ഡൽഹി: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിക്ക് കീഴിൽ തൊഴിലാളികളുടെ ദിവസക്കൂലി വര്ധിപ്പിച്ച് കേന്ദ്രസര്ക്കാര് ഉത്തരവായി. ഇത് പ്രകാരം ഹരിയാനയിലും സിക്കിമിലും ഏറ്റവും ഉയര്ന്ന വേതനമായ 374 രൂപ ലഭിക്കും. അരുണാചൽ പ്രദേശിലും നാഗാലാന്റിലുമാണ് ഏറ്റവും കുറവ് വേതനം, 234 രൂപ. കേരളത്തിൽ 333 രൂപയായിരുന്നത് 349 രൂപയാക്കി വര്ധിപ്പിച്ചിട്ടുണ്ട്. വര്ധിപ്പിച്ച വേതനം ഏപ്രിൽ ഒന്ന് മുതൽ പ്രാബല്യത്തിൽ വരും.
മദ്യ നയ അഴിമതി, ഇ ഡി അറസ്റ്റിനെതിരായ ഡൽഹി മുഖ്യമന്ത്രി അരവിന്ദ് കെജ്രിവാളിന്റെ ഹർജി ഇന്ന് പരിഗണിക്കും. ഇ ഡി നടപടി നിയമവിരുദ്ധമെന്ന് ഹർജിയിൽ വാദം. എന്നാൽ ഇഡി കസ്റ്റഡിയിലുള്ള ഡല്ഹി മുഖ്യമന്ത്രി അരവിന്ദ് കെജ്രിവാളിന് കമ്പ്യൂട്ടറോ പേപ്പറോ അനുവദിച്ചിട്ടില്ലെന്ന് അന്വേഷണ ഉദ്യോഗസ്ഥരെ ഉദ്ധരിച്ച് റിപ്പോര്ട്ട്. ജലവിഭവ വകുപ്പുമായി ബന്ധപ്പെട്ട ഉത്തരവ് കസ്റ്റഡിയിലിരിക്കെ കെജ്രിവാള് പുറത്തിറക്കിയെന്ന ജലവിഭവ വകുപ്പ് മന്ത്രി അതിഷി മെര്ലേനയുടെ പ്രസ്താവനയെ തുടര്ന്നാണ് ഇഡിയുടെ വിശദീകരണം.
അതിഷി ചൂണ്ടിക്കാണിച്ച ഉത്തരവ് വ്യാജമാണെന്ന് നേരത്തെ ബിജെപി ആരോപിച്ചിരുന്നു. ഇതിന്റെ പശ്ചാത്തലത്തിലാണ് അരവിന്ദ് കെജ്രിവാളിന് സര്ക്കാര് ഉത്തരവ് തയ്യാറാക്കാന് തയ്യാറാക്കാന് സാധിക്കുന്ന സൗകര്യങ്ങളൊന്നും ഒരുക്കിയിട്ടില്ലെന്ന വിവരം ഇഡി പുറത്ത് വിട്ടത്. ഇഡിയുടെ കസ്റ്റഡിയിലിരിക്കുന്ന സമയത്തും തന്നേക്കുറിച്ചല്ല കെജരിവാള് ചിന്തിക്കുന്നതെന്നും മറിച്ച് ഡല്ഹിയിലെ ജനങ്ങളെക്കുറിച്ചും അവരുടെ പ്രശ്നങ്ങളെക്കുറിച്ചുമാണെന്ന് ജലവിഭവ വകുപ്പ് മന്ത്രി അതിഷി പറഞ്ഞിരുന്നു. കേന്ദ്ര ഏജന്സികളുടെ അറസ്റ്റൊന്നും ഡല്ഹിയിലെ ജനങ്ങള്ക്കു വേണ്ടിയുള്ള പ്രവര്ത്തനങ്ങളില് നിന്നും കെജരിവാളിനെ തടയാനാകില്ലെന്ന് മന്ത്രി അതിഷി വ്യക്തമാക്കിയിരുന്നു.
ബിജാപുര്: ഛത്തീസ്ഗഡില് സുരക്ഷാ സേനയുമായുണ്ടായ വെടിവെപ്പില് ഒരു സ്ത്രീ ആറ് മാവോയിസ്റ്റുകള് കൊല്ലപ്പെട്ടു. ഛത്തീസ്ഗഡിലെ ബിജാപുര് ജില്ലയിലാണ് സംഭവം. ഏറ്റുമുട്ടല് നടന്ന ചികുര്ഭട്ടി, പുഷ്പക ഗ്രാമങ്ങളിലെ വനമേഖലയില് തിരച്ചില് നടത്തുകയാണെന്ന് ബസ്തര് റേഞ്ച് ഐജി സുന്ദര്രാജ് പി പറഞ്ഞു.
‘പ്രദേശത്ത് മാവോയിസ്റ്റുകളുടെ സാന്നിധ്യമുണ്ടെന്ന് വിവരം ലഭിച്ചിരുന്നു. ഡിസ്ട്രിക്റ്റ് റിസര്വ് ഗാര്ഡ് (ഡിആര്ജി), സെന്ട്രല് റിസര്വ് പൊലീസ് ഫോഴ്സ് (സിആര്പിഎഫ്), എലൈറ്റ് യൂണിറ്റ് കോബ്ര (കമാന്ഡോ ബറ്റാലിയന് ഫോര് റെസല്യൂട്ട് ആക്ഷന്) എന്നി സംഘങ്ങള് ഓപ്പറേഷനിലുണ്ടായിരുന്നുവെന്നും’ അദ്ദേഹം പറഞ്ഞു
ഡല്ഹി: ലോക്സഭ തെരഞ്ഞെടുപ്പിലെ രണ്ടാം ഘട്ടത്തില് വോട്ടെടുപ്പ് നടക്കുന്ന മണ്ഡലങ്ങളിലെ വിജ്ഞാപനം നാളെ പുറപ്പെടുവിക്കും. കേരളം ഉള്പ്പെടെ 13 സംസ്ഥാന-കേന്ദ്ര ഭരണ പ്രദേശങ്ങളിലെ 89 മണ്ഡലങ്ങളിലാണ് രണ്ടാം ഘട്ടത്തില് വോട്ടെടുപ്പ് നടക്കുക.
നാളെ മുതല് ഏപ്രില് നാലു വരെ പത്രിക സമര്പ്പിക്കാം. അഞ്ചാം തീയതി നാമനിര്ദേശ പത്രികകളുടെ സൂക്ഷ്മ പരിശോധന നടക്കും. എട്ടാം തീയതി വരെ പത്രിക പിന്വലിക്കാം. ഏപ്രില് 26 നാണ് വോട്ടെടുപ്പ്.
ലോക്സഭ തെരഞ്ഞെടുപ്പ് ഏഴു ഘട്ടമായിട്ടാണ് നടത്തുന്നത്. കേരളത്തിലെ 20 സീറ്റുകളിലും ഏപ്രില് 26 ന് ഒറ്റഘട്ടമായിട്ടാണ് വോട്ടെടുപ്പ് നടക്കുന്നത്. കര്ണാടക, മധ്യപ്രദേശ്, മഹാരാഷ്ട്ര, മണിപ്പൂര്, രാജസ്ഥാന്, ത്രിപുര തുടങ്ങിയ സംസ്ഥാനങ്ങളിലെ ഏതാനും മണ്ഡലങ്ങളും രണ്ടാം ഘട്ടത്തില് പോളിങ് ബൂത്തിലെത്തും.
വാഷിങ്ടണ്: അമേരിക്കയിലെ ബാള്ട്ടി മോറില് പാലം കപ്പലിടിച്ച് തകര്ന്നു. ഫ്രാന്സിസ് സ്കോട്ട് കീ ബ്രിഡ്ജാണ് തകര്ന്നത്. പറ്റാപ്സ്കോ നദിക്കു മുകളില് രണ്ടരക്കിലോമീറ്റര് നീളമുള്ള നാലുവരി പാലമാണ് തകര്ന്ന് വീണത്.
അപകടസമയത്ത് നിരവധി വാഹനങ്ങള് പാലത്തിലുണ്ടായിരുന്നു. ഏകദേശം ഇരുപതോളം ആളുകള് വെള്ളത്തില് വീണതായി ബാള്ട്ടിമോര് സിറ്റി ഫയര് ഡിപ്പാര്ട്ട്മെന്റ് അറിയിച്ചു. പാലം തകര്ന്നതിനെ തുടര്ന്ന് ഇതുവഴിയുള്ള ഗതാഗതം തിരിച്ചുവിട്ടിട്ടുണ്ട്. ഇടിയുടെ ആഘാതത്തില് കപ്പലിന് തീപിടിച്ചു. രക്ഷാപ്രവര്ത്തനങ്ങള് നടക്കുകയാണ്. അപകടത്തിന്റെ വീഡിയോ ദൃശ്യങ്ങളും പുറത്ത് വന്നിട്ടുണ്ട്.
ഡല്ഹി: ചാന്ദ്ര പര്യവേക്ഷണ പദ്ധതിയായ ചന്ദ്രയാന് 3 പേടകം ലാന്ഡ് ചെയ്ത സ്ഥലത്തിന് പ്രധാനമന്ത്രി നരേന്ദ്രമോദി പ്രഖ്യാപിച്ച ‘ശിവ ശക്തി’ എന്ന പേരിന് അംഗീകാരം. പേര് പ്രഖ്യാപിച്ച് ഏഴുമാസത്തിന് ശേഷം അന്താരാഷ്ട്ര ജ്യോതിശാസ്ത്ര സംഘടന (ഐഎയു) ആണ് ശിവ ശക്തി എന്ന പേര് അംഗീകരിച്ചത്.
ചന്ദ്രയാന് മൂന്നിന്റെ വിക്രം ലാന്ഡറാണ് കഴിഞ്ഞവര്ഷം ഓഗസ്റ്റില് ചന്ദ്രോപരിതലത്തില് ഇറങ്ങിയത്. ഇറങ്ങിയ സ്ഥലം ഇനി മുതല് ശിവ ശക്തി എന്ന പേരില് അറിയപ്പെടുമെന്നാണ് കഴിഞ്ഞവര്ഷം ഓഗസ്റ്റ് 26ന് പ്രധാനമന്ത്രി നരേന്ദ്രമോദി പ്രഖ്യാപിച്ചത്. ഐഎയു വര്ക്കിങ് ഗ്രൂപ്പാണ് വിക്രം ലാന്ഡര് ഇറങ്ങിയ സ്ഥലത്തിന് നല്കിയ ശിവ ശക്തി എന്ന പേര് അംഗീകരിച്ചത്.
ചന്ദ്രയാന് 3 ചന്ദ്രനില് ഇറങ്ങി മൂന്ന് ദിവസത്തിന് ശേഷം ബംഗളൂരുവിലെ ഐഎസ്ആര്ഒ ടെലിമെട്രി ട്രാക്കിങ് ആന്റ് കമാന്ഡ് നെറ്റ് വര്ക്കില് വച്ചാണ് മോദി ശിവ ശക്തി എന്ന പേര് പ്രഖ്യാപിച്ചത്.’ശിവനില്, മനുഷ്യരാശിയുടെ ക്ഷേമത്തിനുള്ള തീരുമാനങ്ങള് ഉണ്ട്. ആ തീരുമാനങ്ങള് നിറവേറ്റാന് ശക്തി നമുക്ക് കരുത്ത് നല്കുന്നു. ചന്ദ്രന്റെ ഈ ശിവശക്തി ബിന്ദു ഹിമാലയവും കന്യാകുമാരിയും തമ്മിലുള്ള ബന്ധത്തിന്റെ ഒരു ബോധം നല്കുന്നു’- പേര് പ്രഖ്യാപിച്ച് മോദി പറഞ്ഞ വാക്കുകള്.
Recent Comments