by Midhun HP News | Nov 3, 2026 | Latest News, കേരളം
തിരുവനന്തപുരം: മന്ത്രിയും മുതിര്‍ന്ന കോണ്‍ഗ്രസ് നേതാവും കെസി വേണുഗോപാലിന്റെ വിശ്വസ്തനുമായ എപി അനില്‍കുമാര്‍ കെപിസിസി പ്രസിഡന്റായേക്കും. ഈ മാസം അവസാനം ഹൈക്കമാന്‍ഡ് പ്രഖ്യാപനം ഉണ്ടാകുമെന്നാണ് വിവരം. സര്‍ക്കാരിന്റെ പ്രവര്‍ത്തനങ്ങളില്‍ നിയന്ത്രണം കൊണ്ടുവരുന്നതിന്റെയും പാര്‍ട്ടിയില്‍ ദളിത് പ്രാതിനിധ്യം ഉറപ്പാക്കുകയും ലക്ഷ്യമിട്ടാണ് നീക്കം.
മുഖ്യമന്ത്രി വിഡി സതീശന്റെ പ്രവര്‍ത്തനരീതിയെച്ചൊല്ലി പാര്‍ട്ടിയിലും സര്‍ക്കാരിലും അഭിപ്രായവ്യത്യാസങ്ങള്‍ രൂക്ഷമായ സാഹചര്യത്തിലാണ് ആറ് തവണ എംഎല്‍എയും നിലവില്‍ കെപിസിസി വര്‍ക്കിങ് പ്രസിഡന്റുമാരില്‍ ഒരാളുമായ എപി അനില്‍ കുമാറിനെ നേതൃനിരയിലേക്ക് കൊണ്ടുവരാനുള്ള നീക്കം. ഇത് അധ്യക്ഷസ്ഥാനത്തേക്ക് പരിഗണിക്കപ്പെട്ടിരുന്ന മറ്റൊരു ദളിത് നേതാവായ കൊടിക്കുന്നില്‍ സുരേഷിന് തിരിച്ചടിയാകും. ദീപാവലിക്ക് ശേഷമേ ഇക്കാര്യത്തില്‍ അന്തിമ തീരുമാനം ഉണ്ടാകുകയുള്ളു.
പാര്‍ട്ടി അധ്യക്ഷ സ്ഥാനത്തേക്ക് എപി അനില്‍ കുമാറിന് കെസി വേണുഗോപാലിന്റെ പിന്തുണയുണ്ടെന്ന് ഒരു കോണ്‍ഗ്രസ് നേതാവ് പറഞ്ഞു. അദ്ദേഹത്തിന്റെ നിയമനം പാര്‍ട്ടിയില്‍ ദളിത് പ്രാതിനിധ്യം എവിടെയെന്ന ചോദ്യത്തിന് മറുപടിയാകുമെന്നും സര്‍ക്കാരിന്റെ പ്രവര്‍ത്തനങ്ങളില്‍ പാര്‍ട്ടി ഇടപെടലിന് സാഹചര്യമൊരുക്കുമെന്നും അദ്ദേഹം അഭിപ്രായപ്പെട്ടു. അധ്യക്ഷനായി തെരഞ്ഞെടുക്കപ്പെട്ടാല്‍ അനില്‍കുമാറിന് മന്ത്രിസ്ഥാനം രാജിവയ്‌ക്കേണ്ടി വരുമെന്നും അദ്ദേഹം കൂട്ടിച്ചേര്‍ത്തു.
ഭരണപരിഷ്‌കാര കമ്മീഷന്‍ നിയമനത്തിലും ഡല്‍ഹിയിലെ സംസ്ഥാന പ്രതിനിധിയുടെ നിയമനത്തിലും കോണ്‍ഗ്രസിനുള്ളില്‍ ഉടലെടുത്ത അഭിപ്രായവ്യത്യാസങ്ങളെ തുടര്‍ന്നാണ് കെപിസിസി പ്രസിഡന്റ് സ്ഥാനത്തേ പുതിയ പേര് ഉയര്‍ന്നുവന്നത്. മുന്‍കാലങ്ങളില്‍ മുഖ്യമന്ത്രിയുടെ സ്ഥാനത്തോളം പ്രധാനമായിരുന്നു പാര്‍ട്ടിയില്‍ കെപിസിസി പ്രസിഡന്റിന്റെതെന്നും കോണ്‍ഗ്രസ് നേതാവ് പറഞ്ഞു. ‘നയപരമായ തീരുമാനങ്ങളും രാഷ്ട്രീയ വിഷയങ്ങളും മുഖ്യമന്ത്രിയും കെ.പി.സി.സി പ്രസിഡന്റും തമ്മിലാണ് ചര്‍ച്ച ചെയ്തിരുന്നത്. തുടര്‍ന്ന് കെ.പി.സി.സി പ്രസിഡന്റ് ഈ തീരുമാനങ്ങള്‍ മറ്റ് നേതാക്കളെയും പ്രവര്‍ത്തകരെയും അറിയിക്കും. കെ.പി.സി.സി അധ്യക്ഷന് സ്വന്തമായ അഭിപ്രായങ്ങള്‍ ഉണ്ടായിരിക്കണം, അദ്ദേഹം മുഖ്യമന്ത്രിക്ക് വിധേയനായിരിക്കരുത്,’ അദ്ദേഹം കൂട്ടിച്ചേര്‍ത്തു.
അനില്‍ കുമാര്‍ അധ്യക്ഷനാകുന്നതോടെ സര്‍ക്കാരില്‍ സംഘടനാപരമായി കൂടുതല്‍ ഇടപെടാനും എഐസിസിയുമായി കൂടുതല്‍ മെച്ചപ്പെട്ട ഏകോപനം ഉറപ്പാക്കാനും സഹായിക്കുമെന്നാണ് നേതൃത്വത്തിന്റെ വിലയിരുത്തല്‍.
by Midhun HP News | Nov 3, 2026 | Latest News, കേരളം
ഹൈദരബാദ്: ശക്തമായ ചുഴലിക്കാറ്റായ മുറസു കരതൊട്ടു. ചൊവ്വാഴ്ച പുലര്‍ച്ചെ തെക്കന്‍ ആന്ധ്രാപ്രദേശ് ഒംഗോളിന് സമീപത്താണ് കരതൊട്ടത്. ചുഴലിക്കാറ്റിന്റെ പശ്ചാത്തലത്തില്‍ സംസ്ഥാനത്ത് അതീവ ജാഗ്രത പ്രഖ്യാപിച്ചു. ശക്തമായ മഴയും മണിക്കൂറില്‍ 120 കിലോമീറ്റര്‍ വരെ വേഗത്തില്‍ കാറ്റ് വീശിയേക്കുമെന്നുമുള്ള മുന്നറിയിപ്പിനെ തുടര്‍ന്ന് ദക്ഷിണതീരത്ത് അധികൃതര്‍ മുന്‍കരുതലുകള്‍ ശക്തമാക്കി. ഇതിന്റെ ഭാഗമായി ആന്ധ്രാപ്രദേശിലെ വിവിധ വിമാനത്താവളങ്ങളില്‍ നിന്നുള്ള 19 സര്‍വീസുകള്‍ റദ്ദാക്കി. നിരവധി ട്രെയിനുകളും റദ്ദാക്കി.
തെക്കന്‍ ആന്ധ്രാപ്രദേശ് ഒംഗോളിന് സമീപം നെല്ലൂരിനും നരസാപുരത്തിനും ഇടയിലൂടെയാണ് ചുഴലിക്കാറ്റ് കടന്നുപോയത്. മണിക്കൂറില്‍ 100 മുതല്‍ 120 കിലോമീറ്റര്‍ വരെയായിരുന്നു കാറ്റിന്റെ വേഗത.
ശക്തമായ മഴ കണക്കിലെടുത്ത് തമിഴ്‌നാട്ടില്‍ ഏഴ് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. പുതുച്ചേരിയിലും ശക്തമായ മഴ മുന്നറിയിപ്പുണ്ട്. ഇന്നലെ തമിഴ്‌നാട്ടിലെയും പുതുച്ചേരിയിലെയും വിവിധ ഭാഗങ്ങളില്‍ ശക്തമായ മഴയാണ് പെയ്തത്. ബുധനാഴ്ച രാവിലെ വരെ തമിഴ്‌നാട് തീരത്ത് മത്സ്യബന്ധനത്തിന് വിലക്ക് ഏര്‍പ്പെടുത്തി. കടലില്‍ പോയവര്‍ ഉടന്‍ തിരിച്ചെത്തണം എന്നാണ് അറിയിപ്പ്. ബീച്ചുകളിലേക്കുള്ള യാത്ര ഒഴിവാക്കണമെന്നും അറിയിപ്പുണ്ട്.
തെക്കന്‍ തീരദേശ ആന്ധ്രയിലും റായലസീമ ജില്ലകളിലും കനത്ത മഴയ്ക്ക് സാധ്യതയുണ്ടെന്ന് മുഖ്യമന്ത്രി എന്‍ ചന്ദ്രബാബു നായിഡു അറിയിച്ചു. സ്ഥിതിഗതികള്‍ വിലയിരുത്താന്‍ വിളിച്ച ഉന്നതതല യോഗത്തില്‍ ഉദ്യോഗസ്ഥരോട് സജ്ജരായിരിക്കാന്‍ അദ്ദേഹം നിര്‍ദേശം നല്‍കി. പല്‍നാട് ജില്ലയില്‍ 30 സെന്റിമീറ്റര്‍ വരെയും, പ്രകാശം ജില്ലയില്‍ 24 സെന്റിമീറ്ററും, മര്‍ക്കാപുരത്ത് 19 സെന്റിമീറ്ററും മഴ ലഭിക്കാന്‍ സാധ്യതയുണ്ട്. കൃഷ്ണ, ഗുണ്ടൂര്‍, നെല്ലൂര്‍ ജില്ലകളിലും ശക്തമായ മഴ പെയ്യുമെന്നാണ് പ്രവചനം.
വെദ്യുതി വിതരണം തടസപ്പെടുന്നത് പരിഹരിക്കാന്‍ തയാറെടുപ്പുകള്‍ പൂര്‍ത്തിയായിട്ടുണ്ട്. ദുരിതാശ്വാസ പ്രവര്‍ത്തനങ്ങള്‍ക്കായി അധിക സേനയെയും വൈദ്യുതി വകുപ്പ് ജീവനക്കാരെയും വിന്യസിച്ചു. ജനങ്ങള്‍ അത്യാവശ്യ ഘട്ടങ്ങളിലല്ലാതെ വീടുകളില്‍ നിന്ന് പുറത്തിറങ്ങരുതെന്നും ദുരന്തനിവാരണ അതോറിറ്റിയുടെ നിര്‍ദേശങ്ങള്‍ കര്‍ശനമായി പാലിക്കണമെന്നും അധികൃതര്‍ അറിയിച്ചു. കടലാക്രമണ സാധ്യതയുള്ളതിനാല്‍ മത്സ്യത്തൊഴിലാളികള്‍ കടലില്‍ പോകരുതെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്.
by Midhun HP News | Nov 2, 2026 | Latest News, ജില്ലാ വാർത്ത
കെ.എസ്.കെ.റ്റി.യു തിരുവനന്തപുരം ജില്ലാ സമ്മേളനം നവംബർ 12, 13, 14 തീയതികളിൽ സ:വി.എസ് അച്യുതാനന്ദൻ നഗറിൽ (ആറ്റിങ്ങൽ മാമം എസ്.എസ് പൂജാ കൺവെൻഷൻ സെൻ്ററിൽ) നടക്കുന്നു. സമ്മേളന വിളംബര ജാഥ ആറ്റിങ്ങൽ വെസ്റ്റ് മേഖലയിൽ നടന്നു. ഏര്യാ സെക്രട്ടറി ആർ രാജു, മേഖലാ പ്രസിഡൻ്റ് കെ തുളസീധരൻ, സെക്രട്ടറി എസ് സതീഷ് കുമാർ, ട്രഷറർ എൻ വേണുഗോപാൽ, ഏര്യയാകമ്മിറ്റി അംഗമായ എസ്.എം രമ്യ, മേഖലാ കമ്മിറ്റി അംഗങ്ങളായ ബി പ്രഭാകരൻ, എസ് ബാബു എന്നിവർ നേതൃത്വം നൽകി.
by Midhun HP News | Nov 2, 2026 | Latest News, കേരളം
ആറ്റിങ്ങൽ: ഡിങ്കിരി അനിലിന് ഷോർട്ട് ഫിലിം സംവിധായകനുള്ള പുരസ്കാരം. അസോസിയേഷൻ ഒഫ് ഷോർട്ട് മൂവി മേക്കേഴ്സ് ആൻഡ് ആർട്ടിസ്റ്റ്സ് ഫെസ്റ്റിവൽ സംഘടിപ്പിച്ച ഇന്റർനാഷണൽ ഷോർട്ട് ഫിലിം ഫെസ്റ്റിവലിൽ മികച്ച രണ്ടാമത്തെ സംവിധായകനായാണ് ഡിങ്കിരി അനിലിനെ തെരഞ്ഞെടുത്തത്. ഡിങ്കിരി അനിൽ സംവിധാനം ചെയ്ത ഉണ്ണികൃഷ്ണൻറെ അതിഥി എന്ന ഷോർട്ട് ഫിലിം ആണ് അവാർഡിന് അർഹമായത്. തിരുവനന്തപുരം ഭാരത് ഭവനിൽ നടന്ന ചടങ്ങിൽ വച്ച് പ്രശസ്ത സാഹിത്യകാരൻ ജോർജ് ഓണക്കൂർ പുരസ്കാരം സമ്മാനിച്ചു. ചലച്ചിത്ര സാഹിത്യ മേഖലകളിലെ പ്രമുഖർ പങ്കെടുത്തു.
by Midhun HP News | Nov 2, 2026 | Latest News, കേരളം
കഴിഞ്ഞ ദിവസമാണ് ഗായിക റിമി ടോമി താൻ രണ്ടാമതും വിവാഹിതയാകാൻ പോകുന്നുവെന്ന വിവരം ആരാധകരുമായി പങ്കുവച്ചത്. നടനോ ഗായകനോ പ്രശസ്തനോ ആയ വ്യക്തിയല്ലെന്നും റിമി വെളിപ്പെടുത്തിയിരുന്നു. ഇപ്പോഴിതാ ആളാരാണെന്ന് തന്റെ ആരാധകർക്ക് പരിചയപ്പെടുത്തിയിരിക്കുകയാണ് റിമി ഇപ്പോൾ. തന്റെ യൂട്യൂബ് ചാനലിലൂടെയാണ് റിമി ഇക്കാര്യം പങ്കുവച്ചത്.
ബോഡി ബിൽഡറും ട്രെയ്‌നറും മുംബൈ മലയാളിയുമായ ലിബിൻ മാത്യുവാണ് വരൻ. മുംബൈയിലെ ഡോംബിവല്ലിയിൽ നവംബറിൽ തന്നെ വിവാഹം നടക്കുമെന്ന് റിമി അറിയിച്ചു. വിവാഹക്ഷണക്കത്തും റിമി വിഡിയോയിൽ പങ്കുവെച്ചു.
“നവംബറിലാണ് കല്യാണം. കല്യാണക്കുറി നിങ്ങളെ കാണിക്കാം. കല്യാണച്ചെക്കൻ ബോംബെയിൽ നിന്നാണ്, ബോഡി ബിൽഡറാണ്. ട്രെയ്‌നറാണ്. എന്റെ ഇപ്പോഴത്തെ കോച്ചാണ്. മലയാളിയാണ്, പേര് ലിബിൻ മാത്യു. മാർച്ച് 10-നാണ് ഞങ്ങൾ ഫോണിൽ സംസാരിക്കുന്നത്. മാർച്ച് 14-ന് എടുത്ത ഒരു ഫോട്ടോ ഞങ്ങൾ ഇൻസ്റ്റഗ്രാമിൽ പോസ്റ്റ് ചെയ്തിട്ടുണ്ട്. അന്നാണ് ഞങ്ങൾ ആദ്യമായി നേരിൽ കാണുന്നത്.
അതിന് മുൻപേ തന്നെ ഫോണിൽ സംസാരിച്ച് ഇഷ്ടമായി. കല്യാണം എന്ന തീരുമാനത്തിലേക്ക് അപ്പോൾ തന്നെ എത്തി എന്നതാണ് സത്യം. മുൻ ഭർത്താവിന്റെ ഫോട്ടോ വെച്ച് ഒരുപാട് പോസ്റ്റുകൾ കണ്ടു. അവരെ വെറുതേ വിട്ടേക്ക്. അദ്ദേഹവും ഞാനും ഒന്നിച്ചെടുത്ത തീരുമാനമായിരുന്നു. എന്നേക്കാൾ നല്ലൊരു പാർട്ണറെ അദ്ദേഹത്തിന് കിട്ടി. അവർ സന്തോഷത്തോടെ ജീവിക്കുന്നു.
ഈ സമയത്ത് എന്തിനാണ് അദ്ദേഹത്തിന്റെ ഫോട്ടോയും വെച്ച് വെറുതേ പറയുന്നത് എന്നതിൽ എനിക്ക് സങ്കടം തോന്നി. കൺമണി, കുട്ടാപ്പി, കുട്ടിമണി എന്നിവരാണ് എന്റെ ലോകം. എവിടെയും പോവുന്നില്ല. പക്ഷേ, കുറച്ച് കൂടുതൽ ബോംബെയിലായിരിക്കും. ഡോംബിവല്ലി എന്ന സ്ഥലത്തായിരിക്കും കല്യാണം.
ചെറിയ പള്ളിയിൽ കുഞ്ഞ് ഓഡിറ്റോറിയത്തിലാണ് ചടങ്ങ്. ഒരു ചടങ്ങേയുള്ളൂ. ഇൻഡസ്ട്രിയിൽ നിന്ന് പോലും ആരെയും വിളിക്കുന്നില്ല. അതിനുമാത്രം ആർഭാടമുള്ള കല്യാണമല്ല. ജിം ദൈവമായി കാണുന്ന ആളാണ് ലിബിൻ. ജിമ്മിനകത്ത് തമാശയും കളിയും കാര്യങ്ങളും അനുവദിക്കില്ല. ഉഗ്രൻ ട്രെയ്‌നറാണ്.
ചില കണക്ഷൻസ്, നമുക്ക് സംസാരിക്കുമ്പോൾ വല്ലാതെ നമുക്ക് ഫീൽ ചെയ്യും. ഞാൻ അതിലാണ് വിശ്വസിക്കുന്നത്. ഒരു ദൈവികത ഉണ്ടതിൽ. ദൈവത്തോട് ഞാനും അത്രയധികം ആഗ്രഹിച്ച് പ്രാർഥിച്ച് ഇരിക്കുന്ന ഒരു സമയത്ത് അതുപോലെ അദ്ദേഹവും അദ്ദേഹത്തിന്റെ ജീവിതത്തിൽ ഒരു പാട്ണറെ ആഗ്രഹിച്ച് ഇരിക്കുന്ന സമയത്ത്, കറക്ടായി ഞങ്ങൾ കണ്ടുമുട്ടിയതു പോലെയാണ് തോന്നുന്നത്.
ഇത്രയും ഒരു 9 മാസം ആയപ്പോഴും നമുക്ക് ഫീൽ ചെയ്യുന്നതും അങ്ങനെയാണ്. പിന്നെ ബാക്കിയെല്ലാം ദൈവത്തിന്റെ കയ്യിൽ. ഒരുപാട് മുൻവിധിയൊന്നുമില്ല. നമ്മളൊക്കെ മനുഷ്യരല്ലേ, നാളെ എന്താണെന്ന് പോലും അറിയാത്ത ആൾക്കാരാണ്. അപ്പോൾ അങ്ങ് ജീവിക്കുക. ഒരു പ്രതീക്ഷയിൽ ഒരു പോസിറ്റിവിറ്റിയിൽ.
അദ്ദേഹത്തിന്റെ കൂടെ നിൽക്കുമ്പോൾ ഒരു ധൈര്യം, സന്തോഷം, പോസിറ്റിവിറ്റി, സമാധാനം ഒക്കെയാണ്. ജീവിതത്തിൽ നമുക്കേറ്റവും വേണ്ടത്, മനസമാധാനത്തോടെ ഇരിക്കാൻ പറ്റുക, എന്തൊരു കാര്യത്തിനും ഒരു പരിഹാരം കിട്ടുക, ഒരു ആശ്വാസം കിട്ടുക. എന്ത് വന്നാലും ഒരാൾ കൂടെയുണ്ട് എന്നുള്ള ഒരു ധൈര്യം. ഇതൊക്കെ എനിക്ക് വല്ലാതെ ലിബിന്റെ ഭാഗത്തു നിന്ന് ഫീൽ ചെയ്തു. ഒരച്ഛന്റെ സ്ഥാനത്ത്, ചേട്ടന്റെ സ്ഥാനത്ത്, ഭർത്താവിന്റെ അതിലുമപരിയായി ഒരു സുഹൃത്തിന്റെ. എല്ലാം കൂടി ചേർന്ന ഒരാളായിട്ടാണ് എനിക്കിപ്പോൾ ഫീൽ ചെയ്യുന്നത്”. – റിമി ടോമി പറഞ്ഞു.
Recent Comments