by Midhun HP News | Nov 2, 2026 | Latest News, ജില്ലാ വാർത്ത
തിരുവനന്തപുരം: ഐഎഎസ് തലപ്പത്ത് വന്‍ അഴിച്ചുപണിയുമായി സംസ്ഥാന സര്‍ക്കാര്‍. കെഎസ്ഇബി ചെയര്‍മാന്‍ സ്ഥാനത്തുനിന്ന് എംജി രാജമാണിക്യത്തെ മാറ്റി. എന്‍ പ്രശാന്ത് ആണ് പുതിയ ചെയര്‍മാന്‍. എംജി രാജമാണിക്യത്തെ തദ്ദേശവകുപ്പിന്റെ ചുമതലയിലേക്കാണ് മാറ്റിയത്.
കെആര്‍ ജ്യോതിലാല്‍ ആണ് പുതിയ ആഭ്യന്തര സെക്രട്ടറി. ആഭ്യന്തര സെക്രട്ടറിയായിരുന്ന മിന്‍ഹാജ് ആലത്തെ ധനകാര്യവകുപ്പിലേക്ക് മാറ്റി. ആരോഗ്യവകുപ്പില്‍ നിന്നും ഷര്‍മിള മേരി ജോസഫിനെ മാറ്റി പകരം ചുമതല മുഹമ്മദ് അനീഷിനാണ്. ഗതാഗതവകുപ്പിന്റെ ചുമതലയാണ് ആണ് ഷര്‍മിള മേരി ജോസഫിന് നല്‍കിയത്. എം ബീന വ്യവസായ വകുപ്പ് സെക്രട്ടറിയാകും.
പുനീത് കുമാര്‍ ഊര്‍ജ വകുപ്പ് അഡീഷണല്‍ സെക്രട്ടറിയാകും. അനുകുമാരിയാണ് ടൂറിസം ഡയറക്ടര്‍. പ്രധാന വകുപ്പുകളിലുള്‍പ്പെടെ മാറ്റം വരുത്തിക്കൊണ്ടാണ് സര്‍ക്കാര്‍ ഐഎഎസ് തലപ്പത്ത് അഴിച്ചുപണി നടത്തിയത്.
by Midhun HP News | Nov 2, 2026 | Latest News, കേരളം
തിരുവനന്തപുരം: സംസ്ഥാനത്തെ എയ്ഡഡ് സ്കൂളുകളിൽ കെ-ടെറ്റ് യോഗ്യതയില്ലാത്ത അധ്യാപകരെ പിരിച്ചുവിടുമെന്ന ഉത്തരവ് പൊതുവിദ്യാഭ്യാസ വകുപ്പ് പിൻവലിച്ചു. കെ-ടെറ്റ് യോഗ്യതയില്ലാതെ ജോലി ചെയ്യുന്ന അധ്യാപകരെ പിരിച്ചുവിടാനും സ്ഥാനക്കയറ്റം റദ്ദാക്കാനുമായിരുന്നു ഉത്തരവ്.
പുതുക്കിയ ഉത്തരവ് പിന്നീട് പുറത്തിറക്കുമെന്ന് വിദ്യാഭ്യാസ വകുപ്പ് അറിയിച്ചു. കെ-ടെറ്റ് യോഗ്യതയില്ലാത്ത അധ്യാപകർക്ക് 2026 ഒക്ടോബർ 29 മുതൽ നിയമനാംഗീകാരവും സ്ഥാനക്കയറ്റവും നൽകില്ലെന്ന് കഴിഞ്ഞ ദിവസം ഉത്തരവിറക്കിയിരുന്നു. ഇതിൽ എയ്ഡഡ് സ്കൂളുകളുടെ കാര്യത്തിൽ വ്യക്തത വരുത്തിയാണ് ഇന്നലെ ഉത്തരവിറക്കിയത്. പ്രതിപക്ഷ അധ്യാപക സംഘടനകൾ ഉൾപ്പെടെ ഉത്തരവിനെതിരെ രംഗത്തുവന്ന പശ്ചാത്തലത്തിലാണ് തീരുമാനം. 2025 സെപ്റ്റംബർ ഒന്നിനാണ് കെ-ടെറ്റ് നിർബന്ധമാക്കി സുപ്രീംകോടതി വിധി പുറപ്പെടുവിച്ചത്.
ഈ തീയതിക്കോ ശേഷമോ യോഗ്യതയില്ലാതെ നിയമിക്കപ്പെട്ടവരെങ്കിൽ അവരെ മാനേജർമാർ പിരിച്ചുവിടണമെന്നാണ് ഉത്തരവിൽ പറയുന്നത്. മാതൃതസ്തികക്ക് ആവശ്യമായ കെ-ടെറ്റ് യോഗ്യത നേടാതെ 2025 സെപ്റ്റംബർ ഒന്നിനോ ശേഷമോ സ്ഥാനക്കയറ്റം നൽകപ്പെട്ട്, സ്ഥാനക്കയറ്റ തസ്തികയിൽ നിയമനാംഗീകാരം ലഭിക്കാതെ തുടരുന്നവരുണ്ടെങ്കിൽ മാതൃതസ്തികയിലേക്ക് തിരിച്ചയക്കണം. കെ-ടെറ്റ് യോഗ്യത നേടാത്തതും എന്നാൽ, പി.എസ്.സിയിൽനിന്ന് നിയമന ശിപാർശ ലഭിച്ചതുമായ ഉദ്യോഗാർഥികളുണ്ടെങ്കിൽ താൽക്കാലിക നിയമനം നൽകാം.
ഇവർ അതത് തസ്തികക്ക് നിർദേശിച്ച യോഗ്യത നേടുന്ന മുറക്ക് അവരുടെ ശിപാർശ സീനിയോറിറ്റി നിലനിർത്തി ക്രമീകരിക്കാം. ഇപ്രകാരം കെ-ടെറ്റ് യോഗ്യത നേടാൻ സുപ്രീംകോടതി ഉത്തരവിൽ പരാമർശിച്ച പരിധിക്കപ്പുറം സമയം അനുവദിക്കില്ല. 2025 സെപ്റ്റംബർ ഒന്നിനു മുമ്പ് ദിവസവേതനാടിസ്ഥാനത്തിൽ ജോലി ചെയ്തതും കെ-ടെറ്റിന് പകരമായി അന്ന് പരിഗണിക്കാവുന്ന സമാന യോഗ്യതകളുണ്ടായിരുന്നിട്ടും കെ- ടെറ്റ് നേടിയില്ലെന്ന കാരണത്താൽ ശമ്പളം ലഭിക്കാത്ത അധ്യാപകർക്ക് ദിവസവേതനം അനുവദിക്കാം.
2025 സെപ്റ്റംബർ ഒന്നിനു മുമ്പ് നിയമനാംഗീകാരം ലഭിച്ച എയ്ഡഡ് സ്കൂൾ അധ്യാപകർക്കും സർക്കാർ സ്കൂൾ അധ്യാപകർക്കും സുപ്രീംകോടതി വിധിയുടെ അടിസ്ഥാനത്തിൽ ഗ്രേഡ്, ഇൻക്രിമെന്‍റ് ആനുകൂല്യങ്ങൾ തടസ്സപ്പെടുത്തിയെങ്കിൽ അത് കാലതാമസമില്ലാതെ അനുവദിക്കാമെന്നും ഉത്തരവിൽ പറയുന്നു.
by Midhun HP News | Nov 2, 2026 | Latest News, ജില്ലാ വാർത്ത
കിളിമാനൂർ: അടയമൺ യു പി സ്കൂളിൽ കേരളപ്പിറവി ദിനം ആഘോഷിച്ചു. ദിനാചരണത്തിന്റെ ഭാഗമായി കേരളീയ നവോത്ഥാന നായകന്മാരുടെ പ്രച്ഛന്നവേഷം വിദ്യാർഥികൾ അവതരിപ്പിച്ചു. ശ്രീനാരായണഗുരു, അയ്യങ്കാളി, ചട്ടമ്പിസ്വാമി, വൈകുണ്ഠസ്വാമികൾ, തൈക്കാട് അയ്യ, അക്കമ്മ ചെറിയാൻ, സഹോദരൻ അയ്യപ്പൻ, പണ്ഡിറ്റ് കറുപ്പൻ, വക്കം അബ്ദുൽ ഖാദർ മൗലവി, എ വി കുട്ടിമാളു എന്നിവരുടെ വേഷമാണ് വിദ്യാർത്ഥികൾ അണിഞ്ഞത്. വിദ്യാർത്ഥികൾ മലയാളത്തിലെ അക്ഷരങ്ങൾ കോർത്ത് അക്ഷരപ്പൂക്കളവും നിർമ്മിച്ചു.
by Midhun HP News | Nov 2, 2026 | Latest News, കേരളം
കൊല്ലം: സ്ത്രീധന പീഡനവുമായി ബന്ധപ്പെട്ട് 26 വയസ്സുകാരിയായ യുവതി ജീവനൊടുക്കി. പത്തനാപുരം സ്വദേശിനിയായ സായയാണ് മരിച്ചത്.
വിവാഹസമ്മാനമായി നൽകിയ കാറിന്റെ വായ്പയുടെ മാസതവണയായ ഇ എം ഐ മുടങ്ങിയതിനെച്ചൊല്ലി ഭർത്താവിന്റെ ഭാഗത്തുനിന്ന് യുവതിക്ക് പീഡനം നേരിടേണ്ടിവന്നെന്നാണ് പുറത്തുവരുന്ന ആരോപണം.
കാറിന്റെ ഇ എം ഐ അടയ്ക്കുന്നതുമായി ബന്ധപ്പെട്ട തർക്കങ്ങളാണ് യുവതിയെ മാനസികമായി തളർത്തിയതെന്നാണ് ആരോപണം. സംഭവത്തിൽ കൂടുതൽ വിവരങ്ങൾ പുറത്തുവരാനുണ്ട്. വിവാഹബന്ധങ്ങളുടെ പേരിൽ സ്ത്രീകൾക്ക് നേരിടേണ്ടിവരുന്ന മാനസിക പീഡനങ്ങളും സ്ത്രീധനവുമായി ബന്ധപ്പെട്ട സമ്മർദങ്ങളും വീണ്ടും ചർച്ചയാകുകയാണ് ഈ സംഭവം.
by Midhun HP News | Nov 2, 2026 | Latest News, ദേശീയ വാർത്ത
ചെന്നൈ: ‘മുറസു’ ചുഴലിക്കാറ്റ് തെക്കന്‍ ആന്ധ്രാപ്രദേശ് തീരത്തേക്ക് നീങ്ങുന്നതിനിടെ തമിഴ്നാടിന്റെ വടക്കന്‍ മേഖലകളില്‍ ശക്തമായ മഴ. നിലവില്‍ ചെന്നൈയില്‍ നിന്ന് ഏകദേശം 250-260 കിലോമീറ്റര്‍ അകലെയാണ് മുറസു. ചുഴലിക്കാറ്റിന്റെ സ്വാധീനത്താല്‍ ചെന്നൈയിലെ പലയിടങ്ങളിലും വെള്ളക്കെട്ട് രൂപപ്പെട്ടു. ചെന്നൈയിലും സമീപ പ്രദേശങ്ങളിലും വ്യാപകമായ മഴയാണ് അനുഭവപ്പെടുന്നത്.
24 മണിക്കൂറിനുള്ളില്‍ നഗരത്തിന്റെ പല ഭാഗങ്ങളിലും 10 മുതല്‍ 15 സെന്റീമീറ്റര്‍ വരെ മഴ പെയ്തു. കടപ്പാക്കം ഉള്‍പ്പെടെയുള്ള ഇടങ്ങളില്‍ 15 സെന്റീമീറ്റര്‍ വീതം മഴയുണ്ടായി. മണലി ന്യൂ ടൗണിലും മണലിയിലും 14 സെന്റീമീറ്റര്‍ വീതം മഴ രേഖപ്പെടുത്തി. സത്തങ്ങാടില്‍ 13 സെന്റീമീറ്റര്‍ മഴ ലഭിച്ചപ്പോള്‍, കത്തിവക്കം, എന്നൂര്‍, ബേസിന്‍ ബ്രിഡ്ജ്, പുഴല്‍, വിംകോ നഗര്‍, തൊണ്ടിയാര്‍പേട്ട് തുടങ്ങിയ പ്രദേശങ്ങളില്‍ 11 സെന്റീമീറ്റര്‍ വീതം മഴ ലഭിച്ചു.
ശക്തമായ മഴയിലും മോശം കാലാവസ്ഥയിലും ചെന്നൈയെയും ആന്ധ്രാപ്രദേശിലെ വിവിധ നഗരങ്ങളെയും തിരുച്ചിറപ്പള്ളിയെയും ബന്ധിപ്പിക്കുന്ന 11 വിമാന സര്‍വീസുകള്‍ റദ്ദാക്കി. ചെന്നൈയില്‍ നിന്ന് വിജയവാഡ, രാജമുന്ദ്രി, കടപ്പ, തിരുച്ചിറപ്പള്ളി എന്നിവിടങ്ങളിലേക്കും തിരിച്ചുമുള്ള 11 വിമാന സര്‍വീസുകളാണ് ഇന്ന് റദ്ദാക്കിയത്.
ചെന്നൈ – വിജയവാഡ റൂട്ടിലെ മൂന്ന് സര്‍വീസുകളും, ചെന്നൈ – രാജമുന്ദ്രി റൂട്ടിലെ രണ്ട് സര്‍വീസുകളും, ചെന്നൈ – കടപ്പ റൂട്ടിലെ രണ്ട് സര്‍വീസുകളും, ചെന്നൈ – തിരുച്ചിറപ്പള്ളി റൂട്ടിലെ നാല് സര്‍വീസുകളുമാണ് റദ്ദാക്കിയതായി ചെന്നൈ വിമാനത്താവള അധികൃതര്‍ അറിയിച്ചു. വിശാഖപട്ടണം, ഹൈദരാബാദ്-വിജയവാഡ രണ്ട് സര്‍വീസുകള്‍ എയര്‍ ഇന്ത്യ എക്‌സ്പ്രസ് റദ്ദാക്കിയിട്ടുണ്ട്. വിജയവാഡ വിമാനത്താവളത്തില്‍ നിന്നുള്ള 10 വിമാന സര്‍വീസുകള്‍ ഇന്‍ഡിഗോയും റദ്ദാക്കിയിട്ടുണ്ട്.
Recent Comments