by Midhun HP News | Sep 12, 2026 | Latest News, ദേശീയ വാർത്ത
ഡല്‍ഹി: ബ്രിക്സ് ഉച്ചകോടിക്ക് ഇന്ന് ഡല്‍ഹിയില്‍ തുടക്കം. ആഗോള നയതന്ത്രരംഗത്ത് നിര്‍ണായകമാകുന്ന തീരുമാനങ്ങള്‍ ഉച്ചകോടിയിലുണ്ടാകുമെന്നാണ് പ്രതീക്ഷിക്കുന്നത്. ചൈനീസ് പ്രസിഡന്റ് ഷീ ജിന്‍ പിങുമായി ഇന്ന് പ്രധാനമന്ത്രി കൂടിക്കാഴ്ച നടത്തും. ഏഴ് വര്‍ഷങ്ങള്‍ക്ക് ശേഷമാണ് അദ്ദേഹം ഇന്ത്യയിലെത്തുന്നത്. അതിര്‍ത്തി തര്‍ക്കത്തില്‍ അസ്വാരസ്യം നിലനില്‍ക്കെയാണ് ഇരുനേതാക്കളും തമ്മിലുള്ള കൂടിക്കാഴ്ചയെന്നതും ശ്രദ്ധേയമാണ്.
റഷ്യ-യുക്രെയ്ന്‍ യുദ്ധം, പശ്ചിമേഷ്യയിലെ സംഘര്‍ഷം, ഹോര്‍മുസ് കടലിടുക്കുമായി ബന്ധപ്പെട്ട തര്‍ക്കങ്ങള്‍, യുഎസ് ഉയര്‍ത്തുന്ന തീരുവ വെല്ലുവിളി എന്നിവയെല്ലാം പ്രതിസന്ധി സൃഷ്ടിക്കുന്നതിനിടെയാണ് ഉച്ചകോടി. ബിംസ്റ്റെക് കൂട്ടായ്മയുടെ അധ്യക്ഷസ്ഥാനത്തുള്ള ബംഗ്ലദേശിനെ ക്ഷണിച്ചിരുന്നെങ്കിലും പ്രധാനമന്ത്രി താരിഖ് റഹ്മാന്‍ എത്തിയേക്കില്ല. വ്യാപാരം, ഊര്‍ജസുരക്ഷ, സാമ്പത്തിക വിഷയങ്ങള്‍ അടക്കം ഉച്ചകോടിയില്‍ ചര്‍ച്ചയാകും.
ഉച്ചകോടയില്‍ പങ്കെടുക്കുന്നതിനായി റഷ്യന്‍ പ്രസിഡന്റ് വ്‌ളാദിമിര്‍ പുടിന്‍, ഇറാന്‍ പ്രസിഡന്റ് മസൂദ് പെസെഷ്‌കിയാന്‍ ഇന്ത്യയിലെത്തി. പുടിനെ കൂടാതെ റഷ്യയുക്രെയ്ന്‍ യുദ്ധം, പശ്ചിമേഷ്യയിലെ സംഘര്‍ഷം, ഹോര്‍മുസ് കടലിടുക്കുമായി ബന്ധപ്പെട്ട തര്‍ക്കങ്ങള്‍, യുഎസ് ഉയര്‍ത്തുന്ന തീരുവ വെല്ലുവിളി എന്നിവയെല്ലാം പ്രതിസന്ധി സൃഷ്ടിക്കുന്നതിനിടെയാണ് ഉച്ചകോടി. ബിംസ്റ്റെക് കൂട്ടായ്മയുടെ അധ്യക്ഷസ്ഥാനത്തുള്ള ബംഗ്ലദേശിനെ ക്ഷണിച്ചിരുന്നെങ്കിലും പ്രധാനമന്ത്രി താരിഖ് റഹ്മാന്‍ എത്തിയേക്കില്ല. വ്യാപാരം, ഊര്‍ജസുരക്ഷ, സാമ്പത്തിക വിഷയങ്ങള്‍ അടക്കം ഉച്ചകോടിയില്‍ ചര്‍ച്ചയാകും.
പ്രാദേശിക സമാധാനവും സ്ഥിരതയും നിലനിര്‍ത്താന്‍ ആത്മാര്‍ഥ പരിശ്രമങ്ങളുണ്ടാകണമെന്ന് പശ്ചിമേഷ്യന്‍ സംഘര്‍ഷങ്ങളുടെ പശ്ചാത്തലത്തില്‍ പ്രധാനമന്ത്രി നരേന്ദ്ര മോദി, ഇറാന്‍ പ്രസിഡന്റ് മസൂദ് പെസെഷ്‌കിയാനുമായുള്ള കൂടിക്കാഴ്ചയില്‍ ആവശ്യപ്പെട്ടു.
നയതന്ത്ര ചര്‍ച്ചകളിലൂടെയും ആശയവിനിമയങ്ങളിലൂടെയും സംഘര്‍ഷങ്ങള്‍ അവസാനിപ്പിക്കണമെന്ന ഇന്ത്യയുടെ നിലപാട് ആവര്‍ത്തിച്ചു. ഉൗര്‍ജപ്രതിസന്ധി പരിഹരിക്കാന്‍ സാധ്യമായ എല്ലാ നടപടികളും സ്വീകരിക്കണം. ഇന്ധന, വാതക കപ്പലുകള്‍ക്ക് സുഗമസഞ്ചാരത്തിന് വഴിയൊരുക്കണമെന്നും പ്രധാനമന്ത്രി പറഞ്ഞു. അതേസമയം, ബ്രിക്സ് രാജ്യങ്ങള്‍ തമ്മിലുള്ള വ്യാപാരത്തില്‍ ദേശീയ കറന്‍സികള്‍ ഉപയോഗിക്കണമെന്ന് മസൂദ് പെസെഷ്‌കിയാന്‍ വെള്ളിയാഴ്ച ബ്രിക്സ് ബിസിനസ് ഫോറത്തില്‍ ആവശ്യപ്പെട്ടു. അമേരിക്കയുടെ കടന്നാക്രമണങ്ങളെയും ഉപരോധങ്ങളെയും ഇറാന്‍ പ്രസിഡന്റ് രൂക്ഷമായി വിമര്‍ശിച്ചു.
സൈബര്‍ ആക്രണമങ്ങള്‍ ഉണ്ടാകാന്‍ സാധ്യതയുള്ളതിനാല്‍ സര്‍ക്കാര്‍ ഉദ്യോഗസ്ഥരും താല്‍ക്കാലിക ജീവനക്കാരും ജാഗ്രത പുലര്‍ത്തണമെന്ന് ഡല്‍ഹി പൊലീസ് മുന്നറിയിപ്പ് നല്‍കി. വിവിഐപി സഞ്ചാരം തടസ്സപ്പെടുത്താനും മനഃപൂര്‍വം പ്രശ്നങ്ങള്‍ ഉണ്ടാക്കാനും സാധ്യതയുണ്ടെന്ന് ഇന്റലിജന്‍സ് ബ്യൂറോയും പൊലീസിന് റിപ്പോര്‍ട്ട് നല്‍കി. റഷ്യന്‍ പ്രസിഡന്റ് വ്ളാദിമര്‍ പുടിനും ഷി ജിന്‍ പിങ്ങിനും റഷ്യ, ചൈന സുരക്ഷാഏജന്‍സികള്‍ പ്രത്യേക സുരക്ഷാകവചങ്ങള്‍ ഒരുക്കിയിട്ടുണ്ട്. ഉച്ചകോടിയുടെ ഭാഗമായി ‘ഭാരത് ഇന്നോവേറ്റ്സ്’ പ്രദര്‍ശനവും അരങ്ങേറും. വിദ്യാഭ്യാസ മന്ത്രാലയം വിദേശകാര്യ മന്ത്രാലയത്തിന്റെ സഹകരണത്തോടെ സംഘടിപ്പിക്കുന്ന പ്രദര്‍ശനത്തില്‍ 37 ഇന്ത്യന്‍ ഡീപ്ടെക് സ്റ്റാര്‍ട്ടപ്പുകളും സംരംഭങ്ങളും അണിനിരക്കും.
by Midhun HP News | Sep 12, 2026 | Latest News, ദേശീയ വാർത്ത
ചെന്നൈ: വേളാങ്കണ്ണി പ്രധാന ദൈവാലയവും പ്രധാന അള്‍ത്താരയും ഒക്‌ടോബര്‍ 3 മുതല്‍ വിശ്വാസികള്‍ക്കായി 24 മണിക്കൂറും തുറന്നിടും. ഭക്തരുടെ അഭ്യര്‍ഥനകള്‍ മാനിച്ചാണ് തീരുമാനമെന്ന് തഞ്ചാവൂര്‍ രൂപത ബിഷപ്പ് റവ.ഡോ. ടി സഹായരാജ് അറിയിച്ചു.
സാധാരണ രാവിലെ അഞ്ചിനും രാത്രി എട്ടിനും ഇടയിലാണ് പള്ളി തുറന്നിടാറ്. എന്നാല്‍ ദൂരെ സ്ഥലങ്ങളില്‍ നിന്ന് എത്തുന്ന വിശ്വാസികള്‍ക്ക് വൈകിയ സമയങ്ങളില്‍ പള്ളിയില്‍ പ്രവേശിക്കാന്‍ കഴിയാതെ വരികയും രാത്രി മുഴുവന്‍ പുറത്ത് കാത്തുനില്‍ക്കേണ്ടി വരുകയും ചെയ്യുന്നത് പതിവാണ്.
ഇതേത്തുടര്‍ന്നാണ് പ്രധാന ദൈവാലയം 24 മണിക്കൂറും തുറന്നിടണമെന്ന് വിശ്വാസികളില്‍ നിന്ന് ആവശ്യം ഉയര്‍ന്നത്. വിഷയത്തില്‍ ദൈവാലയം ഭരണസമിതി ബിഷപ്പില്‍ നിന്ന് ഇക്കാര്യത്തില്‍ പ്രത്യേക അനുമതി നേടുകയായിരുന്നു.
by Midhun HP News | Sep 11, 2026 | Latest News, ദേശീയ വാർത്ത
ഡൽഹി: എൽനിനോ പ്രതിഭാസം ഇന്ത്യയിൽ ഗുരുതരമായ ആരോഗ്യ പ്രത്യാഘാതങ്ങൾ ഉണ്ടാക്കുമെന്നാണ് ലോകാരോഗ്യ സംഘടനയുടെ മുന്നറിയിപ്പ്. ദക്ഷിണേഷ്യയിൽ മഴയുടെ രീതിയിലും താപനിലയിലും ഉണ്ടാകുന്ന മാറ്റങ്ങൾ ഡെങ്കിപ്പനി പോലുള്ള കൊതുകുജന്യ രോഗങ്ങളുടെ വ്യാപനത്തിനും അമിതചൂട് മൂലമുള്ള ആരോഗ്യപ്രശ്നങ്ങൾക്കും സാഹചര്യമൊരുക്കുമെന്ന് ഡബ്ല്യുഎച്ച്ഒ വിശദീകരിക്കുന്നു. ഇന്ത്യയെ എൻനിനോയുടെ ആരോഗ്യപ്രത്യാഘാതങ്ങൾ കൂടുതലായി അനുഭവപ്പെടാൻ സാധ്യതയുള്ള രാജ്യങ്ങളുടെ പട്ടികയിലാണ് ഡബ്ല്യുഎച്ച്ഒ ഉൾപ്പെടുത്തിയിരിക്കുന്നത്.
എന്താണ് എൽനിനോ?
പസഫിക് സമുദ്രത്തിലെ മധ്യ-കിഴക്കൻ ഉഷ്ണമേഖലാ ഭാഗങ്ങളിൽ സമുദ്രോപരിതല ജലത്തിന്റെ താപനില സാധാരണയേക്കാൾ ഉയരുന്ന കാലാവസ്ഥാ പ്രതിഭാസമാണ് എൽനിനോ. ഇത് പസഫിക് മേഖലയിലെ മാത്രം മാറ്റമല്ല. ആഗോളതലത്തിൽ കാറ്റിന്റെ ഗതിയിലും മഴയിലും താപനിലയിലും മാറ്റങ്ങൾ വരുത്താൻ ഇതിന് സാധിക്കും.
ഇന്ത്യയിൽ എൽനിനോയുടെ സ്വാധീനം മഴയിലും ചൂടിലും പ്രതിഫലിക്കാം. നിലവിലെ പസഫിക് സമുദ്രത്തിലെ താപനില കഴിഞ്ഞ 1000 വർഷത്തിനിടയിലെ ഏറ്റവും ഉയർന്ന എൽനിനോ പ്രതിഭാസത്തിലേക്കാണ് വിരൽചൂണ്ടുന്നത്. അത് ഈ വർഷം അവസാനത്തോടെ പാരമ്യത്തിലെത്തും. അടുത്തവർഷം ഫെബ്രുവരിവരെ തുടരുമെന്നാണ് കാലാവസ്ഥ നിരീക്ഷണങ്ങൾ സൂചിപ്പിക്കുന്നത്.
എൽനിനോ എങ്ങനെ ഡെങ്കിപ്പനി സാധ്യത കൂട്ടുന്നു?
എൽനിനോ പ്രതിഭാസം നേരിട്ട് ഡെങ്കിപ്പനി ഉണ്ടാക്കുന്നില്ലെങ്കിലും താപനില, മഴ, ഈർപ്പം തുടങ്ങിയ കാലാവസ്ഥ ഘടകങ്ങളിൽ ഉണ്ടാകുന്ന മാറ്റങ്ങൾ ഏഡിസ് കൊതുകുകളുടെ പ്രജനനത്തിനും ഡെങ്കി വൈറസിന്റെ വ്യാപനത്തിനും അനുകൂലമായ സാഹചര്യം ഉണ്ടാക്കാം.
മഴയുടെ അളവിലും ഇടവേളകളിലും മാറ്റങ്ങളുണ്ടാകുമ്പോൾ വീടുകളിൽ വെള്ളം കെട്ടിനിൽക്കുന്ന സാഹചര്യം ഉണ്ടാകാം. അലക്ഷ്യമായി കൂട്ടിയിട്ടിരിക്കുന്ന പാത്രങ്ങൾ, ടയറുകൾ, ബക്കറ്റുകൾ, ചെടിച്ചട്ടികൾ, ടെറസുകൾ തുടങ്ങിയ ഇടങ്ങളിലെ ചെറിയ വെള്ളക്കെട്ടുകൾ പോലും ഏഡിസ് കൊതുകുകളുടെ പ്രജനന കേന്ദ്രങ്ങളാകാം. അതേസമയം, അമിത മഴയ്ക്ക് പിന്നാലെ ചൂടും ഈർപ്പവും കൂടുന്ന സാഹചര്യവും കൊതുകുകളുടെ പ്രജനനം വർധിപ്പിക്കാൻ ഇടയാക്കാം.
ചൂടും വലിയ ആരോഗ്യഭീഷണി
എൽനിനോ മൂലം ഇന്ത്യയിൽ ഉണ്ടാകുന്ന ഉയർന്ന താപനിലയാണ് ലോകാരോഗ്യ സംഘടന ചൂണ്ടിക്കാണിക്കുന്ന മറ്റൊരു പ്രധാന ആരോഗ്യപ്രശ്നം. അമിത ചൂട് കാരണം നിർജലീകരണം, ഹീറ്റ്‌സ്‌ട്രോക്ക് പോലുള്ള പ്രശ്നങ്ങൾ ഉണ്ടാകാം. നിലവിൽ ഹൃദ്രോഗം, ശ്വാസകോശ രോഗങ്ങൾ, വൃക്കരോഗങ്ങൾ, പ്രമേഹം തുടങ്ങിയ ആരോഗ്യപ്രശ്നങ്ങളുള്ളവരിൽ അമിതചൂട് രോഗാവസ്ഥ കൂടുതൽ ഗുരുതരമാക്കാനും സാധ്യതയുണ്ട്.
ചൂട് കൂടുമ്പോൾ ശരീരത്തിൽ നിന്ന് വിയർപ്പിലൂടെ കൂടുതൽ വെള്ളവും ലവണങ്ങളും നഷ്ടപ്പെടുന്നു. ആവശ്യത്തിന് വെള്ളം കുടിക്കാതിരുന്നാൽ നിർജലീകരണം ഉണ്ടാകാം. തലവേദന, ക്ഷീണം, തലകറക്കം, അമിതമായ വിയർപ്പ്, പേശിവേദന തുടങ്ങിയവ ചൂടുമായി ബന്ധപ്പെട്ട ആരോഗ്യപ്രശ്നങ്ങളുടെ മുന്നറിയിപ്പ് ലക്ഷണങ്ങളാകാം. ശരീര താപനില അപകടകരമായ രീതിയിൽ ഉയർന്ന് ബോധം നഷ്ടപ്പെടുന്ന അവസ്ഥ, ആശയക്കുഴപ്പം തുടങ്ങിയ ലക്ഷണങ്ങൾ ഉണ്ടാകുന്നത് ഹീറ്റ്സട്രോക്കിന്റേതാകാം. ഇത് അടിയന്തര ചികിത്സ ആവശ്യമായ അവസ്ഥയാണ്.
മഴ കുറയുന്നതും മറ്റൊരു പ്രശ്നം
എൽനിനോയുടെ സാഹചര്യത്തിൽ ചില പ്രദേശങ്ങളിൽ സാധാരണയെക്കാൾ കുറഞ്ഞ മഴയും കൂടുതൽ ചൂടും അനുഭവപ്പെടാൻ സാധ്യതയുണ്ടെന്നാണ് ഡബ്ല്യുഎച്ച്ഒയുടെ വിലയിരുത്തൽ. ദക്ഷിണേഷ്യയിലെ ചില മേഖലകളിൽ ഓഗസ്റ്റ് മുതൽ ഒക്ടോബർ വരെയുള്ള കാലയളവിൽ ഇത്തരം വ്യതിയാനങ്ങൾ ആരോഗ്യത്തെ ബാധിക്കാമെന്നാണ് മുന്നറിയിപ്പ്.
മഴ കുറയുന്നത് വെള്ളത്തിന്റെ ലഭ്യതയെ ബാധിക്കാം. ജലക്ഷാമം ഉണ്ടാകുമ്പോൾ ശുചിത്വം പാലിക്കുന്നതിലും സുരക്ഷിതമായ കുടിവെള്ളം ഉറപ്പാക്കുന്നതിലും ബുദ്ധിമുട്ടുകൾ ഉണ്ടാകാം. അതേസമയം, ചില പ്രദേശങ്ങളിൽ പെട്ടെന്നുള്ള കനത്ത മഴയും വെള്ളപ്പൊക്കവും ഉണ്ടാകുന്ന സാഹചര്യമുണ്ടെങ്കിൽ മലിനജലത്തിലൂടെ പകർച്ചവ്യാധികൾക്കുള്ള സാഹചര്യവും ഉണ്ടാകാം.
by Midhun HP News | Sep 11, 2026 | Latest News, ദേശീയ വാർത്ത
പട്ടാമ്പി: പാലക്കാട് തൃത്താല കൊപ്പം എറയൂരിലെ ക്ഷേത്രത്തിൽ അതിക്രമിച്ചുകയറി നിരീക്ഷണ ക്യാമറകൾ തുണികൊണ്ട് മറച്ചുവെച്ച ശേഷം മുൻവശത്തെ ഇരുമ്പ് ഗ്രിൽ മുറിച്ചുമാറ്റി കടത്തിയ സംഭവത്തിൽ ബിജെപി പ്രാദേശിക നേതാക്കൾക്കെതിരെ പോലീസ് കേസെടുത്തു. എറയൂർ ശ്രീ തിരുവളയനാട് ക്ഷേത്രത്തിൽ നടന്ന മോഷണത്തിലാണ് ബിജെപിയുടെ മുതിർന്ന പ്രാദേശിക നേതാക്കൾ ഉൾപ്പെടെയുള്ളവർക്കെതിരെ കൊപ്പം പോലീസ് കേസ് രജിസ്റ്റർ ചെയ്തത്.
ക്ഷേത്ര ഭരണസമിതി നൽകിയ പരാതിയുടെ അടിസ്ഥാനത്തിൽ ബിജെപി കൊപ്പം മണ്ഡലം വൈസ് പ്രസിഡന്റായ മച്ചിങ്ങൽ വീട്ടിൽ എം. പരമേശ്വരൻ, ബിജെപി മുൻ പഞ്ചായത്ത് പ്രസിഡന്റായ ചില്ലവീട്ടിൽ ഗോപിനാഥൻ എന്നിവർക്കെതിരെയാണ് പോലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചിരിക്കുന്നത്.
ഇക്കഴിഞ്ഞ സെപ്റ്റംബർ മൂന്നിനാണ് കേസിനാസ്പദമായ സംഭവം നടന്നത്. രാത്രി സമയത്ത് ക്ഷേത്ര വളപ്പിൽ അതിക്രമിച്ചുകയറിയ പ്രതികൾ മോഷണ ദൃശ്യങ്ങൾ പതിയാതിരിക്കാനായി ക്ഷേത്രത്തിലെ സിസിടിവി ക്യാമറകൾ മറയ്ക്കുകയായിരുന്നു. തുടർന്ന് ക്ഷേത്രത്തിന്റെ മുൻഭാഗത്ത് സുരക്ഷയ്ക്കായി സ്ഥാപിച്ചിരുന്ന പ്രധാന ഇരുമ്പ് ഗ്രിൽ ഉപയോഗിച്ച് മുറിച്ചുമാറ്റി വാഹനത്തിൽ കടത്തിക്കൊണ്ടുപോയി.
എന്നാൽ, ക്യാമറകൾ പൂർണ്ണമായി മറയ്ക്കുന്നതിന് തൊട്ടുമുമ്പ് പ്രതികൾ രണ്ട് സിസിടിവി ക്യാമറകൾക്ക് മുന്നിലെത്തി ലെൻസ് മറയ്ക്കാൻ ശ്രമിക്കുന്ന ദൃശ്യങ്ങൾ ഡിജിറ്റൽ വീഡിയോ റിക്കോർഡറിൽ പതിഞ്ഞിരുന്നു. തുടർന്ന് ക്ഷേത്ര ഭാരവാഹികൾ ദൃശ്യങ്ങൾ പരിശോധിച്ച് പ്രതികളെ തിരിച്ചറിയുകയും കൊപ്പം പോലീസിൽ തെളിവുസഹിതം പരാതി നൽകുകയുമായിരുന്നു.
സംഭവത്തിൽ പൊതുമുതൽ നശിപ്പിക്കൽ, മോഷണം, അതിക്രമിച്ചുകയറൽ തുടങ്ങിയ വകുപ്പുകൾ ചുമത്തിയാണ് പോലീസ് നടപടി. കടത്തിക്കൊണ്ടുപോയ ഇരുമ്പ് ഗ്രിൽ കണ്ടെത്താനും കൃത്യത്തിൽ മറ്റാർക്കെങ്കിലും പങ്കുണ്ടോയെന്ന് കണ്ടെത്താനുമുള്ള തുടരന്വേഷണം പുരോഗമിക്കുകയാണെന്ന് പോലീസ് അധികൃതർ വ്യക്തമാക്കി.
by Midhun HP News | Sep 11, 2026 | Latest News, ദേശീയ വാർത്ത
ഡല്‍ഹി: ഒരിടവേളയ്ക്ക് ശേഷം ആദ്യമായി ക്രൂഡ് വില ബാരലിന് 105 ഡോളര്‍ കടന്നു. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 107 ഡോളര്‍ കടന്നിരിക്കുകയാണ്. ഇതോടെ ഇന്ത്യയില്‍ വീണ്ടും ഇന്ധന, പാചകവാതക വില ഉയരുമോ എന്ന തരത്തില്‍ ആശങ്ക ഉയരുന്നുണ്ട്.
മെയ് 25ന് ശേഷം ആദ്യമായാണ് എണ്ണവില 105 ഡോളര്‍ കടക്കുന്നത്. അമേരിക്ക- ഇറാന്‍ സംഘര്‍ഷമാണ് എണ്ണവില ഉയരാന്‍ പ്രധാന കാരണം. നവംബറിലെ ഇടക്കാല തെരഞ്ഞെടുപ്പിന് ശേഷം മാത്രമേ യുദ്ധം അവസാനിക്കൂ എന്നും അതിന് മുന്‍പ് പെട്രോള്‍ വിലയില്‍ കാര്യമായ ആശ്വാസം ഉണ്ടാകില്ലെന്നാണ് അമേരിക്കന്‍ പ്രസിഡന്റ് ഡോണള്‍ഡ് ട്രംപ് പറഞ്ഞത്. ഇതോടെ ഏഴാം മാസത്തിലേക്ക് കടന്ന ഈ സംഘര്‍ഷത്തിന് ഉടന്‍ അയവുണ്ടാകില്ല എന്ന സൂചനയാണ് വില ഉയരാന്‍ ഒരു കാരണം. ഒരുമാസത്തിനിടെ ബ്രെന്‍ഡ് ക്രൂഡ് വിലയില്‍ 30 ശതമാനത്തിന്റെ വര്‍ധനയാണ് രേഖപ്പെടുത്തിയത്.
യെമനിലെ ഇറാന്‍ പിന്തുണയുള്ള ഹൂതി വിമതര്‍ സൗദി അറേബ്യയുടെ പടിഞ്ഞാറന്‍ തീരത്തുനിന്നുള്ള ചരക്ക് നീക്കങ്ങള്‍ക്ക് ഭീഷണി ഉയര്‍ത്തുകയാണ്. ഇതിനെ തുടര്‍ന്ന് ഈ വര്‍ഷത്തെ ഏറ്റവും കുറഞ്ഞ എണ്ണ ഉല്‍പ്പാദന നിരക്കിലേക്ക് സൗദി അറേബ്യ താഴ്ന്നിരിക്കുകയാണ്. ലോകത്തിലെ ഏറ്റവും വലിയ എണ്ണ ഇറക്കുമതി രാജ്യങ്ങളില്‍ ഒന്നായ ചൈനയുടെ എണ്ണ ആവശ്യകതയില്‍ അടുത്തകാലത്ത് ഉണ്ടായ വര്‍ധനയും വിലയില്‍ പ്രതിഫലിച്ചു. ഇത് തുടരുകയാണെങ്കില്‍ എണ്ണവില ഇനിയും ഉയരുമെന്നാണ് വിലയിരുത്തല്‍.
by Midhun HP News | Sep 10, 2026 | Latest News, ദേശീയ വാർത്ത
ഡല്‍ഹി: ഡല്‍ഹിയില്‍ വെച്ച് നടക്കാനിരിക്കുന്ന ഇന്ത്യ-അഫ്ഗാനിസ്ഥാന്‍ ഒന്നാം ടി20 മത്സരം മാറ്റിവെച്ചേക്കുമെന്ന് റിപ്പോര്‍ട്ട്. സുരക്ഷാ കാരണങ്ങളെ തുടര്‍ന്നാണ് മത്സരം ഒരു ദിവസത്തേക്ക് വൈകിപ്പിക്കാന്‍ സാധ്യതയുള്ളത്.
സെപ്റ്റംബര്‍ 11 മുതല്‍ 13 വരെ ന്യൂഡല്‍ഹിയില്‍ നടക്കാനിരിക്കുന്ന ബ്രിക്സ് ഉച്ചകോടിയുടെ പശ്ചാത്തലത്തില്‍ രാജ്യതലസ്ഥാനത്ത് കനത്ത സുരക്ഷയാണ് ഏര്‍പ്പെടുത്തിയിരിക്കുന്നത്. ഉച്ചകോടിയില്‍ പങ്കെടുക്കാന്‍ നിരവധി വിദേശ പ്രതിനിധികളും വിവിഐപികളും നഗരത്തില്‍ എത്തുന്നതിനാല്‍ ഡല്‍ഹി പൊലീസ് കമ്മീഷണര്‍ ഡല്‍ഹി ആന്‍ഡ് ഡിസ്ട്രിക്ട് ക്രിക്കറ്റ് അസോസിയേഷന് കത്തയച്ചിട്ടുണ്ട്. മത്സരം മാറ്റിവെക്കുകയോ പുനഃക്രമീകരിക്കുകയോ ചെയ്യണമെന്നാണ് പൊലീസിന്റെ ആവശ്യം.
സെപ്റ്റംബര്‍ 13ന് അരുണ്‍ ജെയ്റ്റ്ലി സ്റ്റേഡിയത്തിലാണ് മത്സരം ഷെഡ്യൂള്‍ ചെയ്തിരിക്കുന്നത്. 25,000 മുതല്‍ 35,000 വരെ കാണികള്‍ പങ്കെടുക്കുമെന്ന് പ്രതീക്ഷിക്കുന്ന മത്സര ദിവസങ്ങളില്‍ വിവിഐപി സന്ദര്‍ശനങ്ങളും ഗതാഗത നിയന്ത്രണങ്ങളും ഒരേസമയം കൈകാര്യം ചെയ്യുന്നത് പൊലീസിന് വലിയ വെല്ലുവിളിയാകും. സ്റ്റേഡിയത്തിന് ചുറ്റുമുള്ള പ്രദേശങ്ങളില്‍ ഗതാഗതക്കുരുക്കിനും ജനത്തിരക്കിനും സാധ്യതയുള്ളതിനാല്‍, ഉച്ചകോടി അവസാനിച്ചതിന് ശേഷമുള്ള ഏതെങ്കിലും അനുയോജ്യമായ ദിവസത്തിലേക്ക് മത്സരം മാറ്റണമെന്നാണ് ഡിഡിസിഎയോട് പൊലീസ് അഭ്യര്‍ത്ഥിച്ചിരിക്കുന്നത്.
Recent Comments