by Midhun HP News | Sep 10, 2026 | Latest News, ദേശീയ വാർത്ത
ഡല്‍ഹി: ബ്രിക്‌സ് ഉച്ചകോടിയില്‍ പങ്കെടുക്കാനായി ചൈനീസ് പ്രസിഡന്റ് ഷി ജിന്‍പിങ് ഇന്ത്യയിലെത്തും. ദിവസങ്ങളായി നീണ്ട നയതന്ത്ര അനിശ്ചിതത്വങ്ങള്‍ക്കൊടുവിലാണ് ജിന്‍പിങ്ങിന്റെ ഡല്‍ഹി സന്ദര്‍ശനം ചൈനീസ് വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചത്. ശനി, ഞായര്‍ ദിവസങ്ങളില്‍ ന്യൂഡല്‍ഹിയില്‍ നടക്കുന്ന 18-ാമത് ബ്രിക്‌സ് ഉച്ചകോടിയില്‍ പ്രധാനമന്ത്രി നരേന്ദ്ര മോദിയുടെ ക്ഷണം സ്വീകരിച്ചാണ് ജിന്‍പിങ് പങ്കെടുക്കുന്നത്.
2020ല്‍ ഗാല്‍വന്‍ താഴ്വരയിലുണ്ടായ അതിര്‍ത്തി സംഘര്‍ഷത്തെ തുടർന്ന് ഇരു രാജ്യങ്ങളും തമ്മിലുള്ള ബന്ധത്തില്‍ വിള്ളല്‍ വീണതിനു ശേഷം ആദ്യമായാണ് ചൈനീസ് പ്രസിഡന്റ് ഇന്ത്യയിലേക്ക് വരുന്നത്. 2019ല്‍ തമിഴ്നാട്ടിലെ മാമല്ലപുരത്ത് പ്രധാനമന്ത്രി മോദിയുമായി നടന്ന അനൗദ്യോഗിക ഉച്ചകോടിക്കായാണ് അദ്ദേഹം അവസാനമായി ഇന്ത്യ സന്ദര്‍ശിച്ചത്. കഴിഞ്ഞ വര്‍ഷം പ്രധാനമന്ത്രി നരേന്ദ്ര മോദി ചൈന സന്ദര്‍ശിച്ചതിനെ തുടര്‍ന്നാണ് ഇരു രാജ്യങ്ങളും തമ്മിലുള്ള നയതന്ത്ര ബന്ധത്തില്‍ പുരോഗതി ദൃശ്യമായത്.
ഇന്ത്യയും ചൈനയും പരസ്പരം മത്സരിക്കുകയല്ലെന്നും വികസന പങ്കാളികളാണെന്നുമാണ് ഇരു നേതാക്കളുടെയും നിലപാടെന്ന് ചൈനീസ് വിദേശകാര്യ മന്ത്രാലയം വ്യക്തമാക്കി. ബ്രിക്‌സ് ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദിയും ഷി ജിന്‍പിങ്ങും തമ്മില്‍ ഉഭയകക്ഷി ചര്‍ച്ചകള്‍ നടക്കുമെന്നാണ് പ്രതീക്ഷിക്കുന്നത്. വിവിധ മേഖലകളിലെ സഹകരണം ചര്‍ച്ചയാകും. കഴിഞ്ഞ വര്‍ഷത്തെ ഉഭയകക്ഷി വ്യാപാരം സര്‍വകാല റെക്കോഡായ 155 ബില്യന്‍ ഡോളറില്‍ എത്തിയിരുന്നു.
by Midhun HP News | Sep 10, 2026 | Latest News, ദേശീയ വാർത്ത
ബംഗലൂരു: സര്‍ക്കാര്‍ പരിപാടികളിലെ വന്ദേമാതരം ആലാപനത്തില്‍ കേന്ദ്രസര്‍ക്കാര്‍ നിര്‍ദേശം തള്ളിക്കളഞ്ഞ് കര്‍ണാടക സര്‍ക്കാര്‍. സംസ്ഥാനത്തെ ഔദ്യോഗിക പരിപാടികളില്‍ ഇനി മുതല്‍ ദേശീയ ഗീതമായ വന്ദേമാതരത്തിന്റെ ആദ്യ രണ്ട് ഖണ്ഡികകള്‍ മാത്രം ആലപിച്ചാല്‍ മതിയെന്ന് കര്‍ണാടക സര്‍ക്കാര്‍ ഉത്തരവിറക്കി. രാഷ്ട്രപതി, ഉപരാഷ്ട്രപതി, പ്രധാനമന്ത്രി, ഗവര്‍ണര്‍ എന്നിവര്‍ നേരിട്ട് പങ്കെടുക്കുന്ന പരിപാടികളില്‍ വന്ദേമാതരം പൂര്‍ണമായും ആലപിക്കാമെന്നും ഉത്തരവില്‍ വ്യക്തമാക്കിയിട്ടുണ്ട്.
സര്‍ക്കാരുകളുടെ ഔദ്യോഗിക പരിപാടികളില്‍ വന്ദേമാതരം പൂര്‍ണമായി ആലപിക്കണമെന്ന കേന്ദ്ര ആഭ്യന്തര മന്ത്രാലയം പുറപ്പെടുവിച്ച മാര്‍ഗ്ഗനിര്‍ദ്ദേശങ്ങള്‍ക്ക് വിരുദ്ധമാണ് കര്‍ണാടക സര്‍ക്കാരിന്റെ പുതിയ ഉത്തരവ്. പൊതുപരിപാടികളുടെ സമയദൈര്‍ഘ്യം ക്രമീകരിക്കുന്നതിന് വേണ്ടിയാണ് വന്ദേമാതര ആലാപനം രണ്ട് ഖണ്ഡികയില്‍ ചുരുക്കിയതെന്നാണ് ഡികെ ശിവകുമാര്‍ സര്‍ക്കാര്‍ നല്‍കുന്ന വിശദീകരണം.
1937ല്‍ കോണ്‍ഗ്രസ് സ്വീകരിച്ച ചരിത്രപരമായ നിലപാടിന്റെ തുടര്‍ച്ചയായാണ് രണ്ട് ഖണ്ഡികകള്‍ മാത്രം ആലപിക്കാന്‍ തീരുമാനിച്ചതെന്നും കോണ്‍ഗ്രസ് നേതൃത്വം വ്യക്തമാക്കുന്നു. ദേശീയ ഗാനമായ ജനഗണമനക്ക് നല്‍കുന്ന നിയമപരമായ സംരക്ഷണം വന്ദേമാതരത്തിനും നല്‍കിക്കൊണ്ട് കേന്ദ്രം നിയമം പാസ്സാക്കിയിരുന്നു. തുടര്‍ന്നാണ് സംസ്ഥാനങ്ങളില്‍ ഔദ്യോഗിക പരിപാടികളിലും ചടങ്ങുകളിലും വന്ദേമാതരത്തിന്റെ പൂര്‍ണരൂപം ആലപിക്കുകയോ പ്ലേ ചെയ്യുകയോ വേണമെന്ന് നിര്‍ദേശം നല്‍കിയത്.
by Midhun HP News | Sep 10, 2026 | Latest News, ദേശീയ വാർത്ത
ചെന്നൈ: കഴിഞ്ഞ ഏപ്രിൽ മാസത്തിൽ നടന്ന നിയമസഭാ തെരഞ്ഞെടുപ്പിലെ ചരിത്ര വിജയത്തിന് ശേഷം തമിഴ്‌നാട്ടിൽ ഭരണത്തിലേറിയ തമിഴക വെട്രി കഴകം (ടിവികെ) തങ്ങളുടെ ആദ്യ ഉപതെരഞ്ഞെടുപ്പ് പരീക്ഷണത്തിലേക്ക്. ഒക്ടോബർ 6-ന് നടക്കാനിരിക്കുന്ന മധുരാന്തകം, ധാരാപുരം എന്നീ രണ്ട് നിയമസഭാ മണ്ഡലങ്ങളിലെ ഉപതെരഞ്ഞെടുപ്പുകളിലേക്കുള്ള സ്ഥാനാർത്ഥികളെ ഭരണകക്ഷിയായ ടിവികെ ഔദ്യോഗികമായി പ്രഖ്യാപിച്ചു.
സ്ഥാനാർത്ഥികളായി രാജിവെച്ചെത്തിയ മുൻ എംഎൽഎമാർ
മധുരാന്തകം മണ്ഡലത്തിൽ കെ. മരഗതം കുമാരവേലും ധാരാപുരത്ത് പി. സത്യഭാമയുമാണ് ടിവികെ സ്ഥാനാർത്ഥികളായി ജനവിധി തേടുക. ഇരുവർക്കും മണ്ഡലങ്ങളിലുള്ള ശക്തമായ വ്യക്തിപ്രഭാവവും വോട്ടുബാങ്കും നിലനിർത്തുക എന്ന ലക്ഷ്യത്തോടെയാണ് പാർട്ടി സ്ഥാപകനും മുഖ്യമന്ത്രിയുമായ സി. ജോസഫ് വിജയ് സ്ഥാനാർത്ഥികളെ പ്രഖ്യാപിച്ചത്.
ഏപ്രിൽ 23-ന് നടന്ന പൊതുതെരഞ്ഞെടുപ്പിൽ എഐഎഡിഎംകെ സ്ഥാനാർത്ഥികളായി വിജയിച്ചവരാണ് ഇരുവരും. പിന്നീട് എംഎൽഎ സ്ഥാനം രാജിവെച്ച് ഇവർ ടിവികെയിൽ ചേരുകയായിരുന്നു. ഇതോടെയാണ് രണ്ട് മണ്ഡലങ്ങളിലും ഉപതെരഞ്ഞെടുപ്പിന് കളമൊരുങ്ങിയത്. നിലവിൽ ടിവികെയുടെ ഡെപ്യൂട്ടി ജനറൽ സെക്രട്ടറിയാണ് മരഗതം കുമാരവേൽ. സത്യഭാമ തിരുപ്പൂർ സൗത്ത്-ഈസ്റ്റ് ജില്ലാ സെക്രട്ടറിയായും പ്രവർത്തിച്ചുവരികയാണ്.
‘സെക്യുലർ സോഷ്യൽ ജസ്റ്റിസ് വിക്ടറി ഫ്രണ്ട്’ ബാനറിൽ മത്സരം
കോൺഗ്രസും എംഡിഎംകെയും ഉൾപ്പെടെയുള്ള സഖ്യകക്ഷികളെ അണിനിരത്തി രൂപീകരിച്ച ‘സെക്യുലർ സോഷ്യൽ ജസ്റ്റിസ് വിക്ടറി ഫ്രണ്ട്’ (മതനിരപേക്ഷ സാമൂഹിക നീതി മുന്നണി) എന്ന മുന്നണിയുടെ ബാനറിലാണ് ടിവികെ ഈ ഉപതെരഞ്ഞെടുപ്പുകളെ നേരിടുന്നത്. ബുധനാഴ്ച ചേർന്ന ഘടകകക്ഷി നേതാക്കളുടെ യോഗത്തിലാണ് മുന്നണിയുടെ പേര് ഔദ്യോഗികമായി തീരുമാനിച്ചത്.
വിജയം മാത്രമാണ് ഏക ലക്ഷ്യമെന്നും ചരിത്ര വിജയം ഉറപ്പാക്കാൻ പാർട്ടി ഭാരവാഹികളും പ്രവർത്തകരും അണിനിരക്കണമെന്നും മുഖ്യമന്ത്രി വിജയ് ആഹ്വാനം ചെയ്തു. ടിവികെ സർക്കാരിന്റെ നൂറു ദിനങ്ങളിലെ വികസന നേട്ടങ്ങൾ ജനങ്ങളിലേക്ക് എത്തിച്ച് വിജയം സ്വന്തമാക്കുമെന്ന് സ്ഥാനാർത്ഥി മരഗതം കുമാരവേൽ പ്രതികരിച്ചു.
പ്രതിരോധം തീർക്കാൻ ഡിഎംകെയും എഐഎഡിഎംകെയും
ടിവികെയെ നേരിടാൻ അഭിഭാഷകരായ രണ്ട് പ്രമുഖ സ്ഥാനാർത്ഥികളെയാണ് പ്രധാന പ്രതിപക്ഷമായ ഡിഎംകെ കളത്തിലിറക്കിയിരിക്കുന്നത്. മധുരാന്തകം മണ്ഡലത്തിൽ മുൻ എംഎൽഎ അഡ്വ. ഐ. പരന്താമനും ധാരാപുരത്ത് അഡ്വ. എസ്. സുഗന്ധ്യയും ഡിഎംകെ സ്ഥാനാർത്ഥികളായി മത്സരിക്കും. അതേസമയം എഐഎഡിഎംകെ തങ്ങളുടെ സ്ഥാനാർത്ഥി നിർണ്ണയ ചർച്ചകളിലാണ്. അപേക്ഷകൾ ക്ഷണിച്ച് ഉടൻതന്നെ സ്ഥാനാർത്ഥികളെ പ്രഖ്യാപിക്കുമെന്ന് പാർട്ടി വൃത്തങ്ങൾ അറിയിച്ചു. ഒക്ടോബർ 6-നാണ് വോട്ടെടുപ്പ് നടക്കുക. ഒക്ടോബർ 9-ന് വോട്ടെണ്ണൽ നടക്കും. സർക്കാർ രൂപീകരണത്തിന് ശേഷം നടക്കുന്ന ആദ്യ തെരഞ്ഞെടുപ്പായതിനാൽ ടിവികെ സർക്കാരിന്റെ ജനപ്രീതി വിലയിരുത്തപ്പെടുന്ന നിർണ്ണായക മത്സരമായി ഈ ഉപതെരഞ്ഞെടുപ്പ് മാറും.
by Midhun HP News | Sep 10, 2026 | Latest News, ദേശീയ വാർത്ത
ദുബൈ: ദുബൈ ഡ്യൂട്ടി ഫ്രീ മില്ലേനിയം മില്യനയര്‍ നറുക്കെടുപ്പില്‍ മലയാളിക്ക് ഭാഗ്യം. അജ്മാനില്‍ ഫോട്ടോഗ്രാഫറായി ജോലി ചെയ്യുന്ന മലയാളി ജിജോ പുളിക്കത്തൊടി (41)ക്കാണ് 10 ലക്ഷം ഡോളര്‍ (ഏകദേശം 9 കോടിയിലേറെ രൂപ) സമ്മാനം അടിച്ചത്.
ദുബൈ രാജ്യാന്തര വിമാനത്താവളത്തിലെ കോണ്‍കോഴ്‌സ് ബിയില്‍ ബുധനാഴ്ച നടന്ന നറുക്കെടുപ്പിലാണ് ജിജോയെ ഭാഗ്യം തേടിയെത്തിയത്. ഓഗസ്റ്റ് 22-ന് ഓണ്‍ലൈന്‍ വഴി എടുത്ത 4891 എന്ന ടിക്കറ്റിനാണ് സമ്മാനം അടിച്ചത്.
കഴിഞ്ഞ നാല് വര്‍ഷമായി അജ്മാനില്‍ താമസിക്കുന്ന ജിജോ തന്റെ 17 സുഹൃത്തുക്കള്‍ക്കൊപ്പം ചേര്‍ന്നാണ് ടിക്കറ്റ് എടുത്തത്. ഈ തുക തങ്ങള്‍ക്കെല്ലാവര്‍ക്കും വലിയ സഹായമാകുമെന്ന് ജിജോ പറഞ്ഞു. 1999-ല്‍ മില്ലേനിയം മില്യനയര്‍ ആരംഭിച്ചതിന് ശേഷം ഈ സമ്മാനം നേടുന്ന 283-ാമത്തെ ഇന്ത്യക്കാരനാണ് കേരളത്തില്‍ നിന്നുള്ള ജിജോ. മില്ലേനിയം മില്യനയര്‍ പരമ്പര 554-ന്റെ ഭാഗമായി നടന്ന മറ്റൊരു നറുക്കെടുപ്പില്‍ ദുബൈയിലെ ഇന്ത്യന്‍ പ്രവാസി രോഹന്‍ പ്രകാശ് ഫെര്‍ണാണ്ടസും 10 ലക്ഷം ഡോളര്‍ വിജയിച്ചു. 1710 എന്ന ടിക്കറ്റ് നമ്പറാണ് അദ്ദേഹത്തിന് ഭാഗ്യം നല്‍കിയത്.
ഡ്യൂട്ടി ഫ്രീയുടെ ഫൈനസ്റ്റ് സര്‍പ്രൈസ് നറുക്കെടുപ്പില്‍ ഷാര്‍ജയില്‍ താമസിക്കുന്ന ഇന്ത്യന്‍ സ്വദേശിയായ യോഗേഷ് ധനക് (53) റേഞ്ച് റോവര്‍ കാര്‍ സമ്മാനമായി നേടി. 1243 എന്ന ടിക്കറ്റ് നമ്പറിലൂടെയാണ് നേട്ടം. കഴിഞ്ഞ 15 വര്‍ഷമായി യാത്രകളിലെല്ലാം ടിക്കറ്റെടുക്കുന്ന ഇദ്ദേഹത്തിന് ഇതാദ്യമായാണ് സമ്മാനം ലഭിക്കുന്നത്. ദുബൈയില്‍ താമസിക്കുന്ന തുര്‍ക്കി പൗരന്‍ എസെര്‍ എറോള്‍ ബിഎംഡബ്ല്യു ബൈക്കും ദുബായിലെ ഇന്ത്യക്കാരനായ മെല്‍വിന്‍ പോണ്ടസ് അപ്രീലിയ ബൈക്കും സമ്മാനമായി നേടി. ഇദ്ദേഹത്തിന് ഇത് രണ്ടാം തവണയാണ് ഡ്യൂട്ടി ഫ്രീ നറുക്കെടുപ്പില്‍ ബൈക്ക് സമ്മാനമായി ലഭിക്കുന്നത്.
by Midhun HP News | Sep 9, 2026 | Latest News, ദേശീയ വാർത്ത
ന്യൂഡല്‍ഹി: കേരളം ഉള്‍പ്പടെ അഞ്ച് സംസ്ഥാനങ്ങളിലെ നിയമസഭാ തെരഞ്ഞെടുപ്പ് സമയത്ത് ബിജെപിക്ക് സംഭാവനയായി ലഭിച്ചത് 1472.8 കോടി രൂപ. അസം,തമിഴ്‌നാട്, പുതുച്ചേരി സംസ്ഥാനങ്ങളിലെ തെരഞ്ഞെടുപ്പിന് ബിജെപി ചെലവഴിച്ചത് 160 കോടി രൂപ. കേന്ദ്ര തെരഞ്ഞെടുപ്പ് കമ്മീഷന്‍ പുറത്തുവിട്ട കണക്കുകളിലാണ് ഇക്കാര്യം വ്യക്തമാക്കിയത്.
2026 മാര്‍ച്ച് 15വരെ ബിജെപിയുടെ അക്കൗണ്ടില്‍ ഉണ്ടായിരുന്നത് 6726.6 കോടിയായിരുന്നു. 2026 മെയ് 6-ന് തെരഞ്ഞെടുപ്പ് പൂര്‍ത്തിയായപ്പോള്‍ പാര്‍ട്ടിയുടെ അക്കൗണ്ട് 7,627.2 കോടി രൂപയായി ഉയര്‍ന്നു. ഇപ്പോള്‍ പുറത്തുവിട്ട കണക്കുകളില്‍ മൂന്ന് സംസ്ഥാനങ്ങളില്‍ ബിജെപി തെരഞ്ഞെടുപ്പിനായി ചെലവിട്ട തുകയുമുണ്ട്.
അസം,തമിഴ്‌നാട്, പുതുച്ചേരി എന്നിവിടങ്ങളില്‍ കൂടുതല്‍ തുക ചെലവിട്ടത് അസമിലാണ്. 96.3 കോടി രൂപയാണ് ഇവിടെ ചെലവിട്ടത്. തമിഴ്‌നാട്ടില്‍ 51.6 കോടി രൂപയും പുതുച്ചേരിയില്‍ 11.9 കോടി രൂപയുമാണ് ചെലവിട്ടത്. അതേസമയം പശ്ചിമ ബംഗാള്‍, കേരളം എന്നീ സംസ്ഥാനങ്ങളിലെ തെരഞ്ഞെടുപ്പ് ചെലവ് കണക്കുകള്‍ തെരഞ്ഞെടുപ്പ് കമ്മീഷന്‍ ഇതുവരെ പുറത്തുവിട്ടിട്ടില്ല. ബംഗാളില്‍ ചരിത്രത്തിലാദ്യമായി ബിജെപി അധികാരത്തില്‍ എത്തുകയും കേരളത്തില്‍ മൂന്ന് ഇടങ്ങളില്‍ വിജയം നേടുകയും ചെയ്തു.
by Midhun HP News | Sep 9, 2026 | Latest News, ദേശീയ വാർത്ത
വാഷിങ്ടണ്‍: അമേരിക്കന്‍ യുദ്ധക്കപ്പലുകള്‍ ആക്രമിച്ചതിന് പിന്നാലെ ഇറാനെതിരെ തിരിച്ചടിച്ച് അമേരിക്ക. അഞ്ച് ഇറാനിയന്‍ ക്രൂഡ് ഓയില്‍ ടാങ്കറുകള്‍ യുഎസ് സൈന്യം തകര്‍ത്തതായി യുഎസ് സെന്‍ട്രല്‍ കമാന്‍ഡ് അറിയിച്ചു. ബാലിസ്റ്റിക് മിസൈലുകള്‍ ഉപയോഗിച്ച് തങ്ങളുടെ യുദ്ധക്കപ്പല്‍ ആക്രമിക്കാന്‍ ഇറാന്‍ നടത്തിയ രണ്ട് ശ്രമങ്ങള്‍ക്ക് മറുപടിയായാണ് ആക്രമണങ്ങളെന്ന് സെന്‍ട്രല്‍ കമാന്‍ഡ പ്രസ്താവനയില്‍ പറഞ്ഞു.
ഇറാന്റെ പ്രധാന എണ്ണക്കയറ്റുമതി കേന്ദ്രമായ ഖാര്‍ഗ് ദ്വീപിന് വെറും 6 കിലോമീറ്റര്‍ അകലെ വെച്ച് ഒരു ഇറാനിയന്‍ എണ്ണക്കപ്പലിന് നേരെ അമേരിക്കന്‍ മിസൈല്‍ പതിച്ചതായി ഇറാന്റെ തസ്നിം വാര്‍ത്താ ഏജന്‍സി റിപ്പോര്‍ട്ട് ചെയ്തു. ഒമാന്‍ ഉള്‍ക്കടലിലെ ജാസ്‌കിന് സമീപം രണ്ടാമതൊരു എണ്ണക്കപ്പലിന് നേരെയും ആക്രമണം നടന്നിട്ടുണ്ട്.
ഇറാന്‍ ജാസ്‌കിലെ തെക്കന്‍ തുറമുഖത്തിനും പേര്‍ഷ്യന്‍ ഗള്‍ഫിലെ ഖാര്‍ഗ് ദ്വീപിനും സമീപം കുറഞ്ഞത് മൂന്ന് ഇറാനിയന്‍ എണ്ണ ടാങ്കറുകളെങ്കിലും യുഎസ് സൈന്യം ആക്രമിച്ചതായി ഇറാനിയന്‍ സ്റ്റേറ്റ് ടെലിവിഷനും റിപ്പോര്‍ട്ട് ചെയ്തു. കപ്പലുകളില്‍ നിന്ന് ജീവനക്കാരെ ഒഴിപ്പിച്ചതായും റിപ്പോര്‍ട്ടുകള്‍ പറഞ്ഞു. അമേരിക്കന്‍ തിരിച്ചടിക്ക് മറുപടിയായി യുഎസ് സൈന്യത്തിന് താവളമൊരുക്കുന്ന കുവൈത്ത്, ബഹ്‌റൈന്‍ തുറമുഖങ്ങളിലെ എണ്ണക്കപ്പലുകള്‍ തങ്ങള്‍ ലക്ഷ്യമിടുമെന്ന് ഇറാന്റെ റെവല്യൂഷണറി ഗാര്‍ഡ്സ് മുന്നറിയിപ്പ് നല്‍കിയിട്ടുണ്ട്. തുടര്‍ന്ന് ജീവനക്കാരോട് എത്രയും വേഗം ഈ കപ്പലുകളില്‍ നിന്ന് ഒഴിഞ്ഞുപോകാന്‍ ഇറാന്‍ നിര്‍ദേശം പുറപ്പെടുവിച്ചു.
Recent Comments