by Midhun HP News | Aug 16, 2024 | Latest News, ദേശീയ വാർത്ത
ന്യൂഡല്ഹി: രണ്ടു ദിവസത്തെ സന്ദര്ശനത്തിനായി സുപ്രീംകോടതി ചീഫ് ജസ്റ്റിസ് ഡി വൈ ചന്ദ്രചൂഡ് ഇന്ന് കേരളത്തിലെത്തും. ഹൈക്കോടതിയില് നടക്കുന്ന ചടങ്ങിലും, കുമരകത്ത് കോമണ് വെല്ത്ത് ലീഗല് എഡ്യൂക്കേഷന് അസോസിയേഷന് സംഘടിപ്പിക്കുന്ന പരിപാടിയിലും ചീഫ് ജസ്റ്റിസ് സംബന്ധിക്കും.
കേരള ഹൈക്കോടതിയില് പുതുതായി തയ്യാറാക്കിയ ഡിജിറ്റല് ലൈബ്രറി, ഗവേഷണ കേന്ദ്രം, വിവിധ ഡിജിറ്റല് കോടതികള് തുടങ്ങിയവയുടെ ഉദ്ഘാടനം ചീഫ് ജസ്റ്റിസ് ഡി വൈ ചന്ദ്രചൂഡ് നിര്വഹിക്കും. ഹൈക്കോടതിയില് നടക്കുന്ന പരിപാടിയില് മുഖ്യമന്ത്രി പിണറായി വിജയനും പങ്കെടുക്കും. ഇതാദ്യമായാണ് ചീഫ് ജസ്റ്റിസ് ഡി വൈ ചന്ദ്രചൂഡും മുഖ്യമന്ത്രിയും ഒരു വേദിയിലെത്തുന്നത്.
ഏഴു വര്ഷത്തിന് ശേഷമാണ് സുപ്രീംകോടതി ചീഫ് ജസ്റ്റിസ് കേരള ഹൈക്കോടതിയിലെത്തുന്നത്. ചീഫ് ജസ്റ്റിസ് ആയിരുന്ന ദീപക് മിശ്രയാണ് ഇതിനുമുമ്പ് കേരള ഹൈക്കോടതിയില് എത്തിയ സുപ്രീം കോടതി ചീഫ് ജസ്റ്റിസ്. ഹൈക്കോടതി സുവര്ണ ജൂബിലി പരിപാടിയില് പങ്കെടുക്കാനാണ് ജസ്റ്റിസ് ദീപക് മിശ്ര എത്തിയത്.
by Midhun HP News | Aug 16, 2024 | Latest News, ദേശീയ വാർത്ത
ന്യൂഡല്ഹി: ഭൗമ നിരീക്ഷണ ഉപഗ്രഹവുമായി പറന്നുയര്ന്ന ഐഎസ്ആര്ഒയുടെ എസ്എസ്എല്വി-ഡി3 വിക്ഷേപണം വിജയകരം. ഭൗമ നിരീക്ഷണ ഉപഗ്രഹമായ EOS-08നെ കൃത്യമായി ഭ്രമണപഥത്തിലെത്തിച്ചു. ഇതോടെ ഭാവിയില് കുഞ്ഞന് സാറ്റലൈറ്റുകള് വഹിച്ച് കൊണ്ടുള്ള വിക്ഷേപണത്തിന് ചെലവ് കുറഞ്ഞ ചെറുകിട ബഹിരാകാശ പേടകമാണ് (എസ്എസ്എല്വി) സജ്ജമായത്.
500 കിലോഗ്രാം ഭാരമുള്ള ചെറിയ ഉപഗ്രഹങ്ങള് ഭൂമിയുടെ താഴ്ന്ന ഭ്രമണപഥത്തില് എത്തിക്കുന്ന, അതിവേഗം വളരുന്ന വിപണിയെ തൃപ്തിപ്പെടുത്തുന്നതിനായാണ് വിക്ഷേപണ വാഹനമായ എസ്എസ്എല്വി വികസിപ്പിച്ചത്. കുറഞ്ഞ ചെലവില് ബഹിരാകാശത്ത് എത്തിക്കുക എന്ന ദൗത്യത്തിന്റെ ഭാഗമായാണ് ഇത് വികസിപ്പിച്ചത്. കുറഞ്ഞ സമയത്തിനുള്ളില് ദൗത്യം പൂര്ത്തിയാക്കാന് കഴിയുന്ന 34 മീറ്റര് നീളമുള്ള റോക്കറ്റാണ് വികസിപ്പിച്ചത്. 120 ടണ് ആണ് ഇതിന്റെ ലിഫ്റ്റ് ഓഫ് മാസ്.
2022 ഓഗസ്റ്റില് നടന്ന ആദ്യ ദൗത്യം വിജയിച്ചില്ലെങ്കിലും 2023 ഫെബ്രുവരിയില് നടന്ന രണ്ടാമത്തെ ദൗത്യം ലക്ഷ്യം കണ്ടിരുന്നു. മൂന്നാമത്തെ വിക്ഷേപണമാണ് ഇപ്പോള് വിജയകരമായി പൂര്ത്തിയാക്കിയത്. ഏജന്സിയുടെ ഏറ്റവും പുതിയ മൈക്രോ സാറ്റലൈറ്റായ EOS-08 വഹിച്ച് കൊണ്ടാണ് കുഞ്ഞന് റോക്കറ്റ് പറന്നുയര്ന്നത്. ഭൂമി നിരീക്ഷണത്തിനായാണ് ഉപഗ്രഹ വിക്ഷേപണം.
ഒരു വര്ഷത്തെ ദൗത്യമാണ് ഉദ്ദേശിക്കുന്നത്. ഒരു മൈക്രോ സാറ്റലൈറ്റ് രൂപകല്പ്പന ചെയ്യുകയും വികസിപ്പിക്കുകയും ചെയ്യുക എന്നതാണ് ഇതിലൂടെ ഐഎസ്ആര്ഒ പ്രധാനമായി ലക്ഷ്യമിടുന്നത്.EOS-08 ന് ഏകദേശം 175.5 കിലോഗ്രാം ഭാരമുണ്ട്. ഉപഗ്രഹ അധിഷ്ഠിത നിരീക്ഷണം, ദുരന്തം/പരിസ്ഥിതി നിരീക്ഷണം, തുടങ്ങി വിവിധ ദൗത്യങ്ങള്ക്കായി രാവും പകലും ചിത്രങ്ങള് പകര്ത്താന് രൂപകല്പ്പന ചെയ്ത മൂന്ന് പേലോഡുകളും വഹിച്ചാണ് റോക്കറ്റ് പറന്നുയര്ന്നത്. 475 കിലോമീറ്റര് ഉയരത്തില് വൃത്താകൃതിയിലുള്ള ഭൂമിയുടെ താഴ്ന്ന ഭ്രമണപഥത്തില് ഉറപ്പിച്ച ഉപഗ്രഹത്തിന് ഒരു വര്ഷത്തെ ദൗത്യമുണ്ട്. ഇതിന് ഏകദേശം 420 W വൈദ്യുതി ഉത്പാദിപ്പിക്കാന് കഴിയും.
by Midhun HP News | Aug 16, 2024 | Latest News, ദേശീയ വാർത്ത
അങ്കോല: കർണാടകയിലെ ഷിരൂരിൽ മണ്ണിടിച്ചിലിൽ കാണാതായ മലയാളി ട്രക്ക് ഡ്രൈവർ അർജുനെ കണ്ടെത്താനുള്ള തിരച്ചിൽ ഇന്ന് തുടരും. തിങ്കളാഴ്ച ഗോവയിൽ നിന്നും ഡ്രഡ്ജർ എത്തിക്കുന്നത് വരെ ഗംഗാവലി പുഴയിൽ മുങ്ങൽ വിദഗ്ധരായിരിക്കും തിരച്ചിൽ നടത്തുക. അനുമതി ലഭിച്ചാല് നേവിയും തിരച്ചിലിനെത്തും. കോഴിക്കോട് സ്വദേശി അർജുനെ കാണാതായിട്ട് ഒരു മാസം തികഞ്ഞു.
മത്സ്യത്തൊഴിലാളിയും മുങ്ങൽ വിദഗ്ധനുമായ ഈശ്വർ മൽപ്പെയുടെ സംഘം, എൻഡിആർഎഫ്, എസ്ഡിആർഎഫ് എന്നിവർ ഇന്ന് തിരച്ചിലിന് ഉണ്ടാകും. ഉത്തര കന്നഡ ജില്ലാ ഭരണകൂടം അനുമതി നൽകിയാൽ നാവിക സേനയും തിരച്ചിലിൽ പങ്കെടുക്കും. അർജുൻ ഓടിച്ച ലോറിയുടെ കയർ കിട്ടിയ ഭാഗത്താണ് പരിശോധന നടത്തുക.
മണ്ണിടിച്ചിലിൽ വെള്ളത്തിൽ പതിച്ച വലിയ കല്ലുകൾ നീക്കാൻ സാധിച്ചാലേ ലോറിയുെട സ്ഥാനം കൃത്യമായി കണ്ടെത്താൻ സാധിക്കൂവെന്ന് ഈശ്വർ മൽപ്പെ പറയുന്നു. കഴിഞ്ഞ മാസം 16നാണ് കോഴിക്കോട് കണ്ണാടിക്കൽ സ്വദേശിയായ അർജുനേയും തടകയറ്റി വന്ന ലോറിയേയും മണ്ണിടിച്ചിലിനെത്തുടർന്ന കാണാതായത്. അർജുന് പുറമേ കർണാടക സ്വദേശികളായ ലോകേഷ്, ജഗന്നാഥ് എന്നിവരേയും കണ്ടെത്താനുണ്ട്.
by Midhun HP News | Aug 15, 2024 | Latest News, ദേശീയ വാർത്ത
ന്യൂഡല്ഹി: ചെങ്കോട്ടയിലെ സ്വതന്ത്ര്യ ദിനാഘോഷ ചടങ്ങില് പ്രതിപക്ഷ നേതാവ് രാഹുല്ഗാന്ധിയോട് അനാദരവ് കാണിച്ചെന്ന് ആക്ഷേപം. രാഹുല്ഗാന്ധിക്ക് പിന്നിരയില് സീറ്റ് നല്കിയതാണ് വിമര്ശനത്തിന് ഇടയാക്കിയത്. പ്രതിപക്ഷ നേതാവിന് മുന് നിരയില് സീറ്റ് നല്കണമെന്നതാണ് പ്രോട്ടോക്കോള്.
ചെങ്കോട്ടയിലെ സ്വതന്ത്ര്യ ദിനാഘോഷ ചടങ്ങില് ഒളിംപിക്സില് വെങ്കല മെഡല് നേടിയ ഹോക്കി താരങ്ങള്ക്കൊപ്പം നാലാം നിരയിലാണ് രാഹുല്ഗാന്ധിക്ക് സീറ്റ് അനുവദിച്ചിരുന്നത്. ഇതിന്റെ ചിത്രങ്ങള് പുറത്തുവന്നതോടെയാണ് പ്രോട്ടോക്കോള് ലംഘനമുണ്ടായിയെന്ന വിമര്ശനം ഉയര്ന്നത്.സര്ക്കാരിന്റെ നടപടിക്കെതിരെ സമൂഹമാധ്യമങ്ങളില് രൂക്ഷ വിമര്ശനം ഉയര്ന്നു. പ്രതിപക്ഷ നേതാവ് എന്ന പദവിയെ അപമാനിക്കുന്നതാണ് സര്ക്കാരിന്റെ നടപടിയെന്നും വിമര്ശനമുയര്ന്നു. എന്നാല് ഒളിംപിക് മെഡല് ജേതാക്കള്ക്ക് ഇരിപ്പിടം ഒരുക്കുന്നതിന്റെ ഭാഗമായിട്ടാണ് ഇത്തരമൊരു ക്രമീകരണം ഏര്പ്പെടുത്തിയതെന്നാണ് പ്രതിരോധമന്ത്രാലയത്തിന്റെ വിശദീകരണം.
by Midhun HP News | Aug 15, 2024 | Latest News, ദേശീയ വാർത്ത
കൊല്ക്കത്ത: പശ്ചിമ ബംഗാളില് ക്രൂരമായ പീഡനത്തിന് ഇരയായി കൊല്ലപ്പെട്ട യുവ ഡോക്ടര് കൂട്ട ബലാത്സംഗത്തിന് വിധേയയായിട്ടുണ്ടാകാന് സാധ്യതയെന്ന് റിപ്പോര്ട്ട്. പോസ്റ്റ്മോര്ട്ടം റിപ്പോര്ട്ടിന്റെ അടിസ്ഥാനത്തില് ഡോക്ടറെ ഉദ്ധരിച്ചും യുവതിയുടെ മാതാപിതാക്കള് കല്ക്കട്ട ഹൈക്കോടതിയില് നല്കിയ ഹര്ജിയുടെ അടിസ്ഥാനത്തിലുമുള്ള റിപ്പോര്ട്ടിലാണ് ഇക്കാര്യം പറയുന്നത്.
യുവ ഡോക്ടറുടെ പോസ്റ്റ്മോര്ട്ടത്തില് ശരീരത്തില് നിന്ന് ഗണ്യമായ അളവില് സ്രവം ലഭിച്ചിരുന്നു. ഇത് ബീജമാകാനാണ് സാധ്യത. കൂടുതല് പരിശോധനയ്ക്ക് ശേഷം മാത്രമേ ഇക്കാര്യത്തില് വ്യക്തത വരുത്താന് സാധിക്കുകയുള്ളൂ എന്ന് റിപ്പോര്ട്ടില് പറയുന്നു. ഒന്നിലധികം ആളുകള് ചേര്ന്ന് യുവതിയെ ക്രൂരമായ പീഡനത്തിന് ഇരയാക്കി എന്ന സാധ്യതയിലേക്കാണ് ഇത് വിരല് ചൂണ്ടുന്നത്. പോസ്റ്റ്മോര്ട്ടം റിപ്പോര്ട്ടില് ജനനേന്ദ്രിയത്തില് നിന്ന് 150 മില്ലിഗ്രാം സ്രവം കണ്ടെത്തിയതായി ഡോക്ടര് പറഞ്ഞതായും റിപ്പോര്ട്ട് ചൂണ്ടിക്കാണിക്കുന്നു.
‘ ജനനേന്ദ്രിയത്തില് നിന്ന് കണ്ടെത്തിയ ബീജത്തിന്റെ അളവ് ഒരു വ്യക്തിയുടേതാകാന് കഴിയില്ല. ഒന്നിലധികം ആളുകളുടെ പങ്കാളിത്തം ഇത് സൂചിപ്പിക്കുന്നു, ”ഓള് ഇന്ത്യ ഫെഡറേഷന് ഓഫ് ഗവണ്മെന്റ് ഡോക്ടേഴ്സ് അസോസിയേഷന്റെ അഡീഷണല് ജനറല് സെക്രട്ടറി ഡോ സുബര്ണ ഗോസ്വാമി മാധ്യമങ്ങളോട് പറഞ്ഞു.
പോസ്റ്റ്മോര്ട്ടത്തില് ഇരയുടെ ശരീരത്തില് നിന്ന് 150 മില്ലിഗ്രാം ബീജം കണ്ടെത്തിയതായി മാതാപിതാക്കളുടെ ഹര്ജി ഉദ്ധരിച്ചുള്ള റിപ്പോര്ട്ടില് പറയുന്നു. ബീജത്തിന്റെ അളവ് കൂട്ടബലാത്സംഗം എന്ന സംശയം ബലപ്പെടുത്തുന്നതായും ഹര്ജിയില് പറയുന്നു. കേസുമായി ബന്ധപ്പെട്ട് ഒരാളെ പോലീസ് അറസ്റ്റ് ചെയ്തിട്ടുണ്ട്.
മകളുടെ നഗ്നശരീരത്തില് കാലുകള് ബലംപ്രയോഗിച്ച് നീട്ടിയതിന്റെ അടയാളങ്ങള് കുറ്റകൃത്യത്തിന്റെ ഭയാനകത വ്യക്തമാക്കുന്നതാണെന്ന് യുവ ഡോക്ടറിന്റെ മാതാപിതാക്കള് പറയുന്നു. യുവതിയുടെ കൈകളിലും മുഖത്തും വെട്ടേറ്റ പാടുകളുണ്ടായിരുന്നു. ക്രൂരമായ മര്ദ്ദനത്തില് യുവതിയുടെ കണ്ണടയില് നിന്ന് ഗ്ലാസ് കഷ്ണങ്ങള് പൊട്ടി കണ്ണുകളിലേക്ക് തുളച്ചു കയറിയതായി പോസ്റ്റ്മോര്ട്ടം റിപ്പോര്ട്ട് സൂചിപ്പിക്കുന്നു. തലയ്ക്കും കഴുത്തിനും പരിക്കേറ്റിട്ടുണ്ട്. പ്രതിഷേധം ശക്തമായതോടെ കല്ക്കട്ട ഹൈക്കോടതി കേസ് സെന്ട്രല് ബ്യൂറോ ഓഫ് ഇന്വെസ്റ്റിഗേഷന് കൈമാറിയിരിക്കുകയാണ്.
by Midhun HP News | Aug 15, 2024 | Latest News, ദേശീയ വാർത്ത
ന്യൂഡല്ഹി: 2047ല് വികസിത ഭാരതം എന്ന ലക്ഷ്യം കൈവരിക്കുമെന്ന് പ്രധാനമന്ത്രി നരേന്ദ്രമോദി. എല്ലാ വിഭാഗക്കാരെയും ഒപ്പം കൂട്ടിയുള്ള വികസിത ഭാരതമാണ് ലക്ഷ്യമിടുന്നത്. വികസിത ഭാരതം 2047 എന്നത് കേവലം വാക്കുകളല്ല. 140 കോടി ജനങ്ങളുടെ ദൃഢനിശ്ചയത്തിന്റെയും സ്വപ്നങ്ങളുടെയും പ്രതിഫലനമാണെന്നും മോദി പറഞ്ഞു. ചെങ്കോട്ടയില് ദേശീയപതാക ഉയര്ത്തിയ ശേഷം നടത്തിയ സ്വാതന്ത്ര്യദിന പ്രസംഗത്തിലാണ് വികസിത ഭാരതം എന്ന ലക്ഷ്യത്തെ കുറിച്ച് മോദി വാചാലനായത്.
ലോകം ഇന്ത്യയുടെ വളര്ച്ച ഉറ്റുനോക്കുകയാണ്. 2047ഓടെ ഇന്ത്യയെ വികസിതമാക്കാന് ആളുകള് നിരവധി നിര്ദ്ദേശങ്ങള് നല്കി. രാജ്യത്തെ ഉല്പ്പാദന മേഖലയുടെ ഹബ്ബായി മാറ്റുകയാണ് ലക്ഷ്യം. നിശ്ചയദാര്ഢ്യത്തോടെ പ്രവര്ത്തിച്ചാല് 2047-ഓടെ ഇന്ത്യയെ വികസിത രാഷ്ട്രമാക്കാന് സാധിക്കും. 40 കോടി ജനങ്ങള്ക്ക് അടിമത്തത്തിന്റെ ചങ്ങലകള് പൊട്ടിച്ച് സ്വാതന്ത്ര്യം നേടാനാകുമെങ്കില്, 140 കോടി ജനങ്ങളുടെ ദൃഢനിശ്ചയത്തിലൂടെ എന്ത് നേടാനാകുമെന്ന് സങ്കല്പ്പിക്കാനും മോദി ആവശ്യപ്പെട്ടു.
‘മുമ്പ്, ആളുകള് മാറ്റം ആഗ്രഹിച്ചു, പക്ഷേ അവരുടെ അഭിലാഷങ്ങള് ശ്രദ്ധിക്കപ്പെട്ടില്ല. ഞങ്ങള് ഭൂമിയില് വലിയ പരിഷ്കാരങ്ങള് കൊണ്ടുവന്നു.പരിഷ്കാരങ്ങളോടുള്ള ഞങ്ങളുടെ പ്രതിബദ്ധത താല്ക്കാലിക കൈയടിക്കോ നിര്ബന്ധങ്ങള്ക്കോ വേണ്ടിയല്ല, മറിച്ച് രാജ്യത്തെ ശക്തിപ്പെടുത്താനുള്ള ദൃഢനിശ്ചയമാണ് . വികസിത ഭാരതത്തിനായുള്ള ജനങ്ങളുടെ നിര്ദ്ദേശങ്ങളില് ഭരണപരിഷ്കാരങ്ങള്, വേഗത്തിലുള്ള നീതിന്യായ സംവിധാനം, പരമ്പരാഗത മരുന്നുകള് പ്രോത്സാഹിപ്പിക്കല് എന്നിവ ഉള്പ്പെടുന്നു’- മോദി പറഞ്ഞു.
യുവാക്കള്ക്കും കര്ഷകര്ക്കും ഒപ്പം നില്ക്കും. എല്ലാ ഗ്രാമങ്ങളിലെയും വീടുകളില് വൈദ്യുതി എത്തണം. സ്വാതന്ത്ര്യസമര സേനാനികള്ക്ക് ആദരം അര്പ്പിച്ച മോദി പ്രകൃതിദുരന്തത്തില് ജീവന് നഷ്ടമായവരെ സ്മരിച്ചു. രാജ്യത്തെ സായുധ സേന മിന്നലാക്രമണവും വ്യോമാക്രമണവും നടത്തിയപ്പോള് ഓരോ ഇന്ത്യക്കാരനും അതില് അഭിമാനം കൊണ്ടതായും മോദി പറഞ്ഞു.
Recent Comments