by Midhun HP News | Oct 6, 2026 | Latest News, ദേശീയ വാർത്ത
ഡല്‍ഹി: 2001 ഒക്ടോബറില്‍ ഗുജറാത്ത് മുഖ്യമന്ത്രിയായി തുടങ്ങിയ നരേന്ദ്ര മോദി നാളെ (ഒക്ടോബര്‍ ഏഴ്) ഭരണരംഗത്ത് 25 വര്‍ഷം പൂര്‍ത്തിയാക്കുകയാണ്. ഒരുമാസം നീണ്ടുനില്‍ക്കുന്ന സേവാ സങ്കല്‍പ് അഭിയാന്‍ പരിപാടിയിലൂടെയാണ് ബിജെപി ഇത് ആഘോഷമാക്കുന്നത്. മോദിയുടെ ജന്മസ്ഥലമായ ഭട്‌നഗറിനെയും അദ്ദേഹത്തിന്റെ പാര്‍ലമെന്റ് മണ്ഡലമായ വാരണാസിയെയും ബന്ധിപ്പിച്ചുകൊണ്ട് വിവിധ പരിപാടികളും ജനസമ്പര്‍ക്ക പരിപാടികളും ഇതിന്റെ ഭാഗമായി സംഘടിപ്പിച്ചിട്ടുണ്ട്.
2001 ഒക്ടോബര്‍ ഏഴിനാണ് മോദി ഗുജറാത്ത് മുഖ്യമന്ത്രിയാകുന്നത്. 2014ല്‍ ദേശീയ രാഷ്ട്രീയഭൂമികയിലേക്ക് കളംമാറുന്നതുവരെ ഏകദേശം 13 വര്‍ഷത്തോളം അദ്ദേഹം ഗുജറാത്ത് മുഖ്യമന്ത്രിയായിരുന്നു. തുടര്‍ന്ന് മൂന്ന് തവണയായി ഇന്ത്യയുടെ പ്രധാനമന്ത്രി പദത്തിലും അദ്ദേഹം സേവനം അനുഷ്ഠിച്ചു വരുന്നു.
അപ്രതീക്ഷിതമായാണ് നരേന്ദ്രമോദി ഗുജറാത്ത് മുഖ്യമന്ത്രിയാകുന്നത്. ആ വര്‍ഷം ജനുവരിയിലുണ്ടായ വന്‍ ഭൂകമ്പത്തെത്തുടര്‍ന്ന് തകര്‍ന്നടിഞ്ഞ ഗുജറാത്തിനെ പുനര്‍നിര്‍മിക്കുക എന്ന വലിയ ഉത്തരവാദിത്തമാണ് അന്ന് അദ്ദേഹത്തിന് മുന്നിലുണ്ടായിരുന്നത്. അത് വിജയകരമായി പൂര്‍ത്തിയാക്കാന്‍ മോദിക്ക് കഴിഞ്ഞു. മുഖ്യമന്ത്രിയായി ചുമതലയേറ്റതിന് ശേഷം നടന്ന 2002-ലെ നിയമസഭാ തെരഞ്ഞെടുപ്പ് അദ്ദേഹത്തിന്റെ രാഷ്ട്രീയ ജീവിതത്തിലെ കടുത്ത അഗ്‌നിപരീക്ഷയായിരുന്നു.
ഗോധ്രാ സംഭവങ്ങളെത്തുടര്‍ന്നുള്ള കലാപങ്ങളുടെ പശ്ചാത്തലത്തില്‍ നടന്ന തെരഞ്ഞെടുപ്പില്‍ ബിജെപി 182-ല്‍ 127 സീറ്റുകള്‍ നേടി വിജയിച്ചു. മോദി തന്റെ ആദ്യ പൂര്‍ണ കാലാവധിയിലേക്ക് മുഖ്യമന്ത്രിയായി അധികാരമേറ്റു. പാര്‍ട്ടിനേതാവ് എന്ന നിലയില്‍ നിന്ന് ജനപ്രിയനായ ഒരു രാഷ്ട്രീയ നേതാവിലേക്കുള്ള അദ്ദേഹത്തിന്റെ വളര്‍ച്ചയായിരുന്നു ഇത്. അടിസ്ഥാന സൗകര്യങ്ങള്‍, നിക്ഷേപം, ജലസേചനം എന്നിവയ്ക്ക് മുന്‍ഗണന നല്‍കിയ അദ്ദേഹത്തിന്റെ ഭരണശൈലി ‘ഗുജറാത്ത് മോഡല്‍’ എന്ന പേരില്‍ അറിയപ്പെട്ടു.
2013ല്‍ ബിജെപി നരേന്ദ്രമോദിയെ പ്രധാനമന്ത്രി സ്ഥാനാര്‍ത്ഥിയായി പ്രഖ്യാപിച്ചു. വികസന നായകനായും ശക്തമായ ഭരണാധികാരിയായും അദ്ദേഹത്തെ അവതരിപ്പിച്ചുകൊണ്ടുള്ള തെരഞ്ഞെടുപ്പ് പ്രചാരണമാണ് പാര്‍ട്ടി നടത്തിയത്. ഒരു വര്‍ഷത്തിനുശേഷം നടന്ന ലോക്സഭാ തെരഞ്ഞെടുപ്പില്‍ ബിജെപി 282 സീറ്റുകള്‍ നേടി.
2014 മെയ് 26ന് നരേന്ദ്ര മോദി രാജ്യത്തിന്റെ പ്രധാനമന്ത്രിയായി സത്യപ്രതിജ്ഞ ചെയ്തു അധികാരമേറ്റു. ചെങ്കോട്ടയില്‍ നടത്തിയ ആദ്യ സ്വാതന്ത്ര്യദിന പ്രസംഗത്തില്‍ താന്‍ രാജ്യത്തിന്റെ ‘പ്രധാന സേവകന്‍’ ആണെന്ന് അദ്ദേഹം പ്രഖ്യാപിച്ചു. സ്വച്ഛ് ഭാരത് മിഷന്‍, ജന്‍ ധന്‍ യോജന, മേക്ക് ഇന്‍ ഇന്ത്യ തുടങ്ങിയ നിരവധി പദ്ധതികള്‍ക്ക് അദ്ദേഹത്തിന്റെ ആദ്യ സര്‍ക്കാര്‍ തുടക്കമിട്ടു.
2017ല്‍ അവതരിപ്പിച്ച ചരക്ക് സേവന നികുതി, ഭൂരിഭാഗം പരോക്ഷ നികുതികളെയും ഒരു ഏകീകൃത ദേശീയ ചട്ടക്കൂടിലേക്ക് കൊണ്ടുവന്നു. ഏറ്റവും കൂടുതല്‍ ചര്‍ച്ച ചെയ്യപ്പെട്ടതായിരുന്നു 2016-ലെ നോട്ടുനിരോധനം. ഉന്നത മൂല്യമുള്ള കറന്‍സി നോട്ടുകള്‍ വിപണിയില്‍ നിന്ന് പിന്‍വലിച്ച സംഭവമായിരുന്നു ഇത്. ഇത്തരം നോട്ടുകള്‍ പിന്‍വലിക്കുന്നതോടുകൂടി രാജ്യത്ത് കള്ളപ്പണം ഒഴുകുന്നത് തടയിടാനാകുമെന്നും, തീവ്രവാദപ്രവര്‍ത്തനങ്ങളെയും മയക്കുമരുന്ന് കച്ചവടങ്ങളെയും ഇല്ലാതാക്കാനാകുമെന്നുമായിരുന്നു കേന്ദ്രസര്‍ക്കാര്‍ വാദം.
2016ലെ ഉറി ആക്രമണത്തിന് ശേഷം ഇന്ത്യ അതിര്‍ത്തി കടന്നുള്ള സര്‍ജിക്കല്‍ സ്‌ട്രൈക്ക് പ്രഖ്യാപിച്ചു. 2019-ലെ പുല്‍വാമ ആക്രമണത്തിന് ശേഷം ബാലാക്കോട്ടില്‍ ഇന്ത്യ വ്യോമാക്രമണം നടത്തി. 2025-ല്‍ പഹല്‍ഗാം ഭീകരാക്രമണത്തെത്തുടര്‍ന്ന് സര്‍ക്കാര്‍ ‘ഓപ്പറേഷന്‍ സിന്ദൂര്‍’ പ്രഖ്യാപിച്ചു. അതിര്‍ത്തി കടന്നുള്ള ഭീകരവാദത്തിനെതിരെ ശക്തമായ മറുപടി സര്‍ക്കാരിന്റെ ഭാഗത്തുനിന്നുണ്ടായി. രണ്ടാം മോദി സര്‍ക്കാരിന്റെ ഏറ്റവും വലിയ രാഷ്ട്രീയ തീരുമാനങ്ങളില്‍ ഒന്നായിരുന്നു ജമ്മു കശ്മീരിന്റെ പ്രത്യേക പദവി നല്‍കുന്ന ആര്‍ട്ടിക്കിള്‍ 370 റദ്ദാക്കിയത്. ബിജെപിയുടെ ദീര്‍ഘകാലമായുള്ള പ്രഖ്യാപനമായിരുന്നു ഇത്. ഈ തീരുമാനം രാജ്യത്തിനകത്തും പുറത്തും വലിയ ചര്‍ച്ചകള്‍ക്കും നിയമപോരാട്ടങ്ങള്‍ക്കും വഴിവെച്ചു.
മോദി സര്‍ക്കാരിന്റെ ഭരണകാലം നേരിട്ട ഏറ്റവും വലിയ വെല്ലുവിളിയായിരുന്നു കോവിഡ് മഹാമാരി. രാജ്യവ്യാപകമായ ലോക്ക്ഡൗണും തുടര്‍ന്ന് ലോകത്തിലെ ഏറ്റവും വലിയ വാക്‌സിനേഷന്‍ യജ്ഞങ്ങളിലൊന്നും സര്‍ക്കാര്‍ വിജയകരമായി നടപ്പിലാക്കി. 2024ലെ ലോക്സഭാ തെരഞ്ഞെടുപ്പില്‍ ബിജെപിക്ക് ഒറ്റയ്ക്ക് കേവലഭൂരിപക്ഷം ലഭിച്ചില്ലെങ്കിലും സഖ്യകക്ഷികളുടെ പിന്തുയില്‍ എന്‍ഡിഎ സര്‍ക്കാര്‍ അധികാരത്തില്‍ തുടര്‍ന്നു. ഇന്ത്യയുടെ പ്രഥമ പ്രധാനമന്ത്രിയായിരുന്നു ജവഹര്‍ലാല്‍ നെഹ്റുവിന് ശേഷം തുടര്‍ച്ചയായി മൂന്നാം തവണയും പ്രധാനമന്ത്രി പദത്തിലെത്തുന്ന രണ്ടാമത്തെ വ്യക്തിയായി നരേന്ദ്ര മോദി മാറി.
by Midhun HP News | Oct 6, 2026 | Latest News, ദേശീയ വാർത്ത
ദുബൈ: യുഎഇയില്‍ സ്‌കൂള്‍ പരിസരത്ത് ഫോട്ടോയും വിഡിയോയും എടുക്കുന്നതില്‍ മാതാപിതാക്കള്‍ക്ക് കര്‍ശന വിലക്ക്. കുട്ടികളുടെ സ്വകാര്യതയും സുരക്ഷയും മുന്‍നിര്‍ത്തി ദുബൈയിലെയും ഷാര്‍ജയിലെയും പ്രമുഖ സ്‌കൂളുകളാണ് മാതാപിതാക്കള്‍ക്കും സന്ദര്‍ശകര്‍ക്കും പുതിയ മാര്‍ഗനിര്‍ദ്ദേശം നല്‍കി സര്‍ക്കുലര്‍ അയച്ചിരിക്കുന്നത്.
സ്‌കൂള്‍ ക്യാംപസിനുള്ളില്‍ വെച്ച് വിദ്യാര്‍ഥികളുടെ ഫോട്ടോയോ വിഡിയോയോ എടുക്കരുതെന്നും, അനുവാദമില്ലാതെ മറ്റ് കുട്ടികള്‍ ഉള്‍പ്പെടുന്ന ചിത്രങ്ങള്‍ വാട്‌സാപ്പ് ഗ്രൂപ്പുകളിലോ സോഷ്യല്‍ മീഡിയയിലോ മറ്റ് ഡിജിറ്റല്‍ പ്ലാറ്റ്ഫോമുകളിലോ പങ്കുവെക്കരുതെന്നുമാണ് മാതാപിതാക്കള്‍ക്കും സന്ദര്‍ശകര്‍ക്കും സ്‌കൂളുകള്‍ നിര്‍ദ്ദേശം നല്‍കിയത്.
യുഎഇയിലെ സ്വകാര്യത സംരക്ഷണ നിയമങ്ങള്‍ക്കും അടുത്തിടെ പുറത്തിറക്കിയ നിര്‍ദ്ദേശങ്ങള്‍ക്കും വിധേയമായാണ് ഈ നടപടി. ക്ലാസ് മുറികള്‍, കൊറിഡോറുകള്‍, കളിസ്ഥലങ്ങള്‍, അസംബ്ലി, കുട്ടികളെ സ്‌കൂളില്‍ ഇറക്കുന്നതും തിരികെ കൊണ്ടുപോകുന്നതുമായ സ്ഥലങ്ങള്‍ തുടങ്ങിയവിടങ്ങളിലെല്ലാം ഈ വിലക്ക് ബാധകമാണ്. മറ്റു കുട്ടികളുടെയോ അധ്യാപകരുടെയോ ജീവനക്കാരുടെയോ ചിത്രങ്ങള്‍ അനുമതിയില്ലാതെ പകര്‍ത്തുമ്പോഴുണ്ടാകുന്ന സ്വകാര്യതാ ലംഘനം തടയുകയാണ് സ്‌കൂള്‍ അധികൃതരുടെ ലക്ഷ്യം.
സ്‌കൂള്‍ പരിസരത്ത് കുട്ടികളുടെ അനുവാദമില്ലാതെ ഫോട്ടോയോ വിഡിയോയോ എടുക്കുന്ന മാതാപിതാക്കള്‍ക്ക് യുഎഇ സ്വകാര്യതാ നിയമങ്ങള്‍ പ്രകാരം 500,000 ദിര്‍ഹം വരെ പിഴ ലഭിച്ചേക്കാം. അധികൃതര്‍ക്ക് പരാതി നല്‍കുകയും നടപടി കുറ്റകരമാണെന്ന് കണ്ടെത്തുകയും ചെയ്താല്‍ മാത്രമാണ് ഈ നടപടി നേരിടേണ്ടി വരിക. യുഎഇ സൈബര്‍ കുറ്റകൃത്യ നിയമത്തിലെ ആര്‍ട്ടിക്കിള്‍ 44 പ്രകാരം, ഒരു കുട്ടിയുടെ സ്വകാര്യത ലംഘിക്കുന്ന രീതിയില്‍ ചിത്രം പകര്‍ത്തുകയോ പങ്കുവെക്കുകയോ ചെയ്താല്‍ മാതാപിതാക്കള്‍ക്കോ സന്ദര്‍ശകര്‍ക്കോ കുറഞ്ഞത് ആറ് മാസം തടവോ, 150,000 മുതല്‍ 500,000 ദിര്‍ഹം വരെ പിഴയോ, അല്ലെങ്കില്‍ ഇവ രണ്ടും കൂടിയോ ലഭിക്കാമെന്നും നിയമവിദഗ്ധര്‍ പറയുന്നു.
by Midhun HP News | Oct 5, 2026 | Latest News, ദേശീയ വാർത്ത
ഡല്‍ഹി: ചന്ദ്രനില്‍ ആണവ റിയാക്ടറുകള്‍ സ്ഥാപിക്കാന്‍ അമേരിക്കയും ചൈനയും റഷ്യയും തമ്മില്‍ കടുത്ത മത്സരമെന്ന് റിപ്പോര്‍ട്ട്. ചന്ദ്രനില്‍ സ്ഥിരമായി കേന്ദ്രങ്ങള്‍ നിര്‍മിക്കുന്നതിനും വിഭവങ്ങള്‍ പര്യവേക്ഷണം ചെയ്യുന്നതിനും കൂടുതല്‍ ബഹിരാകാശ ദൗത്യങ്ങള്‍ക്ക് പിന്തുണ നല്‍കുന്നതിനും അണുശക്തി നിര്‍ണായകമാകുമെന്നാണ് വിലയിരുത്തല്‍.
ചന്ദ്രന്റെ ദക്ഷിണ ധ്രുവത്തിന് സമീപം മനുഷ്യരുടെ അറ്റകുറ്റപ്പണികളില്ലാതെ പ്രവര്‍ത്തിക്കാനും ശേഷിയുള്ള ആണവ റിയാക്ടര്‍ തയ്യാറാക്കാന്‍ നാസ ഇതിനകം തന്നെ കരാറുകാരോട് ആവശ്യപ്പെട്ടതായി ‘ദി ന്യൂയോര്‍ക്ക് ടൈംസ്’ റിപ്പോര്‍ട്ട് ചെയ്തു. 2030 ഡിസംബറോടെ ഈ റിയാക്ടര്‍ വിക്ഷേപണത്തിന് സജ്ജമാക്കുകയാണ് നാസയുടെ ലക്ഷ്യം.
നാസ നിര്‍ദേശിച്ചിരിക്കുന്ന ‘ലൂണാര്‍ റിയാക്ടര്‍-1’ 20 കിലോവാട്ട് വൈദ്യുതി ഉല്‍പ്പാദിപ്പിക്കുമെന്നും അറ്റകുറ്റപ്പണികളില്ലാതെ അഞ്ച് വര്‍ഷത്തോളം പ്രവര്‍ത്തിക്കുമെന്നും പ്രതീക്ഷിക്കുന്നു. അതേസമയം, ചൈനയുമായുള്ള രഹസ്യ സഹകരണത്തിന്റെ ഭാഗമായി 2036-ഓടെ ‘സെലെന’ എന്ന് പേരിട്ടിരിക്കുന്ന റിയാക്ടര്‍ വികസിപ്പിക്കാനാണ് റഷ്യ പദ്ധതിയിടുന്നത്.
ചൈനീസ് നേതൃത്വത്തിലുള്ള ചന്ദ്രനിലയങ്ങള്‍ക്ക് ആവശ്യമായ വൈദ്യുതി നല്‍കാനാണ് ഈ പദ്ധതി ലക്ഷ്യമിടുന്നത്. 10 കിലോവാട്ട് വരെ വൈദ്യുതി ഉല്‍പ്പാദിപ്പിക്കാനും പത്ത് വര്‍ഷത്തോളം പ്രവര്‍ത്തിക്കാനും തക്കവണ്ണമാണ് രൂപകല്‍പ്പന ചെയ്തിരിക്കുന്നത്.
ചന്ദ്രനില്‍ സ്ഥിരമായ ഒരു താവളം പ്രവര്‍ത്തിപ്പിക്കാന്‍ വൈദ്യുതോര്‍ജ സ്രോതസ്സ് അത്യന്താപേക്ഷിതമാണ്. പകല്‍ സമയത്ത് സൗരോര്‍ജ പാനലുകള്‍ ഉപയോഗിച്ച് വൈദ്യുതി ഉണ്ടാക്കാമെങ്കിലും സൗരോര്‍ജത്തെ മാത്രം ആശ്രയിക്കുക പ്രയാസകരമാണ്.
സൂര്യപ്രകാശമില്ലാതെയും പ്രവര്‍ത്തിക്കാന്‍ സാധിക്കുന്ന ആണവ റിയാക്ടറുകള്‍ക്ക്, പരിമിത മനുഷ്യ ഇടപെടലുകളോടെ ദീര്‍ഘകാലത്തേക്ക് വൈദ്യുതി നല്‍കാന്‍ കഴിയും. പ്രാരംഭ ഘട്ടത്തില്‍, ഉപകരണങ്ങള്‍ പ്രവര്‍ത്തിപ്പിക്കാനും ലൂണാര്‍ വാഹനങ്ങള്‍ ചാര്‍ജ് ചെയ്യുന്നതിനും സൗരോര്‍ജവും റേഡിയോ ഐസോടോപ്പ് സംവിധാനങ്ങളുമാണ് അമേരിക്കയും ചൈനയും ഉപയോഗിക്കാന്‍ ലക്ഷ്യമിടുന്നത്. എന്നാല്‍, കൂടുതല്‍ വലിയ താവളങ്ങള്‍ നിര്‍മിക്കുമ്പോള്‍ അതിന് വലിയ അളവില്‍ വൈദ്യുതി ആവശ്യമായി വരും.
by Midhun HP News | Oct 5, 2026 | Latest News, ദേശീയ വാർത്ത
ദുബായ്: ടെൽ അവീവിലേക്ക് പോവുകയായിരുന്ന ഫ്ലൈദുബായ് വിമാനത്തിൽ പൈലറ്റിനെ ആക്രമിച്ച സഹ പൈലറ്റ് ഹമാം അൽ-ഹമ്മാമി അന്വേഷണ ഉദ്യോഗസ്ഥരോട് കൂടുതൽ വിവരങ്ങൾ വെളിപ്പെടുത്തി. വിമാനം ഇടിച്ചിറക്കാൻ ലക്ഷ്യമിട്ടത് ടെൽ അവീവിലെ വിമാനത്താവളത്തിലാണെന്നും ക്യാപ്റ്റൻ സ്മിത് മച്ചാറിനെ കൊലപ്പെടുത്തിയ ശേഷം സാധാരണപോലെ യാത്ര തുടരാനാണ് ഉദ്ദേശിച്ചതെന്നും വിമാനത്താവളത്തിൽ ലാൻഡിംഗ് അനുമതി നേടിയ ശേഷം മറ്റൊരു വിമാനത്തിലോ ഉയരമുള്ള കെട്ടിടത്തിലോ ഇടിച്ചിറക്കാനായിരുന്നു ലക്ഷ്യമെന്നും ഇയാൾ ഇസ്രയേൽ അന്വേഷണ ഉദ്യോഗസ്ഥരോട് വെളിപ്പടുത്തി. എന്നാൽ, സ്മിത്ത് മച്ചാർ കോക്പിറ്റ് വാതിൽ തുറന്നതോടെ പദ്ധതി പൊളിയുകയായിരുന്നു.
ഏറെക്കാലമായുള്ള തൻ്റെ പദ്ധതിയായിരുന്നെന്നും ഫ്ലൈ ദുബായിൽ ജോലി നേടിയത് തന്നെ ഈ ലക്ഷ്യവുമായിട്ടാണെന്നും അൽ ഹമ്മാമ്മി സമ്മതിച്ചു. പല തവണ ഇസ്രയേലിലേക്ക് വിമാനം പറത്തുകയും ഒടുവിൽ വ്യക്തമായ ഒരു പ്ലാൻ തയാറാക്കുകയും ചെയ്തു. ജൂണിലും ജൂലൈയിലും ശ്രമം നടത്തിയെങ്കിലും ഫലവത്തായില്ല.
സംഭവ ദിവസം പ്രാർത്ഥിക്കുന്നുവെന്ന് പറഞ്ഞ് സീറ്റിൽ നിന്ന് മാറുകയായിരുന്നു. കോക്പിറ്റിലെ ക്രാഷ് ആക്സ് ഉപയോഗിച്ചാണ് പിന്നിൽ നിന്ന് പൈലറ്റ് സ്മിത്ത് മച്ചാറിൻ്റെ തലയ്ക്ക് ആഞ്ഞടിച്ച് കൊലപ്പെടുത്താൻ ശ്രമിച്ചത്. എന്നാൽ തലക്കടിയേറ്റിട്ടും സ്മിത്ത് മച്ചാർ എതിർത്ത് നിന്നതും കോക്പിറ്റ് വാതിൽ തുറന്നതുമാണ് തൻ്റെ പദ്ധതി പൊളിയാൻ കാരണമെന്നും ഇയാൾ സമ്മതിച്ചു.
ഇതിനിടെ രണ്ടു വർഷത്തോളം ഹമ്മാമ്മി ഓസ്ട്രേലിയയിൽ ഉണ്ടായിരുന്നതായി കണ്ടെത്തി. ഇവിടെ വച്ച് ഇയാൾ മതമൗലികവാദ സംഘടനകളുമായി ബന്ധപ്പെട്ടിരുന്നുവെന്ന വിവരത്തെ തുടർന്ന് ഓസ്ട്രേലിയൻ രഹസ്യാന്വേഷണ വിഭാഗം അന്വേഷണം തുടങ്ങി.
by Midhun HP News | Oct 5, 2026 | Latest News, ദേശീയ വാർത്ത
ബ്യൂണസ് അയേഴ്സ്: രാജ്യാന്തര ഫുട്‌ബോളില്‍ നിന്നും വിരമിക്കല്‍ പ്രഖ്യാപിച്ച അര്‍ജന്റീനന്‍ ഇതിഹാസ താരം ലയണല്‍ മെസിയുടെ ദേശീയ ജഴ്‌സിയില അവസാന മത്സരം ഏഴിന്. ആഫ്രിക്കന്‍ ടീമായ ബെനിനാണ് എതിരാളികള്‍. ബ്യൂണസ് അയേഴ്സിലെ മോര്‍ണിമെന്റല്‍ സ്‌റ്റേഡിയത്തില്‍ ഇന്ത്യന്‍ സമയം പുലര്‍ച്ചെ 4.30നാണ് മത്സരം.
39കാരനായ താരം പിതാവ് ഹോര്‍ഹെ മെസിയുടെ വിയോഗത്തിനു പിന്നാലെയാണ് വിരമിക്കല്‍ പ്രഖ്യാപിച്ചത്. അര്‍ജന്റീനയ്ക്കായി 207 മത്സരങ്ങളില്‍ നിന്നായി 125 ഗോളുകള്‍ നേടിയിട്ടുണ്ട്.
അതേസമയം ഇന്നലെ നടന്ന സൗഹൃദ ഫുട്‌ബോളില്‍ ആഫ്രിക്കന്‍ ടീമായ ബുര്‍ക്കിനഫാസോയെ എതിരില്ലാത്ത ഏഴ് ഗോളിന് അര്‍ജന്റീന പരാജയപ്പെടുത്തി. ഫിഫ ലോക റാങ്കിങില്‍ 62ാം സ്ഥാനത്തുള്ള ബുര്‍ക്കിനഫാസോയ്‌ക്കെതിരെ ശക്തമായ ടീമിനെയാണ് അര്‍ജന്റീന ഇറക്കിയത്. ലൗറ്റാരോ മാര്‍ട്ടിനെസ്, ജാന്‍ലൂക്ക പ്രസ്റ്റിയാനി, നിക്കോ പാസ്, അല്‍വാരസ്, മസ്റ്റാന്റുവാനോ, സിമയോണി, എന്നിവരാണ് ഗോള്‍ നേടിയത്. മൂമോനി ഡിയാലോ സെല്‍ഫ് ഗോള്‍ വഴങ്ങി.
ബ്യൂണസ് അയേഴ്സിലെ റിവർപ്ലേറ്റിന്റെ തട്ടകവും ലാറ്റിനമേരിക്കയിലെ ഏറ്റവും വലിയ സ്റ്റേഡിയവുമായി എൽ മോനുമെന്റലിലാണ് മെസിയുടെ അവസാന പോരാട്ടം. 84,000 കാണികളെ ഉൾക്കൊള്ളാൻ ശേഷിയുള്ള വിശാലമായ മൈതാനത്താണ് പോരാട്ടം.
ഫിഫ വിൻഡോയിൽ അർജന്റീന കളിക്കുന്ന മൂന്നാമത്തെ സൗഹൃദ പോരാട്ടമാണിത്. അന്താരാഷ്ട്ര കരിയർ നാട്ടുകാർക്ക് മുന്നിൽ തന്നെ കളിച്ച് അവസാനിപ്പിക്കാനുള്ള അവസരവും ഇതിലൂടെ മെസിക്ക് ലഭിക്കുന്നു. കഴിഞ്ഞ ഓഗസ്റ്റിലാണ് മെസി അന്താരാഷ്ട്ര ഫുട്ബോൾ അവസാനിപ്പിക്കുന്നതായി പ്രഖ്യാപിച്ചത്. മെസിക്കുള്ള ആദരമെന്ന നിലയിലാണ് ലയണൽ സ്കലോനി ബെനിനെതിരായ പോരാട്ടത്തിനുള്ള സ്ക്വാഡിലേക്ക് മെസിയേയും ഉൾപ്പെടുത്തിയത്.അർജന്റീനയ്ക്കായി 208ാം അന്താരാഷ്ട്ര മത്സരം കളിച്ചാണ് അദ്ദേഹം വിരമിക്കുക. നിലവിൽ 207 കളികളിൽ അർജന്റീനയ്ക്കായി മെസി കളത്തിലെത്തി. രാജ്യത്തിനായി ഏറ്റവും കൂടുതൽ അന്താരാഷ്ട്ര മത്സരം കളിച്ച താരമെന്ന നേട്ടവും ഏറ്റവും കൂടുതൽ ഗോൾ നേടിയ താരമെന്ന നേട്ടവും മെസിക്ക് സ്വന്തമാണ്.
മെസിയുടെ രണ്ട് പതിറ്റാണ്ടിലേറെ നീണ്ട അന്താരാഷ്ട്ര കരിയറിനാണ് ഒക്ടോബർ ആറിന് വിരാമമാകുന്നത്. ദേശീയ ടീമിനായി 125 ഗോളുകളും 68 അസിസ്റ്റുകളുമുണ്ട്. 2022ലെ ഖത്തർ ലോകകപ്പ് കിരീട നേട്ടമാണ് ഏറ്റവും സമ്മോഹന ഓർമ. 2 കോപ്പ അമേരിക്ക കിരീടങ്ങളും ഒരു ഫൈനലിസിമ ട്രോഫിയും മെസി അർജന്റീനയ്ക്കായി നേടിയിട്ടുണ്ട്. 2008ൽ ഒളിംപിക് സ്വർണം, 2021ലും 2024ലും തുടരെ കോപ്പ കിരീടങ്ങൾ. 2022ൽ ലോകകപ്പ്, 2022ൽ തന്നെ ഇറ്റലിയെ വീഴ്ത്തി ഫൈനലിസിമ കിരീടവും.
നൈജീരിയ, ടോഗോ, ബുർക്കിന ഫാസോ, നൈജർ എന്നീ രാജ്യങ്ങളുമായി അതിർത്തി പങ്കിടുന്ന ചെറിയ ആഫ്രിക്കൻ രാജ്യമാണ് മെസിയുടെ അവസാന എതിരാളികളായ ബെനിൻ. ദി സ്ക്വിറൽസ് എന്ന് മുമ്പ് അറിയപ്പെട്ടിരുന്ന അവർ പിന്നീട് ഔദ്യോഗികമായ ദി ചീറ്റാസ് എന്നു മാറ്റി. മഞ്ഞയും പച്ചയും കലർന്ന ജേഴ്സിയാണ് ബെനിൻ താരങ്ങൾ പരമ്പരാഗതമായി ധരിക്കുന്നത്.
by Midhun HP News | Oct 3, 2026 | Latest News, ദേശീയ വാർത്ത
ഡല്‍ഹി: രാജ്യത്തെ മുന്‍നിര സ്വകാര്യ എണ്ണ വിതരണ കമ്പനിയായ നയാര പെട്രോള്‍, ഡീസല്‍ വില വര്‍ധിപ്പിച്ചു. പെട്രോള്‍ ലിറ്ററിന് അഞ്ചു രൂപയും ഡീസല്‍ മൂന്നു രൂപയുമാണ് കൂട്ടിയത്. രാജ്യാന്തര വിപണിയില്‍ അസംസ്‌കൃത എണ്ണയുടെ വില വര്‍ധിച്ച സാഹചര്യത്തിലാണ് നടപടി.
ശനിയാഴ്ച മുതല്‍ പുതുക്കിയ വില പ്രാബല്യത്തില്‍ വന്നതായി നയാരയെ ഉദ്ധരിച്ചുകൊണ്ടുള്ള റിപ്പോര്‍ട്ടുകളില്‍ പറയുന്നു. ഇറാന്‍ സംഘര്‍ഷത്തെത്തുടര്‍ന്നുണ്ടായ ഊര്‍ജ പ്രതിസന്ധിയില്‍, രാജ്യത്ത് ആദ്യം ഇന്ധന വില വര്‍ധിപ്പിച്ചത് നയാര ആയിരുന്നു. മാര്‍ച്ച് 26ന് പെട്രോളിന് അഞ്ചു രൂപയും ഡീസലിന് മൂന്നു രൂപയുമാണ് കമ്പനി വര്‍ധിപ്പിച്ചത്. തുടര്‍ന്നു മറ്റു കമ്പനികളും ഇന്ധന വില ഉയര്‍ത്തി.
മാര്‍ച്ചില്‍ ഉയര്‍ത്തിയ വില നയാര ജൂലൈയില്‍ കുറച്ചിരുന്നു. രാജ്യാന്തര വിപണിയിലെ മാറ്റം ചൂണ്ടിക്കാട്ടിയായിരുന്നു വില പുനര്‍ നിര്‍ണയിച്ചത്.
രാജ്യത്ത് വിവിധ സംസ്ഥാനങ്ങളിലായി ഏഴായിരത്തിലേറെ റീട്ടെയ്ല്‍ കേന്ദ്രങ്ങളാണ് നയാരയ്ക്കുള്ളത്.
Recent Comments