by Midhun HP News | Apr 20, 2026 | Latest News, കേരളം
കോഴിക്കോട്: ലോണ് ആപ്പ് ഭീഷണിക്ക് പിന്നാലെ വടകരയില് നിന്നും കാണാതായ ആയിഞ്ചേരി സ്വദേശി വിഷ്ണുവിനെ കണ്ടെത്തി. പയ്യന്നൂര് റെയില്വേ സ്റ്റേഷനില് നിന്നും കണ്ടെത്തിയെന്നാണ് വിവരം. നേത്രാവതി എക്സ്പ്രസില് യാത്ര ചെയ്യുന്നതിനിടെ, സഹയാത്രക്കാരന്റെ മൊബൈല് ഫോണില് വിഷ്ണു രാവിലെ സഹോദരനെ ഫോണില് വിളിക്കുകയായിരുന്നു.
താന് ജീവനോടെയുണ്ടെന്നും, സാമ്പത്തിക പ്രതിസന്ധി നിലനില്ക്കുന്നതിനാല് വീട്ടിലേക്ക് വരാന് തല്ക്കാലം താല്പ്പര്യപ്പെടുന്നില്ലെന്നും വിഷ്ണു അറിയിച്ചു. എന്നാല് വീട്ടുകാര് കടുത്ത മനഃപ്രയാസത്തിലൂടെയാണ് പോകുന്നതെന്നും, വീട്ടിലേക്ക് മടങ്ങി വരണമെന്നും അനുജന് വിഷ്ണുവിനോട് ആവശ്യപ്പെട്ടു. തുടര്ന്ന് പയ്യന്നൂര് റെയില്വേ സ്റ്റേഷനില് ഇറങ്ങുകയായിരുന്നു.
ഇതിനിടെ സിആര്പിഎഫില് ജോലി ചെയ്യുന്ന അമ്മാവന്റെ ഫോണ് നമ്പറും ശേഖരിച്ച് വിഷ്ണു വിളിച്ചു. തുടര്ന്ന് വീട്ടുകാര് പയ്യന്നൂരിലെത്തി വിഷ്ണുവിനെ കണ്ടു. വീട്ടുകാരുടെ പരാതിയെത്തുടര്ന്ന് വിഷ്ണുവിനെ പൊലീസ് അന്വേഷിച്ചു വരികയായിരുന്നു. ലോണ് ആപ്പുമായി ബന്ധപ്പെട്ട വിവരങ്ങള്ക്കായി പൊലീസ് വിഷ്ണുവില് നിന്നും മൊഴിയെടുക്കും.
ഇക്കഴിഞ്ഞ ഏപ്രില് 13 നാണ് 25 കാരനായ വിഷ്ണുവിനെ കാണാതായത്. ബാങ്കില് പോകുന്നുവെന്നു പറഞ്ഞാണ് വിഷ്ണു വീട്ടില് നിന്നും പോയതെന്ന് വീട്ടുകാര് പറയുന്നു. പതിനായിരം രൂപയാണ് 25 കാരനായ വിഷ്ണു ലോണ് ആപ്പില് നിന്നും വായ്പയെടുത്തത്. ഇതിന്റെ തിരിച്ചടവ് മുടങ്ങിയതോടെയാണ്, മോര്ഫ് ചെയ്ത ചിത്രങ്ങള് കാണിച്ച് ലോണ് ആപ്പ് മാഫിയാ സംഘത്തിലുള്ളവര് ഭീഷണിപ്പെടുത്തിയെന്നാണ് കുടുംബം പറയുന്നത്.
by Midhun HP News | Apr 20, 2026 | Latest News, കേരളം
കണ്ണൂര്: ലൈംഗിക അതിക്രമ കേസ് വീണ ജോര്ജിനെ കരിങ്കൊടി കാണിച്ചതിനു പിന്നാലെയുള്ള വേട്ടയാടലെന്ന് കെ എസ് യു കണ്ണൂര് ജില്ലാ അധ്യക്ഷന് എം സി അതുല്. ഫെയ്സ്ബുക്ക് പോസ്റ്റിലൂടെയാണ് പ്രതികരണം. സൗഹൃദം ഉണ്ടായിരുന്ന സമയത്തെ കാര്യങ്ങള് തെറ്റായി വ്യാഖ്യാനിച്ചെന്നും ആരെയും അപമാനിക്കുകയോ വഞ്ചിക്കുകയോ ചെയ്തിട്ടില്ലെന്നും അതുല് ഫെയ്സ്ബുക്ക് കുറിപ്പില് പറഞ്ഞു. സാമ്പത്തിക വിവരങ്ങള് കോടതിയില് ഹാജരാക്കുമെന്നും അതുല് വ്യക്തമാക്കി.
ഫെയ്സ് ബുക്ക് കുറിപ്പിന്റെ പൂര്ണരൂപം
വാര്ത്തകളും പരാതിയും കണ്ടു.
വീണ ജോര്ജിനെ കരിങ്കൊടി കാണിച്ചതിന് ശേഷം മുതല് പലവിധത്തില് ഭീഷണികളും വേട്ടയാടലുകളും നേരിടുകയാണ്. നിന്നെ ഫിനിഷ് ചെയ്യും’ എന്നാണ് അടക്കം പറിച്ചില്. എല്ലാ നെറികെട്ട കളിയും പ്രതീക്ഷിച്ചു തന്നെയാണ് മുന്നോട്ടുപോയത്. പക്ഷേ ഇത് അല്പ്പം കടന്ന കയ്യായിപ്പോയി. ഒരാളെ ചീറ്റ് ചെയ്യണം എന്നുള്ള ഉദ്ദേശത്തിലോ സ്ത്രീകളെ അപമാനിക്കണമെന്നുള്ള ഉദ്ദേശത്തിലോ ഒരു കാലഘട്ടത്തിലും മുന്നോട്ടു പോയിട്ടില്ല. വിവിധ ക്യാംപസുകളില് സംഘടനാ പ്രവര്ത്തനം നടത്തി പല വിദ്യാര്ഥികളുമായും ഇടപഴകി മുന്നോട്ട് പോയ ഒരാളെന്ന നിലയില് അവര്ക്കൊക്കെ എന്റെ രാഷ്ട്രീയത്തെപ്പറ്റി അറിയാം എന്നാണ് കരുതുന്നത്.
സൗഹൃദവും പ്രണയവും ഉണ്ടായിരുന്ന സമയത്ത് പരസ്പരം ചെയ്ത സഹായങ്ങളും ഇടപെടലുകളും മറ്റ് രീതിയില് വ്യാഖ്യാനിച്ച് മുന്നോട്ട് പോകുന്നത് ശരിയാണോ എന്നത് കാലം തെളിയിക്കും. ഒരുപാട് ജീവിത പ്രാരാബ്ദങ്ങള്ക്കിടയില് നിന്നും കടം മേടിച്ചും തിരിച്ചു കൊടുത്തും പല സുഹൃത്തുക്കളുടെ സഹായം കൊണ്ടുമൊക്കെ പൊതുപ്രവര്ത്തനം നടത്തി മുന്നോട്ട് പോകുന്ന സാധാരണക്കാരനാണ് ഞാനും. ഇപ്പോഴും കടവും ലോണുകളുമല്ലാതെ വ്യക്തിപരമായി ഈ പൊതുപ്രവര്ത്തനം കൊണ്ട് ഒന്നും സമ്പാദിച്ചിട്ടില്ല.
വേദനകളും യാതനകളും പ്രതിസന്ധികളും അനവധി ഉണ്ടായിട്ടുണ്ടെങ്കിലും ഈ പൊളിറ്റിക്സില് നിലനില്ക്കാന് പ്രേരിപ്പിക്കുന്നത് ഇതിനോടുള്ള പാഷനും കോണ്ഗ്രസിന്റെ ലെഗസിയുമാണ്. കോടതിയുടെ മുന്നിലിരിക്കുന്ന ഒരു കേസിന്റെ കൂടുതല് വിശദാംശങ്ങളിലേക്ക് പബ്ലിക് ഡൊമെയിനില് തല്ക്കാലം ചര്ച്ചയാക്കാന് ഉദ്ദേശിക്കുന്നില്ല. (കേസിനെ ബാധിക്കുന്നത് കൊണ്ട്). ബാങ്ക് സ്റ്റേറ്റ്മെന്റുകളും മറ്റ് വിവരങ്ങളുമൊക്കെ കോടതിക്ക് മുമ്പാകെ ഹാജരാക്കും. കോടതി നീതി ഉറപ്പാക്കട്ടെ. കുറ്റപ്പെടുത്തലുകളും ആക്ഷേപങ്ങളും തുടരുന്നവരുടെ ഉദ്ദേശം മറ്റൊന്നാണല്ലോ. അവര്ക്ക് വിശദീകരണങ്ങളും പോരാതെ വരും.
by Midhun HP News | Apr 20, 2026 | Latest News, കേരളം
കണ്ണൂര്: ക്ഷേത്രോത്സവത്തിനിടെ മാല പൊട്ടിച്ചോടിയ കര്ണാടക സ്വദേശിനികള് പിടിയില്. കര്ണാടകയിലെ ഗുല്ബര്ഗ് സ്വദേശികളെയാണ് നാട്ടുകാര് പിടികൂടി പൊലീസില് ഏല്പ്പിച്ചത്.
മാതമംഗലം പുലിയൂര് കാളി ക്ഷേത്രോത്സവത്തിനിടെയാണ് സ്ത്രീയുടെ മാല പൊട്ടിച്ച സംഘത്തിലെ രണ്ടുപേരെ നാട്ടുകാര് പിടികൂടിയത്. കര്ണാടകയിലെ ഗുല്ബര്ഗ് സ്വദേശിനികളായ ഇവരെ പെരിങ്ങോം പൊലീസ് കസ്റ്റഡിയിലെടുത്തു.
ഉത്സവ സമാപന ദിവസമായ ഞായറാഴ്ച ഉച്ചയ്ക്ക് 2.45-നാണ് മാതമംഗലം പറവൂര് സ്വദേശി പി വി രോഹിണി(76)യുടെ അഞ്ചരപ്പവന് സ്വര്ണമാല നാലുപേര് ചേര്ന്ന് കഴുത്തില് നിന്ന് പൊട്ടിച്ചത്. രോഹിണി കൊറന്തിയമ്മ തെയ്യത്തെ തൊഴാന് വരിയില് നില്ക്കുമ്പോള് പിറകിലുള്ള നാല് സ്ത്രീ കള് ചേര്ന്ന് മാല പൊട്ടിക്കുകയായിരുന്നു. രോഹിണി മോഷ്ടാക്കളുടെ പിന്നാലെ കരഞ്ഞുകൊണ്ട് ഓടി. ഇതിനിടെ നാട്ടുകാര് ചേര്ന്ന് രണ്ടുപേരെ പിടികൂടി. സംഘത്തിലുണ്ടായ രണ്ടു പേര് സ്ഥലത്ത് നിന്ന് ഓടിരക്ഷപ്പെട്ടു.
ക്ഷേത്രഭാരവാഹികള് വിവരമറിയിച്ചതിനെ തുടര്ന്ന് പെരിങ്ങോം പൊലിസ് സ്ഥലത്തെത്തി ഇവരെ കസ്റ്റഡിയിലെടുത്തു. സ്ത്രീയുടെ മാല മോഷ്ടിക്കുന്ന ക്ഷേത്രത്തില് നിന്നുള്ള സിസിടിവി ദൃശ്യങ്ങള് സംഭവം കഴിഞ്ഞയുടനെ തന്നെ സാമൂഹിക മാധ്യമങ്ങളില് പ്രചരിച്ചിരുന്നു. പൊലിസ് പിടികൂടിയ സ്ത്രീകളില്നിന്ന് മാല കണ്ടു കിട്ടിയിട്ടില്ല. ഓടി രക്ഷപ്പെട്ട സ്ത്രീകളുടെ കൈയിലായിരിക്കാം മാ ലയെന്ന നിഗമനത്തിലാണ് പൊലീസ്. ക്ഷേത്രോത്സവത്തിനിടെയുണ്ടായ തിക്കിനും തിരക്കിനും ഇടയിലാണ് കവര്ച്ച നടന്നത്.
by Midhun HP News | Apr 20, 2026 | Latest News, കേരളം
തിരുവനന്തപുരം: സംസ്ഥാനത്ത് ശസ്ത്രക്രിയകള്ക്ക് പുതിയ മാര്ഗരേഖ ആരോഗ്യവകുപ്പ് പുറപ്പെടുവിച്ചു. രോഗികള്ക്ക് ശസ്ത്രക്രിയ വിവരങ്ങള് അടങ്ങിയ റിസ്റ്റ് ബാന്ഡ് ധരിപ്പിച്ചിരിക്കണം. ശസ്ത്രക്രിയ നടത്തേണ്ട ശരീരഭാഗം മുന്കൂട്ടി അടയാളപ്പെടുത്തണം. ഓപ്പറേഷന് തിയേറ്ററില് ആരും മൊബൈല് ഫോണ് ഉപയോഗിക്കരുത് തുടങ്ങിയ നിര്ദേശങ്ങള് മാര്ഗരേഖയില് ഉള്പ്പെടുന്നു.
ശസ്ത്രക്രിയയ്ക്ക് മുമ്പ് വൈറ്റ് ബോര്ഡില് ശസ്ത്രക്രിയയ്ക്ക് ഉപയോഗിക്കുന്ന ഉപകരണങ്ങളുടെ പേരും എണ്ണവും രേഖപ്പെടുത്തണം. ശസ്ത്രക്രിയയ്ക്ക് ശേഷം ഉപകരണങ്ങളുടെ എണ്ണം പരിശോധിച്ച് ചെക്ക്ലിസ്റ്റ് ബന്ധപ്പെട്ട മേധാവിക്ക് കൈമാറണമെന്നും നിര്ദേശിക്കുന്നു. ശസ്ത്രക്രിയയ്ക്ക് മുമ്പ് ഡോക്ടറും നഴ്സും രോഗിയുടെ ഐപി നമ്പര്, കേസ് റെക്കോര്ഡ് എന്നിവ പൂര്ത്തിയാക്കണം.
വാര്ഡ് ഡോക്ടറും നഴ്സ് ഇന് ചാര്ജും പ്രീ ഓപ്പറേറ്റീവ് ചെക്ക് ലിസ്റ്റ് പൂരിപ്പിച്ച് ഒപ്പിടണം. തിയേറ്റര് ചുമതലയുള്ള നഴ്സിങ്ങ് ഓഫീസര് ഇതു വായിച്ച് വ്യക്തത വരുത്തി ഒപ്പിടണം. അതിനുശേഷം മാത്രമേ തീയേറ്ററിനുള്ളിലേക്ക് രോഗിയെ പ്രവേശിപ്പിക്കാന് പാടുള്ളൂവെന്നും മാര്ഗനിര്ദേശത്തിലുണ്ട്. ചെറുതും വലുതുമായ എല്ലാത്തരം ശസ്ത്രക്രിയയ്ക്കും ഈ മാര്ഗനിര്ദേശങ്ങള് പാലിക്കണമെന്നും നിര്ദേശിച്ചിട്ടുണ്ട്.
by Midhun HP News | Apr 20, 2026 | Latest News, കേരളം
കണ്ണൂര്: അഞ്ചരക്കണ്ടി ഡെന്റല് കോളജിലെ വിദ്യാര്ത്ഥി നിതിന് രാജിന്റെ മരണത്തില്, ആത്മഹത്യാപ്രേരണാക്കുറ്റം ചുമത്തി പൊലീസ് കേസെടുത്തതിനെത്തുടര്ന്ന് ഒളിവില് പോയ അധ്യാപകര് കേരളം വിട്ടെന്ന് പൊലീസ്. അധ്യാപകനും ഓറല് പതോളജി ആന്റ് മൈക്രോബയോളജി വിഭാഗം മേധാവിയായിരുന്ന ഡോ. എം കെ റാം ആന്ധ്രയിലാണെന്ന് പൊലീസിന് വിവരം ലഭിച്ചതായി റിപ്പോര്ട്ടുകള്. പ്രതി ചേര്ക്കപ്പെട്ട അധ്യാപിക ഡോ. സംഗീത നമ്പ്യാറും കേരളത്തില് ഇല്ലെന്ന് പൊലീസ് കണ്ടെത്തി.
നിതിന്റെ മരണത്തെത്തുടര്ന്ന് സസ്പെന്ഷനില് ആയിരുന്ന ഡോ. റാമിനെ 16 ന് കോളജില് നിന്ന് പുറത്താക്കിയിരുന്നു. ആന്ധ്ര സ്വദേശിയാണ് ഇയാള്. ഈ മാസം 10 ന് ഉച്ചയ്ക്കാണ് നിതിന് രാജ് കോളജ് കെട്ടിടത്തില് നിന്നും ചാടി മരിച്ചത്. ഈ മാസം 12 നാണ് പ്രത്യേക അന്വേഷണ സംഘം അധ്യാപകരായ ഡോ. റാമിനും ഡോ. സംഗീതയ്ക്കുമെതിരെ കേസെടുത്തത്. ആത്മഹത്യാ പ്രേരണ, ജാതീയ അധിക്ഷേപം തുടങ്ങിയ കുറ്റങ്ങളും ചുമത്തിയിട്ടുണ്ട്. നിതില് മരിച്ച് 10 ദിവസമായിട്ടും പ്രതികളെ പിടികൂടാന് പൊലീസിന് സാധിച്ചിട്ടില്ല.
ലോണ് ആപ്പ് കാരണമാണ് നിതിന് രാജ് മരിച്ചതെന്ന് വരുത്തിതീര്ക്കാനാണ് പൊലീസ് ശ്രമിക്കുന്നതെന്ന് വീട്ടുകാര് ആരോപിക്കുന്നു. കേസെടുത്തതിന് പിന്നാലെ അധ്യാപകരായ ഡോ. റാം, ഡോ. സംഗീത എന്നിവര് മുന്കൂര് ജാമ്യഹര്ജി നല്കിയിരുന്നു. കണ്ണൂര് ജില്ലാ സെഷന്സ് കോടതി അധ്യാപകരുടെ മുന്കൂര് ജാമ്യഹര്ജികള് ഈ മാസം 22 ന് പരിഗണിക്കുന്നുണ്ട്. നിതിന് രാജിനെ ഭീഷണിപ്പെടുത്തിയ ലോണ് ആപ്പിലെ മൂന്നു ജീവനക്കാരെ പൊലീസ് അറസ്റ്റ് ചെയ്തിരുന്നു. ഇവരുടെ കസ്റ്റഡി അപേക്ഷ ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി ഇന്നു പരിഗണിക്കും.
by Midhun HP News | Apr 20, 2026 | Latest News, കേരളം
കൊച്ചി: അക്ഷയ തൃതീയ ദിനമായ ഞായറാഴ്ച വില്പ്പനയില് നേട്ടവുമായി സംസ്ഥാനത്തെ സ്വര്ണ വ്യാപാരികള്. കേരളമെമ്പാടുമുള്ള 12,000 ജ്വല്ലറികളില് നിന്നായി ഞായറാഴ്ച വൈകീട്ട് വരെ ഏകദേശം 1260 കോടി രൂപയുടെ വ്യാപാരം നടന്നതായാണ് ഓള് കേരള ഗോള്ഡ് ആന്റ് സില്വര് മര്ച്ചന്റ്സ് അസോസിയേഷന്റെ കണക്ക്.
ഏകദേശം 900 കിലോയുടെ സ്വര്ണമാണ് വിറ്റുപോയത്. അക്ഷയ തൃതീയ ദിനത്തില് സ്വര്ണവിലയില് വര്ധന ഉണ്ടായില്ലെന്നത് വാങ്ങാനെത്തിയവര്ക്ക് ആശ്വാസമായതായും ഗോള്ഡ് ആന്റ് സില്വര് മര്ച്ചന്റ്സ് അസോസിയേഷന് ജനറല് സെക്രട്ടറി എസ് അബ്ദുള് നാസര് പറഞ്ഞു.
Recent Comments