by Midhun HP News | Feb 26, 2025 | Latest News, കേരളം
കൊച്ചി: പൊക്കാളി മേഖലയിലെ പദ്ധതികൾ വിജയകരമായി മുന്നോട്ടു കൊണ്ടുപോകണമെങ്കിൽ നാട്ടുകാരുടെ സഹകരണം വേണമെന്ന് നടൻ സലിംകുമാർ. പൊക്കാളി പാടത്ത് മത്സ്യക്കൃഷിയുടെ കാലാവസ്ഥ കഴിയുന്ന ഉടൻ തന്നെ പുറത്തു നിന്നുള്ളവര് വലവീശി മീന് പിടിച്ചുകൊണ്ടു പോകുന്നത് അനീതിയാണ്. സ്വന്തം പാടത്ത് മത്സ്യകർഷകനെക്കാൾ അവകാശം പുറത്തു നിന്നുള്ളവർക്കാണെന്ന അവസ്ഥ മറ്റൊരു രാജ്യത്തും ഇല്ലെന്ന് അദ്ദേഹം പറഞ്ഞു.
താന് അതില് അനുഭവസ്ഥനാണെന്നും അദ്ദേഹം പറഞ്ഞു. സ്വന്തമായുള്ള 13 ഏക്കറില് 35,000 കരിമീന് കുഞ്ഞുങ്ങളെ നിക്ഷേപിക്കുകയും അവയെ തീറ്റ കൊടുത്തു വളര്ത്തുകയും ചെയ്തു. എന്നാല് ചിലര് കാലാവധിയുടെ പേരു പറഞ്ഞു രണ്ടിഞ്ചു വലുപ്പമുള്ള കരിമീൻ കുഞ്ഞുങ്ങളെ മുഴുവൻ പിടിച്ചു കൊണ്ടു പോയി. ആ ഭൂമിയിപ്പോള് ദുരന്ത ഭൂമിയാണെന്നും കൃഷി മന്ത്രി പി പ്രസാദിന്റെ സാന്നിധ്യത്തിൽ സലിംകുമാർ പറഞ്ഞു.
കാർഷിക വികസന കർഷക ക്ഷേമ വകുപ്പ് പ്രകാരം ‘2025’ എന്ന പേരിൽ കുഴുപ്പിള്ളിയിൽ സംഘടിപ്പിച്ച പൊക്കാളി ഏകദിന ശിൽപശാലയിൽ പങ്കെടുക്കാനെത്തിയതായിരുന്നു സലിംകുമാർ.
പൊക്കാളി പോലുള്ള പരമ്പരാഗത വിത്തിനങ്ങളുടെ ഗുണത്തിനും കരുത്തിനും പ്രാധാന്യം നൽകേണ്ടതുണ്ടെന്നും അതു മുൻനിർത്തിക്കൊണ്ടുള്ള പദ്ധതികളാണ് സർക്കാർ ആവിഷ്കരിക്കുന്നതെന്നും മന്ത്രി പി പ്രസാദ് പറഞ്ഞു. ഇത്തരം വിത്തിനങ്ങളെ ഉപേക്ഷിച്ച് മറ്റു വിത്തുകളുടെ പിന്നാലെ പോകുന്ന പ്രവണത കർഷകർ അവസാനിപ്പിക്കണം. കെ.എൻ.ഉണ്ണിക്കൃഷ്ണൻ എംഎൽഎ അധ്യക്ഷത വഹിച്ചു. കലക്ടർ എൻ.എസ്.കെ.ഉമേഷ്, ജില്ലാ പഞ്ചായത്ത് പ്രസിഡന്റ് മനോജ് മൂത്തേടൻ, പ്രിൻസിപ്പൽ കൃഷി ഓഫിസർ ഷേർളി സഖറിയാസ്, വൈപ്പിൻ ബ്ലോക്ക് പഞ്ചായത്ത് പ്രസിഡന്റ് തുളസി സോമൻ, പറവൂർ ബ്ലോക്ക് പഞ്ചായത്ത് പ്രസിഡന്റ് കമല സദാനന്ദൻ, പി വി ലാജു തുടങ്ങിയവർ പ്രസംഗിച്ചു.
by Midhun HP News | Feb 26, 2025 | Latest News, ജില്ലാ വാർത്ത
ആലപ്പുഴ: ആലപ്പുഴയില് ആശ വര്ക്കര്മാര് നടത്തുന്ന കലക്ടറേറ്റ് മാര്ച്ച് പൊളിക്കാന് ബദല് മാര്ച്ചുമായി സിഐടിയു ആശ യൂണിയന്. പാസ്പോര്ട്ട് ഓഫീസിലേക്കാണ് സിഐടിയു ആശ വര്ക്കേഴ്സ് യൂണിയന്റെ മാര്ച്ച്. ഒരേ സമയമാണ് ഇരു മാര്ച്ചുകളും. മാര്ച്ചില് പങ്കെടുക്കാന് ചുവപ്പ്, വെള്ള വസ്ത്രം അണിഞ്ഞെത്താന് സിഐടിയു സംഘടന ആശ യൂണിയന് പ്രവര്ത്തകര്ക്ക് നിര്ദേശം നല്കി. പി പി ചിത്തരഞ്ജന് എംഎല്എയാണ് സമരം ഉദ്ഘാടനം ചെയ്യുക.
ആലപ്പുഴയില് ആശ വര്ക്കര്മാര് നാളെ നടത്തുന്ന കലക്ടറേറ്റ് മാര്ച്ചില് പങ്കെടുക്കരുതെന്ന് സിഐടിയു നേതാവ് ശബ്ദസന്ദേശത്തിലൂടെ ആവശ്യപ്പെട്ടു. ആശ വര്ക്കര്മാരുടെ സിഐടിയു സംഘടനയുടെ വാട്സ്ആപ്പ് ഗ്രൂപ്പിലാണ് ശബ്ദ സന്ദേശമെത്തിയത്. സമരത്തില് പങ്കെടുക്കാന് പോകുന്നവര് യൂണിയനില് നിന്ന് രാജിവെച്ച് സമരത്തിന് പോകണം. എല്ലാം നേടിത്തന്നത് സിഐടിയു ആണെന്നും ജില്ലാ നേതാവിന്റെ ശബ്ദ സന്ദേശത്തില് പറയുന്നു.
ആരെങ്കിലും വിളിച്ചാല് സ്ഥലത്തില്ലെന്ന് പറഞ്ഞ് ഒഴിഞ്ഞ് മാറണമെന്നും സിഐടിയു നേതാവ് നിര്ദേശിക്കുന്നു. സെക്രട്ടേറിയറ്റിന് മുന്നില് സമരം ഇരിക്കുന്നത് മുഴുവന് ആശമാരല്ല, തൊഴിലുറപ്പ് തൊഴിലാളികള് ഉള്പ്പെടെ ഉണ്ടെന്ന് ശബ്ദ സന്ദേശത്തില് അധിക്ഷേപിക്കുന്നുണ്ട്. ആലപ്പുഴയില് നാളെ ആശ വര്ക്കര്മാരുടെ കലക്ടറേറ്റ് മാര്ച്ച് നടക്കാനിരിക്കെയാണ് സിഐടിയു നേതാവിന്റെ ശബ്ദ സന്ദേശം പുറത്ത് വന്നത്. പ്രതിപക്ഷം പിന്തുണയക്കുന്ന ആശ വര്ക്കര്മാരുടെ സമരം ഉദ്ഘാടനെ ചെയ്യുന്നത് മുന് എംപി ഡോ. കെ എസ് മനോജാണ്. ആലപ്പുഴയ്ക്ക് പുറമെ, കൊല്ലം, മലപ്പുറം കലക്ടറേറ്റുകളിലേക്കും ആശ വര്ക്കര്മാര് പ്രതിഷേധ മാര്ച്ച് സംഘടിപ്പിച്ചിട്ടുണ്ട്.
by Midhun HP News | Feb 26, 2025 | Latest News, ജില്ലാ വാർത്ത
തിരുവനന്തപുരം: കേരള അഡ്മിനിസ്ട്രേറ്റീവ് സര്വീസ് തെരഞ്ഞെടുപ്പിനായി മാര്ച്ച് ഏഴിന് വിജ്ഞാപനം പുറപ്പെടുവിക്കുമെന്ന് പിഎസ് സി. പ്രാഥമിക പരീക്ഷയും അന്തിമപരീക്ഷയും അഭിമുഖവും പൂര്ത്തിയാക്കി 2026 ഫെബ്രുവരി 16ന് റാങ്ക് ലിസ്റ്റ് പ്രസിദ്ധീകരിക്കും.
കെഎഎസ് തെരഞ്ഞെടുപ്പിന് ഒറ്റഘട്ടമായി നൂറ് മാര്ക്ക് വീതമുള്ള രണ്ടു പേപ്പര് അടങ്ങിയ പ്രാഥമിക പരീക്ഷ ജൂണ് 14ന് നടക്കും. 100 മാര്ക്ക് വീതമുള്ള 3 പേപ്പര് അടങ്ങിയ അന്തിമ വിവരണാത്മക പരീക്ഷ ഒക്ടോബര് 17, 18 തീയതികളില് നടത്തുമെന്നും പിഎസ് സി അറിയിച്ചു. 2026 ജനുവരിയില് അഭിമുഖം പൂര്ത്തിയാക്കി ഫെബ്രുവരി 16ന് റാങ്ക് ലിസ്റ്റ് പ്രസിദ്ധീകരിക്കും. പ്രാഥമിക പരീക്ഷയുടെയും അന്തിമ പരീക്ഷയുടെയും സിലബസ് വിജ്ഞാപനത്തോടൊപ്പം പ്രസിദ്ധീകരിക്കും. കഴിഞ്ഞ തവണത്തെ കെഎഎസ് തെരഞ്ഞെടുപ്പിന്റെ സിലബസാണ് പ്രാഥമിക, അന്തിമ പരീക്ഷകള്ക്ക് തീരുമാനിച്ചിട്ടുള്ളത്.
പ്രാഥമിക പരീക്ഷയിലും അന്തി മ പരീക്ഷയിലും ഇംഗ്ലീഷ് ചോദ്യത്തോടൊപ്പം മലയാള പരിഭാഷയും ഭാഷാ ന്യൂനപക്ഷങ്ങള്ക്ക് തമിഴ്, കന്നട പരിഭാഷയും ലഭ്യമാക്കും. ഉദ്യോഗാര്ഥികള്ക്ക് ഇംഗ്ലീഷിലോ, മലയാളത്തിലോ, ഭാഷാ ന്യൂനപക്ഷങ്ങള്ക്ക് ഇംഗ്ലീഷിലോ, തമിഴിലോ, കന്നടയിലോ ഉത്തരം എഴുതുവാനും അവസരം നല്കുമെന്നും പിഎസ് സി വാര്ത്താക്കുറിപ്പില് അറിയിച്ചു.
by Midhun HP News | Feb 26, 2025 | Latest News, കേരളം
കൊച്ചി: ആശ വര്ക്കര്മാരുടെ സമരത്തിനെതിരെ സിപിഎം നേതാവ് എളമരം കരീം വീണ്ടും. സമരം നടത്തുന്നത് ഏതോ ഈര്ക്കില് സംഘടനയാണ്. അവരുടെ സംഘടനാശക്തി കൊണ്ടൊന്നുമല്ല ഇത് സംഭവിക്കുന്നത്. അവര്ക്ക് പിന്നില് ആരോ ഉണ്ടാകാം. മാധ്യമങ്ങളുടെ ശ്രദ്ധ കിട്ടിയതോടെ അവര്ക്ക് ഒരു ഹരമായി. മഹിളാ കോണ്ഗ്രസ് മന്ത്രിയുടെ വീട്ടിലേക്ക് തള്ളിക്കയറുന്നു. എല്ലാ ദിവസവും വാര്ത്ത വരുന്നു. അങ്ങനെ ശ്രദ്ധ പിടിച്ചുപറ്റിയതിന്റെ ആവേശത്തിലാണ് സമരം തുടരുന്നത്. അതല്ലാതെ തൊഴിലാളികളുടെ പ്രശ്നം പരിഹരിക്കല് ഈ വിധത്തിലല്ല എന്നും എളമരം കരീം പറഞ്ഞു.
ആരോഗ്യമേഖലയെ പൂര്ണമായി സ്തംഭിപ്പിച്ചുകൊണ്ടുള്ള സമരത്തെ അനുകൂലിക്കാനാകില്ല. മുമ്പ് സിഐടിയു നിരവധി സമരങ്ങള് കേന്ദ്രസര്ക്കാര് ഓഫീസുകള്ക്കും പാര്ലമെന്റിനും മുന്നില് നടത്തി. കേന്ദ്ര തൊഴില് വകുപ്പുമായും ആരോഗ്യവകുപ്പുമായും ചര്ച്ച നടത്തിയപ്പോഴും ഇവര് തൊഴിലാളികളല്ല, വൊളണ്ടിയേഴ്സ് ആണെന്നാണ് കേന്ദ്രസര്ക്കാര് പറഞ്ഞത്. അതിനാല് ഇന്സെന്റീവ് മാത്രമേ നല്കാനാകൂ എന്നാണ് പറഞ്ഞത്.
ഈ സാഹചര്യത്തില് കേരള സര്ക്കാരിന് കഴിയാവുന്നത് സംസ്ഥാന സര്ക്കാര് ചെയ്തിട്ടുണ്ട്. ആശ വര്ക്കര്മാര്ക്ക് 7000 രൂപ വരെ ഓണറേറിയം നല്കുന്നത് കേരള സര്ക്കാര് കൂടി ചേര്ന്നിട്ടാണ്. കൂടാതെ, അവര് ചെയ്യുന്ന ഓരോ ജോലിക്കും പ്രത്യേക ഇന്സെന്റീവുകളുണ്ട്. ആശ വര്ക്കര്മാരുടെ ജോലിഭാരം കുറയ്ക്കണമെന്ന ആവശ്യത്തില്, എന്എച്ച്എം ഡയറക്ടര് ഇടപെട്ട് കുറയ്ക്കാമെന്ന് സമ്മതിച്ചിട്ടുണ്ട്.
ദേശീയ തലത്തില് എന്എച്ച്എം എംപ്ലോയീസ് ഫെഡറേഷന്, അങ്കണവാടി വര്ക്കേഴ്സ് ഫെഡറേഷന്, ആശ വര്ക്കേഴ്സ് ഫെഡറേഷന് എന്നിവരെല്ലാം ചേര്ന്ന് ഡല്ഹിയില് ശക്തമായ സമരം നടത്താന് തീരുമാനിച്ചിട്ടുണ്ട്. ഇന്ത്യാരാജ്യത്ത് കേരളത്തില് പരിഗണിക്കുന്നതുപോലെ ഒരു സ്ഥലത്തും ഈ വിഭാഗത്തെ പരിഗണിക്കുന്നില്ല എന്നതാണ് സത്യമെന്ന് എളമരം കരീം പറഞ്ഞു.
എന്എച്ച്എമ്മിന് കീഴില് ജോലി ചെയ്യുന്നവര് ആരോഗ്യ മേഖലയില് ജോലി ചെയ്യുന്നവരാണ്. ആരോഗ്യമേഖലയില് വളരെ കരുതലോടെയാണ് സിഐടിയു സമരം ചെയ്യുന്നത്. ആരോഗ്യമേഖലയെ സ്തംഭിപ്പിക്കുന്ന സമരത്തിലേക്ക് ഒരിക്കലും ട്രേഡ് യൂണിയനുകള് പോകാറില്ല. എന്നാല് ഈ സമരം ചെയ്യുന്നവര്ക്ക് അതൊന്നും അറിയില്ല. അവര് എന്തോ ചെയ്യുന്നുവെന്ന് എളമരം കരീം പറഞ്ഞു. ആരോഗ്യമേഖലയിലെ സര്വേകള്, കണക്കെടുപ്പുകള് തുടങ്ങിയവ നടത്തുന്നുണ്ട്. കുഷ്ടരോഗികളുടെ സര്വേ, ജീവിതശൈലീ രോഗങ്ങളുടെ സര്വേ തുടങ്ങിയവ കേരളത്തില് നടക്കുന്നുണ്ട്. ഇതെല്ലാം കേന്ദ്രസര്ക്കാര് ആവിഷ്കരിക്കുന്ന പദ്ധതികളാണ്. കൃത്യമായ സമയത്ത് സര്വേ റിപ്പോര്ട്ട് നല്കിയില്ലെങ്കില് രോഗനിര്മ്മാര്ജ്ജനത്തിനുള്ള ഫണ്ട് സംസ്ഥാനത്തിന് നഷ്ടമാകുമെന്ന് എളമരം കരീം പറഞ്ഞു.
by Midhun HP News | Feb 26, 2025 | Latest News, ജില്ലാ വാർത്ത
തിരുവനന്തപുരം: വെഞ്ഞാറമൂട് കൂട്ടക്കൊലപാതകത്തിന്റെ ചുരുളഴിക്കാന് പൊലീസ്. കൂട്ടക്കൊലപാതകത്തിന് സാമ്പത്തിക ബാധ്യതയാണോ കാരണം, അതോ മറ്റു കാരണങ്ങള് വല്ലതുമുണ്ടോ തുടങ്ങി നിരവധി ചോദ്യങ്ങള്ക്ക് ഉത്തരം കണ്ടെത്താനുള്ള ശ്രമത്തിലാണ് പൊലീസ്. ആശുപത്രിയില് ചികിത്സയില് കഴിയുന്ന പ്രതി അഫാനെ വിശദമായി ചോദ്യം ചെയ്യുന്നതോടെ ഉത്തരം കണ്ടെത്താന് കഴിയുമെന്ന പ്രതീക്ഷയിലാണ് പൊലീസ്.
പ്രതി അഫാനെ ഇന്ന് വീണ്ടും ചോദ്യം ചെയ്യും. അഫാന്റെ ആരോഗ്യനിലയില് പുരോഗതിയുണ്ടെങ്കിലും ഇന്നു കൂടി ആശുപത്രിയില് തുടരും. അഫാനെ കസ്റ്റഡിയിലെടുത്ത് വിശദമായി ചോദ്യം ചെയ്താല് മാത്രമേ കൊലപാതക കാരണത്തെക്കുറിച്ച് കൂടുതല് വ്യക്തത ലഭിക്കൂ എന്നാണ് പൊലീസ് പറയുന്നത്. കൂട്ടക്കൊലപാതകങ്ങള്ക്ക് പിന്നില് കൃത്യമായ ആസൂത്രണം ഉണ്ടായിട്ടുണ്ടെന്നാണ് പൊലീസിന്റെ പ്രാഥമിക നിഗമനം. ഓരോരുത്തരേയും ആക്രമിക്കാനുള്ള സമയം അഫാന് തീരുമാനിച്ചിരുന്നുവെന്നും പൊലീസ് കരുതുന്നു. വൈകീട്ട് സഹോദരനെ കുഴിമന്തി വാങ്ങാന് വിട്ടത് കാമുകിയെ കൊലപ്പെടുത്തുക എന്ന ഉദ്ദേശത്തോടെയാണെന്നുമാണ് പൊലീസ് നിഗമനം.
കൂട്ട ആത്മഹത്യയെ കുറിച്ച് മുന്പ് ആലോചിച്ചിരുന്നുവെന്ന പ്രതിയുടെ മൊഴിയുടെ അടിസ്ഥാനത്തില് അഫാന്റെ ഗൂഗിള് സെര്ച്ച് ഹിസ്റ്ററി പരിശോധിക്കാനും അന്വേഷണം സംഘം തീരുമാനിച്ചു. ഇതിന്റെ ഭാഗമായി സൈബര് പൊലീസിന് കത്ത് നല്കി. കൂട്ട ആത്മഹത്യയ്ക്കുള്ള മാര്ഗങ്ങള് ഗൂഗിളില് തെരഞ്ഞിരുന്നുവെന്നും പ്രതി മൊഴി നല്കിയിട്ടുണ്ട്. ഈ പശ്ചാത്തലത്തിലാണ് അഫാന്റെ ഗൂഗിള് സെര്ച്ച് ഹിസ്റ്ററി പരിശോധിക്കാന് തീരുമാനിച്ചത്. ഇതിന് പുറമേ അഫാന്റെയും ഉമ്മ ഷെമിയുടെയും ഫോണുകളും പരിശോധിക്കും. ഇതിനായി ഫോണുകള് ഫോറന്സിക് പരിശോധനയ്്ക്ക് കൈമാറി.
Recent Comments