ഹെല്‍മറ്റിനുള്ളില്‍ കുഞ്ഞു പെരുമ്പാമ്പ്; ബൈക്ക് യാത്രക്കാരന്റെ തലയില്‍ കടിച്ചു

by Midhun HP News | Jun 2, 2024 | Latest News, കേരളം

കണ്ണൂര്‍: വീട്ടില്‍ നിര്‍ത്തിയിട്ട ബൈക്കിന് മുകളില്‍വെച്ച ഹെല്‍മറ്റില്‍ കയറിക്കൂടിയത് കുട്ടി പെരുമ്പാമ്പ്. ഇതറിയാതെ രാവിലെ ജോലി സ്ഥലത്തേക്ക് പോകേണ്ട തിരക്കില്‍ ഹെല്‍മറ്റ് ധരിച്ച ബൈക്ക് യാത്രക്കാരന്റെ തലയില്‍ പാമ്പ് കടിച്ചു. പടിയൂര്‍ നിടിയോടിയിലെ കെ രതീഷിനാണ്(40)കടിയേറ്റത്.

തലയില്‍ കടിയേറ്റപ്പോഴാണ് ഹെല്‍മറ്റ് അഴിച്ചുനോക്കിയത്. അകത്ത് പാമ്പാണെന്ന് കണ്ടപ്പോള്‍ വെപ്രാളത്തിനിടയില്‍ ഹെല്‍മറ്റ് എറിഞ്ഞു. കടിച്ച പാമ്പിനെ തിരിച്ചറിയാനും കഴിഞ്ഞില്ല. ഉടന്‍ ബന്ധുക്കള്‍ രതീഷിനെ കണ്ണൂരിലെ സ്വകാര്യ ആസ്പത്രിയിലെത്തിച്ചു.
പരിശോധനയ്ക്കിടയിലാണ് പെരുമ്പാമ്പാണെന്നും വിഷമില്ലാത്തതാണെന്നും മനസ്സിലായത്. വനം വകുപ്പിലെ താത്കാലിക ജീവനക്കാരനാണ് രതീഷ്.

കുടിക്കാന്‍ വെള്ളം ചോദിച്ചെത്തി; ചിതറയില്‍ യുവാവ് പട്ടാപ്പകല്‍ വീട്ടമ്മയെ ബലാത്സംഗം ചെയ്തു

by Midhun HP News | Jun 2, 2024 | Latest News, കേരളം

കൊല്ലം: കുടിക്കാന്‍ വെള്ളം ചോദിച്ചെത്തിയ യുവാവ് പട്ടാപ്പകല്‍ വീട്ടമ്മയെ ബലാത്സംഗം ചെയ്തു. കൊല്ലം ചിതറയിലാണ് വീട്ടില്‍ അതിക്രമിച്ച് കയറി യുവതിയെ പീഡിപ്പിച്ചത്. ചിതറ ചള്ളിമുക്ക് സ്വദേശി 22 വയസുള്ള വിഷ്ണുവിനെ പൊലീസ് അറസ്റ്റ് ചെയ്തു.

വ്യാഴം ഉച്ചയ്ക്കായിരുന്നു കേസിനാസ്പദമായ സംഭവം. വെള്ളം ചോദിച്ചെത്തിയ യുവാവ് വീട്ടില്‍ അതിക്രമിച്ച് കയറി പീഡിപ്പിക്കുയായിരുന്നു. ഈ സമയത്ത് ഭര്‍ത്താവും കുട്ടിയും വീട്ടില്‍ ഇല്ലായിരുന്നു.വിഷ്ണുവിന് ഒരു ഗ്ലാസ് വെള്ളം കൊടുത്തുപ്പോള്‍ ഒരു ഗ്ലാസ് കൂടി ആവശ്യപ്പെട്ടു. വെള്ളം എടുക്കാനായി യുവതി അടുക്കളയിലേക്ക് പോയപ്പോള്‍ അകത്ത് കയറിയ വിഷ്ണു യുവതിയെ ബലാത്സംഗം ചെയ്യുകയായിരുന്നു. യുവതി ബഹളം വച്ചതോടെ വിഷ്ണു ഓടിരക്ഷപ്പെട്ടു.യുവതി അയല്‍ക്കാരെയും ബന്ധുക്കളെയും അറിയിച്ചതിനെ തുടര്‍ന്ന് പ്രതിയെ പ്രദേശത്തുനിന്നു തന്നെ പിടികൂടി പൊലീസിന് കൈമാറുകയായിരുന്നു. പ്രതി ലഹരിക്ക് അടിമയും നിരവധി കേസുകളില്‍ പ്രതിയാണെന്ന് ചിതറ പൊലീസ് അറിയിച്ചു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

‘കേരളസര്‍ക്കാര്‍’ മതി; പരിഷ്‌കരിച്ച ‘തുമ്പയുടെ’ അക്ഷര ഭംഗിയില്‍ മലയാള പാഠാവലി

by Midhun HP News | Jun 1, 2024 | Latest News, കേരളം

തിരുവനന്തപുരം: വരികള്‍ക്കിടയില്‍ കൂടുതല്‍ അകലമിട്ടും അക്ഷരത്തിന്റെ വലുപ്പം കൂട്ടിയും തുമ്പ ഫോണ്ടില്‍ പരിഷ്‌കരിച്ച ലിപിയോടെ പുതിയ മലയാള പാഠപുസ്തകങ്ങള്‍ ഒരുങ്ങുന്നു. വ്യഞ്ജനങ്ങളോട് സ്വരങ്ങള്‍ ചേര്‍ന്നുണ്ടാകുന്ന അക്ഷരങ്ങളുടേയും കൂട്ടക്ഷരങ്ങളുടേയും എണ്ണം കുറച്ച പാഠപുസ്തകത്തില്‍ 90 ലിപികളാണ് ഉപയോഗിച്ചിരിക്കുന്നത്.

കേരളാ സര്‍ക്കാര്‍, കേരള സര്‍ക്കാര്‍ എന്നീ പ്രയോഗങ്ങള്‍ക്ക് പകരം ദീര്‍ഘവും അകലവും കുറച്ച് കേരളസര്‍ക്കാര്‍ എന്നാണ് ഉപയോഗിച്ചിരിക്കുന്നത്. പൊതുവിദ്യാഭ്യാസവകുപ്പ് എന്ന് ചേര്‍ത്താണ് എഴുതിയിരിക്കുന്നത്. അധ്യാപകന്‍, പൊലീസ്, വിദ്യാര്‍ഥി, ക്ലാസ്, മാര്‍ഗം, താല്‍പര്യം തുടങ്ങിയ വാക്കുകള്‍ പഴയ ലിപിയില്‍ നിന്നും മാറിയിട്ടുണ്ട്.

മലയാളത്തില്‍ അഞ്ഞൂറിലധികം ലിപികള്‍ നിലവിലുള്ളത് അച്ചടിയില്‍ വിഷമം സൃഷ്ടിക്കുന്നതിനാലാണ് ലിപികളുടെ എണ്ണം കുറച്ചത്. മലയാളത്തിന്റെ ശൈലീരീതി എന്ന ശൈലീ പുസ്തകവും ഇതിനായി പ്രസിദ്ധീകരിച്ചു. 1971ലാണ് ആദ്യം ലിപി പരിഷ്‌കരണം നടത്തിയത്. കംപ്യൂട്ടറില്‍ മലയാളം ടൈപ്പിങ് വ്യാപകമായ സാഹചര്യത്തിലാണ് ഏകീകൃത എഴുത്തു രീതിക്ക് രൂപം കൊടുക്കാന്‍ ചീഫ് സെക്രട്ടറിയായിരുന്ന വി പി ജോയ് അധ്യക്ഷനായി 2021ല്‍ ഔദ്യോഗിക ഭാഷാ പരിഷ്‌കരണ സമിതി രൂപീകരിച്ചത്.