by Midhun HP News | Apr 3, 2023 | Latest News, കേരളം, ജില്ലാ വാർത്ത
കോഴിക്കോട്: ആലപ്പുഴ- കണ്ണൂര് എക്സ്പ്രസില് തീ കൊളുത്തിയ അക്രമി റോഡിലെത്തി ബൈക്കില് കയറി രക്ഷപ്പെടുന്നതിന്റെ സിസിടിവി ദൃശ്യങ്ങള് പുറത്തു വന്നു. റോഡിലെത്തി ഫോണ് വിളിക്കുന്നതും, ഏതാനും സമയത്തിന് ശേഷം ഒരു ബൈക്ക് അടുത്തെത്തി നിര്ത്തുന്നതും, തുടര്ന്ന് അക്രമിയെന്ന് സംശയിക്കുന്ന യുവാവ് ബൈക്കില് കയറി രക്ഷപ്പെടുന്നതും ദൃശ്യങ്ങളിലുണ്ട്.
ചുവപ്പ് ഷര്ട്ടും പാന്റ്സും ധരിച്ച യുവാവാണ് ദൃശ്യങ്ങളിലുള്ളത്. കറുത്ത നിറത്തിലുള്ള ഷൂവും ധരിച്ചിട്ടുണ്ട്. രാത്രി ദൃശ്യങ്ങളായതിനാല്, അക്രമിയുടെ കൂടുതല് വ്യക്തമായ ചിത്രങ്ങള് ലഭിക്കാനായി ഹൈവേയിലെ മുഴുവന് സിസിടിവി ദൃശ്യങ്ങളും പൊലീസ് പരിശോധിച്ചു വരികയാണ്. അതിനിടെ അക്രമി 25 വയസ്സുള്ള യുവാവാണെന്ന് മന്ത്രി അഹമ്മദ് ദേവര് കോവില് സൂചിപ്പിച്ചു. അക്രമിക്കും പരിക്കേറ്റതായാണ് പൊലീസ് കമ്മീഷണറെയും എസ്പിയേയും വിളിച്ചപ്പോള് അറിയിച്ചത്. അക്രമിയെപ്പറ്റി വ്യക്തമായ വിവരങ്ങള് ഇതുവരെ ലഭിച്ചിട്ടില്ലെന്നും മന്ത്രി സൂചിപ്പിച്ചു. അതേസമയം അക്രമിയെന്ന് സംശയിക്കുന്ന യുവാവ് പോയ ബൈക്കിനെപ്പറ്റി പൊലീസിന് വിവരം ലഭിച്ചതായി റിപ്പോര്ട്ടുണ്ട്. ബൈക്കിന്റെ ആര്സി ഉടമയെ പൊലീസ് കണ്ടെത്തിയെന്നാണ് സൂചന. ബൈക്ക് കൊയിലാണ്ടി ഭാഗത്തേക്കാണ് പോയതെന്നും പൊലീസ് വിലയിരുത്തുന്നു. ബൈക്കില് നിന്നും ലഭിക്കുന്ന കുറിപ്പടികളില് നിന്നും കാര്പ്പെന്റര് എന്ന എഴുത്തും കിട്ടിയിട്ടുണ്ട്. അക്രമിയുടേതെന്ന് സംശയിക്കുന്ന ബാഗില് നിന്നും ലഭിച്ച നോട്ടില് എസ് എന്ന് നിരവധി തവണ എഴുതിയിട്ടുണ്ട്.
കേരളത്തിലെയും തമിഴ്നാട്ടിലെയും അടക്കം ഒട്ടേറെ സ്ഥലങ്ങളെപ്പറ്റിയും കുറിപ്പിലുണ്ട്. ഡല്ഹി, നോയിഡ തുടങ്ങിയ സ്ഥലങ്ങളെപ്പറ്റിയും വിവരണങ്ങളുണ്ട്. ട്രെയിനില് തീവെച്ച സംഭവത്തില് കേന്ദ്ര റെയില്വേ മന്ത്രാലയം വിശദാംശങ്ങള് തേടി. കേന്ദ്ര അന്വേഷണ ഏജന്സികളും വിവരങ്ങള് ആരാഞ്ഞു. കേന്ദ്ര ആഭ്യന്തരമന്ത്രാലയവും സ്ഥിതി നിരീക്ഷിച്ചു വരികയാണ്. ലഭ്യമായ സിസിടിവി ദൃശ്യങ്ങളുടെ അടിസ്ഥാനത്തില് പ്രതിയുടെ രേഖാചിത്രം പൊലീസ് തയ്യാറാക്കുകയാണ്. സംസ്ഥാന തീവ്രവാദ വിരുദ്ധ സ്ക്വാഡും സംഭവത്തില് അന്വേഷിക്കുന്നുണ്ട്.
by Midhun HP News | Apr 3, 2023 | Latest News, കേരളം, ജില്ലാ വാർത്ത
കോഴിക്കോട് എലത്തൂരില് അജ്ഞാതന് ട്രെയിനിന് തീകൊളുത്തിയ സംഭവത്തില് മരിച്ച മൂന്ന് പേരുടെയും പോസ്റ്റ്മോര്ട്ടം പൂര്ത്തിയായി. കണ്ണൂര് മട്ടന്നൂര് സ്വദേശികളായ റഹ്മത്ത്, സഹറ, നൗഫീഖ് എന്നിവരാണ് മരിച്ചത്. ഇവരുടെ ശരീരത്തില് പൊള്ളലേറ്റ പാടുകളില്ല. ട്രെയിനില് നിന്ന് ചാടിയ സമയത്ത് തലയ്ക്ക് ഗുരുതരമായി പരുക്കേറ്റിരുന്നു. രക്ഷപെടാന് ശ്രമിച്ചപ്പോള് ട്രെയിനില് നിന്ന് ചാടിയതാകാമെന്നാണ് പ്രാഥമിക നിഗമനം. ഇവരുടെ തലയ്ക്ക് പിന്നില് ആഴത്തിലുള്ള മുറിവുകളുണ്ട്.
എലത്തൂര് റെയില്വേ സ്റ്റേഷന് സമീപത്ത് നിന്നാണ് മട്ടന്നൂര് സ്വദേശി റഹ്മത്തിന്റേയും സഹോദരിയുടെ മകള് രണ്ട് വയസുകാരി സഹറയുടേയും മൃതദേഹങ്ങള് കിട്ടിയത്. പെട്രോള് ആക്രമണം ഭയന്ന് ട്രെയിനില് നിന്ന് റഹ്മത്തും കുഞ്ഞും എടുത്ത് ചാടിയെന്നാണ് യാത്രക്കാര് പറയുന്നത്. മറ്റൊരു ട്രെയിനിന്റെ ലോക്കോ പൈലറ്റാണ് ട്രാക്കില് കിടക്കുന്ന മൂന്ന് മൃതദേഹങ്ങള് കണ്ടത്. ഇദ്ദേഹം ഉടന് റെയില്വേ ഉന്നത ഉദ്യോഗസ്ഥരെ വിവരമറിയിക്കുകയും പൊലീസും റെയില്വേ ഉദ്യോഗസ്ഥരും സ്ഥലത്തെത്തി മൃതദേഹങ്ങള് കണ്ടെത്തുകയുമായിരുന്നു. ഇന്നലെ രാത്രി 9 മണിയോടെയാണ് ആലപ്പുഴകണ്ണൂര് എക്സിക്യൂട്ടിവ് എക്സ്പ്രസില് അജ്ഞാതന് തീവച്ചത്. സംഭവത്തില് ഒന്പത് പേര്ക്കാണ് പരുക്കേറ്റത്. ഇതില് രണ്ട് പേരുടെ നില ഗുരുതരമാണെന്ന് പൊലീസ് അറിയിച്ചു. ഗുരുതരമായി പൊള്ളലേറ്റ പ്രിന്സ് എന്നയാളെ ബേബി മെമ്മോറിയല് ആശുപത്രിയില് പ്രവേശിപ്പിച്ചിരിക്കുകയാണ്. പരുക്കേറ്റ മറ്റുള്ളവര് കോഴിക്കോട് മെഡിക്കല് കോളജിലാണ്.
by Midhun HP News | Apr 3, 2023 | Latest News, കേരളം, ജില്ലാ വാർത്ത
ചെന്നൈ: ഇരട്ടകുട്ടികളാണ് നയന്താരയ്ക്കും, വിഘ്നേശ് ശിവനും. വാടക ഗര്ഭപാത്രത്തിലൂടെ ഉണ്ടായ കുട്ടികളെക്കുറിച്ച് അന്ന് ഏറെ വിവാദം ഉണ്ടായിരുന്നു. എന്നാല് തമിഴ്നാട് സര്ക്കാര് നടത്തിയ അന്വേഷണത്തില് താര ദമ്പതികള് കുറ്റക്കാര് അല്ലെന്നാണ് കണ്ടെത്തിയത്. എന്നാല് ഇതുവരെ കുട്ടികളുടെ ഒരു ചിത്രം പോലും എവിടെയും താര ദമ്പതികള് പകര്ത്താന് അനുവദിച്ചിട്ടില്ല. ഉയിര്, ഉലകം എന്നാണ് കുട്ടികളുടെ പേര് എന്നത് കുട്ടികള് ജനിച്ചപ്പോള് തന്നെ വിഘ്നേശ് വെളിപ്പെടുത്തിയിരുന്നു. എന്നാല് ഇപ്പോള് കുട്ടികളുടെ ഔദ്യോഗിക പേരുകള് പുറത്തുവന്നിരിക്കുകയാണ്. ഉയിര് രുദ്രനില് എന് ശിവ എന്നും ഉലക ദൈവിക എന് ശിവ എന്നുമാണ് കുട്ടികളുടെ ഔദ്യോഗിക പേരുകള് എന്നാണ് പുറത്തുവരുന്ന വിവരം.
അടുത്തിടെ മുംബൈ വിമാനതാവളത്തില് എത്തിയ നയന്താരയെയും ഭര്ത്താവിനെയും പാപ്പരാസികള് വളഞ്ഞിരുന്നു. എന്നാല് രണ്ടുപേരും കൈയ്യില് എടുത്തിരുന്ന കുട്ടികളുടെ മുഖം മാറോട് അടുക്കി കുഞ്ഞുങ്ങളുടെ മുഖം മറക്കുന്ന വീഡിയോ സോഷ്യല് മീഡിയയില് വൈറലായി. വീഡിയോയില് ആരാധകരുടെ കമന്റുകള് നിറയുകയാണ്. മികച്ച രക്ഷിതാക്കളാണ് നയന്സും, വിഘ്നേശും എന്നാണ് കമന്റുകളില് പലതും പറയുന്നത്. ഒപ്പം തന്നെ പാപ്പരാസികളുടെ സ്വകാര്യതയിലേക്കുള്ള കടന്നുകയറ്റത്തെ പലരും വിമര്ശിക്കുന്നുണ്ട്. തന്റെ കുട്ടികളെ ചിറകിനുള്ളില് ഒളിപ്പിക്കുന്ന അമ്മ കിളിയെപ്പോലെ എന്നും ചില കമന്റുകള് ഈ വീഡിയോയ്ക്ക് നയന്താരയെക്കുറിച്ച് ആരാധകരുടെതായി വരുന്നുണ്ട്.
by Midhun HP News | Apr 3, 2023 | Latest News, കേരളം, ജില്ലാ വാർത്ത
തിരുവനന്തപുരം: ശമ്പളം കിട്ടാത്തതിന്റെ പേരില് ഡ്യൂട്ടിക്കിടെ ബാഡ്ജ് ധരിച്ച് പ്രതിഷേധിച്ച വനിത കണ്ടക്ടറെ സ്ഥലംമാറ്റിയ ഉത്തരവ് കെഎസ്ആര്ടിസി പിന്വലിച്ചു. വൈക്കം ഡിപ്പോയിലെ കണ്ടക്ടറായ അഖില എസ് നായരുടെ സ്ഥലമാറ്റ ഉത്തരവാണ് റദ്ദാക്കിയത്. വൈക്കത്ത് നിന്ന് പാലായിലേക്ക് സ്ഥലംമാറ്റി കൊണ്ടുള്ള ഉത്തരവാണ് റദ്ദാക്കിയത്. അതേസമയം, അഖില പ്രദര്ശിപ്പിച്ച ബാഡ്ജിലെ കാര്യങ്ങള് വസ്തുത വിരുദ്ധമാണെന്ന് മന്ത്രി ആന്റണി രാജു പറഞ്ഞു.
അഖിലയ്ക്കെതിരായ നടപടി സര്ക്കാര് അറിഞ്ഞ വിഷയമല്ല, എന്താണ് സംഭവിച്ചതെന്ന് പരിശോധിക്കാമെന്നും മന്ത്രി നേരത്തെ പറഞ്ഞിരുന്നു. വനിത കണ്ടക്ടറെ സ്ഥലം മാറ്റിയ നടപടി താഴേത്തട്ടിലോ മറ്റോ എടുത്തതാകാം. ശമ്പളം ലഭിക്കാത്തതിന് മുമ്പും പ്രതിഷേധങ്ങളുണ്ടായിട്ടുണ്ട്. അതൊന്നും സര്ക്കാരിനെ അപകീര്ത്തിപെടുത്തുന്നതല്ല. സ്ഥലം മാറ്റത്തില് യൂണിയനുകളുടെ പ്രതിഷേധത്തെ പറ്റി അറിഞ്ഞിട്ടില്ലെന്നും മന്ത്രി പറഞ്ഞിരുന്നു.
ജനുവരി 11-ാം തീയതി അഖില നടത്തിയ പ്രതിഷേധത്തിന്റെ ചിത്രം സോഷ്യല്മീഡിയയില് വൈറലായിരുന്നു. ശമ്പളരഹിത സേവനം 41-ാം ദിവസം എന്ന ബാഡ്ജ് ധരിച്ചായിരുന്നു പ്രതിഷേധം. അഖിലയുടെ നടപടി സര്ക്കാരിനെയും കെഎസ്ആര്ടിസിയെയും അപകീര്ത്തിപ്പെടുത്തുന്നതായിരുന്നെന്ന് നടപടി ഉത്തരവില് മാനേജ്മെന്റ് പറഞ്ഞിരുന്നു.
നടപടി ഉത്തരവില് പറഞ്ഞത് ഇങ്ങനെ: ‘11.01.2023ന് വൈക്കം ഡിപ്പോയിലെ 08.30 കളക്ടറേറ്റ് സര്വീസ് പോയ കണ്ടക്ടര് അഖില എസ് നായര് ഒരു ജീവനക്കാരി എന്ന നിലയില് പാലിക്കേണ്ട ചട്ടങ്ങള്ക്ക് വിരുദ്ധമായി സ്വന്തം നിലയില് സര്ക്കാരിനും കോര്പ്പറേഷനും എതിരെ പ്രതിഷേധിച്ച് ‘ശമ്പളരഹിത സേവനം 41-ാം ദിവസം’ എന്ന ബാഡ്ജ് ധരിച്ച് ഡ്യൂട്ടി നിര്വഹിക്കുകയും ആയത് നവമാധ്യമങ്ങള് വഴി പ്രചരിക്കപ്പെടുകയും, അതിലൂടെ സര്ക്കാരിനെയും കോര്പ്പറേഷനെയും അപകീര്ത്തിപ്പെടുത്തുന്നതിന് ഇടവരികയും ചെയ്തു. പ്രവൃത്തിയിലൂടെ അച്ചടക്ക ലംഘനം നടത്തിയതായി ബോധ്യപ്പെട്ടു. മേല്ക്കാരണങ്ങളാല് അഖില നായരെ ഭരണപരമായ സൗകര്യാര്ത്ഥം പാലാ യൂണിറ്റിലേക്ക് സ്ഥലം മാറ്റി കൊണ്ട് ഉത്തരവിടുന്നു.
by Midhun HP News | Apr 3, 2023 | Latest News, കേരളം, ജില്ലാ വാർത്ത
കോഴിക്കോട്: ആലപ്പുഴ- കണ്ണൂർ എക്സിക്ക്യൂട്ടീവ് ട്രെയിനിൽ തീവെപ്പ് നടത്തിയ അക്രമിയുടെ രേഖാചിത്രം പുറത്തിവിട്ട് പൊലീസ്. മുഖ്യസാക്ഷിയായ റാസിഖ് നൽകിയ വിവരങ്ങളുടെ അടിസ്ഥാനത്തിലാണ് രേഖാചിത്രം തയ്യാറാക്കിയത്. പ്രതി ഇതര സംസ്ഥാന തൊഴിലാളിയെന്ന സൂചനയിലൂന്നിയാണ് പൊലീസ് അന്വേഷണം പുരോഗമിക്കുന്നത്. ടൗൺ, മെഡിക്കൽ കോളേജ്, അസിസ്റ്റൻറ് കമ്മീഷണർമാരും, റൂറൽ എസ്എസ്ബി ഡിവൈഎസ്പി എന്നിവർ എലത്തൂർ സ്റ്റേഷനിൽ എത്തിച്ചേർന്നിട്ടുണ്ട്. ട്രെയിൻ തീവെപ്പ് കേസിലെ പ്രതിയെ കുറിച്ച് നിർണായക വിവരങ്ങൾ ലഭിച്ചതായി സംസ്ഥാന പൊലീസ് മേധാവി അനിൽ കാന്ത് അറിയിച്ചു. അന്വേഷണത്തിന് പ്രത്യേക സംഘത്തെ രൂപീകരിക്കും. കണ്ണൂരിലേക്കെത്തി അന്വേഷണത്തിന് നേതൃത്വം നൽകുമെന്നും അദ്ദേഹം അറിയിച്ചു. പ്രതിയുടേതെന്ന് കരുതുന്ന ഒരു ബാഗ് ഉപേക്ഷിക്കപ്പെട്ട നിലയിൽ ട്രാക്കിൽ നിന്നും കണ്ടെത്തിയിരുന്നു.
പെട്രോള് അടങ്ങിയ കുപ്പി, സ്ഥലപ്പേരുകളുടെ കുറിപ്പ്, ഇംഗ്ലീഷിലും ഹിന്ദിയിലും എഴുതിയ ദിനചര്യ കുറിപ്പ്, ഇയര്ഫോണും കവറും, രണ്ട് മൊബൈല് ഫോണുകള്, ഭക്ഷണമടങ്ങിയ ടിഫിന് ബോക്സ്, പാക്കറ്റിലുള്ള ലഘുഭക്ഷണം, പഴ്സ്, ടീ ഷര്ട്ട്, തോര്ത്ത്, കണ്ണട, കപ്പലണ്ടി മിഠായി എന്നിവയാണ് ബാഗില് നിന്ന് കണ്ടെത്തിയത്. ഇവ ശാസ്ത്രീയ പരിശോധനയ്ക്ക് അയക്കുമെന്ന് അന്വേഷണ ഉദ്യോഗസ്ഥര് അറിയിച്ചു. ചിറയിന്കീഴ്, കഴക്കൂട്ടം, തിരുവനന്തപുരം, കോവളം, കുളച്ചല്, കന്യാകുമാരി തുടങ്ങിയ സ്ഥലപ്പേരുകളാണ് നോട്ട് ബുക്കില് രേഖപ്പെടുത്തിയിട്ടുള്ളത്. നോട്ട് ബുക്കിലെ കുറിപ്പില് കാര്പെന്റര് എന്ന വാക്ക് ആവര്ത്തിച്ച് രേഖപ്പെടുത്തിയിട്ടുണ്ട്. അതിനിടെ പ്രതിയുടേതെന്ന് കരുതുന്ന സിസിടിവി ദൃശ്യങ്ങൾ പുറത്ത് വന്നു.
by Midhun HP News | Apr 3, 2023 | Latest News, കേരളം, ജില്ലാ വാർത്ത
ചെന്നൈ: തമിഴ് സിനിമയിലെ ദളപതിയാണ് നടന് വിജയ്. സോഷ്യല് മീഡിയയില് എത്ര സജീവമല്ലെങ്കിലും ഫേസ്ബുക്കിലും ട്വിറ്ററിലും വിജയ്ക്ക് അക്കൗണ്ടുകള് ഉണ്ട്. ഇത് അഡ്മിന്മാരാണ് നോക്കുന്നതെന്ന് പൊതുവേദിയില് വിജയ് തന്നെ പറഞ്ഞിട്ടുണ്ട്. ഫേസ്ബുക്കില് 78 ലക്ഷവും ട്വിറ്ററില് 44 ലക്ഷവുമാണ് വിജയ്യുടെ ഫോളോവേഴ്സ്. ഇപ്പോഴിതാ അദ്ദേഹം ഇന്സ്റ്റഗ്രാമിലും വിജയ് തന്റെ ഔദ്യോഗിക അക്കൗണ്ട് ആരംഭിച്ചിരിക്കുന്നു. ഇന്സ്റ്റഗ്രാം പേജ് പുറത്തിറക്കി ലിയോ ലുക്കില് ഒരു ഫോട്ടോയാണ് വിജയ് പോസ്റ്റ് ചെയ്തിരിക്കുന്നത്. ആദ്യത്തെ ഒരു മണിക്കൂറില് തന്നെ 7.5 ലക്ഷത്തോളം ഫോളോവേര്സാണ് വിജയ് നേടിയത്. ഇപ്പോൾ വരെ അദ്ദേഹത്തിന് 4.3 മില്ല്യൺ ഇതുവരെ താരം ആരെയും പിന്തുടരുന്നില്ല. ലോകേഷ് കനകരാജ് ചിത്രം ലിയോയുടെ പ്രൊമോഷന് വലിയ രീതിയില് ഗുണകരമാവുമെന്നാണ് വിലയിരുത്തല്.
Recent Comments