by Midhun HP News | Aug 6, 2026 | Latest News, കേരളം
തൊടുപുഴ: കാര്‍ തോട്ടിലേക്ക് മറിഞ്ഞ് ഒരാള്‍ മരിച്ചു. ഇടുക്കി ഏലപ്പാറ നാലാംമൈലിനു സമീപമാണ് അപകടമുണ്ടായത്. കാറിലുണ്ടായിരുന്ന മൂന്നുപേര്‍ക്ക് പരിക്കേറ്റു. ഇതില്‍ ഒരാളുടെ നില ഗുരുതരമാണ്.
തിരുവനന്തപുരം സ്വദേശികള്‍ സഞ്ചരിച്ച വാഹനമാണ് അപകടത്തില്‍പ്പെട്ടത്. രാവിലെയായിരുന്നു അപകടം. ഏലപ്പാറയില്‍ നിന്നും കട്ടപ്പനയിലേക്ക് വരുന്ന മലയോര ഹൈവേയില്‍ നാലാം മൈലിന് സമീപമാണ് അപകടമുണ്ടായത്.
നിയന്ത്രണം വിട്ട കാര്‍ സമീപത്തെ ചിന്നാര്‍ തോട്ടിലേക്ക് മറിയുകയായിരുന്നു. കാറില്‍ അഞ്ചുപേരാണ് ഉണ്ടായിരുന്നത്. കാറിലുണ്ടായിരുന്ന നാലു വയസ്സുള്ള കുട്ടി പരിക്കേല്‍ക്കാതെ രക്ഷപ്പെട്ടു. പരിക്കേറ്റവരെ പീരുമേട് താലൂക്ക് ആശുപത്രിയില്‍ പ്രവേശിപ്പിച്ചിട്ടുണ്ട്.
by Midhun HP News | Aug 6, 2026 | Latest News, കേരളം
തിരുവനന്തപുരം: സംസ്ഥാനത്ത് വീണ്ടും വെള്ളപ്പൊക്ക ഭീഷണി ഉയര്‍ന്നതോടെ, എല്‍ഡിഎഫ് സര്‍ക്കാര്‍ നടപ്പാക്കിയ കോടികളുടെ പ്രളയ പ്രതിരോധ പദ്ധതികള്‍ വീണ്ടും ചര്‍ച്ചയാകുന്നു. വെള്ളപ്പൊക്ക ദുരിതങ്ങള്‍ തടയുന്നതിനായി പുതിയ ഡിസാസ്റ്റര്‍ റെസിലിയന്റ് പ്രോഗ്രാം പ്രഖ്യാപിച്ച പശ്ചാത്തലത്തില്‍, സമാന ലക്ഷ്യങ്ങളോടെ കഴിഞ്ഞ എല്‍ഡിഎഫ് സര്‍ക്കാരിന്റെ കാലത്ത് തുടങ്ങിയ പദ്ധതികളുടെ കാര്യക്ഷമതയാണ് ചോദ്യം ചെയ്യപ്പെടുന്നത്.
2018, 2019 പ്രളയങ്ങള്‍ക്ക് ശേഷം ആരംഭിച്ച റീബില്‍ഡ് കേരള ഡെവലപ്മെന്റ് പ്രോഗ്രാമിന്റെ ഭാഗമായി, 2025 മെയ്യിലാണ് റെസിലിയന്റ് കേരള പ്രോഗ്രാം ആരംഭിച്ചത്. കാലാവസ്ഥ വ്യതിയാനങ്ങളെ പ്രതിരോധിക്കാനും പ്രളയ മുന്നറിയിപ്പ് സംവിധാനങ്ങള്‍ കാര്യക്ഷമമാക്കാനും ലക്ഷ്യമിട്ടായിരുന്നു ഇത്. ലോകബാങ്ക്, ഏഷ്യന്‍ ഇന്‍ഫ്രാസ്ട്രക്ചര്‍ ഇന്‍വെസ്റ്റ്മെന്റ് ബാങ്ക്, ഫ്രഞ്ച് ഡെവലപ്മെന്റ് ഏജന്‍സി എന്നീ രാജ്യാന്തര ധനകാര്യ സ്ഥാപനങ്ങളുടെ സഹായത്തോടെ 2025 മുതല്‍ 2030 വരെയുള്ള ഘട്ടങ്ങളായാണ് പദ്ധതി പൂര്‍ത്തിയാക്കാന്‍ ലക്ഷ്യമിട്ടിരുന്നത്.
പമ്പ, അച്ചന്‍കോവില്‍, മണിമല ആറുകളെ ഉള്‍പ്പെടുത്തി ഗ്രേറ്റര്‍ പമ്പ നദീതടം കേന്ദ്രീകരിച്ചുള്ള സംയോജിത നദീതട പരിപാലന പദ്ധതിയുമുണ്ടായിരുന്നു. 2018ലെയും 2019ലെയും പ്രളയം കനത്ത നാശം വിതച്ച ഇടുക്കി, കോട്ടയം, പത്തനംതിട്ട, ആലപ്പുഴ ജില്ലകളിലായിരുന്നു ഇത് നടപ്പാക്കാന്‍ ഉദ്ദേശിച്ചിരുന്നത്. കൃത്യമായ പ്രളയ മുന്നറിയിപ്പ് നല്‍കല്‍, പ്രളയ പ്രവചനം ശക്തിപ്പെടുത്തല്‍, അണക്കെട്ടുകളിലെ ജലനിരപ്പ് ക്രമീകരിക്കല്‍, ദീര്‍ഘകാല ജലസുരക്ഷ ഉറപ്പാക്കല്‍ എന്നിവയായിരുന്നു പ്രധാന ലക്ഷ്യങ്ങള്‍. ഇതിനായി 2023 ജൂണില്‍ ലോകബാങ്ക് 1,426.47 കോടി രൂപയുടെ വായ്പാ സഹായം അനുവദിച്ചിരുന്നു.
പദ്ധതിയുടെ ഭാഗമായി പ്രളയ പ്രവചന സംവിധാനങ്ങള്‍ സജ്ജമാക്കിയതായി റിപ്പോര്‍ട്ടുകള്‍ അവകാശപ്പെട്ടിരുന്നെങ്കിലും, അടുത്തിടെയുണ്ടായ വെള്ളപ്പൊക്കത്തില്‍ ഇവ എത്രത്തോളം ഫലപ്രദമായെന്നതില്‍ സംശയം ഉയര്‍ന്നിട്ടുണ്ട്. പമ്പാ നദീതടത്തില്‍ കൃത്യസമയത്ത് മുന്നറിയിപ്പ് നല്‍കാനോ വെള്ളപ്പൊക്കത്തിന്റെ ആഘാതം കുറയ്ക്കാനോ ഈ സംവിധാനങ്ങള്‍ക്ക് സാധിച്ചില്ലെന്ന് മുതിര്‍ന്ന സര്‍ക്കാര്‍ ഉദ്യോഗസ്ഥന്‍ ചൂണ്ടിക്കാട്ടി. കുട്ടനാടിനെ വെള്ളപ്പൊക്കത്തില്‍ നിന്ന് സംരക്ഷിക്കുന്നതിനായി പമ്പ, മണിമല, അച്ചന്‍കോവില്‍ നദീതടങ്ങള്‍ ഉള്‍പ്പെടുത്തി സമഗ്ര പദ്ധതി കേന്ദ്ര സര്‍ക്കാരിന് സമര്‍പ്പിച്ചിരുന്നെങ്കിലും, ആവശ്യമായ പിന്തുണ ലഭിച്ചില്ലെന്ന് വിമര്‍ശനങ്ങളോട് പ്രതികരിച്ച മുന്‍ ജലസേചന മന്ത്രി റോഷി അഗസ്റ്റിന്‍ വ്യക്തമാക്കി.
by Midhun HP News | Aug 6, 2026 | Latest News, ദേശീയ വാർത്ത
ടെഹ്‌റാന്‍: ഹോര്‍മൂസ് കടലിടുക്ക് ഭാഗികമായി തുറക്കുന്നു. ഇറാനും ഒമാനും കൈകാര്യം ചെയ്യുന്ന താല്‍ക്കാലിക പാത സംബന്ധിച്ച് ധാരണയിലെത്തിയെന്ന് ഇറാന് സൂചിപ്പിച്ചു. ഒമാനുമായുള്ള ചര്‍ച്ച അന്തിമഘട്ടത്തിലാണെന്നും ഇറാന് വ്യക്തമാക്കി. എന്നാല്‍ ഹോര്‍മൂസില്‍ ഇറാന് മേല്‍ക്കൈ അനുവദിക്കുന്ന ധാരണ അംഗീകരിക്കില്ലെന്ന് അമേരിക്ക അറിയിച്ചു.
ഹോര്‍മൂസില്‍ ഇറാന്റെ അവകാശങ്ങള്‍ സംരക്ഷിക്കു തരത്തിലുള്ള ഏകദേശ ധാരണയാണ് ഒമാനുമായുള്ള ചര്‍ച്ചയില്‍ ഉണ്ടായിരിക്കുന്നത്. ഹോര്‍മൂസ് വഴി ഗള്‍ഫിലേക്ക് കടക്കുന്ന കപ്പലുകളുടെ നിയന്ത്രണം ഇറാനായിരിക്കും. കപ്പലിലെ ചരക്കുമൂല്യത്തില്‍റെ 5 മുതല്‍ 7 ശതമാനം വരെ ടോള്‍ നിരക്ക് ഈടാക്കാനും ഇറാന് അധികാരമുണ്ടാകും. ഇത്തരത്തില്‍ ഇറാന്റെയും ഒമാന്റെയും നിയന്ത്രണത്തിലൂടെയുള്ള താല്‍ക്കാലിക പാത തുറക്കാനാണ് ധാരണയായിട്ടുള്ളത്.
താല്‍ക്കാലിക പാതയുടെ പൂര്‍ണ നിയന്ത്രണം ഇറാനും ഒമാനും ആയിരിക്കും എന്നാണ് ചര്‍ച്ചയില്‍ ധാരണയായിട്ടുള്ളത്. എന്നാല്‍ ഇറാന് മേല്‍ക്കൈ നല്‍കുന്ന ധാരണ അനുവദിക്കാനാവില്ലെന്നും, താല്‍ക്കാലിക പാത എന്ന നിര്‍ദേശം അംഗീകരിക്കാനാവില്ലെന്നുമാണ് യുഎസ് നിലപാട്. ഇറാന് ഹോര്‍മൂസില്‍ മേല്‍ക്കൈ അനുവദിക്കുന്നത് അവരുടെ വിജയം അംഗീകരിക്കുന്നതിന് തുല്യമാണെന്നും യുഎസ് കണക്കുകൂട്ടുന്നു.
അടിയന്തരമായി ഹോര്‍മൂസ് തുറക്കണമെന്നും, ഹോര്‍മൂസിന്റെ നിയന്ത്രണം വിട്ടുനല്‍കാന്‍ തയ്യാറായില്ലെങ്കില്‍ ഇറാനുമേല്‍ കടുത്ത അക്രമണം ഉണ്ടാകുമെന്നും യുഎസ് പ്രസിഡന്റ് ഡോണള്‍ഡ് ട്രംപ് മുന്നറിയിപ്പ് നല്‍കിയിരുന്നു. വെള്ളിയാഴ്ചയ്ക്കകം ഹോര്‍മൂസ് തുറക്കുന്നതില്‍ അന്തിമ തീരുമാനം ഉണ്ടാകുമെന്നും ട്രംപ് അഭിപ്രായപ്പെട്ടിരുന്നു. ഒന്നുകില്‍ യുഎസുമായി ധാരണയിലെത്തുക അല്ലെങ്കില്‍ പൂര്‍ണമായും കീഴടങ്ങുക എന്ന മുന്നറിയിപ്പും ഇറാന് ട്രംപ് നല്‍കിയിരുന്നു.
by Midhun HP News | Aug 6, 2026 | Latest News, കേരളം
കൊച്ചി: സ്വര്‍ണക്കൊള്ളയ്ക്കു പിന്നാലെ ശബരിമല നെയ്യ് ക്രമക്കേടിലും തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് പിഎസ് പ്രശാന്ത് പ്രതിയാകും. ദുരൂഹ ഇടപാടിന് നേതൃത്വം നല്‍കിയത് പ്രശാന്താണെന്ന് വിജിലന്‍സ് അന്വേഷണത്തില്‍ കണ്ടെത്തിയതോടെയാണ് പ്രതി ചേര്‍ക്കാന്‍ തീരുമാനിച്ചത്. ദേവസ്വം ബോര്‍ഡ് മുന്‍ അംഗം അജികുമാര്‍, മുന്‍ അഡ്മിനിസ്ട്രേറ്റിവ് ഓഫിസര്‍ മുരാരി ബാബു എന്നിവരെയും പ്രതിചേര്‍ക്കും. മുരാരി ബാബു മരണപ്പെട്ടെങ്കിലും പ്രതിപ്പട്ടികയില്‍ ഉള്‍പ്പെടുത്തും. പിന്നീട് തുടര്‍നടപടികളില്‍ നിന്ന് ഒഴിവാക്കും. മണ്ഡല കാലത്ത് മില്‍മയില്‍ നിന്ന് നെയ്യ് വാങ്ങിയതില്‍ ക്രമക്കേടുണ്ടായെന്നാണ് കേസ്. പിഎസ് പ്രശാന്ത് നിലവില്‍ സ്വര്‍ണക്കൊള്ളക്കേസില്‍ ജയിലിലാണ്.
മില്‍മയില്‍ നിന്ന് വാങ്ങിയ ഒന്നര ലക്ഷം ലിറ്റര്‍ നെയ്യ് മാറിച്ചുവിറ്റെന്നും ടെന്‍ഡര്‍ നടപടിയില്‍ കൃത്രിമം നടന്നെന്നുമാണ് ആരോപണം. കുറഞ്ഞ വിലയ്ക്ക് നെയ്യ് നല്‍കാമെന്ന തമിഴ്‌നാട് സ്ഥാപനത്തിന്റെ വാഗ്ദാനം തള്ളി മില്‍മയില്‍ നിന്ന് നെയ്യ് വാങ്ങിയതിലൂടെ ദേവസ്വം ബോര്‍ഡിനു 2.27 കോടിയുടെ നഷ്ടം ഉണ്ടായെന്നാണു വിജിലന്‍സിന്റെ കണ്ടെത്തല്‍. മുന്‍ എക്‌സിക്യുട്ടീവ് ഓഫിസര്‍ മുരാരി ബാബുവിന്റെ ശുപാര്‍ശയിലാണു മില്‍മയുടെ നെയ്യ് വാങ്ങിയത്. ദേവസ്വം കമ്മിഷണര്‍ എതിര്‍ത്തെങ്കിലും അന്നത്തെ ബോര്‍ഡ് പ്രസിഡന്റ് പിഎസ് പ്രശാന്തും അംഗം അജികുമാറും മില്‍മയെ അനുകൂലിക്കുകയും മറ്റ് ടെന്‍ഡറുകള്‍ റദ്ദാക്കുകയുമായിരുന്നു.
എറണാകുളം വിജിലന്‍സ് സ്‌പെഷല്‍ സെല്‍ എസ്പി എംജെ സോജന്റെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. അതീവ ജാഗ്രതയോടും ഊര്‍ജി മായും അന്വേഷണം നടത്തണമെന്നു ഹൈക്കോടതി നിര്‍ദേശിച്ചു. മാധ്യമവാര്‍ത്തകളുടെ അടിസ്ഥാനത്തില്‍ സ്വമേധയാ കേസെടുത്ത ഹൈക്കോടതി, പ്രത്യേക ടീമിനെ നിയോഗി ക്കാന്‍ വിജിലന്‍സ് ഡയറക്ടറോടു നേരത്തേ ആവശ്യപ്പെട്ടിരുന്നു. ന്നിധാനത്തെ ആടിയശിഷ്ടം നെയ്യ് ക്രമക്കേട് കേസും സോജനാണ് അന്വേഷിക്കുന്നത് എന്നതിനാല്‍ മില്‍മ നെയ്യ് കേസിലും ചുമതലയേല്‍പ്പിക്കാമെന്ന് ദേവസ്വം ബെഞ്ച് നിര്‍ദേശിച്ചു. കേസ് 17നു വീണ്ടും പരിഗണിക്കും.
by Midhun HP News | Aug 6, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയുടെ കുതിപ്പ് തുടരുന്നു. ഇന്ന് പവന് ഒറ്റയടിക്ക് 2120 രൂപയാണ് വര്‍ധിച്ചത്. 1,09,800 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 265 രൂപയാണ് കൂടിയത്. 13,725 രൂപയാണ് ഒരു ഗ്രാം സ്വര്‍ണത്തിന്റെ വില. ഇന്നലെ രണ്ടു തവണയായി 2000 രൂപയാണ് വര്‍ധിച്ചത്. ഇതോടെ രണ്ടു ദിവസത്തിനിടെ സ്വര്‍ണവിലയില്‍ 4200 രൂപയുടെ വര്‍ധനയാണ് രേഖപ്പെടുത്തിയത്.
എണ്ണവില കുറഞ്ഞത് അടക്കമുള്ള ഘടകങ്ങളാണ് സ്വര്‍ണവിലയെ സ്വാധീനിച്ചത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡിന്റെ വില ബാരലിന് 80 ഡോളറില്‍ താഴെയെത്തി നില്‍ക്കുകയാണ്. കൂടാതെ യുഎസ് കേന്ദ്ര ബാങ്കായ ഫെഡറല്‍ റിസര്‍വ് പലിശ നിരക്കില്‍ മാറ്റം വരുത്താതിരുന്നതും സ്വര്‍ണവിലയെ സ്വാധീനിക്കുന്നുണ്ട്. അമേരിക്ക- ഇറാന് സംഘര്‍ഷത്തിന് അയവ് വന്നതാണ് എണ്ണവില കുറയാണ് കാരണം.
വരും ദിവസങ്ങളിലും അന്താരാഷ്ട്ര വിപണിയിലെ ചലനങ്ങള്‍ക്കനുസരിച്ച് സംസ്ഥാനത്തെ വിലയില്‍ വ്യതിയാനങ്ങള്‍ തുടരാന്‍ സാധ്യതയുണ്ട്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
Recent Comments