by Midhun HP News | Oct 1, 2026 | Latest News, ദേശീയ വാർത്ത
ഡല്‍ഹി: ദുബൈയില്‍നിന്ന് ഇസ്രയേലിലെ ടെല്‍ അവീവിലേക്ക് പറന്ന ഫ്‌ലൈ ദുബൈ യാത്രാ വിമാനത്തില്‍ അപകടം ഒഴിവാക്കിയത് ഇന്ത്യന്‍ വംശജനായ പൈലറ്റിന്റെ ഇടപെടല്‍. വിമാനം സഹപൈലറ്റ് വിമാനം തകര്‍ക്കാന്‍ ശ്രമിച്ചപ്പോള്‍ തടഞ്ഞ് അപകടം ഒഴിവാക്കിയത് ഇന്ത്യക്കാരനായ സ്മിത് മച്ചാറാണെന്നാണ് റിപ്പോര്‍ട്ടുകള്‍.
ഒമാന്‍ സ്വദേശിയായ സഹപൈലറ്റ് വിമാനത്തിന്റെ നിയന്ത്രണം ഏറ്റെടുത്ത് തകര്‍ക്കാന്‍ ശ്രമിച്ചപ്പോള്‍ ഇന്ത്യന്‍ വംശജനായ പൈലറ്റ് തടഞ്ഞതായി ഇസ്രയേലിലെ ചാനല്‍ 12 റിപ്പോര്‍ട്ട് ചെയ്തു.ഫ്‌ലൈ ദുബായുടെ ബോയിങ് 737 വിമാനത്തിലാണ് സംഭവം നടന്നത്. സഹപൈലറ്റ് പൈലറ്റിനെ കുത്തുകയായിരുന്നു എന്നാണ് റിപ്പോര്‍ട്ടുകള്‍. സംഘര്‍ഷത്തിന്റെ കാരണം വ്യക്തമല്ല. വിമാനം സൗദി അറേബ്യയിലെ തബൂക്കില്‍ അടിയന്തരമായി ഇറക്കി. വിമാനത്തിലുണ്ടായിരുന്ന 180ഓളം ഇസ്രയേല്‍ യാത്രക്കാരും സുരക്ഷിതരാണ്. യാത്രക്കാര്‍ ഇസ്രയേലില്‍ തിരിച്ചെത്തിയ ശേഷം സുരക്ഷാ ഏജന്‍സികള്‍ വിവരങ്ങള്‍ ശേഖരിക്കും.
സംഭവത്തില്‍ സ്മിത് മച്ചാറെയും സഹപൈലറ്റിനെയും ആശുപത്രിയിലേക്ക് മാറ്റുകയും ചെയ്തു. അദ്ദേഹത്തിന്റെ ആരോഗ്യനിലയെക്കുറിച്ചുള്ള വിവരങ്ങള്‍ ഉടന്‍ ലഭ്യമായിട്ടില്ല. ലിങ്ക്ഡ്ഇന്‍ പ്രൊഫൈല്‍ പ്രകാരം 2022 ജൂണ്‍ മുതല്‍ ഫ്‌ലൈ ദുബൈയുടെ ബോയിങ് 737 വിഭാഗത്തില്‍ ക്യാപ്റ്റനായി സേവനമനുഷ്ഠിച്ചു വരികയാണ് സ്മിത് മച്ചാര്‍. അതിനുമുമ്പ് മുംബൈയിലെ സ്‌പൈസ് ജെറ്റില്‍ 11 വര്‍ഷം അദ്ദേഹം പ്രവര്‍ത്തിച്ചിട്ടുണ്ട്. അവിടെ സീനിയര്‍ കമാന്‍ഡറായും 2020 നവംബര്‍ മുതല്‍ മറ്റ് പൈലറ്റുമാരുടെ പരിശീലകനായും ലൈന്‍ ട്രെയിനിങ് ക്യാപ്റ്റനായും അദ്ദേഹം പ്രവര്‍ത്തിച്ചിട്ടുണ്ട്. ബോയിങ് 737-800, 737 മാക്‌സ് 8, 9 എന്നീ വിമാനങ്ങളില്‍ 9,750 മണിക്കൂര്‍ വിമാനം പറത്തിയിട്ടുണ്ട്.
by Midhun HP News | Sep 30, 2026 | Latest News, ദേശീയ വാർത്ത
ടെല്‍ അവീവ്: ദുബായില്‍ നിന്ന് ഇസ്രയേല്‍ തലസ്ഥാനമായ ടെല്‍ അവീവിലേക്ക് 174 യാത്രക്കാരുമായി പറന്ന ഫ്‌ളൈ ദുബായ് വിമാനം അടിയന്തര സാഹചര്യത്തെ തുടര്‍ന്ന് സൗദി അറേബ്യയിലെ തബൂക്ക് വിമാനത്താവളത്തില്‍ ഇറക്കിയതിനു പിന്നില്‍ നാടകീയ സംഭവങ്ങള്‍. എമര്‍ജന്‍സി സിഗ്നല്‍ നല്‍കിയതിനു പിന്നാലെ സൗദി അറേബ്യക്ക് മുകളില്‍ വെച്ച് വിമാനം തിരികേ പറന്നു. ഇതോടെ വിമാനം റാഞ്ചിയതാണോ എന്ന സംശയം ഉയര്‍ന്നു.
34,000 അടി ഉയരത്തില്‍ പറന്നിരുന്ന വിമാനം രണ്ട് മിനുട്ടിനുള്ളില്‍ 16,600 അടിയിലേക്ക് പതിക്കുകയും ചെയ്തതോടെ ആശങ്കയായി. വിമാനം ആദ്യം അന്താരാഷ്ട്ര അടിയന്തര കോഡായ 7700 സിഗ്നല്‍ നല്‍കിയിരുന്നു. പിന്നാലെയാണ് 7500 എന്ന് കോഡ് നല്‍കിയത്. അനധികൃത ഇടപെടലോ ഹൈജാക്കിങ്ങോ അടക്കമുള്ള സാഹചര്യം സൂചിപ്പിക്കുന്ന കോഡാണിത്.
ഇതോടെ ഇസ്രയേല്‍ യുദ്ധവിമാനങ്ങള്‍ ഫ്‌ളൈ ദുബായ് വിമാനത്തിനു സമീപത്തേക്ക് കുതിച്ചെത്തിയെന്നും ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹുവും പ്രതിരോധ മന്ത്രി ഇസ്രയേല്‍ കാറ്റ്‌സും അടിയന്തര കൂടിയാലോചനകള്‍ നടത്തി എന്നും ഇസ്രയേല്‍ മാധ്യമങ്ങള്‍ റിപ്പോര്‍ട്ട് ചെയ്തു.
എന്നാല്‍ വിമാനത്തിന്റെ കോക്ക്പിറ്റില്‍ പൈലറ്റുമാര്‍ തമ്മില്‍ ഉണ്ടായ തര്‍ക്കത്തെ തുടര്‍ന്നാണ് അടിയന്തര സന്ദേശം നല്‍കിയതെന്നും ഹൈജാക്ക് അല്ലെന്നും പിന്നീട് കണ്ടെത്തി. പിന്നാലെയാണ് വിമാനം സൗദി അറേബ്യയില്‍ സുരക്ഷിതമായി ലാന്‍ഡ് ചെയ്തത്.
by Midhun HP News | Sep 30, 2026 | Latest News, ദേശീയ വാർത്ത
മംഗളൂരു: മംഗളൂരു റിഫൈനറി ആന്‍ഡ് പെട്രോകെമിക്കല്‍സ് ലിമിറ്റഡിന്റെ (MRPL) ഹൈഡ്രോ സള്‍ഫര്‍ ട്രീറ്റ്മെന്റ് യൂണിറ്റില്‍ സ്‌ഫോടനം. ഇതേത്തുടര്‍ന്നുണ്ടായ തീപിടിത്തത്തില്‍ എട്ടുപേര്‍ക്ക് പരിക്കേറ്റു. ഇതില്‍ രണ്ടു പേരുടെ നില ഗുരുതരമാണെന്നാണ് റിപ്പോര്‍ട്ടുകള്‍.
ഉച്ചയോടെയാണ് റിഫൈനറിയില്‍ പൊട്ടിത്തെറിയുണ്ടായത്. ബോയിലര്‍ പൊട്ടിത്തെറിച്ചാണ് അപകടമുണ്ടായതെന്നാണ് പ്രാഥമിക വിവരം. സ്‌ഫോടനത്തിന്റെ ശബ്ദം കിലോമീറ്ററുകളോളം നീണ്ടു. സ്‌ഫോടനത്തെത്തുടര്‍ന്ന് വീടുകള്‍ കുലുങ്ങുകയും വാതിലുകളും ജനലുകളും വിറച്ചതായും ജോക്കാട്ടെ, സൂറത്കല്‍ എന്നിവിടങ്ങളിലെ താമസക്കാര്‍ പറഞ്ഞു.
റിഫൈനറി പരിസരത്ത് നിന്ന് കറുത്ത പുക ഉയരുകയും ചെയ്തിരുന്നു. തീപിടിത്തം നിയന്ത്രണവിധേയമായതായി സിറ്റി പൊലീസ് കമ്മീഷണര്‍ സുധീര്‍ കുമാര്‍ റെഡ്ഡി അറിയിച്ചു. ആശങ്കപ്പെടേണ്ട സാഹചര്യമില്ലെന്നും ആവശ്യമായ മുന്‍കരുതല്‍ നടപടികള്‍ സ്വീകരിക്കുന്നുണ്ടെന്നും പൊലീസ് വ്യക്തമാക്കി. സ്‌ഫോടനത്തെത്തുടര്‍ന്ന് എംആര്‍പിഎല്‍ ഡിപിഎസ് സ്‌കൂളിന് അവധി പ്രഖ്യാപിച്ചു.
by Midhun HP News | Sep 30, 2026 | Latest News, ദേശീയ വാർത്ത
നഗോയ: ഏഷ്യൻ ഗെയിംസിന്റെ 11 -ാം ദിവസം തകർപ്പൻ മെഡൽവേട്ടയുമായി ഇന്ത്യ. അമ്പെയ്ത്തിൽ ഇന്ത്യ ഹാട്രിക് സ്വർണം നേടി. അമ്പെയ്ത്തിൽ കോംപൗണ്ട് ഇനത്തിൽ മൂന്നു വിഭാഗത്തിലും ഇന്ത്യ സ്വർണം തൂത്തുവാരി. പുരുഷ വിഭാഗം ഫൈനലിൽ ചൈനയെയാണ് ഇന്ത്യ തകർത്തത്. സഹിൽ രാജേഷ് യാദവ്- തിരുമുരു ഗണേഷ് മണിരത്നം- കുശാൽ ദലാൽ സഖ്യമാണ് ഇന്ത്യയ്ക്കായി സ്വർണം എയ്തിട്ടത്.
പിന്നിൽ നിന്ന ശേഷമാണ് ഇന്ത്യ ഫൈനലിൽ ശക്തമായ തിരിച്ചു വരവ് നടത്തിയത്. ഒരു പോയിന്റ് വ്യത്യാസത്തിലാണ് ഇന്ത്യ വിജയിച്ചത്. ഇതോടെ ഇന്ത്യയുടെ സ്വർണ മെഡൽ നേട്ടം പത്തായി. മെഡൽ പട്ടികയിൽ ഇന്ത്യ ഏഴാം സ്ഥാനത്തേക്ക് ഉയർന്നു. ഇന്നു നടന്ന അമ്പെയ്ത്ത് മത്സരങ്ങളിൽ വനിതകളുടെ കോംപൗണ്ട് ഇനത്തിലും, മിക്സഡ് ടീം ഇനത്തിലും ഇന്ത്യ സ്വർണം നേടിയിരുന്നു.
കൂടാതെ, ഏഷ്യൻ ഗെയിംസിലെ ട്രാപ്പ് ഷൂട്ടിങ് മിക്സഡ് ടീം ഇനത്തിൽ ഇന്ത്യ സ്വർണം നേടി. നീരു ദണ്ഡ – കൈനാൻ ചെനായി സഖ്യമാണ് ഇന്ത്യയ്ക്കായി സ്വർണം നേടിയത്. ആവേശകരമായ ഫൈനൽ മത്സരത്തിൽ ഖത്തറിനെ ഒരു പോയിന്റിന് മറികടന്നാണ് ഒന്നാം സ്ഥാനം കരസ്ഥമാക്കിയത്. 34 പോയിന്റുകൾ നേടി ഏഷ്യൻ റെക്കോർഡ് തകർത്താണ് ഇന്ത്യയുടെ ഈ നേട്ടം.
വ്യക്തിഗത ഇനത്തിൽ സ്വർണം നേടിയ നീരു ദണ്ഡയ്ക്ക് രണ്ട് ദിവസത്തിനിടെ ലഭിക്കുന്ന രണ്ടാമത്തെ സ്വർണ മെഡലാണിത്. ഫൈനലിൽ തകർപ്പൻ തിരിച്ചുവരവിലൂടെയായിരുന്നു ഇന്ത്യ സുവർണ നേട്ടം കൈവരിച്ചത്. തുടക്കത്തിലെ തിരിച്ചടികൾക്ക് ശേഷം നിർണായക നിമിഷങ്ങളിൽ എല്ലാ ഷോട്ടുകളും കൃത്യമായി ലക്ഷ്യത്തിലെത്തിച്ചാണ് ഇന്ത്യൻ ജോഡി സ്വർണം വെടിവെച്ചിട്ടത്.
by Midhun HP News | Sep 30, 2026 | Latest News, ദേശീയ വാർത്ത
തിരുവനന്തപുരം: കേന്ദ്ര ആഭ്യന്തരമന്ത്രി അമിത്ഷായുടെ കേരളസന്ദര്‍ശനത്തിനിടെയുണ്ടായ പ്രതിഷേധങ്ങളെച്ചൊല്ലി കോണ്‍ഗ്രസും ബിജെപിയും തമ്മിലുണ്ടായ പോര് തെരുവിലേക്ക്. തിരുവനന്തപുരം ജില്ലയിലെ കോണ്‍ഗ്രസ് ഓഫീസുകള്‍ക്ക് നേരെ കഴിഞ്ഞ ദിവസം രാത്രി ആക്രമണം ഉണ്ടായി. ഡിസിസി ഓഫീസിന്റെ ചില്ലുകള്‍ കല്ലേറില്‍ തകര്‍ന്നു. ആനാവൂര്‍ മണ്ഡലം കമ്മിറ്റി ഓഫീസിന് തീയിട്ടു. ഇതിന്റെ സിസിടിവി ദൃശ്യങ്ങള്‍ പുറത്തുവന്നിട്ടുണ്ട്. ആക്രമണത്തിന് പിന്നില്‍ ബിജെപിയും ആര്‍എസ്എസും ആണെന്ന് കോണ്‍ഗ്രസ് നേതാക്കള്‍ ആരോപിച്ചു.
ശനിയാഴ്ച കൊല്ലത്ത് മാതാ അമൃതാനന്ദമയി ദേവിയുടെ ജന്മദിനാഘോഷത്തില്‍ പങ്കെടുക്കാന്‍ എത്തിയ അമിത് ഷായെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി കാട്ടി പ്രതിഷേധിച്ചിരുന്നു. തുടര്‍ന്ന് യുവമോര്‍ച്ച മുഖ്യമന്ത്രിക്കും മന്ത്രിമാര്‍ക്കും എതിരെ പ്രതിഷേധം നടത്തി.
ഇന്നലെ ബാലരാമപുരത്ത് മന്ത്രി ഒജെ ജനീഷിനെതിരായ കരിങ്കൊടി പ്രതിഷേധവുമായി ബന്ധപ്പെട്ട് യൂത്ത് കോണ്‍ഗ്രസിന്റെയും ബിജെപിയുടെയും പ്രവര്‍ത്തകര്‍ ഏറ്റുമുട്ടുകയും ചെയ്തു. ഇതില്‍ തിരുവനന്തപുരം സൗത്ത് ജില്ലാ പ്രസിഡന്റ് മുക്കംപാലമൂട് ബിജുവിന് പരിക്കേറ്റിരുന്നു. ഇതിനു പിന്നാലെയാണ് ഇന്നലെ രാത്രി കോണ്‍ഗ്രസ് ഓഫീസുകള്‍ക്ക് നേരെ ആക്രമണമുണ്ടാകുന്നത്.
ഡിസിസി ഓഫീസിന് നേരെയുണ്ടായ ആക്രമണത്തില്‍ മ്യൂസിയം പൊലീസ് കേസെടുത്ത് അന്വേഷണം ആരംഭിച്ചു. പ്രദേശത്തെ സിസിടിവി ദൃശ്യങ്ങള്‍ പരമാവധി ശേഖരിച്ച് അക്രമികളെ കണ്ടെത്താനുള്ള ശ്രമത്തിലാണ്. ആഭ്യന്തര മന്ത്രി ഡിസിസി ഓഫീസില്‍ നേരിട്ട് എത്തി കാര്യങ്ങള്‍ വിലയിരുത്തി. സംസ്ഥാനത്ത് പാര്‍ട്ടി ഓഫീസുകള്‍ ആരും ആക്രമിക്കാറില്ലെന്നും അക്രമികള്‍ക്കെതിരെ ശക്തമായ നടപടി ഉണ്ടാകുമെന്നും രമേശ് ചെന്നിത്തല പറഞ്ഞു.
അക്രമികളെ കയറൂരി വിടുകയാണ് ബിജെപി നേതൃത്വമെന്നും ഇതില്‍ പ്രതിഷേധിച്ച് ജില്ലയില്‍ കോണ്‍ഗ്രസ് മാര്‍ച്ചുകള്‍ നടത്തുമെന്നും ഡിസിസി ഓഫീസ് സന്ദര്‍ശിച്ച ശേഷം കെപിസിസി പ്രസിഡന്റ് സണ്ണി ജോസഫും പറഞ്ഞു.
by Midhun HP News | Sep 30, 2026 | Latest News, ദേശീയ വാർത്ത
ഡല്‍ഹി: ബാങ്കുകളുടെ പ്രവൃത്തി ദിവസം അഞ്ചാക്കി കുറക്കണമെന്ന ആവശ്യം പരിശോധിക്കാന്‍ ഉന്നതതല സമിതി രൂപീകരിച്ചു. മാനേജ്‌മെന്റിന്റെ ഭാഗത്തു നിന്ന് അഞ്ച് പേരും സംഘടനകളെ പ്രതിനിധീകരിച്ച് 7 പേരുമാണ് സമിതിയില്‍ ഉള്ളത്.
എന്നാല്‍, ആഴ്ചയില്‍ അഞ്ച് ദിവസം മാത്രം ബാങ്കുകള്‍ പ്രവര്‍ത്തിച്ചാല്‍ മതി എന്ന തീരുമാനത്തോട് സര്‍ക്കാരിന് അനുകൂല നിലപാട് അല്ല ഉള്ളത്. നേരത്തെ ബാങ്ക് മാനേജ്‌മെന്റും യൂണിയനും തമ്മിലുണ്ടാക്കിയ ഉഭയകക്ഷി കരാറില്‍ പ്രവൃത്തിദിനം അഞ്ചായി കുറയ്ക്കാന്‍ തീരുമാനിച്ചിരുന്നു. എന്നാല്‍ സര്ക്കാരിന്റെ അനുമതിയില്ലാതെ ഇതു നടപ്പാക്കാനാവില്ല. അതുകൊണ്ടുതന്നെ ധനമന്ത്രാലയത്തിന്റെ പ്രതിനിധികളില്ലാതെ ഇത്തരമൊരു സമിതി രൂപീകരിച്ചതുകൊണ്ട് കാര്യമില്ലെന്നാണ് വിലയിരുത്തല്‍.
ഉന്നതസമിതി രൂപീകരിക്കുമെന്നുള്ള ഉറപ്പിന്മേലാണ് കഴിഞ്ഞ ദിവസം ബാങ്ക് യൂണിയനുകള്‍ പണിമുടക്കില്‍ നിന്ന് പിന്മാറിയത്. ഇന്ത്യന്‍ ബാങ്ക്‌സ് അസോസിയേഷന്‍ പുറത്തിറക്കിയ ഔദ്യോഗിക പ്രസ്താവന പ്രകാരം, ബാങ്ക് ഓഫ് ഇന്ത്യയുടെ എംഡിയും സിഇഒയുമായ രജനീഷ് കര്‍ണാടകാണ് ഉന്നതലസമിതിയുടെ ചെയര്‍മാന്‍.
സര്ക്കാരിന്റെ അനുമതി ലഭിച്ചാല്‍ ബാങ്കുകള്‍ക്ക് എല്ലാ ശനിയാഴ്ചയും അവധിയായിരിക്കും.
Recent Comments