by Midhun HP News | Oct 12, 2026 | Latest News, ജില്ലാ വാർത്ത
മലയാള വേദിയുടെ 243- മത് പ്രതിമാസ സാഹിത്യ കൂട്ടായ്‌മയുടെ ഭാഗമായി പുസ്‌തക പ്രകാശനവും കവിയരങ്ങും നടന്നു. നോവലിസ്‌റ്റ് കാർത്തു ആർ.ജി. യുടെ ‘മഴയ്ക്കപ്പുറം’ എന്ന നോവലിന്റെ പ്രകാശനം പ്രശസ്‌ത കവിയും എഴുത്തുകാരനുമായ ഓരനെല്ലൂർ ബാബു നിർവഹിച്ചു. കടക്കാവൂർ സർക്കിൾ ഇൻസ്പെക്ർ പ്രൈജു പുസ്‌തകം സ്വീകരിച്ചു.
സാംസ്‌കാരിക സമ്മേളനത്തിൽ വാർഡ് മെമ്പർ ശ്രീനാഥ് അധ്യക്ഷനായി. ശ്രീകണ്‌ഠൻ കല്ലമ്പലം സ്വാഗതം ആശംസിച്ചു. ഡോക്ടർ പ്രിയ സുനിൽ നോവൽ അവതരണം നടത്തി. രാമചന്ദ്രൻകരവാരം, ഡോക്ടർ അഞ്ജനപ്രതീഷ്, ഡോക്ടർ അശോക് ശങ്കർ, മധുസൂദനക്കുറുപ്പ്, താഹിർ കല്ലമ്പലം എന്നിവർ ആശംസകൾ നേർന്നു. നോവലിസ്‌റ്റ് കാർത്തു ആർ. ജി. മറുപടി പ്രസംഗം നടത്തി. തുടർന്ന് നടന്ന കവിയരങ്ങിൽ മടവൂർ സുരേന്ദ്രൻ, എ.കെ.നിസാർ പള്ളിക്കൽ, അയിലം വസന്തകുമാരി, രണിത. കെ, ആലങ്കോട് ദർശൻ, രമ്യ കെ.എസ്., അനിൽ പൂതക്കുഴി, പ്രസേന സിന്ധു, മുത്താന സുധാകരൻ, ശ്രീകണ്‌ഠൻ കല്ലമ്പലം, ശ്രീകുമാരി ഓച്ചിറ, ഷീന രാജീവ്, തുടങ്ങിയവർ കവിതകൾ അവതരിപ്പിച്ചു.
ചടങ്ങിൽ കവിയും എഴുത്തുകാരനുമായ ഓരനെല്ലൂർ ബാബുവിനെയും കടക്കാവൂർ സർക്കിൾ ഇൻസ്പെക്ടർ ശ്രീ. പ്രൈജുവിനെയും എഴുത്തുകാരി ഉപഹാരങ്ങൾ നൽകി ആദരിച്ചു. നോവലിസ്‌റ്റ് കാർത്തു.ആർ.ജി.യെ മലയാളവേദി ചെയർമാൻ ഓരനെല്ലൂർ ബാബു പ്രത്യേക ഉപഹാരം നൽകി ആദരിച്ചു.
by Midhun HP News | Oct 12, 2026 | Latest News, ദേശീയ വാർത്ത
സ്റ്റോക്ക്ഹോം: 2026-ലെ സാമ്പത്തിക ശാസ്ത്ര നൊബേൽ പുരസ്കാരം അമേരിക്കൻ സാമ്പത്തിക ശാസ്ത്രജ്ഞരായ റോബർട്ട് ഇ. ഹാളിനും മൈക്കൽ വുഡ്ഫോർഡിനും. ആഗോളതലത്തിൽ സർക്കാരുകൾക്കും സെൻട്രൽ ബാങ്കുകൾക്കും സാമ്പത്തിക ആഘാതങ്ങളെ കൃത്യമായി നിയന്ത്രിക്കാനും നേരിടാനും സഹായിക്കുന്ന സാമ്പത്തിക മാതൃകകൾ രൂപപ്പെടുത്തിയതിനാണ് ഈ അംഗീകാരം. സ്റ്റോക്ക്ഹോമിലെ റോയൽ സ്വീഡിഷ് അക്കാദമി ഓഫ് സയൻസസാണ് പുരസ്കാരം പ്രഖ്യാപിച്ചത്.
മാക്രോ ഇക്കണോമിക് സ്റ്റെബിലൈസേഷന്റെ സൂക്ഷ്മ സാമ്പത്തിക അടിത്തറയെക്കുറിച്ചുള്ള ഗവേഷണങ്ങൾക്കാണ് ഇരുവരും ആദരിക്കപ്പെട്ടത്. സാമ്പത്തിക വളർച്ചയിലെ ചാഞ്ചാട്ടങ്ങളും മാന്ദ്യങ്ങളും ലഘൂകരിക്കുന്നതിലും വിപണിയിൽ സ്ഥിരത കൊണ്ടുവരുന്നതിലും ഇവരുടെ പഠനങ്ങൾ നിർണ്ണായക പങ്കുവഹിച്ചതായി അക്കാദമി വിലയിരുത്തി. കാലിഫോർണിയയിലെ സ്റ്റാൻഫോർഡ് സർവകലാശാലയിലെ പ്രൊഫസറാണ് റോബർട്ട് ഇ. ഹാൾ. ന്യൂയോർക്കിലെ കൊളംബിയ സർവകലാശാലയിലെ പ്രൊഫസറാണ് മൈക്കൽ വുഡ്ഫോർഡ്. പുരസ്കാര നേട്ടം അപ്രതീക്ഷിതവും വലിയ ബഹുമതിയുമാണെന്ന് മൈക്കൽ വുഡ്ഫോർഡ് പ്രതികരിച്ചു.
ലോകമെമ്പാടുമുള്ള സെൻട്രൽ ബാങ്കുകളും ധനകാര്യ മന്ത്രാലയങ്ങളും ഇപ്പോൾ ഉപയോഗിക്കുന്ന പ്രായോഗിക മാതൃകകൾക്ക് സുസ്ഥിരമായ ഒരു സൈദ്ധാന്തിക അടിത്തറ നൽകാൻ ഇരുവരുടെയും കണ്ടെത്തലുകൾക്ക് സാധിച്ചുവെന്ന് സാമ്പത്തിക ശാസ്ത്ര നൊബേൽ സമിതി ചെയർമാൻ ജോൺ ഹാസ്‌ലർ വ്യക്തമാക്കി. ഊർജ്ജ പ്രതിസന്ധികൾ അല്ലെങ്കിൽ ഉപഭോക്തൃ വിപണിയിലെ പെട്ടെന്നുള്ള തകർച്ചകൾ പോലുള്ള സാമ്പത്തിക ആഘാതങ്ങളെ നേരിടാൻ ഇവരുടെ ഗവേഷണങ്ങൾ ലോകത്തിന് കരുത്തുപകർന്നതായും അദ്ദേഹം ചൂണ്ടിക്കാട്ടി.
ആൽഫ്രഡ് നൊബേലിന്റെ സ്മരണാർത്ഥം സ്വീഡിഷ് സെൻട്രൽ ബാങ്ക്1968-ൽ ഏർപ്പെടുത്തിയതാണ് സാമ്പത്തിക ശാസ്ത്ര പുരസ്കാരം. സാങ്കേതികമായി മറ്റ് അഞ്ച് നൊബേൽ പുരസ്കാരങ്ങൾ പോലെ ആൽഫ്രഡ് നൊബേൽ നേരിട്ട് സ്ഥാപിച്ചതല്ലെങ്കിലും, എല്ലാ വർഷവും ഡിസംബർ 10-ന് നൊബേൽ ചരമവാർഷിക ദിനത്തിൽ മറ്റ് പുരസ്കാരങ്ങൾക്കൊപ്പമാണ് ഇതും സമ്മാനിക്കുന്നത്. 12 ദശലക്ഷം സ്വീഡിഷ് ക്രോണറാണ് (ഏകദേശം 12 ലക്ഷം യു.എസ് ഡോളർ) പുരസ്കാരത്തുക.
by Midhun HP News | Oct 12, 2026 | Latest News, കേരളം
തിരുവനന്തപുരം: അടുത്ത 23 ദിവസത്തിനുള്ളില്‍, രാജ്യത്തിന്റെ ശേഷിക്കുന്ന ഭാഗങ്ങളില്‍ നിന്നും തെക്കുപടിഞ്ഞാറന്‍ മണ്‍സൂണ്‍ പിന്‍വാങ്ങുമെന്ന് കേന്ദ്ര കാലാവസ്ഥാ വകുപ്പ്. ഒപ്പം തെക്കേ ഇന്ത്യയില്‍ വടക്കുകിഴക്കന്‍ മണ്‍സൂണ്‍(തുലാവര്‍ഷം) മഴ ആരംഭിക്കുന്നതിനും സാധ്യതയുണ്ട്. മന്നാര്‍ ഉള്‍ക്കടലിലും അതിനോട് ചേര്‍ന്ന തെക്കന്‍ തമിഴ്നാട് തീരത്തും, സമുദ്രനിരപ്പില്‍ നിന്ന് 0.9 കി.മീ. ഉയരത്തില്‍ ചക്രവാതച്ചുഴി തുടരുന്നു.
ബംഗാള്‍ ഉള്‍ക്കടലില്‍ ന്യൂന മര്‍ദ്ദ സാധ്യത, തെക്കന്‍ ആന്‍ഡമാന്‍ കടലിലും സമീപ പ്രദേശങ്ങളിലും മുകളിലായി ചക്രവാതച്ചുഴി തുടരുന്നു. ഈ ചക്രവാതച്ചുഴിയുടെ സ്വാധീനഫലമായി ഒക്ടോബര്‍ 13-ഓടെ തെക്കുകിഴക്കന്‍ ബംഗാള്‍ ഉള്‍ക്കടലില്‍ ന്യൂനമര്‍ദ്ദം രൂപപ്പെടാന്‍ സാധ്യത.
കേരളത്തില്‍ 2026 ഒക്ടോബര്‍ 12 മുതല്‍ 16 വരെയുള്ള ദിവസങ്ങളില്‍ നേരിയതോ മിതമായതോ ആയ മഴയ്ക്ക് സാധ്യത. ഒക്ടോബര്‍ 15,16 തീയതികളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത. ഒക്ടോബര്‍ 12 കേരളത്തിലെ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 3040 കി.മീ. വരെ വേഗതയില്‍ ശക്തമായ കാറ്റിനും സാധ്യത. ഒക്ടോബര്‍ 13, 14തീയതികളില്‍ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്ക് സാധ്യത.ഒക്ടോബര്‍ 15, 16 തീയതികളില്‍ ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 4050 കി.മീ. വരെ വേഗതയില്‍ ശക്തമായ കാറ്റിനും സാധ്യതയുണ്ടെന്നും മുന്നറിയിപ്പ്.
by Midhun HP News | Oct 12, 2026 | Latest News, കേരളം
പയ്യന്നൂർ: മോഷ്ടിച്ച ബൈക്കുമായി യാത്ര ചെയ്യുന്നതിനിടെ പൊലീസുകാരനോട് വഴി ചോദിച്ച ഇതരസംസ്ഥാന തൊഴിലാളി പിടിയിലായി. വ്യാഴാഴ്ച രാത്രി എട്ട് മണിയോടെ വെള്ളൂർ കൊട്ടണച്ചേരി ക്ഷേത്രത്തിന് സമീപത്തുവെച്ചാണ് സംഭവം. കാസർകോട്ടെ പൊലീസുകാരനായ പെരളം സ്വദേശി സുനീഷിനോടാണ് ബൈക്കിലെത്തിയ യുവാവ് ഹിന്ദിയിൽ കാഞ്ഞങ്ങാട്ടേക്കുള്ള വഴിയും ദൂരവും ചോദിച്ചത്.
യുവാവിന് വഴി പറഞ്ഞുകൊടുക്കുന്നതിനിടെ സുനീഷ് ബൈക്കിന്റെ നമ്പർ ശ്രദ്ധിച്ചിരുന്നു. വഴി ചോദിച്ച ശേഷം യുവാവ് ബൈക്കോടിച്ച് പോയെങ്കിലും, ഹിന്ദിയിലുള്ള സംസാരത്തിലും അപരിചിതമായ പെരുമാറ്റത്തിലും പന്തികേട് തോന്നിയ സുനീഷ് ബൈക്കിന്റെ നമ്പർ കാസർകോട് കൺട്രോൾ റൂമിലുള്ള രജനീഷ് എന്ന പൊലീസുകാരന് കൈമാറി പരിശോധിക്കാൻ ആവശ്യപ്പെട്ടു. തുടർന്ന് നടത്തിയ വിവരശേഖരണത്തിലാണ് രണ്ട് ദിവസം മുൻപ് വടകരയിൽ നിന്ന് മോഷണം പോയ ബൈക്കാണിതെന്ന് വ്യക്തമായത്.
വാഹനം മോഷണമുതലാണെന്ന് സ്ഥിരീകരിച്ചതോടെ സുനീഷ് സ്വന്തം ബൈക്കിൽ യുവാവിനെ അതിവേഗം പിന്തുടരുകയായിരുന്നു. തുടർന്ന് ചെറുവത്തൂരിൽ വെച്ച് ഇയാളെ തടഞ്ഞുനിർത്തി സാഹസികമായി പിടികൂടി. വിവരമറിഞ്ഞ് സ്ഥലത്തെത്തിയ ചന്തേര പൊലീസ് പ്രതിയെ കസ്റ്റഡിയിലെടുത്ത് കേസ് രജിസ്റ്റർ ചെയ്ത വടകര പൊലീസിന് കൈമാറി.
by Midhun HP News | Oct 12, 2026 | Latest News, ജില്ലാ വാർത്ത
തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണർ സ്ഥാനത്തുനിന്നും ഗ്യാനേഷ് കുമാറിനെ നീക്കണമെന്ന് ആവശ്യപ്പെടുന്ന പ്രമേയം കേരള നിയമസഭ പാസാക്കി. മുഖ്യമന്ത്രി വി.ഡി. സതീശനാണ് നിയമസഭാ ചട്ടം 118 പ്രകാരം സഭയിൽ പ്രമേയം അവതരിപ്പിച്ചത്. ഇതോടെ മുഖ്യ തെരഞ്ഞെടുപ്പ് കമ്മീഷണർക്കെതിരെ പ്രമേയം പാസാക്കുന്ന രാജ്യത്തെ ആദ്യ നിയമസഭയായി കേരളം മാറി.
ഭരണപക്ഷത്തിന് പുറമെ പ്രതിപക്ഷത്തെ ഇടത് അംഗങ്ങളും പ്രമേയത്തെ പിന്തുണച്ചു. എന്നാൽ സഭയിലുണ്ടായിരുന്ന മൂന്ന് ബിജെപി അംഗങ്ങൾ മാത്രമാണ് പ്രമേയത്തെ എതിർത്തത്. തുടർന്ന് സഭയ്ക്ക് പുറത്തിറങ്ങിയ ബിജെപി അംഗങ്ങൾ പ്രമേയത്തിന്റെ പകർപ്പ് പരസ്യമായി കത്തിച്ച് പ്രതിഷേധം രേഖപ്പെടുത്തി.
മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് രാജ്യതലസ്ഥാനത്ത് സംയുക്ത പ്രതിപക്ഷ പാർട്ടികളും കോക്രോച്ച് ജനതാ പാർട്ടിയും (സിജെപി) വിദ്യാർത്ഥി സംഘടനകളും ശക്തമായ പ്രക്ഷോഭം തുടരുന്നതിനിടയിലാണ് കേരള സർക്കാരിന്റെ നിർണ്ണായകമായ ഈ രാഷ്ട്രീയ നീക്കം. സ്വതന്ത്രവും നീതിയുക്തവുമായ തെരഞ്ഞെടുപ്പ് പ്രക്രിയയെ അട്ടിമറിക്കുന്നുവെന്ന ആക്ഷേപങ്ങൾ ശക്തമാകുന്ന സാഹചര്യത്തിലാണ് സംസ്ഥാന നിയമസഭ ഭരണഘടനാപരമായ വഴിയിലൂടെ പ്രമേയം പാസാക്കി കേന്ദ്രത്തിന് മുന്നറിയിപ്പ് നൽകിയത്.
Recent Comments