ഗോപാലകൃഷ്ണൻ (51) അന്തരിച്ചു
ചിറയിൻകീഴ്: ചെറുവള്ളിമുക്ക് രോഹിണിയിൽ ഗോപാലകൃഷ്ണൻ (51) അന്തരിച്ചു. തുമ്പ സ്റ്റേഷനിലെ ഗ്രേഡ് എസ്ഐയായിരുന്നു.
ഭാര്യ: ജയശ്രീ
മക്കൾ ഐദിഗ്, ഐശ്വര്യ
ഡബിള് ഡെക്കര് ട്രെയിന് പാലക്കാട്ടേയ്ക്ക്; പരീക്ഷണ ഓട്ടം വിജയകരമെന്ന് റെയില്വേ
പാലക്കാട്: ബംഗളൂരു – കോയമ്പത്തൂര് ഉദയ് ഡബിള് ഡെക്കര് സൂപ്പര് ഫാസ്റ്റ് ട്രെയിന് പാലക്കാട്ടേക്കു നീട്ടുന്നതിന്റെ ഭാഗമായുള്ള പരീക്ഷണ ഓട്ടം വിജയകരം. ഇന്നലെ രാവിലെ എട്ടിനു കോയമ്പത്തൂരില് നിന്നു പുറപ്പെട്ട ട്രെയിന് പൊള്ളാച്ചി വഴി 11.05നു പാലക്കാട് ടൗണ് റെയില്വേ സ്റ്റേഷനിലും 11.10നു പാലക്കാട് ജംഗ്ഷനിലുമെത്തി. പരീക്ഷണ ഓട്ടം വിജയകരമായി പൂര്ത്തിയാക്കിയതായി റെയില്വേ അറിയിച്ചു.
1.20ന് പാലക്കാട് ജംഗ്ഷനില് നിന്നു പുറപ്പെട്ടു 3.45നു കോയമ്പത്തൂരിലെത്തി. സേലം, പാലക്കാട് ഡിവിഷനുകള് ചേര്ന്നാണു പരീക്ഷണ ഓട്ടം നടത്തിയത്. ഉദയ് എക്സ്പ്രസ് സീരീസിലെ ആദ്യ ഡബിള് ഡെക്കര് എസി ചെയര് കാറാണിത്. സ്ഥിരം സര്വീസ് ഉടന് ആരംഭിക്കുമെന്ന് അധികൃതര് അറിയിച്ചു. ട്രെയിനിന്റെ സമയക്രമത്തില് തീരുമാനമായിട്ടില്ല.
പതിവ് തെറ്റിച്ചില്ല; തൃശൂര് പൂരത്തിനുള്ള എണ്ണ കൈമാറി പൗരസ്ത്യ കല്ദായ സുറിയാനി സഭ
തൃശൂര്: ശക്തന് തമ്പുരാനോടുള്ള നന്ദി സൂചകമായി പതിവ് തെറ്റിക്കാതെ തൃശൂര് പൂരത്തിനുള്ള എണ്ണ കൈമാറി പൗരസ്ത്യ കല്ദായ സുറിയാനി സഭ. പഴയകാലം മുതല് തുടരുന്ന ആചാരപ്രകാരം പൗരസ്ത്യ കല്ദായ സുറിയാനി സഭ തൃശ്ശൂര് പുത്തന്പേട്ടയിലെ മാര്ത്ത് മറിയം വലിയ പള്ളിയില് നിന്ന് പാറമേക്കാവ്, തിരുവമ്പാടി ദേവസ്വങ്ങള്ക്ക് മാര് ഔഗിന് കുര്യാക്കോസ് മെത്രാപ്പോലീത്തയാണ് എണ്ണ കൈമാറിയത്.
ശക്തന് തമ്പുരാന് നാടിന്റെ വാണിജ്യവളര്ച്ച ലക്ഷ്യമിട്ട് നസ്രാണികളെ തൃശൂരില് കൊണ്ടുവന്ന് കുടിയിരുത്തിയെന്നതാണ് ചരിത്രം. ഇവര്ക്ക് പള്ളിപണിയാനും ആരാധന നടത്താനും അടക്കം തമ്പുരാന് സൗകര്യവും ഒരുക്കിയിരുന്നു. ശക്തന് തമ്പുരാനോടും തൃശൂര് എന്ന നാടിനോടും കൂറുപുലര്ത്തിയാണ് വര്ഷാവര്ഷം തൃശൂര് പൂരത്തിന് സംഭാവനയായി എണ്ണ കൈമാറുന്നത്. ദേവസ്വം ഭാരവാഹികളും മാര്ത്ത് മറിയം വലിയ പള്ളി വികാരി ഫാ. കെ ആര് ഇനാശു, ഫാ. ജിനു ജോസ്, കേന്ദ്ര ട്രസ്റ്റി ബോര്ഡ് വൈസ് ചെയര്മാന് രാജന് ജോസ് മണ്ണുത്തി, കേന്ദ്ര ട്രസ്റ്റി ബോര്ഡ് അംഗങ്ങളായ ജോസ് താഴത്ത്, ലിയോണ്സ് കാങ്കപ്പാടന് മാര്ത്ത് മറിയം വലിയ പള്ളി കൈക്കാരന്മാരായ സോജന് ജോണ്, ജോര്ജ് ജോയ്, പാരിഷ് കൗണ്സില് അംഗമായ ചാള്സ് ചിറ്റില്ലപ്പിള്ളി എന്നിവരും ചടങ്ങില് പങ്കെടുത്തു.
ജയില് വളപ്പിലേക്ക് മദ്യവും ബീഡിയും ഏഴ് പൊതി ചെമ്മീന് റോസ്റ്റും വലിച്ചെറിഞ്ഞു; പ്രതിയെ കൈയോടെ പൊക്കി
കൊച്ചി: മൂവാറ്റുപുഴ സ്പെഷ്യല് സബ് ജയിലിന്റെ മതില്ക്കെട്ടിനകത്തേക്ക് മദ്യക്കുപ്പിയും ബീഡിയും ചെമ്മീന് റോസ്റ്റും അടക്കമുള്ള പൊതികള് എറിഞ്ഞയാളെ പൊലീസ് പിടികൂടി. തൃക്കാക്കര എച്ച്എംടി കോളനി കുന്നത്ത് കൃഷ്ണകൃപ വീട്ടില് വിനീത് (32) ആണ് മൂവാറ്റുപുഴ പൊലീസിന്റെ പിടിയിലായത്. മോഷണക്കേസില് സബ്ജയിലില് കഴിയുന്ന സഹോദരന് വേണ്ടിയാണ് പൊതികള് വലിച്ചെറിഞ്ഞത്.
ഇന്നലെ സഹോദരനെ കാണാന് വിനീത് സബ് ജയിലില് എത്തിയിരുന്നു. ജയിലില് പ്രവേശിക്കുന്നതിന് മുന്പാണ് മദ്യം അടക്കം വലിച്ചെറിഞ്ഞത്.ഒരു പൊതിയില് ഒരു കുപ്പി മദ്യവും മിനല് വാട്ടറുമായിരുന്നു. മറ്റൊന്നില് പതിനഞ്ച് കൂട് ബീഡിയും മൂന്നാമത്തെ പൊതിയില് ഒരു ലൈറ്ററും 7 പായ്ക്കറ്റ് ചെമ്മീന് റോസ്റ്റുമാണ് ഉണ്ടായിരുന്നത്.സാധനങ്ങള് അടുക്കളയുടെ പിന്ഭാഗത്താണ് വന്നുവീണത്. ജയില് സൂപ്രണ്ടിന്റെ പരാതിയെ തുടര്ന്ന് നടത്തിയ അന്വേഷണത്തിലാണ് പ്രതി പിടിയിലായത്.
കോഴിക്കോട് മെഡിക്കൽ കോളേജിലെ എംബിബിഎസ് വിദ്യാർത്ഥിനി വാഹനാപകടത്തിൽ മരിച്ചു
കൽപ്പറ്റ: കോഴിക്കോട് മെഡിക്കൽ കോളേജിലെ എംബിബിഎസ് വിദ്യാർത്ഥിനി വാഹനാപകടത്തിൽ മരിച്ചു. മലപ്പുറം മഞ്ചേരി കിഴക്കേതല സ്വദേശി ഓവുങ്ങൽ അബ്ദു സലാമിന്റെ മകൾ ഫാത്തിമ തസ്കിയ (24) ആണ് മരിച്ചത്. കല്പറ്റ പിണങ്ങോട് പന്നിയാർ റോഡിൽ വെച്ച് നിയന്ത്രണം വിട്ട സ്കൂട്ടർ താഴ്ചയിലേക്ക് മറിഞ്ഞായിരുന്നു അപകടം. സഹായത്രികയും സുഹൃത്തുമായ അജ്മയെ പരിക്കുകളോടെ കോഴിക്കോട് മെഡിക്കൽ കോളേജിൽ പ്രവേശിപ്പിച്ചു. ഇരുവരും കോഴിക്കോട് മെഡിക്കൽ കോളേജിലെ മെഡിക്കൽ വിദ്യാർഥികളാണ്.
ഇന്നലെ രാത്രി പത്ത് മണിയോടെയായിരുന്നു അപകടം. മെഡിക്കൽ ഹെൽത്ത് ക്ലബ്ബ് മീറ്റിംങ്ങുമായി ബന്ധപ്പെട്ട് കൽപ്പറ്റയിൽ പോയി തിരിച്ച് വരുമ്പോഴായിരുന്നു അപകടമുണ്ടായത്. പിണങ്ങോട് നിന്നും പൊഴുതന ആറാം മൈലിലേക്ക് പോകുന്ന റോഡിലെ വളവിൽ തസ്ക്കിയ സഞ്ചരിച്ച സ്കൂട്ടർ റോഡിൽ നിന്നും താഴ്ചയിലേക്ക് മറിയുകയായിരുന്നു. തസ്കിയ സംഭവ സ്ഥലത്ത് വെച്ചു തന്നെ മരിച്ചു. മൃതദേഹം കല്പറ്റ ഫാത്തിമ ഹോസ്പിറ്റലിലേക്ക് മാറ്റി. സുഹൃത്ത് അജ്മിയയെ സാരമായ പരിക്കുകളോടെ കോഴിക്കോട് മെഡിക്കൽ കോളേജിൽ പ്രവേശിപ്പിക്കുകയും ചെയ്തു.
Recent Comments