by Midhun HP News | Oct 31, 2026 | Latest News, കായികം, ജില്ലാ വാർത്ത
ഓക്ക്‌ലന്‍ഡ്: ന്യൂസിലന്‍ഡിനെതിരായ അഞ്ച് മത്സരങ്ങളടങ്ങിയ ഏകദിന പരമ്പരയ്ക്കുള്ള ആദ്യ മൂന്ന് മത്സരങ്ങളിലേക്കുള്ള ടീമിലും പേസ് ബൗളര്‍ അക്വിബ് നബിയെ ഉള്‍പ്പെടുത്തി. ആദ്യം പ്രഖ്യാപിച്ച ടീമില്‍ താരത്തെ അവസാന രണ്ട് മത്സരങ്ങള്‍ക്കായാണ് ഉള്‍പ്പെടുത്തിയിരുന്നത്. ടീമില്‍ ഉള്‍പ്പെട്ടിരുന്ന പേസര്‍ പ്രസിദ്ധ് കൃഷ്ണ പരിക്കു മാറി ഫിറ്റ്‌നസ് തെളിയിച്ച് തിരിച്ചെത്തുമെന്നു പ്രതീക്ഷിക്കപ്പെട്ടിരുന്നു. എന്നാല്‍ താരം പൂര്‍ണമായി ഫിറ്റ്‌സ് വീണ്ടെടുത്തില്ല. ഇതോടെയാണ് നബിയെ പരമ്പരയില്‍ മൊത്തം നിലനിര്‍ത്താന്‍ തീരുമാനിച്ചത്.
ഹാംസ്ട്രിങ് പരിക്കിനെ തുടര്‍ന്നാണ് പ്രസിദ്ധ് കൃഷ്ണയ്ക്ക് പരമ്പര നഷ്ടമായത്. വെസ്റ്റ് ഇന്‍ഡീസിനെതിരായ പോരാട്ടത്തിനിടെയാണ് പ്രസിദ്ധിനു പരിക്കേല്‍ക്കുന്നത്. കിവികള്‍ക്കെതിരായ പോരാട്ടത്തിനു മുന്‍പ് താരം ഫിറ്റ്‌നസ് വീണ്ടെടുക്കുമെന്ന പ്രതീക്ഷയിലാണ് ടീമില്‍ ഉള്‍പ്പെടുത്തിയത്. എന്നാല്‍ തിരിച്ചു വരവ് വൈകും എന്നു വ്യക്തമായി.
കിവികള്‍ക്കെതിരായ ടെസ്റ്റ് പരമ്പരയ്ക്കു മുന്‍പ് പ്രസിദ്ധ് ഫിറ്റ്‌നസ് വീണ്ടെടുക്കുമെന്നാണ് ഇന്ത്യന്‍ മാനേജ്‌മെന്റ് പ്രതീക്ഷിക്കുന്നത്. ടെസ്റ്റിനു മുന്‍പ് ഇന്ത്യ എ- ന്യൂസിലന്‍ഡ് എ ചതുര്‍ദിന പോരാട്ടത്തിലെ മൂന്നാം മത്സരം നവംബര്‍ 7 മുതല്‍ ആരംഭിക്കും. അതിനു മുന്‍പ് ഫിറ്റ്‌നസ് തെളിയിച്ചാല്‍ ടെസ്റ്റ് പരമ്പരയ്ക്ക് മുന്നോടിയായി പ്രസിദ്ധിനെ ഇന്ത്യ എ ടീമിലുള്‍പ്പെടുത്തി കളത്തിലിറക്കാനും നീക്കമുണ്ട്.
ഇന്ത്യന്‍ ഏകദിന ടീം (ആദ്യ 3 പോരാട്ടങ്ങള്‍): ശുഭ്മാന്‍ ഗില്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്‌ലി, ശ്രേയസ് അയ്യര്‍, കെഎല്‍ രാഹുല്‍, അക്ഷര്‍ പട്ടേല്‍, നമാന്‍ ധിര്‍, അന്‍ഷുല്‍ കാംബോജ്, ഗുര്‍നൂര്‍ ബ്രാര്‍, ഋതുരാജ് ഗെയ്ക്‌വാദ്, അര്‍ഷ്ദീപ് സിങ്, ഇഷാന്‍ കിഷന്‍, മുഹമ്മദ് സിറാജ്, കുല്‍ദീപ് യാദവ്, നിതീഷ് കുമാര്‍ റെഡ്ഡി (ആദ്യ ഏകദിനത്തിന് മാത്രം), അക്വിബ് നബി.
ഇന്ത്യന്‍ ഏകദിന ടീം (അവസാന 2 പോരാട്ടങ്ങള്‍): ശ്രേയസ് അയ്യര്‍ (ക്യാപ്റ്റന്‍), രോഹിത് ശര്‍മ, വിരാട് കോഹ്‌ലി, തിലക് വര്‍മ, ഇഷാന്‍ കിഷന്‍, അക്ഷര്‍ പട്ടേല്‍, നമാന്‍ ധിര്‍, ഗുര്‍നൂര്‍ ബ്രാര്‍, ഋതുരാജ് ഗെയ്ക്‌വാദ്, അര്‍ഷ്ദീപ് സിങ്, കുമാര്‍ കുശാഗ്ര, മുഹമ്മദ് സിറാജ്, യഷ് ഠാക്കൂര്‍, കുല്‍ദീപ് യാദവ്, അക്വിബ് നബി.
by Midhun HP News | Oct 30, 2026 | Latest News, കായികം, ജില്ലാ വാർത്ത
ഓക്ക്‌ലന്‍ഡ്: അന്താരാഷ്ട്ര ടി20യില്‍ ചരിത്ര നേട്ടവുമായി ഇന്ത്യന്‍ പേസര്‍ അര്‍ഷ്ദീപ് സിങ്. അന്താരാഷ്ട്ര ടി20യില്‍ 150 വിക്കറ്റുകള്‍ വീഴ്ത്തുന്ന ചരിത്രത്തിലെ ആദ്യ ഇന്ത്യന്‍ താരമെന്ന ഒരിക്കലും മായാത്ത നേട്ടമാണ് പഞ്ചാബ് താരം സ്വന്തമാക്കിയത്. ന്യൂസിലന്‍ഡിനെതിരായ നാലാം ടി20യില്‍ കിവി ക്യാപ്റ്റന്‍ മിച്ചല്‍ സാന്റ്‌നറെ പുറത്താക്കിയാണ് അര്‍ഷ്ദീപ് റെക്കോര്‍ഡിട്ടത്. സാന്റ്നര് അര്‍ഷ്ദീപ് സിങിന്റെ പന്തില്‍ നിതീഷ് കുമാര്‍ റെഡ്ഡിയ്ക്ക് ക്യാച്ച് നല്‍കിയാണ് മടങ്ങിയത്.
കരിയറിലെ 103ാം മത്സരത്തിലാണ് അര്‍ഷ്ദീപിന്റെ നേട്ടം. നിലവില്‍ ടി20 ഫോര്‍മാറ്റില്‍ ഏറ്റവും കൂടുതല്‍ വിക്കറ്റെടുത്ത ഇന്ത്യന്‍ താരവും അര്‍ഷ്ദീപ് സിങാണ്.
ദിവസങ്ങള്‍
ഇതിനൊപ്പം മറ്റൊരു നേട്ടവും താരം സ്വന്തമാക്കി. അന്താരാഷ്ട്ര ക്രിക്കറ്റില്‍ ഏറ്റവും കുറച്ച് ദിവസങ്ങള്‍ക്കൊണ്ട് 150 ടി20 വിക്കറ്റുകള്‍ നേടുന്ന താരമെന്ന റെക്കോര്‍ഡാണ് അര്‍ഷ്ദീപ് സ്വന്തമാക്കിയത്. 1,577 ദിവസം കൊണ്ടാണ് അര്‍ഷ്ദീപ് 150 വിക്കറ്റുകള്‍ നേടിയത്. ശ്രീലങ്കന്‍ സ്പിന്നര്‍ വാനിന്ദു ഹസരങ്കയുടെ റെക്കോര്‍ഡാണ് അര്‍ഷ്ദീപ് പഴങ്കഥയാക്കിയത്. ഹസരങ്ക 2,325 ദിവസമെടുത്താണ് 150 വിക്കറ്റുകള്‍ ടി20യില്‍ വീഴ്ത്തിയത്.
പന്തുകള്‍
പന്തുകളുടെ കണക്കില്‍ ടി20യില്‍ ഏറ്റവും വേഗത്തില്‍ 150 വിക്കറ്റുകള്‍ നേടുന്ന പേസറെന്ന റെക്കോര്‍ഡും അര്‍ഷ്ദീപ് സ്വന്തം പേരിലാക്കി. 2,143 പന്തുകളില്‍ നിന്നാണ് താരം 150 വിക്കറ്റുകള്‍ വീഴ്ത്തിയത്. ബംഗ്ലാദേശ് പേസര്‍ മുസ്തഫിസുര്‍ റഹ്മാന്റെ റെക്കോര്‍ഡാണ് അര്‍ഷ്ദീപ് മറികടന്നത്. 2,532 പന്തുകള്‍ നേരിട്ടാണ് മുസ്തഫിസുര്‍ 150 വിക്കറ്റുകള്‍ സ്വന്തമാക്കിയത്.
മൊത്തം ബൗളര്‍മാരുടെ പട്ടികയില്‍ ഹോങ്കോങ് താരം ഇഹ്‌സാന്‍ ഖാനൊപ്പം മൂന്നാം സ്ഥാനവും അര്‍ഷ്ദീപ് സിങ് പങ്കിടുന്നു. 2,035 പന്തില്‍ 150 വിക്കറ്റെടുത്ത ഹസരങ്കയാണ് പട്ടികയില്‍ ഒന്നാമത്. അഫ്ഗാന്‍ സ്പിന്നര്‍ റാഷിദ് ഖാന്‍ 2,098 പന്തില്‍ 150 വിക്കറ്റുകളുമായി രണ്ടാമതും നില്‍ക്കുന്നു. അര്‍ഷ്ദീപ് സിങും ഇഹ്‌സാന്‍ ഖാനും 2,143 പന്തുകളുമായി മൂന്നാം സ്ഥാനം പങ്കിടുന്നു.
40 വിക്കറ്റുകള്‍
ഒരു കലണ്ടര്‍ വര്‍ഷം ഏറ്റവും കൂടുതല്‍ ടി20 വിക്കറ്റുകള്‍ നേടുന്ന ഫുള്‍ മെമ്പര്‍ രാജ്യങ്ങളിലെ താരമെന്ന റെക്കോര്‍ഡിലും അര്‍ഷ്ദീപ് എത്തി. 2026ല്‍ അന്താരാഷ്ട്ര ടി20യില്‍ ഇന്ത്യന്‍ പേസര്‍ 40 വിക്കറ്റുകളാണ് വീഴ്ത്തിയത്. അയര്‍ലന്‍ഡിന്റെ ജോഷ് ലിറ്റില്‍ 2022ല്‍ 39 വിക്കറ്റുകള്‍ വീഴ്ത്തിയതായിരുന്നു നേരത്തെയുള്ള റെക്കോര്‍ഡ്. 2024ല്‍ ഹസരങ്ക 38 വിക്കറ്റുകള്‍ വീഴ്ത്തിയിരുന്നു. 2022ല്‍ ഭുവനേശ്വര്‍ കുമാര്‍ 37 വിക്കറ്റുകളും വീഴ്ത്തിയിട്ടുണ്ട്.
ഇന്ത്യക്കായി ഏറ്റവും കൂടതല്‍ ടി20 വിക്കറ്റുകള്‍ വീഴ്ത്തിയ താരങ്ങള്‍
അര്‍ഷ്ദീപ് സിങ്: 103 മത്സരങ്ങള്‍, 150 വിക്കറ്റുകള്‍
ജസ്പ്രിത് ബുംറ: 100 മത്സങ്ങള്‍, 126 വിക്കറ്റുകള്‍
അക്ഷര്‍ പട്ടേല്‍: 116 മത്സങ്ങള്‍, 116 വിക്കറ്റുകള്‍
ഹര്‍ദിക് പാണ്ഡ്യ: 138 മത്സങ്ങള്‍, 114 വിക്കറ്റുകള്‍
by Midhun HP News | Oct 30, 2026 | Latest News, കായികം, ജില്ലാ വാർത്ത
ഓക്‌ലന്‍ഡ്: ന്യൂസിലന്‍ഡിനെതിരായ ടി20 പരമ്പരയിലെ തുടര്‍ച്ചയായ നാലാം മത്സരത്തിലും നിർണായക ടോസ് ജയിച്ച ഇന്ത്യ ഫീല്‍ഡിംഗ് തെരഞ്ഞെടുത്തു. കഴിഞ്ഞ മത്സരം കളിച്ച ടീമില്‍ രണ്ട് മാറ്റങ്ങളുമായാണ് ഇന്ത്യ നാലാം മത്സരത്തിനിറങ്ങുന്നത്. പരിക്കുമാറി ഇഷാന്‍ കിഷന്‍ പ്ലേയിംഗ് ഇലവനില്‍ തിരിച്ചെത്തിയപ്പോൾ കൗമാരതാരം വൈഭവ് സൂര്യവംശി പ്ലേയിംഗ് ഇലവനില്‍ നിന്ന് പുറത്തായി. ആദ്യ മൂന്ന് കളികളിലും തിളങ്ങാൻ കഴിയാതിരുന്ന പേസര്‍ ഭുവനേശ്വര്‍ കുമാറിന് പകരം മായങ്ക് യാദവും ഇന്ത്യയുടെ പ്ലേയിംഗ് ഇലവനിലെത്തി.
വൈഭവ് പുറത്തായതോടെ ഇന്ന് സഞ്ജു സാംസണ്‍-അഭിഷേക് ശര്‍മ ഓപ്പണിംഗ് സഖ്യം തന്നെയാകും ഇന്ത്യക്കായി ഇന്നിംഗ്സ് ഓപ്പണ്‍ ചെയ്യുക. കഴിഞ്ഞ മത്സരം തോറ്റ ടീമില്‍ ന്യൂസിലന്‍ഡും ഒരു മാറ്റം വരുത്തി. കെയ്ൽ ജൈമിസണ് പകരം നഥാന്‍ സ്മിത്ത് ന്യൂസിലന്ഡിന്റെ പ്ലേയിംഗ് ഇലവനിലെത്തി. അഞ്ച് മത്സര പരമ്പരയിലെ ആദ്യ മൂന്ന് കളികളും ജയിച്ച് ഇന്ത്യ 3-0ന് പരമ്പര സ്വന്തമാക്കിയിരുന്നു. മൂന്ന് കളികളിലും ടോസ് ജയിച്ച ഇന്ത്യ ഫീല്‍ഡിംഗ് തെരഞ്ഞെടുക്കുകയായിരുന്നു.
ന്യൂസിലൻഡ് പ്ലേയിംഗ് ഇലവൻ: ഫിൻ അലൻ, ടിം സീഫെർട്ട് (വിക്കറ്റ് കീപ്പർ), ഡാരിൽ മിച്ചൽ, ഗ്ലെൻ ഫിലിപ്സ്, ബെവോൺ ജേക്കബ്സ്, മൈക്കൽ ബ്രേസ്‌വെൽ, മിച്ചൽ സാന്‍റ്നർ (ക്യാപ്റ്റൻ), നഥാൻ സ്മിത്ത്, ആദം മിൽനെ, ജേക്കബ് ഡഫി, മാത്യു ഫിഷർ.
ഇന്ത്യ പ്ലേയിംഗ് ഇലവൻ: അഭിഷേക് ശർമ്മ, സഞ്ജു സാംസൺ (വിക്കറ്റ് കീപ്പർ), ഇഷാൻ കിഷൻ, ശ്രേയസ് അയ്യർ (ക്യാപ്റ്റൻ), തിലക് വർമ്മ, നിതീഷ് കുമാർ റെഡ്ഡി, നമൻ ധീർ, അക്ഷർ പട്ടേൽ, അർഷ്ദീപ് സിങ്, മയാങ്ക് യാദവ്, പ്രിൻസ് യാദവ്.
by Midhun HP News | Oct 30, 2026 | Latest News, കായികം, ജില്ലാ വാർത്ത
ഓക്ക്‌ലന്‍ഡ്: ന്യൂസിലന്‍ഡിനെതിരായ അഞ്ച് മത്സരങ്ങളുടെ ടി20 പരമ്പരയിലെ നാലാം മത്സരം ഇന്ന്. ഓക്ക്ലന്‍ഡിലെ ഈഡന്‍ പാര്‍ക്കില്‍ ഇന്ത്യന്‍ സമയം ഉച്ചയ്ക്ക് 12.30നാണ് മത്സരം നടക്കുന്നത്. ആദ്യ മൂന്ന് മത്സരങ്ങളും വിജയിച്ച് പരമ്പര ഇതിനകം സ്വന്തമാക്കിയ ഇന്ത്യ, ഈ മത്സരത്തിലും ജയം തുടര്‍ന്ന് പരമ്പര തൂത്തുവാരാനാകും ലക്ഷ്യമിടുന്നത്. അതേസമയം, അഭിമാനപ്രശ്നമായ അവസാന രണ്ട് മത്സരങ്ങളില്‍ വിജയം നേടി ആത്മവിശ്വാസം വീണ്ടെടുക്കാനാണ് കിവീസിന്റെ ശ്രമം.
ആദ്യ മത്സരങ്ങളില്‍ ബാറ്റിങ്ങിലും ബൗളിങ്ങിലും ഒരുപോലെ തിളങ്ങിയ ഇന്ത്യ, ആതിഥേയരായ ന്യൂസിലന്‍ഡിന് യാതൊരു അവസരവും നല്‍കാതെയാണ് മേധാവിത്വം സ്ഥാപിച്ചത്. ഓക്ക്ലന്‍ഡിലെ ഈഡന്‍ പാര്‍ക്കിലെ ചെറിയ ബൗണ്ടറികള്‍ വലിയ റണ്ണൊഴുക്കിന് വഴിയൊരുക്കുന്നവയാണ്. ഇവിടെ പവര്‍പ്ലേ ഓവറുകളില്‍ റണ്‍സ് കണ്ടെത്തുക എന്നത് നിര്‍ണായകമാണ്. ചെറിയ ബൗണ്ടറി ആയതിനാല്‍ത്തന്നെ മികച്ച ഷോട്ടുകളിലൂടെ വലിയ സ്‌കോറുകള്‍ പടുത്തുയര്‍ത്താന്‍ ഇരുടീമുകളിലെയും ബാറ്റ്സ്മാന്‍മാര്‍ ശ്രമിക്കും. ടോസ് നേടുന്ന ടീം ബൗളിങ് തെരഞ്ഞെടുക്കാനാണ് സാധ്യത. രണ്ടാമത് ബാറ്റ് ചെയ്യുന്ന ടീമിന് ഇവിടെ കൂടുതല്‍ മുന്‍തൂക്കം ലഭിക്കാറുണ്ട്.
തകര്‍പ്പന്‍ ഫോമിലുള്ള ഓപ്പണര്‍ അഭിഷേക് ശര്‍മയുടെ പ്രകടനം തന്നെയാണ് ഇന്ത്യയുടെ പ്രധാന കരുത്ത്. മുന്‍ മത്സരങ്ങളിലെപ്പോലെ ഇന്നും പവര്‍പ്ലേയില്‍ വേഗത്തില്‍ റണ്‍സ് കണ്ടെത്താന്‍ താരം ശ്രമിക്കും. മലയാളിതാരം സഞ്ജു സാംസണ്‍, യുവതാരം വൈഭവ് സൂര്യവംശി, മധ്യനിരയില്‍ ക്യാപ്റ്റന്‍ ശ്രേയസ് അയ്യര്‍, തിലക് വര്‍മ, നമന്‍ ധിര്‍ എന്നിവരും ബാറ്റിങ് നിരയെ ശക്തമാക്കുന്നു. ബൗളിങ്ങില്‍ സ്പിന്നര്‍മാരും പേസര്‍മാരും ഒരേപോലെ കിവീസ് ബാറ്റിങ് നിരയെ സമ്മര്‍ദത്തിലാക്കാന്‍ കാത്തിരിക്കുന്നു.
പരമ്പര ഇതിനകം സ്വന്തമാക്കിയതിനാല്‍ പ്ലേയിങ് ഇലവനില്‍ ചില പരീക്ഷണങ്ങള്‍ക്കോ റൊട്ടേഷനുകള്‍ക്കോ ഇന്ത്യ മുതിര്‍ന്നേക്കാം. പരിക്കിനെ തുടർന്ന് കഴിഞ്ഞ രണ്ട് മത്സരങ്ങളില്‍ കളിക്കാതിരുന്ന ഇഷാൻ കിഷൻ ഇന്ന് തിരികെ എത്തുമോ എന്ന കാര്യത്തില്‍ ഇതുവരെ വ്യക്തത വന്നിട്ടില്ല. ഇഷാൻ അന്തിമ ഇലവനിലെത്തിയാല്‍ വൈഭവോ സഞ്ജുവോ ബെഞ്ചിലിരിക്കേണ്ടിവരും.
ഗ്ലെന്‍ ഫിലിപ്സ്, ഡാരില്‍ മിച്ചല്‍, നായകന്‍ മിച്ചല്‍ സാന്റ്നര് എന്നിവരിലാണ് ന്യൂസിലന്ഡിന്റെ പ്രധാന പ്രതീക്ഷ. ആദ്യ മൂന്ന് മത്സരങ്ങളിലെയും തോല്‍വികളില്‍ നിന്ന് പാഠമുള്‍ക്കൊണ്ട് ബാറ്റിങ് നിരയിലും ബൗളിങ് നിരയിലും ഒത്തൊരുമയോടെ കളിക്കേണ്ടത് കിവീസിന് അനിവാര്യമാണ്. ലോക്കി ഫെര്‍ഗൂസന്റെ തിരിച്ചുവരവ് ടീമിന്റെ പേസ് ആക്രമണത്തിന് കരുത്ത് പകരും.
by Midhun HP News | Oct 29, 2026 | Latest News, കായികം, ജില്ലാ വാർത്ത
തിരുവനന്തപുരം: രഞ്ജി ട്രോഫി ക്രിക്കറ്റിൽ ബംഗാളിന് മുന്നിൽ സമ്പൂർണ്ണമായി കീഴടങ്ങി ആതിഥേയരായ കേരളം. അവസാന ദിനം ബാറ്റിങ് തുടർന്ന കേരളത്തെ രണ്ടാം ഇന്നിങ്സിൽ വെറും 120 റൺസിന് ചുരുട്ടിക്കെട്ടിയ ബംഗാൾ 287 റൺസിന്റെ പടുകൂറ്റൻ ജയം സ്വന്തമാക്കി. ഒന്നാം ഇന്നിങ്സിലെ ബാറ്റിങ് പരാജയത്തിന് പിന്നാലെ രണ്ടാം ഇന്നിങ്സിലും മുൻനിരയും മധ്യനിരയും ഒരുപോലെ തകർന്നടിഞ്ഞതാണ് കേരളത്തിന് സ്വന്തം തട്ടകത്തിൽ നാണംകെട്ട തോൽവി സമ്മാനിച്ചത്.
നാല് വിക്കറ്റ് നഷ്ടത്തിൽ 53 റൺസ് എന്ന അതീവ പരുങ്ങലിലായ നിലയിലാണ് കേരളം മത്സരത്തിന്റെ അവസാന ദിനം ബാറ്റിങ് പുനരാരംഭിച്ചത്. എന്നാൽ തലേദിവസത്തെ സ്കോറായ 19 റൺസിൽ നിൽക്കെ തന്നെ ക്യാപ്റ്റൻ വിഷ്ണു വിനോദിന്റെ വിക്കറ്റ് നഷ്ടമായതോടെ കേരളത്തിന്റെ പതനം വേഗത്തിലായി. ഒരു റൺസ് മാത്രമെടുത്ത സൽമാൻ നിസാറും അധികം വൈകാതെ കൂടാരം കയറി.
വാലറ്റത്ത് 33 റൺസെടുത്ത എം.ഡി. നിധീഷ് മാത്രമാണ് ബംഗാൾ ബൗളർമാർക്കെതിരെ അല്പമെങ്കിലും ചെറുത്തുനിൽപ്പ് നടത്തിയത്. എന്നാൽ അതൊന്നും വലിയൊരു പരാജയത്തിൽനിന്ന് കേരളത്തെ രക്ഷിക്കാൻ പര്യാപ്തമായിരുന്നില്ല. ഒന്നാം ഇന്നിങ്സിൽ നാല് വിക്കറ്റുകളുമായി കേരള ബാറ്റിങ് നിരയെ തകർത്ത ഇടംകൈയൻ സ്പിന്നർ പ്രദീപ്ത പ്രമാണിക് രണ്ടാം ഇന്നിങ്സിലും ആറ് വിക്കറ്റുകൾ വീഴ്ത്തി കേരളത്തിന്റെ ചീട്ടുകൊട്ടാരം തകർത്തു.
മുൻനിരയെയും വാലറ്റത്തെയും എറിഞ്ഞിട്ട് മുഹമ്മദ് ഷമിയും മികച്ച പിന്തുണ നൽകി. വൈശാഖ് ചന്ദ്രനെയും ആദിത്യ സർവാതെയെയും മടക്കി അയച്ച ഷമി മത്സരത്തിലുടനീളം തകർപ്പൻ ഫോം നിലനിർത്തി. ജയിക്കാൻ 408 റൺസ് എന്ന കൂറ്റൻ ലക്ഷ്യവുമായി നാലാം ഇന്നിങ്സിൽ ബാറ്റിങ്ങിനിറങ്ങിയ കേരളത്തിന് ബംഗാളിന്റെ കൃത്യതയാർന്ന ബൗളിംഗിന് മുന്നിൽ യാതൊരു മറുപടിയും ഉണ്ടായിരുന്നില്ല. ഒന്നാം ഇന്നിങ്സിലും രണ്ടാം ഇന്നിങ്സിലും ഒരുപോലെ ബാറ്റിങ് നിര പരാജയപ്പെട്ടത് കേരളത്തിന് വരും മത്സരങ്ങളിൽ വലിയ തലവേദനയായി മാറും.
by Midhun HP News | Oct 28, 2026 | Latest News, കായികം, ജില്ലാ വാർത്ത
ഡല്‍ഹി: ന്യൂസിലന്‍ഡിനെതിരായ മൂന്നാം ടി20 അന്താരാഷ്ട്ര മത്സരത്തില്‍ കൗമാരതാരം വൈഭവ് സൂര്യവംശിക്ക് വേണ്ടി ഓപ്പണിങ് സ്ഥാനം വിക്കറ്റ് കീപ്പര്‍ ബാറ്റര്‍ സഞ്ജു സാംസണ്‍ വിട്ടുകൊടുക്കുകയായിരുന്നുവെന്ന് അഭിഭേഷ് ശർമ. ഇത് അദ്ദേഹത്തിന്റെ വ്യക്തിത്വത്തെയാണ് കാണിക്കുന്നത് എന്ന് പറഞ്ഞ് സഞ്ജുവിനെ അഭിഷേക് ശർമ പ്രശംസിച്ചു.
മത്സരത്തില്‍ ഇന്ത്യ ആറു വിക്കറ്റിന്റെ വിജയമാണ് നേടിയത്. 38 പന്തില്‍ 113 റണ്‍സെടുത്ത അഭിഷേക് ശർമയുടെ തകര്‍പ്പന്‍ ബാറ്റിങ്ങ് ആണ് അനായാസ വിജയം നേടി കൊടുത്തത്. മുന്‍ മത്സരത്തില്‍ മൂന്നാമനായി ഇറങ്ങിയ വൈഭവ് സൂര്യവംശി ഇത്തവണ ഓപ്പണര്‍ ആയി ഇറങ്ങി അഭിഷേക് ശർമയ്ക്ക് മികച്ച പിന്തുണയാണ് നല്‍കിയത്. 19 പന്തില്‍ 45 റണ്‍സ് ആയിരുന്നു വൈഭവിന്റെ സംഭാവന. ഇതിന് മുന്‍പുള്ള മത്സരങ്ങളില്‍ അഭിഷേക് ശര്‍മ്മയ്‌ക്കൊപ്പം സഞ്ജു സാംസണ്‍ ആണ് ഓപ്പണര്‍ ആയി ഇറങ്ങിയത്. ഇത്തവണ വൈഭവ് സൂര്യവംശിക്ക് വേണ്ടി ഓപ്പണിങ് സ്ഥാനം വേണ്ടെന്ന് വച്ച സഞ്ജു സാംസണ്‍ വണ്‍ഡൗണ്‍ ആയാണ് ഇറങ്ങിയത്. ഇഷാന്‍ കിഷന്‍ പരിക്കേറ്റതിനെ തുടര്‍ന്നാണ് വൈഭവ് സൂര്യവംശിക്ക് ടൂര്‍ണമെന്റില്‍ അവസരം ലഭിച്ചത്. രണ്ടാം മത്സരത്തില്‍ 61 റണ്‍സ് നേടി പ്ലെയര്‍ ഓഫ് ദി മാച്ച് പുരസ്‌കാരം നേടി മികച്ച ഫോമില്‍ നില്‍ക്കുമ്പോഴാണ് ഓപ്പണിങ് സ്ഥാനം സഞ്ജു ത്യജിച്ചത്. ടീമംഗങ്ങള്‍ ഒന്നടങ്കം സഞ്ജുവിന്റെ വ്യക്തിത്വത്തെ പുകഴ്ത്തുകയാണ്.
കഴിഞ്ഞ മത്സരത്തില്‍ സഞ്ജു ഭായി ബാറ്റ് ചെയ്ത രീതി നോക്കുമ്പോള്‍, തനിക്ക് പരിചിതമായ ബാറ്റിങ് സ്ഥാനം വിട്ടുകൊടുക്കുക എന്നത് എളുപ്പമുള്ള കാര്യമല്ല. അത് അദ്ദേഹത്തിന്റെ വ്യക്തിത്വത്തെയാണ് കാണിക്കുന്നത്. ടീമിലെ എല്ലാവരും നിസ്വാര്‍ഥരാണ് എന്നാണ് ഇത് കാണിക്കുന്നത്. മറ്റുള്ളവരുടെ നേട്ടങ്ങളില്‍ സന്തോഷിക്കുന്നവരാണ് ടീമംഗങ്ങള്‍. ഒരു മികച്ച ടീമിന്റെ അടയാളം ഇതാണ്’- ബിസിസിഐ ടിവിയോട് അഭിഷേക് ശർമ പറഞ്ഞു.
‘ആദ്യ പന്ത് നേരിട്ടപ്പോള്‍ തന്നെ വൈഭവ് തന്റെ ആക്രമണോത്സുകത പ്രകടിപ്പിച്ചു. നോണ്‍- സ്‌ട്രൈക്കര്‍ എന്‍ഡില്‍ നിന്ന് അത് കണ്ടപ്പോള്‍ എനിക്കും വലിയ ആവേശമായി. വൈഭവ് കളിച്ച രീതിക്ക് പ്രത്യേക അഭിനന്ദനം അര്‍ഹിക്കുന്നു’- വൈഭവ് സൂര്യവംശിയെ പുകഴ്ത്താനും അഭിഷേക് ശർമ മറന്നില്ല.
Recent Comments