by Midhun HP News | Mar 16, 2026 | Latest News, കേരളം
കോട്ടയം: കോട്ടയം: നിയമസഭാ തെരഞ്ഞെടുപ്പിനുള്ള കേരള കോണ്ഗ്രസ്(എം) സ്ഥാനാര്ഥികളെ പ്രഖ്യാപിച്ചു. കേരള കോണ്ഗ്രസ് മത്സരിക്കുന്ന 12 നിയോജക മണ്ഡലങ്ങളിലേക്കുള്ള സ്ഥാനാര്ഥികളെയാണ് പ്രഖ്യാപിച്ചത്. പാലായില് പാര്ട്ടി ചെയര്മാന് ജോസ് കെ. മാണി തന്നെ മത്സരിക്കും. പാര്ട്ടിയുടെ അഞ്ച് എംഎല്എമാരും അതാത് സീറ്റുകളില് തന്നെ മത്സരിക്കും. മന്ത്രി റോഷി അഗസ്റ്റിന് സിറ്റിങ് സീറ്റായ ഇടുക്കിയില് തന്നെ വീണ്ടും ജനവിധി തേടും. കടുത്തുരുത്തിയില് മുന് ജില്ലാ പഞ്ചായത്ത് പ്രസിഡന്റ് നിര്മ്മല ജിമ്മിയും ഇരിക്കൂറില് മാത്യു കുന്നപ്പള്ളിയും മത്സരിക്കും. കോണ്ഗ്രസില് നിന്ന് ഇന്ന് രാവിലെ രാജിവെച്ച നഗരസഭാ കൗണ്സിലര് ബിജു ചിറയത്താണ് ചാലക്കുടിയില് പാര്ട്ടിയുടെ സ്ഥാനാര്ഥി
സ്ഥാനാര്ഥികള്
1. പാലാ-ജോസ് കെ. മാണി
2. ഇടുക്കി-റോഷി അഗസ്റ്റിന്
3. കാഞ്ഞിരപ്പള്ളി- ഡോ. എന്. ജയരാജ്
4. ചങ്ങനാശ്ശേരി- അഡ്വ. ജോബ് മൈക്കിള്
5. പൂഞ്ഞാര്- അഡ്വ. സെബാസ്റ്റ്യന് കുളത്തുങ്കല്
6. ചാലക്കുടി- അഡ്വ. ബിജു ചിറയത്ത്
7. റാന്നി- പ്രമോദ് നാരായണന്
8. തൊടുപുഴ- സിറിയക് ചാഴികാടന്
9. പിറവം- സാബു കെ. ജേക്കബ്
10. ഇരിക്കൂര്- മാത്യു കുന്നപ്പള്ളി
11. കടുത്തുരുത്തി- നിര്മ്മല ജിമ്മി
12. പെരുമ്പാവൂര്- ബേസില് പോള്
by Midhun HP News | Mar 16, 2026 | Latest News, കേരളം
തൃശൂര്: സിപിഐ വിട്ട സി സി മുകുന്ദന് എംഎല്എ ബിജെപിയില് ചേര്ന്നു. ഉച്ചയോടെ തൃശൂരിലെ ബിജെപി ജില്ലാ കമ്മിറ്റി ഓഫീസായ നമോ ഭവനിലെത്തിയാണ് പാര്ട്ടി അംഗത്വം സ്വീകരിച്ചത്. മുകുന്ദനെ എഎന് രാധാകൃഷ്ണന് ഷാള് അണിയിച്ച് സ്വീകരിച്ചു. പിന്നാക്കക്കാര്ക്ക് എന്തെങ്കിലും ചെയ്യാന് കഴിയുന്ന പ്രസ്ഥാനമാണ് ബിജെപി എന്നാണ് മുകുന്ദന് പ്രതികരിച്ചത്.
സിപിഐ പുറത്താക്കിയതിനു ശേഷം മുകുന്ദന് കോണ്ഗ്രസ് പിന്തുണയില് സ്വതന്ത്ര സ്ഥാനാര്ഥിയാകാന് നീക്കം നടത്തിയിരുന്നു. എന്നാല് കോണ്ഗ്രസില് നിന്ന് ഉറപ്പ് കിട്ടാതെ വന്നതോടെ ബിജെപിയില് ചേരുകയായിരുന്നു. നാട്ടികയില് സി സി മുകുന്ദന് പകരം മുന് എംഎല്എ ഗീതാ ഗോപിയെ സിപിഐ സ്ഥാനാര്ഥിയാക്കിയതോടെയാണ് സി സി മുകുന്ദന് ഇടഞ്ഞത്. ഗീതാ ഗോപിയുടേത് പേയ്മെന്റ് സീറ്റ് ആണ് എന്ന് വിമര്ശിച്ച മുകുന്ദന്, പണം പിരിച്ചു നല്കാന് തന്നോട് പാര്ട്ടി ആവശ്യപ്പെട്ടെന്ന ഗുരുതര ആരോപണം ഉന്നയിച്ചിരുന്നു.
നാട്ടിക മണ്ഡലത്തില് സ്വതന്ത്രനായി മത്സരിക്കുകയാണെങ്കില് മുകുന്ദനെ പിന്തുണയ്ക്കേണ്ടെന്നായിരുന്നു കോണ്ഗ്രസ് തീരുമാനം. കോണ്ഗ്രസ് കൈവിട്ടതോടെയാണ് സി സി മുകുന്ദനെ കൂട്ടാന് ബിജെപി തീരുമാനിച്ചത്. അടുത്തിടെ ബിജെപിയില് ചേര്ന്ന സിപിഐ മുന് നേതാവും വൈക്കം മുന് എംഎല്എയുമായ കെ അജിത് ആണ് മുകുന്ദനെ ബിജെപി പാളയത്തില് എത്തിക്കാന് ശ്രമം നടത്തിയത്.
നാട്ടികയില് ബിജെപി സ്ഥാനാര്ത്ഥിയായി മുകുന്ദന് മത്സരിക്കുമെന്നാണ് സൂചന. ബിജെപിയുടെ വോട്ടുകള്ക്ക് പുറമെ, നിലവിലെ എംഎല്എയായിരുന്ന സ്വാധീനത്തില് മുകുന്ദന് നേടുന്ന വോട്ടുകളും തെരഞ്ഞെടുപ്പ് ഫലത്തില് നിര്ണായകമാകുമെന്നാണ് ബിജെപി വിലയിരുത്തുന്നത്. പട്ടികജാതി സംവരണമണ്ഡലമായ നാട്ടിക, ഇടതുപക്ഷത്തിന്റെ ശക്തമായ കോട്ടയായാണ് വിലയിരുത്തപ്പെടുന്നത്.
by Midhun HP News | Mar 16, 2026 | Latest News, കേരളം
കൊച്ചി: സംസ്ഥാനത്ത് സ്വര്ണവിലയില് വീണ്ടും ഇടിവ്. രാവിലെ 360 രൂപ കുറഞ്ഞ സ്വര്ണവിലയില് ഉച്ചയോടെ 1280 രൂപയാണ് കുറഞ്ഞത്. 1,15,440 രൂപയാണ് ഒരു പവന് സ്വര്ണത്തിന്റെ വില. ഉച്ചയോടെ ഗ്രാമിന് ആനുപാതികമായി 160 രൂപയാണ് കുറഞ്ഞത്. 14,430 രൂപയാണ് ഒരു ഗ്രാം സ്വര്ണത്തിന്റെ വില.
ഈ മാസം ഒന്നിന് 1,26,920 രൂപയായിരുന്നു സ്വര്ണവില. ഇത് തന്നെയാണ് ഈ മാസത്തെ ഏറ്റവും ഉയര്ന്ന നിരക്കും. പശ്ചിമേഷ്യന് സംഘര്ഷത്തിന്റെ തുടക്കത്തില് വന്കുതിപ്പ് നടത്തിയതിന് പിന്നാലെയാണ് സ്വര്ണവില ഇടിഞ്ഞത്. രണ്ടാഴ്ചയ്ക്കിടെ പവന് 11,000 രൂപയിലധികമാണ് കുറഞ്ഞത്.
സുരക്ഷിത നിക്ഷേപം എന്ന നിലയില് വിവിധ രാജ്യങ്ങളിലെ കേന്ദ്രബാങ്കുകള് സ്വര്ണം വാങ്ങിക്കൂട്ടുന്നത് അടക്കമുള്ള ഘടകങ്ങളാണ് സ്വര്ണവിലയില് പ്രതിഫലിക്കുന്നത്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്ണ വിലയിലെ റെക്കോര്ഡ്. ഡിസംബര് 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Mar 16, 2026 | Latest News, കേരളം
കൊല്ലം: കെപിസിസി സെക്രട്ടറി തൊടിയൂര് രാമചന്ദ്രന് ബിജെപിയില് ചേര്ന്നു. ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് അംഗത്വം നല്കി സ്വീകരിച്ചു. കരുനാഗപ്പള്ളി നിയോജക മണ്ഡലം യുഡിഎഫ് ചെയര്മാന് സ്ഥാനം രാജിവെച്ചതിന് പിന്നാലെയാണ് തൊടിയൂര് രാമചന്ദ്രന് ബിജെപിയില് ചേര്ന്നത്.
കഴിഞ്ഞ ദിവസമാണ് തൊടിയൂര് രാമചന്ദ്രന് കരുനാഗപ്പള്ളി നിയോജക മണ്ഡലം യുഡിഎഫ് ചെയര്മാന് സ്ഥാനം രാജിവെച്ചത്. മുതിര്ന്ന നേതാക്കള് ഇടപെട്ട് അനുനയ ചര്ച്ചകള്ക്ക് ശ്രമിച്ചെങ്കിലും തൊടിയൂര് രാമചന്ദ്രന് തന്റെ തീരുമാനത്തില് ഉറച്ചുനില്ക്കുകയായിരുന്നു. കരുനാഗപ്പള്ളി യുഡിഎഫ് ചെയര്മാന് ആയിരുന്നു തൊടിയൂര് രാമചന്ദ്രന്. മെഡിട്രീന ഹോസ്പിറ്റല് എം ഡി ഡോ. പ്രതാപ് കുമാര്, സിപിഎം കോവളം ഏരിയ കമ്മിറ്റി അംഗം എന് എ റഷീദ്, എന്സിപി നേതാവ് ദേവപ്രശാന്ത് എന്നിവരും ബിജെപിയില് ചേര്ന്നു.
കഴിഞ്ഞ 15 വര്ഷക്കാലമായി യുഡിഎഫ് കരുനാഗപ്പള്ളി നിയോജക മണ്ഡലം ചെയര്മാനായി പ്രവര്ത്തിച്ചു വരികയാണെന്നും യുഡിഎഫ് നേതൃത്വത്തില് നടത്തിയ എല്ലാ പരിപാടികളും വളരെ വിജയകരമായി നടത്തുവാന് കഴിഞ്ഞിട്ടുണ്ടെന്നും പറഞ്ഞ തൊടിയൂര് രാമചന്ദ്രന്, എംഎല്എയുടെ ഭാഗത്ത് നിന്നുണ്ടായിട്ടുള്ള തിക്താനുഭവങ്ങള് സഹിക്കാന് കഴിയുന്നതല്ലെന്നും പറഞ്ഞാണ് ചെയര്മാന് സ്ഥാനം രാജിവെച്ചത്.
by Midhun HP News | Mar 16, 2026 | Latest News, കേരളം
കണ്ണൂര്: കണ്ണൂര് എഡിഎം നവീന് ബാബുവിന്റെ മരണത്തില് തുടരന്വേഷണത്തിന് ഉത്തരവ്. തുടരന്വേഷണം ആവശ്യപ്പെട്ട് കുടുംബം സമര്പ്പിച്ച ഹര്ജിയിയില് തലശേരി ജില്ല സെഷന്സ് കോടതിയാണ് വിധി പറഞ്ഞത്.
നവീന് ബാബുവിന്റെ ഭാര്യയുടെ ഹര്ജിയിലാണ് സുപ്രധാന ഉത്തരവുണ്ടായിരിക്കുന്നത്. സിപിഎം നേതാവും മുന് ജില്ലാ പഞ്ചായത്ത് പ്രസിഡന്റുമായിരുന്നു പി പി ദിവ്യയുടെ ഔദ്യോഗിക നമ്പറിലെ മുഴുവന് വിശദാംശങ്ങളും ശേഖരിക്കണമെന്നതുള്പ്പെടെ നാല് കാര്യങ്ങള് അന്വേഷിച്ച് റിപ്പോര്ട്ട് നല്കാനാണ് കോടതി ആവശ്യപ്പെട്ടിരിക്കുന്നത്.
നവീന് ബാബുവിനെതിരായ കൈക്കൂലി ആരോപണത്തില് പ്രശാന്തന് ഗോള്ഡ് ലോണ് പണയം വെച്ച് ലഭിച്ച തുകയാണ് കൈക്കൂലിയായി നല്കിയതെന്ന് ആരോപിച്ചിരുന്നു. ഈ രേഖകള് അന്വേഷണത്തിന്റെ ഭാഗമാക്കണം. പള്ളിക്കുന്നില് ഒക്ടോബര് ആറാം തീയതി പ്രശാന്തനും നവീന് ബാബുവും കൂടിക്കാഴ്ച നടത്തിയെന്നതില് കൂടുതല് വിവങ്ങള് അന്വേഷിക്കണം. എഡിഎം കൈക്കൂലിക്കാരനാണെന്ന് സൂചിപ്പിക്കുന്ന തരത്തില് വിജിലന്സില് പരാതി നല്കിയിരുന്നു, കേസില് വിജിലന്സ് ഉദ്യോഗസ്ഥരുടെ ഇടപെടല്, മൊഴി എന്നിവ ഉള്പ്പെടെ രേഖപ്പെടുത്തണം ഇത്തരം കാര്യങ്ങളിലാണ് തുടരന്വേഷണം വേണമെന്ന് കോടതി ഉത്തവിട്ടിരിക്കുന്നത്.
കുറ്റപത്രത്തിലെ 13 പിഴവുകള് ചൂണ്ടികാട്ടിയാണ് നവീന് ബാബുവിന്റെ ഭാര്യ മഞ്ജുഷ കോടതിയെ സമീപിച്ചത്. പ്രതി ഭരിക്കുന്ന പാര്ട്ടിയുടെ ഭാഗമായിട്ടും ശരിയായ തെളിവുകള് ശേഖരിച്ചില്ലെന്നും പ്രശാന്തനില് നിന്ന് കൈക്കൂലി വാങ്ങിയെന്ന് വ്യാജകേസ് നിര്മ്മിക്കാന് ശ്രമിച്ചുവെന്നുമായിരുന്നു ഹര്ജിയിലെ വാദം. പി പി ദിവ്യയും പ്രശാന്തനുമായുള്ള ഫോണ് കോള് രേഖകള്, ചാറ്റുകള് എന്നിവ എസ്ഐടി പരിശോധിച്ചില്ല, പി പി ദിവ്യയുടെ ഡിലീറ്റ് ചെയ്ത ചാറ്റുകള് വീണ്ടെടുക്കണം, പ്രതിയുടെ ഫോണ് ഫോറന്സിക് പരിശോധനയ്ക്ക് വിധേയമാക്കണമെന്നും ഹര്ജിയില് ആവശ്യപ്പെട്ടിരുന്നു.
2024 ഒക്ടോബര് 15-നാണ് നവീന് ബാബുവിനെ കണ്ണൂര് പള്ളിക്കുന്നിലെ ക്വാര്ട്ടേഴ്സില് തൂങ്ങിമരിച്ച നിലയില് കണ്ടെത്തിയത്. തലേദിവസം കണ്ണൂര് കലക്ടറേറ്റില് നവീന് ബാബുവിന്റെ യാത്രയയപ്പ് ചടങ്ങ് നടക്കുമ്പോള് അതിലേക്ക് ക്ഷണിക്കപ്പെടാതെ കടന്നുവരുകയും അപകീര്ത്തികരമായി പ്രസംഗിക്കുകയും ചെയ്തുവെന്നാണ് ദിവ്യയുടെ പേരിലുള്ള ആരോപണം. പെട്രോള് പമ്പിന് എന്ഒസി നല്കാന് നവീന്ബാബു കൈക്കൂലി വാങ്ങിയെന്ന് പ്രശാന്തന് ആരോപിച്ചിരുന്നു.
by Midhun HP News | Mar 16, 2026 | Latest News, കേരളം
തൃശൂര്: നിയമസഭ തെരഞ്ഞെടുപ്പില് സിപിഐ വിട്ട് നാട്ടിക മണ്ഡലത്തില് സ്വതന്ത്രനായി മത്സരിക്കുന്ന സി സി മുകുന്ദനെ പിന്തുണയ്ക്കേണ്ടെന്ന് കോണ്ഗ്രസ് തീരുമാനം. നാട്ടികയില് സുനില് ലാലൂരിനെ കോണ്ഗ്രസ് സ്ഥാനാര്ത്ഥിയാക്കാനാണ് ധാരണ. കോണ്ഗ്രസ് പിന്തുണ തേടി സിസി മുകുന്ദന് ഡല്ഹിയില് പോയി നേതാക്കളുമായി ചര്ച്ച നടത്തിയിരുന്നു. ഇടതു വോട്ടുകള് സി സി മുകുന്ദന് പിടിച്ചാല് യുഡിഎഫിന് അത് ഗുണം ചെയ്യുമെന്നുമാണ് കോണ്ഗ്രസ് വിലയിരുത്തല്.
സിറ്റിങ്ങ് എംഎല്എയായിരുന്ന സി സി മുകുന്ദനെ തഴഞ്ഞ് ഗീതാ ഗോപിയെ സ്ഥാനാര്ത്ഥിയാക്കാന് തീരുമാനിച്ചതാണ് പ്രശ്നങ്ങള്ക്ക് അടിസ്ഥാനം. നാട്ടികയില് സിപിഐ സ്ഥാനാര്ഥിയായി മത്സരിക്കുന്ന ഗീതാ ഗോപിയുടേത് ‘പേയ്മെന്റ് സീറ്റ്’ ആണെന്ന ആരോപണത്തിന് പിന്നാലെയാണ് സി സി മുകുന്ദനെ പുറത്താക്കിയത്. പിന്നാലെ നാട്ടികയില് സ്വതന്ത്രനായി മത്സരിക്കുമെന്ന് പ്രഖ്യാപിക്കുകയായിരുന്നു.
കോണ്ഗ്രസ് കൈവിട്ട സി സി മുകുന്ദനെ കൂടെ കൂട്ടാന് ബിജെപി തീരുമാനിച്ചു. അടുത്തിടെ പാര്ട്ടിയില് ചേര്ന്ന, സിപിഐ മുന് നേതാവും വൈക്കം മുന് എംഎല്എയുമായ കെ അജിത് ആണ് മുകുന്ദനെ ബിജെപി പാളയത്തില് എത്തിക്കാന് ശ്രമം നടത്തിയത്. ഇന്ന് ഉച്ചയ്ക്ക് മുകുന്ദന് ബിജെപി ഓഫീസിലെത്തി പാര്ട്ടി അംഗത്വം സ്വീകരിക്കും. നാട്ടികയില് ബിജെപി സ്ഥാനാര്ത്ഥിയായി മുകുന്ദന് മത്സരിക്കുമെന്നാണ് സൂചന.
ആംആദ്മി പാര്ട്ടി നേതാക്കളും മുകുന്ദനുമായി ചര്ച്ച നടത്തിയിരുന്നു. ബിജെപിയുടെ വോട്ടുകള്ക്ക് പുറമെ, നിലവിലെ എംഎല്എയായിരുന്ന സ്വാധീനത്തില് മുകുന്ദന് നേടുന്ന വോട്ടുകളും തെരഞ്ഞെടുപ്പ് ഫലത്തില് നിര്ണായകമാകുമെന്നാണ് ബിജെപി വിലയിരുത്തുന്നത്. പട്ടികജാതി സംവരണമണ്ഡലമായ നാട്ടിക, ഇടതുപക്ഷത്തിന്റെ ശക്തമായ കോട്ടയായാണ് വിലയിരുത്തപ്പെടുന്നത്.
Recent Comments