by Midhun HP News | Nov 5, 2026 | Latest News, കേരളം
തിരുവനന്തപുരം: ന്യൂനമര്‍ദ്ദമായി ദുര്‍ബലപ്പെട്ട മുറസു ചുഴലിക്കാറ്റിന്റെ സ്വാധീനഫലമായി സംസ്ഥാനത്ത് മഴ മുന്നറിയിപ്പില്‍ മാറ്റം. ഇന്ന് (വ്യാഴാഴ്ച) പത്തനംതിട്ട, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട് ജില്ലകളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യതയുണ്ട്. ജാഗ്രതയുടെ ഭാഗമായി ഈ ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചു.
നാളെ (വെള്ളിയാഴ്ച) പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയാണ് കാലാവസ്ഥ വകുപ്പ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. ശനിയാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലും ഞായറാഴ്ച ഇടുക്കി ജില്ലയിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. മഴയ്‌ക്കൊപ്പം ഇടിമിന്നലിനും സാധ്യതയുള്ളതിനാല്‍ ജാഗ്രത പാലിക്കണമെന്നും മുന്നറിയിപ്പില്‍ പറയുന്നു.
by Midhun HP News | Nov 5, 2026 | Latest News, കേരളം
കൊച്ചി: ചേരാനെല്ലൂര്‍ വാഹനാപകടക്കേസില്‍ പതിനേഴുകാരന്റെ പിതാവായ ജഡ്ജിക്ക് ഹൈക്കോടതി മുന്‍കൂര്‍ ജാമ്യം അനുവദിച്ചു. മൂന്ന് കാര്യങ്ങള്‍ ചൂണ്ടിക്കാട്ടിയാണ് ജസ്റ്റിസ് കൗസര്‍ എടപ്പഗത്ത് അഡീഷണല്‍ ജില്ലാ ജഡ്ജിക്ക് മുന്‍കൂര്‍ ജാമ്യം അനുവദിച്ചത്. അപകടത്തിന് ഇടയാക്കിയ വാഹനം കസ്റ്റഡിയില്‍ എടുത്തിട്ടുണ്ട്. മറ്റ് തെളിവുകള്‍ ഫോറന്‍സിക് പരിശോധനയ്ക്ക് അയച്ചിട്ടുണ്ട്. അന്വേഷണവുമായി പ്രതി സഹകരിക്കുന്നില്ലെന്ന വാദം പ്രോസിക്യൂഷനില്ല. ഈ സാഹചര്യത്തില്‍ കേസില്‍ പ്രതിയായ ജഡ്ജിക്ക് മുന്‍കൂര്‍ ജാമ്യം അനുവദിക്കുന്നുവെന്ന് കോടതി വ്യക്തമാക്കി.
ജഡ്ജിക്ക് ജാമ്യം നല്‍കരുതെന്ന് ആവശ്യപ്പെട്ട് പതിനാറുപേജുള്ള മറുപടിയാണ് പ്രോസിക്യൂഷന്‍ കോടതിയില്‍ സമര്‍പ്പിച്ചത്. പതിനാലുപേജുള്ള മറുപടി അപകടത്തില്‍ മരിച്ച ജയബാലകൃഷ്ണന്റെ കുടുംബവും സമര്‍പ്പിച്ചിരുന്നു. എല്ലാ കേസിലും ഇത്തരത്തില്‍ എത്രപേര്‍ക്ക് എതിരെ നരഹത്യാക്കുറ്റം ചുമത്തിയിട്ടുണ്ടെന്ന ചോദ്യവും കോടതിയുടെ ഭാഗത്തുനിന്നുണ്ടായി. ഇത് എങ്ങനെയാണ് ഒരുപ്രത്യേക കേസ് ആകുന്നത്?. ഈ കേസില്‍ സര്‍ക്കാരിന് എന്താണ് ഇത്ര താത്പര്യം. സാമൂഹിക മാധ്യമങ്ങള്‍ സൃഷ്ടിക്കുന്ന പ്രതിസന്ധിയാണോ മുന്‍കൂര്‍ ജാമ്യം നല്‍കരുതെന്ന് പറയാനുള്ള കാരണമെന്നും കോടതി ചോദിച്ചു.
ജില്ലാ ജഡ്ജി അന്വേഷണവുമായി സഹകരിക്കുന്നുണ്ടല്ലോ. കസ്റ്റഡിയില്‍ എടുത്തുള്ള ചോദ്യം ചെയ്യല്‍ അനിവാര്യമാണെങ്കില്‍ അത് നല്‍കുമെന്നും കോടതി പറഞ്ഞു. എന്നാല്‍ ഈ കേസില്‍ അതിന്റെ ആവശ്യമില്ലെന്നും അതിനാല്‍ മുന്‍കൂര്‍ ജാമ്യം നല്‍കുമെന്നും ഹൈക്കോടതി വ്യക്തമാക്കി.
by Midhun HP News | Nov 5, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില വീണ്ടും കൂടി. ഇന്ന് പവന് ഒറ്റയടിക്ക് 2360 രൂപയാണ് വര്‍ധിച്ചത്. 1,07,080 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 295 രൂപയാണ് വര്‍ധിച്ചത്. 13,385 രൂപയാണ് ഒരു ഗ്രാം സ്വര്‍ണത്തിന്റെ വില. ഇന്നലെ രണ്ടുതവണയായി 2320 രൂപയാണ് വര്‍ധിച്ചത്.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിച്ചത്. എണ്ണവില ബാരലിന് നൂറ് ഡോളറില്‍ താഴെയാണ്. അമേരിക്കന്‍ തെരഞ്ഞെടുപ്പ് ഫലമാണ് സ്വര്‍ണത്തെ സ്വാധീനിച്ച മറ്റൊരു പ്രധാന ഘടകം. തെരഞ്ഞെടുപ്പില്‍ അമേരിക്കന്‍ പ്രസിഡന്റ് ഡോണള്‍ഡ് ട്രംപിന് തിരിച്ചടിയേറ്റതോടെ ഡോളര്‍ ദുര്‍ബലമായതും ബോണ്ട് യീല്‍ഡ് കുറഞ്ഞതുമാണ് സ്വര്‍ണത്തിന് കരുത്തായത്. രണ്ടുദിവസത്തിനിടെ ഏകദേശം 5000 രൂപയാണ് വര്‍ധിച്ചത്.
യുഎസ്- ഇറാന്‍ യുദ്ധം അവസാനിപ്പിക്കുന്നതിനുള്ള ചര്‍ച്ചകള്‍ ലോകം ഉറ്റുനോക്കുകയാണ്. അമേരിക്കന്‍ തെരഞ്ഞെടുപ്പ് ഫലം യുദ്ധം അവസാനിപ്പിക്കാന്‍ സഹായകമാകുമെന്നാണ് വിലയിരുത്തല്‍. ചര്‍ച്ച വിജയിച്ചാല്‍ ആഗോള സമ്പദ് വ്യവസ്ഥ തിരിച്ചുവരാന്‍ ഇടയാക്കും.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Nov 5, 2026 | Latest News, കേരളം
പാലക്കാട്: കെഎസ്ആർടിസിയുടെ ‘പ്രിയദർശിനി’ പദ്ധതി പാലക്കാട് ജില്ലയിൽ വിജയകരമായി മുന്നേറുന്നു. പദ്ധതി ആരംഭിച്ച് 142 ദിവസം പിന്നിടുമ്പോൾ ജില്ലയിൽ ആകെ 62,08,613 സീറോ ടിക്കറ്റുകളാണ് വിതരണം ചെയ്തിരിക്കുന്നത്. നവംബർ രണ്ട് വരെയുള്ള കണക്കുകൾ പ്രകാരമാണിത്. ജനങ്ങൾക്കിടയിൽ പദ്ധതിക്ക് വലിയ സ്വീകാര്യതയാണ് ലഭിച്ചുകൊണ്ടിരിക്കുന്നത് എന്നത് വ്യക്തമാക്കുന്നതാണ് ഈ കണക്കുകൾ.
വടക്കഞ്ചേരി, മണ്ണാർക്കാട്, പാലക്കാട്, ചിറ്റൂർ എന്നിങ്ങനെ ജില്ലയിലെ നാല് യൂണിറ്റുകൾ കേന്ദ്രീകരിച്ചാണ് പദ്ധതിയുടെ പ്രവർത്തനം കാര്യക്ഷമമായി നടപ്പിലാക്കുന്നത്. ഇതിൽ പാലക്കാട് യൂണിറ്റിലാണ് ഏറ്റവും കൂടുതൽ പേർ സീറോ ടിക്കറ്റുകൾ പ്രയോജനപ്പെടുത്തിയത്—2,63,29,71 പേർ. ചിറ്റൂരിൽ 10,53,905 പേരും വടക്കഞ്ചേരിയിൽ 13,29,593 പേരും മണ്ണാർക്കാടിൽ 11,92,144 പേരുമാണ് സീറോ ടിക്കറ്റുകൾ ഉപയോഗിച്ചത്.
സീറോ ടിക്കറ്റ് സംവിധാനം വഴി ഇതുവരെ 18,96,85,714 രൂപയാണ് ആകെ വരുമാനമായി കെഎസ്ആർടിസിക്ക് ലഭിച്ചിട്ടുള്ളത്. യൂണിറ്റ് തിരിച്ച് കണക്കാക്കുമ്പോൾ പാലക്കാട് യൂണിറ്റിൽ നിന്ന് 9,02,90,037 രൂപയും, ചിറ്റൂരിൽ നിന്ന് 3,22,89,296 രൂപയും, വടക്കഞ്ചേരിയിൽ നിന്ന് 3,78,98,740 രൂപയും, മണ്ണാർക്കാടിൽ നിന്ന് 2,92,07,641 രൂപയും വരുമാനമായി നേടിയെന്ന് അധികൃതർ അറിയിച്ചു. പൊതുഗതാഗതത്തെ കൂടുതൽ ജനകീയമാക്കുന്നതിൽ പ്രിയദർശിനി പദ്ധതി നിർണ്ണായക പങ്കുവഹിക്കുന്നുണ്ടെന്നാണ് ഈ കണക്കുകൾ വ്യക്തമാക്കുന്നത്.
by Midhun HP News | Nov 5, 2026 | Latest News, ജില്ലാ വാർത്ത
ലോസാഞ്ചലസ്: തിരുവനന്തപുരത്ത് ജനിച്ച നിത്യ രാമന്‍ ലോസാഞ്ചലസ് മേയര്‍ തെരഞ്ഞെടുപ്പില്‍ ചരിത്ര വിജയം നേടി. നിലവിലെ മേയര്‍ കാരെന്‍ ബാസിനെ പരാജയപ്പെടുത്തിയാണ് നിത്യ ലോസാഞ്ചലസിന്റെ മേയറാകുന്ന ആദ്യ ഏഷ്യന്‍-അമേരിക്കന്‍ വനിതയെന്ന ചരിത്രനേട്ടം സ്വന്തമാക്കിയത്. യുഎസിലെ രണ്ടാമത്തെ വലിയ നഗരമായ ലോസാഞ്ചലസ് നഗരത്തിന്റെ പരമോന്നത ഭരണപദവിയിലെത്തുന്ന രണ്ടാമത്തെ വനിതകൂടിയാണിവര്‍.
ഡിസിഷന്‍ ഡെസ്‌ക് എച്ച് ക്യു പുറത്തുവിട്ട കണക്കുകള്‍ പ്രകാരം, 51.1 ശതമാനം വോട്ടുകളാണ് നിത്യ നേടിയത്. എന്നാല്‍ കാരെന്‍ ബാസിന് 48.33 വോട്ടുകളെ നേടാന്‍ സാധിച്ചുള്ളു. ആറു വര്‍ഷത്തോളമായി ഡിസ്ട്രിക് 4നെ പ്രതിനിധീകരിക്കുന്ന ലൊസാഞ്ചലസ് സിറ്റി കൗണ്‍സില്‍ അംഗമാണ് നിത്യ. സിറ്റി കൗണ്‍സിലില്‍ സേവനമനുഷ്ഠിക്കുന്ന ആദ്യത്തെ ഏഷ്യന്‍-അമേരിക്കന്‍ വനിതയും ആദ്യത്തെ ദക്ഷിണേഷ്യന്‍ വംശജയുമാണ്.
കലിഫോര്‍ണിയയില്‍ അര്‍ബന്‍ പ്ലാനര്‍ കൂടിയായ നിത്യ, ഭവനരഹിതരുടെ പ്രതിസന്ധി പരിഹരിക്കാനായാണ് രാഷ്ട്രീയത്തില്‍ ഇറങ്ങിയത്. നഗരത്തിലെ ഉയര്‍ന്ന ജീവിതച്ചെലവ്, ജനങ്ങളുടെ അടിസ്ഥാന ആവശ്യങ്ങള്‍ എന്നിവ മുന്‍ നിര്‍ത്തി നടത്തിയ പ്രചാരണമാണ് നിത്യയ്ക്ക് യുവ വോട്ടര്‍മാര്‍ക്കിടയില്‍ മികച്ച പിന്തുണ കിട്ടാന്‍ കാരണമായത്. 2028ല്‍ നടക്കുന്ന ഒളിമ്പിക്‌സിന് ലോസാഞ്ചലസ് നഗരം ആതിഥേയത്വം വഹിക്കാനിരിക്കെയാണ് ഭരണനേതൃത്വത്തിലേയ്ക്ക് നിത്യ രാമന്‍ എത്തുന്നത്.
കേരളവുമായുള്ള ബന്ധം:
1981 ജൂലൈ 28ന് തിരുവനന്തപുരത്താണ് നിത്യ രാമന്റെ ജനനം. നഗരത്തിലെ കോട്ടയ്ക്കകത്ത് രാമസ്വാമി കോവില്‍തെരുവിലാണ് നിത്യയുടെ കുടുംബം പതിറ്റാണ്ടുകള്‍ക്ക് മുന്‍പ് കഴിഞ്ഞിരുന്നത്. കെല്‍ട്രോണിക്‌സിലെ ഉദ്യോഗസ്ഥനായിരുന്ന ആര്‍. വെങ്കട്ടരാമനും ഇന്ത്യന്‍ ഓവര്‍സീസ് ബാങ്ക് ജീവനക്കാരിയായിരുന്ന സുധയുമാണ് മാതാപിതാക്കള്‍. തിരുവനന്തപുരത്തുള്ള കുടുംബവീട് നേരത്തേ വിറ്റുപോയി. കുടുംബാംഗങ്ങളാരും കോട്ടയ്ക്കകത്ത് താമസമില്ല. നിത്യയ്ക്ക് ആറു വയസ്സുള്ളപ്പോഴാണ് ഈ തമിഴ് കുടുംബം അമേരിക്കയിലെ ലൂസിയാനയിലേക്ക് കുടിയേറിയത്.
ഹാര്‍വാര്‍ഡ് സര്‍വകലാശാലയിലും എംഐടിയിലും പഠനം പൂര്‍ത്തിയാക്കി. 2020ല്‍ സിറ്റി കൗണ്‍സില്‍ തെരഞ്ഞെടുപ്പില്‍ വിജയിച്ചു. 2024ലും വിജയം ആവര്‍ത്തിച്ചു. തമിഴ് വംശജനും തിരക്കഥാകൃത്തുമായ വാലി ചന്ദ്രശേഖരനാണ് നിത്യയുടെ ഭര്‍ത്താവ്. ഇരട്ടക്കുട്ടികളായ കര്‍ണനും കാവേരിക്കുമൊപ്പം സില്‍വര്‍ലേക്കിലാണ് നിത്യയും കുടുംബവും ഇപ്പോള്‍ താമസിക്കുന്നത്.
Recent Comments