by liji HP News | Apr 11, 2024 | Latest News, ദേശീയ വാർത്ത
ഡല്ഹി: ന്യൂഡല്ഹി അടക്കം 18 എയിംസ്, പുതുച്ചേരി ജിപ്മെര്, ബംഗളൂരു നിഹാന്സ്, ചണ്ഡിഗഡ് പിജിഐഎംഇആര്, തിരുവനന്തപുരം ശ്രീചിത്ര ഇന്സ്റ്റിറ്റ്യൂട്ട് എന്നീ സ്ഥാപനങ്ങളില് തുടങ്ങുന്ന പിജി കോഴ്സുകളിലേക്കുള്ള പൊതു പ്രവേശന പരീക്ഷയ്ക്ക് അപേക്ഷിക്കാം.
പൊതു പ്രവേശന പരീക്ഷ ഐഎന്ഐ-സിഇടിക്ക് ( ഇന്സ്റ്റിറ്റ്യൂട്ട് ഓഫ് നാഷണല് ഇംപോര്ട്ടന്സ് കംബൈന്ഡ് എന്ട്രന്സ് ടെസ്റ്റ്) നാളെ വൈകീട്ട് അഞ്ചു മണി വരെ ബേസിക് രജിസ്ട്രേഷന് നടത്താം.മെയ് 18 നാണ് പരീക്ഷ. ജൂലൈ ഒന്നിനാണ് കോഴ്സുകള് ആരംഭിക്കുന്നത്. പൂര്ണ വിവരങ്ങള്ക്ക് https://finalmdmsmch.aiimsexams.ac.in
by Midhun HP News | Apr 11, 2024 | Latest News, ദേശീയ വാർത്ത
ന്യൂഡല്ഹി: ഇന്ത്യന് കൗണ്സില് ഓഫ് മെഡിക്കല് റിസര്ച്ചിന്റെ(ഐസിഎംആര്) ട്രയല് റണ്ണിന്റെ ഭാഗമായി ശസ്ത്രക്രിയയ്ക്കിടെ ടിഷ്യു സാമ്പിള് പാത്തോളജിക്കല് പരിശോധനക്കായി ഡ്രോണ് ഉപയോഗിച്ച് എത്തിച്ചു.
ഡ്രോണ് ഉപയോഗിച്ച് 37 കിലോമീറ്റര് ദൂരത്ത് നിന്ന് സാമ്പിള് 16 മിനിറ്റുകൊണ്ട് എത്തിച്ചു. റോഡ് മാര്ഗം 60 മിനിറ്റ് എടുക്കുന്ന സ്ഥാനത്താണ് 16 മിനിറ്റില് സാമ്പിള് എത്തിച്ചത്.
ചികിത്സാ രംഗത്ത് ഡ്രോണ് ഉപയോഗപ്പെടുത്താനുള്ള പദ്ധതിയുടെ ഭാഗമായിട്ടായിരുന്നു ഐസിഎംആര് ട്രയല് റണ് നടത്തിയത്. കാര്ക്കളയിലെ ഡോ.ടി.എം.എ പൈ ഹോസ്പിറ്റലിലെ രോഗിയില് നിന്ന് ശസ്ത്രക്രിയയിലൂടെ പുറത്തെടുത്ത ഇന്ട്രാ ഓപ്പറേറ്റീവ് സര്ജിക്കല് ബയോസ്പെസിമന് കസ്തൂര്ബ മെഡിക്കല് കോളജിലെ ലാബിലേക്ക് എത്തിക്കുകയായിരുന്നു.
by liji HP News | Apr 10, 2024 | Latest News, ദേശീയ വാർത്ത
സൗദിയിൽ വധശിക്ഷയ്ക്ക് വിധിക്കപ്പെട്ട് തടവിൽ കഴിയുന്ന കോഴിക്കോട് സ്വദേശി അബ്ദുറഹീമിനായി കൈകോർത്ത് നാട്. റഹീമിന് മുന്നിലുള്ളത് വെറും 6 നാൾ മാത്രമാണ്. ഇതിനോടകം റഹീമിനമായി 13 കോടി രൂപ സ്വരൂപിച്ചിട്ടുണ്ട്. ഇനി വേണ്ടത് 21 കോടി രൂപയാണ്. ഏപ്രിൽ 16ന് അകം 34 കോടി രൂപയാണ് റഹീമിനായി നൽകേണ്ടത്. ഭീമമായ ഈ തുക കണ്ടെത്താനുള്ള നെട്ടോട്ടത്തിലാണ് അബ്ദുറഹീമിന്റെ കുടുംബവും നാട്ടുകാരും.
മകൻ തിരിച്ചുവരുമെന്ന പ്രതീക്ഷയിൽ കാത്തിരിക്കുകയാണ് അബ്ദുറഹീമിന്റെ മാതാവ് ഫാത്തിമ. മോചന തുകയിൽ 10 ശതമാനം പോലും ഇതുവരെ സ്വരൂപിക്കാൻ സാധിച്ചിട്ടില്ല. നാട്ടുകാർ ഒത്തുചേർന്ന് കൂടുതൽ പണം കണ്ടെത്താൻ ശ്രമം നടത്തുന്നുണ്ടെങ്കിലും അതും മതിയാവില്ല. സുമനസ്സുകളുടെ സഹായം ലഭിച്ചാൽ മാത്രമെ അബ്ദുറഹീമിന് ജീവിതത്തിലേക്കുള്ള തിരിച്ചുവരവ് സാധ്യമാകൂ.
അപ്പീൽ കോടതിയിൽ നിന്നു അന്തിമ വിധി വരുന്നതിന് മുമ്പ് 15 ദശലക്ഷം റിയാൽ നഷ്ടപരിഹാരമായി നൽകിയാൽ മാപ്പ് നാൽകാമെന്ന് സൗദി കുടുംബം റിയാദിലെ സാമൂഹിക പ്രവർത്തകനായ അഷ്റഫ് വെങ്ങാട്ടിനെ അറിയിക്കുകയായിരുന്നു. ഇതോടെയാണ് അബ്ദുറഹീമിനെ രക്ഷിക്കാനുള്ള ഇടപെടലുകളിലേക്ക് സുഹൃത്തുക്കളും നാട്ടുകാരും കടന്നത്.
by liji HP News | Apr 10, 2024 | Latest News, ദേശീയ വാർത്ത
ഡല്ഹി: ഇന്ന് ഓണ്ലൈന് ബാങ്കിങ് ചെയ്യാത്തവര് ചുരുക്കമായിരിക്കും. സുരക്ഷിതമായി ഓണ്ലൈന് ബാങ്കിങ് നിര്വഹിച്ചില്ലായെങ്കില് ഹാക്കര്മാര് പണം തട്ടിയെടുത്തെന്ന് വരാം. പാസ് വേര്ഡും സ്വകാര്യ വിവരങ്ങളും അപരിചിതരുമായി പങ്കുവെയ്ക്കരുതെന്നും ശരിയായ ഉറവിടത്തില് നിന്നല്ലാതെ ബാങ്കിങ് ആപ്പുകള് ഡൗണ്ലോഡ് ചെയ്യരുതെന്നും സ്ഥിരമായി പറയുന്ന കാര്യമാണ്. ഇക്കാര്യങ്ങള് ഇടപാടുകാര് ശ്രദ്ധിച്ച് തുടങ്ങിയതോടെ പണം തട്ടാന് പുതുവഴികള് തേടുകയാണ് ഹാക്കര്മാര്. ഇപ്പോള് പുതിയ തട്ടിപ്പുകളില് വീഴാതിരിക്കാന് മാര്ഗനിര്ദേശവുമായി രംഗത്തുവന്നിരിക്കുകയാണ് എച്ച്ഡിഎഫ്സി ബാങ്ക്.
1. ആവശ്യമില്ലാത്ത സമയത്ത് ഫോണില് ബ്ലൂടൂത്ത് ഓഫ് ആണെന്ന് ഉറപ്പ് വരുത്തണം. അല്ലാത്തപക്ഷം ഫോണില് നുഴഞ്ഞുകയറാന് ഹാക്കര്മാര്ക്ക് അത് അവസരമാകുമെന്ന് മുന്നറിയിപ്പില് പറയുന്നു
2. ബാങ്കിങ് ആപ്പുകള് ഉപയോഗിച്ച് കഴിഞ്ഞാല് ലോഗ് ഔട്ട് ചെയ്യാന് മറക്കരുത്. പലരും ഇത് ശ്രദ്ധിക്കാറില്ല. ലോഗ് ഔട്ട് ചെയ്യാതെ ആപ്പ് ക്ലോസ് ചെയ്യുന്നത് സുരക്ഷാഭീഷണി സൃഷ്ടിക്കുന്നതായി മുന്നറിയിപ്പില് പറയുന്നു.
3. പബ്ലിക് വൈ ഫൈ നെറ്റ് വര്ക്കുകള് ഹാക്കര്മാരുടെ സ്വര്ഗമായാണ് കണക്കാക്കുന്നത്. എയര്പോര്ട്ട് അടക്കമുള്ള പൊതുസ്ഥലങ്ങളില് വൈ ഫൈ ഉപയോഗിച്ച് ഇന്റര്നെറ്റ് ഉപയോഗിക്കുമ്പോള് ഒരു കാരണവശാലും ബാങ്കിങ് ആപ്പുകള് ഉപയോഗിക്കരുത്. ഹാക്കര്മാര് നുഴഞ്ഞുകയറി ബാങ്ക് അക്കൗണ്ട് വിവരങ്ങള് ചോര്ത്താനുള്ള സാധ്യത എല്ലായ്പ്പോഴും ഓര്മ്മ വേണം.
4. ഓരോ ആപ്പിനും വ്യത്യസ്ത പിന് നല്കുന്നതും സുരക്ഷയ്ക്ക് നല്ലതാണ്. എല്ലാത്തിനും ഒരു പിന് തന്നെ നല്കുന്നത് ഹാക്കര്മാര്ക്ക് കാര്യങ്ങള് കൂടുതല് എളുപ്പമാക്കും. ഫോണ് ദുരുപയോഗം ചെയ്യുന്നത് ഒഴിവാക്കാന് ഓരോ ആപ്പിനും വ്യത്യസ്ത പിന് നമ്പര് നല്കാന് ശീലിക്കുക.
5. ഫോണിന് കേടുപാടുകള് സംഭവിച്ചാല് ബാങ്കിങ് ആപ്പുകള് അണ്ഇന്സ്റ്റാള് ചെയ്ത ശേഷം മാത്രം സര്വീസ് സെന്ററില് നല്കുക. എല്ലായ്പ്പോഴും ഇത് എളുപ്പമാകണമെന്നില്ല. എങ്കിലും ഹാക്കര്മാരുടെ ആക്രമണത്തില് നിന്ന് രക്ഷപ്പെടാന് ഇത് ചെയ്യാന് മറക്കരുതെന്നും മുന്നറിയിപ്പില് പറയുന്നു.
by liji HP News | Apr 9, 2024 | Latest News, ദേശീയ വാർത്ത
ഡല്ഹി: ആന്ഡ്രോയിഡ് ഉപയോക്താക്കള്ക്ക് സന്തോഷ വാര്ത്ത!. ഉടന് തന്നെ ആന്ഡ്രോയിഡ് ഫോണ് ബിഗ് സ്ക്രീനില് കണക്ട് ചെയ്ത് സമ്പൂര്ണ ആന്ഡ്രോയിഡ് പിസി ആയി ഉപയോഗിക്കാന് സാധിക്കും. ഒരു മാസത്തിനുള്ളില് ഇത് നടപ്പാക്കാനുള്ള ശ്രമത്തിലാണ് ഗൂഗിള്. ആന്ഡ്രോയിഡ് ഓപ്പറേറ്റിങ് സിസ്റ്റം വികസിപ്പിച്ചത് ഗൂഗിള് ആണ്.
ആന്ഡ്രോയിഡ് 14 അപ്ഗ്രേഡ് ചെയ്ത് പുതിയ സംവിധാനം അവതരിപ്പിക്കാനുള്ള ശ്രമത്തിലാണ് ഗൂഗിള്. മെയ് മാസത്തില് ഇത് ഗൂഗിള് അവതരിപ്പിച്ചേക്കുമെന്നാണ് റിപ്പോര്ട്ടുകള്. ആന്ഡ്രോയിഡ് 14 ഓപ്പറേറ്റിങ് സിസ്റ്റത്തില് പ്രവര്ത്തിക്കുന്ന പുതിയ ആന്ഡ്രോയിഡ് ഡെസ്ക് ടോപ്പ് പതിപ്പിന്റെ ബീറ്റാ വേര്ഷനില് ഈ മാറ്റങ്ങള് ഉള്ക്കൊള്ളിച്ചിട്ടുണ്ട്. വലിയ സ്ക്രീനില് കൂടുതല് ആപ്പുകള് ഒരേ സമയം ഉപയോഗിക്കാന് കഴിയുന്നവിധമാണ് സംവിധാനം ഒരുക്കിയിരിക്കുന്നത്. വലിപ്പത്തില് മാറ്റം വരുത്തി ഒരേ സമയം കൂടുതല് ആപ്പുകള് ഉപയോഗിക്കാന് കഴിയുന്നവിധമാണ് പരീക്ഷണം നടത്തിയത്.
ആന്ഡ്രോയിഡ് ഒരു വലിയ സ്ക്രീനില് പ്രവര്ത്തിക്കുന്നതും കാഴ്ചക്കാര്ക്ക് പുതിയ കാഴ്ചാനുഭൂതി നല്കി പുതിയ ഓപ്ഷനുകളെ പിന്തുണയ്ക്കുന്നതും ഉടന് തന്നെ യാഥാര്ഥ്യമാക്കാനുള്ള ശ്രമത്തിലാണ് ഗൂഗിള് എന്നാണ് റിപ്പോര്ട്ടുകള് വ്യക്തമാക്കുന്നത്. ഈ പുതിയ ടൂള് ഔദ്യോഗികമായി പുറത്തിറക്കുമ്പോള് ഉപയോക്താക്കളെ അമ്പരപ്പിക്കാനാകുമെന്ന പ്രതീക്ഷയിലാണ് ഗൂഗിള്.
by liji HP News | Apr 9, 2024 | Latest News, ദേശീയ വാർത്ത
അര നൂറ്റാണ്ടില് ഒരിക്കല് നടക്കുന്ന ഏറ്റവും ദൈര്ഘ്യമേറിയ സൂര്യഗ്രഹണത്തിന് സാക്ഷ്യം വഹിച്ച് ലോകം. അമേരിക്ക, കാനഡ, മെക്സിക്കോ ഉൾപ്പടെയുള്ള വടക്കൻ അമേരിക്കന് രാജ്യങ്ങളിൽ സൂര്യഗ്രഹണം ദൃശ്യമായി. മെക്സിക്കോയുടെ പസഫിക് തീരത്ത് പ്രാദേശിക സമയം രാവിലെ 11.07 മുതല് സൂര്യഗ്രഹണം ദൃശ്യമായി.
4 മിനിറ്റ് 27 സെക്കന്റ് ദൈർഘ്യം പൂർണഗ്രഹണം നേരിൽ കാണാൻ ദശലക്ഷക്കണക്കിന് ആളുകളാണ് കാത്തിരുന്നത്. വലിയ ആഘോഷമായാണ് ഈ അപൂർവ നിമിഷത്തെ ആളുകൾ കൊണ്ടാടിയത്. “വളരെ മനോഹരവും അവിസ്മരണീയവുമായ ദിവസം”എന്നായിരുന്നു സൂര്യഗ്രഹണം നേരിൽ കണ്ട് ശേഷം മെക്സിക്കൻ പ്രസിഡൻ്റ് ആന്ദ്രേസ് മാനുവൽ ലോപ്പസ് ഒബ്രഡോറിന്റെ പ്രതികരണം.
Recent Comments