by Midhun HP News | Sep 10, 2024 | Latest News, ജില്ലാ വാർത്ത
വക്കം: വക്കം ഖാദർ അനുസ്മരണ വേദിയുടെ നേതൃത്വത്തിലുള്ള ഐ.എൻ.എ ഹീറോ വക്കം ഖാദർ രക്തസാക്ഷിത്വ ദിനാചരണം വ്യത്യസ്ത പരിപാടികളോടെ വക്കം ഖാദർ സ്മൃതി മണ്ഡപത്തിൽ നടന്നു. അനുസ്മരണ സമ്മേളനം മുൻ മന്ത്രിയുമായ എം.എം.ഹസ്സൻ ഉദ്ഘാടനം ചെയ്തു. അനുസ്മരണ വേദി ചെയർമാൻ എം.എ.ലത്തീഫ് അധ്യക്ഷത വഹിച്ചു. ഇളമ്പാ ഉണ്ണികൃഷ്ണൻ സ്വാഗതം ആശംസിച്ചു. ഗ്രന്ഥകാരൻ വക്കം സുകുമാരൻ, വക്കം ഷാൻ, എം. ഉറൂബ്, നേമം അഷ്കർ, പഞ്ചായത്ത് അംഗങ്ങളായ പെരുംകുളം അൻസർ, ഫൈസൽ, ബി. സി അജയരാജ്, ശ്രീചന്ദ്. എസ്, സമിതി ഭാരവാഹികളായ സഞ്ജു, റഹീം വക്കം, രാഹുൽ അഴൂർ, ഷജിൻ മാടൻവിള, ആകാശ് കടയ്ക്കാവൂർ, നാസർ കലാനികെതൻ, ബൈജു, മുനീർ, നയീം തുടങ്ങിയവർ പ്രസംഗിച്ചു. സംസ്ഥാന അധ്യാപക പുരസ്കാര ജേതാവ് വക്കം ഗവ.എച്ച്.എസ്.എസ് അധ്യാപകൻ സൗദീഷിനെ ചടങ്ങിൽ അനുമോദിച്ചു.
by Midhun HP News | Sep 10, 2024 | Latest News, ജില്ലാ വാർത്ത
കൊച്ചി: ജസ്റ്റിസ് ഹേമ കമ്മിറ്റി റിപ്പോര്ട്ട് സംബന്ധിച്ച ഹര്ജികള് ഹൈക്കോടതി പ്രത്യേക ബെഞ്ച് ഇന്ന് പരിഗണിക്കും. ഹര്ജികള് പരിഗണിക്കുന്നതിനായി രൂപീകരിച്ച പ്രത്യേക ബെഞ്ചിന്റെ ആദ്യ സിറ്റിങ്ങ് ആണ് ഇന്നു നടക്കുക. ജസ്റ്റിസ് എ കെ ജയശങ്കരന് നമ്പ്യാര്, ജസ്റ്റിസ് സി എസ് സുധ എന്നിവരടങ്ങിയ ബെഞ്ചാണ് ഹര്ജികള് പരിഗണിക്കുക.
ഹേമ കമ്മിറ്റി റിപ്പോര്ട്ട് പുറത്തു വിടുന്നതിനെതിരെ നിര്മാതാവ് സജിമോന് പാറയില് നല്കിയ അപ്പീല്, റിപ്പോര്ട്ടില് പറയുന്ന കുറ്റകൃത്യങ്ങള് സംബന്ധിച്ച് സിബിഐ അന്വേഷണം ആവശ്യപ്പെട്ട് വനിതാ അഭിഭാഷകരായ എ ജന്നത്ത്, അമൃത പ്രേംജിത്ത് എന്നിവര് നല്കിയ പൊതുതാല്പ്പര്യഹര്ജി, ടി പി നന്ദകുമാര്, മുന് എംഎല്എ ജോസഫ് എം പുതുശേരി എന്നിവര് നല്കിയ ഹര്ജികളും പ്രത്യേക ബെഞ്ച് പരിഗണിക്കും.
ഹര്ജികളില് കക്ഷി ചേര്ക്കണമെന്നാവശ്യപ്പെട്ട് നടി രഞ്ജിനിയും കോടതിയെ സമീപിച്ചിട്ടുണ്ട്. റിപ്പോര്ട്ടില് പരാമര്ശിച്ചിരിക്കുന്ന ലൈംഗിക അതിക്രമം നടത്തിയവര്ക്കെതിരെ ക്രിമിനല് നടപടി ആരംഭിക്കാന് സര്ക്കാരിന് നിര്ദേശം നല്കണമെന്ന് ആവശ്യപ്പെട്ട് പൊതു പ്രവര്ത്തകന് പായിച്ചിറ നവാസ് നല്കിയ പൊതുതാല്പ്പര്യഹര്ജിയും പ്രത്യേക ബെഞ്ച് പരിഗണിക്കും.മലയാള സിനിമയിലെ സ്ത്രീകള് നേരിടുന്ന ചൂഷണങ്ങളെക്കുറിച്ച് പഠിക്കാന് നിയോഗിച്ച ജസ്റ്റിസ് ഹേമ കമ്മിറ്റി റിപ്പോര്ട്ടിന്റെ പൂര്ണരൂപം മുദ്രവെച്ച കവറില് ഹാജരാക്കാന് ആക്ടിങ് ചീഫ് ജസ്റ്റീസ് എ മുഹമ്മദ് മുഷ്താഖ് ഉള്പ്പെട്ട മറ്റൊരു ബെഞ്ച് നേരത്തെ സര്ക്കാരിനോട് ആവശ്യപ്പെട്ടിരുന്നു. മുദ്ര വെച്ച കവറില് നല്കുന്ന റിപ്പോര്ട്ടിനൊപ്പം, സര്ക്കാരിന്റെ നിലപാടും അറിയിക്കണമെന്നും ഡിവിഷന് ബെഞ്ച് നിര്ദേശം നല്കിയിട്ടുണ്ട്.
by Midhun HP News | Sep 10, 2024 | Latest News, ജില്ലാ വാർത്ത
തിരുവനന്തപുരം: നിയോജകമണ്ഡല തലത്തിലുള്ള സപ്ലൈകോയുടെ ഓണം ഫെയറുകൾ ഇന്ന് ആരംഭിക്കും. ഓരോ നിയോജകമണ്ഡലത്തിലെയും ഒരു സൂപ്പർമാർക്കറ്റ് വീതമാണ് ഓണം ഫെയർ ആയി പ്രവർത്തിക്കുക. സെപ്റ്റംബർ 14 വരെയാണ് സപ്ലൈകോ ഓണം ഫെയറുകൾ സംഘടിപ്പിക്കുന്നത്.
എറണാകുളം ജില്ലയിൽ കൊച്ചി മറൈൻഡ്രൈവിൽ പ്രവർത്തിക്കുന്ന സപ്ലൈകോ ജില്ലാ ഓണം ഫെയറിന് പുറമെയാണ് നിയോജകമണ്ഡല തലത്തിലുള്ള ഫെയറുകൾ സംഘടിപ്പിക്കുന്നത്. പെരുമ്പാവൂർ സൂപ്പർമാർക്കറ്റ്, അങ്കമാലി പീപ്പിൾസ് ബസാർ, കോലഞ്ചേരി സൂപ്പർമാർക്കറ്റ്, പിറവം ഹൈപ്പർ മാർക്കറ്റ്, കോതമംഗലം സൂപ്പർമാർക്കറ്റ്, മൂവാറ്റുപുഴ സൂപ്പർ മാർക്കറ്റ്, വൈപ്പിനിലെ നായരമ്പലം മാവേലി സ്റ്റോർ, പറവൂർ പീപ്പിൾസ് ബസാർ, കളമശ്ശേരി നീരിക്കോട് മാവേലി സ്റ്റോർ, തൃപ്പൂണിത്തുറ സൂപ്പർ മാർക്കറ്റ്, ആലുവ സൂപ്പർമാർക്കറ്റ്, എറണാകുളം ഗാന്ധിനഗർ ഹൈപ്പർമാർക്കറ്റ്, കൊച്ചി ചുള്ളിക്കൽ പീപ്പിൾസ് ബസാർ, തൃക്കാക്കര വൈറ്റില സൂപ്പർമാർക്കറ്റ് എന്നിവയാണ് നിയോജകമണ്ഡലം ഫെയറുകൾ ആയി പ്രവർത്തിക്കുക.
ഓണംഫെയറുകളിലും എല്ലാ സപ്ലൈകോ വില്പനശാലകളിലും നിത്യോപയോഗ സാധനങ്ങൾക്ക് 45% വരെ വിലക്കുറവുണ്ട്. ഫെയറുകളിലും സൂപ്പർമാർക്കറ്റുകളിലും ഉച്ചയ്ക്ക് രണ്ടു മുതൽ നാലു വരെ ഡീപ്പ് ഡിസ്കൗണ്ട് അവേഴ്സ് പദ്ധതി നടപ്പാക്കുന്നുണ്ട്. നിത്യോപയോഗ സാധനങ്ങൾക്ക് 50 ശതമാനം വരെ വിലക്കുറവ് ഡീപ്പ് ഡിസ്കൗണ്ട് അവേഴ്സിൽ ലഭിക്കും.
by Midhun HP News | Sep 10, 2024 | Latest News, ജില്ലാ വാർത്ത
തിരുവനന്തപുരം: സ്കൂള് ഉച്ചഭക്ഷണ പദ്ധതിയുടെ പരിധിയില് വരുന്ന സംസ്ഥാനത്തെ എല്ലാ കുട്ടികള്ക്കും ഓണത്തിന് 5 കിലോ അരി വീതം വിതരണം ചെയ്യുന്നത് കുട്ടികളുടെ ഭക്ഷ്യഭദ്രത ഉറപ്പുവരുത്തുക എന്ന ലക്ഷ്യത്തോടെയാണെന്ന് പൊതുവിദ്യാഭ്യാസവും തൊഴിലും വകുപ്പ് മന്ത്രി വി ശിവന്കുട്ടി പറഞ്ഞു. സ്കൂള് കുട്ടികള്ക്ക് ഓണത്തിന് അഞ്ച് കിലോ അരിവിതരണം ചെയ്യുന്നതിന്റെ സംസ്ഥാനതല ഉദ്ഘാടനം തിരുവനന്തപുരം കമലേശ്വരം ജിഎച്ച്എസ്എസില് നിര്വഹിച്ചു സംസാരിക്കുകയായിരുന്നു മന്ത്രി.
നമ്മുടെ ഭരണഘടനയിലെ 47 ാം അനുച്ഛേദത്തില് ജനങ്ങളുടെ പോഷകാഹാര നിലവാരവും ജീവിതനിലവാരവും പൊതുആരോഗ്യവും ഉയര്ത്തുക രാഷ്ട്രത്തിന്റെ പ്രാഥമിക കര്ത്തവ്യങ്ങളാണെന്ന് രേഖപ്പെടുത്തിയിട്ടുണ്ട്. ഉച്ചഭക്ഷണ പദ്ധതിയില് എന്റോള് ചെയ്തിട്ടുള്ള സംസ്ഥാനത്തെ 12027 വിദ്യാലയങ്ങളിലെ പ്രീ-പ്രൈമറി മുതല് എട്ടാം ക്ലാസ്സുവരെയുള്ള 26.22 ലക്ഷം വിദ്യാര്ഥികള്ക്കാണ് 5 കിലോ വീതം അരി വിതരണം ചെയ്യുന്നത്. ഇതില്, 2.06 ലക്ഷം കുട്ടികള് പ്രീ-പ്രൈമറി വിഭാഗത്തിലും 13.80 ലക്ഷം കുട്ടികള് പ്രൈമറി വിഭാഗത്തിലും 10.35 ലക്ഷം കുട്ടികള് അപ്പര് പ്രൈമറി വിഭാഗത്തിലും ഉള്പ്പെടുന്നു. 13,112 മെട്രിക് ടണ് അരിയാണ് ഇതിനായി ആകെ വേണ്ടിവരുന്നതെന്ന് മന്ത്രി പറഞ്ഞു.
ഭക്ഷ്യവകുപ്പിന്റെ സഹകരണത്തോടെയാണ് അരി വിതരണം. വകുപ്പിന്റെ കീഴില് പ്രവര്ത്തിക്കുന്ന സപ്ലൈക്കോയാണ് അരി സ്കൂളുകളില് എത്തിച്ചുനല്കുന്നത്. ഓണാവധി ആരംഭിക്കുന്നതിനു മുന്പായി അരി വിതരണം പൂര്ത്തീകരിക്കുന്നതിനുള്ള തയ്യാറെടുപ്പുകള് സപ്ലൈക്കോയുമായി ചേര്ന്ന് പൊതുവിദ്യാഭ്യാസവകുപ്പ് നടത്തിയിട്ടുണ്ട്. വിതരണത്തിന് സ്കൂളുകളില് എത്തിച്ചുനല്കുന്ന അരി പി.ടി.എ, സ്കൂള് ഉച്ചഭക്ഷണ കമ്മറ്റി, എസ്.എം.സി, മദര് പി.ടി.എ എന്നിവയുടെ നേതൃത്വത്തിലും മേല്നോട്ടത്തിലും ഏറ്റുവാങ്ങി കുട്ടികള്ക്ക് വിതരണം ചെയ്യുന്നതിനുള്ള ക്രമീകരണങ്ങള് സ്കൂളുകള് നടത്തണം. വിതരണം പൂര്ത്തീകരിക്കുന്നതുവരെ അരി കേടുവരാതെ സുരക്ഷിതമായി സൂക്ഷിക്കുകയും ചെയ്യണമെന്ന് മന്ത്രി പറഞ്ഞു. ഭക്ഷ്യപൊതുവിതരണ വകുപ്പ് മന്ത്രി ജി.ആര് അനില് അധ്യക്ഷത വഹിച്ചു.കമലേശ്വരം ജി എച്ച് എസ് എസിലെ എട്ടാംക്ലാസ് വിദ്യാര്ഥി റിസ്വാന് അഞ്ച് കിലോ അരിയുടെ കിറ്റ് നല്കി ചടങ്ങില് മന്ത്രി വി ശിവന് കുട്ടി വിതരണം ഉദ്ഘാടനം ചെയ്തു. തുടര്ന്ന് മന്ത്രി ജി ആര് അനിലും വിശിഷ്ടാതിഥികളും കുട്ടികള്ക്ക് കിറ്റുകള് നല്കി.
ആന്റണി രാജു എംഎല്എ, ജില്ലാ പഞ്ചായത്ത് പ്രസിഡന്റ് ഡി സുരേഷ് കുമാര്, വാര്ഡ് കൗണ്സിലര് വിജയകുമാരി വി, സപ്ലൈക്കോ റിജിയണല് മാനേജര് എ സജാദ് എന്നിവര് ആശംസകള് അര്പ്പിച്ചു. സ്കൂള് എസ്എംസി ചെയര്പെഴ്സണ് ഷീജ ആര് പി, പ്രിന്സിപ്പല് സിന്ധു എസ് ഐ, ഹെഡ്മിസ്ട്രസ് ഷീബ ഈപ്പന് എന്നിവര് പങ്കെടുത്തു. പൊതുവിദ്യാഭ്യാസ ഡയറക്ടര് ഷാനവാസ് എസ് സ്വാഗതവും പൊതുവിദ്യാഭ്യാസ അഡീഷണല് ഡയറക്ടര് ആര് എസ് ഷിബു നന്ദിയും പറഞ്ഞു. സ്കൂള് വിദ്യാര്ഥികള്, രക്ഷിതാക്കള്, അധ്യാപകര്, ഉദ്യോഗസ്ഥര് തുടങ്ങിയവര് പങ്കെടുത്തു.
by Midhun HP News | Sep 9, 2024 | Latest News, ജില്ലാ വാർത്ത
സ്നേഹ റസിഡൻ്റ്സ് അസോസിയേഷൻ കഴിഞ്ഞ വർഷത്തെ പോലെ 2024 ഓണം കിറ്റ്, വിദ്യാഭ്യാസ പുരസ്കാരം, സ്നേഹ സൗഭാഗ്യ ലക്കി പ്രൈസ് വിതരണം പോയിൻറ് മുക്ക് എസ് എ എ ഓഫീസിൽ നടന്നു. അസോസിയേഷൻ പ്രസിഡൻ്റ് പ്രസന്നബാബുവിന്റെ അധ്യക്ഷതയിൽ കൂടിയ യോഗത്തിൽ ആറ്റിങ്ങൽ എം.പി അഡ്വക്കേറ്റ് അടൂർ പ്രകാശ്
ഉദ്ഘാടനം നിർവഹിച്ചു.
അസോസിയേഷൻ സെക്രട്ടറി ബി. ആർ. പ്രസാദ് സ്വാഗതം പറഞ്ഞു. പൊതുമരാമത്തു കാര്യ സ്റ്റാൻഡ് കമ്മിറ്റി ചെയർമാൻ അവനവഞ്ചേരി രാജു ആശംസകൾ അർപ്പിച്ചു. ചടങ്ങിൽ എസ്.എസ്.എൽ.സി പ്ലസ് ടു ഉന്നത വിജയം കരസ്ഥമാക്കിയ വിദ്യാർത്ഥികൾക്ക് പുരസ്കാരങ്ങൾ വിതരണം ചെയ്തു. തുടർന്ന് 150 ഓളം എസ് ആർ എ കുടുംബങ്ങൾക്കും നാട്ടിലെ പാവപ്പെട്ടവർക്കും ഓണക്കിറ്റ് വിതരണവും നടന്നു. ചടങ്ങിനോടനുബന്ധിച്ച് നടന്ന സ്നേഹ സൗഭാഗ്യ ലക്കി ഡ്രോയുടെ നറുക്കെടുപ്പും സമ്മാനങ്ങളും വിതരണം ചെയ്തു. അസോസിയേഷൻ എക്സിക്യൂട്ടീവ് അംഗം എം. താഹ കൃതജ്ഞത പറഞ്ഞു.
by Midhun HP News | Sep 9, 2024 | Latest News, ജില്ലാ വാർത്ത
: ആറ്റിങ്ങൽ ചാത്തമ്പറ ചിറ നീന്തൽ പരിശീലനകേന്ദ്രമാക്കണമെന്ന് സി.പി.ഐ.എം ആറ്റിങ്ങൽ വെസ്റ്റ് ലോക്കൽകമ്മിറ്റി പച്ചംകുളം ബ്രാഞ്ച് സമ്മേളനം അധികൃതരോട് ആവശ്യപ്പെട്ടു. സമ്മേളനം ഏരിയാ കമ്മിറ്റി അംഗം എം പ്രദീപ് ഉദ്ഘാടനം ചെയ്തു. എൻ ശിവദാസൻ അധ്യക്ഷത വഹിച്ചു. പി.കെ പ്രശാന്ത് സ്വാഗതം പറഞ്ഞു.
എൻ ആശാറാണി രക്തസാക്ഷി പ്രമേയവും ആർ .കെ രതീഷ് അനുശോചന പ്രമേയവും അവതരിപ്പിച്ചു. ബ്രാഞ്ച് സെക്രട്ടറി ജി നാരായണ പിള്ള പ്രവർത്തന റിപ്പോർട്ട് അവതരിപ്പിച്ചു. ഏര്യാകമ്മിറ്റി അംഗങ്ങളായ സി.ജി വിഷ്ണു ചന്ദ്രൻ,ആർ രാജു, ലോക്കൽകമ്മിറ്റി സെക്രട്ടറി അഡ്വ എൻ മോഹനൻ നായർ, ലോക്കൽകമ്മിറ്റി അംഗം എസ് സതീഷ് കുമാർ എന്നിവർ സംസാരിച്ചു. ചർച്ചകൾക്കും മറുപടിക്കും ശേഷം പുതിയ സെക്രട്ടറിയായി തുളസീധരൻ നായരെ തെരഞ്ഞെടുത്തു.
Recent Comments