by Midhun HP News | Sep 20, 2026 | Latest News, ദേശീയ വാർത്ത
മുംബൈ: മുംബൈയിലെ കോസ്റ്റൽ റോഡിൽ അമിതവേഗത്തിലെത്തിയ ആഡംബര ബിഎംഡബ്ല്യു കാർ നിയന്ത്രണം വിട്ട് ഡിവൈഡറിലിടിച്ച് 75 അടി താഴ്ചയിലേക്ക് പതിച്ച് മൂന്ന് വിദ്യാർഥികൾ മരിച്ചു. കാറിലുണ്ടായിരുന്ന മറ്റൊരു വിദ്യാർഥി അതീവ ഗുരുതരാവസ്ഥയിൽ ആശുപത്രിയിൽ ചികിത്സയിലാണ്.
ഞായറാഴ്ച പുലർച്ചെ 5.20-ഓടെ ലാലാ ലജ്പത് റായ് കോളജിന് എതിർവശമുള്ള ലോട്ടസ് ജെട്ടിക്ക് സമീപമാണ് അപകടം. മറൈൻ ഡ്രൈവിൽനിന്ന് ഹാജി അലി ഭാഗത്തേക്ക് പോവുകയായിരുന്ന വാഹനമാണ് അപകടത്തിൽപ്പെട്ടതെന്ന് പൊലീസ് അറിയിച്ചു. അമിതവേഗതയിൽ സഞ്ചരിക്കുകയായിരുന്ന കാർ നിയന്ത്രണം വിട്ട് കോസ്റ്റൽ റോഡിലെ ഡിവൈഡറിലേക്ക് ഇടിച്ചുകയറുകയും തുടർന്ന് ബാരിക്കേഡ് തകർത്ത് ഫ്ലൈഓവറിൽനിന്ന് 75 അടിയോളം താഴ്ചയിലേക്ക് കൂപ്പുകുത്തുകയുമായിരുന്നുവെന്ന് കോസ്റ്റൽ റോഡ് കൺട്രോൾ റൂം അധികൃതർ വ്യക്തമാക്കി.
അപകടം നടന്നയുടൻ കാറിലുണ്ടായിരുന്ന നാല് വിദ്യാർഥികളെയും സമീപത്തെ നായർ ആശുപത്രിയിൽ എത്തിച്ചെങ്കിലും മൂന്നുപേർ മരണത്തിന് കീഴടങ്ങിയിരുന്നു. ഷനായ് ഗജ്ജൽ (21), ധൈര്യ സേത്ത് (17), ആദിത്യ ജകമാനിയ (19) എന്നിവരാണ് മരിച്ചത്. ഗുരുതരമായി പരിക്കേറ്റ ആദിത്യ ഓസ്വാൾ (23) നായർ ആശുപത്രിയിലെ ട്രോമ വാർഡിൽ തീവ്രപരിചരണ വിഭാഗത്തിൽ ചികിത്സയിലാണ്. നാലുപേരും വിദ്യാർഥികളാണെന്ന് സ്ഥിരീകരിച്ചിട്ടുണ്ട്.
അമിതവേഗതയാണോ അതോ വാഹനത്തിന്റെ സാങ്കേതിക തകരാറാണോ അപകടത്തിന് വഴിവെച്ചതെന്ന് വ്യക്തമാക്കാൻ പൊലീസ് വിശദമായ അന്വേഷണം ആരംഭിച്ചു. സൗത്ത് മുംബൈയിലെ മറൈൻ ഡ്രൈവിനെ ബാന്ദ്ര-വർളി സീ ലിങ്കുമായി ബന്ധിപ്പിക്കുന്ന 10.58 കിലോമീറ്റർ നീളമുള്ള എക്സ്പ്രസ് വേയാണ് മുംബൈ കോസ്റ്റൽ റോഡ്. ഏതാനും ദിവസങ്ങൾക്ക് മുൻപ് നവി മുംബൈയിലെ വാശി പികെസി ആശുപത്രിക്ക് സമീപം അമിതവേഗത്തിലെത്തിയ എസ്‌യുവി ഇടിച്ച് മൂന്ന് പേർക്ക് ഗുരുതരമായി പരിക്കേറ്റിരുന്നു.
by Midhun HP News | Sep 19, 2026 | Latest News, ദേശീയ വാർത്ത
ദുബൈ: വാഹന സംബന്ധമായ നടപടിക്രമങ്ങള്‍ ലളിതമാക്കുന്നതിന് പുതിയ പദ്ധതിയുമായി ഷാര്‍ജ പൊലീസ്. ‘യുവര്‍ പാത്ത്, മെയ്ഡ് ഈസി’ എന്ന പദ്ധതിയിലൂടെ വാഹന സേവനങ്ങള്‍ ഒറ്റ പ്ലാറ്റ്ഫോമിലൂടെ ലഭ്യമാക്കിയിരിക്കുകയാണ് പൊലീസ്. ഇനി ട്രാഫിക്, ലൈസന്‍സിങ് സേവനങ്ങള്‍ വാഹന ഉടമകള്‍ക്ക് കൂടുതല്‍ എളുപ്പത്തില്‍ ലഭ്യമാക്കും.
വിവിധ സേവനങ്ങളും സൗകര്യങ്ങളും ഒരൊറ്റ പ്ലാറ്റ്ഫോമില്‍ കൊണ്ടുവരുന്നത് വാഹന ഉടമകളെ ലഭ്യമായ ഓപ്ഷനുകളെക്കുറിച്ച് അറിയാനും നടപടിക്രമങ്ങള്‍ വ്യക്തമായി മനസ്സിലാക്കാനും ഇടപാടുകള്‍ കാര്യക്ഷമമായി പൂര്‍ത്തിയാക്കാനും സഹായിക്കുമെന്ന് വെഹിക്കിള്‍സ് ആന്റ് ഡ്രൈവേഴ്സ് ലൈസന്‍സിങ് ഡിപ്പാര്‍ട്ട്മെന്റ് ഡെപ്യൂട്ടി ഡയറക്ടര്‍ ലഫ്റ്റനന്റ് കേണല്‍ ഖാലിദ് അഹമ്മദ് ബിന്‍ അശൈഖ് പറഞ്ഞു.
ഉപഭോക്താക്കളുടെ ആവശ്യങ്ങള്‍ക്കനുസൃതമായി സേവന വിതരണ രീതികള്‍ പുനര്‍രൂപകല്‍പ്പന ചെയ്യാനുള്ള വിപുലമായ ശ്രമത്തിന്റെ ഭാഗമാണ് ഈ പദ്ധതിയെന്നും അദ്ദേഹം കൂട്ടിച്ചേര്‍ത്തു.
ലൈസന്‍സ് പുതുക്കല്‍, വാഹന രജിസ്ട്രേഷന്‍ ഉള്‍പ്പെടെയുള്ള ട്രാഫിക് സംബന്ധമായ വിവിധ സേവനങ്ങളും വിവരങ്ങളുമാണ് ഇനി ഒറ്റ പ്ലാറ്റ്ഫോമിലൂടെ ലഭ്യമാകുക. ഇതുവഴി ഓഫീസുകള്‍ കയറി ഇറങ്ങാതെ ഡിജിറ്റല്‍, സ്മാര്‍ട്ട് സേവനങ്ങള്‍ പ്രയോജനപ്പെടുത്തി ഉപഭോക്താക്കള്‍ക്ക് സമയം ലാഭിക്കാനാകും. ഡ്രൈവിങ് ഇന്‍സ്റ്റിറ്റ്യൂട്ടുകള്‍, വിദ്യാര്‍ഥികള്‍, അധ്യാപകര്‍ തുടങ്ങി സമൂഹത്തിന്റെ വിവിധ വിഭാഗങ്ങളിലുള്ളവര്‍ക്ക് ഇതിലേക്ക് നേരിട്ട് പ്രവേശനം ലഭിക്കും.
by Midhun HP News | Sep 19, 2026 | Latest News, ദേശീയ വാർത്ത
വിദേശയാത്രകൾ ആസൂത്രണം ചെയ്യുന്ന ഇന്ത്യൻ സഞ്ചാരികൾക്കായി പ്രധാനപ്പെട്ട വിസ വിവരങ്ങൾ. ടൂറിസം പ്രോത്സാഹിപ്പിക്കുന്നതിന്റെ ഭാഗമായി പല രാജ്യങ്ങളും വിസ നിബന്ധനകളിൽ ഇളവുകൾ നൽകാറുണ്ടെങ്കിലും, സുരക്ഷാ കാരണങ്ങളടക്കമുള്ള വിവിധ ഘടകങ്ങൾ മുൻനിർത്തി ചില രാജ്യങ്ങൾ തങ്ങളുടെ വിസ ചട്ടങ്ങൾ കർശനമാക്കിയിട്ടുണ്ട്.
ഇന്ത്യൻ പാസ്‌പോർട്ടിന്റെ ആഗോള റാങ്കിംഗിലും ഇളവുകളിലും സമീപകാലത്തായി മാറ്റങ്ങൾ വന്നിട്ടുണ്ട്. ഈ സാഹചര്യത്തിൽ, ഇന്ത്യക്കാർക്ക് വിസ നിയമങ്ങളിൽ മാറ്റം വരുത്തിയ പ്രധാനപ്പെട്ട ഒമ്പത് രാജ്യങ്ങളെക്കുറിച്ചുള്ള വിവരങ്ങൾ താഴെ പറയുന്നവയാണ്:
പ്രധാന രാജ്യങ്ങളിലെ വിസ നിയമ മാറ്റങ്ങൾ
ലാവോസ് (Laos): മുൻകാലങ്ങളിൽ ഇന്ത്യക്കാർക്ക് ലാവോസിൽ എത്തിയ ശേഷം വിസ ഓൺ അറൈവൽ (Visa on Arrival) സൗകര്യം ലഭ്യമായിരുന്നു. എന്നാൽ നിലവിൽ ഈ സൗകര്യം ഒഴിവാക്കിയിട്ടുണ്ട്. പകരം യാത്രക്കാർ ഓൺലൈൻ വഴി മുൻകൂട്ടി ഇ-വിസ (E-Visa) എടുത്തേ തീരൂ.
ഖത്തർ (Qatar): ഒരുകാലത്ത് വിസ ഇല്ലാതെ തന്നെ ഇന്ത്യൻ പാസ്‌പോർട്ട് ഉടമകൾക്ക് ഖത്തറിലേക്ക് യാത്ര ചെയ്യാൻ സാധിച്ചിരുന്നു. എന്നാൽ നിലവിൽ ഖത്തർ സന്ദർശിക്കാൻ ഓൺലൈൻ വഴിയുള്ള ഇ-വിസ മുൻകൂട്ടി നേടേണ്ടതുണ്ട്.
ശ്രീലങ്ക (Sri Lanka): ശ്രീലങ്കയിലേക്ക് പോകുന്ന ഇന്ത്യക്കാർക്കായി നേരത്തെ ഇ-വിസ ഓൺ അറൈവൽ സൗകര്യം ഉണ്ടായിരുന്നെങ്കിലും, ഇപ്പോൾ യാത്ര പുറപ്പെടുന്നതിന് മുൻപ് തന്നെ അനുമതി (ETA) വാങ്ങിയിരിക്കണം.
ഇറാൻ (Iran): സാധാരണ ഇന്ത്യൻ പാസ്‌പോർട്ട് ഉടമകൾക്ക് അനുവദിച്ചിരുന്ന വിസ രഹിത പ്രവേശനം ഇറാൻ കഴിഞ്ഞ നവംബറിൽ റദ്ദാക്കിയിരുന്നു. നിലവിൽ ഇറാൻ സന്ദർശിക്കാൻ ഉദ്ദേശിക്കുന്നവർ മുൻകൂട്ടി ഇ-വിസ സ്വന്തമാക്കേണ്ടതുണ്ട്.
ചിലി, വെനസ്വേല, ഘാന (Chile, Venezuela & Ghana): ഈ രാജ്യങ്ങളിലേക്ക് യാത്ര ചെയ്യാൻ മുമ്പും മുൻകൂട്ടി വിസ എടുക്കേണ്ടിരുന്നു. എന്നാൽ നിലവിൽ സഞ്ചാരികളുടെ സൗകര്യാർത്ഥം ഈ രാജ്യങ്ങൾ ഓൺലൈൻ വഴി ഇ-വിസ നേടാനുള്ള സൗകര്യം ഒരുക്കിയിട്ടുണ്ട്.
കേപ് വെർദെ (Cape Verde): ഫുട്‌ബോൾ ലോകകപ്പിലൂടെ ശ്രദ്ധ നേടിയ ഈ കൊച്ചു ദ്വീപ് രാജ്യം ഇന്ത്യക്കാർക്ക് നൽകിവന്നിരുന്ന വിസ ഓൺ അറൈവൽ സൗകര്യം അവസാനിപ്പിച്ചു.
നിക്കരാഗ്വെ (Nicaragua): നിക്കരാഗ്വെയിലേക്ക് പോകുന്ന ഇന്ത്യക്കാർക്കായിരുന്ന വിസ ഓൺ അറൈവലും സബ്സ്റ്റിറ്റ്യൂട്ട് വിസ പ്രോഗ്രാമുകളും പൂർണ്ണമായി എടുത്തുമാറ്റി. നിലവിൽ ഇലക്ട്രോണിക് വിസയ്ക്കായി ഓൺലൈൻ വഴി അപേക്ഷിക്കുകയോ അല്ലെങ്കിൽ എമിഗ്രേഷൻ അതോറിറ്റിയെ നേരിട്ട് ബന്ധപ്പെടുകയോ വേണം.
വിസ നിയമങ്ങൾ അതത് രാജ്യങ്ങളുടെ നയങ്ങൾക്കും സാഹചര്യങ്ങൾക്കും അനുസൃതമായി മാറിക്കൊണ്ടിരിക്കാം. അതിനാൽ ഏതൊരു രാജ്യത്തേക്കും യാത്ര തിരിക്കുന്നതിന് മുൻപ് ഔദ്യോഗിക എംബസി വെബ്‌സൈറ്റുകളോ വിസ പോർട്ടലുകളോ സന്ദർശിച്ചു പുതിയ വിവരങ്ങൾ ഉറപ്പുവരുത്തുക.
by Midhun HP News | Sep 18, 2026 | Latest News, ദേശീയ വാർത്ത
ചണ്ഡീഗഢ്: കാനഡയിലെ പ്രതിരോധമന്ത്രി, സൈന്യം, പൊലീസ് എന്നിവര്‍ക്കായി കുപ്രസിദ്ധ ക്രിമിനല്‍ സംഘമായ ലോറന്‍സ് ബിഷ്ണോയ് ഗ്യാങ് അയച്ചതായി കരുതുന്ന ഭീഷണിക്കത്ത് സമൂഹമാധ്യമങ്ങളില്‍ വൈറലാകുന്നു. കാനഡയില്‍ തങ്ങള്‍ക്ക് 5,000 അംഗങ്ങളുണ്ടെന്നും പൊലീസിനേക്കാള്‍ കൂടുതല്‍ തോക്കുകളുണ്ടെന്നും കത്തില്‍ അവകാശപ്പെടുന്നു. പൊലീസിന്റെ അന്വേഷണ രേഖകളില്‍ നിന്നാണ് ഈ വിവരം പുറത്തുവന്നത്.
കാനഡയിലെ അബ്കോര്‍ട്ട് പൊലീസ് വകുപ്പിനാണ് കത്ത് ലഭിച്ചത്. ജൂലൈയില്‍ നാടുകടത്താന്‍ ഉത്തരവിട്ട ബിഷ്ണോയ് സംഘാംഗത്തിന്റെ ഇമിഗ്രേഷന്‍ ആന്‍ഡ് റെഫ്യൂജി ബോര്‍ഡ് ഹിയറിങ്ങിലെ തെളിവുകളില്‍ നിന്നാണ് വിവരാവകാശ നിയമപ്രകാരം രേഖകള്‍ പുറത്തുവന്നത്. കാനഡയിലെ വിവിധ ഭാഗങ്ങളില്‍ ഭീഷണിപ്പെടുത്തി പണം തട്ടുന്ന ഇന്ത്യക്കാരുടെ സംഘങ്ങളെക്കുറിച്ചുള്ള തെളിവുകളും ഇതിലുള്‍പ്പെടുന്നു. കനേഡിയന്‍ ബോര്‍ഡര്‍ സര്‍വീസസ് ഏജന്‍സി അടുത്തിടെ പുറത്തുവിട്ട രേഖകളില്‍ ബിഷ്ണോയ് സംഘവുമായി ബന്ധമുള്ള അമിതോജ് ബജ്വ, സാഹിബ്ജോത് സിങ് എന്നിവരുടെ പേരുകളുമുണ്ട്. കാനഡയിലെ ആല്‍ബര്‍ട്ട, ഒന്റാറിയോ, ബ്രിട്ടീഷ് കൊളംബിയ എന്നിവിടങ്ങളില്‍ നടന്ന വെടിവെയ്പ്പുകളില്‍ ഉള്‍പ്പെടെ ഇവര്‍ക്ക് പങ്കുണ്ടെന്ന് കണ്ടെത്തിയതായി രേഖകളില്‍ പറയുന്നു.
‘ഞങ്ങള്‍ നിങ്ങള്‍ക്ക് രേഖാമൂലം മുന്നറിയിപ്പും വെല്ലുവിളിയും നല്‍കുന്നു. ഞങ്ങള്‍ ഇന്ത്യന്‍ ഗ്യാങ് ആണ്, ഞങ്ങളെ തടയാന്‍ കാനഡയ്ക്ക് ധൈര്യമില്ല. കാനഡ ഇനി ഞങ്ങള്‍ ഭരിക്കും, ആര്‍ക്കും ഞങ്ങളെ തടയാന്‍ കഴിയില്ല. ഞങ്ങള്‍ വളരെ ശക്തരാണ്… കാനഡയില്‍ ഞങ്ങള്‍ക്ക് 5,000ത്തിലധികം അംഗങ്ങളുണ്ട്, വെറും 1000 ഡോളറിന് അവര്‍ക്ക് വെടിവെയ്പ്പ് നടത്താന്‍ കഴിയും. നിങ്ങള്‍ക്ക് ഞങ്ങളെ തടയാന്‍ കഴിയുമോ? ഒരിക്കലുമില്ല. ഞങ്ങള്‍ ഉടന്‍ തന്നെ കാനഡ പിടിച്ചെടുക്കുന്നത് നിങ്ങള്‍ കാണും’ -കത്തില്‍ പറയുന്നു.
ബിസിനസുകാര്‍ തങ്ങള്‍ക്ക് നികുതി നല്‍കുന്നതു പോലെ പണം നല്‍കണമെന്നും കത്തില്‍ ആവശ്യപ്പെടുന്നുണ്ട്. നിരവധി കുറ്റകൃത്യങ്ങളില്‍ പങ്കുണ്ടെന്ന് കണ്ടെത്തി ബിഷ്ണോയിയുടെ അടുത്ത കൂട്ടാളിയായ കരംവീര്‍ സിങ്ങിനെയും മറ്റ് നാല് പഞ്ചാബ് സ്വദേശികളെയും സിബിഎസ്എ നാടുകടത്തി രണ്ട് ദിവസത്തിന് ശേഷമാണ് ഈ വിവരങ്ങള്‍ പുറത്തുവന്നത്.
by Midhun HP News | Sep 18, 2026 | Latest News, ദേശീയ വാർത്ത
ലഖ്‌നൗ: അന്തരിച്ച ഭർത്താവിന്റെ പേരിലുള്ള വ്യക്തിഗത വായ്പാ കുടിശ്ശിക തീർക്കാനായി വിധവയായ ഭാര്യയുടെ സ്ഥിരനിക്ഷേപത്തിൽ (എഫ്ഡി) നിന്ന് 19,90,693 രൂപ അനധികൃതമായി തട്ടിയെടുത്ത സ്റ്റേറ്റ് ബാങ്ക് ഓഫ് ഇന്ത്യയ്ക്ക് (എസ്ബിഐ) അലഹബാദ് ഹൈക്കോടതിയുടെ കനത്ത പ്രഹരം. പിടിച്ചെടുത്ത 19.90 ലക്ഷം രൂപയും അതിന്റെ പലിശയും ഉടൻ തിരികെ നൽകാൻ ഉത്തരവിട്ട കോടതി, ബാങ്കിന്റെ ക്രൂരമായ നിയമലംഘനങ്ങൾ കാരണം യുവതിക്കുണ്ടായ മാനസിക പീഡനങ്ങൾക്ക് ഒരു ലക്ഷം രൂപ നഷ്ടപരിഹാരം നൽകാനും നിർദ്ദേശിച്ചു.
ജസ്റ്റിസ് ശേഖർ ബി. സറഫ്, ജസ്റ്റിസ് അവധേഷ് കുമാർ ചൗധരി എന്നിവരടങ്ങിയ ഡിവിഷൻ ബെഞ്ചാണ് എസ്ബിഐയുടെ നടപടികളെ രൂക്ഷമായി വിമർശിച്ചുകൊണ്ട് ഉത്തരവ് പുറപ്പെടുവിച്ചത്. സ്ത്രീയുടെ സ്ഥിരനിക്ഷേപം തുടങ്ങിയ ആഷിയാന ശാഖയിൽ നിന്ന് ഭർത്താവിന്റെ ലോൺ അക്കൗണ്ട് നിലനിന്നിരുന്ന ജാനകിപുരം ശാഖയിലേക്ക് രഹസ്യമായി മാറ്റുകയും, പണം മുഴുവൻ വായ്പയിലേക്ക് വകയിരുത്തിയ ശേഷം അക്കൗണ്ട് തിരികെ മാറ്റുകയും ചെയ്ത ബാങ്കിന്റെ തന്ത്രം തികച്ചും ദുരുദ്ദേശ്യപരമാണെന്ന് കോടതി ചൂണ്ടിക്കാട്ടി. ബാങ്കിങ് വ്യവസ്ഥയ്ക്കും വിശ്വാസ്യതയ്ക്കും തന്നെ തീരാക്കളങ്കമാണ് ഇത്തരം നടപടികളെന്നും ബെഞ്ച് നിരീക്ഷിച്ചു.
ലഖ്‌നൗവിലെ ആശുപത്രിയിൽ അസിസ്റ്റന്റ് പ്രൊഫസറായിരുന്ന യുവതിയുടെ ഭർത്താവ് 2020 നവംബറിലാണ് എസ്ബിഐയിൽ നിന്ന് 15 ലക്ഷം രൂപയുടെ വ്യക്തിഗത വായ്പയെടുത്തത്. ഈ വായ്പയിൽ ഭാര്യ ഒപ്പുവെക്കുകയോ, വായ്പയുടെ കോ-ആപ്ലിക്കന്റ്, ജാമ്യക്കാരി, നോമിനി തുടങ്ങിയ യാതൊരു ഉത്തരവാദിത്തങ്ങളും വഹിക്കുകയോ ചെയ്തിരുന്നില്ല. 2021 മെയ് 6-ന് കൊവിഡ് ബാധയെത്തുടർന്ന് ഭർത്താവ് മരണപ്പെട്ടു.
നിയമാനുസൃതമായ നടപടികളിലൂടെ കാര്യങ്ങൾ നീക്കുന്നതിന് പകരം വിധവയായ യുവതിയെ പണം ആവശ്യപ്പെട്ട് ബാങ്ക് നിരന്തരം ഭീഷണിപ്പെടുത്താൻ തുടങ്ങി. പലിശയുൾപ്പെടെ 13,87,382 രൂപ ആവശ്യപ്പെട്ട് ബാങ്ക് നോട്ടീസ് അയച്ചു. തുടർന്ന് യുവതിയുടെ ശമ്പള അക്കൗണ്ട് മരവിപ്പിച്ചെങ്കിലും ആർബിഐ ഓംബുഡ്സ്മാൻ ഇടപെട്ട് ഈ വിലക്ക് നീക്കുകയായിരുന്നു.
വായ്പാ തിരിച്ചടവ് സംബന്ധിച്ച് തർക്കപരിഹാര ചർച്ചകൾ നടക്കുന്നതിനിടെയാണ് 2025-ൽ യുവതി തുടങ്ങിയ സ്ഥിരനിക്ഷേപത്തിൽ നിന്ന് 19.90 ലക്ഷം രൂപ എസ്ബിഐ ഏകപക്ഷീയമായി തട്ടിയെടുത്തത്. ഇതിനെതിരെ യുവതി ഹൈക്കോടതിയെ സമീപിക്കുകയായിരുന്നു. ഭാര്യയുമായി ബാങ്കിന് യാതൊരു തരത്തിലുള്ള കരാറോ നിയമപരമായ കടപ്പാടോ ഇല്ലാതിരുന്നിട്ടും അവരുടെ പണം ഭർത്താവിന്റെ വായ്പയ്ക്കായി ബാങ്ക് വകയിരുത്തിയത് ഗുരുതരമായ നിയമലംഘനവും അവിശ്വാസവുമാണെന്ന് കോടതി വ്യക്തമാക്കി.
ഭർത്താവിന്റെ വായ്പാതുക അനന്തരാവകാശിയിൽനിന്ന് ഈടാക്കാൻ ബാങ്കിന് അവകാശമുണ്ടെങ്കിൽപ്പോലും അത് നിയമപരമായ മാർഗ്ഗങ്ങളിലൂടെ മാത്രമേ സാധ്യമാകൂ. സ്വന്തം ഇഷ്ടപ്രകാരം ഉപഭോക്താവിന്റെ എഫ്ഡിയിലേക്ക് കടന്നുകയറുന്നത് ബാങ്കിന്റെ ഭാഗത്തുനിന്നുള്ള ഗുരുതരമായ വഞ്ചനയാണ്. ഇത്തരമൊരു നടപടിയെ ബാങ്കിങ് നിയമത്തിലെവിടെയും ന്യായീകരിക്കാനാവില്ലെന്നും കോടതി അടിവരയിട്ടു.
ബാങ്കിന്റെ പെരുമാറ്റം അങ്ങേയറ്റം അപലപനീയമാണെന്ന് വ്യക്തമാക്കിയ കോടതി, പിൻവലിച്ച 19,90,693 രൂപയും ഫിക്സഡ് ഡിപ്പോസിറ്റിന് നൽകിയിരുന്ന പലിശ സഹിതം നാലാഴ്ചയ്ക്കകം യുവതിക്ക് തിരികെ നൽകാനും ഒപ്പം ഒരു ലക്ഷം രൂപ നഷ്ടപരിഹാരം കൈമാറാനും ഉത്തരവിട്ടു.
by Midhun HP News | Sep 18, 2026 | Latest News, ദേശീയ വാർത്ത
അബുദാബി: യുഎയില്‍ വരുംമാസങ്ങളില്‍ മഴ ശക്തമാകുമെന്ന് ദേശീയ കാലാവസ്ഥാ കേന്ദ്രം(എന്‍സിഎം). തണുത്ത കാലാവസ്ഥയില്‍ യുഎയില്‍ സാധാരണ ലഭിക്കുന്നതിക്കോള്‍ കൂടുതല്‍ മഴ ലഭിക്കുമെന്നാണ് കാലാവസ്ഥാ കേന്ദ്രത്തിന്റെ മുന്നറിയിപ്പ്.
ഒക്ടോബര്‍ മുതല്‍ ജനുവരി വരെയുള്ള മാസങ്ങളില്‍ ശരാശരിയില്‍ കൂടുതല്‍ മഴ ലഭിക്കുമെന്നാണ് ദീര്‍ഘകാല കാലാവസ്ഥാ മാതൃകകള്‍ സൂചിപ്പിക്കുന്നത്. ആഗോള കാലാവസ്ഥാ വ്യതിയാനമായ ‘എല്‍ നിനോ’ ശക്തമാകുന്നതിന്റെ പശ്ചാത്തലത്തിലാണ് കാലാവസ്ഥാ കേന്ദ്രം ഇത്തരമൊരു സൂചന നല്‍കുന്നത്. എന്നാല്‍ കൂടുതല്‍ മഴ ലഭിക്കുമെന്ന പ്രവചനം അതിതീവ്ര കൊടുങ്കാറ്റിനോ കനത്ത വെള്ളപ്പൊക്കത്തിനോ ഉള്ള മുന്നറിയിപ്പായി തെറ്റിദ്ധരിക്കരുതെന്ന് ദേശീയ കാലാവസ്ഥാ കേന്ദ്രത്തിലെ വിദഗ്ദ്ധന്‍ അഹമ്മദ് ഹബീബ് വ്യക്തമാക്കി.
കിഴക്കന്‍ ഉഷ്ണമേഖലാ പസഫിക് സമുദ്രത്തിലെ ഉപരിതല ജലത്തിന് അസാധാരണമായ ചൂട് അനുഭവപ്പെടുന്ന കാലാവസ്ഥാ പ്രതിഭാസമാണ് എല്‍ നിനോ. ലോകത്തെ കാലാവസ്ഥാ രീതികളെ സ്വാധീനിക്കാന്‍ ഈ പ്രതിഭാസത്തിന് കഴിയുമെങ്കിലും, ഇതിന്റെ സാന്നിധ്യം ചില ഇടങ്ങളില്‍ തീവ്രമായ കാലാവസ്ഥാ വ്യതിയാനങ്ങള്‍ ഉണ്ടാക്കില്ല. എല്‍ നിനോയില്‍ യുഎഇയില്‍ നേരിട്ട് പ്രകൃതിദുരന്തങ്ങള്‍ക്ക് കാരണമാകണമെന്നില്ല.
യുഎഇയില്‍ ശക്തമായ മഴ ലഭിക്കണമെങ്കില്‍ കാറ്റിന്റെ ഗതി, അന്തരീക്ഷ ഈര്‍പ്പം, താപനില, വായുമര്‍ദ്ദ വ്യതിയാനങ്ങള്‍ എന്നിവ ഒത്തുവരേണ്ടതുണ്ട്. എല്‍ നിനോ മൂലം ഗുണകരമായ മഴ ലഭിക്കാന്‍ സാധ്യതയുണ്ടെങ്കിലും അത് വെള്ളപ്പൊക്കത്തിലേക്ക് നയിക്കുമോ എന്നത് ആ സമയത്തെ പ്രാദേശിക വായുമര്‍ദ്ദ വ്യതിയാനങ്ങളെ ആശ്രയിച്ചിരിക്കും. എല്‍ നിനോ കാരണം രാജ്യത്ത് കനത്ത പ്രളയമുണ്ടാകുമെന്ന രീതിയില്‍ സോഷ്യല്‍ മീഡിയയില്‍ പ്രചരിക്കുന്ന മുന്നറിയിപ്പുകള്‍ വ്യാജമാണെന്ന് കാലാവസ്ഥാ കേന്ദ്രം അറിയിച്ചു.
Recent Comments