by Midhun HP News | Mar 26, 2026 | Latest News, ദേശീയ വാർത്ത
ഡല്ഹി: എല്പിജി നിയന്ത്രണം മുതലെടുത്ത് ഭക്ഷണ ബില്ലുകളില് അധിക ചാര്ജ് ഈടാക്കുന്നതായി ശ്രദ്ധയില്പ്പെട്ടാല് നടപടിയെടുക്കുമെന്ന് കേന്ദ്ര ഉപഭോക്തൃ സംരക്ഷണ അതോറിറ്റി. എല്പിജി ചാര്ജ്, ഗ്യാസ് സര്ചാര്ജ് തുടങ്ങിയ പേരുകളില് ബില്ലില് അധിക തുക ചുമത്തുന്നത് കണ്ടെത്തിയാല് നടപടിയെടുക്കുമെന്ന് കാണിച്ച് ഹോട്ടലുകള്ക്കും റെസ്റ്റോറന്റുകള്ക്കുമാണ് ഉപഭോക്തൃ സംരക്ഷണ അതോറിറ്റി മുന്നറിയിപ്പ് നല്കിയത്.
ചില റെസ്റ്റോറന്റുകള് ബില്ലില് അധിക ചാര്ജ് ചുമത്തിയതിന്റെ ചിത്രങ്ങള് സാമൂഹിക മാധ്യമങ്ങളില് പ്രചരിച്ചിരുന്നു. സിസിപിഎയ്ക്കും ഇതുസംബന്ധിച്ച് ഒട്ടേറെ പരാതികള് ലഭിച്ചു. ഇത്തരം ചാര്ജുകള് മുന്പു കേന്ദ്രം വിലക്കിയ സര്വീസ് ചാര്ജിനു തുല്യമാണെന്നും സിസിപിഎ വിലയിരുത്തി. റെസ്റ്റോറന്റുകള് ചാര്ജ് ചുമത്തിയാല് ബില്ലില് നിന്ന് ഇതൊഴിവാക്കണമെന്ന് ഉപയോക്താവിന് ആവശ്യപ്പെടാം. ഉപഭോക്തൃ സംരക്ഷണ നിയമത്തിലെ വ്യവസ്ഥകള് ചൂണ്ടിക്കാണിച്ചാണ് അതോറിറ്റി മുന്നറിയിപ്പ് നല്കിയത്.
സേവന ചാര്ജുമായി ബന്ധപ്പെട്ട് നിലവിലുള്ള മാര്ഗ്ഗനിര്ദ്ദേശങ്ങള് മറികടക്കുന്നതിനാണ് ഇത്തരം ചാര്ജുകള് ചുമത്തുന്നതെന്ന് അതോറിറ്റി വിലയിരുത്തി. ഇത് നിയമവിരുദ്ധമായ വ്യാപാര രീതിയായതിനാല് നിയമം ലംഘിക്കുന്നവര്ക്കെതിരെ കര്ശന നടപടി സ്വീകരിക്കുമെന്നും മുന്നറിയിപ്പില് പറയുന്നു.
ഉപഭോക്താക്കളെ തെറ്റിദ്ധരിപ്പിക്കുകയോ സ്വമേധയാ അല്ലാത്ത ഏതെങ്കിലും അധിക ചാര്ജ് അടയ്ക്കാന് നിര്ബന്ധിക്കുകയോ ചെയ്യരുത്. അത്തരം രീതികള് നേരിടുന്ന ഉപഭോക്താക്കള്ക്ക് ഹോട്ടലിനോടോ റെസ്റ്റോറന്റിനോടോ ബില്ലില് നിന്ന് ചാര്ജ് നീക്കം ചെയ്യാന് അഭ്യര്ത്ഥിക്കാവുന്നതാണ്. 1915 എന്ന നമ്പറില് വിളിച്ചോ അതിന്റെ ആപ്പ് വഴിയോ പരാതി നല്കാമെന്നും ഇ-ജാഗ്രിതി പോര്ട്ടല് വഴി ഉപഭോക്തൃ കമ്മീഷന് മുമ്പാകെ പരാതി നല്കാമെന്നും അതോറിറ്റി അറിയിച്ചു.
by Midhun HP News | Mar 26, 2026 | Latest News, ദേശീയ വാർത്ത
ഡല്ഹി: ഗുണനിലവാരമില്ലാത്ത ഭക്ഷണം വിതരണം ചെയ്തെന്ന പരാതിയില് ഇന്ത്യന് റെയില്വേ കാറ്ററിങ് ആന്ഡ് ടൂറിസം കോര്പ്പറേഷന് (ഐആര്സിടിസി) പിഴ ചുമത്തി റെയില്വേ. ഐആര്സിടിസി പത്ത്ലക്ഷം രൂപ പിഴയൊടുക്കണം എന്നാണ് നിര്ദേശം. പട്ന-ടാറ്റാനഗര് വന്ദേ ഭാരത് എക്സ്പ്രസില് മാര്ച്ച് 15 ന് വിതരണം ചെയ്ത ഭക്ഷണത്തെ കുറിച്ചുള്ള പരാതിയാണ് നടപടിക്ക് ആധാരം.
ഐആര്സിടിസിക്ക് പുറെ ട്രെയിനില് ഭക്ഷണം വിതരണത്തിന് കരാറെടുത്ത സ്ഥാപനത്തിന് എതിരെയും നടപടിയുണ്ട്. കരാര് കമ്പനിയില് നിന്നും 50 ലക്ഷം രൂപ പിഴ ഈടാക്കാനും കരാര് അവസാനിപ്പിക്കാനും റെയില്വെ ഉത്തരവിട്ടു. യാത്രക്കാരുടെ സുരക്ഷയും ഗുണനിലവാരവുമാണ് പ്രധാന മുന്ഗണനയെന്ന് ഇന്ത്യന് റെയില്വേ വക്താവ് നടപടി വിശദീകരച്ച് കൊണ്ട് വ്യക്തമാക്കി.
പരാതികള് ഒറ്റപ്പെട്ട സംഭവമാണ്, മികച്ച സേവനമാണ് റെയില്വെ നല്കുന്നത് എന്നും അധികൃതര് വിശദീകരിച്ചു. ഇന്ത്യന് റെയില്വേ അതിന്റെ ട്രെയിനുകളിലുടനീളം പ്രതിവര്ഷം ഏകദേശം 58 കോടി പേര്ക്ക് ഭക്ഷണം വിളമ്പുന്നുണ്ട്. ഇതില് അമിത നിരക്ക് ഈടാക്കുന്നതുമായി ബന്ധപ്പെട്ട ആക്ഷേപങ്ങള് ഉള്പ്പെടെ ശരാശരി 0.0008 ശതമാനം മാത്രമാണ് പരാതികളുടെ തോത് എന്നും മന്ത്രാലയം പറഞ്ഞു. ഇത്തരം പരാതികളില് കഴിഞ്ഞ മൂന്ന് വര്ഷത്തിനിടെ 2.6 കോടി രൂപ പിഴ ചുമത്തിയിട്ടുണ്ട്. 2025-ല്, പാന്ട്രി കാര് ജീവനക്കാര് റെയില്വേ യാത്രക്കാരെ ആക്രമിച്ച 3 സംഭവങ്ങള് റിപ്പോര്ട്ട് ചെയ്യപ്പെട്ടിട്ടുണ്ട്. പാന്ട്രി കാര് ജീവനക്കാര്ക്കെതിരെ അതത് സര്ക്കാര് റെയില്വേ പോലീസ് നിയമനടപടി സ്വീകരിച്ചിട്ടുണ്ട്.
by Midhun HP News | Mar 26, 2026 | Latest News, ദേശീയ വാർത്ത
ടെഹ്റാന്: ഇന്ത്യ ഉള്പ്പെടെയുള്ള സൗഹൃദ രാജ്യങ്ങള്ക്ക് ഹോര്മുസ് കടലിടുക്ക് വഴി ചരക്ക് കപ്പലുകള് കൊണ്ടുപോകാന് അനുമതി നല്കി ഇറാന്. ഇറാന് വിദേശകാര്യ മന്ത്രി അബ്ബാസ് അരാഗ്ചിയാണ് ഇക്കാര്യം വ്യക്തമാക്കിയത്. ചൈന, റഷ്യ, ഇന്ത്യ, ഇറാഖ്, പാകിസ്ഥാന് എന്നിവയുള്പ്പെടെയുള്ള സൗഹൃദ രാജ്യങ്ങള്ക്ക് ഹോര്മുസ് കടലിടുക്ക് വഴി ചരക്കു നീക്കത്തിന് അനുമതി നല്കിയെന്നാണ് അറിയിപ്പ്. മുംബൈയിലെ ഇറാന് കോണ്സുലേറ്റ് ജനറല് ആണ് ഇറാന് വിദേശകാര്യ മന്ത്രി അബ്ബാസ് അരാഗ്ചിയുടെ പ്രതികരണം സംബന്ധിച്ച് എക്സില് പങ്കുവച്ചത്.
ഹോര്മുസ് കടലിടുക്ക് തുറക്കണമെന്ന് യുഎന് സെക്രട്ടറി ജനറല് അന്റോണിയോ ഗുട്ടറസ് ആവശ്യപ്പെട്ടിരുന്നു. ഇതിന് പിന്നാലെയാണ് ഇറാന്റെ പ്രതികരണം പുറത്തുവരുന്നത്. പശ്ചിമേഷ്യയിലെ യുദ്ധം അവസാനിപ്പിക്കാന് യുഎസിനോടും ഇസ്രയേലിനോടും ഗുട്ടറസ് അഭ്യര്ത്ഥിച്ചു. എക്സ് പോസ്റ്റില് ആയിരുന്നു പ്രതകരണം. ഹോര്മുസ് കടലിടുക്കിന്റെ ദീര്ഘകാല അടച്ചിടല് എണ്ണ, വാതകം, വളം എന്നിവയുടെ നീക്കത്തെ സ്തംഭിപ്പിക്കുന്നു. മേഖലയിലും അതിനപ്പുറത്തും, സാധാരണക്കാര് ഗുരുതരമായ നാശനഷ്ടങ്ങള് സഹിക്കുകയും അഗാധമായ അരക്ഷിതാവസ്ഥയില് ജീവിക്കുകയാണെന്നുമായിരുന്നു ഗുട്ടറസ് ചൂണ്ടിക്കാട്ടിയത്. യുദ്ധത്തിന്റെ അനന്തരഫലങ്ങള് കുറയ്ക്കുന്നതിനുള്ള ഏറ്റവും നല്ല മാര്ഗം സംഘര്ഷം അവസാനിപ്പിക്കുക എന്നതാണെന്നും അദ്ദേഹം ചൂണ്ടിക്കാട്ടിരുന്നു.
സംഘര്ഷങ്ങള്ക്കിടെ ഇന്ത്യ ഇറാനില് നിന്നും എല്പിജി വാങ്ങാന് തയ്യാറായതും വലിയ വാര്ത്താ പ്രാധാന്യം നേടിയിട്ടുണ്ട്. 2019ന് ശേഷം ആദ്യമായി ഇറാനില് നിന്നും ഇന്ത്യ എല്പിജി വാങ്ങുന്നത്. ഇറാനില്നിന്നുള്ള എല്പിജി വഹിച്ചുകൊണ്ടുള്ള ‘അറോറ’ എന്ന കപ്പല് മംഗളൂരു തുറമുഖത്തെത്തുമെന്നാണ് റിപ്പോര്ട്ടുകള്. അമേരിക്ക ഉപരോധങ്ങളില് താല്ക്കാലികമായി ഇളവ് നല്കിയതിനെത്തുടര്ന്നാണ് വര്ഷങ്ങള്ക്ക് ശേഷം ഇറാനില് നിന്ന് ഇന്ത്യ എല്പിജി വാങ്ങുന്നത്. 2019-ല് അമേരിക്കന് സമ്മര്ദ്ദത്തെത്തുടര്ന്നാണ് ഇറാനില് നിന്നുള്ള ഊര്ജ്ജ ഇറക്കുമതി ഇന്ത്യ അവസാനിപ്പിച്ചത്.
by Midhun HP News | Mar 25, 2026 | Latest News, ദേശീയ വാർത്ത
നൊമ്പരമായി മലപ്പുറം വേങ്ങര സ്വദേശി ഈസ്മായീൽ. റിയാദിലെ അസീസിയയിലുള്ള താമസസ്ഥലത്ത് വെച്ചുണ്ടായ അപ്രതീക്ഷിത അപകടമാണ് 51-കാരനായ ഈസ്മായീലിന്റെ ജീവനെടുത്തത്. പൈപ്പിലെ തടസ്സം നീക്കാനായി ഒഴിച്ച സൾഫ്യൂരിക് ആസിഡിൽ നിന്നുള്ള അതിശക്തമായ വിഷവാതകം ശ്വസിച്ചതാണ് മരണകാരണം.
ബാത്റൂമിലെ പൈപ്പിൽ ആസിഡ് ഒഴിച്ച വിവരം അറിയാതെ അകത്തേക്ക് പ്രവേശിച്ച ഈസ്മായീൽ നിമിഷങ്ങൾക്കകം ബോധരഹിതനായി വീഴുകയായിരുന്നു. ഉടൻ തന്നെ അൽഈമാൻ ആശുപത്രിയിൽ എത്തിച്ച് തീവ്രപരിചരണ വിഭാഗത്തിൽ ചികിത്സ നൽകിയെങ്കിലും ചൊവ്വാഴ്ചയോടെ പ്രവാസലോകത്തോട് അദ്ദേഹം വിടപറഞ്ഞു. പൈപ്പ് ക്ലീൻ ചെയ്യാൻ ഉപയോഗിക്കുന്ന ഇത്തരം രാസവസ്തുക്കൾ എത്രത്തോളം അപകടകാരികളാണെന്ന് ഈ മരണം നമ്മെ ഓർമ്മിപ്പിക്കുന്നു. ഗൾഫ് നാടുകളിൽ കഴിയുന്ന ഓരോ പ്രവാസിയും ഇത്തരം കാര്യങ്ങളിൽ അതീവ ജാഗ്രത പാലിക്കേണ്ടതുണ്ട്.
by Midhun HP News | Mar 25, 2026 | Latest News, ദേശീയ വാർത്ത
ഡല്ഹി: രാജ്യത്തെ ആദ്യ ദയാമരണത്തിന് വിധേയനായ ഹരീഷ് റാണയുടെ അവയവങ്ങള് ദാനം ചെയ്തു. ഹരീഷിന്റെ ഹൃദയവാല്വുകളും കോര്ണിയയുമാണ് ദാനം ചെയ്തത്. അവയവങ്ങള് ദാനം ചെയ്യാന് കുടുംബം നേരത്തെ തന്നെ സമ്മതം അറിയിച്ചിരുന്നു. ഇന്ന് രാവിലെയാണ് ഹരീഷ് റാണ സംസാകാരം നടന്നത്. ഡല്ഹി ഗ്രീന് പാര്ക്ക് ശ്മശാനത്തില് നടന്ന ചടങ്ങില് അടുത്ത ബന്ധുക്കളും സുഹൃത്തുക്കളും മാത്രമാണ് പങ്കെടുത്തത്.
അബോധാവസ്ഥ(കോമ)യില് കഴിയുന്ന 31കാരനായ യുപി ഗാസിയബാദ് സ്വദേശി ഹരീഷ് റാണയുടെ ദയാവധം നടത്താന് സുപ്രീം കോടതി അനുമതി നല്കിയിരുന്നു. ഹരീഷിന്റെ ജീവന് നിലനിര്ത്താന് സഹായിക്കുന്ന ഉപകരണങ്ങള് ഘട്ടം ഘട്ടമായി പിന്വലിക്കാനായിരുന്നു കോടതി നിര്ദേശം. മാര്ച്ച് പതിനൊന്നിനായിരുന്നു വിധി.
2013 മുതല് കോമയില് കഴിയുന്ന ഹരീഷ് ചികിത്സയോട് പ്രതികരിക്കുന്നില്ലെന്ന മെഡിക്കല് ബോര്ഡ് റിപ്പോര്ട്ട് അംഗീകരിച്ച കോടതി, ജീവന് നിലനിര്ത്തുന്ന ഉപകരണം ഘട്ടംഘട്ടമായി പിന്വലിച്ച് ദയാവധം നടപ്പാക്കാന് നിര്ദേശിക്കുകയായിരുന്നു. ബിടെക് വിദ്യാര്ഥിയായിരുന്ന ഹരീഷ് റാണ 2013 ആഗസ്തിലാണ് കെട്ടിടത്തില്നിന്ന് വീണ് അബോധാവസ്ഥയിലായത്. അന്നുമുതല് ട്യൂബ് വഴി നല്കുന്ന ഭക്ഷണത്തെയും ശ്വസന സഹായികളെയും ആശ്രയിച്ചാണ് ജീവിച്ചിരുന്നത്.
by Midhun HP News | Mar 25, 2026 | Latest News, ദേശീയ വാർത്ത
ഡല്ഹി: സാമ്പത്തിക തട്ടിപ്പുകളില് നിന്ന് സംരക്ഷണം ഉറപ്പാക്കുന്നതിന് ഏപ്രില് ഒന്നുമുതല് ഓണ്ലൈന് ഇടപാടുകളില് മാറ്റം. പുതിയ ആര്ബിഐ ചട്ടം അനുസരിച്ചാണ് മാറ്റം വരുന്നത്. വര്ദ്ധിച്ചുവരുന്ന ഓണ്ലൈന് തട്ടിപ്പുകള് തടയുന്നതിനായി കര്ശനമായ ഓതന്റിക്കേഷന് വ്യവസ്ഥകളാണ് നടപ്പാകാന് പോകുന്നത്.
ഏപ്രില് 1 മുതല് ഇന്ത്യയുടെ ഡിജിറ്റല് പേയ്മെന്റ് ആവാസവ്യവസ്ഥയിലാണ് പുതിയ സുരക്ഷാ നവീകരണം വരുന്നത്. റോഡരികിലെ ചായക്കടകള് മുതല് വലിയ റീട്ടെയില് പര്ച്ചെയ്സ് വരെയുള്ള ദൈനംദിന പണമിടപാടുകള് ക്യുആര് കോഡുകളിലൂടെയും മൊബൈല് ആപ്പുകളിലൂടെയുമാണ് ഇപ്പോള് നടന്നുവരുന്നത്. ഇത്തരം ഇടപാടുകളുടെ സുരക്ഷ ശക്തിപ്പെടുത്തുന്നതിന് വേണ്ടിയാണ് പുതിയ വ്യവസ്ഥ ആര്ബിഐ കൊണ്ടുവന്നത്. ഇടപാടുകളെ ഒരുവിധത്തിലും ബാധിക്കാത്ത വിധം സുരക്ഷ ഉറപ്പാക്കാനുള്ള നടപടികളാണ് ആര്ബിഐ സ്വീകരിച്ചത്.
ടു-ഫാക്ടര് ഓതന്റിക്കേഷന് (2FA) കൂടുതല് ശക്തമാക്കിയും ഡൈനാമിക് സുരക്ഷാ പാളികള് അവതരിപ്പിച്ചുമാണ് ഇത് നടപ്പാക്കുന്നത്. സിസ്റ്റം പരാജയപ്പെടുമ്പോള് ഉത്തരവാദിത്തം ബാങ്കുകളിലേക്ക് മാറ്റും എന്നതാണ് മറ്റൊരു പ്രത്യേകത. ഇനി ഓണ്ലൈന് ഇടപാടുകള്ക്ക് ഒരൊറ്റ ഒടിപി (ഒറ്റത്തവണ പാസ്വേഡ്) മതിയാകില്ല എന്നതാണ് ഏറ്റവും വലിയ മാറ്റം. പേയ്മെന്റുകള് കുറഞ്ഞത് രണ്ട് ഓതന്റിക്കേഷനെങ്കിലും വിധേയമാകണം. അവ ചുവടെ:
പാസ്വേഡ് അല്ലെങ്കില് പാസ്ഫ്രെയ്സ്
PIN (വ്യക്തിഗത തിരിച്ചറിയല് നമ്പര്)
വിരലടയാളം അല്ലെങ്കില് മുഖം തിരിച്ചറിയല് പോലുള്ള ബയോമെട്രിക്സ്
ബാങ്കിംഗ് ആപ്പുകളില് സൃഷ്ടിക്കപ്പെട്ട സോഫ്റ്റ്വെയര് ടോക്കണുകള്
ഹാര്ഡ്വെയര് ടോക്കണുകള്
എസ്എംഎസ് അടിസ്ഥാനമാക്കിയുള്ള ഒടിപി
ഇതിനര്ത്ഥം ഓരോ ഇടപാടും കുറഞ്ഞത് രണ്ട് സുരക്ഷാ പരിശോധനകളിലൂടെ കടന്നുപോകണം. ഇത് അനധികൃത ആക്സസ് ഗണ്യമായി കുറയ്ക്കുമെന്നാണ് ആര്ബിഐ കണക്കുകൂട്ടുന്നത്. ഒടിപി അടിസ്ഥാനമാക്കിയുള്ള പരിശോധന വ്യാപകമായി ഉപയോഗിക്കുന്നുണ്ടെങ്കിലും തട്ടിപ്പുകാര് അത് മറികടക്കാനുള്ള വഴികള് കണ്ടെത്തിയിട്ടുണ്ട്. തട്ടിപ്പുകളുടെ വര്ധന കണക്കിലെടുത്താണ് പുതിയ മാറ്റം ആര്ബിഐ കൊണ്ടുവന്നത്.
ഡൈനാമിക് ഓതന്റിക്കേഷന്
പുതിയ ചട്ടത്തിലെ ഏറ്റവും പ്രധാനപ്പെട്ട ഘടകങ്ങളിലൊന്ന് ഡൈനാമിക് ഓതന്റിക്കേഷന് ആണ്.
ഈ സംവിധാനത്തിന് കീഴില്, ഓരോ ഇടപാടിനും കുറഞ്ഞത് ഒരു ഓതന്റിക്കേഷന് ഘടകമെങ്കിലും സമാനതകളില്ലാത്തതായിരിക്കണം. ഉദാഹരണത്തിന്:
ബയോമെട്രിക് സ്കാനുമായി സംയോജിപ്പിച്ച സ്റ്റാറ്റിക് പിന്
ഒറ്റത്തവണ ടോക്കണുമായി സംയോജിപ്പിച്ച പാസ്വേഡ്
തട്ടിപ്പുകാരന് ഒരു ഘടകത്തിലേക്ക് (പിന് പോലുള്ളവ) ആക്സസ് നേടിയാലും രണ്ടാമത്തെ, ഡൈനാമിക് ലെയര് സംരക്ഷണം നല്കും. അതുവഴി അനധികൃത ഇടപാട് ബ്ലോക്ക് ചെയ്യാന് സാധിക്കും. ഇത് അനധികൃത ഇടപാടുകളുടെ അപകടസാധ്യത ഗണ്യമായി കുറയ്ക്കാന് സഹായിക്കും.
Recent Comments