by Midhun HP News | Sep 25, 2026 | Latest News, ദേശീയ വാർത്ത
ഡൽഹി: വോട്ടർപട്ടികയുടെ സമഗ്ര പുതുക്കൽ പ്രക്രിയയിൽ ഔദ്യോഗിക പദവി ദുരുപയോഗം ചെയ്യുകയും നിയമപരമായ ചുമതലകൾ ബോധപൂർവ്വം ലംഘിക്കുകയും ചെയ്തെന്ന് ആരോപിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ക്രിമിനൽ നടപടി ആവശ്യപ്പെട്ട് സുപ്രീം കോടതിയിൽ ഹർജി.
ഭരണഘടനയുടെ അനുച്ഛേദം 32 പ്രകാരം സുപ്രീം കോടതി അഭിഭാഷകനായ ശൈലേന്ദ്ര മണി ത്രിപാഠിയാണ് പൊതുതാൽപ്പര്യ ഹർജി ഫയൽ ചെയ്തത്. മറ്റ് രണ്ട് തെരഞ്ഞെടുപ്പ് കമ്മീഷണർമാരുടെ അറിവോ യോജിപ്പോ ഇല്ലാതെ മുഖ്യ കമ്മീഷണർ ഏകപക്ഷീയമായി നടപ്പിലാക്കിയ തീരുമാനങ്ങളും മാർഗ്ഗനിർദ്ദേശങ്ങളും സോഫ്റ്റ്‌വെയർ മാറ്റങ്ങളും ഭരണഘടനാ വിരുദ്ധവും അസാധുവുമായി പ്രഖ്യാപിക്കണമെന്നും ഹർജിയിൽ ആവശ്യപ്പെടുന്നു.
വോട്ടർപട്ടിക പുതുക്കലുമായി ബന്ധപ്പെട്ട നടപടികളിൽ മറ്റ് രണ്ട് തെരഞ്ഞെടുപ്പ് കമ്മീഷണർമാരായ സുഖ്ബീർ സിങ് സന്ധു, വിവേക് ജോഷി എന്നിവരുടെ വിയോജിപ്പുകൾ അവഗണിച്ച് മുഖ്യ കമ്മീഷണർ ഏകപക്ഷീയമായി മുന്നോട്ടുപോയെന്ന റിപ്പോർട്ടിന് പിന്നാലെയാണ് നിർണ്ണായക നീക്കം.
വോട്ടർ രജിസ്ട്രേഷനുള്ള ഫോം 6-ൽ ചട്ടവിരുദ്ധമായി വരുത്തിയ മാറ്റങ്ങൾ, വോട്ടർപട്ടികയുടെ ഡാറ്റാബേസ് കേന്ദ്രീകരണം, പശ്ചിമ ബംഗാളിൽ തെരഞ്ഞെടുപ്പ് കമ്മീഷന്റെ പേരിൽ 16.10 ലക്ഷം വോട്ടർമാരെ തള്ളാൻ അപ്പീൽ നൽകിയത് എന്നിവ ഉൾപ്പെടെയുള്ള വിഷയങ്ങളിൽ കമ്മീഷണർമാർ 14 തവണ രേഖാമൂലം എതിർപ്പ് അറിയിച്ചിരുന്നു. എന്നാൽ ഈ ഭൂരിപക്ഷ അഭിപ്രായത്തെ അട്ടിമറിച്ച് മുഖ്യ കമ്മീഷണർ ഏകപക്ഷീയമായി ഉത്തരവുകൾ നടപ്പിലാക്കുകയായിരുന്നുവെന്ന് ഹർജിക്കാരൻ ചൂണ്ടിക്കാട്ടുന്നു.
വോട്ടർപട്ടിക തയ്യാറാക്കുന്നതിലും തിരുത്തുന്നതിലും ഗുരുതരമായ വീഴ്ച വരുത്തുന്ന ഉദ്യോഗസ്ഥർക്കെതിരെ ക്രിമിനൽ നടപടി വ്യവസ്ഥ ചെയ്യുന്ന 1950-ലെ ജനപ്രാതിനിധ്യ നിയമത്തിലെ സെക്ഷൻ 32 പ്രകാരം മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ, സീനിയർ ഡെപ്യൂട്ടി ഇലക്ഷൻ കമ്മീഷണർ മനീഷ് ഗാർഗ്, ഡയറക്ടർ ജനറൽ (ഐടി) സീമ ഖന്ന എന്നിവർക്കെതിരെ കേസെടുത്ത് വിചാരണ ആരംഭിക്കാൻ നിർദ്ദേശം നൽകണമെന്നാണ് പ്രധാന ആവശ്യം.
കമ്മീഷനിൽ അഭിപ്രായവ്യത്യാസമുണ്ടായാൽ ഭൂരിപക്ഷ തീരുമാനപ്രകാരമാണ് നടപടികൾ കൈക്കൊള്ളേണ്ടതെന്ന് 2023-ലെ കേന്ദ്ര നിയമം നിഷ്കർഷിക്കുന്നുണ്ട്. ഇത് കാറ്റിൽപ്പറത്തി നടപ്പിലാക്കിയ തീരുമാനങ്ങൾ നിയമവിരുദ്ധമായി പ്രഖ്യാപിക്കണമെന്ന് ഹർജി ആവശ്യപ്പെടുന്നു.
സ്പെഷ്യൽ ഇന്റൻസീവ് റിവിഷൻ പ്രക്രിയയുടെ ഭാഗമായി രാജ്യത്തെ 30 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 13 കോടിയോളം വോട്ടർമാരുടെ പേരുകൾ വോട്ടർപട്ടികയിൽനിന്ന് നീക്കം ചെയ്ത സാഹചര്യത്തെക്കുറിച്ച് സമഗ്രമായി അന്വേഷിക്കാൻ വിരമിച്ച സുപ്രീം കോടതി ജഡ്ജിയുടെ നേതൃത്വത്തിൽ പ്രത്യേക അന്വേഷണ സംഘം രൂപീകരിക്കണമെന്നും ഹർജിയിൽ ബോധിപ്പിച്ചിട്ടുണ്ട്. ഐടി, സൈബർ സുരക്ഷാ വിദഗ്ധരുടെ സഹായത്തോടെ ഇസിഐനെറ്റ് , ഇആർഒനെറ്റ് ഡാറ്റാബേസുകളിൽ ഫോറൻസിക് ഓഡിറ്റ് നടത്തണമെന്നും, ചട്ടവിരുദ്ധമായി മാറ്റം വരുത്തിയ ഫോം 6 പഴയ രീതിയിലേക്ക് പുനഃസ്ഥാപിക്കണമെന്നും ഹർജിയിൽ ആവശ്യപ്പെടുന്നു. കേന്ദ്ര സർക്കാർ, കേന്ദ്ര തെരഞ്ഞെടുപ്പ് കമ്മീഷൻ, ക്യാബിനറ്റ് സെക്രട്ടറി, ഗ്യാനേഷ് കുമാർ എന്നിവരെ എതിർകക്ഷികളാക്കിയാണ് ഹർജി സമർപ്പിച്ചിട്ടുള്ളത്.
by Midhun HP News | Sep 25, 2026 | Latest News, ദേശീയ വാർത്ത
ഡല്‍ഹി: ദീര്‍ഘകാല വൈദ്യുതി കരാര്‍ റദ്ദാക്കിയതിനെതിരെ കേരളസര്‍ക്കാര്‍ സമര്‍പ്പിച്ച ഹര്‍ജി സുപ്രീംകോടതി തിങ്കളാഴ്ച പരിഗണിക്കും. ഹര്‍ജി അടിയന്തരമായി പരിഗണിക്കണമെന്ന കേരളത്തിന്റെ ആവശ്യം കോടതി അംഗീകരിക്കുകയായിരുന്നു. കേരളം അഭിമുഖീകരിക്കുന്ന വലിയ ഊര്‍ജ്ജ പ്രതിസന്ധി ചൂണ്ടിക്കാട്ടിയാണ്, ഹര്‍ജി അടിയന്തരമായി പരിഗണിക്കണമെന്ന് സംസ്ഥാന സര്‍ക്കാര്‍ ആവശ്യപ്പെട്ടത്.
ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് കേരള സര്‍ക്കാരിന്റെ ഹര്‍ജി പരിഗണിക്കുന്നത്. ദീര്‍ഘകാല വൈദ്യുതി കരാര്‍ റദ്ദാക്കിയതിലൂടെ സംസ്ഥാനം വലിയ സാമ്പത്തിക നഷ്ടം നേരിടുന്നു. ഇതുവരെ സംസ്ഥാനത്തിന് 12, 570 കോടി രൂപയുടെ നഷ്ടമുണ്ടായതായും സംസ്ഥാന സര്‍ക്കാര്‍ ഹര്‍ജിയില്‍ ചൂണ്ടിക്കാട്ടുന്നു. കേരളത്തിന് കുറഞ്ഞ വിലയ്ക്ക് വൈദ്യുതി ലഭിക്കുന്നില്ലെന്നും ഹര്‍ജിയില്‍ പറയുന്നു.
വൈദ്യുതി റെഗുലേറ്ററി അപ്പലേറ്റ് ബോഡിയാണ് കരാര്‍ റദ്ദാക്കിയത്. ഇതിനെതിരെ സര്‍ക്കാര്‍ സുപ്രീംകോടതിയില്‍ അപ്പീല്‍ നല്‍കിയിരുന്നു. എന്നാല്‍ അപ്പീലില്‍ സുപ്രീംകോടതി വാദം കേട്ടിരുന്നില്ല. നിലവിലെ വൈദ്യുതി പ്രതിസന്ധിയുടെ പശ്ചാത്തലത്തിലാണ് ഹര്‍ജി അടിയന്തരമായി പരിഗണിക്കണമെന്ന് ആവശ്യപ്പെട്ടത്. മുതിര്‍ന്ന അഭിഭാഷകര്‍ കേരളത്തിന് വേണ്ടി സുപ്രീംകോടതിയില്‍ ഹാജരാകും.
by Midhun HP News | Sep 24, 2026 | Latest News, ദേശീയ വാർത്ത
ഡല്‍ഹി: മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാര്‍ 48 മണിക്കൂറിനുള്ളില്‍ രാജിവെക്കണമെന്ന് ആവശ്യപ്പെട്ട് കോക്രോച്ച് ജനതാ പാര്‍ട്ടി (സിജെപി) രംഗത്ത്. ഗ്യാനേഷ് കുമാര്‍ ഇതിന് തയ്യാറായില്ലെങ്കില്‍ രാജ്യവ്യാപക പ്രക്ഷോഭം ആരംഭിക്കുമെന്ന് പാര്‍ട്ടി മുന്നറിയിപ്പ് നല്‍കി. വരാനിരിക്കുന്ന എല്ലാ തെരഞ്ഞെടുപ്പുകളും താല്‍ക്കാലികമായി നിര്‍ത്തിവെക്കണമെന്നും എസ്ഐആര്‍ നടപടികള്‍ 2025ലെ സ്ഥിതിയിലേക്ക് തിരികെ മാറ്റണമെന്നും സിജെപി ആവശ്യപ്പെട്ടു.
ഡല്‍ഹിയില്‍ വാര്‍ത്താസമ്മേളനത്തിലാണ് സിജെപി നേതാക്കളായ അഭിജിത് ദീപ്‌കെ, സൗരവ് ദാസ്, അശുതോഷ് രങ്ക എന്നിവര്‍ നിലപാട് വ്യക്തമാക്കിയത്. തെരഞ്ഞെടുപ്പ് കമ്മീഷണര്‍മാര്‍ക്കിടയിലെ അഭിപ്രായവ്യത്യാസങ്ങളെക്കുറിച്ച് ഇന്ത്യന്‍ എക്‌സ്പ്രസ് നടത്തിയ അന്വേഷണ റിപ്പോര്‍ട്ട് പുറത്തുവന്നതിന് പിന്നാലെയാണ് ഡല്‍ഹിയില്‍ വാര്‍ത്താസമ്മേളനം നടന്നത്. രാജ്യതലസ്ഥാനത്തും രാജ്യത്തുടനീളവും കുത്തിയിരിപ്പ് സമരങ്ങള്‍ ഉള്‍പ്പെടെയുള്ള പ്രതിഷേധങ്ങള്‍ സംഘടിപ്പിക്കുമെന്ന് സിജെപി സ്ഥാപകനും കണ്‍വീനറുമായ ദീപ്‌കെ മാധ്യമപ്രവര്‍ത്തകരോട് പറഞ്ഞു.
പാര്‍ട്ടിയുടെ ഭാഗത്തുനിന്ന് മൂന്ന് പ്രധാന ആവശ്യങ്ങളാണ് കോ-കണ്‍വീനര്‍ സൗരവ് ദാസ് മുന്നോട്ടുവെച്ചത്. മുഖ്യ തെരഞ്ഞെടുപ്പ് കമ്മീഷണറുടെ രാജി, ഗ്യാനേഷ് കുമാറിനും അദ്ദേഹത്തിന് നിര്‍ദ്ദേശം നല്‍കിയവര്‍ക്കുമെതിരെ ക്രിമിനല്‍ നടപടികള്‍ സ്വീകരിക്കുക, വരാനിരിക്കുന്ന എല്ലാ തെരഞ്ഞെടുപ്പുകളും മരവിപ്പിക്കുക എന്നിവയാണ് പ്രധാന ആവശ്യങ്ങള്‍, ഇതിനുപുറമെ, എസ്ഐആര്‍ സംബന്ധിച്ച ഫയലുകള്‍ സുപ്രീംകോടതിയുടെ നേതൃത്വത്തിലുള്ള സമിതിയുടെ കസ്റ്റഡിയില്‍ സൂക്ഷിക്കണമെന്നും, തെരഞ്ഞെടുപ്പ് കമ്മീഷണര്‍മാരുടെ നിയമനവുമായി ബന്ധപ്പെട്ട നിയമം റദ്ദാക്കണമെന്നും പാര്‍ട്ടി ആവശ്യപ്പെട്ടു.
തെരഞ്ഞെടുപ്പ് കമ്മീഷനുള്ളിലെ തീരുമാനങ്ങളിലും നടപടികളിലും കമ്മീഷണര്‍മാരായ സുഖ്ബീര്‍ സിങ് സിന്ധുവും വിവേക് ജോഷിയും കുറഞ്ഞത് 14 തവണ വിയോജിപ്പ് രേഖപ്പെടുത്തിയിരുന്നു എന്ന റിപ്പോര്‍ട്ട് പുറത്തുവന്ന് ദിവസങ്ങള്‍ക്ക് ശേഷമാണ് ഈ സംഭവവികാസങ്ങള്‍. എന്നാല്‍ വ്യത്യസ്ത അഭിപ്രായങ്ങളും എഴുതിനല്‍കിയ നിരീക്ഷണങ്ങളും ആഭ്യന്തര പരിശോധനകളും കമ്മീഷന്റെ പ്രവര്‍ത്തനങ്ങളുടെ സാധാരണ ഭാഗമാണെന്നും, എസ്ഐആര്‍ ഉള്‍പ്പെടെ കഴിഞ്ഞ വര്‍ഷത്തെ എല്ലാ തീരുമാനങ്ങളും ഏകകണ്ഠമായിരുന്നുവെന്നുമാണ് തെരഞ്ഞെടുപ്പ് കമ്മീഷന്‍ ഇതിനകം വ്യക്തമാക്കിയിട്ടുള്ളത്.
by Midhun HP News | Sep 24, 2026 | Latest News, ദേശീയ വാർത്ത
കേന്ദ്ര സർക്കാർ സ്ഥപനമായ ഖാദി ആൻഡ് വില്ലേജ് ഇൻഡസ്ട്രീസ് കമ്മിഷനിൽ (KVIC) 50 ഒഴിവുകൾ. യങ് പ്രൊഫഷണൽ, അഡ്വൈസർ, സീനിയർ കൺസൾട്ടന്റ് എന്നീ തസ്തികകളിലാണ് അവസരം. പി.ജി,എഞ്ചിനീയറിങ്,ബിരുദം തുടങ്ങിയ യോഗ്യതയുള്ളവർക്ക് അപേക്ഷിക്കാം. ഫ്രഷേഴ്‌സിനും അവസരമുണ്ട്. അപേക്ഷകൾ സമർപ്പിക്കാനുള്ള അവസാന തീയതി സെപ്റ്റംബർ 30.
ഒഴിവുകൾ
യങ് പ്രൊഫഷണൽ- 20
അക്കൗണ്ട്സ് ആൻഡ് ഓഡിറ്റ്- 5
എച്ച്ആർ ആൻഡ് അഡ്മിനിസ്ട്രേഷൻ -4
ഖാദി -3
ലീഗൽ -3
മാർക്കറ്റിങ്- 1
ഡിസൈൻ ആൻഡ് ഡ്രോയിങ് -1
സയൻസ് ആൻഡ് ടെക്നോളജി -1
പബ്ലിസിറ്റി- 2
അഡ്വൈസർ- 15
അക്കൗണ്ട്സ് ആൻഡ് ഓഡിറ്റ് -3
ഖാദി റോ മെറ്റീരിയൽസ്- 3
അഡ്മിനിസ്ട്രേഷൻ ആൻഡ് എച്ച്ആർ- 2
ഖാദി -2
ലീഗൽ- 2
എസ്റ്റേറ്റ് ആൻഡ് സർവീസസ് -1
മാർക്കറ്റിങ് -1
SFURTI -1
സീനിയർ കൺസൾട്ടന്റ് -15
അക്കൗണ്ട്സ് ആൻഡ് ഓഡിറ്റ് -3
ഖാദി റോ മെറ്റീരിയൽസ്- 2
അഡ്മിനിസ്ട്രേഷൻ ആൻഡ് എച്ച്ആർ- 2
ഖാദി- 2
ലീഗൽ -1
എസ്റ്റേറ്റ് ആൻഡ് സർവീസസ് -2
മാർക്കറ്റിങ് 1
SFURTI- 1
സയൻസ് ആൻഡ് ടെക്നോളജി -1
യോഗ്യത
യങ് പ്രൊഫഷണൽ തസ്തികകളിലേക്ക് ബന്ധപ്പെട്ട വിഷയത്തിൽ ബിരുദാനന്തര ബിരുദം വേണം.
അക്കൗണ്ട്സ്, എച്ച്ആർ, ടെക്സ്റ്റൈൽ, നിയമം, മാർക്കറ്റിങ്, സിവിൽ എഞ്ചിനീയറിങ്, ആർക്കിടെക്ചർ, മാസ് കമ്മ്യൂണിക്കേഷൻ തുടങ്ങിയ മേഖലകളിൽ യോഗ്യത ആവശ്യമാണ്
അഡ്വൈസർ തസ്തികയിലേക്ക് സർക്കാർ വകുപ്പുകളിലോ പൊതുമേഖലാ സ്ഥാപനങ്ങളിലോ നിന്ന് വിരമിച്ചവർക്കും സ്വമേധയാ വിരമിച്ചവർക്കുമാണ് അപേക്ഷിക്കാനാകുക.
ബന്ധപ്പെട്ട മേഖലയിൽ കുറഞ്ഞത് 15 വർഷത്തെ പ്രവൃത്തിപരിചയം വേണം.
സീനിയർ കൺസൾട്ടന്റ് തസ്തികയിലേക്ക് ബന്ധപ്പെട്ട വിഷയത്തിൽ പി.ജി അല്ലെങ്കിൽ മാനേജ്മെന്റ് ബിരുദവും കുറഞ്ഞത് അഞ്ച് വർഷത്തെ പ്രവൃത്തിപരിചയവും ആവശ്യമാണ്.
പ്രായപരിധി
യങ് പ്രൊഫഷണലിന് 2026 ഒക്ടോബർ ഒന്നിന് 27 വയസിൽ താഴെയായിരിക്കണം.
അഡ്വൈസർ തസ്തികയിൽ 40 മുതൽ 65 വയസുവരെയാണ് പ്രായപരിധി.
സീനിയർ കൺസൾട്ടന്റിന് അപേക്ഷയുടെ അവസാന തീയതിയിൽ 39 വയസിൽ താഴെയായിരിക്കണം.
നിയമന കാലാവധി
ആദ്യ നിയമനം ഒരു വർഷത്തേക്കാണ്. പ്രകടനവും കമ്മിഷന്റെ ആവശ്യകതയും പരിഗണിച്ച് പരമാവധി രണ്ട് വർഷത്തേക്ക് കൂടി കരാർ നീട്ടാം.
തിരഞ്ഞെടുപ്പ്
ഓൺലൈൻ അപേക്ഷകളുടെ പരിശോധന, യോഗ്യതയും പ്രവൃത്തിപരിചയവും അടിസ്ഥാനമാക്കിയുള്ള ഷോർട്ട്‌ലിസ്റ്റിങ്, രേഖാ പരിശോധന, വ്യക്തിഗത അഭിമുഖം എന്നിവയുടെ അടിസ്ഥാനത്തിലാണ് തിരഞ്ഞെടുപ്പ്. അഭിമുഖത്തിന് അപേക്ഷയുടെ പ്രിന്റൗട്ടും ഒറിജിനൽ ഫോട്ടോ തിരിച്ചറിയൽ രേഖയും കൊണ്ടുവരണം.
കൂടുതൽ വിവരങ്ങൾക്ക് വിജ്ഞാപനം സന്ദർശിക്കുക
https://apps.kvic.gov.in/KVIC-RECRUITMENT/
by Midhun HP News | Sep 24, 2026 | Latest News, ദേശീയ വാർത്ത
നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് (NBEMS) NEET PG 2026 ഫലം പ്രഖ്യാപിച്ചു. ഔദ്യോഗിക പോർട്ടലായ natboard.edu.in, nbe.edu.in എന്നിവയിൽ ഫലം പരിശോധിക്കാം. പരീക്ഷയിൽ ഉദ്യോഗാർഥികൾ നേടിയ റോ സ്കോറും നീറ്റ് പി ജി റാങ്കും ഉൾപ്പെടുന്ന ഫലമാണ് പ്രസിദ്ധീകരിച്ചിരിക്കുന്നത്. ഉദ്യോഗാർഥികൾക്ക് NBEMS-ന്റെ ഔദ്യോഗിക വെബ്സൈറ്റ് സന്ദർശിച്ച് ഫലം പരിശോധിക്കാം.
by Midhun HP News | Sep 24, 2026 | Latest News, ദേശീയ വാർത്ത
മുംബൈ: ഓഹരി വിപണിയില്‍ കനത്ത ഇടിവ്. ബിഎസ്ഇ സെന്‍സെക്‌സ് 700 പോയിന്റ് ആണ് താഴ്ന്നത്. നിഫ്റ്റി 23,200 എന്ന സൈക്കോളജിക്കല്‍ ലെവലിന് താഴെയാണ്.
എണ്ണവില ഉയര്‍ന്നതും അമേരിക്കന്‍ ബോണ്ട് യീല്‍ഡ് വര്‍ധിച്ചതുമാണ് വിപണിക്ക് വിനയായത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 103 ഡോളറിന് മുകളിലാണ്. അമേരിക്ക- ഇറാന്‍ സംഘര്‍ഷത്തിന് അയവ് വരുന്നതുമായി ബന്ധപ്പെട്ട് അനിശ്ചിതത്വം തുടരുന്നതാണ് വില ഉയര്‍ന്നുനില്‍ക്കാന്‍ കാരണം. കൂടാതെ 2007ന് ശേഷമുള്ള ഏറ്റവും ഉയര്‍ന്ന നിലയിലാണ് യുഎസ് ട്രഷറി യീല്‍ഡ്. കൂടാതെ അമേരിക്കയിലെ ബിസിനസ് ആക്ടിവിറ്റി അഞ്ചുവര്‍ഷത്തിനിടയിലെ ഏറ്റവും ശക്തമായ നിലയിലാണ് എന്ന് വ്യക്തമാക്കുന്ന കണക്കുകള്‍ പുറത്തുവന്നിരുന്നു. ഇതിന് പിന്നാലെ ഡോളര്‍ ശക്തിയാര്‍ജിച്ചതും വിപണിയെ ബാധിച്ചു.
ഡോളറിനെതിരെ രൂപയുടെ മൂല്യത്തില്‍ 11 പൈസയുടെ ഇടിവാണ് ഉണ്ടായത്. 95.84ലേക്കാണ് രൂപ താഴ്ന്നത്. എണ്ണവില ഉയര്‍ന്നതും യുസ് ബോണ്ട് യീല്‍ഡ് വര്‍ധിച്ചതും ഡോളര്‍ കരുത്താര്‍ജിച്ചതും തന്നെയാണ് രൂപയെ ബാധിച്ചത്. എച്ച്ഡിഎഫ്‌സി ബാങ്ക്, ബജാജ് ഫിനാന്‍സ്, റിലയന്‍സ്, ആക്‌സിസ് ബാങ്ക് ഓഹരികളാണ് പ്രധാനമായി നഷ്ടം നേരിട്ടത്.
Recent Comments