by Midhun HP News | Oct 27, 2026 | Latest News, കായികം
വെല്ലിംഗ്ടണ്‍: ന്യൂസിലന്‍ഡിനെതിരായ ടി20 പരമ്പരയിലെ മൂന്നാം മത്സരത്തിൽ 8 വിക്കറ്റിന്റെ ആധികാരിക ജയവുമായി ടി20 പരമ്പര സ്വന്തമാക്കി ഇന്ത്യ. ആദ്യം ബാറ്റ് ചെയ്ത് ന്യൂസിലന്‍ഡ് ഉയര്‍ത്തിയ 199 റണ്‍സിന്‍റെ വിജയലക്ഷ്യം അഭിഷേക് ശര്‍മയുടെ റെക്കോര്‍ഡ് സെഞ്ചുറിയുടെ(38 പന്തില്‍ 113) യും വൈഭസ് സൂര്യവംശിയുടെ വെടിക്കെട്ട് ബാറ്റിംഗിന്‍റെയും(19 പന്തില്‍ 45) കരുത്തില്‍ 6.4 ഓവര്‍ ബാക്കിനിര്‍ത്തി നാല് വിക്കറ്റ് നഷ്ടത്തില്‍ ഇന്ത്യ മറികടന്നു. 15 പന്തില്‍ അര്‍ധസെഞ്ചുറി തികച്ച അഭിഷേക് 35 പന്തില്‍ സെഞ്ചുറിയിലെത്തി. 11 സിക്സും 9 ഫോറും അടങ്ങുന്നതാണ് അഭിഷേകിന്‍റെ വെടിക്കെട്ട് സെഞ്ചുറി.
അഭിഷേകിനൊപ്പം പവര്‍ പ്ലേയില്‍ തകര്‍ത്തടിച്ച വൈഭവ് 19 പന്തില്‍ നാല് സിക്സും നാല് ഫോറും അടക്കമാണ് 45 റണ്‍സെടുത്തത്. മലയാളി താരം സഞ്ജു സാംസണും(13 പന്തില്‍ 18) ക്യാപ്റ്റൻ ശ്രേയസ് അയ്യരും(10 പന്തില്‍ 5) വിജയത്തിനരികെ വീണെങ്കിലും നമൻ ധിറും(4*) തിലക് വര്‍മയും(1*) ചേര്‍ന്ന് ഇന്ത്യയെ വിജയവര കടത്തി. ജയത്തോടെ അഞ്ച് മത്സര ടി20 പരമ്പര ഇന്ത്യ 3-0ന് സ്വന്തമാക്കി. പരമ്പരയിലെ നാലാം മത്സരം വെള്ളിയാഴ്ച ഓക്‌ലന്‍ഡില്‍ നടക്കും. സ്കോര് ന്യൂസിലന്‍ഡ് 20 ഓവറില്‍ 198-3, ഇന്ത്യ 13.2 ഓവറില്‍ 199-4.
അഭിഷേക് ആറാട്ട്-വൈഭവ് വെടിക്കെട്ട്
199 റണ്‍സ് വിജയലക്ഷ്യത്തിലേക്ക് ബാറ്റ് വീശിയ ഇന്ത്യക്കായി അഭിഷേക് ശര്‍മക്കൊപ്പം വൈഭവ് സൂര്യവംശിയാണ് ഇന്നിംഗ്സ് ഓപ്പണ്‍ ചെയ്തത്. ജേക്കബ് ഡഫിയെറിഞ്ഞ ആദ്യ പന്ത് തന്നെ ബൗണ്ടറി കടത്തിയാണ് വൈഭവ് തുടങ്ങിയത്. നേരിട്ട ആദ്യ പന്ത് സിക്സിന് തൂക്കിയ അഭിഷേകും വൈഭവും ചേര്‍ന്ന് ആദ്യ ഓവറില്‍ തന്നെ 26 റണ്‍സടിച്ചു.ആദ്യം മില്‍നെ എറിഞ്ഞ രണ്ടാം ഓവറിലും അടിതുടര്‍ന്ന ഇരുവരും ചേര്‍ന്ന് 17 റണ്‍സ് കൂടി അടിച്ചെടുത്തു. അഭിഷേകിനെ വീഴ്ത്താന്‍ മൂന്നാം ഓവറില്‍ മൈക്കല്‍ ബ്രേസ്‌വെല്ലിനെ കൊണ്ടുവെന്നെങ്കിലും രണ്ട് സിക്സും രണ്ട് ഫോറും പറത്തിയ അഭിഷേകും വൈഭവും ചേര്‍ന്ന് ഇന്ത്യയെ 50 കടത്തി.നാലാം ഓവറില്‍ പന്തെറിയാനെത്തിയ കെയ്ല്‍ ജൈമിസണെതിരെ 20 റണ്‍സും അഞ്ചാം ഓവറില്‍ ആദം മില്‍നെക്കെതിരെ 16 റണ്‍സും അടിച്ച് അഭിഷേക്-വൈഭവ് സഖ്യം ഇന്ത്യയെ 100 കടത്തി.
15 പന്തില്‍ അഭിഷേക് അര്‍ധസെഞ്ചുറി തികച്ചു. പവര്‍ പ്ലേയിലെ അവസാന ഓവറില്‍ ജേക്കബ് ഡഫിക്കെതിരെ 18 റണ്‍സ് കൂടി നേടി ഇന്ത്യയെ 118 റണ്‍സിലെത്തിച്ചതോടെ ടി20 ചരിത്രത്തിലെ ഏറ്റവും ഉയര്‍ന്ന പവര്‍ പ്ലേ സ്കോറെന്ന റെക്കോര്‍ഡും സ്വന്തമാക്കി. പവര്‍പ്ലേക്ക് ശേഷവും അഭിഷേക് അടി തുടര്‍ന്നു. എട്ടാം ഓവറിലെ ആദ്യ പന്തില്‍ വൈഭവിനെ പുറത്താക്കി ഫിഷര്‍ കിവീസിന് നേരിയ ആശ്വാസം നല്‍കി. 29 പന്തില്‍ 95 റണ്‍സിലെത്തിയ അഭിഷേക് ജൈമിസണെ ബൗണ്ടറി കടത്തി 35 പന്തില്‍ സെഞ്ചുറി തികച്ചു. പിന്നാലെ വീണ്ടും സിക്സും ഫോറും പറത്തിയ അഭിഷേക് പത്താം ഓവറിലെ അവസാന പന്തില്‍ വീണു. വിജയത്തിനരികെ ശ്രേയസ് അയ്യര്‍(10 പന്തില്‍ 5), സഞ്ജു സാംസണും(13 പന്തില്‍ 18) നിരാശപ്പെടുത്തി മടങ്ങിയെങ്കിലും നമൻ ധിറും തിലക് വര്‍മയും ചേര്‍ന്ന് ഇന്ത്യയെ അനായാസം വിജയവര കടത്തി. കിവീസിനായി കെയ്ൽ ജൈമിസണ്‍ രണ്ട് വിക്കറ്റെടുത്തു.
നേരത്തെ ടോസ് നഷ്ടമായി ആദ്യം ബാറ്റ് ചെയ്ത ന്യൂസിലന്‍ഡ് ഡാരില്‍ മിച്ചലിന്റെ വെടിക്കെട്ട് അര്‍ധസെഞ്ചുറി മികവില്‍ 20 ഓവറില്‍ 200 റണ്‍സടിച്ചു. 52 പന്തില്‍ 89 റണ്‍സെടുത്ത് ടോപ് സ്കോററായ മിച്ചലിന് പുറമെ ഫിന്‍ അലന്‍(25 പന്തില്‍ 40), ബെവോൺ ജേക്കബ്സ്(23 പന്തില്‍ 39 എന്നിവരും കിവീസിനായി തിളങ്ങി. ഇന്ത്യക്കായി അര്‍ഷ്ദീപ് സിംഗ് 33 റണ്‍സിന് ഒരു വിക്കറ്റെടുത്തപ്പോള്‍ നിതീഷ് കുമാര്‍ റെഡ്ഡി 23 റണ്‍സിന് ഒരു വിക്കറ്റെടുത്തു.
by Midhun HP News | Oct 27, 2026 | Latest News, കായികം
വെല്ലിങ്ടന്‍: ന്യൂസിലന്‍ഡിനെതിരായ രണ്ടാം ടി20യില്‍ ഇന്ത്യക്ക് 100 റണ്‍സ് വിജയലക്ഷ്യം. അപരാജിത അര്‍ധ സെഞ്ച്വറിയുമായി കളം നിറഞ്ഞ ഡാരില്‍ മിച്ചലിന്റെ (52 പന്തില്‍ 89*) തകര്‍പ്പന്‍ ബാറ്റിങ് കരുത്തിലാണ് കിവികള്‍ മികച്ച സ്കോര് കണ്ടെത്തിയത്. 25 പന്തില്‍ 40 റണ്‍സടിച്ച ഫിന്‍ അലനും ആതിഥേയ നിരയില്‍ തിളങ്ങി.
നിശ്ചിത ഓവറില്‍ മൂന്ന് വിക്കറ്റ് നഷ്ടത്തിലാണ് ന്യൂസിലന്‍ഡ് 198 റണ്‍സ് നേടിയത്. മത്സരത്തില്‍ ടോസ് നേടിയ ഇന്ത്യ ഫീല്‍ഡിങ് തെരഞ്ഞെടുക്കുകയായിരുന്നു.
രണ്ടാം ഓവറില്‍ ടിം സീഫെര്‍ട്ടിനെ (2) പുറത്താക്കി അര്‍ഷ്ദീപ് സിങ് കിവികളെ ഞെട്ടിച്ചെങ്കിലും പിന്നീടങ്ങോട്ട് വമ്പന്‍ ബാറ്റിങ് വെടിക്കെട്ടിനാണ് ഹെന്റി സ്റ്റേഡിയം സാക്ഷ്യം വഹിച്ചത്.
by Midhun HP News | Oct 27, 2026 | Latest News, കായികം
വെല്ലിങ്ടന്‍: ന്യൂസിലന്‍ഡിനെതിരെയുള്ള മൂന്നാം ടി20 പോരാട്ടത്തിന് കളമൊരുങ്ങുമ്പോള്‍, ക്രിക്കറ്റ് ലോകം ആകാംക്ഷയോടെ ഉറ്റുനോക്കുന്നത് വെല്ലിങ്ടനിലെ ഹെന്റി സ്റ്റേഡിയത്തിലേക്കാണ്. പരമ്പരയില്‍ ഇതിനകം 2-0 ന് മുന്നിലെത്തിയ ഇന്ത്യ, ഈ മത്സരവും ജയിച്ച് പരമ്പര സ്വന്തമാക്കാനുള്ള പോരാട്ടത്തിനൊരുങ്ങുമ്പോള്‍, തങ്ങളുടെ പ്രതീക്ഷകള്‍ നിലനിര്‍ത്താന്‍ ജീവനുവേണ്ടി പൊരുതുകയാണ് കിവീസ് പട. ഇന്ത്യന്‍ സമയം ഉച്ചയ്ക്ക് 12.30നാണ് മത്സരം ആരംഭിക്കുന്നത്.
ക്രൈസ്റ്റ്ചര്‍ച്ചില്‍ നടന്ന ആദ്യ രണ്ട് മത്സരങ്ങളിലും സമാനതകളില്ലാത്ത ത്രില്ലര്‍ വിജയങ്ങളാണ് ഇന്ത്യ സ്വന്തമാക്കിയത്. രണ്ട് കളികളിലും വമ്പന്‍ ലക്ഷ്യങ്ങള്‍ പിന്തുടര്‍ന്നിറങ്ങിയ ഇന്ത്യന്‍ ബാറ്റിങ് നിര, അവസാന ഓവറുകളിലെ കരുത്തുറ്റ പ്രകടനത്തിലൂടെ 4 വിക്കറ്റിന്റെ തകര്‍പ്പന്‍ ജയങ്ങള്‍ പിടിച്ചെടുക്കുകയായിരുന്നു. സഞ്ജു സാംസണ്‍, തിലക് വര്‍മ, നമന്‍ ധീര്‍, നിതീഷ് കുമാര്‍ റെഡ്ഡി തുടങ്ങി ഓരോ മത്സരത്തിലും ഉത്തരവാദിത്തം ഏറ്റെടുത്ത് കളിച്ച താരങ്ങളുടെ ബാറ്റിങ് മികവാണ് ഇന്ത്യയുടെ വിജയ രഹസ്യം.
മറുവശത്ത്, ന്യൂസിലന്‍ഡിന്റെ അവസ്ഥ അത്രകണ്ട് സുഖകരമല്ല. ഗ്ലെന്‍ ഫിലിപ്‌സും ബെവോന്‍ ജേക്കബ്സും അടക്കമുള്ള ബാറ്റര്‍മാര്‍ മികച്ച പ്രകടനം പുറത്തെടുത്തെങ്കിലും, ഡെത്ത് ഓവറുകളിലെ പാളിച്ചകള്‍ കിവീസിനെ നിരന്തരം വേട്ടയാടുന്നു. പരിക്കുകളുടെ വലിയ തിരിച്ചടിയും ആതിഥേയരെ ഉലയ്ക്കുന്നുണ്ട്. പ്രധാന പേസര്‍ മാറ്റ് ഹെന്റിക്ക് പരമ്പര മുഴുവന്‍ നഷ്ടമായി, ലോക്കി ഫെര്‍ഗൂസനാകട്ടെ നിര്‍ണായക മത്സരത്തില്‍ നിന്നും പുറത്താണ്. നായകന്‍ മിച്ചല്‍ സാന്റ്‌നറും സംഘവും പരമ്പരയില്‍ ജീവശ്വാസം നിലനിര്‍ത്തണമെങ്കില്‍ ഇന്ന് അത്ഭുതങ്ങള്‍ കാണിക്കേണ്ടിവരും.
വെല്ലിങ്ടനിലെ കാറ്റും വ്യത്യസ്തമായ പിച്ച് സ്വഭാവവും ഇരു ടീമുകളുടെയും പേസര്‍മാര്‍ക്കും മുന്‍നിര ബാറ്റര്‍മാര്‍ക്കും കടുത്ത പരീക്ഷണമാകും സമ്മാനിക്കുക. ടോസ് നേടുന്ന നായകന്‍ ഫീല്‍ഡിങ് തെരഞ്ഞെടുക്കാനാണ് സാധ്യതയെന്നാണ് വിദഗ്ധരുടെ വിലയിരുത്തല്‍. പരമ്പര തൂത്തുവാരി ചരിത്രമെഴുതാന്‍ ഇന്ത്യ ഇറങ്ങുമ്പോള്‍, അഭിമാനം കാക്കാനുള്ള മരണപോരാട്ടത്തിലാണ് കിവീസ്. ക്രിക്കറ്റ് പ്രേമികള്‍ക്ക് മറ്റൊരു ആവേശരാത്രി കൂടി സമ്മാനിക്കാന്‍ കളിക്കളമൊരുങ്ങി കഴിഞ്ഞു.
ഇഷാന് ഇന്നുമില്ല
പരമ്പരയിലെ ആദ്യ മത്സരത്തിനിടെ പരിക്കേറ്റ ബാറ്റര്‍ ഇഷാന് കിഷന്‍ ഇന്നത്തെ മത്സരത്തിലും കളിക്കില്ലെന്ന് ബിസിസിഐ അറിയിച്ചിട്ടുണ്ട്. യുവതാരം വൈഭവ് സൂര്യവംശിയെ വീണ്ടും പ്ലേയിങ് ഇലവനില്‍ ഉള്‍പ്പെടുത്തിയേക്കും. കഴിഞ്ഞ മത്സരത്തില്‍ വൈഭവിനെ മൂന്നാം നമ്പരില്‍ കളിപ്പിച്ചതില്‍ വലിയ വിമര്‍ശനങ്ങള്‍ ഉയര്‍ന്നിരുന്നു. താരത്തെ ഓപ്പണിങ് സ്‌പോട്ടില്‍ ഇറക്കണമെന്നും പരിചയ സമ്പന്നനായ സഞ്ജു സാംസണിനെ മൂന്നാം നമ്പരില്‍ കളിപ്പിക്കണമെന്നും ആവശ്യപ്പെട്ട് മുന്‍ താരങ്ങളുള്‍പ്പെടെ രംഗത്തെത്തിയിട്ടുണ്ട്. ടീം മാനേജ്‌മെന്റിന്റെ അന്തിമ തീരുമാനമറിയാന്‍ ടോസ് വരെ കാത്തിരിക്കണം.
by Midhun HP News | Oct 26, 2026 | Latest News, കായികം
വെല്ലിങ്ടന്‍: ന്യൂസിലന്‍ഡിനെതിരായ മൂന്നാം ടി20 മത്സരത്തില്‍ നിന്ന് വിക്കറ്റ് കീപ്പര്‍ ബാറ്റര്‍ ഇഷാന് കിഷന്‍ പുറത്ത്. പരിക്കിനെ തുടര്‍ന്ന് വെല്ലിങ്ടനില്‍ നടക്കുന്ന മത്സരത്തില്‍ അദ്ദേഹത്തിന് കളിക്കാനാകില്ലെന്ന് ബിസിസിഐ സ്ഥിരീകരിച്ചു. പരമ്പരയിലെ ആദ്യ മത്സരത്തിനിടെയാണ് ഇഷാന് തുടയുടെ അടിഭാഗത്ത് പരിക്കേറ്റത്. പരിക്ക് പൂര്‍ണമായി ഭേദമാകാത്തതിനാല്‍ ഒക്ടോബര്‍ ചൊവ്വാഴ്ച നടക്കുന്ന മൂന്നാം ടി20യില്‍ താരം കളിക്കില്ല. നിലവില്‍ ബിസിസിഐ മെഡിക്കല്‍ സംഘം അദ്ദേഹത്തിന്റെ ആരോഗ്യനില നിരീക്ഷിച്ചുവരികയാണ്.
ഇഷാന് പകരക്കാരനായി കുമാര്‍ കുശാഗ്രയെ ടീമില്‍ ഉള്‍പ്പെടുത്തിയിട്ടുണ്ടെങ്കിലും, കഴിഞ്ഞ മത്സരത്തില്‍ താരത്തിന് പ്ലേയിങ് ഇലവനില്‍ അവസരം ലഭിച്ചിരുന്നില്ല. ഇഷാന്റെ അഭാവത്തില്‍ രണ്ടാം ടി20 മത്സരത്തില്‍ മൂന്നാം നമ്പറിലാണ് യുവതാരം വൈഭവ് സൂര്യവംശി ബാറ്റ് ചെയ്യാന്‍ ഇറങ്ങിയത്. 8 പന്തില്‍ 4 റണ്‍സ് മാത്രം എടുത്ത് വൈഭവ് പുറത്തായിരുന്നു. ഓപ്പണറായി മാത്രം കളിച്ചു ശീലമുള്ള വൈഭവിന് വണ്‍ ഡൗണ്‍ പൊസിഷനില്‍ തിളങ്ങാന്‍ കഴിഞ്ഞില്ല.
ആര്‍ അശ്വിന്‍, ദിനേഷ് കാര്‍ത്തിക് തുടങ്ങിയ മുന്‍ താരങ്ങള്‍ വൈഭവിനെ അദ്ദേഹത്തിന്റെ സ്ഥിരം പൊസിഷനായ ഓപ്പണിങ്ങില്‍ തന്നെ കളിപ്പിക്കണമെന്ന് ആവശ്യപ്പെട്ടിട്ടുണ്ട്. മലയാളി താരം സഞ്ജു സാംസണെ മൂന്നാം നമ്പരിലേക്ക് മാറ്റണമെന്നും മുന്‍ താരങ്ങള്‍ ആവശ്യപ്പെടുന്നു. മൂന്നാം ടി20യിലും ഇഷാന് പുറത്തായ സാഹചര്യത്തില്‍, വൈഭവ് സൂര്യവംശിക്ക് തന്റെ പ്രതിഭ തെളിയിക്കാന്‍ മറ്റൊരു അവസരം കൂടി ലഭിക്കുമോ എന്നാണ് ക്രിക്കറ്റ് ലോകം ഉറ്റുനോക്കുന്നത്.
by Midhun HP News | Oct 24, 2026 | Latest News, കായികം
ക്രൈസ്റ്റ്ചര്‍ച്ച്: രണ്ടാം ടി20 മത്സരത്തില്‍ ന്യൂസിലന്‍ഡിനെതിരെ ഇന്ത്യയ്ക്ക് 181 റണ്‍സ് വിജയലക്ഷ്യം. ന്യൂസിലന്‍ഡ് നിശ്ചിത 20 ഓവറില്‍ അഞ്ചുവിക്കറ്റ് നഷ്ടത്തില്‍ 180 റണ്‍സ് ആണ് അടിച്ചുകൂട്ടിയത്. ഗ്ലെന്‍ ഫിലിപ്‌സിന്റെയും ബെവന്‍ ജേക്കബ്സ് എന്നിവരുടെ ബാറ്റിങ്ങിന്റെ പിന്‍ബലത്തിലാണ് ന്യൂസിലന്‍ഡ് ഭേദപ്പെട്ട സ്കോര് നേടിയത്. ആദ്യ ടി20ല്‍ ഇന്ത്യ വിജയിച്ചിരുന്നു.
ഗ്ലെന്‍ ഫിലിപ്പ്സ് ആണ് ടോപ്പ് സ്‌കോറര്‍. 43 പന്തില്‍ നാലു സിക്‌സിന്റെയും നാലു ബൗണ്ടറികളുടെയും അകമ്പടിയോടെ 70 റണ്‍സ് ആണ് ഫിലിപ്‌സിന്റെ സമ്പാദ്യം. 46 പന്തില്‍ 58 റണ്‍സ് നേടിയ ബെവന്‍ ജേക്കബ്സ് മികച്ച പിന്തുണ നല്‍കി. ഇന്ത്യയ്ക്ക് വേണ്ടി അര്‍ഷ്ദീപ് സിങ് രണ്ടുവിക്കറ്റുകള്‍ നേടി.
ആദ്യ ടി20യില്‍ ആദ്യം ബാറ്റ് ചെയ്ത കിവീസ് 225 റണ്‍സ് ഉയര്‍ത്തിയെങ്കിലും നാല് പന്തുകള്‍ അവശേഷിക്കെ ഇന്ത്യ വിജയത്തിലെത്തി.
ഇന്ത്യ ഇലവന്‍: ശ്രേയസ് അയ്യര്‍ (ക്യാപ്റ്റന്‍), വൈഭവ് സൂര്യവംശി, സഞ്ജു സാംസണ്‍, അഭിഷേക് ശര്‍മ, തിലക് വര്‍മ, നമാന്‍ ധിര്‍, നിതീഷ് കുമാര്‍ റെഡ്ഡി, അക്ഷര്‍ പട്ടേല്‍, ഭുവനേശ്വര്‍ കുമാര്‍, അര്‍ഷ്ദീപ് സിങ്, പ്രിന്‍സ് യാദവ്.
by Midhun HP News | Oct 24, 2026 | Latest News, കായികം
ക്രൈസ്റ്റ്ചര്‍ച്ച്: ന്യൂസിലന്‍ഡിനെതിരായ രണ്ടാം ടി20 പോരാട്ടത്തിന് അല്‍പ്പ സമയത്തിനുള്ളില്‍ ഇന്ത്യ ഇറങ്ങും. ടോസ് നേടി ഇന്ത്യ ബൗളിങ് തിരഞ്ഞെടുത്തു. ഇന്ത്യന്‍ ടീമില്‍ പരിക്കേറ്റ ഇഷാന് പകരം പതിനഞ്ചുകാരനായ വൈഭവ് സൂര്യവംശി ഇടംപിടിച്ചു. മായങ്ക് യാദവിന് പകരം പ്രിന്‍സ് യാദവ് ഇടംപിടിച്ചു.
ആദ്യ ടി20യിലും ടോസ് നേടിയ ഇന്ത്യ ബാറ്റിങ് തിരഞ്ഞെടുക്കുകയായിരുന്നു. ആദ്യം ബാറ്റ് ചെയ്ത കിവീസ് 225 റണ്‍സ് ഉയര്‍ത്തിയെങ്കിലും നാല് പന്തുകള്‍ അവശേഷിക്കെ ഇന്ത്യ വിജയത്തിലെത്തി. അവര്‍ ഉയര്‍ത്തുന്ന റണ്‍സ് ചെയ്‌സ് ചെയ്ത് വിജയം നേടാമെന്ന ആത്മവിശ്വാസമാണ് ഇന്ത്യ വീണ്ടും ബൗളിങ് തിരഞ്ഞെടുക്കാന്‍ കാരണമായത്
ഇന്ത്യ ഇലവന്‍: ശ്രേയസ് അയ്യര്‍ (ക്യാപ്റ്റന്‍), വൈഭവ് സൂര്യവംശി, സഞ്ജു സാംസണ്‍, അഭിഷേക് ശര്‍മ, തിലക് വര്‍മ, നമാന്‍ ധിര്‍, നിതീഷ് കുമാര്‍ റെഡ്ഡി, അക്ഷര്‍ പട്ടേല്‍, ഭുവനേശ്വര്‍ കുമാര്‍, അര്‍ഷ്ദീപ് സിങ്, പ്രിന്‍സ് യാദവ്.
Recent Comments