by Midhun HP News | Jan 6, 2026 | Latest News, ജില്ലാ വാർത്ത, സിനിമ
സര്വ്വം മായയുടെ വന് വിജയത്തിന്റെ സന്തോഷത്തിലൂടെ കടന്നു പോവുകയാണ് നിവിന് പോളി. ഏറെ നാളുകള്ക്ക് ശേഷമാണ് നിവിന് പോളിയുടെ ഒരു സിനിമ ബോക്സ് ഓഫീസില് വിജയം നേടുന്നത്. 600 ദിവസത്തെ ഇടവേളയ്ക്ക് ശേഷം തിയേറ്ററിലെത്തിയ നിവിന് പോളി ചിത്രമാണ് സര്വ്വം മായ. അഖില് സത്യനൊരുക്കിയ ചിത്രം പത്ത് ദിവസം കൊണ്ട് തന്നെ നൂറ് കോടി ക്ലബ്ബില് ഇടം നേടുകയും ചെയ്തു.
സര്വ്വം മായയുടെ വിജയത്തിന് പിന്നാലെ, മോശം സമയത്തും തനിക്ക് പിന്തുണ നല്കി കൂടെ നിന്ന പ്രേക്ഷകര്ക്ക് നിവിന് പോളി നന്ദി പറഞ്ഞിരുന്നു. കരിയറില് പ്രശ്നങ്ങളും ബുദ്ധിമുട്ടുകളും നേരിടേണ്ടി വന്നപ്പോള് ദൈവത്തെപ്പോലെ കൂടെ നിന്നത് പ്രേക്ഷകരാണെന്നാണ് നിവിന് പോളി പറഞ്ഞത്. വിവാദങ്ങള് നേരിടേണ്ടി വന്ന സമയത്ത് പ്രേക്ഷകരുടെ സ്നേഹം തൊട്ടറിഞ്ഞൊരു അനുഭവം മനോരമ ഓണ്ലൈനിന് നല്കിയ അഭിമുഖത്തില് നിവിന് പോളി പങ്കുവെക്കുന്നുണ്ട്.
”എന്റെ ജീവിതത്തില് ഏറ്റവും കടുപ്പമേറിയ ചില ദിവസങ്ങള് ഉണ്ടായിരുന്നു. എനിക്കെതിരെ കെട്ടിച്ചമച്ച ആരോപണങ്ങളുമായി ഒരാള് വന്ന സമയം കലൂരിലെ വീട്ടിലേക്കു പോകുമ്പോള്, സ്കൂട്ടറില് വന്ന ഒരു കുടുംബം എന്റെ കാറിനു വട്ടം വച്ചു നിര്ത്തി. ആ ഭാര്യയും ഭര്ത്താവും എന്നോടു പറഞ്ഞു, ‘ഞങ്ങളുണ്ട് കൂടെ. ഇതിലൊന്നും തളരരുത്. ധൈര്യമായി മുന്നോട്ടു പോകണം’. എന്റെ കണ്ണു നിറഞ്ഞു പോയി. എന്റെ ആരാണവര്? അവര്ക്കു വണ്ടി ഓടിച്ചു നേരെ വീട്ടില് പോയാല് പോരെ? പക്ഷേ, ഞാന് ചെയ്ത ചില സിനിമകള് അവരെ സന്തോഷിപ്പിച്ചിട്ടുണ്ടാവും. അതുകൊ ണ്ടാവും വണ്ടി നിര്ത്തി അടുത്തേക്കു വരാന് തോന്നിയത്.” എന്നാണ് നിവിന് പോളി പറഞ്ഞത്.
സ്ഥിരമായി ഒരേ തരത്തിലുള്ള സിനിമകള് ചെയ്യൂവെന്ന് വിമര്ശനങ്ങള് നേരിട്ടപ്പോഴാണ് താന് പരീക്ഷണങ്ങള്ക്ക് തയ്യാറായതെന്ന് നേരത്തെ നിവിന് പോളി പറഞ്ഞിരുന്നു. എന്നാല് താന് ചെയ്ത സിനിമകളെല്ലാം തനിക്ക് ഇഷ്ടപ്പെട്ടവയായിരുന്നുവെന്ന് നിവിന് പറയുന്നു. ”എനിക്ക് ഇഷ്ടപ്പെട്ട സിനിമകളാണ് ചെയ്തതൊക്കെയും. നിര്ഭാഗ്യവശാല് അവ വേണ്ടതുപോലെ വിജയിക്കുകയോ ശ്രദ്ധിക്കപ്പെടുകയോ ചെയ്തില്ലെന്നു മാത്രം. ഞാന് മാത്രമല്ല കുടുബം മുഴുവന് അതിന്റെ മാനസിക ബുദ്ധിമുട്ടുകള് അനുഭവിച്ചു. എവിടെ ചെന്നാലും ആളുകള്ക്കു ചോദിക്കാന് ഉണ്ടായിരുന്നത് സിനിമകളുടെ പരാജയത്തെപ്പറ്റി മാത്രമായിരുന്നു. പലരും പല ഉപദേശങ്ങള് നല്കുകയും ചെയ്തു. അതോടെ ഞാനാകെ കണ്ഫ്യൂഷനിലായി” എന്നും നിവിന് പറയുന്നു.
അഖില് സത്യന് ഒരുക്കിയ സര്വ്വം മായയിലെ നായിക റിയ ഷിബുവാണ്. അജു വര്ഗീസും നിവിന് പോളിയും വര്ഷങ്ങള്ക്ക് ശേഷം ഒരുമിച്ച ചിത്രം കൂടിയാണ് സര്വ്വം മായ. ജനാര്ദ്ദനന്, പ്രീതി മുകുന്ദന്, മധു വാര്യര് തുടങ്ങിയവരും ചിത്രത്തില് പ്രധാന വേഷങ്ങളിലെത്തുന്നുണ്ട്. ഹൗസ്ഫുള്ളായി ഇപ്പോഴും പ്രദര്ശനം തുടരുകയാണ് സര്വ്വം മായ.
by Midhun HP News | Jan 6, 2026 | Latest News, ദേശീയ വാർത്ത
ഡല്ഹി: ഇന്ത്യയെ ലക്ഷ്യംവെച്ച് രാജ്യത്തെ പ്രായപൂര്ത്തിയാവാത്ത കുട്ടികളെ അടക്കം റിക്രൂട്ട് ചെയ്ത് പാകിസ്ഥാന് രഹസ്യാന്വേഷണ ഏജന്സിയായ ഐഎസ്ഐ വല വിപുലീകരിക്കുന്നതായി റിപ്പോര്ട്ട്. സുരക്ഷാ ആശങ്കകള് ഉയരുന്നതിനിടെ, ചാരവൃത്തി ആരോപിച്ച് പഞ്ചാബ് പൊലീസ് 15 വയസ്സുള്ള ആണ്കുട്ടിയെ അറസ്റ്റ് ചെയ്തു. ഇതിന് പിന്നാലെ പഞ്ചാബില് ഉടനീളം ജാഗ്രത വര്ധിപ്പിച്ചു.
ഐഎസ്ഐ ബന്ധമുള്ളവരുമായി കുട്ടി ഒരു വര്ഷത്തോളമായി ബന്ധം സ്ഥാപിച്ചിരുന്നതായി അന്വേഷണ ഉദ്യോഗസ്ഥര് കണ്ടെത്തിയതിനെ തുടര്ന്നാണ് പത്താന്കോട്ട് പൊലീസ് അറസ്റ്റ് ചെയ്തത്. ഇന്ത്യയുമായി ബന്ധപ്പെട്ട പ്രധാനപ്പെട്ടതും സെന്സിറ്റീവുമായ വിവരങ്ങള് മൊബൈല് ഫോണ് വഴി കുട്ടി പങ്കുവെച്ചതായും കണ്ടെത്തിയിട്ടുണ്ട്.
ജമ്മുവിലെ സാംബ ജില്ലയില് താമസിക്കുന്ന കുട്ടി പാകിസ്ഥാന് കേന്ദ്രമായി പ്രവര്ത്തിക്കുന്നവരുമായി ആശയവിനിമയം നടത്തിയതായി നിരീക്ഷണത്തിലൂടെയും സാങ്കേതിക വിശകലനത്തിലൂടെയുമാണ് കണ്ടെത്തിയത്. ചോദ്യം ചെയ്യലില് 15കാരന് ഒറ്റയ്ക്കല്ലെന്നും പ്രായപൂര്ത്തിയാവാത്ത മറ്റു ചില കുട്ടികളും ഐഎസ്ഐ പ്രവര്ത്തകരുമായി ബന്ധപ്പെട്ട് പ്രവര്ത്തിക്കുന്നതായും സംശയിക്കുന്നതായി പൊലീസ് വൃത്തങ്ങള് പറഞ്ഞു. കുട്ടിയെ കസ്്റ്റഡിയിലെടുത്ത പശ്ചാത്തലത്തില് പഞ്ചാബിലുടനീളമുള്ള പൊലീസ് സ്റ്റേഷനുകളിലേക്ക് ജാഗ്രത നിര്ദേശം നല്കിയിട്ടുണ്ട്. സമാനമായ നെറ്റ്വര്ക്കുകളില് കുടുങ്ങാന് സാധ്യതയുള്ള മറ്റ് കുട്ടികളെ തിരിച്ചറിയാനും ജാഗ്രത പാലിക്കാനും മുന്നറിയിപ്പില് പറയുന്നു.
‘പിടിക്കപ്പെട്ട കുട്ടിക്ക് 15 വയസ്സ് ആണ് പ്രായം. പാകിസ്ഥാനിലെ ഐഎസ്ഐ പ്രവര്ത്തകരുമായി കുട്ടിക്ക് ബന്ധമുണ്ടായിരുന്നു. അന്വേഷണത്തിനിടെ, ഡാറ്റ എങ്ങനെ കൈമാറ്റം ചെയ്യപ്പെടുന്നു എന്നതിനെക്കുറിച്ചുള്ള നിര്ണായക വിവരങ്ങള് ലഭിച്ചിട്ടുണ്ട്. പഞ്ചാബിലെ മറ്റ് ചില പ്രായപൂര്ത്തിയാകാത്ത കുട്ടികളും ഉള്പ്പെട്ടിട്ടുണ്ടെന്ന് സൂചിപ്പിക്കുന്ന വിവരങ്ങളും ഞങ്ങള് കണ്ടെത്തി. സംസ്ഥാനത്തുടനീളമുള്ള പൊലീസ് യൂണിറ്റുകളെ അറിയിച്ചിട്ടുണ്ട്. ഉചിതമായ നടപടി സ്വീകരിക്കും’- പത്താന്കോട്ട് സീനിയര് പൊലീസ് സൂപ്രണ്ട് ദല്ജീന്ദര് സിംഗ് ധില്ലണ് പറഞ്ഞു. സെന്സിറ്റീവ് വിവരങ്ങള് ചോരുന്നത് തടയുന്നതിലും ഡിജിറ്റല് പ്ലാറ്റ്ഫോമുകള് വഴി പ്രവര്ത്തിക്കുന്ന ശത്രു ഏജന്സികള് കുട്ടികളെ ചൂഷണം ചെയ്യുന്നില്ലെന്ന് ഉറപ്പാക്കുന്നതിലുമാണ് ശ്രദ്ധ കേന്ദ്രീകരിക്കുന്നതെന്നും അധികൃതര് കൂട്ടിച്ചേര്ത്തു.
by Midhun HP News | Jan 6, 2026 | Latest News, കേരളം
കൊച്ചി: വരുന്ന നിയമസഭാ തെരഞ്ഞെടുപ്പില് മത്സരരംഗത്തുണ്ടാകുമെന്ന സൂചന നല്കി രാഹുല് ഈശ്വര്. മധ്യതിരുവിതാംകൂറിലെ മണ്ഡലങ്ങളില് മത്സരിക്കാന് താല്പര്യമുണ്ടോയെന്ന് ഒരു പ്രധാന രാഷ്ട്രീയ പാര്ട്ടി ചോദിച്ചതായും രാഹുല് ഈശ്വര് വെളിപ്പെടുത്തി. ചെങ്ങന്നൂര്, തിരുവല്ല, കൊട്ടാരക്കര എന്നിവിടങ്ങളില് മത്സരിക്കാന് താല്പര്യമുണ്ടോ എന്നാണ് ചോദിച്ചതെന്നും രാഹുല് ഈശ്വര് പറഞ്ഞു. കോണ്ഗ്രസിനുവേണ്ടി മല്സരിക്കാനുളള താല്പര്യമാണ് രാഹുല് ഈശ്വര് പരോക്ഷമായി സൂചിപ്പിക്കുന്നത്.
വരുന്ന തെരഞ്ഞെടുപ്പില് സംസ്ഥാനത്തു കോണ്ഗ്രസ് ജയിക്കണമെന്നാണ് താന് ആഗ്രഹിക്കുന്നതെന്ന് രാഹുല് ഈശ്വര് പറഞ്ഞു. സംസ്ഥാനത്തെ സാധാരണ മലയാളികളുടെ ആഗ്രഹമാണിതെന്നും കേരളത്തിനും അതാണ് നല്ലതെന്നും രാഹുല് പറഞ്ഞു. മഹാത്മാഗാന്ധിയുടെ പാതയില് ഹിന്ദു മുസ്ലിം ക്രിസ്ത്യന് ഐക്യമാണ് തന്റെ ലക്ഷ്യം. അതാണ് തന്റെ വസ്ത്രധാരണത്തിലുള്ളതെന്നും രാഹുല് കൂട്ടിച്ചേര്ത്തു.
പുരുഷന്മാരുടെ അവകാശങ്ങള്ക്ക് വേണ്ടിയുള്ള പോരാളിയെന്ന നിലയിലാണ് രാഹുല് ഈശ്വര് ഇപ്പോള് നിറഞ്ഞുനില്ക്കുന്നത്. ഇതിന്റെ പേരില് അതിജീവിതയെ അധിക്ഷേപിച്ചെന്ന കേസില് ജയില്വാസവും അനുഭവിച്ചു. ജാമ്യവ്യവസ്ഥ ലംഘിച്ചെന്ന് ആരോപിച്ച് രാഹുല് മാങ്കൂട്ടത്തില് കേസിലെ അതിജീവിത വീണ്ടും പരാതി നല്കിയിട്ടുണ്ട്.
ജാമ്യം റദ്ദാക്കാന് നടപടി സ്വീകരിക്കണമെന്നും പരാതിക്കാരി ആവശ്യപ്പെട്ടു. പ്രത്യേക അന്വേഷണ സംഘം മേധാവി പൂങ്കുഴലിക്ക് നല്കിയ പരാതി തിരുവനന്തപുരം സിറ്റി സൈബര് പൊലീസിന് കൈമാറിയിരിക്കുകയാണ്. ഇതേ നതുടര്ന്ന് ഹൈക്കോടതിയില് മുന്കൂര് ജാമ്യ ഹര്ജി സമര്പ്പിച്ചിരിക്കുകയാണ് രാഹുല് ഈശ്വര്.
by Midhun HP News | Jan 6, 2026 | Latest News, കേരളം
കൊച്ചി: രാഹുൽ മാങ്കൂട്ടത്തിൽ കേസിലെ പരാതിക്കാരിയെ സമൂഹ മാധ്യമം വഴി വീണ്ടും അപമാനിച്ചെന്ന പരാതിയിൽ മുൻകൂർ ജാമ്യം തേടി രാഹുൽ ഈശ്വർ നൽകിയ ഹർജി ഹൈക്കോടതി ഇന്ന് പരിഗണിക്കും. വിഷയത്തിൽ സംസ്ഥാന സർക്കാരിന്റെ നിലപാടും കോടതി തേടും. കേസില് തിങ്കളാഴ്ചയാണ് രാഹുൽ ഈശ്വർ മുന്കൂര് ജാമ്യാപേക്ഷ നല്കിയത്. തിരുവനന്തപുരം സൈബര് പൊലീസ് രജിസ്റ്റര് ചെയ്ത കേസിലാണ് മുന്കൂര് ജാമ്യാപേക്ഷ.
ജാമ്യവ്യവസ്ഥ ലംഘിച്ചതിന് അറസ്റ്റ് ചെയ്യാനുള്ള സാധ്യതയുള്ളതിനാലാണ് രാഹുല് മുന്കൂര് ജാമ്യാപേക്ഷ സമര്പ്പിച്ചത്. ജനുവരി നാലിന് തന്റെ യുട്യൂബ് ചാനലില് രാഹുല് അപ്ലോഡ് ചെയ്ത വിഡിയോക്കെതിരെ അതിജീവിത രംഗത്തു വന്നിരുന്നു. തിരുവനന്തപുരം സിറ്റി സൈബര് പൊലീസിന് ഇവര് പരാതിയും നല്കിയിരുന്നു. ഈ കേസിലെ അറസ്റ്റ് തടയാനാണ് മുന്കൂര് ജാമ്യാപേക്ഷ. വിഡിയോയില് പറഞ്ഞത് വസ്തുത മാത്രമാണെന്നും അതിജീവിതയെ അപമാനിച്ചിട്ടില്ലെന്നും ജാമ്യവ്യവസ്ഥ ലംഘിച്ചിട്ടില്ലെന്നുമാണ് രാഹുലിന്റെ വാദം.
രാഹുല് ഈശ്വര് സാമൂഹ മാധ്യമത്തിലൂടെ അധിക്ഷേപിച്ചെന്നും ഇത് ജാമ്യ വ്യവസ്ഥയുടെ ലംഘനമാണെന്നുമായിരുന്നു അതിജീവിതയുടെ പരാതി. രാഹുല് ഈശ്വറിന്റെ ജാമ്യം റദ്ദാക്കാന് നടപടി സ്വീകരിക്കണമെന്നും അതിജീവിത ആവശ്യപ്പെട്ടിരുന്നു.
രാഹുല് മാങ്കൂട്ടത്തില് എംഎല്എക്കെതിരെ പരാതി നല്കിയ യുവതിയെ വിഡിയോയിലൂടെ അധിക്ഷേപിച്ച കേസില് രാഹുല് ഈശ്വര് നേരത്തെ റിമാന്ഡിലായിരുന്നു. 16 ദിവസത്തിന് ശേഷമാണ് അന്ന് ജാമ്യം ലഭിച്ചത്. അതിജീവിതയ്ക്ക് എതിരെ അപകീര്ത്തികരമായ പരാമര്ശങ്ങള് ഒന്നിന് പിറകെ ഒന്നായി നടത്തിയ രാഹുല് ഈശ്വറിനെ നവംബര് 30 നാണ് പൊലീസ് കസ്റ്റഡിയിലെടുത്ത് അറസ്റ്റ് ചെയ്തത്.
തൊട്ടടുത്ത ദിവസം ജാമ്യാപേക്ഷ തിരുവനന്തപുരം എസിജെഎം കോടതി തള്ളിയതോടെ രാഹുല് ജയിലില് നിരാഹാര സമരം ആരംഭിച്ചു. രാഹുല് ഈശ്വര് അന്വേഷണവുമായി സഹകരിക്കുന്നില്ലെന്ന പ്രോസിക്യൂഷന് വാദത്തെ അംഗീകരിച്ചായിരുന്നു കോടതി ജാമ്യം നിഷേധിച്ചത്. എന്നാല് ജാമ്യത്തിലിറങ്ങിയ രാഹുല് ഈശ്വര് വീണ്ടും വിഡിയോ ചെയ്തതോടെയാണ് അതിജീവിത പരാതി നല്കിയത്.
by Midhun HP News | Jan 6, 2026 | Latest News, കേരളം
കല്ലമ്പലം: ജിഹാദും സന്ധ്യയും ഉടൻതന്നെ സത്യപ്രതിജ്ഞ ചെയ്യും. നാവായിക്കുളത്ത് കോൺഗ്രസ്സ് സമവായം. ഇടഞ്ഞ് നിന്നവർ ഒരുമിച്ചിരിക്കുന്നു എന്ന് തുറന്ന് പറച്ചിൽ. പരസ്പരം പോരടിച്ചവർ ഒരു കൊടിക്കീഴിൽ വീണ്ടും.
ഒത്തൊരുമിച്ചിരിക്കുന്നു എന്ന് നേതൃത്വം.
പാർട്ടി നേതൃത്വത്തിന്റെ മുൻ തീരുമാനപ്രകാരം ജിഹാദ് പഞ്ചായത്ത് പ്രസിഡണ്ടായും സന്ധ്യ വൈസ് പ്രസിഡണ്ട് ആയും ഏതാനും ദിവസങ്ങൾക്കകം തന്നെ സത്യപ്രതിജ്ഞ ചെയ്യും എന്നാണ് കഴിഞ്ഞ ദിവസം നടന്ന പ്രസ് മീറ്റിൽ നേതൃത്വം അറിയിച്ചിരിക്കുന്നത്.
Recent Comments