എസ് വൈ എസ് ജില്ലാ പ്ലാറ്റിനം സഫറിന് ഉജ്ജല തുടക്കം

by Midhun HP News | Nov 16, 2024 | Latest News

തിരുവനന്തപുരം: ഉത്തരവാദിത്തം മനുഷ്യപറ്റിന്റെ രാഷ്ട്രീയം എന്ന പ്രമേയത്തിൽ എസ് വൈ എസ് പ്ലാറ്റിനം ഇയറിന്റെ ഭാഗമായി ജില്ലാ കമ്മിറ്റി സംഘടിപ്പിക്കുന്ന പ്ലാറ്റിനം സഫറിന് ഉജ്ജല തുടക്കം. മൂന്ന് ദിവസങ്ങളിലായി നടക്കുന്ന യാത്രയിൽ 50 സ്വീകരണ കേന്ദ്രങ്ങളിൽ പ്ലാറ്റിനം ഇയർ സന്ദേശങ്ങളും, പ്രമേയ പ്രഭാഷണങ്ങളും നടക്കും.

എസ് വൈ എസ് ജില്ലാ പ്രസിഡന്റ് മുഹമ്മദ് ഷരീഫ് സഖാഫി എഴിപ്പുറം നയിക്കുന്ന യാത്രയുടെ ഉദ്ഘാടന സമ്മേളനം വർക്കല മുനിസിപ്പൽ പാർക്കിൽ കേരളാ മുസ്‌ലിം ജമാഅത്ത് ജില്ലാ പ്രസിഡൻ്റ് ആലംകോട് ഹാഷിം ഹാജിയുടെ അധ്യക്ഷതയിൽ സ്വാഗത സംഘം ചെയർമാൻ അബ്ദുൽ സലാം അഹ്സനിയുടെ പ്രാർത്ഥനയോടെ
എസ് വൈ എസ് സംസ്ഥാന സെക്രട്ടറി നേമം സിദ്ദീഖ് സഖാഫി ഉദ്ഘാടനം ചെയ്തു. ഷറഫുദ്ദീൻ പോത്തൻകോട് പ്രമേയ പ്രഭാഷണം നടത്തി. സമസ്ത ജില്ലാ സെക്രട്ടറി ജാബിർ ഫാളിലി, എസ് വൈ എസ് ജില്ലാ സെക്രട്ടറി സനൂജ് വഴിമുക്ക്,എസ് ജെ എം ജില്ലാ പ്രസിഡൻ്റ് സാബിർ സൈനി, എസ് എസ് എഫ് സെക്രട്ടറി അബ്ദുല്ല ഫാളിലി,സയ്യിദ് ഹുസൈൻ ബാഫഖി, ഖലീൽ ലത്വീഫി എന്നിവർ ആശംസകൾ അർപ്പിച്ചു. സോൺ പ്രസിഡൻ്റ് അനീസ് സഖാഫി സ്വാഗതവും, സെക്രട്ടറി നൗഫൽ മദനി നന്ദിയും പറഞ്ഞു. ശേഷം ചിലക്കൂർ മലപ്പുറം വലിയുല്ലാഹിയുടെ മഖാം സിയാറത്തിന് സയ്യിദ് മുഹമ്മദ് ജൗഹരി നേതൃത്വം നൽകി.

വെള്ളിയാഴ്ച രാവിലെ എട്ട് മണിക്ക് പള്ളിക്കലിൽ നിന്ന് ആരംഭിക്കുന്ന പ്രയാണം കല്ലമ്പലം, കിളിമാനൂർ, ആലംകോട്,മോഹനപുരം, പോത്തൻകോട്, കണിയാപുരം എന്നിവിടങ്ങളിലെ പര്യടനങ്ങൾക്ക് ശേഷം പെരുമാതുറ സിറ്റിയിൽ നടക്കുന്ന പൊതുസമ്മേളനത്തിൽ ഹാമിദ് യാസീൻ ജൗഹരി അൽമദനിയുടെ മുഖ്യപ്രഭാഷണത്തോടെ സമാപിക്കും.

ശനിയാഴ്ച രാവിലെ ഒമ്പത് മണിക്ക് പെരിങ്ങമ്മല നിന്നാരംഭിക്കുന്ന പര്യടനം തൊളിക്കോട്,നെടുമങ്ങാട് മാർക്കറ്റ് ജംഗ്ഷൻ, വാളിക്കോട്, പൂവച്ചൽ, വിളപ്പിൽശാല, വള്ളക്കടവ് എന്നിവിടങ്ങളിലെ പര്യടനങ്ങൾ കഴിഞ്ഞ് ബീമാപള്ളിയിൽ നടക്കുന്ന പൊതുസമ്മേളനത്തിൽ വെള്ളൂർ സിദ്ദീഖ് അഹ്സനിയുടെ മുഖ്യപ്രഭാഷണത്തോടെ സമാപിക്കും. ഞായറാഴ്ച രാവിലെ ഒമ്പത് മണിക്ക് കാരയ്ക്കാമണ്ഡപത്ത് നിന്നാരംഭിക്കുന്ന യാത്ര വഴിമുക്ക്, ഇടിച്ചക്കപ്ലാമൂട്, പാറശ്ശാല, കളിയിക്കാവിള,പൊഴിയൂർ, പൂവാർ എന്നിവിടങ്ങളിലെ പര്യടനങ്ങൾക്ക് ശേഷം വിഴിഞ്ഞത്ത് നടക്കുന്ന സമാപന സമ്മേളനം സമസ്ത കേന്ദ്ര മുശാവറ അംഗം വിഴിഞ്ഞം അബ്ദുൽ റഹ്മാൻ സഖാഫി ഉദ്ഘാടനം ചെയ്യും.

ജില്ലാ എക്‌സിക്യുട്ടീവ് അംഗങ്ങളോടൊപ്പം പ്ലാട്യൂൺ ജില്ലാ ചീഫ് മുഹമ്മദ് ഷാഫിയുടെ നേതൃത്വത്തിൽ മുപ്പത്തി മൂന്നംഗ പ്ലാറ്റ്യൂൺ അംഗങ്ങളും യാത്രയിലെ സ്ഥിരാംഗങ്ങളാണ്. സമസ്ത, കേരള മുസ്ലിം ജമാഅത്ത്, എസ് എസ് എഫ്, എസ് ജെ എം, എസ് എം എ നേതാക്കൾ വിവിധ സ്വീകരണ കേന്ദ്രങ്ങളിൽ സംബന്ധിക്കും.

ലോറി തട്ടി ടെക്‌നോപാര്‍ക്ക് സോഫ്റ്റ് വെയര്‍ എന്‍ജിനീയര്‍ മരിച്ചു

by Midhun HP News | Nov 16, 2024 | Latest News

തിരുവനന്തപുരം: കോണ്‍ക്രീറ്റ് മിക്‌സിങ് ലോറി തട്ടിയുണ്ടായ അപകടത്തില്‍ ടെക്‌നോപാര്‍ക്ക് സോഫ്റ്റ് വെയര്‍ എന്‍ജിനീയര്‍ മരിച്ചു. കാര്യവട്ടം തുണ്ടത്തില്‍ നവോദയ നഗറില്‍ ടിസി 2404ല്‍ മുഹമ്മദ് അഷറഫ് അലി (36) ആണ് മരിച്ചത്. മൃതദേഹം സ്വകാര്യ ആശുപത്രി മോര്‍ച്ചറിയിലാണ്.

ഇന്നലെ രാവിലെ 10.30 ന് ശ്രീകാര്യം ജംക്ഷനു സമീപം വച്ചായിരുന്നു അപകടം. ടെക്‌നോപാര്‍ക്ക് അലയന്‍സ് കമ്പനിയിലെ എന്‍ജിനിയറായ മുഹമ്മദ് അഷറഫ് അലി ശ്രീകാര്യത്തുള്ള ഫിസിയോ തെറാപ്പിസ്റ്റിനെ കാണാന്‍ സ്‌കൂട്ടറില്‍ പോകവേ മറ്റൊരു വാഹനത്തിനു സൈഡ് കൊടുക്കാനായി വെട്ടി തിരിക്കുമ്പോള്‍ നിയന്ത്രണം വിട്ട് സ്‌കൂട്ടര്‍ ലോറിയുടെ അടിയില്‍പ്പെട്ടു. നാട്ടുകാര്‍ ആശുപത്രിയില്‍ എത്തിച്ചെങ്കിലും ഉച്ചയോടെ മരിച്ചു. അജീമിന്റെയും പരേതനായ ബഷീര്‍ മുഹമ്മദിന്റെയും മകനാണ്. പാലക്കാട് സ്വദേശിയായ മുഹമ്മദ് അഷറഫ് അലി ഏറെ കാലമായി കാര്യവട്ടത്താണ് താമസം. ടെക്‌നോപാര്‍ക്കിലെ ടാറ്റ ഇലക്‌സി യിലെ സോഫ്റ്റ് വയര്‍ എന്‍ജിനീയര്‍ റഹ്മത്ത് ആണ് ഭാര്യ ‘മകന്‍ 9 മാസം പ്രായമുള്ള റാഹില്‍.

അവസാന വേഷമെന്ന് അറിഞ്ഞില്ല, കാണികളെ ആര്‍ത്തു ചിരിപ്പിച്ച് അവര്‍ ചുരമിറങ്ങി, അഞ്ജലിയും ജെസിയും ഇരുന്നത് മുൻസീറ്റിൽ

by Midhun HP News | Nov 16, 2024 | Latest News

കണ്ണൂർ: കടന്നപ്പള്ളി തെക്കെക്കരയിൽ കൂടിയ കാണികൾക്ക് മുന്നിൽ വനിതാ മെസ്സിലെ കഥാപാത്രങ്ങളായി ആടിത്തീർക്കുമ്പോൾ അഞ്ജലിയും ജെസി മോഹനനും അറിഞ്ഞിരുന്നില്ല ഇത് അവരുടെ അവസാന വേഷങ്ങളായിരിക്കുമെന്ന്. വ്യാഴാഴ്ച രാത്രി കടന്നപ്പള്ളി തെക്കെക്കര റെഡ് സ്റ്റാറിൻ്റെ നാടകോത്സവത്തിലാണ് വനിതാ മെസ് എന്ന നാടകം അവതരിപ്പിച്ചത്.

രാത്രി 7.30നാണ് തെക്കെക്കരയിൽ നാടകം തുടങ്ങിയത്. വൻ ജനാവലിയാണ് കായങ്കുളം ദേവ കമ്യുണിക്കേഷൻസ് അവതരിപ്പിച്ച നാടകം കാണാനായി തെക്കെക്കരയിലെത്തിയത്. രാജീവൻ മമ്മിളി സംവിധാനം ചെയ്ത കോമഡിക്ക് പ്രാധാന്യം നൽകിയ ഈ നാടകം കോമഡിക്ക് പ്രാധാന്യം നൽകിയുള്ളതായിരുന്നു. വനിതാ ശാക്തീകരണവും പുരുഷ മേധാവിത്വവും തമ്മിലുള്ള ഏറ്റുമുട്ടലുകളും സഹിക്കാനും പൊറുക്കാനുള്ളവയുമാണ് കുടുംബ ബന്ധങ്ങൾ എന്ന ആശയം വിളംബരം ചെയ്യുന്നതായിരുന്നു. ഒന്നിച്ചു ജീവിക്കുന്നവർ വേർപിരിയേണ്ടത് മരണത്തിലൂടെ മാത്രമാണ് എന്ന സന്ദേശം നൽകിയാണ് വനിതാ മെസ് നാടകം അവസാനിക്കുന്നത്.

പത്തുമണിയോടെ അവസാനിച്ച നാടകത്തിന് ശേഷം സംഘാടകർ നൽകിയ ഭക്ഷണവും കഴിച്ചാണ് പതിനൊന്നരയോടെ നാടക സംഘം വെള്ളിയാഴ്ച നാടകം അവതരിപ്പിക്കേണ്ട സുൽത്താൻബത്തേരിയിലേക്ക് തിരിച്ചത്. കേളകം മലയാം പാടിയിൽ നാടക സംഘം സഞ്ചരിച്ച മിനി ബസ് മറിഞ്ഞുണ്ടായ അപകടത്തിന് കാരണമായത് വഴിയെ കുറിച്ച് യാതൊരു പരിചയമില്ലാത്തതും രാത്രി ഏറെ വൈകിയുള്ളയാത്രയുമാണ്‌. നിടുംപൊയിൽ -പേര്യ ചുരം വഴിയുള്ള യാത്ര റോഡിൽ ഗർത്തങ്ങൾ ഉണ്ടായതിനെ തുടർന്ന് നിരോധിച്ചതിനാൽ ബോയ്സ് ടൗൺ വഴിയാണ് വയനാട്ടിലേക്ക് വാഹനങ്ങൾ പോയിരുന്നത്. ഏലപ്പീടിക വഴി ചെറു വാഹനങ്ങൾക്ക് മാത്രം പോകാനാവുന്ന മറ്റൊരു റോഡിലുടെ എത്താനാണ് ഇവർ ശ്രമിച്ചത്. ഗൂഗിൾ മാപ്പ് പറഞ്ഞു കൊടുത്ത എളുപ്പവഴിയായിരുന്നു ഇത്.

രാത്രിയിൽ ​ഗൂ​ഗിൾ മാപ്പിന്റെ നിർദേശങ്ങൾക്കനുസരിച്ച് സ്റ്റിയറിങ് തിരിച്ച ഡ്രൈവർ അറിഞ്ഞിരുന്നില്ല മുന്നിൽ കാത്തിരുന്ന അപകടം. ആഴമുള്ള താഴ്ച്ചയിലേക്ക് ബസ് നിയന്ത്രണം വിട്ട് വീഴുകയായിരുന്നു. മുൻ സീറ്റിലിരിക്കുകയായിരുന്ന അഞ്ജലിയും ജെസി മോഹനനുമാണ് മരിച്ചത്. വേദിയിൽ നിന്ന് വേദിയിലേക്കുള്ള നാടക അവതരണത്തിൽ നിന്നും ലഭിക്കുന്ന തുച്ഛമായ തുക കൊണ്ടാണ് ഇവർ കുടുംബം നോക്കിയിരുന്നത്. മരണപ്പെട്ട അഞ്ജലിക്ക് ഒരു കുഞ്ഞുണ്ട്. ജെസിയുടെ ഭർത്താവ് അടുത്തിടെയാണ് മരിച്ചത്. രണ്ടു കുടുംബത്തിനും തീരാ നഷ്ടമായിരിക്കുകയാണ് കലാകാരികളുടെ വിയോഗം.

ഹോസ്റ്റൽ കെട്ടിടത്തിന്റെ മുകളിൽ നിന്ന് വീണ് നഴ്സിങ് വിദ്യാർഥിനി മരിച്ചു

by Midhun HP News | Nov 16, 2024 | Latest News

പത്തനംതിട്ട: ഹോസ്റ്റൽ കെട്ടിടത്തിന്റെ മുകളിൽനിന്നു വീണു പരിക്കേറ്റ നഴ്സിങ് വിദ്യാർഥിനി മരിച്ചു. തിരുവനന്തപുരം അയിരൂർപാറ രാമപുരത്തുപൊയ്ക ശിവം വീട്ടിൽ സജീവ്, രാധാമണി ദമ്പതികളുടെ മകൾ അമ്മു സജീവ് (21) ആണ് മരിച്ചത്. ഇന്നലെ വൈകിട്ടാണു സംഭവം.

ചുട്ടിപ്പാറ ഗവ നഴ്സിങ് കോളജിലെ 4ാം വർഷ വിദ്യാർഥിനിയായിരുന്നു അമ്മു. പത്തനംതിട്ട നഗരത്തിലെ സ്വകാര്യ ഹോസ്റ്റല്‍ കെട്ടിടത്തില്‍ നിന്നാണ് അമ്മു വീണത്. വീഴ്ചയിൽ പരുക്കേറ്റ വിദ്യാർഥിനിയെ പത്തനംതിട്ട ജനറൽ ആശുപത്രിയിലെത്തിച്ചു. തുടർന്ന് തിരുവനന്തപുരം മെഡിക്കൽ കോളജിലേക്ക് കൊണ്ടുവരുന്ന വഴി മരണം സംഭവിക്കുകയായിരുന്നു. സഹോദരൻ: അഖിൽ സജീവ്.

അഞ്ച് മാസത്തെ കാത്തിരിപ്പ്, ശക്തന്‍ പ്രതിമ പുനഃസ്ഥാപിച്ചു

by Midhun HP News | Nov 16, 2024 | Latest News

തൃശൂര്‍: കെഎസ്ആര്‍ടിസി ബസിടിച്ചു തകര്‍ന്ന ശക്തന്‍ പ്രതിമ പുനഃസ്ഥാപിച്ചു. 5 മാസത്തെ കാത്തിരിപ്പിനൊടുവിലാണ് പ്രതിമ തിരികെയെത്തിയത്. പ്രതിമ പീഠത്തില്‍ ഉറപ്പിക്കലും മറ്റു ജോലികളും പൂര്‍ത്തിയാകാന്‍ ഒരു മാസം കൂടി സമയമെടുക്കുമെന്ന് ശില്‍പ്പി കുന്നുവിള മുരളി പറഞ്ഞു.

കെഎസ്ആര്‍ടിസി ബസിടിച്ചു തകര്‍ന്ന ശക്തന്‍ തമ്പുരാന്റെ വെങ്കല പ്രതിമയുടെ അറ്റകുറ്റപ്പണികള്‍ തിരുവനന്തപുരതാണ് പൂര്‍ത്തിയായത്. ശില്‍പി തിരുവനന്തപുരം കേശവദാസപുരം സ്വദേശി കുന്നുവിള മുരളിയാണു പ്രതിമ കേടുപാടുകള്‍ തീര്‍ത്തു നവീകരിച്ചത്. ഇക്കഴിഞ്ഞ ജൂണിലാണു ബസിടിച്ച് പ്രതിമ തകര്‍ന്നത്. പാപ്പനംകോട് സിഡ്കോ ഇന്‍ഡസ്ട്രിയല്‍ എസ്റ്റേറ്റിലാണ് അറ്റകുറ്റപ്പണി പൂര്‍ത്തിയാക്കിയത്.1500 കിലോ ഭാരമുണ്ട്. 19.5 ലക്ഷം രൂപ ചെലവഴിച്ചാണ് പ്രതിമയുടെ കേടുപാടുകള്‍ തീര്‍ത്തത്. 2013ലാണ് ശക്തന്‍ നഗറില്‍ പ്രതിമ സ്ഥാപിച്ചത്.പുനഃസ്ഥാപത്തിന് ശേഷമുള്ള ഔദ്യോഗിക അനാച്ഛാദനം ഉടനെയുണ്ടാവും. പ്രതിമാസ്ഥാപനം വൈകുന്നതില്‍ പ്രതിഷേധിച്ച സുരേഷ് ഗോപി എംപി പതിനഞ്ചു ദിവസത്തെ സമയം നല്‍കിയിരുന്നു. ഇല്ലാത്തപക്ഷം സ്വന്തം ചിലവില്‍ പ്രതിമ സ്ഥാപിക്കുമെന്നും അദ്ദേഹം പറഞ്ഞിരുന്നു.