by Midhun HP News | Nov 5, 2026 | Latest News, ജില്ലാ വാർത്ത
ലോസാഞ്ചലസ്: തിരുവനന്തപുരത്ത് ജനിച്ച നിത്യ രാമന്‍ ലോസാഞ്ചലസ് മേയര്‍ തെരഞ്ഞെടുപ്പില്‍ ചരിത്ര വിജയം നേടി. നിലവിലെ മേയര്‍ കാരെന്‍ ബാസിനെ പരാജയപ്പെടുത്തിയാണ് നിത്യ ലോസാഞ്ചലസിന്റെ മേയറാകുന്ന ആദ്യ ഏഷ്യന്‍-അമേരിക്കന്‍ വനിതയെന്ന ചരിത്രനേട്ടം സ്വന്തമാക്കിയത്. യുഎസിലെ രണ്ടാമത്തെ വലിയ നഗരമായ ലോസാഞ്ചലസ് നഗരത്തിന്റെ പരമോന്നത ഭരണപദവിയിലെത്തുന്ന രണ്ടാമത്തെ വനിതകൂടിയാണിവര്‍.
ഡിസിഷന്‍ ഡെസ്‌ക് എച്ച് ക്യു പുറത്തുവിട്ട കണക്കുകള്‍ പ്രകാരം, 51.1 ശതമാനം വോട്ടുകളാണ് നിത്യ നേടിയത്. എന്നാല്‍ കാരെന്‍ ബാസിന് 48.33 വോട്ടുകളെ നേടാന്‍ സാധിച്ചുള്ളു. ആറു വര്‍ഷത്തോളമായി ഡിസ്ട്രിക് 4നെ പ്രതിനിധീകരിക്കുന്ന ലൊസാഞ്ചലസ് സിറ്റി കൗണ്‍സില്‍ അംഗമാണ് നിത്യ. സിറ്റി കൗണ്‍സിലില്‍ സേവനമനുഷ്ഠിക്കുന്ന ആദ്യത്തെ ഏഷ്യന്‍-അമേരിക്കന്‍ വനിതയും ആദ്യത്തെ ദക്ഷിണേഷ്യന്‍ വംശജയുമാണ്.
കലിഫോര്‍ണിയയില്‍ അര്‍ബന്‍ പ്ലാനര്‍ കൂടിയായ നിത്യ, ഭവനരഹിതരുടെ പ്രതിസന്ധി പരിഹരിക്കാനായാണ് രാഷ്ട്രീയത്തില്‍ ഇറങ്ങിയത്. നഗരത്തിലെ ഉയര്‍ന്ന ജീവിതച്ചെലവ്, ജനങ്ങളുടെ അടിസ്ഥാന ആവശ്യങ്ങള്‍ എന്നിവ മുന്‍ നിര്‍ത്തി നടത്തിയ പ്രചാരണമാണ് നിത്യയ്ക്ക് യുവ വോട്ടര്‍മാര്‍ക്കിടയില്‍ മികച്ച പിന്തുണ കിട്ടാന്‍ കാരണമായത്. 2028ല്‍ നടക്കുന്ന ഒളിമ്പിക്‌സിന് ലോസാഞ്ചലസ് നഗരം ആതിഥേയത്വം വഹിക്കാനിരിക്കെയാണ് ഭരണനേതൃത്വത്തിലേയ്ക്ക് നിത്യ രാമന്‍ എത്തുന്നത്.
കേരളവുമായുള്ള ബന്ധം:
1981 ജൂലൈ 28ന് തിരുവനന്തപുരത്താണ് നിത്യ രാമന്റെ ജനനം. നഗരത്തിലെ കോട്ടയ്ക്കകത്ത് രാമസ്വാമി കോവില്‍തെരുവിലാണ് നിത്യയുടെ കുടുംബം പതിറ്റാണ്ടുകള്‍ക്ക് മുന്‍പ് കഴിഞ്ഞിരുന്നത്. കെല്‍ട്രോണിക്‌സിലെ ഉദ്യോഗസ്ഥനായിരുന്ന ആര്‍. വെങ്കട്ടരാമനും ഇന്ത്യന്‍ ഓവര്‍സീസ് ബാങ്ക് ജീവനക്കാരിയായിരുന്ന സുധയുമാണ് മാതാപിതാക്കള്‍. തിരുവനന്തപുരത്തുള്ള കുടുംബവീട് നേരത്തേ വിറ്റുപോയി. കുടുംബാംഗങ്ങളാരും കോട്ടയ്ക്കകത്ത് താമസമില്ല. നിത്യയ്ക്ക് ആറു വയസ്സുള്ളപ്പോഴാണ് ഈ തമിഴ് കുടുംബം അമേരിക്കയിലെ ലൂസിയാനയിലേക്ക് കുടിയേറിയത്.
ഹാര്‍വാര്‍ഡ് സര്‍വകലാശാലയിലും എംഐടിയിലും പഠനം പൂര്‍ത്തിയാക്കി. 2020ല്‍ സിറ്റി കൗണ്‍സില്‍ തെരഞ്ഞെടുപ്പില്‍ വിജയിച്ചു. 2024ലും വിജയം ആവര്‍ത്തിച്ചു. തമിഴ് വംശജനും തിരക്കഥാകൃത്തുമായ വാലി ചന്ദ്രശേഖരനാണ് നിത്യയുടെ ഭര്‍ത്താവ്. ഇരട്ടക്കുട്ടികളായ കര്‍ണനും കാവേരിക്കുമൊപ്പം സില്‍വര്‍ലേക്കിലാണ് നിത്യയും കുടുംബവും ഇപ്പോള്‍ താമസിക്കുന്നത്.
by Midhun HP News | Nov 5, 2026 | Latest News, ജില്ലാ വാർത്ത
തിരുവനന്തപുരം: പാങ്ങപ്പാറയില്‍ 17കാരനായ അഭിറാമിനെ കൊന്ന് ചാക്കില്‍ കെട്ടി വിജനമായ പറമ്പില്‍ തള്ളിയ കേസില്‍ ഒരു യുവതിയെ പോലീസ് കസ്റ്റഡിയിലെടുത്തു. കേസിലെ രണ്ടാം പ്രതിയായ പങ്ങപ്പാറ സ്വദേശി ഉമര്‍ മുഫ്താറുമായി (22) അടുത്ത ബന്ധമുള്ള യുവതിയെയാണ് ബുധനാഴ്ച രാത്രി പൊലീസ് കസ്റ്റഡിയിലെടുത്തത്. കേസിലെ മുഖ്യപ്രതിയായ പ്രായപൂര്‍ത്തിയാകാത്ത ആള്‍ക്ക് വേണ്ടി അഭിറാമിനെയും മറ്റൊരു സുഹൃത്തിനെയും ലക്ഷ്യമിടാന്‍ പദ്ധതിയുള്ളതായി ഉമര്‍ മുഫ്താര്‍ തന്നോട് പറഞ്ഞിരുന്നതായി ഇവര്‍ പൊലീസിനോട് വെളിപ്പെടുത്തി. തെളിവ് നശിപ്പിക്കാനുള്ള പ്രതികളുടെ നീക്കങ്ങളെക്കുറിച്ചും യുവതിക്ക് അറിവുണ്ടായിരുന്നെന്നാണ് വിവരം.
വിശദമായ ചോദ്യം ചെയ്യലിനും വസ്തുതാപരിശോധനയ്ക്കും ശേഷമായിരിക്കും യുവതിയുടെ അറസ്റ്റ് രേഖപ്പെടുത്തുന്ന കാര്യത്തില്‍ തീരുമാനമെടുക്കുകയെന്ന് പൊലീസ് അറിയിച്ചു. കേസുമായി ബന്ധപ്പെട്ട് 17കാരനായ മുഖ്യപ്രതി, ഉമര്‍ മുഫ്താര്‍, മണക്കാട് സ്വദേശി ആനന്ദ ബി.എ (18) എന്നിവരെ ഇതിനകം അറസ്റ്റ് ചെയ്തിട്ടുണ്ട്. തിങ്കളാഴ്ചയാണ് ശ്രീകാര്യത്തിന് സമീപം പാങ്ങപ്പാറയിലെ വിജനമായ പറമ്പിലെ വാഴക്കൂട്ടത്തിനിടയില്‍ ചാക്കില്‍ കെട്ടിയ നിലയില്‍ അഭിറാമിന്റെ മൃതദേഹം കണ്ടെത്തിയത്. കാണാതായതിനെ തുടര്‍ന്ന് അഭിറാമിന്റെ മാതാപിതാക്കള്‍ ശ്രീകാര്യം പൊലീസില്‍ പരാതി നല്‍കിയിരുന്നു.
അഭിറാമിന്റെ സുഹൃത്തുമായി പ്രണയത്തിലായിരുന്ന പെണ്‍കുട്ടിയുമായി മുഖ്യപ്രതി മുന്‍പ് അടുപ്പത്തിലായിരുന്നു. ഇതാണ് കൊലപാതകത്തിലേക്ക് നയിച്ച വൈരാഗ്യത്തിന് കാരണം. അഭിറാമിന്റെ സുഹൃത്തായ ആനന്ദ എന്ന പെണ്‍കുട്ടിയെ ഉപയോഗിച്ചാണ് പ്രതികള്‍ അഭിറാമിനെ പങ്ങപ്പാറയിലെ വിജനമായ സ്ഥലത്തേക്ക് വിളിച്ചുവരുത്തിയത്. അഭിറാം വഴി സുഹൃത്തിനെ ഇവിടെയെത്തിക്കാനായിരുന്നു പ്രതികളുടെ നീക്കം. എന്നാല്‍ ഈ ശ്രമം പരാജയപ്പെട്ടതോടെ പ്രതികള്‍ അഭിറാമിനെ ആക്രമിക്കുകയും ബെല്‍റ്റ് ഉപയോഗിച്ച് ശ്വാസം മുട്ടിച്ച് കൊലപ്പെടുത്തുകയുമായിരുന്നു. തുടര്‍ന്ന് മൃതദേഹം ചാക്കിലാക്കി വിജനമായ പറമ്പില്‍ ഉപേക്ഷിക്കുകയായിരുന്നെന്ന് പൊലീസ് വ്യക്തമാക്കി.
by Midhun HP News | Nov 5, 2026 | Latest News, ജില്ലാ വാർത്ത
ആറ്റിങ്ങലിൽ ജനസേവന കേന്ദ്രത്തിൽ പരിചയസമ്പന്നരായ സ്റ്റാഫുകളെ ആവശ്യമുണ്ട്.
ബന്ധപ്പെടേണ്ട നമ്പർ: 8714163234
by Midhun HP News | Nov 5, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് മയക്കുമരുന്നു വ്യാപനം തടയാന്‍ ലക്ഷ്യമിട്ട് നടപ്പിലാക്കുന്ന ‘ഓപ്പറേഷന്‍ തൂഫാന്‍’ ദൗത്യത്തിന്റെ ഭാഗമായി, ലഹരിക്കടത്തിലൂടെ നിയമവിരുദ്ധമായി സമ്പാദിച്ച 40 പേരുടെ സ്വത്തുക്കള്‍ കണ്ടുകെട്ടാനുള്ള നടപടികള്‍ പൊലീസ് ആരംഭിച്ചു. ലഹരിക്കടത്തുമായി ബന്ധമുള്ള 148 ബാങ്ക് അക്കൗണ്ടുകള്‍ മരവിപ്പിച്ചതായും കേസുകളില്‍ ഉള്‍പ്പെട്ട 186 വാഹനങ്ങളും 801 മൊബൈല്‍ ഫോണുകളും കസ്റ്റഡിയില്‍ എടുത്തതായും നോഡല്‍ ഓഫീസര്‍ ഐജി പുട്ട വിമലാദിത്യ വാര്‍ത്താ സമ്മേളനത്തില്‍ അറിയിച്ചു.
ഓപ്പറേഷന്‍ തുടങ്ങിയശേഷം 8125 പരാതി ഫോണ്‍ വഴിയും 5668 പരാതികള്‍ വാട്ട്‌സ്ആപ്പ് വഴി ലഭിച്ചതായും അവര്‍ അറിയിച്ചു. ആഭ്യന്തര മന്ത്രിയുടെ ഓഫീസിലും പരാതികള്‍ ലഭിക്കുന്നുണ്ടെന്നും വന്‍ ജനകീയ പങ്കാളിത്തമാണ് ദൗത്യത്തിന് ലഭിക്കുന്നതെന്നും ഐജി വ്യക്തമാക്കി.
വിദേശത്ത് നിന്ന് ഇന്ത്യയിലേക്ക് ലഹരി കടത്തുന്നവരെ തിരിച്ചറിഞ്ഞിട്ടുണ്ട്. നാലു പേര്‍ക്കെതിരെ റെഡ് കോര്‍ണര്‍ നോട്ടീസും ഒരാള്‍ക്കെതിരെ ബ്ലൂ കോര്‍ണര്‍ നോട്ടീസും പത്തു പേര്‍ക്കെതിരെ ലുക്ക്ഔട്ട് നോട്ടീസും നല്‍കി. ഇന്റര്‍പോളിന്റെ സഹായത്തോടെ ഇവരെ പിടികൂടാനുള്ള നടപടികള്‍ തുടങ്ങി. കുറ്റകൃത്യങ്ങള്‍ ആവര്‍ത്തിക്കാതിരിക്കാന്‍ 2500ഓളം പേരുടെ വിവരങ്ങള്‍ ശേഖരിച്ച് നിരീക്ഷിച്ചുവരികയാണെന്നും ഐജി അറിയിച്ചു. ഇതുവരെ 15,515 പേര്‍ ഓപ്പറേഷന്‍ തൂഫാന്റെ ഭാഗമായി അറസ്റ്റിലായിട്ടുണ്ട്.
by Midhun HP News | Nov 5, 2026 | Latest News, ജില്ലാ വാർത്ത
കിളിമാനൂർ പാപ്പാല ജംഗ്ഷനിൽ ബൈക്കും പിക്കപ്പ് വാനും കൂട്ടിയിടിച്ച് ബൈക്ക് യാത്രികന് ഗുരുതരമായി പരിക്കേറ്റു ആറ്റിങ്ങൽ പൂവൻ പാറ സ്വദേശി 40 വയസ്സുള്ള ഷംനാദ് 40 നാണ് പരിക്കേറ്റത്. കഴിഞ്ഞ ദിവസം വൈകുന്നേരം അഞ്ചരയോടെയായിരുന്നു അപകടം. നിലമേൽ ഭാഗത്തുനിന്ന് കിളിമാനൂർ ഭാഗത്തേക്ക് എത്തിയ പിക്കപ്പ് വാനും എതിർ ദിശയിൽ നിന്ന് വന്ന ബൈക്കുമാണ് കൂട്ടിയിടിച്ചത്. അപകടത്തിൽ ഗുരുതരമായി പരിക്കേറ്റ ഷംനാദിനെ ഉടൻ വെഞ്ഞാറമൂട്ടിൽ സ്വകാര്യ ആശുപത്രിയിൽ പ്രവേശിപ്പിച്ചു.
by Midhun HP News | Nov 4, 2026 | Latest News, ജില്ലാ വാർത്ത
തിരുവനന്തപുരം: തിരുവനന്തപുരം ജില്ലയിൽ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്‍റെ മുന്നറിയിപ്പ്. അടുത്ത മൂന്നു മണിക്കൂറിൽ ജില്ലയിൽ ഓറഞ്ച് അലർട്ട് പ്രഖ്യാപിച്ചു.
ഇടിമിന്നലോട് കൂടിയ മഴയ്ക്കും മണിക്കൂറിൽ 40-50 കിലോമീറ്റർ വരെ വേഗതയിൽ ശക്തമായ കാറ്റിനുമുള്ള സാധ്യതയാണ് കേന്ദ്ര കാലാവസ്ഥ വകുപ്പ് പുറപ്പെടുവിച്ചിരിക്കുന്നത്. ആന്ധ്ര തീരത്ത് തീവ്ര ന്യൂനമർദ്ദം സ്ഥിതി ചെയ്യുന്നതിനാൽ ഞായറാഴ്ച വരെ മഴ തുടരും.
ലക്ഷദ്വീപിന് മുകളിലും, തെക്കൻ തമിഴ്നാട്ടിന് മുകളിലുമായി ചക്രവാത ചുഴികളും നിലനിൽക്കുന്നതും മഴ സ്വാധീനിക്കും. ബുധനാഴ്ച കോട്ടയം, ഇടുക്കി, വയനാട് ജില്ലകളിൽ യെലോ അലേര്‍ട്ട് പ്രഖ്യാപിച്ചിട്ടുണ്ട്. വ്യാഴാഴ്ച പത്തനംതിട്ട ജില്ലയിലും യെലോ അലര്‍ട്ടാണ്.
Recent Comments