by Midhun HP News | Mar 11, 2026 | Latest News, ദേശീയ വാർത്ത
ലഖ്നൗ: ഒരാളുടെ ജീവിതം എങ്ങനെയാണ് മാറിമറിയുന്നതെന്ന് പ്രവചിക്കാന് പോലും പറ്റില്ല. മസ്തിഷ്ക മരണം സംഭവിച്ച 50 വയസുള്ള ഒരു സ്ത്രീ ജീവിതത്തിലേയ്ക്ക് തിരികെ വന്നത് ‘അത്ഭുതം’ എന്നല്ലാതെ മറ്റൊന്നുമല്ല. മരിച്ചുവെന്ന് കരുതി സംസ്കാര ചടങ്ങുകള്ക്കായി വീട്ടിലേയ്ക്ക് ആംബുലന്സില് പോകുമ്പോഴാണ് അത് സംഭവിച്ചത്. കുഴിയില് വീണതിന്റെ ആഘാതത്തില് സ്ത്രീ പെട്ടെന്ന് സ്വാഭാവിക ശ്വാസം എടുത്തു തുടങ്ങുകയായിരുന്നു.
സംഭവം ഇങ്ങനെ: ബറേലിയിലെ ആശുപത്രിയിലെ ഡോക്ടര്മാരാണ് വിനീത ശുക്ല മരിച്ചെന്ന് കുടുംബത്തോട് പറഞ്ഞത്. വിനീതയുടെ ഭര്ത്താവ് കുല്ദീപ് കുമാര് ശുക്ല ഇവരെ ആശുപത്രിയില് നിന്ന് ആംബുലന്സില് വീട്ടിലേയ്ക്ക് കൊണ്ടുപോയി. സംസ്കാര ചടങ്ങുകള്ക്കുള്ള ഒരുക്കങ്ങള് തയ്യാറാക്കാന് ബന്ധുക്കളോട് നിര്ദേശിച്ചിരുന്നു. ദേശീയ പാതയിലെ കുഴി നിറഞ്ഞ ഭാഗത്തെത്തിയപ്പോള് ആംബുലന്സ് വലിയ കുഴിയില് വീണ് കുലുങ്ങി. ശ്വാസം നിലച്ച വിനീത സാധാരണ ഗതിയില് ശ്വസിക്കാന് തുടങ്ങി. ഉടനെ തിരിച്ച് ആശുപത്രിയില് എത്തിക്കുകയും സംസ്കാര ചടങ്ങുകള് നിര്ത്തിവെയ്ക്കാന് ആവശ്യപ്പെടുകയും ചെയ്തു. തീവ്രപരിചരണ വിഭാഗത്തില് ചികിത്സയിലായിരുന്ന വിനീത തിങ്കളാഴ്ച പൂര്ണ ആരോഗ്യവതിയായി വീട്ടിലേയ്ക്ക് മടങ്ങി.
പിലിഭിത്തിലെ ജുഡീഷ്യല് കോടതിയില് സീനിയര് അസിസ്റ്റന്റായി ജോലി ചെയ്യുന്ന വിനീത ഫെബ്രുവരി 22ന് വൈകുന്നേരം വീട്ടിലെ ജോലി ചെയ്യുന്നതിനിടെയാണ് ബോധരഹിതയായി വീണത്. പിലിഭിതിലെ മെഡിക്കല് കോളജില് എത്തിച്ചെങ്കിലും വിദഗ്ധ ചികിത്സയ്ക്കായി ബറേലിയിലേക്ക് മാറ്റുകയായിരുന്നു.
by Midhun HP News | Mar 11, 2026 | Latest News, ദേശീയ വാർത്ത
ഡൽഹി: പാക് ചാര സംഘടനയായ ഐഎസ്ഐക്കായി ചാരവൃത്തി നടത്തിയ നാവികസേനയിലെ സൈനികൻ അറസ്റ്റിൽ. ആഗ്ര സ്വദേശി ആദർശ് കുമാറാണ് (24) അറസ്റ്റിലായത്. കൊച്ചിയിലെ തെക്കൻ നാവിക ആസ്ഥാനത്താണ് ഇയാൾ ജോലി ചെയ്തിരുന്നത്. ഇവിടുത്തെ തന്ത്രപ്രധാന ചിത്രങ്ങൾ അടക്കം പ്രധാനപ്പെട്ട വിവരങ്ങൾ ഐഎസ്ഐക്ക് കൈമാറിയെന്നാണ് കണ്ടെത്തൽ. ഉത്തർപ്രദേശ് എടിഎസ് ആണ് ഇയാളെ അറസ്റ്റ് ചെയ്തത്. നാവികസേനയിൽ ലാൻസ് നായിക് ആയാണ് ഇയാൾ ജോലി ചെയ്തിരുന്നത്. ഐഎസ്ഐ ഏജന്റുമായി ഇയാൾ ബന്ധം സ്ഥാപിച്ചതായും ബാങ്ക് അക്കൗണ്ടിലേക്ക് പണം എത്തിയതായും അന്വേഷണത്തിൽ തെളിഞ്ഞിട്ടുണ്ട്.
by Midhun HP News | Mar 11, 2026 | Latest News, ദേശീയ വാർത്ത
ഡൽഹി: രാജ്യത്ത് ആദ്യമായി ദയാവധത്തിന് അനുമതി നൽകി സുപ്രീംകോടതി. 13 വർഷമായി കൃത്രിമമായി ജീവൻ നിലനിർത്തുന്ന ഹരീഷ് റാണയ്ക്ക് ഉപകരണങ്ങൾ മാറ്റി സ്വാഭാവിക മരണം അനുവദിക്കുന്നതിനാണ് സുപ്രീംകോടതി അനുമതി നൽകിയത്. വൃദ്ധരായ മാതാപിതാക്കളുടെ ഹർജിയിലാണ് അനുമതി. യന്ത്രസഹായത്തോടെ മാത്രം ജീവൻ തുടരുന്നതിൽ അർത്ഥമില്ലെന്ന ഡോക്ടർമാരുടെ അഭിപ്രായവും കോടതി പരിഗണിച്ചു. ഹരീഷ് റാണെയ്ക്ക് നൽകി വരുന്ന വെൻ്റിലേറ്റർ സഹായം പിൻവലിക്കാമെന്നും ഘട്ടം ഘട്ടമായി ചികിത്സ അവസാനിപ്പിക്കാമെന്നും കോടതി വ്യക്തമാക്കി.
2013ലാണ് ഹരീഷ് റാണെ എന്ന വിദ്യാർത്ഥിയ്ക്ക് അപകടം സംഭവിക്കുന്നത്. ഛണ്ഡീഗഢിലെ കോളേജിൽ സിവിൽ എഞ്ചിനീയറിംഗ് വിദ്യാർത്ഥിയായിരുന്ന ഹരീഷ് റാണെയ്ക്ക് കെട്ടിടത്തിന് മുകളിൽ നിന്ന് വീണ് തലയ്ക്ക് സാരമായി പരിക്കേൽക്കുകയായിരുന്നു.
അനങ്ങാൻ കഴിയാത്ത രീതിയിൽ വെൻ്റിലേറ്ററിൻ്റെ സഹായത്തോടെയാണ് ഇക്കാലമത്രയും കഴിഞ്ഞിരുന്നത്. 2018ലാണ് രാജ്യത്ത് ദയാവധം നിയമപരമാക്കിയിട്ടുള്ള സുപ്രീംകോടതി ഉത്തരവ് വന്നത്. റാണെയുടെ മാതാപിതാക്കളുടെ ഹർജിയിൽ വിശദമായ വാദം കേട്ട കോടതി ഹരീഷ് റാണെ തിരിച്ചുവരാൻ സാധ്യതയില്ലെന്ന് ഡോക്ടർമാരുൾപ്പെടെയുള്ളവരുടെ നിർദേശത്തെ തുടർന്ന് തീരുമാനത്തിലെത്തുകയായിരുന്നു.
by Midhun HP News | Mar 11, 2026 | Latest News, ദേശീയ വാർത്ത
ടെഹ്റാന്: ഇറാനിലെ റഷ്യന് കോണ്സുലേറ്റിന് നേര്ക്ക് ആക്രമണം. ഇസ്ഫഹാനിലെ കോണ്സുലേറ്റിലാണ് ആക്രമണമുണ്ടായത്. ആര്ക്കും പരുക്കേറ്റതായി റിപ്പോര്ട്ടില്ല. ഓഫിസ് കെട്ടിടത്തിനു കേടുപാടുകളുണ്ടായി.രാജ്യാന്തര നിയമങ്ങളുടെ ലംഘനമാണിതെന്ന് റഷ്യന് വിദേശകാര്യമന്ത്രാലയം അഭിപ്രായപ്പെട്ടു.
അതിനിടെ ഇസ്രയേലില് ഇറാന് ആക്രമണം കടുപ്പിച്ചു. ടെല് അവീവ്, ജെറുസലേം തുടങ്ങിയ നഗരങ്ങളില് ഇറാന് മിസൈല് വര്ഷിച്ചു. ഇറാന്റെ മിസൈല് ആക്രമണത്തില് നിരവധി പേര്ക്ക് പരിക്കേറ്റതായി ഇസ്രയേലി മാധ്യമങ്ങള് റിപ്പോര്ട്ട് ചെയ്യുന്നു. ഇറാന്റെ മിസൈല് ആക്രമണത്തെ ഭൂരിഭാഗവും പ്രതിരോധിച്ചതായി ഇസ്രയേല് സൈന്യം അവകാശപ്പെട്ടു.
ടെഹ്റാന് ഉള്പ്പെടെ ഇറാന്റെ വിവിധ നഗരങ്ങളില് ഇസ്രയേലും അമേരിക്കയും ആക്രമണം തുടരുകയാണ്. ഹോര്മുസ് കടലിടുക്കില് ഇറാന്റെ 16 ബോട്ടുകള് തകര്ത്തതായി അമേരിക്ക അവകാശപ്പെട്ടു. ഇറാനുമായുള്ള യുദ്ധത്തില് 150 യുഎസ് സൈനികര്ക്കു പരിക്കേറ്റതായി വാര്ത്താ ഏജന്സിയായ റോയിട്ടേഴ്സ് റിപ്പോര്ട്ടു ചെയ്തു. പരിക്കേറ്റവരുടെ കണക്കുകള് ആദ്യമായാണ് പുറത്തുവരുന്നത്.
ബഹ്റൈന്, യുഎഇ, സൗദി അറേബ്യ, ഖത്തര് എന്നീ രാജ്യങ്ങളില് ഇറാന് കടുത്ത ആക്രമണം നടത്തി. ഇറാന്റെ ഡ്രോണ്, മിസൈല് വര്ഷത്തില് രണ്ടു സൈനികര് ഉള്പ്പെടെ യുഎഇയില് കൊല്ലപ്പെട്ടവരുടെ എണ്ണം ആറായി. യുഎസ്ഇസ്രയേല് ആക്രമണങ്ങളില് ടെഹ്റാനില് 40 പേര് കൊല്ലപ്പെട്ടു. ലബനനില് കൊല്ലപ്പെട്ടവരുടെ എണ്ണം 486 ആയി. ഇവരില് 84 പേര് കുട്ടികളാണ്. ഒരാഴ്ചയ്ക്കിടെ 6.67 ലക്ഷം പേര് ഒഴിപ്പിക്കപ്പെട്ടതായി യുഎന് ഏജന്സികള് അറിയിച്ചു.
by Midhun HP News | Mar 11, 2026 | Latest News, ദേശീയ വാർത്ത
വാഷിങ്ടൺ: ഹോർമുസ് കടലിടുക്കിൽ മൈനുകൾ സ്ഥാപിച്ചിട്ടുണ്ടെങ്കിൽ ഉടൻ നീക്കം ചെയ്യണമെന്ന് ഇറാനോട് യുഎസ് പ്രസിഡന്റ് ഡോണൾഡ് ട്രംപ്. അല്ലെങ്കിൽ കടുത്ത സൈനിക നടപടിയുണ്ടാകും. മൈനുകൾ സ്ഥാപിക്കുകയോ അത് നീക്കം ചെയ്യാൻ തയാറാകാതിരിക്കുകയോ ചെയ്താൽ ഉണ്ടാകാൻ പോകുന്ന പ്രത്യാഘാതങ്ങൾ സമാനതകൾ ഇല്ലാത്തതായിരിക്കുമെന്നും ട്രംപ് മുന്നറിയിപ്പ് നൽകി.
സോഷ്യൽ മീഡിയ പ്ലാറ്റ്ഫോമായ ട്രൂത്തിലൂടെയാണ് ട്രംപിന്റെ മുന്നറിയിപ്പ്. ഹോർമുസ് കടലിടുക്കിൽ ഇറാൻ മൈനുകൾ സ്ഥാപിച്ചിട്ടുണ്ടെന്ന റിപ്പോർട്ട് ഞങ്ങളുടെ ശ്രദ്ധയിൽപെട്ടിട്ടില്ല. അങ്ങനെ എന്തെങ്കിലും സ്ഥാപിച്ചിട്ടുണ്ടെങ്കിൽ അത് ഉടൻ തന്നെ നീക്കം ചെയ്യണമെന്നാണ് അമേരിക്ക ആവശ്യപ്പെടുന്നത്. മൈനുകൾ ഇറാൻ തന്നെ നീക്കം ചെയ്യുകയാണെങ്കിൽ അത് ആ രാജ്യത്തിന് തന്നെ ശരിയായ ചുവടുവയ്പ്പായിരിക്കുമെന്നും ട്രംപ് അഭിപ്രായപ്പെട്ടു.
മൈനുകൾ സ്ഥാപിക്കാൻ ശ്രമിച്ചാൽ മയക്കുമരുന്ന് കടത്തുകാരെ നശിപ്പിക്കാൻ ഉപയോഗിക്കുന്ന സാങ്കേതികവിദ്യയും മിസൈൽ ശേഷിയും ഉപയോഗിക്കും. അത് വളരെ ക്രൂരമായിരിക്കുമെന്നും ട്രംപ് വ്യക്തമാക്കി. എന്നാൽ ഹോര്മുസ് കടലിടുക്കില് ബോംബുകള് സ്ഥാപിച്ചിട്ടില്ലെന്ന് ഇറാന് വ്യക്തമാക്കി. തങ്ങളെ ആക്രമിക്കാനാണ് ഉദ്ദേശമെങ്കില്, നേരിടാൻ കരയില് നിന്ന് നേരിട്ട് കപ്പലുകളെ ലക്ഷ്യം വെക്കാവുന്ന റോക്കറ്റുകള് സജ്ജമാക്കി വെച്ചിട്ടുണ്ടെന്നും ഇറാന് പ്രതികരിച്ചു.
by Midhun HP News | Mar 11, 2026 | Latest News, ദേശീയ വാർത്ത
ഡല്ഹി: പശ്ചിമേശ്യയിലെ സംഘര്ഷങ്ങളുടെ പശ്ചാത്തലത്തില് ഫ്യുവല് സര്ചാര്ജ് പ്രഖ്യാപിച്ച് എയര് ഇന്ത്യ. ആഭ്യന്തര, അന്താരാഷ്ട്ര ശ്യംഖലകളില് സര്ചാര്ജ് ഏര്പ്പെടുത്തുന്നതോടെ വിമാനനിരക്കില് വര്ധനയുണ്ടായേക്കുമെന്ന് റിപ്പോര്ട്ട്.
മൂന്ന് ഘട്ടങ്ങളിലായാണ് സര്ചാര്ജ് നടപ്പിലാക്കുകയെന്നാണ് അറിയിപ്പ്. എയര് ഇന്ത്യ എക്സ്പ്രസ് നടത്തുന്ന സര്വീസുകളിലും ഈ സര്ചാര്ജ് ബാധകമാകുമെന്ന് എയര്ലൈന് ഗ്രൂപ്പ് അറിയിച്ചു. ഗള്ഫ് മേഖലയിലെ വിതരണ തടസ്സങ്ങളെത്തുടര്ന്ന് 2026 മാര്ച്ച് ആദ്യം മുതല് ഏവിയേഷന് ടര്ബൈന് ഇന്ധനത്തിന്റെ വിലയില് വലിയ വര്ധനയുണ്ടായതുകൊണ്ടാണ് ഈ വര്ധന നടപ്പാക്കുന്നതെന്ന് എയര്ലൈന് അറിയിച്ചു.
ഘട്ടം 1: ആഭ്യന്തര വിമാനങ്ങള്ക്കും സാര്ക്ക് രാജ്യങ്ങളിലേക്കുള്ള റൂട്ടുകള്ക്കും ടിക്കറ്റിന് 399 രൂപ നിരക്ക് വര്ധിക്കും.
ഘട്ടം 2: പശ്ചിമേഷ്യ (10 ഡോളര്), തെക്കുകിഴക്കന് ഏഷ്യ (20 ഡോളര്), ആഫ്രിക്ക (30 ഡോളര്) ഉള്പ്പെടെ നിരവധി അന്താരാഷ്ട്ര റൂട്ടുകളില് സര്ചാര്ജ് വര്ദ്ധിപ്പിക്കും.
ഘട്ടം 3: ഹോങ്കോങ്, ജപ്പാന്, ദക്ഷിണ കൊറിയ തുടങ്ങിയ വിദൂര കിഴക്കന് രാജ്യങ്ങളിലേക്കും പിന്നീട് സര്ചാര്ജ് വ്യാപിപ്പിക്കും, വിശദാംശങ്ങള് പിന്നീട് അറിയിക്കും.
ഘട്ടം 1, ഘട്ടം 2 എന്നിവയില് സര്ചാര്ജ് നടപ്പാക്കുന്നുണ്ടെന്നും ഘട്ടം 3 പിന്നീട് ആസൂത്രണം ചെയ്തിട്ടുണ്ടെന്നും എയര്ലൈന് പറഞ്ഞു.
സര്ചാര്ജ് നടപ്പാക്കുന്നതിന് മുമ്പ് നല്കിയ ടിക്കറ്റുകള്ക്ക് ഇത് ബാധിക്കില്ലെന്ന് എയര്ലൈന് വ്യക്തമാക്കി, യാത്രക്കാര് അവരുടെ യാത്രാ തീയതികളിലോ ടിക്കറ്റിലോ മാറ്റങ്ങള് വരുത്തുന്നില്ലെങ്കില് മാത്രം. പ്രവര്ത്തനങ്ങള് നിലനിര്ത്താന് സര്ചാര്ജ് ആവശ്യമാണെന്ന് എയര് ഇന്ത്യ പറഞ്ഞു.
ഏവിയേഷന് ടര്ബൈന് ഇന്ധനം ഒരു എയര്ലൈനിന്റെ പ്രവര്ത്തനചെലവിന്റെ ഏകദേശം 40 ശതമാനം വരുന്നു, ഇത് ഇന്ധന വില വര്ധനയെ വലിയ രീതിയില് സ്വാധീനിക്കും. മാര്ച്ച് ആദ്യം മുതല്, ഗള്ഫ് മേഖലയിലെ രാഷ്ട്രീയ സാഹചര്യങ്ങളുമായി ബന്ധപ്പെട്ട വിതരണ തടസ്സങ്ങള് കാരണം എടിഎഫ് വില കുത്തനെ ഉയര്ന്നു, ഇത് എയര്ലൈനുകളുടെ പ്രവര്ത്തനച്ചെലവ് വര്ധിപ്പിച്ചു. ഇന്ത്യയില് ഈ സ്വാധീനം വളരെ കൂടുതലാണ്, കാരണം എടിഎഫിന് ന് ഉയര്ന്ന എക്സൈസ് ഡ്യൂട്ടിയും വാറ്റും ബാധകമാണ്, പ്രത്യേകിച്ച് ഡല്ഹി, മുംബൈ പോലുള്ള പ്രധാന മെട്രോ നഗരങ്ങളില്. ഇത് എയര്ലൈനുകള്ക്ക് പ്രവര്ത്തനച്ചെലവ് വര്ധിച്ചു. അതേസമയം എയര് ഇന്ത്യ എക്സ്പ്രസ് നിലവില് അവരുടെ വിമാനങ്ങളില് ഫ്യൂവല് സര്ചാര്ജ് ഈടാക്കുന്നില്ലെന്നാണ് റിപ്പോര്ട്ട്.
Recent Comments