by Midhun HP News | Oct 2, 2026 | Latest News, ദേശീയ വാർത്ത
ഡല്‍ഹി: എസ്ഐആറുമായി ബന്ധപ്പെട്ട് വന്‍ തോതില്‍ വോട്ടര്‍മാരുടെ പേരുകള്‍ വെട്ടിമാറ്റിയെന്ന് വിമര്‍ശനം നേരിടുന്ന പശ്ചാത്തലത്തില്‍, നടപടികള്‍ പൂര്‍ത്തിയാക്കിയ 20 സംസ്ഥാനങ്ങളോടും കേന്ദ്രഭരണ പ്രദേശങ്ങളോടും വോട്ടര്‍പട്ടികയില്‍ നിന്ന് പുറത്തായവര്‍ക്ക് വേണ്ടി പ്രത്യേക ഡ്രൈവ് നടത്താന്‍ തിരഞ്ഞെടുപ്പ് കമ്മീഷന്റെ നിര്‍ദേശം.
ഇത് സംബന്ധിച്ച് സെപ്റ്റംബര്‍ 29ന് തെരഞ്ഞെടുപ്പ് കമ്മീഷന് സംസ്ഥാന തെരഞ്ഞെടുപ്പ് കമ്മീഷന് കത്ത് അയച്ചിരുന്നു. അതിന് പിന്നാലെ കഴിഞ്ഞ ദിവസം നടന്ന തെരഞ്ഞെടുപ്പ് കമ്മീഷണര്‍മാരുടെ യോഗത്തിലും മുഖ്യതെരഞ്ഞടുപ്പ് കമ്മീഷണര്‍ ഇക്കാര്യം നിര്‍ദേശിച്ചതായാണ് റിപ്പോര്‍്ട്ടുകള്‍.
രാജ്യത്തുടനീളമായി വോട്ടര്‍പട്ടികയില്‍ നിന്ന് 13 കോടിയോളം പേരുകള്‍ ഒഴിവാക്കപ്പെട്ടതില്‍ കമ്മീഷന് കടുത്ത വിമര്‍ശനം നേരിടുന്നതിനിടയിലാണ് ഈ പുതിയ നീക്കം. ജൂലൈ മാസത്തില്‍ ഫോം 6-ല്‍ കൂട്ടിച്ചേര്‍ത്ത ചോദ്യം ഒഴിവാക്കിക്കൊണ്ടായിരിക്കും ഈ ഡ്രൈവ് നടത്തുക. നേരത്തെ എസ്ഐആറുമായി ബന്ധപ്പെട്ട് അപേക്ഷകനോ അവരുടെ മാതാപിതാക്കളോ വോട്ടര്‍പട്ടികയില്‍ ഉള്‍പ്പെട്ടിരുന്നോ എന്ന ചോദ്യം ഓണ്‍ലൈന്‍ ഫോമില്‍ നിര്‍ബന്ധമാക്കിയിരുന്നു. ഇതിന് മറുപടി നല്‍കാതെ ഫോം സബ്മിറ്റ് ചെയ്യാന്‍ സാധിക്കുമായിരുന്നില്ല. ഇതേതുടര്‍ന്ന് മാതാപിതാക്കളുടെ പേര് പട്ടികയില്‍ നിന്ന് ഒഴിവാക്കപ്പെട്ട വോട്ടര്‍ക്ക് അപേക്ഷ നല്‍കാന്‍ കഴിയുമായിരുന്നില്ല. ഇത് വലിയ വിമര്‍ശനത്തിന് ഇടയാക്കിയിരുന്നു.
by Midhun HP News | Oct 2, 2026 | Latest News, ദേശീയ വാർത്ത
ഷിംല: ഹിമാചല്‍ പ്രദേശിലെ 148 സര്‍ക്കാര്‍ സിബിഎസ് ഇ സ്‌കൂളുകളില്‍ അധ്യാപകര്‍ക്ക് ഇനിമുതല്‍ ഡ്രസ് കോഡ്. ഇളം പര്‍പ്പിള്‍, നേവി ബ്ലൂ, എന്നീ നിറങ്ങളിലെ വസ്ത്രങ്ങള്‍ മാത്രമേ സ്‌കൂളിലേക്ക് ധരക്കാവൂ. പെട്ടന്ന് ശ്രദ്ധ പിടിച്ചുപറ്റുന്ന കടുംനിറങ്ങളൊന്നും സ്‌കൂളിന്റെ പരിധിയിലേ വേണ്ടെന്നാണ് നിര്‍ദേശം.
പുരുഷ അധ്യാപകര്‍ക്ക് പാന്റും ഷര്‍ട്ടും ടൈയും ബ്ലേസറുമാണ് അംഗീകൃത വേഷം. അധ്യാപികമാര്‍ക്ക് സാരി, സല്‍വാര്‍, ഷര്‍ട്ടും പാന്റും ധരിക്കാം. ഇതിനൊപ്പം ബ്ലേസറും നിര്‍ബന്ധമാണ്. സ്‌കൂളിന്റെ ലോഗോയും ഉണ്ടായിരിക്കണം. ചെരുപ്പിനുമുണ്ട് നിര്‍ദേശം. കറുത്ത നിറത്തിലുള്ള ചെരുപ്പുകള്‍ മാത്രമേ സ്‌കൂളില്‍ ഉപയോഗിക്കാവൂ.
പ്രിന്‍സിപ്പല്‍ മുതല്‍ കരാര്‍ അധ്യാപകര്‍ ഡ്രസ് കോഡ് പാലിച്ചേ മതിയാകൂ എന്നാണ് നിര്‍ദേശം. അടുത്ത വര്‍ഷം മുതല്‍ കൂടുതല്‍ സിബിഎസ്ഇ സ്‌കൂളുകളില്‍ ഈ രീതി തുടരുമെന്നും സര്‍ക്കാര്‍ അറിയിച്ചു. ഒരു ദിവസം മൂന്ന് തവണ ടീച്ചര്‍മാരുടെ ഹാജര്‍ രേഖപ്പെടുത്തുന്ന രീതിയും അടുത്തിടെ അവതരിപ്പിച്ചിരുന്നു.
by Midhun HP News | Oct 2, 2026 | Latest News, ദേശീയ വാർത്ത
മുംബൈ: മുഖ്യതെരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് ഗാന്ധി ജയന്തിദിനത്തില്‍ പ്രതിഷേധം ആരംഭിക്കാനിരിക്കെ മുംബൈയിലെ ശിവാജി പാര്‍ക്കില്‍ സുരക്ഷ ശക്തമാക്കി പൊലീസ്. ശിവാജി പാര്‍ക്കിനും ചുറ്റും ബാരിക്കേഡുകള്‍ സ്ഥാപിച്ചു. പ്രദേശത്ത് പൊലീസ് നിരോധനാജ്ഞ പ്രഖ്യാപിച്ചു.
ഇന്നുമുതല്‍ രാജ്യത്തെ എല്ലാ ജില്ലകളിലും ജനാധിപത്യ സംരക്ഷണ മാര്‍ച്ച് നടത്താന്‍ ഇന്ത്യമുന്നണിയും തീരുമാനിച്ചിട്ടുണ്ട്. ഒക്ടോബര്‍ ആറിന് എംപിമാരുടെ നേതൃത്വത്തില്‍ തെരഞ്ഞെടുപ്പ് കമ്മീഷന് മാര്‍ച്ചും ഉണ്ടാകും. മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജിക്കാര്യം നവംബര്‍ ഒന്നിന് ഡല്‍ഹിയിലെ വന്‍ റാലിയോടെ രാഷ്ട്രീയ പ്രചാരണമാക്കാനാണ് പ്രതിപക്ഷ ശ്രമം.
അനുമതി ഇല്ലെങ്കിലും മുംബൈയിലെ ശിവാജി പാര്‍ക്കില്‍തന്നെ പ്രതിഷേധം നടത്തുമെന്ന് സിജെപി നേതാവ് അഭിജീത് ദിപ്കെ പറഞ്ഞു. പ്രതിഷേധം നടത്തുകയെന്നത് നമ്മുടെ അവകാശമാണ്. ആസാദ് മൈതാനത്ത് പ്രതിഷേധം നടത്താന്‍ ഞങ്ങള്‍ ആഗ്രഹിക്കുന്നില്ലെന്നും ശിവാജി പാര്‍ക്കില്‍ തന്നെ പ്രതിഷേധം നടത്തുമെന്ന് അഭിജീത് വ്യക്തമാക്കി.
ഗ്യാനേഷ് കുമാറിന്റെ രാജിവരെ പ്രതിഷേധം തുടരും ശിവാജി പാര്‍ക്കിലെ ആറാം നമ്പര്‍ ഗേറ്റില്‍ എല്ലാവരും ഒത്തുചേരണമെന്നും ജനാധിപത്യം രക്ഷിക്കാന്‍ പ്രതിജ്ഞ ചെയ്യണമെന്നും അദ്ദേഹം പറഞ്ഞു.
ശിവാജി പാര്‍ക്കില്‍ സിജെപി നടത്താനിരിക്കുന്ന പ്രതിഷേധത്തിനെതിരേ പ്രദേശവാസികള്‍ രംഗത്തെത്തിയെന്ന വാദം അഭിജീത് ദിപ്കെ നിരാകരിച്ചു. പ്രദേശവാസികളാരും തങ്ങളുടെ പ്രതിഷേധത്തെ എതിര്‍ക്കുന്നില്ലെന്നും ശിവജി പാര്‍ക്ക് സൈലന്റ് സോണ്‍ ആണെങ്കില്‍ മുഖ്യമന്ത്രിക്ക് എങ്ങനെ അവിടെ റാലികള്‍ സംഘടിപ്പിക്കാനാകുമെന്നും അദ്ദേഹം ചോദിച്ചു. രാജിവെച്ചില്ലെങ്കില്‍ ഒക്ടോബര്‍ അവസാനത്തോടെ ഡല്‍ഹി ജന്തര്‍ മന്തറിലെ പ്രതിഷേധം ആരംഭിക്കും. അതിനുപിന്നാലെ ഗോവ, കര്‍ണാടക, പശ്ചിമബംഗാള്‍, ഉത്തര്‍ പ്രദേശ്, ബിഹാര്‍, ഝാര്‍ഖണ്ഡ് എന്നിവിടങ്ങളിലേക്കും പ്രതിഷേധം വ്യാപിപ്പിക്കും, അദ്ദേഹം കൂട്ടിച്ചേര്‍ത്തു. എസ്ഐആറുമായി ബന്ധപ്പെട്ട് രണ്ട് തെരഞ്ഞെടുപ്പ് കമ്മിഷണര്‍മാര്‍ വിയോജിപ്പ് പ്രകടിപ്പിച്ചിരുന്നെന്ന വാര്‍ത്തയ്ക്ക് പിന്നാലെയാണ് മുഖ്യ തെരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് സിജെപി രംഗത്തെത്തിയത്.
by Midhun HP News | Oct 1, 2026 | Latest News, ദേശീയ വാർത്ത
ഡല്‍ഹി: ഫ്രിഡ്ജ്, എസി, ഫ്രിഡ്ജ്, വാഷിങ് മെഷീന്‍ ഉള്‍പ്പെടെ പല ഇലക്ട്രോണിക്‌സ് ഉല്‍പ്പന്നങ്ങളുടെയും വില ഇന്നുമുതല്‍ വര്‍ധിക്കും. അസംസ്‌കൃത വസ്തുക്കളുടെ വിലയിലും ഗതാഗത ചെലവിലും ഉണ്ടായ വര്‍ധനയെ തുടര്‍ന്ന് പല കമ്പനികളും വില വര്‍ധിപ്പിക്കാന്‍ തുടങ്ങിയതായി പിടിഐ റിപ്പോര്‍ട്ട് ചെയ്യുന്നു.
എസി, എല്‍ഇഡി ടിവി, വാഷിങ് മെഷീന്‍ അടക്കമുള്ള ഇലക്ട്രോണിക്‌സ് ഉല്‍പ്പന്നങ്ങളുടെ വിലയില്‍ കമ്പനികള്‍ അഞ്ചുമുതല്‍ എട്ടു ശതമാനം വരെ വര്‍ധന വരുത്തിയതായാണ് റിപ്പോര്‍ട്ടുകള്‍ വ്യക്തമാക്കുന്നത്. ഉത്സവ ഷോപ്പിങ് സീസണിന് തൊട്ടുമുന്‍പാണ് ഈ വര്‍ധന. ഈ വില വര്‍ധന എല്ലാ ബ്രാന്‍ഡുകളിലും ഉല്‍പ്പന്ന വിഭാഗങ്ങളിലും ഒരേപോലെയല്ല. എസിക്കാണ് കൂടുതല്‍ വില വര്‍ധന. എസി വിലയില്‍ അഞ്ചുശതമാനം മുതല്‍ എട്ടുശതമാനം വരെയാണ് വില വര്‍ധന ഉണ്ടായിരിക്കുന്നത്. ഒക്ടോബര്‍ ഒന്നുമുതല്‍ എസി വിലയില്‍ അഞ്ചുമുതല്‍ ഏഴു ശതമാനം വരെ വര്‍ധന വരുത്തിയതായി എല്‍ജി ഇലക്ട്രോണിക്‌സ് സ്ഥിരീകരിച്ചിട്ടുണ്ട്.
ടിവി വാങ്ങുന്നവര്‍ക്കും ഉയര്‍ന്ന വില നല്‍കേണ്ടി വരും. എല്‍ഇഡി ടിവികള്‍ക്ക് മൂന്നുമുതല്‍ നാലുശതമാനം വരെ വില വര്‍ധനയാണ് ചില കമ്പനികള്‍ ലക്ഷ്യമിടുന്നത്. ഫ്രിഡ്ജുകളുടെയും വാഷിങ് മെഷീനുകളുടെ വിലയില്‍ മൂന്ന് മുതല്‍ നാലുശതമാനം വരെ കൂട്ടാന്‍ ചില നിര്‍മ്മാതാക്കള്‍ തയ്യാറെടുക്കുന്നതായും റിപ്പോര്‍ട്ടുകള്‍ വ്യക്തമാക്കുന്നു.
വില കൂടാന്‍ കാരണം?
ചെമ്പ്, അലുമിനിയം, സ്റ്റീല്‍, പ്ലാസ്റ്റിക്, ക്രൂഡ് ഒായില്‍ ഉല്‍പ്പന്നങ്ങള്‍ തുടങ്ങിയ പ്രധാന അസംസ്‌കൃത വസ്തുക്കളുടെ വിലയില്‍ ഉണ്ടായ വര്‍ധനയാണ് ഇലക്ട്രോണിക്‌സ് ഉല്‍പ്പന്നങ്ങളുടെ വില വര്‍ധിപ്പിക്കാന്‍ കമ്പനികളെ പ്രേരിപ്പിക്കുന്നതെന്നും റിപ്പോര്‍ട്ടുകള്‍ ചൂണ്ടിക്കാണിക്കുന്നു. കൂടാതെ ഗതാഗത, ലോജിസ്റ്റിക്‌സ് ചെലവുകളും വര്‍ധിച്ചിട്ടുണ്ട്. ഇതിന് പുറമേ വിദേശ നാണയ വിനിമയത്തിലെ വ്യതിയാനങ്ങള്‍ ഇറക്കുമതി ചെയ്യുന്ന ഘടകങ്ങളുടെയും അസംസ്‌കൃത വസ്തുക്കളുടെയും ചെലവ് വര്‍ധിപ്പിച്ചിട്ടുണ്ട്. പശ്ചിമേഷ്യയിലെ നിലവിലെ ഭൗമരാഷ്ട്രീയ സാഹചര്യമാണ് അസംസ്‌കൃത വസ്തുക്കളുടെ വില വര്‍ധിക്കാന്‍ പ്രധാന കാരണമെന്നും റിപ്പോര്‍ട്ട് ചൂണ്ടിക്കാണിക്കുന്നു.
by Midhun HP News | Oct 1, 2026 | Latest News, ദേശീയ വാർത്ത
നഗോയ: ഏഷ്യന്‍ ഗെയിംസ് ക്രിക്കറ്റില്‍ ശ്രീലങ്കക്കെതിരെ വമ്പന്‍ ജയവുമായി ഇന്ത്യ ഫൈനലില്‍ പ്രവേശിച്ചു. 170 റണ്‍സിന്റെ വിജയലക്ഷ്യം പിന്തുടര്‍ന്ന ലങ്ക, കേവലം 45 റണ്‍സിന് ഓള്‍ഔട്ടായി. 15 റണ്‍സ് നേടിയ നുവനിദു ഫെര്‍നാണ്ടോ ആണ് രണ്ടക്കം കടന്ന ഏക ലങ്കന്‍ ബാറ്റര്‍. 124 റണ്‍സിനാണ് ഇന്ത്യ വമ്പൻ ജയം സ്വന്തമാക്കിയത്. സ്‌കോര്‍: ഇന്ത്യ -20 ഓവറില്‍ ഏഴിന് 169, ശ്രീലങ്ക -9.5 ഓവറില്‍ 45ന് പുറത്ത്. ഒന്നാം സെമിയില്‍ ബംഗ്ലാദേശിനെ തോല്‍പ്പിച്ച പാകിസ്ഥാനാണ് സ്വർണ മെഡലിനായുള്ള ഫൈനലില്‍ ഇന്ത്യയുടെ എതിരാളികള്‍. കഴിഞ്ഞ വര്‍ഷം നടന്ന ഏഷ്യാകപ്പ് ഫൈനലിലും ഇന്ത്യ-പാക് പോരാട്ടമായിരുന്നു എന്നത് ശ്രദ്ധേയമാണ്. ശനിയാഴ്ചയാണ് കലാശപ്പോരാട്ടം.
മറുപടി ബാറ്റിങ്ങിനിറങ്ങിയ ശ്രീലങ്കയ്ക്ക് തുടക്കം മുതല്‍ തകര്‍ച്ചയായിരുന്നു. ജസ്പ്രീത് ബുംറയെറിഞ്ഞ ആദ്യ ഓവറില്‍, സ്‌കോര്‍ ബോര്‍ഡില്‍ റണ്ണെത്തും മുന്‍പ് രണ്ട് വിക്കറ്റുകള്‍ വീണു. സിനത് ജയവര്‍ദന, സോഹന്‍ ഡിലവര എന്നിവരാണ് ആദ്യ ഓവറില്‍ സംപൂജ്യരായി മടങ്ങിയത്. തൊട്ടടുത്ത ഓവറില്‍, പന്ത് ഫെയ്‌സ് ചെയ്യുംമുന്‍പ് ലസിത് ക്രൂസ്പുലെ (പൂജ്യം) റണ്ണൗട്ടായതോടെ മുന്‍നിരയുടെ പതനം സമ്പൂര്‍ണമായി.
സ്‌കോര്‍ 18ല്‍ നില്‍ക്കെ ക്യാപ്റ്റന്‍ സഹന്‍ അരച്ചിഗെ (9) വൈഭവ് സൂര്യവംശിക്ക് ക്യാച്ച് സമ്മാനിച്ച് മടങ്ങി. ഇതേ സ്‌കോറില്‍ അശേന്‍ ബന്ദാരയും പൂജ്യനായി മടങ്ങി. രണ്ടക്കം പിന്നിട്ട ഏക ബാറ്ററായ നുവനിദു ഫെര്‍നാണ്ടോ (15) റണ്ണൗട്ടായി. പിന്നീടെത്തിയ ഒരാള്‍ക്കു പോലും ഇന്ത്യന്‍ ബൗളര്‍ക്കു മുന്നില്‍ പിടിച്ചു നില്‍ക്കാനായില്ല. പത്താം ഓവര്‍ എറിയാനെത്തിയ അഭിഷേക് ശര്‍മ, അഞ്ച് പന്തുകള്‍ എറിയുന്നതിനിടെ അവസാന രണ്ട് വിക്കറ്റുകളും വീഴ്ത്തി ലങ്കന്‍ ഇന്നിങ്‌സിന് തിരശ്ശീലയിട്ടു.
by Midhun HP News | Oct 1, 2026 | Latest News, ദേശീയ വാർത്ത
ഡല്‍ഹി: ദുബായ്-ടെല്‍ അവീവ് ഫ്‌ളൈദുബായ് വിമാനം തകര്‍ക്കാന്‍ ശ്രമിച്ച സഹപൈലറ്റിനെ ചെറുത്തുതോല്‍പ്പിച്ച് യാത്രക്കാരുടെ ജീവന്‍ രക്ഷിച്ച ഇന്ത്യന്‍ പൈലറ്റ് ക്യാപ്റ്റന്‍ സ്മിത് മച്ചാറിന്റെ ധീരതയെ പ്രശംസിച്ച് പ്രധാനമന്ത്രി നരേന്ദ്ര മോദി. ക്യാപ്റ്റന്‍ സ്മിത് മച്ചാര്‍ ‘ഹീറോ’ ആണെന്ന് വിശേഷിപ്പിച്ച പ്രധാനമന്ത്രി, അദ്ദേഹത്തിന്റെ പ്രവൃത്തിയില്‍ രാജ്യം അഭിമാനിക്കുന്നുവെന്ന് എക്‌സില്‍ കുറിച്ചു.
‘ഏറ്റവും ഗുരുതരമായ അപകടസാഹചര്യത്തിലും, ഗുരുതര പരിക്കേറ്റിട്ടും അദ്ദേഹം അസാമാന്യ ധൈര്യവും മറ്റുള്ളവരുടെ ജീവന്‍ രക്ഷിക്കാനുള്ള ഉറച്ച നിശ്ചയദാര്‍ഢ്യവും പ്രകടിപ്പിച്ചു. അദ്ദേഹത്തിന്റെ ഈ ധീരത നൂറുകണക്കിന് ജീവനുകള്‍ രക്ഷിക്കാനും വലിയ ദുരന്തം ഒഴിവാക്കാനും സഹായിച്ചു. ക്യാപ്റ്റന്‍ മച്ചാറിന്റെ പ്രവൃത്തിയില്‍ ഇന്ത്യ അഭിമാനിക്കുന്നു. അദ്ദേഹം പരിക്കില്‍ നിന്ന് അതിവേഗം മുക്തനാകട്ടെയെന്ന് പ്രാര്‍ഥിക്കുന്നു’ -പ്രധാനമന്ത്രി കുറിച്ചു.
വിമാനം അപകടത്തിലാക്കാന്‍ ശ്രമിച്ച സഹപൈലറ്റിന്റെ ആക്രമണത്തില്‍ ക്യാപ്റ്റന്‍ സ്മിത് മച്ചാറിന് ഗുരുതര പരിക്കേറ്റിരുന്നു. എന്നാല്‍, പരിക്കുകള്‍ വകവെക്കാതെ കോക്പിറ്റില്‍ വെച്ച് സഹപൈലറ്റിനെ ചെറുത്തുതോല്‍പ്പിക്കാന്‍ അദ്ദേഹത്തിന് സാധിച്ചു. കോക്പിറ്റിന്റെ വാതില്‍ തുറന്ന നല്‍കിയതോടെ, യാത്രക്കാരെത്തി അക്രമിയെ കീഴടക്കുകയായിരുന്നു. നിലവില്‍ സൗദി അറേബ്യയില്‍ ചികിത്സയില്‍ കഴിയുന്ന മച്ചാറിന്റെ ആരോഗ്യനില തൃപ്തികരമാണെന്ന് അധികൃതര്‍ അറിയിച്ചു.
കഴിഞ്ഞ ദിവസം ഒമാന്‍ സ്വദേശിയായ സഹപൈലറ്റ് വിമാനത്തിന്റെ നിയന്ത്രണം ഏറ്റെടുത്ത് തകര്‍ക്കാന്‍ ശ്രമിച്ചപ്പോള്‍ ക്യാപ്റ്റന്‍ സ്മിത് മച്ചാര്‍ തടയുകയായിരുന്നു. സഹപൈലറ്റ് പൈലറ്റിനെ കുത്തുകയായിരുന്നു. സംഘര്‍ഷത്തിന്റെ കാരണം വ്യക്തമല്ല. പിന്നാലെ വിമാനം സൗദി അറേബ്യയിലെ തബൂക്കില്‍ അടിയന്തരമായി ഇറക്കി. വിമാനത്തിലുണ്ടായിരുന്ന 180 ഇസ്രയേല്‍ യാത്രക്കാരും സുരക്ഷിതരാണ്.
ഇന്ത്യന്‍ പൗരനായ സ്മിത് മച്ചാറിന് വാണിജ്യ വിമാനങ്ങള്‍ പറത്തുന്നതില്‍ 13 വര്‍ഷത്തിലേറെ പരിചയസമ്പത്തുണ്ട്. മുന്‍പ് സ്പൈസ് ജെറ്റില്‍ 10 വര്‍ഷത്തോളം സീനിയര്‍ കമാന്‍ഡറായും ലൈന്‍ ട്രെയിനിങ് ക്യാപ്റ്റനായും സേവനമനുഷ്ഠിച്ച അദ്ദേഹം 2022 ജൂണിലാണ് ഫ്ളൈദുബായില്‍ ചേര്‍ന്നത്. ബോയിങ് 737 വിമാനങ്ങളില്‍ 9,750 മണിക്കൂറിലധികം വിമാന ഓപ്പറേഷന്‍ പരിചയം അദ്ദേഹത്തിനുണ്ട്.
Recent Comments