by Midhun HP News | Aug 24, 2026 | Latest News, ജില്ലാ വാർത്ത
തിരുവനന്തപുരം: കേരളത്തില്‍ മണ്‍സൂണ്‍ മഴയില്‍ 23 ശതമാനം കുറവ് ഉണ്ടായതായി കേന്ദ്ര കാലാവസ്ഥ വകുപ്പ്. ജൂണ്‍ ഒന്നിനും ഓഗസ്റ്റ് 24നും ഇടയില്‍ കേരളത്തിന് സാധാരണയായി ലഭിക്കേണ്ട മഴയിലാണ് കുറവ് ഉണ്ടായിരിക്കുന്നത്. സാധാരണയായി 1,671 മില്ലിമീറ്റര്‍ മഴയാണ് ലഭിക്കേണ്ടത്. എന്നാല്‍ 1,278.7 മില്ലിമീറ്റര്‍ മഴ മാത്രമാണ് ലഭിച്ചതെന്ന് കണക്കുകള്‍ വ്യക്തമാക്കുന്നു.
കണ്ണൂര്‍, കാസര്‍കോട്, കോട്ടയം, കോഴിക്കോട്, പത്തനംതിട്ട, തിരുവനന്തപുരം എന്നി ആറ് ജില്ലകളില്‍ മാത്രമാണ് സാധാരണ ലഭിക്കേണ്ട മഴ ലഭിച്ചത്. മറ്റു ജില്ലകളിലെല്ലാം മഴയില്‍ കുറവ് ഉണ്ടായെന്നാണ് കണക്കുകള്‍ വ്യക്തമാക്കുന്നത്. സംസ്ഥാനത്ത് മഴക്കുറവ് ഏറ്റവും കൂടുതല്‍ രേഖപ്പെടുത്തിയത് വയനാട് ജില്ലയിലാണ്. സാധാരണ ലഭിക്കേണ്ട മഴയെ അപേക്ഷിച്ച് 51 ശതമാനം കുറവാണ് വയനാട്ടില്‍ രേഖപ്പെടുത്തിയത്. സാധാരണയായി 2114.7 മില്ലിമീറ്റര്‍ മഴ ലഭിക്കേണ്ട സ്ഥാനത്ത് 1,039.7 മില്ലിമീറ്റര്‍ മഴ മാത്രമാണ് വയനാടിന് ലഭിച്ചത്. ഇടുക്കിയില്‍ മഴയില്‍ 45 ശതമാനം കുറവാണ് ഉണ്ടായത്. 2092 മില്ലിമീറ്റര്‍ മഴ ലഭിക്കേണ്ട സ്ഥാനത്ത് 1,147 മില്ലിമീറ്റര്‍ മഴയാണ് ഇടുക്കിയില്‍ ലഭിച്ചത്. കൊല്ലമാണ് തൊട്ടുതാഴെ. മഴയില്‍ 30 ശതമാനം കുറവാണ് കൊല്ലത്ത് ഉണ്ടായത്.
അതേസമയം പത്തനംതിട്ടയില്‍ 1220 മില്ലിമീറ്റര്‍ മഴ ലഭിച്ചു. സാധാരണ ലഭിക്കേണ്ട മഴയോട് അടുത്ത് മഴ ഇത്തവണ കിട്ടി. സാധാരണയായി 1,250 മില്ലിമീറ്റര്‍ മഴയാണ് പത്തനംതിട്ടയില്‍ ലഭിക്കേണ്ടത്. തിരുവനന്തപുരത്ത് 632.5 മില്ലിമീറ്റര്‍ മഴ ലഭിക്കേണ്ട സാഹചര്യത്തില്‍ 629.6 മില്ലിമീറ്റര്‍ മഴ ലഭിച്ചതായും കണക്കുകള്‍ വ്യക്തമാക്കുന്നു.
by Midhun HP News | Aug 24, 2026 | Latest News, കേരളം
തിരുവോണത്തിന് തലേദിവസമായ ഉത്രാടം നാൾ കേരളത്തിന്റെ ഓണാഘോഷങ്ങളിൽ ഏറെ പ്രത്യേകതയുള്ള ദിവസമാണ്. ഓണസദ്യയ്ക്കും ആഘോഷങ്ങൾക്കുമുള്ള അവസാന ഒരുക്കങ്ങൾ പൂർത്തിയാക്കുന്നതിനായി നാടും നഗരവും ഒരുപോലെ സജീവമാകുന്ന ദിവസമാണിത്. ഈ ദിവസത്തെ തിരക്കിനും ഓട്ടത്തിനുമാണ് പൊതുവെ “ഉത്രാടപ്പാച്ചിൽ” എന്ന് പറയുന്നത്.
ഉത്രാടം എത്തുന്നതോടെ ഓണത്തിന്റെ ആവേശം അതിന്റെ ഉച്ചസ്ഥായിയിലെത്തും. നേരത്തെ വാങ്ങാൻ കഴിയാതെ പോയ സാധനങ്ങൾ അവസാ നമായി വാങ്ങുന്നതിനായി ആളുകൾ വീടുകളിൽ നിന്ന് വിപണികളിലേക്ക് എത്തുന്നു. പച്ചക്കറികൾ, പഴങ്ങൾ, പൂക്കൾ, പലവ്യഞ്ജനങ്ങൾ, വാഴയില, കായ, ഉപ്പേരി തുടങ്ങിയ സദ്യ വട്ടങ്ങൾ വാങ്ങാൻ കടകളിലും ചന്തകളിലും വലിയ തിരക്കായിരിക്കും. കാലം എത്ര മാറിയാലും ഉത്രാടപ്പാച്ചിലിനും തിരുവോണത്തിനും ഒരു മാറ്റവും ഉണ്ടാകാൻ സാധ്യതയില്ല. സൂപ്പർമാർക്കറ്റുകളെയും ഓൺലൈനുകളെയും ആശ്രയിക്കുന്ന തലമുറക്ക് ഇത് മനസ്സിലാകണമെങ്കിൽ തെരുവിലേക്ക് ഇറങ്ങണം അഥവാ ഏറ്റവും അടുത്ത ചന്ത ഒന്ന് സന്ദർശിക്കണം. കേരളത്തിന്റെ വ്യാപാര തലസ്ഥാനമായ എറണാകുളത്ത് ബ്രോഡ്വേയിലും ജ്യൂസ് സ്ട്രീറ്റിലും മാർക്കറ്റ് റോഡിലും എല്ലാം ഒരു അടി വെക്കാൻ പറ്റാത്ത അത്ര തിരക്കാണ്.
അവസാനവട്ട ഓണച്ചന്ത
ഉത്രാട ദിനത്തിലെ പ്രധാന കാഴ്ചകളിലൊന്ന് ഓണച്ചന്തകളിലെ തിരക്കാണ്. ഗ്രാമീണ ചന്തകൾ മുതൽ നഗരത്തിലെ മോളുകളും വ്യാപാരകേന്ദ്രങ്ങ ളും ഉപഭോക്താക്കളെ കൊണ്ട് നിറയും. ഓണകോടി വാങ്ങാനും ബന്ധുക്കൾക്കും സുഹൃത്തുക്കൾക്കും നൽകാനുള്ള സമ്മാനങ്ങൾ ശേഖരിക്കാനും ആളുകൾ ഈ ദിവസം സമയം കണ്ടെത്തുന്നു. പൂക്കൾക്കും ഉത്രാടച്ചന്തയിൽ വലിയ ആവശ്യമാണ്. പൂക്കളം ഒരുക്കുന്നതിനുള്ള വിവിധതരം പൂക്കൾ തേടി ആളുകൾ വിപണിയിലെത്തുന്നു. വീട്ടു മുറ്റത്ത് മനോഹരമായ പൂക്കളം ഒരുക്കാനുള്ള അവസാന വട്ട തയ്യാറെടുപ്പുകളും ഉത്രാട നാളിൽ നടക്കുന്നു. ബോണസും അഡ്വാൻസും ഒക്കെ കിട്ടിയ തുകയൊക്കെ ആളുകൾ ഗൃഹോപകരണങ്ങളും വസ്ത്രങ്ങളും ഒക്കെ വാങ്ങാനായി ചെലവഴിക്കുന്നു.
സദ്യയ്ക്കുള്ള ഒരുക്കങ്ങൾ
തിരുവോണ സദ്യയുടെ വിഭവങ്ങൾക്കാവശ്യമായ സാധനങ്ങൾ ശേഖരിക്കുന്നതും ഉത്രാടപ്പാച്ചിലിന്റെ പ്രധാന ഭാഗമാണ്. ചേന, കുമ്പളങ്ങ, വെള്ളരിക്ക, പയർ, പച്ചക്കായ, പാവയ്ക്ക തുടങ്ങിയ പച്ചക്കറികൾക്കൊപ്പം തേങ്ങ, പുളി, ശർക്കര, പരിപ്പ്, അരി, മസാലകൾ തുടങ്ങിയവയും വാങ്ങുന്നു. ചില വീടുകളിൽ സദ്യയ്ക്കാവശ്യമായ ചില പലഹാരങ്ങളും അച്ചാറുകളും ഉത്രാട ദിവസം തന്നെ തയ്യാറാക്കിത്തുടങ്ങും.
ഓണക്കോടിയുടെ ആവേശം
പുതിയ വസ്ത്രങ്ങൾ വാങ്ങുന്നതും ഉത്രാടനാളിന്റെ മറ്റൊരു പ്രധാന സവിശേഷതയാണ്. മുതിർന്നവർക്കും കുട്ടികൾക്കും ഓണക്കോടി വാങ്ങുന്ന പതിവ് ഇന്നും പല കുടുംബങ്ങളിലും തുടരുന്നു. വസ്ത്രശാലകളിൽ തിരക്ക് വർധിക്കുന്നതും ഉത്രാടപ്പാച്ചിലിന്റെ ഭാഗമാണ്.
ഗ്രാമവും നഗരവും ഒരുപോലെ സജീവം
ഉത്രാട നാളിൽ കേരളത്തിന്റെ ഗ്രാമീണ മേഖലകളിലും നഗരങ്ങളിലും ഒരുപോലെ ആഘോഷാന്തരീക്ഷമാണ്. റോഡുകളിൽ വാഹനത്തിരക്കും വ്യാപാര കേന്ദ്രങ്ങളിൽ ജനത്തിരക്കും വർധിക്കും. ചെറിയ കടകൾ മുതൽ വലിയ മാളുകൾ വരെ ഓണ വിപണിയുടെ സജീവത പ്രകടമാകും. അവസാന നിമിഷം വരെ ആവശ്യമായ സാധനങ്ങൾ വാങ്ങിയെടുക്കാനുള്ള തിരക്കാണ് എല്ലായിടത്തും കാണുന്നത്.
ഒന്നാം ഓണത്തിന്റെ പ്രത്യേകത
കേരളീയ ആചാരത്തിൽ ഉത്രാടം ഒന്നാം ഓണം എന്ന നിലയിലും അറിയപ്പെടുന്നു. അതുകൊണ്ടു തന്നെ ഉത്രാടം നാളിൽ തന്നെ പല വീടുകളിലും ഓ ണാഘോഷങ്ങൾക്ക് തുടക്കമാകും. ബന്ധുക്കൾ എത്തിച്ചേരുകയും വീടുകൾ വൃത്തിയാക്കി അലങ്കരിക്കുകയും പൂക്കളം ഒരുക്കുകയും ഓണ സദ്യ യ്ക്കുള്ള ഒരുക്കങ്ങൾ നടത്തുകയും ചെയ്യും.
“ഉത്രാടപ്പാച്ചിൽ” എന്നത് വെറും വിപണിയിലെ തിരക്കിന്റെ പേരല്ല. ഓണത്തെ വരവേൽക്കാനുള്ള കേരളീയരുടെ കൂട്ടായ ആവേശത്തിന്റെയും അവസാനവട്ട ഒരുക്കങ്ങളുടെയും പ്രതീകമാണ് അത്. തിരക്കിനിടയിലും കുടുംബത്തിനും ബന്ധങ്ങൾക്കും ആഘോഷത്തിനും പ്രാധാന്യം നൽകുന്ന മലയാളിയുടെ ഓണ സംസ്കാരത്തിന്റെ മനോഹരമായൊരു കാഴ്ചയാണ് ഉത്രാടപ്പാച്ചിൽ.
by Midhun HP News | Aug 24, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്ത് ഓണക്കാലത്തെ മദ്യവില്‍പ്പനയില്‍ റെക്കോര്‍ഡ്. കഴിഞ്ഞ ആറു ദിവസത്തിനിടെ മാത്രം മദ്യവില്‍പ്പനയില്‍ വന്‍വര്‍ധനയാണ് രേഖപ്പെടുത്തിയത്. കഴിഞ്ഞ ദിവസങ്ങളില്‍ ബെവ്‌കോയില്‍ 512.11 കോടിയുടെ മദ്യവില്‍പ്പനയാണ് നടന്നത്. കഴിഞ്ഞ വര്‍ഷം സമാന കാലയളവില്‍ ഇത് 460.8 കോടി രൂപയായിരുന്നുവെന്ന് കണക്കുകള്‍ വ്യക്തമാക്കുന്നു.
ഇന്നലെ വരെയുള്ള കണക്കനുസരിച്ച് മദ്യവില്‍പ്പനയില്‍ കഴിഞ്ഞ വര്‍ഷത്തെ അപേക്ഷിച്ച് ഏകദേശം 52 കോടി രൂപയുടെ വര്‍ധനയാണ് രേഖപ്പെടുത്തിയത്. ഇന്നും ഉത്രാട ദിനത്തിലും മദ്യവില്‍പ്പന കൂടുമെന്നാണ് ബെവ്‌കോയുടെ കണക്കുകൂട്ടല്‍.
കഴിഞ്ഞ ശനിയാഴ്ച മാത്രം 102 കോടിയുടെ മദ്യവില്‍പ്പനയാണ് നടന്നത്. കഴിഞ്ഞ മൂന്ന് ദിവസത്തിനിടെ 279.12 കോടിയുടെ മദ്യമാണ് സംസ്ഥാനത്ത് വിറ്റത്. ലഹരിമാഫിയയെ തളയ്ക്കാന്‍ സംസ്ഥാന സര്‍ക്കാര്‍ പ്രഖ്യാപിച്ച ‘ഓപ്പറേഷന്‍ തൂഫാ’നെത്തുടര്‍ന്ന് മയക്കുമരുന്ന് കിട്ടാതായവര്‍ മദ്യത്തിലേക്കു തിരിയുന്നുവെന്നതിനു തെളിവാണ് കുതിച്ചുയരുന്ന മദ്യ വില്‍പ്പനയെന്നാണ് പൊലീസിന്റെ നിഗമനം.
by Midhun HP News | Aug 24, 2026 | Latest News, ദേശീയ വാർത്ത
ഡല്‍ഹി: രാജ്യത്ത് പഞ്ചസാരയ്ക്ക് പിന്നാലെ സവാള വിലയും കുതിച്ചുയരുന്നു. രാജ്യത്തെ ശരാശരി സവാള വില കിലോയ്ക്ക് 42 രൂപയായി ഉയര്‍ന്നു. കഴിഞ്ഞ മാസത്തെ അപേക്ഷിച്ച് 19 ശതമാനം വര്‍ധനവാണുണ്ടായിട്ടുള്ളത്. കഴിഞ്ഞ വര്‍ഷം ഇതേ സമയത്തെ അപേക്ഷിച്ച് 45 ശതമാനമാണ് വര്‍ധന. ഡല്‍ഹി, കേരളം, തമിഴ്‌നാട്, അസം തുടങ്ങിയ മേഖലകളിലെല്ലാം സവാള വില കുതിച്ചുയര്‍ന്നു.
ഡല്‍ഹിയില്‍ കിലോയ്ക്ക് 65 രൂപയും (കഴിഞ്ഞ വര്‍ഷം 35 രൂപ) ചെന്നൈയില്‍ 58 രൂപയുമാണ് (കഴിഞ്ഞ വര്‍ഷം 33 രൂപ) നിലവിലുള്ള നിരക്ക്. ഡല്‍ഹിയില്‍ കഴിഞ്ഞ മാസത്തേക്കാള്‍ 20 രൂപയുടെ വര്‍ധനവാണ് ഉണ്ടായിരിക്കുന്നത്. സവാള വില കുതിച്ചുയരുന്നത് പരിഗണിച്ച്, വിലക്കയറ്റം നിയന്ത്രിക്കാന്‍ നടപടിയുമായി കേന്ദ്രസര്‍ക്കാര്‍ രംഗത്തെത്തി.
മഹാരാഷ്ട്രയിലെ നാസിക്കില്‍ നിന്ന് ഡല്‍ഹി, ചെന്നൈ, കൊച്ചി, ഗുവാഹത്തി എന്നിവിടങ്ങളിലേക്ക് പ്രത്യേക ട്രെയിന്‍ മാര്‍ഗം സവാള ഉള്ളി എത്തിക്കാനാണ് കേന്ദ്രത്തിന്റെ നീക്കം. സവാളയുമായി ‘കാന്ദ എക്‌സ്പ്രസ്’ ഇന്നു മുതല്‍ ഈ സംസ്ഥാനങ്ങളിലേക്ക് ഓടിത്തുടങ്ങും. മഹാരാഷ്ട്രയിലെ ബഫര്‍ സ്റ്റോക്കുകളില്‍ നിന്ന് പ്രധാന ഉപഭോഗ കേന്ദ്രങ്ങളിലേക്ക് ഉള്ളി എത്തിക്കുകയാണ് സര്‍ക്കാര്‍ ലക്ഷ്യമിടുന്നത്.
by Midhun HP News | Aug 24, 2026 | Latest News, ദേശീയ വാർത്ത
ഡല്‍ഹി: സെപ്റ്റംബര്‍ 11ന് ദേശ വ്യാപക ബാങ്ക് പണിമുടക്ക്. ബാങ്ക് യൂണിയനുകളുടെ സംയുക്ത ഫോറമായ യൂണൈറ്റഡ് ഫോറം ഓഫ് ബാങ്ക് യൂണിയന്‍സ് ആണ് പണിമുടക്ക് ആഹ്വാനം ചെയ്തത്.
ബാങ്കിങ് പ്രവര്‍ത്തനം ആഴ്ചയില്‍ അഞ്ചുദിവസമായി കുറയ്ക്കണമെന്ന നിര്‍ദേശം നടപ്പാക്കുന്നതിലെ കാലതാമസം, പ്രവര്‍ത്തന മികവിനെ അടിസ്ഥാനമാക്കി ഇന്‍സെന്റീവ് നല്‍കുന്ന പദ്ധതിയുമായി ബന്ധപ്പെട്ട അഭിപ്രായ വ്യത്യാസങ്ങള്‍, പെന്‍ഷന്‍ സംബന്ധമായ വിഷയം ഉള്‍പ്പെടെ നിരവധി ആവശ്യങ്ങള്‍ ഉന്നയിച്ചാണ് സമരം പ്രഖ്യാപിച്ചത്. സെപ്റ്റംബര്‍ 11 വെള്ളിയാഴ്ചയാണ്. സെപ്റ്റംബര്‍ 12 രണ്ടാം ശനിയാഴ്ചയും സെപ്റ്റംബര്‍ 13 ഞായറാഴ്ചയുമാണ്. ചില സംസ്ഥാനങ്ങളില്‍ വിനായക ചതുര്‍ഥിയോടനുബന്ധിച്ച് സെപ്റ്റംബര്‍ 14 തിങ്കളാഴ്ച ബാങ്ക് അവധിയാണ്. ഫലത്തില്‍ നാലുദിവസം ബാങ്കുകള്‍ അടഞ്ഞുകിടക്കും.
ഒന്‍പത് ബാങ്കിലെ ജീവനക്കാരുടെയും ഓഫീസര്‍മാരുടെയും യൂണിയനുകളുടെ സംയുക്ത ഫോറമാണ് യൂണൈറ്റഡ് ഫോറം ഓഫ് ബാങ്ക് യൂണിയന്‍സ്. ഇതിന് പുറമേ ആവശ്യങ്ങള്‍ പരിഗണിച്ചില്ലെങ്കില്‍ സെപ്റ്റംബര്‍ 28 മുതല്‍ മൂന്ന് ദിവസത്തെ രാജ്യ വ്യാപക പണിമുടക്ക് നടത്തുമെന്നും യൂണൈറ്റഡ് ഫോറം ഓഫ് ബാങ്ക് യൂണിയന്‍സ് മുന്നറിയിപ്പ് നല്‍കിയിട്ടുണ്ട്.
അര്‍ദ്ധ വാര്‍ഷിക കണക്കെടുപ്പ് സെപ്റ്റംബര്‍ അവസാനമാണ്. ഈസമയത്ത് പണിമുടക്ക് നടത്തിയാല്‍ അത് ബാങ്കുകളുടെ പ്രവര്‍ത്തനത്തെ ബാധിച്ചേക്കും. തുടര്‍ന്നും ആവശ്യങ്ങള്‍ അംഗീകരിക്കാന്‍ കേന്ദ്രസര്‍ക്കാരും ബാങ്ക് മാനേജ്‌മെന്റുകളും തയ്യാറായില്ലെങ്കില്‍ ഒക്ടോബര്‍ 26 മുതല്‍ അനിശ്ചിതകാല സമരത്തിലേക്ക് നീങ്ങാനും സംഘടന തീരുമാനിച്ചിട്ടുണ്ട്.
Recent Comments