by Midhun HP News | Jun 26, 2025 | Latest News, ജില്ലാ വാർത്ത
ആറ്റിങ്ങൽ: തിരുവനന്തപുരം റൂറൽ ജില്ലയിലെ ആറ്റിങ്ങൽ, മംഗലപുരം, പോത്തൻകോട്, തിരുവനന്തപുരം സിറ്റി ജില്ലയിലെ ശ്രീകാര്യം എന്നീ പോലീസ് സ്റ്റേഷനുകളിലെ കൊലപാതകം, കൊലപാതക ശ്രമം തുടങ്ങിയ നിരവധി കേസുകളിലെ പ്രതിയും ആറ്റിങ്ങൽ പോലീസ് സ്റ്റേഷൻ പരിധിയിലെ താമസക്കാരനുമായ ഇടയ്ക്കോട് ഊരുപൊയ്ക മങ്കാട്ടുമൂല രതീഷ് ഭവനിൽ രതീഷ് @ ഭായ്എന്ന രതീഷ് (36) അറസ്റ്റിൽ.
ജില്ല പോലീസ് മേധാവി സുദർശൻ ഐ പി എസ്, ആറ്റിങ്ങൽ ഡിവൈ സ്പി മഞ്ജുലാൽ, ആറ്റിങ്ങൽ പോലീസ് സ്റ്റേഷൻ എസ് എച്ച് ഒ അജയൻ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. തിരുവനന്തപുരം സബ് ഡിവിഷണൽ മജിസ്ട്രേറ്റ് കോടതി മുമ്പാകെ ഹാജരാക്കി രണ്ട് വർഷകാലത്തേയ്ക്ക് റിമാൻറ് ചെയ്തു.
by Midhun HP News | Jun 26, 2025 | Latest News, ജില്ലാ വാർത്ത
ആറ്റിങ്ങൽ: ആറ്റിങ്ങൽ കുളച്ചൽ കൂട്ടായ്മയുടെ അഭിമുഖ്യത്തിൽ ഉന്നത വിജയം നേടിയ വിദ്യാർത്ഥികളെ അനുമോദിച്ചു. ആറ്റിങ്ങൽ വ്യാപാര ഭവനിൽ നടന്ന അനുമോദന സമ്മേളനം അഷ്റഫ് കല്ലമ്പലം ഉദ്ഘാടനം ചെയ്തു. എസ്.എസ്.എൽ.സി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികൾക്ക് ക്യാഷ് അവാർഡും മെമെന്റോയും ചടങ്ങിൽ നൽകി. മാഹീൻകുട്ടി പാലാംകോണം അധ്യക്ഷനായി. നജീബ് സലീം, അഷ്കർ പാലാംകോണം എന്നിവർ സംസാരിച്ചു. ആറ്റിങ്ങൽ നുജൂം സ്വാഗതവും സലീം വഞ്ചിയൂർ നന്ദിയും പറഞ്ഞു.
by Midhun HP News | Jun 26, 2025 | Latest News, ജില്ലാ വാർത്ത, മരണം
ആറ്റിങ്ങൽ: പാലസ് റോഡ് ശിൽപാചാരി വിളാകത്ത് വീട്ടിൽ ടി തങ്കമ്മാൾ (82) അന്തരിച്ചു. പരേതനായ പി തങ്കപ്പൻ ആചാരിയുടെ ഭാര്യയാണ്.
മക്കൾ: പുഷ്പലത, ശിവകുമാർ (ധനലക്ഷ്മി ജ്വല്ലറി കച്ചേരി ജംഗ്ഷൻ ആറ്റിങ്ങൽ), സുരേഷ് കുമാർ (ധനലക്ഷ്മി ജ്വല്ലറി), ബിന്ദു.
മരുമക്കൾ: പരേതനായ ശിവകുമാർ (ചെന്നൈ), സിന്ധു ശിവകുമാർ, രാജശ്രീ സുരേഷ്, സുന്ദരം ആചാരി (വിഴിഞ്ഞം).
by Midhun HP News | Jun 26, 2025 | Latest News, ജില്ലാ വാർത്ത
തിരുവനന്തപുരം: വിദ്യാര്ഥികള് സ്കൂളില് പോകുന്ന സമയത്തും തിരികെ വീട്ടില് വരുന്ന സമയത്തും റോഡിലൂടെ പോകുന്ന വാഹനങ്ങള് കൈ കാണിച്ച് ലിഫ്റ്റ് ചോദിക്കുന്നത് പതിവ് കാഴ്ചയാണ്. പക്ഷേ, ഇത് ചിലപ്പോള് ഒരു അപകടത്തിലേക്ക് നയിക്കാമെന്ന് മോട്ടോര് വാഹനവകുപ്പ് മുന്നറിയിപ്പ് നല്കി.
‘വാഹനം ഓടിക്കുന്ന വ്യക്തിയുടെ സ്വഭാവം, പശ്ചാത്തലം എന്നിവ അറിയാത്ത സാഹചര്യത്തില് ലിഫ്റ്റ് വാങ്ങിയുള്ള യാത്ര അപകടത്തില് കലാശിക്കാനുള്ള സാധ്യത ഏറെയാണ്. അമിത വേഗത്തില് വാഹനം ഓടിക്കുന്നവര്, അശ്രദ്ധമായി വാഹനം ഉപയോഗിക്കുന്നവര്, മദ്യപിച്ച് വാഹനം ഓടിക്കുന്നവര് , മയക്കു മരുന്ന് ഉപയോഗിക്കുന്നവര് / കടത്തുന്നവര്, കുട്ടികളെ തട്ടിക്കൊണ്ട് പോകുന്നവര്, കുട്ടികളോട് മോശമായി പെരുമാറുന്നവര്, മറ്റു ക്രിമിനല് പശ്ചാത്തലം ഉള്ളവര്, എന്നിങ്ങനെ ലിഫ്റ്റ് ചോദിച്ച് പോകുമ്പോള് നിങ്ങള് നേരിടേണ്ടി വന്നേക്കാവുന്ന വിപത്തുകള് അനവധിയാണ്. അതിനാല് കഴിവതും അപരിചിതരോട് ലിഫ്റ്റ് ചോദിക്കുന്നത് ഒഴിവാക്കുക.’- മോട്ടോര് വാഹനവകുപ്പ് ഫെയ്സ്ബുക്കില് കുറിച്ചു.
കുറിപ്പ്:
അപരിചിതരോട് ലിഫ്റ്റ് ചോദിക്കുന്നത് ഒഴിവാക്കാം.
വിദ്യാര്ത്ഥികള് സ്കൂളില് പോകുന്ന സമയത്തും തിരികെ വീട്ടില് വരുന്ന സമയത്തും റോഡിലൂടെ പോകുന്ന വാഹനങ്ങള് കൈ കാണിച്ച് ലിഫ്റ്റ് ചോദിക്കുന്നത് പതിവ് കാഴ്ചയാണ്.പക്ഷേ, ഇത് ചിലപ്പോള് ഒരു അപകടത്തിലേക്ക് നയിക്കാം.
വാഹനം ഓടിക്കുന്ന വ്യക്തിയുടെ സ്വഭാവം, പശ്ചാത്തലം എന്നിവ അറിയാത്ത സാഹചര്യത്തില് ലിഫ്റ്റ് വാങ്ങിയുള്ള യാത്ര അപകടത്തില് കലാശിക്കാനുള്ള സാധ്യത ഏറെയാണ്.
അമിത വേഗത്തില് വാഹനം ഓടിക്കുന്നവര്, അശ്രദ്ധമായി വാഹനം ഉപയോഗിക്കുന്നവര്,
മദ്യപിച്ച് വാഹനം ഓടിക്കുന്നവര് , മയക്കു മരുന്ന് ഉപയോഗിക്കുന്നവര് / കടത്തുന്നവര്, കുട്ടികളെ തട്ടിക്കൊണ്ട് പോകുന്നവര്, കുട്ടികളോട് മോശമായി പെരുമാറുന്നവര്, മറ്റു ക്രിമിനല് പശ്ചാത്തലം ഉള്ളവര്, എന്നിങ്ങനെ ലിഫ്റ്റ് ചോദിച്ച് പോകുമ്പോള് നിങ്ങള് നേരിടേണ്ടി വന്നേക്കാവുന്ന വിപത്തുകള് അനവധിയാണ്…
അതിനാല് കഴിവതും അപരിചിതരോട് ലിഫ്റ്റ് ചോദിക്കുന്നത് ഒഴിവാക്കുക.
അപരിചതരായ വ്യക്തികള് അവരുടെ വാഹനത്തില് ലിഫ്റ്റ് തന്നാലും,നിങ്ങളോട് കയറാന് നിര്ബന്ധിച്ചാലും അത്തരം അവസരങ്ങള് ഒഴിവാക്കുക….
സ്കൂള് ബസുകള്, പൊതു ഗതാഗത സംവിധാനങ്ങള് എന്നിവ പരമാവധി ഉപയോഗിക്കുക.
നടന്നു പോകാവുന്ന ദൂരം, റോഡിന്റെ വലതു വശം ചേര്ന്ന്, കരുതലോടെ നടക്കുക.നടത്തം ആരോഗ്യത്തിനും നല്ലതാണ്.
സ്കൂള് യാത്രകള്ക്ക് മാത്രമല്ല, എല്ലാ യാത്രകള്ക്കും ഇത് ബാധകമാണ്….
യാത്രകള് അപകട രഹിതമാക്കാന് നമുക്ക് ശ്രദ്ധയോടും കരുതലോടും കൂടി മുന്നോട്ട് പോകാം…
by Midhun HP News | Jun 25, 2025 | Latest News, ജില്ലാ വാർത്ത
തിരുവനന്തപുരം: കേരളത്തിന്റെ അഭിമാന പദ്ധതിയായ കെ ഫോണിന് ഇനി രാജ്യത്ത് എവിടെയും ഇന്റര്നെറ്റ് എത്തിക്കാം. ദേശീയതലത്തില് ബ്രോഡ്ബാന്ഡ് ഇന്റര്നെറ്റ് നല്കാനുള്ള ഐഎസ്പി എ (ഇന്റര്നെറ്റ് സര്വീസ് പ്രൊവൈഡര് കാറ്റഗറി എ) ലൈസന്സ് കെ ഫോണ് സ്വന്തമാക്കി. കേരളത്തിലുടനീളം സജ്ജീകരിച്ച നെറ്റ്വര്ക്ക് സംവിധാനത്തിനു പുറമേ മറ്റു സംസ്ഥാനങ്ങളില് നെറ്റ്വര്ക്ക് സംവിധാനമൊരുക്കിയും പ്രധാനപ്പെട്ട ഇന്റര്നെറ്റ് സേവനദാതാക്കളുമായി സഹകരിച്ചും കെ ഫോണിന് ഇനി രാജ്യവ്യാപകമായി ഇന്റര്നെറ്റ് സേവനം നല്കാനാകും.
സംസ്ഥാനത്ത് ദാരിദ്ര്യരേഖയ്ക്ക് താഴെയുള്ള കുടുംബങ്ങള്ക്ക് സൗജന്യമായും മറ്റുള്ളവര്ക്ക് കുറഞ്ഞനിരക്കിലും ഇന്റര്നെറ്റ് എത്തിക്കുക ലക്ഷ്യമിട്ടാണ് കെ ഫോണ് പദ്ധതിക്ക് എല്ഡിഎഫ് സര്ക്കാര് തുടക്കംകുറിച്ചത്. ഇതിന്റെ ഭാഗമായി വിപുലമായ നെറ്റ്വര്ക്ക് സംവിധാനമാണ് ഒരുക്കിയത്.
മറ്റ് ഇന്റര്നെറ്റ് സേവനദാതാക്കളുമായി താരതമ്യം ചെയ്താല് ഏറ്റവും വലിയ നെറ്റ്വര്ക്കാണ് കെ ഫോണിനുള്ളത്. 3,1153 കിലോമീറ്റര് ഫൈബര് ഒപ്റ്റിക് കേബിള് ഇതിനകം കെ ഫോണ് പൂര്ത്തിയാക്കിയിട്ടുണ്ട്. ഐഎസ്പി ലൈസന്സും ഐപി ഇന്ഫ്രാസ്ട്രക്ചര് ലൈസന്സും എന്എല്ഡി (നാഷണല് ലോങ് ഡിസ്റ്റന്സ്) ലൈസന്സും നേരത്തെ സ്വന്തമാക്കിയിരുന്നു. കെ ഫോണ് സംസ്ഥാനത്ത് ഇതിനകം 1,07,328 ഇന്റര്നെറ്റ് കണക്ഷന് നല്കി. 14,151 ബിപിഎല് കുടുംബങ്ങളിലും 67,097 മറ്റു വീടുകളിലും 23,163 സര്ക്കാര് ഓഫീസുകളിലുമാണ് ഇന്റര്നെറ്റ് എത്തിച്ചത്.
by Midhun HP News | Jun 25, 2025 | Latest News, ജില്ലാ വാർത്ത
തിരുവനന്തപുരം: ഇരട്ട ചക്രവാതച്ചുഴിയുടെ സ്വാധീനഫലമായി സംസ്ഥാനത്ത് മഴ മുന്നറിയിപ്പില് മാറ്റം. നേരത്തെ ഇന്ന് എട്ടുജില്ലകളില് ഒറ്റപ്പെട്ട ശക്തമായ മഴ ലഭിക്കുമെന്നായിരുന്നു കാലാവസ്ഥ വകുപ്പിന്റെ പ്രവചനം. എന്നാല് പുതുക്കിയ മഴ മുന്നറിയിപ്പ് അനുസരിച്ച് ഇടുക്കി, പാലക്കാട്, മലപ്പുറം, വയനാട് ജില്ലകളില് ഇന്ന് ഒറ്റപ്പെട്ട സ്ഥലങ്ങളില് തീവ്രമഴയാണ് കാലാവസ്ഥ വകുപ്പ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളില് ഓറഞ്ച് അലര്ട്ട് പ്രഖ്യാപിച്ചു.
തിരുവനന്തപുരം, കൊല്ലം ഒഴികെയുള്ള മറ്റെല്ലാ ജില്ലകളിലും ഇന്ന് മഴ മുന്നറിയിപ്പ് ഉണ്ട്. ഒറ്റപ്പെട്ട ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളില് യെല്ലോ അലര്ട്ട് പ്രഖ്യാപിച്ചു. നാളെയും ഇടുക്കി, മലപ്പുറം, വയനാട് ജില്ലകളില് ഒറ്റപ്പെട്ട സ്ഥലങ്ങളില് തീവ്രമഴയാണ് കാലാവസ്ഥ വകുപ്പ് കണക്കുകൂട്ടുന്നത്. ജാഗ്രതയുടെ ഭാഗമായി ഈ ജില്ലകളിലും ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, ആലപ്പുഴ ഒഴികെയുള്ള മറ്റെല്ലാ ജില്ലകളിലും നാളെ മഴ മുന്നറിയിപ്പ് ഉണ്ട്. ഈ ജില്ലകളില് ഒറ്റപ്പെട്ട ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി യെല്ലോ അലര്ട്ട് പ്രഖ്യാപിച്ചിട്ടുണ്ട്.
വെള്ളിയാഴ്ചയും ശനിയാഴ്ചയും കോട്ടയം, എറണാകുളം, ഇടുക്കി, തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളിലും ഒറ്റപ്പെട്ട ശക്തമായ മഴയാണ് പ്രവചിക്കുന്നത്. ജാഗ്രതയുടെ ഭാഗമായി ഈ ജില്ലകളിലും യെല്ലോ അലര്ട്ട് പ്രഖ്യാപിച്ചിട്ടുണ്ട്. വയനാട് ജില്ലയില് ശക്തമായ മഴ തുടരുകയാണ്. ഇന്നലെ രാത്രി മുതല് തുടങ്ങിയ മഴയില് കഴിഞ്ഞവര്ഷം ഉരുള്പൊട്ടല് ഉണ്ടായ മുണ്ടക്കൈ, ചൂരല്മഴ പ്രദേശങ്ങളിലൂടെ ഒഴുകുന്ന പുന്നപ്പുഴ കുത്തിയൊലിച്ച് ഒഴുകുന്നത് നാട്ടുകാരുടെ ഇടയില് ആശങ്കയ്ക്ക് ഇടയാക്കിയിരിക്കുകയാണ്.
തീരദേശ വടക്കന് ആന്ധ്രാ പ്രദേശിന്റെയും അതിനോട് ചേര്ന്നുള്ള തെക്കന് ഒഡിഷ തീരത്തിനും സമീപം മധ്യ പടിഞ്ഞാറന് ബംഗാള് ഉള്ക്കടലിനും വടക്കു പടിഞ്ഞാറന് ബംഗാള് ഉള്ക്കടലിനും മുകളിലായി ഉയര്ന്ന ലെവലില് ചക്രവാതച്ചുഴി സ്ഥിതിചെയ്യുന്നുണ്ട്. തെക്കന് ഉത്തര്പ്രദേശിന് മുകളില് മറ്റൊരു ചക്രവാതച്ചുഴിയും സ്ഥിതിചെയ്യുന്നു. ഇതിന്റെ സ്വാധീനഫലമായാണ് മഴ ലഭിക്കുന്നതും കാലാവസ്ഥ വകുപ്പ് വ്യക്തമാക്കി.
Recent Comments