ധരംശാല: ഇംഗ്ലണ്ടിനെതിരായ അവസാന ടെസ്റ്റിൽ ഇന്ത്യ ഇന്നിംഗ്സിനും 64 റൺസിനും ജയിച്ചു. ഇന്ത്യയുടെ ഒന്നാം ഇന്നിംഗ്സ് സ്കോറായ 477 പിന്തുടർന്ന ഇംഗ്ലണ്ട് രണ്ടാം ഇന്നിംഗ്സിൽ 195 ന് പുറത്തായി. 5 വിക്കറ്റ് നേടിയ അശ്വിനാണ് ഇംഗ്ലണ്ടിനെ തകർത്തത്. ബുംറ, കുൽദീപ് യാദവ് എന്നിവർ രണ്ടും ജഡേജ ഒരു വിക്കറ്റും നേടി. 84 റൺസെടുത്ത ജോ റൂട്ട് മാത്രമാണ് ഇംഗ്ലീഷ് നിരയിൽ പിടിച്ചുനിന്നത്.
സ്ക്കോർ:
ഇന്ത്യ- 477
ഇംഗ്ലണ്ട് – 218, 195
ധരംശാല: ഇംഗ്ലണ്ടിനെതിരായ അവസാന ടെസ്റ്റില് രോഹിത് ശര്മയ്ക്കും ശുഭ്മാന് ഗില്ലിനും സെഞ്ച്വറി, ഇന്ത്യക്ക് ഒന്നാം ഇന്നിങ്സില് 44 റണ്സ് ലീഡായി. ഒരു വിക്കറ്റ് നഷ്ടത്തില് 135 റണ്സ് എന്ന നിലയില്നിന്ന് രണ്ടാംദിവസം തുടങ്ങിയ ഇന്ത്യ, 58 ഓവര് പിന്നിട്ടപ്പോള് 262 റണ്സ് എടുത്തു. വിക്കറ്റ് നഷ്ടപ്പെട്ടിട്ടില്ല.
രോഹിത് ശര്മ 12 ഫോറുകളും മൂന്ന് സിക്സറും പറത്തിയാണ് സെഞ്ച്വറി നേടിയത്. 9 തവണ പന്ത് അതിര്ത്തി കടത്തിയ ഗില് അഞ്ച് സിക്സറുകളും അടിച്ചാണ് നൂറ് കടന്നത്. ടെസ്റ്റില് രോഹിത്തിന്റെ പതിനാലാമത്തെയും ഗില്ലിന്റെ നാലാമത്തെയും സെഞ്ച്വറിയാണ്.
ഹിമാചല്പ്രദേശിലെ ധരംശാല ക്രിക്കറ്റ് സ്റ്റേഡിയത്തില് വ്യാഴാഴ്ച ആരംഭിച്ച ടെസ്റ്റില് ടോസ് നേടി ആദ്യം ബാറ്റുചെയ്ത ഇംഗ്ലണ്ട് 218 റണ്സിന് പുറത്തായിരുന്നു. ഇന്ത്യന് സ്പിന്നര്മാരായ കുല്ദീപ് യാദവും രവിചന്ദ്രന് അശ്വിനുമാണ് സന്ദര്ശകരുടെ കഥകഴിച്ചത്. കുല്ദീപ് അഞ്ചും അശ്വിന് നാലും രവീന്ദ്ര ജഡേജ ഒന്നും വിക്കറ്റുകള് നേടി.
15 ഓവറില് 72 റണ്സ് വിട്ടുനല്കിയാണ് കുല്ദീപ് അഞ്ചുവിക്കറ്റ് നേടിയത്. ഇംഗ്ലണ്ടിന്റെ ആദ്യത്തെ നാല് വിക്കറ്റും കുല്ദീപിനായിരുന്നു. 11.4 ഓവര് എറിഞ്ഞ് 51 റണ്സ് വിട്ടുനല്കിയാണ് അശ്വിന് തന്റെ നൂറാം ടെസ്റ്റ് മത്സരം നാല് വിക്കറ്റ് നേട്ടത്തോടെ ഗംഭീരമാക്കിയത്. ജഡേജ 10 ഓവറില് 17 റണ്സ് വിട്ടുനല്കി ഒരു വിക്കറ്റെടുത്തു.
മുംബൈ: ഇംഗ്ലണ്ടിനെതിരായ അഞ്ചാമത്തേയും അവസാനത്തേയും ക്രിക്കറ്റ് ടെസ്റ്റില് സ്റ്റാര് പേസര് ജസ്പ്രിത് ബുംറ കളിക്കും. നാലാം ടെസ്റ്റില് ബുംറയ്ക്ക് ബിസിസിഐ വിശ്രമം അനുവദിച്ചിരുന്നു. മാര്ച്ച് ഏഴ് മുതല് ധരംശാലയിലാണ് അഞ്ചാമത്തെ ടെസ്റ്റ്. അഞ്ച് മത്സരങ്ങളടങ്ങിയ പരമ്പര ഇന്ത്യ 3-1നു സ്വന്തമാക്കി കഴിഞ്ഞു.
പരമ്പരയിലെ ആദ്യ മൂന്ന് മത്സരങ്ങളും ബുംറ കളിച്ചിരുന്നു. 17 വിക്കറ്റുകളുമായി മിന്നും ഫോമിലാണ് താരം.ടീമിലുണ്ടായിരുന്ന വാഷിങ്ടന് സുന്ദറിനെ ഒഴിവാക്കി. താരം രഞ്ജിയില് തമിഴ്നാടിനായി കളിക്കാനിറങ്ങും. പരിക്കേറ്റ് പുറത്തായിരുന്ന കെഎല് രാഹുലിനു ഫിറ്റ്നസ് തെളിയിക്കാന് സാധിച്ചില്ല. താരം ചികിത്സയ്ക്കായി ലണ്ടനിലാണ്.
രജത് പടിദാര് ഈ പരമ്പരയില് കാര്യമായ പ്രകടനം നടത്തിയില്ല. നാലാം ടെസ്റ്റില് രണ്ടിന്നിങ്സിലും താരം പരാജയമായിരുന്നു. എന്നാല് താരം ടീമില് സ്ഥാനം നിലനിര്ത്തി. ടെസ്റ്റ് അരങ്ങേറ്റ ശേഷം താരം ആറ് ഇന്നിങ്സുകള് കളിച്ചു. രണ്ട് തവണ ഡക്കില് വീണു. ആകെ നേടിയത് 32 റണ്സ്.
ഡല്ഹി: ഇന്ത്യന് ടീമിലേക്കുള്ള ഋഷഭ് പന്തിന്റെ തിരിച്ചുവരവില് പ്രതീക്ഷ പ്രകടിപ്പിച്ച് ബാറ്റിങ് ഇതിഹാസം സുനില് ഗാവസ്കര്. അധികം താമസിയാതെ പന്ത് ഇന്ത്യന് ടീമില് സ്ഥാനം വീണ്ടെടുക്കുമെന്ന് അദ്ദേഹം പറഞ്ഞു.
പന്ത് ഫിറ്റാണെങ്കില് സെലക്ടര്മാര് ഇന്ത്യന് ടീമിലെ ‘ഗെയിം ചേഞ്ചറെ’ തെരഞ്ഞെടുക്കും. ഇന്ത്യന് പ്രീമിയര് ലീഗിന്റെ (ഐപിഎല്) പുതിയ സീസണിനായി തയാറെടുക്കുന്ന പന്ത് വാഹനാപകടത്തിന് ശേഷം വിശ്രമത്തിലായിരുന്നു.
രണ്ട് വര്ഷം മുമ്പ് നടന്ന ഒരു വാഹനാപകടത്തില് പന്തിന് പരിക്കേറ്റിരുന്നു. ഡല്ഹി ക്യാപിറ്റല്സിന്റെ മാര്ക്വീ താരം ഐപിഎലിന്റെ വരാനിരിക്കുന്ന സീസണില് തിരിച്ചുവരവ് നടത്തുമെന്ന് സൂചനയുണ്ട്. ടൂര്ണമെന്റിന്റെ ആദ്യ ഘട്ട മത്സരങ്ങളില് താരം ഇംപാക്റ്റ് പ്ലെയര് നിയമം ഉപയോഗിച്ച് ബാറ്ററായി മാത്രം കളിക്കാന് സാധ്യതയുണ്ടെന്നും റിപ്പോര്ട്ടുകളുണ്ട്.
പന്തിന്റെ തിരിച്ചുവരവില് പ്രതീക്ഷ പ്രകടിപ്പിച്ച ഗാവസ്കര്, താന് സ്ഫോടനാത്മക ബാറ്ററിന്റെ വലിയ ആരാധകനാണെന്ന് പറഞ്ഞു. ‘ഞാനും അദ്ദേഹത്തിന്റ ഒരു വലിയ ആരാധകനാണ്, എന്നെ സംബന്ധിച്ചിടത്തോളം ഏറ്റവും പ്രധാനം, പന്ത് പഴയതുപോലെ ആരോഗ്യവാനായിരിക്കണം എന്നാണ്. അദ്ദേഹത്തിന് ഇത് വളരെ ബുദ്ധിമുട്ടായിരിക്കും, ആ ബാറ്റിങ് മികവ് വീണ്ടെടുക്കാന് ചിലപ്പോള് കുറച്ച് സമയമെടുക്കും. പക്ഷേ അദ്ദേഹം പരിശീലനം ആരംഭിച്ചത് നന്നായി,’ ഗാവസ്കര് സ്റ്റാര് സ്പോര്ട്സിനോട് പറഞ്ഞു.
റാഞ്ചി: ഇംഗ്ലണ്ടിനെതിരെ അഞ്ച് ക്രിക്കറ്റ് ടെസ്റ്റുകളുടെ പരമ്പരയില് ഒരു മത്സരം അവശേഷിക്കേ ടീം ഇന്ത്യ സീരീസ് ജയത്തിനരികെ. നാലാം ടെസ്റ്റില് 192 റണ്സ് വിജയലക്ഷ്യം തേടിയിറങ്ങിയ ടീം ഇന്ത്യ 8 ഓവറില് വിക്കറ്റ് നഷ്ടമില്ലാതെ 40 എന്ന സ്കോറില് മൂന്നാം ദിനം അവസാനിപ്പിച്ചു. മികച്ച തുടക്കവുമായി രോഹിത് ശര്മ്മയും (27 പന്തില് 24*), യശസ്വി ജയ്സ്വാളും (21 പന്തില് 16*) ആണ് ക്രീസില്. രണ്ട് ദിവസവും10 വിക്കറ്റും ശേഷിക്കെ ഇന്ത്യക്ക് നാലാം ടെസ്റ്റ് ജയിക്കാന് 152 റണ്സ് കൂടി മതി. റാഞ്ചിയില് ജയിച്ചാല് ഇന്ത്യക്ക് പരമ്പര സ്വന്തമാകും.
രണ്ടാം ദിനം അവസാനിക്കുമ്പോള് ഇംഗ്ലണ്ടിനായിരുന്നു മുന്തൂക്കം. എന്നാല് മൂന്നാം ദിനം ധ്രുവ് ജുറെലിന്റെ ബാറ്റിംഗ് മികവില് ഇംഗ്ലണ്ടിന്റെ ലീഡ് കുറച്ചുകൊണ്ടുവന്ന ഇന്ത്യ, രണ്ടാം ഇന്നിംഗ്സില് ഇംഗ്ലണ്ടിനെ സ്പിന് കെണിയില് കുരുക്കി മത്സരത്തിലേക്ക് തിരികെയെത്തുകയായിരുന്നു. ആദ്യ ഇന്നിംഗ്സില് 46 റണ്സിന്റെ ലീഡ് വഴങ്ങിയ ഇന്ത്യ രണ്ടാം ഇന്നിംഗ്സില് ഇംഗ്ലണ്ടിനെ 145 റണ്സിന് ഓള്ഔട്ടാക്കി. അശ്വിന് അഞ്ച് വിക്കറ്റെടുത്തപ്പോള് കുല്ദീപ് യാദവ് നാലും രവീന്ദ്ര ജഡേജ ഒരുവിക്കറ്റും വീഴ്ത്തി.
നേരത്തെ 219-7 എന്ന സ്കോറില് മൂന്നാം ദിനം ക്രീസിലിറങ്ങിയ ഇന്ത്യക്ക് 90 റണ്സടിച്ച ധ്രുവ് ജുറെലിന്റെ പോരാട്ടമാണ് കരുത്തായത്. വാലറ്റത്തെ കൂട്ടുപിടിച്ച് ജുറാൽ 307 റൺസാണ് ഇന്ത്യക്ക് ഒന്നാം ഇന്നിംഗ്സിൽ നേടിത്തന്നത്.
റാഞ്ചി: ഇന്ത്യക്കെതിരായ നാലാം ക്രിക്കറ്റ് ടെസ്റ്റില് ഇംഗ്ലണ്ട് കൂട്ടത്തകര്ച്ച ഒഴിവാക്കി പൊരുതുന്നു. ഉച്ച ഭക്ഷണത്തിനു പിരിയുമ്പോള് 112 റണ്സ് ചേര്ക്കുന്നതിനിടെ അഞ്ച് വിക്കറ്റുകള് നഷ്ടമായ ഇംഗ്ലണ്ട് ഉച്ച ഭക്ഷണ ശേഷം വിക്കറ്റ് കളയാതെ പൊരുതുന്നു. അവര് നിലവില് അഞ്ച് വിക്കറ്റ് നഷ്ടത്തില് 198 റണ്സെന്ന നിലയില്.
മുന് നായകന് ജോ റൂട്ട് അര്ധ സെഞ്ച്വറിയുമായി ഒരറ്റം കാത്തപ്പോള് വിക്കറ്റ് കീപ്പര് ബാറ്റര് ബെന് ഫോക്സും പ്രതിരോധം തീര്ത്തു. നിലവില് റൂട്ട് 67 റണ്സുമായും ഫോക്സ് 28 റണ്സുമായും ക്രീസില്.
ടോസ് നേടി ബാറ്റിങ് തിരഞ്ഞെടുത്ത് ഒന്നാം ഇന്നിങ്സ് തുടങ്ങിയ ഇംഗ്ലണ്ടിനു സ്കോര് 47ല് നില്ക്കെയാണ് ആദ്യ വിക്കറ്റ് നഷ്ടമായത്. പിന്നാലെ അതേ സ്കോറില് രണ്ടാം വിക്കറ്റും നഷ്ടം. പിന്നീട് കൃത്യമായ ഇടവേളകളില് മൂന്ന് വിക്കറ്റുകള് കൂടി ബലി കഴിക്കേണ്ടി വന്നു.
അരങ്ങേറ്റം അവിസ്മരണീയമാക്കി അകാശ് ദീപ് മൂന്ന് വിക്കറ്റുകള് വീഴ്ത്തി കരുത്തു കാണിച്ചു. പിന്നാലെ പന്തെടുത്ത സ്പിന്നര്മാരായ ആര് അശ്വിന്, രവീന്ദ്ര ജഡേജ എന്നിവര് ഓരോ വിക്കറ്റുകള് വീഴ്ത്തി ഇംഗ്ലീഷ് മുറിവില് കൂടുതല് ഉപ്പ് തേച്ചു.
ജസ്പ്രിത് ബുംറയുടെ അഭാവത്തില് ടെസ്റ്റില് ഇന്ത്യക്കായി അരങ്ങേറിയ പേസര് അകാശ് ദീപ് ഇംഗ്ലണ്ടിന്റെ നിര്ണായക മൂന്ന് വിക്കറ്റുകള് വീഴ്ത്തി അവരുടെ തുടക്കം തകര്ത്തു. കഴിഞ്ഞ കളികളില് നിര്ണായക ബാറ്റിങുമായി കളം നിറഞ്ഞ ബെന് ഡുക്കറ്റ്, ഓലി പോപ്പ് എന്നിവരെ ഒറ്റ ഓവറില് മടക്കി ഇംഗ്ലണ്ടിനെ ഞെട്ടിച്ച അകാശ് ദീപ് തൊട്ടുപിന്നാലെ സാക് ക്രൗളിയേയും മടക്കി ഇംഗ്ലണ്ടിനെ പ്രതിരോധത്തിലാക്കി.
ബാസ്ബോള് ശൈലിയില് അടിച്ചു തകര്ത്ത സാക് ക്രൗളി 42 പന്തില് ആറ് ഫോറും ഒരു സിക്സും സഹിതം 42 റണ്സെടുത്തു മടങ്ങി. ബെന് ഡുക്കറ്റ് 11 റണ്സിലും പുറത്ത്. ഒലി പോപ്പ് പൂജ്യത്തിലും കൂടാരം കയറി.
പിന്നീട് ഇന്നിങ്സ് നേരെയാക്കാന് ജോണി ബെയര്സ്റ്റോ- ജോ റൂട്ട് സഖ്യത്തിന്റെ ശ്രമം. ബെയര്സ്റ്റോ ഫോമിലേക്കെന്ന സൂചന നല്കി മുന്നേറവേയാണ് അശ്വിന് പന്തെടുത്തത്. ബെയര്സ്റ്റോ 35 പന്തില് 38 റണ്സുമായി മടങ്ങി. താരം നാല് ഫോറും ഒരു സിക്സും തൂക്കി. പിന്നാലെ വന്ന ബെന് സ്റ്റോക്സിനെ മൂന്ന് റണ്സില് ജഡേജയും മടക്കി.
Recent Comments