by Midhun HP News | Sep 24, 2026 | Latest News, ദേശീയ വാർത്ത
ഡൽഹി: ബാങ്ക് ജീവനക്കാരുടെ സംഘടനകൾ പ്രഖ്യാപിച്ച രാജ്യവ്യാപക പണിമുടക്കിന് മുന്നോടിയായി ബാങ്കിങ് സേവനങ്ങളിൽ നേരിടുന്ന തടസ്സം കുറയ്ക്കുന്നതിന് വേണ്ടി 27 ഞായറാഴ്ച എല്ലാ പൊതുമേഖലാ ബാങ്കുകളും റീജിയണൽ റൂറൽ ബാങ്കുകളും സാധാരണ പോലെ തുറന്നു പ്രവർത്തിക്കുമെന്ന് കേന്ദ്ര ധനമന്ത്രാലയം. സെപ്റ്റംബർ 28 മുതൽ 30 വരെയാണ് രാജ്യവ്യാപക പണിമുടക്കിന് ആഹ്വാനം ചെയ്തിരിക്കുന്നത്.
സെപ്റ്റംബർ 26 ശനിയാഴ്ച, 27 ഞായർ എന്നീ അവധി ദിവസങ്ങൾക്ക് തൊട്ടുപിന്നാലെയാണ് യുണൈറ്റഡ് ഫോറം ഓഫ് ബാങ്ക് യൂണിയൻസ് മൂന്ന് ദിവസത്തെ പണിമുടക്ക് പ്രഖ്യാപിച്ചിരിക്കുന്നത്. ഇത് ജനങ്ങൾക്ക് തുടർച്ചയായ ദിവസങ്ങളിൽ ബാങ്കിങ് സേവനങ്ങൾ തടസ്സപ്പെടുന്നതിനിടയാക്കുമെന്ന് ചൂണ്ടിക്കാട്ടിയാണ് ധനമന്ത്രാലയം ഞായറാഴ്ച തുറന്ന് പ്രവ‍ര്‍ത്തിക്കാൻ തീരുമാനിച്ചത്. തിങ്കളാഴ്ച പണിമുടക്ക് ആരംഭിക്കുന്നതിന് മുൻപായി ഉപഭോക്താക്കൾക്ക് അത്യാവശ്യ ബാങ്കിങ് സേവനങ്ങൾ ലഭ്യമാക്കുകയാണ് ഈ തീരുമാനത്തിന്റെ ലക്ഷ്യം.
by Midhun HP News | Sep 23, 2026 | Latest News, ദേശീയ വാർത്ത
ഷാര്‍ജ: കര്‍ണാടകയിലെ ഉഡുപ്പി സ്വദേശിയെ യുഎഇയിലെ ഷാര്‍ജയില്‍ കൊല്ലപ്പെട്ട നിലയില്‍ കണ്ടെത്തി. ഒമ്പതു കഷണങ്ങളായി മുറിച്ച നിലയില്‍, പാര്‍ക്ക് ചെയ്ത കാറിലാണ് മൃതദേഹം കണ്ടെത്തിയത്. രണ്ടു ബാഗുകളിലാക്കിയ നിലയിലായിരുന്നു മൃതദേഹങ്ങള്‍. ഉഡുപ്പി സ്വദേശി ആല്‍വിന്‍ പ്രകാശ് കുന്ദര്‍ ആണ് കൊല്ലപ്പെട്ടത്. ഒമാനിലേക്കുള്ള വഴിയിലാണ് കാര്‍ കിടന്നത്. ഇയാളുടെ ഭാര്യയെയും കൗമാരക്കാരനായ മകനെയും കുറിച്ച് യാതൊരു വിവരവുമില്ല.
കഴിഞ്ഞ ജൂലൈയില്‍ നടന്ന കൊലപാതകത്തിന്റെ വിവരങ്ങളാണ് പുറത്തു വന്നിരിക്കുന്നത്. കഴിഞ്ഞ 14 വര്‍ഷമായി ഷാര്‍ജ വിമാനത്താവളത്തില്‍ ജോലിക്കാരനാണ് പ്രകാശ്. സ്‌കൂള്‍ ടീച്ചറായ ഭാര്യ ടിന, പത്താം ക്ലാസ്സില്‍ പഠിക്കുന്ന മകന്‍ എന്നിവര്‍ക്കൊപ്പം യുഎഇയിലാണ് താമസിച്ചിരുന്നത്. ആല്‍വിന്‍ പ്രകാശ് മരിച്ചതിനു പിന്നാലെ, ഭാര്യയെയും മകനെയും കാണാതായി.
ആല്‍വിന്‍ പ്രകാശുമായി ഫോണില്‍ ബന്ധപ്പെടാന്‍ സാധിക്കാത്തതിനെത്തുടര്‍ന്ന് സഹോദരന്‍ അനില്‍ നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിയുന്നത്. സുഖമാണ് എന്നറിയിച്ച് കഴിഞ്ഞ ജൂലൈ 20 ന് അനിലിന് ആല്‍വിന്‍ പ്രകാശിന്റെ സന്ദേശം ലഭിക്കുന്നു. സാധാരണ വോയ്‌സ് മെസ്സേജാണ് ആല്‍വിന്‍ അയക്കാറുള്ളത്. പകരം എസ്എംഎസ് വന്നതിനെത്തുടര്‍ന്ന് അനിലിന് സംശയം തോന്നി.
അനില്‍ തിരികെ വിളിച്ചെങ്കിലും ആല്‍വിന്‍ പ്രകാശിനെ ഫോണില്‍ ലഭിച്ചില്ല. തുടര്‍ന്ന് ആല്‍വിന്റെ ഷാര്‍ജയിലുള്ള സുഹൃത്ത് മനോഹറിനെ വിളിച്ച് അന്വേഷിക്കാന്‍ ആവശ്യപ്പെട്ടു. ഫ്‌ലാറ്റില്‍ ചെന്നപ്പോള്‍ ആല്‍വിന്‍ ഇന്ത്യയിലേക്ക് പോയതായി സെക്യൂരിറ്റി മനോഹറിനെ അറിയിച്ചു. ആല്‍വിന്റെ കമ്പനിയിലെ എച്ച് ആര്‍ ജീവനക്കാരും ആല്‍വിന്‍ ഇന്ത്യയിലേക്ക് പോയെന്നാണ് പറഞ്ഞത്.
എന്നാല്‍ കമ്പനിയെ വിളിച്ച് ആല്‍വിന്‍ ഇന്ത്യയിലെത്തിയിട്ടില്ലെന്ന് അറിയിച്ചു. തുടര്‍ന്ന് പാസ്‌പോര്‍ട്ട് പരിശോധിച്ചപ്പോള്‍ ആല്‍വിന്‍ ഷാര്‍ജ വിട്ടിട്ടില്ലെന്നും കണ്ടെത്തി. തുടര്‍ന്ന് മിസ്സിങ് കേസ് നല്‍കുകയായിരുന്നു. തുടര്‍ന്ന് പൊലീസ് നടത്തിയ അന്വേഷണത്തിലാണ് കഷണങ്ങളായി മുറിച്ച നിലയില്‍ മൃതദേഹങ്ങള്‍ കണ്ടെത്തിയത്. കൊലപാതകത്തിന് പിന്നില്‍ ആരെന്നോ, എന്താണ് കാരണമെന്നോ വ്യക്തമായിട്ടില്ല.
by Midhun HP News | Sep 23, 2026 | Latest News, ദേശീയ വാർത്ത
ഡല്‍ഹി: തെരഞ്ഞെടുപ്പ് കമ്മീഷനില്‍ നിര്‍ണായക വിഷയങ്ങളില്‍ ഭിന്നത നിലനില്‍ക്കുന്നതായുള്ള റിപ്പോര്‍ട്ടില്‍ പ്രതികരണവുമായി കമ്മീഷന് രംഗത്ത്. കഴിഞ്ഞ ഒരു വര്‍ഷത്തിനിടെ എടുത്ത എല്ലാ തീരുമാനങ്ങളും ഏകകണ്ഠമായിരുന്നുവെന്ന് തെരഞ്ഞെടുപ്പ് കമ്മിഷന്‍ വ്യക്തമാക്കി. ഏതൊരു സ്ഥാപനത്തിലെയും ചര്‍ച്ചകളുടെ ഭാഗമായി വ്യത്യസ്ത അഭിപ്രായങ്ങളും നിരീക്ഷണങ്ങളും ഉയരുന്നത് സ്വാഭാവികമാണെന്നും കമ്മീഷന് പറഞ്ഞു.
എസ്‌ഐആറുമായി ബന്ധപ്പെട്ട ചില തീരുമാനങ്ങളില്‍ രണ്ട് തെരഞ്ഞെടുപ്പ് കമ്മിഷണര്‍മാര്‍ തങ്ങളുടെ അറിവില്ലാതെ തീരുമാനങ്ങളെടുത്തതിനെതിരെ രേഖാമൂലം എതിര്‍പ്പ് അറിയിച്ചതായി ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തിരുന്നു. ഇതിലാണ് ഇപ്പോള്‍ കമ്മീഷന് വ്യക്തത വരുത്തിയത്. ചീഫ് ഇലക്ഷന്‍ കമ്മീഷണര്‍ ഗ്യാനേഷ് കുമാര്‍, തെരഞ്ഞെടുപ്പ് കമ്മിഷണര്‍മാരായ സുഖ്ബീര്‍ സിങ് സന്ധു, വിവേക് ജോഷി എന്നിവരാണ് നിലവില്‍ കമ്മിഷനിലെ ഉന്നത മൂന്ന് ഉദ്യോഗസ്ഥര്‍.
‘വ്യത്യസ്ത അഭിപ്രായങ്ങളും നിരീക്ഷണങ്ങളും ഏതൊരു സ്ഥാപനത്തിലെയും ചര്‍ച്ചകളുടെ ഭാഗമാണ്. അന്തിമ തീരുമാനം കൈക്കൊള്ളുന്നതിന് മുമ്പുള്ള പ്രക്രിയയുടെ ഭാഗമാണിത്. മൂന്ന് കമ്മീഷണര്‍മാര്‍ക്ക് മാത്രമല്ല, തെരഞ്ഞെടുപ്പ് സംവിധാനത്തിന്റെ മെച്ചപ്പെടുത്തലിനായി കമ്മീഷന് നിര്‍ദേശങ്ങള്‍ നല്‍കാന്‍, കമ്മീഷനിലെ എല്ലാ ഉദ്യോഗസ്ഥര്‍ക്കും പൂര്‍ണ അധികാരമുണ്ട്’ -തെരഞ്ഞെടുപ്പ് കമ്മീഷന് ഇന്ന് ഉച്ചയ്ക്ക് പുറത്തിറക്കിയ പ്രസ്താവനയില്‍ വ്യക്തമാക്കി.
പത്ത് മാസക്കാലയളവിലുണ്ടായ ചില പ്രത്യേക ആഭ്യന്തര കുറിപ്പുകളും നിരീക്ഷണങ്ങളും മാത്രം ഉയര്‍ത്തിക്കാട്ടി കമ്മിഷന്റെ തീരുമാനങ്ങള്‍, നിര്‍ദേശങ്ങള്‍, പദ്ധതികള്‍ എന്നിവയുടെ വലിയ ഭാഗം അവഗണിച്ച് വിഷയത്തിന്റെ ഒരു വശം മാത്രമാണ് വാര്‍ത്തയില്‍ അവതരിപ്പിച്ചതെന്നും കമ്മീഷന് പറഞ്ഞു.
‘കഴിഞ്ഞ മാസങ്ങളില്‍ കമ്മിഷന്‍ നിരവധി തീരുമാനങ്ങള്‍ കൈക്കൊണ്ടു. നിര്‍ദേശങ്ങള്‍ പുറപ്പെടുവിക്കുകയും 40ഓളം പുതിയ പദ്ധതികള്‍ അവതരിപ്പിക്കുകയും ചെയ്തു. രാജ്യത്തുടനീളം വോട്ടര്‍പട്ടിക പുതുക്കല്‍ (എസ്ഐആര്‍) ഉള്‍പ്പെടെ നിരവധി തിരഞ്ഞെടുപ്പ് പരിഷ്‌കരണങ്ങളും നടപ്പാക്കി. കഴിഞ്ഞ ഒരു വര്‍ഷത്തിനിടെ കമ്മിഷന്റെ മുഴുവന്‍ അംഗങ്ങളും ഏകകണ്ഠമായി എടുത്ത തീരുമാനങ്ങളുടെ ഫലമാണ് ഇവയെല്ലാം’ -ഡെപ്യൂട്ടി ഡയറക്ടര്‍ പി പവന്‍ ഒപ്പുവച്ച പ്രസ്താവനയില്‍ കമ്മീഷന് വ്യക്തമാക്കി.
by Midhun HP News | Sep 22, 2026 | Latest News, ദേശീയ വാർത്ത
കൊല്‍ക്കത്ത: പശ്ചിമബംഗാളിലെ നന്ദിഗ്രാം, റെജിനഗര്‍ എന്നിവിടങ്ങളില്‍ ഒക്ടോബര്‍ 6ന് നടക്കുന്ന ഉപതെരഞ്ഞെടുപ്പുകള്‍ പ്രതിപക്ഷ സ്ഥാനത്തിനായുള്ള പോരാട്ടമായി മാറും. ഉപതെരഞ്ഞെടുപ്പ് പ്രഖ്യാപിച്ചതോടെ നാടകീയ രംഗങ്ങളാണ് ബംഗാളില്‍ അരങ്ങേറുന്നത്. ഭരണകക്ഷിയായ ബിജെപിയെ എതിര്‍ക്കുന്ന എന്നാല്‍ തൃണമൂല്‍ കോണ്‍ഗ്രസിനോട് (ടിഎംസി) ആഭിമുഖ്യമില്ലാത്തവരുടെ വോട്ടുകള്‍ ആരുടെ പെട്ടിയില്‍ വീഴും എന്നാണ് എല്ലാവരും ഉറ്റ് നോക്കുന്നത്.
തൃണമൂല്‍ കോണ്‍ഗ്രസില്‍ രൂപപ്പെട്ട ആഭ്യന്തര കലഹം തെരഞ്ഞെടുപ്പിലും പ്രതിഫലിക്കും. മമതാ ബാനര്‍ജിയുടെയും അരൂപ് റോയിയുടെയും നേതൃത്വത്തിലുള്ള വിഭാഗങ്ങള്‍ തമ്മിലുള്ള പോരാട്ടം നാടകീയ സംഭവങ്ങള്‍ക്കാണ് വഴിവെച്ചെരിക്കുന്നത്.
തൃണമൂല്‍ കോണ്‍ഗ്രസ് സ്ഥാനാര്‍ത്ഥി അപ്രതീക്ഷിതമായി പിന്മാറിയതോടെ മമത, കോണ്‍ഗ്രസ് സ്ഥാനാര്‍ത്ഥി മിലാന്‍ പ്രഥാനെ പിന്തുണച്ചു. മമതയുടെ പിന്തുണയോടെ തൃണമൂലിന്റെ ഭൂരിഭാഗം വോട്ടുകളും സമാഹരിക്കാന്‍ കഴിയുമെന്നാണ് കോണ്‍ഗ്രസ് കണക്ക് കൂട്ടുന്നത്. 1996ല്‍ സിപിഐയെ 138 വോട്ടിന് പരാജയപ്പെടുത്തിയ ചരിത്രം നന്ദിഗ്രാമില്‍ കോണ്‍ഗ്രസ്സിനുണ്ട്. മമതയിലൂടെ ആ ചരിത്രം ആവര്‍ത്തിക്കാനാണ് കോണ്‍ഗ്രസിന്റെ ശ്രമം.
പതിറ്റാണ്ടുകളായി തങ്ങള്‍ക്ക് നഷ്ടപ്പെട്ട പ്രദേശം തിരിച്ചുപിടിക്കാന്‍ കോണ്‍ഗ്രസ് ആഗ്രഹിക്കുമ്പോള്‍ തൃണമൂല്‍ കോണ്‍ഗ്രസ്സിലേക്ക് പോയ വോട്ടര്‍മാരെ തിരികെ കൊണ്ടു വരാന്‍ കഴിയുമെന്നാണ് ഇടതുപക്ഷത്തിന്റെ പ്രതീക്ഷ. പ്രതിപക്ഷം ഭിന്നിച്ചു നില്‍ക്കുന്നത് ബിജെപിക്ക് അനുകൂലമായ സാഹചര്യമാണ് ഒരുക്കുന്നത്.
ന്യൂനപക്ഷങ്ങള്‍ക്ക് ആധിപത്യമുള്ള റെജിനഗറില്‍ തൃണമൂല്‍ കോണ്‍ഗ്രസ്സിന് നേരത്തെ മുന്‍തൂക്കം ഉണ്ടായിരുന്നു. എന്നാല്‍ പിളര്‍പ്പിന് ശേഷം വോട്ടര്‍മാര്‍ ആര്‍ക്കൊപ്പം നില്‍ക്കും എന്നതാണ് എല്ലാവരും ഉറ്റ് നോക്കുന്നത്. നന്ദിഗ്രാമില്‍ ബിജെപിക്ക് അനുകൂലമായ സാഹചര്യമാണ്. ബിജെപിക്ക് വെല്ലുവിളിയായി ഏത് പാര്‍ട്ടി ഉയര്‍ന്നുവരുമെന്നതാണ് ഏറെ ശ്രദ്ധേയമായ കാര്യം. ഒക്ടോബര്‍ 9നാണ് വോട്ടെണ്ണല്‍ നടക്കുന്നത്.
by Midhun HP News | Sep 22, 2026 | Latest News, ദേശീയ വാർത്ത
ന്യൂയോര്‍ക്ക്: യുഎസ് പ്രസിഡന്റ് ഡൊണാള്‍ഡ് ട്രംപും പ്രമുഖ വാര്‍ത്താ മാധ്യമങ്ങളും തമ്മിലുള്ള ഏറ്റുമുട്ടലിനിടയില്‍ പുതിയ ലൈവ് സ്ട്രീമിങ്ങുമായി ട്രംപ് ടിവി രംഗത്തെത്തി. ട്രംപിന്റെ പഴയ കാല പ്രസംഗങ്ങള്‍, ഭരണകൂടത്തിന്റെ പ്രഖ്യാപനങ്ങള്‍, പുതിയ അപ്‌ഡേറ്റുകള്‍ എന്നിവ ഉള്‍പ്പെടുത്തിക്കൊണ്ടാണ് വൈറ്റ് ഹൗസ് ലൈവ് സ്ട്രീമിങ്ങ് ആരംഭിച്ചിരിക്കുന്നത്.
തനിക്കെതിരെ നിരന്തരമായി വ്യാജവാര്‍ത്തകള്‍ നല്‍കുകയാണെന്ന് ആരോപിച്ച് സിഎന്‍എന്‍ , പൊളിറ്റിക്കോ , എംഎസ്‌നൗ എന്നീ മാധ്യമങ്ങള്‍ക്ക് നേരത്തെ ട്രംപ് വൈറ്റ് ഹൗസില്‍ വിലക്ക് ഏര്‍പ്പെടുത്തിയിരുന്നു. വിലക്കിനെതിരെ മൂന്ന് മാധ്യമസ്ഥാപനങ്ങളും ഫെഡറല്‍ കോടതിയില്‍ ഹര്‍ജി നല്‍കി. എന്നാല്‍ മാധ്യമങ്ങള്‍ക്ക് ഏര്‍പ്പെടുത്തിയ നിയന്ത്രണങ്ങളെ ന്യായീകരിച്ചുകൊണ്ട് ട്രംപ് തിങ്കളാഴ്ച്ച രംഗത്ത് എത്തി.
വ്യാജവാര്‍ത്തകള്‍ നല്‍കുന്ന മാധ്യമപ്രവര്‍ത്തകരെ വൈറ്റ് ഹൗസില്‍ നിയന്ത്രിക്കാന്‍ ഭരണകൂടത്തിന് അവകാശമുണ്ടെന്ന് ട്രംപ് വ്യക്തമാക്കി. വിലക്കിനെ തുടര്‍ന്ന് തന്നെ മറ്റുള്ള മാധ്യമങ്ങളും ബഹിഷ്‌ക്കരിച്ചേക്കും എന്നുള്ള വാദങ്ങളും ട്രംപ് തള്ളിക്കളഞ്ഞു. മാധ്യമങ്ങളുമായുള്ള പ്രശ്‌നം രൂക്ഷമാകുന്നതിനിടിയില്‍ ആണ് ലൈവ് സ്ട്രീമിംഗുമായി ‘ട്രംപ് ടിവി’ പ്രവര്‍ത്തനം ആരംഭിച്ചത്.
ലോഞ്ചിനിടയില്‍ അമേരിക്കയുടെ 47ാമത് പ്രസിഡന്റായി ട്രംപ് സത്യപ്രതിജ്ഞ ചെയ്യുന്ന ചടങ്ങ് ഉള്‍പ്പെടെയുള്ള പൊതുപരിപാടികളുടെയും പ്രസംഗങ്ങളുടെയും ദൃശ്യങ്ങള്‍ വൈറ്റ് ഹൗസ് സംപ്രേഷണം ചെയ്തു. അതേസമയം, റിപ്പോര്‍ട്ടിംഗിന്റെ അടിസ്ഥാനത്തില്‍ ഏത് മാധ്യമപ്രവര്‍ത്തകര്‍ക്ക് വൈറ്റ് ഹൗസില്‍ പ്രവേശനം നല്‍കണമെന്ന് തീരുമാനിക്കാന്‍ സര്‍ക്കാരിന് അവകാശമില്ലെന്ന് വാദിച്ചുകൊണ്ട് സിഎന്‍എന്‍, എംഎസ്‌നൗ, പൊളിറ്റിക്കോ എന്നിവര്‍ മാധ്യമ നിയന്ത്രണത്തെ കോടതിയില്‍ ചോദ്യം ചെയ്തിരിക്കുകയാണ്. 81ാമത് ഐക്യരാഷ്ട്ര പൊതുസഭയില്‍ പങ്കെടുക്കുന്നതിനായി ട്രംപ് ഇപ്പോള്‍ ന്യൂയോര്‍ക്കിലാണ് ഉള്ളത്.
by Midhun HP News | Sep 22, 2026 | Latest News, ദേശീയ വാർത്ത
ഡല്‍ഹി: റോഡിലെ കുഴികളും വിള്ളലുകളും കണ്ടെത്താന്‍ എഐ അടിസ്ഥാനമാക്കിയുള്ള സംവിധാനം പരീക്ഷിക്കാന്‍ കേന്ദ്രം. സ്മാര്‍ട്ട്‌ഫോണ്‍ വിഡിയോകള്‍ ഉപയോഗിച്ച് റോഡുകളിലെ കുഴികളും വിള്ളലുകളും ഉള്‍പ്പെടെ തിരിച്ചറിയുകയാണ് ലക്ഷ്യം. ഗ്രാമീണ റോഡുകളുടെ നിലവാരം വിലയിരുത്തുന്നതിനായി രാജ്യവ്യാപകമായി ഈ സംവിധാനം പരീക്ഷണാടിസ്ഥാനത്തില്‍ നടപ്പാക്കാന്‍ നടപടികള്‍ ആരംഭിച്ചിട്ടുണ്ട്.
പ്രധാനമന്ത്രി ഗ്രാമ സഡക് യോജനയ്ക്ക് (PMGSY) കീഴിലുള്ള റോഡുകളില്‍ എഐ സംവിധാനം പരീക്ഷിക്കുന്നതിന് ഗ്രാമവികസന മന്ത്രാലയം തത്ത്വത്തില്‍ അംഗീകാരം നല്‍കിയിട്ടുണ്ട്. സെന്റര്‍ ഫോര്‍ ഡെവലപ്മെന്റ് ഓഫ് അഡ്വാന്‍സ്ഡ് കമ്പ്യൂട്ടിങും (ഇഉഅഇ) നാഷണല്‍ റൂറല്‍ ഇന്‍ഫ്രാസ്ട്രക്ചര്‍ ഡെവലപ്മെന്റ് ഏജന്‍സിയും (NRIDA) ചേര്‍ന്നാണ് പുതിയ സാങ്കേതികവിദ്യ വികസിപ്പിച്ചിരിക്കുന്നത്.
സെപ്റ്റംബര്‍ ഒന്ന് മുതല്‍ വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഫീല്‍ഡ് പരിശോധനകള്‍ ആരംഭിച്ചിട്ടുണ്ട്. വാഹനങ്ങളില്‍ ഘടിപ്പിച്ചിട്ടുള്ള മൊബൈല്‍ ഫോണുകളിലെ ആപ്പ് വഴി റോഡിന്റെ വിഡിയോകള്‍ പകര്‍ത്തിയാണ് ഇത് വിലയിരുത്തുന്നത്. നിലവില്‍ കുഴികള്‍, നീളത്തിലുള്ള വിടവുകള്‍, കുറുകെയുള്ള വിടവുകള്‍, വശങ്ങളിലെ കേടുപാടുകള്‍, പാച്ചുകള്‍, കാടുപിടിച്ചതുകൊണ്ടുള്ള തടസങ്ങള്‍ തുടങ്ങി ഏഴ് തരം കേടുപാടുകള്‍ തിരിച്ചറിയാന്‍ ഈ സംവിധാനത്തിന് കഴിയും.
എഞ്ചിനീയര്‍മാര്‍ റോഡിലെ കുഴികള്‍ പരിശോധിച്ച് എഐ സംവിധാനങ്ങളുടെ കണ്ടെത്തലുമായി ഒത്തുനോക്കും. റോഡ് അറ്റകുറ്റപ്പണികള്‍ നടത്തുന്നതില്‍ തീരുമാനം എടുക്കുന്നതിനുള്ള ഉപകരണമായി മാത്രമാണ് ഈ സാങ്കേതികവിദ്യ പരീക്ഷിക്കുന്നത്. പൂനെ, ലഖ്നൗ, അസമിലെ കാംരൂപ്, മേഘാലയയിലെ റി-ഭോയ് എന്നീ പ്രദേശങ്ങളിലാണ് ഇതിന്റെ ആദ്യഘട്ട ട്രയലുകള്‍ നടന്നത്. നിലവില്‍, eMARG മൊബൈല്‍ ആപ്ലിക്കേഷനില്‍ ഫീല്‍ഡ് ഉദ്യോഗസ്ഥര്‍ റെക്കോര്‍ഡുചെയ്ത പരിശോധനകളിലൂടെയും ജിയോ-ടാഗ് ചെയ്ത ചിത്രങ്ങളിലൂടെയുമാണ് റോഡ് അറ്റകുറ്റപ്പണികള്‍ നിരീക്ഷിക്കുന്നത്.
Recent Comments