by Midhun HP News | Oct 23, 2026 | Latest News, കായികം, ജില്ലാ വാർത്ത
ഖെബര്‍ഹ: ഓസ്‌ട്രേലിയക്കെതിരായ രണ്ടാം ക്രിക്കറ്റ് ടെസ്റ്റില്‍ ദക്ഷിണാഫ്രിക്ക ഇന്നിങ്‌സ് ജയം സ്വന്തമാക്കിയതോടെ ലോക ടെസ്റ്റ് ചാംപ്യന്‍ഷിപ്പ് പോരാട്ടം കനക്കുന്നു. ഇന്നിങ്‌സിനും 31 റണ്‍സിനുമാണ് പ്രോട്ടീസ് വിജയിച്ചത്. ആദ്യ ടെസ്റ്റില്‍ ഓസ്‌ട്രേലിയയും വിജയിച്ചിരുന്നു.
നിലവില്‍ ടെസ്റ്റ് ചാംപ്യന്‍ഷിപ്പ് പോയിന്റ് പട്ടികയില്‍ ഓസ്‌ട്രേലിയ ഒന്നാമതും ന്യൂസിലന്‍ഡ് രണ്ടാം സ്ഥാനത്തും ദക്ഷിണാഫ്രിക്ക മൂന്നാം സ്ഥാനത്തുമുണ്ട്. തോറ്റെങ്കിലും ഓസ്‌ട്രേലിയയുടെ ഒന്നാം സ്ഥാനത്തിനു ഇളക്കമൊന്നും വന്നില്ല. എന്നാല്‍ അവര്‍ക്ക് ലീഡുയര്‍ത്താന്‍ സാധിക്കാത്തത് തിരിച്ചടിയാണ്. ഇന്ത്യ ഉള്‍പ്പെടെയുള്ള ടീമുകള്‍ക്കാണ് ഇതോടെ പ്രതീക്ഷ വര്‍ധിച്ചത്.
നിലവില്‍ ഓസ്‌ട്രേലിയക്ക് 75.00 ശതമാനം പോയിന്റുകളും ന്യൂസിലന്‍ഡിന് 72.22 ശതമാനം പോയിന്റും ദക്ഷിണാഫ്രിക്കയ്ക്ക് 66.67 ശതമാനവുമാണ് പോയിന്റ്. ഇന്ത്യ അഞ്ചാം സ്ഥാനത്താണ് നില്‍ക്കുന്നത്. പട്ടികയില്‍ ഇന്ത്യയേക്കാള്‍ ചെറിയ പോയിന്റ് മുന്‍തൂക്കത്തില്‍ ബംഗ്ലാദേശാണ് നാലാമത് നില്‍ക്കുന്നത്.
ഇന്ത്യന്‍ സാധ്യത
ടെസ്റ്റ് ചാംപ്യന്‍ഷിപ്പിലെ ഈ സൈക്കിളില്‍ ഇന്ത്യക്ക് ഇനി 7 മത്സരങ്ങളാണ് ശേഷിക്കുന്നത്. രണ്ടാം സ്ഥാനത്തുള്ള ന്യൂസിലന്‍ഡുമായി 2 ടെസ്റ്റ് മത്സരങ്ങളാണ് ഇന്ത്യ കളിക്കാനൊരുങ്ങുന്നത്. പിന്നാലെ സ്വന്തം മണ്ണില്‍ 5 ടെസ്റ്റ് പോരാട്ടങ്ങളില്‍ ഇന്ത്യ ഓസ്‌ട്രേലിയയുമായും ഏറ്റുമുട്ടും. 60 ശതമാനം പോയിന്റുകളാണ് ഇന്ത്യക്ക് ഫൈനലിലെത്താന്‍ വേണ്ടത്. ഈ ഏഴ് ടെസ്റ്റുകളില്‍ നിന്നായി ഇന്ത്യ 62 പോയിന്റുകള്‍ നേടണം. മാത്രമല്ല രണ്ടില്‍ കൂടുതല്‍ മത്സരങ്ങളില്‍ തോല്‍ക്കാനും പാടില്ല.
അത്ര എളുപ്പമല്ല ഇന്ത്യക്ക് മുന്നിലുള്ള കടമ്പ. അടുത്ത 7 ടെസ്റ്റില്‍ 5 ടെസ്റ്റുകളെങ്കിലും ജയിക്കണം. അതുമാത്രം പോര ഓസ്‌ട്രേലിയ, ന്യൂസിലന്‍ഡ്, ദക്ഷിണാഫ്രിക്ക ടീമുകള്‍ തങ്ങളുടെ ബാക്കിയുള്ള മത്സരങ്ങളില്‍ രണ്ടെണ്ണത്തിലെങ്കിലും പോയിന്റും നഷ്ടപ്പെടുത്തണം.
പട്ടികയില്‍ നാലാമതുള്ള ബംഗ്ലാദേശും ഇന്ത്യയെ പോലെ മറ്റ് മത്സരങ്ങളുടെ ഫലവും ഒപ്പം സ്വന്തം മുന്നേറ്റവും ആശ്രയിച്ചാണ് നില്‍ക്കുന്നത്. 6 കളികളാണ് സൈക്കിളില്‍ അവര്‍ക്ക് ശേഷിക്കുന്നത്. ഇതില്‍ 4 പോരാട്ടങ്ങള്‍ സ്വന്തം നാട്ടിലാണെന്നത് അവര്‍ക്ക് വലിയ ആത്മവിശ്വാസം നല്‍കുന്നതാണ്.
by Midhun HP News | Oct 22, 2026 | Latest News, കായികം
ക്രൈസ്റ്റ് ചര്‍ച്ച്: വെസ്റ്റ്ഇന്‍ഡീസിനെതിരായ ടി20 പരമ്പരയുടെ ആവേശം കെട്ടടങ്ങും മുന്‍പ് ഇന്ത്യ അടുത്ത അങ്കത്തിന് ഇറങ്ങുന്നു. ന്യൂസിലന്‍ഡിനെതിരായ അഞ്ച് മത്സര ടി20 പരമ്പരയിലെ ആദ്യമത്സരം ഇന്ന് ക്രൈസ്റ്റ് ചര്‍ച്ചിലെ ഹാഗ് ലി ഓവല്‍ സ്‌റ്റേഡിയത്തില്‍ ഇന്ത്യന്‍ സമയം ഉച്ചയ്ക്ക് 12.30നാണ് മത്സരം.
ക്യാപ്റ്റന്‍ ശ്രേയസ് അയ്യരുടെ നേതൃത്വത്തിലിറങ്ങുന്ന ഇന്ത്യന്‍ ടീമിന്റെ പ്രതീക്ഷ മുഴുവന്‍ ബാറ്റിങ് നിരയിലാണ്. അഭിഷേക്- ശര്‍മ സഞ്ജു സാംസണ്‍ ഓപ്പണിങ് ജോഡി നല്‍കുന്ന തുടക്കം മധ്യനിരയില്‍ ഇഷാന്‍ കിഷന്‍, ശ്രേയസ്, തിലക് വര്‍മ തുടങ്ങിയവര്‍ ഏറ്റുപിടിച്ചാല്‍ ഇന്ത്യക്ക് കാര്യങ്ങള്‍ എളുപ്പമാകും. വിന്‍ഡീസ് പരമ്പരയില്‍ അവസരം ലഭിക്കാതിരുന്ന പതിനഞ്ചുകാരന്‍ വൈഭവ് സൂര്യവംശിക്ക് ന്യൂസിലന്‍ഡിലും ബെഞ്ചിലായിരിക്കും സ്ഥാനമെന്നാണ് റിപ്പോര്‍ട്ടുകള്‍.
നാലുവര്‍ഷത്തിനുശേഷം ദേശീയ ടീമിലേക്ക് തിരിച്ചെത്തിയ പേസര്‍ ഭുവനേശ്വര്‍ കുമാര്‍ ഇന്ന് ഇലവനില്‍ ഇടംപിടിച്ചേക്കും. വിന്‍ഡീസിനെതിരായ അഞ്ചാം ടി20യില്‍ ഭുവിയെ ഇലവനില്‍ ഉള്‍പ്പെടുത്തിയിരുന്നെങ്കിലും മഴ മൂലം ഉപേക്ഷിച്ചിരുന്നതിനാല്‍ ഗ്രൗണ്ടില്‍ ഇറങ്ങാന്‍ സാധിച്ചില്ല. ഭുവിക്കൊപ്പം അര്‍ഷ്ദീപ് സിങും പ്രിന്‍സ് യാദവും പേസ് നിരയില്‍ എത്തിയേക്കും.
by Midhun HP News | Oct 21, 2026 | Latest News, കായികം, ജില്ലാ വാർത്ത
തിരുവനന്തപുരം: രഞ്ജി ട്രോഫിയില്‍ ഒഡിഷയ്‌ക്കെതിരെ കേരളത്തിന് ഇന്നിങ്‌സ് വിജയം. നാലാം ദിനം നാലിന് 102 എന്ന നിലയില്‍ ബാറ്റിങ് പുനരാരംഭിച്ച ഒഡിഷയ്ക്ക് 41 റണ്‍സ് മാത്രമാണ് കൂട്ടിച്ചേര്‍ക്കാനായത്. അഞ്ച് വിക്കറ്റ് പിഴുത ജലജ് സക്‌സേനയാണ് കേരളത്തിന്റെ ബൗളിങ് ആക്രമണത്തിന് നേതൃത്വം നല്‍കിയത്. ഇന്നിങ്‌സിനും 36 റണ്‍സിനുമാണ് കേരളത്തിന്റെ ജയം. സ്‌കോര്‍: കേരളം – 404, ഒഡിഷ – 225 & 143. 26 മുതല്‍ കരുത്തരായ ബംഗാളിനെതിരെയാണ് കേരളത്തിന്റെ അടുത്ത മത്സരം.
ഏഴ് മെയ്ഡനുകള്‍ ഉള്‍പ്പെടെ 18 ഓവര്‍ പന്തെറിഞ്ഞ സ്‌ക്‌സേന, 34 റണ്‍സ് മാത്രം വിട്ടുനല്‍കിയാണ് അഞ്ച് വിക്കറ്റുകള്‍ വീഴ്ത്തിയത്. ആദിത്യ സര്‍വാതെ രണ്ട് വിക്കറ്റ് നേടി. ഒഡിഷയെ ആദ്യ ഇന്നിങ്‌സില്‍ 225ല്‍ തളച്ചപ്പോള്‍ നാല് വിക്കറ്റുമായി വൈശാഖ് ചന്ദ്രനാണ് തിളങ്ങിയത്. ആദിത്യ സര്‍വാതെ മൂന്നും സക്സേന രണ്ട് വിക്കറ്റും സ്വന്തമാക്കി. എംഡി നിധീഷ് ഒരു വിക്കറ്റെടുത്തു. ഒഡിഷ ഓപണര്‍ ഗൗരവ് ചൗധരി രണ്ടിന്നിങ്‌സിലും അര്‍ധ സെഞ്ച്വറി (50, 53) നേടിയെങ്കിലും മറ്റാർക്കും അവസരത്തിനൊത്ത് ഉയരാനാകാതെ പോയത് തിരിച്ചടിയായി.
നേരത്തെ സച്ചിന്‍ ബേബിക്ക് പിന്നാലെ വിക്കറ്റ് കീപ്പര്‍ ബാറ്റര്‍ മുഹമ്മദ് അസ്ഹറുദ്ദീനും സെഞ്ച്വറി നേടിയതോടെയാണ് കേരളം ഒന്നാം ഇന്നിങ്‌സില്‍ 404 എന്ന മികച്ച ടോട്ടല്‍ ഉയര്‍ത്തിയത്. ആദ്യ ദിനത്തില്‍ തുടക്കത്തില്‍ പരുങ്ങിയ കേരളത്തെ സച്ചിന്‍ ബേബിയും മുഹമ്മദ് അസ്ഹറുദ്ദീനും ചേര്‍ന്നാണ് ട്രാക്കിലാക്കിയത്. ഒന്നാം ദിനത്തില്‍ സച്ചിന്‍ ബേബി സെഞ്ച്വറിയുമായി കളം വാണപ്പോള്‍ രണ്ടാം ദിനത്തില്‍ മുഹമ്മദ് അസ്ഹറുദ്ദീനാണ് ഇന്നിങ്‌സിന്റെ കടിഞ്ഞാണേന്തിയത്. എട്ടാമനായി ക്രീസിലെത്തിയ ആദിത്യ സാര്‍വതെ അര്‍ധ സെഞ്ച്വറിയടിച്ച് അസ്ഹറുദ്ദീനെ പിന്തുണച്ചു.
അസ്ഹറുദ്ദീന്‍ 263 പന്തുകള്‍ നേരിട്ട് 11 ഫോറുകള്‍ സഹിതം 139 റണ്‍സെടുത്തു. സാര്‍വതെ 53 റണ്‍സും കണ്ടെത്തി. അസ്ഹറുദ്ദീന്‍ പുറത്താകാതെ നിന്നു. 72 റണ്‍സുമായാണ് അസ്ഹറുദ്ദീന്‍ രണ്ടാം ദിനം ബാറ്റിങ് തുടങ്ങിയത്. ക്രീസില്‍ സര്‍വാധിപത്യം രണ്ടാം ദിനത്തിലും താരം നിലനിര്‍ത്തി കേരളത്തിനു കരുത്തായി. പിന്തുണയ്ക്കാന്‍ ആളില്ലാതെ വന്നതോടെയാണ് താരം അപരാജിതനായി ഇന്നിങ്‌സിനു തിരശ്ശീലയിട്ടത്.
by Midhun HP News | Oct 9, 2026 | Latest News, കായികം
റാഞ്ചി: വെസ്റ്റ് ഇന്‍ഡീസിനെതിരായ ടി20 പരമ്പരയിലെ രണ്ടാം പോരാട്ടത്തിന് ഇന്ത്യ ഇന്ന് റാഞ്ചിയില്‍ കളത്തിലിറങ്ങും. ആദ്യ മത്സരം ജയിച്ച ഇന്ത്യ പരമ്പരയില്‍ 1-0-ന് മുന്നിലാണ്. ആദ്യ ടി20യില്‍ ശ്രേയസ് അയ്യരുടെ തകര്‍പ്പന്‍ സെഞ്ച്വറിയുടെ (43 പന്തില്‍ 102 റണ്‍സ് – 10 ഫോറും 6 സിക്‌സും) കരുത്തിലാണ് ഇന്ത്യ എട്ട് വിക്കറ്റിന്റെ അനായാസ വിജയം സ്വന്തമാക്കിയത്. വിജയത്തുടര്‍ച്ച ലക്ഷ്യമിട്ട് ഇന്ത്യ ഇറങ്ങുമ്പോള്‍, പരമ്പരയിലേക്ക് തിരിച്ചുവരാനാണ് വിന്‍ഡീസിന്റെ ശ്രമം. രാത്രി ഏഴ് മണി മുതലാണ് മത്സരം.
ഇന്ത്യന്‍ ബാറ്റിങ് നിരയില്‍ കാര്യമായ മാറ്റങ്ങള്‍ക്ക് സാധ്യതയില്ല. ഓപ്പണിങ് സ്ലോട്ടില്‍ മലയാളി താരം സഞ്ജു സാംസണും അഭിഷേക് ശര്‍മയും തുടരും. കഴിഞ്ഞ മത്സരങ്ങളില്‍ തിളങ്ങാന്‍ കഴിയാത്ത സഞ്ജുവിന് ഫോമിലേക്ക് മടങ്ങിയെത്തേണ്ടത് അനിവാര്യമാണ്. കൗമാര താരം വൈഭവ് സൂര്യവംശിക്ക് ഇന്ന് അവസരം ലഭിക്കാന്‍ സാധ്യത കുറവാണ്. പരിശീലകന്‍ ഗംഭീറും ടീം മാനേജ്‌മെന്റും ഇക്കാര്യം വ്യക്തമാക്കിയിരുന്നു. ഇഷാന്‍ കിഷന്‍, തിലക് വര്‍മ എന്നിവര്‍ മധ്യനിരയില്‍ കളിക്കും.
ഓള്‍റൗണ്ടര്‍മാരായി അക്‌സര്‍ പട്ടേല്‍, ശിവം ദുബെ, നമന്‍ ധിര്‍ എന്നിവരാണുണ്ടാകുക. കഴിഞ്ഞ മത്സരത്തില്‍ മൂന്ന് വിക്കറ്റുകള്‍ വീഴ്ത്തിയ ഓഫ് സ്പിന്നര്‍ നമന്‍ ധിറിന്റെ പ്രകടനം മാനേജ്മെന്റിന് വലിയ ആശ്വാസമാണ്. ബൗളിങ് നിരയില്‍ പേസര്‍ മായങ്ക് യാദവിന് പകരം പ്രിന്‍സ് യാദവിന് അവസരം നല്‍കിയേക്കും. ചൈനാമാന്‍ സ്പിന്നര്‍ കുല്‍ദീപ് യാദവും ടീമിലുണ്ടാകും.
മറുഭാഗത്ത്, ക്യാപ്റ്റന്‍ ഷായ് ഹോപ്പിന്റെ മികച്ച ഫോം വിന്‍ഡീസിന് ആശ്വാസമാണെങ്കിലും മറ്റ് പ്രമുഖ താരങ്ങള്‍ ഫോമിലാകാത്തത് തിരിച്ചടിയാണ്. എങ്കിലും ഷിമ്രോണ്‍ ഹെറ്റ്‌മെയര്‍, റോവ്മാന്‍ പവല്‍, ഷെര്‍ഫെയ്ന്‍ റുഥര്‍ഫോര്‍ഡ്, റൊമാരിയോ ഷെപ്പേര്‍ഡ് തുടങ്ങി ഒറ്റയ്ക്ക് മത്സരം തിരിച്ചുവിടാന്‍ ശേഷിയുള്ള ടി20 സ്‌പെഷലിസ്റ്റുകള്‍ അവരുടെ നിരയിലുണ്ട്.
2023ന് ശേഷം റാഞ്ചിയില്‍ രാത്രിയില്‍ നടക്കുന്ന ആദ്യ ടി20 മത്സരമാണിത്. പിച്ചിന്റെ മുന്‍കാല ചരിത്രം പരിശോധിച്ചാല്‍ ഇവിടെ ഉയര്‍ന്ന സ്‌കോറുകള്‍ പിറക്കാന്‍ സാധ്യത കുറവാണ്. ഇവിടെ നടന്ന ഏഴ് മത്സരങ്ങളില്‍ നാലിലും രണ്ടാമത് ബാറ്റ് ചെയ്ത ടീമുകളാണ് വിജയിച്ചിട്ടുള്ളത്.
by Midhun HP News | Oct 7, 2026 | Latest News, കായികം
ബുസാൻ റെഡ് കാർപ്പറ്റിൽ മലയാളത്തിന്റെ അഭിമാന ചിത്രം ‘ചെവിട്ടോർമ്മ’. ദക്ഷിണ കൊറിയയിൽ നടക്കുന്ന ഏഷ്യയിലെ ഏറ്റവും വലിയ ചലച്ചിത്ര മേളകളിലൊന്നായ 31-ാമത് ബുസാൻ അന്താരാഷ്ട്ര ചലച്ചിത്രമേളയുടെ റെഡ് കാർപ്പറ്റിൽ ചെവിട്ടോർമ പ്രദർശനത്തിനൊരുങ്ങുന്നത്.
ലോകത്തിന്റെ വിവിധ ഭാഗങ്ങളിൽ നിന്നുമെത്തിയ ആയിരക്കണക്കിന് ചലച്ചിത്രപ്രേമികളെയും അന്താരാഷ്ട്ര മാധ്യമങ്ങളെയും സാക്ഷിനിർത്തിയാണ് മലയാളത്തിന്റെ ഈ അഭിമാന ചിത്രം റെഡ് കാർപ്പറ്റിൽ ശ്രദ്ധാ കേന്ദ്രമായത്. ഈ വർഷത്തെ ബുസാൻ അന്താരാഷ്ട്ര ചലച്ചിത്രമേളയിലേക്ക് മലയാളത്തിൽ നിന്നും തിരഞ്ഞെടുക്കപ്പെട്ട ഏക ചിത്രമാണ് ‘ചെവിട്ടോർമ്മ’.
ചിത്രത്തിന്റെ രചനയും സംവിധാനവും നിർവ്വഹിച്ചിരിക്കുന്നത് ലിയോ തദേവൂസ് ആണ്. ചിത്രത്തിന്റെ വേൾഡ് പ്രീമിയറിനോടനുബന്ധിച്ച് നടന്ന ചടങ്ങിൽ സംവിധായകൻ ലിയോ തദേവൂസ്, അഭിനേതാക്കളായ ദിലീഷ് പോത്തൻ, പൗളി വത്സൻ, സ്റ്റാൻ സ്റ്റീഫൻ, നിർമ്മാതാക്കളായ സ്റ്റീഫൻ സക്കറിയാസ്, ലോഗൻ രവി തുടങ്ങിയവർ റെഡ് കാർപ്പറ്റി‌ലെത്തി. ഒക്ടോബർ 8 ന് മേളയിലെ പ്രശസ്തമായ ‘ഏഷ്യൻ സിനിമാ പനോരമ’ വിഭാഗത്തിൽ ചിത്രം പ്രദർശിപ്പിക്കും.
by Midhun HP News | Oct 7, 2026 | Latest News, കായികം
ബ്യൂനസ് അയേഴ്‌സ്: ഇതിഹാസതാരം മെസിയുടെ വിടവാങ്ങല്‍ മത്സരത്തില്‍ അര്‍ജന്റീനയ്ക്ക് വിജയം. എതിരില്ലാത്ത മൂന്ന് ഗോളിനാണ് അര്‍ജന്റീനയുടെ വിജയം. മത്സരത്തിലെ അവസാനഗോള്‍ സ്വന്തം പേരിലെഴുതിയാണ് മെസി കളം വിട്ടത്. കളം നിറഞ്ഞുകളിച്ച മെസിയുടെ അസിസ്റ്റില്‍ 48ാം മിനിറ്റില്‍ നിക്കോളാസ് ഒട്ടോമെന്‍ഡിയാണ് ആദ്യ ഗോള്‍ നേടിയത്. അളന്നുമുറിച്ചുനല്‍കിയ കോര്‍ണര്‍ കിക്ക് അനായാസം ഓട്ടോമെന്‍ഡി വലയിലെത്തിച്ചു. 60ാം മിനിറ്റില്‍ നിക്കോ പാസ് രണ്ടാം ഗോള്‍ നേടി. 71ാം മിനിറ്റില്‍ ലഭിച്ച പെനാല്‍റ്റി മെസി വലയിലെത്തിച്ചു. പിതാവിന്റെ മരണത്തെ തുടര്‍ന്ന് കഴിഞ്ഞ ഓഗസ്റ്റിലാണ് രാജ്യാന്തര കരിയര്‍ അവസാനിപ്പിക്കാന്‍ മെസി തീരുമാനിച്ചത്.
കഴിഞ്ഞ ലോകകപ്പില്‍ കീരീടം നഷ്ടമായെങ്കിലും അര്‍ജന്റീന ആരാധകര്‍ക്കു മുന്നില്‍ അവസാനമായി ഒരു മത്സരം കൂടി കളിക്കാന്‍ അര്‍ജന്റീന ഫുട്‌ബോള്‍ അസോസിയേഷന്‍ ഇതിഹാസ താരത്തെ ടീമിലേക്കു തിരികെ വിളിക്കുകയായിരുന്നു. 2022ല്‍ ഫിഫ ലോകകപ്പ് വിജയിച്ച അര്‍ജന്റീന ടീമംഗങ്ങളും മെസ്സിക്കൊപ്പം കളിച്ചു രാജ്യാന്തര വിന്‍ഡോയില്‍ രണ്ടു മത്സരങ്ങള്‍ പൂര്‍ത്തിയാക്കിയ അര്‍ജന്റീന ബൊളീവിയയെയും (40), ബുര്‍ക്കിന ഫാസോയെയും (70) തോല്‍പിച്ച ശേഷമാണ് ബെനിനെ നേരിടുന്നത്.
നിറകണ്ണുകളോടെയാണ് മെസി സ്റ്റേഡിയത്തിലെത്തിയത്. പത്താംമിനിറ്റില്‍ കളി നിര്‍ത്തി സ്റ്റേഡിയം ഒന്നാകെ തങ്ങളുടെ പ്രിയപ്പെട്ട താരത്തിന് ആദരവ് അര്‍പ്പിച്ചു. അര്‍ജന്റീനയ്‌ക്കൊപ്പം രണ്ടു പതിറ്റാണ്ടിലേറെ നീണ്ട മെസ്സിയുടെ ഫുട്‌ബോള്‍ യാത്രയ്ക്കാണ് അവസാനമാവുന്നത്. 2005-ലാണ് മെസി ദേശീയ ടീമിനായി അരങ്ങേറ്റ മത്സരം കളിച്ചത്.
ദേശീയ ടീമിനായി 125 ഗോളുകളും 68 അസിസ്റ്റുകളുമുണ്ട്. 2022ലെ ഖത്തര്‍ ലോകകപ്പ് കിരീട നേട്ടമാണ് ഏറ്റവും സമ്മോഹന ഓര്‍മ. 2 കോപ്പ അമേരിക്ക കിരീടങ്ങളും ഒരു ഫൈനലിസിമ ട്രോഫിയും മെസി അര്‍ജന്റീനയ്ക്കായി നേടിയിട്ടുണ്ട്. 2008ല്‍ ഒളിംപിക് സ്വര്‍ണം, 2021ലും 2024ലും തുടരെ കോപ്പ കിരീടങ്ങള്‍. 2022ല്‍ ലോകകപ്പ്, 2022ല്‍ തന്നെ ഇറ്റലിയെ വീഴ്ത്തി ഫൈനലിസിമ കിരീടവും.
നൈജീരിയ, ടോഗോ, ബുര്‍ക്കിന ഫാസോ, നൈജര്‍ എന്നീ രാജ്യങ്ങളുമായി അതിര്‍ത്തി പങ്കിടുന്ന ചെറിയ ആഫ്രിക്കന്‍ രാജ്യമാണ് മെസിയുടെ അവസാന എതിരാളികളായ ബെനിന്‍. ദി സ്‌ക്വിറല്‍സ് എന്ന് മുമ്പ് അറിയപ്പെട്ടിരുന്ന അവര്‍ പിന്നീട് ഔദ്യോ?ഗികമായ ദി ചീറ്റാസ് എന്നു മാറ്റി. മഞ്ഞയും പച്ചയും കലര്‍ന്ന ജേഴ്‌സിയാണ് ബെനിന്‍ താരങ്ങള്‍ പരമ്പരാ?ഗതമായി ധരിക്കുന്നത്.
Recent Comments