by Midhun HP News | Nov 29, 2023 | Latest News, ദേശീയ വാർത്ത
ഡല്ഹി: ചൈനയില് പടര്ന്നു പിടിക്കുന്ന അജ്ഞാത ന്യൂമോണിയയുടെ പശ്ചാത്തലത്തില് സംസ്ഥാനങ്ങള്ക്ക് കേന്ദ്ര ആരോഗ്യമന്ത്രാലയത്തിന്റെ ജാഗ്രതാ നിര്ദേശം. രാജസ്ഥാന്, കര്ണാടക, ഗുജറാത്ത്, ഉത്തരാഖണ്ഡ്, തമിഴ്നാട് എന്നീ ആറു സംസ്ഥാനങ്ങള്ക്കാണ് ജാഗ്രതാ നിര്ദേശം നല്കിയത്.
ശ്വാസകോശ സംബന്ധമായ അസുഖവുമായി എത്തുന്ന രോഗികള്ക്ക് മതിയായ ചികിത്സ ഉറപ്പാക്കാന് ആശുപത്രികളും ആരോഗ്യപ്രവര്ത്തകരും പരിപൂര്ണ സജ്ജമായിരിക്കണമെന്ന് നിര്ദേശത്തില് പറയുന്നു. സീസണലായി ഉണ്ടാകുന്ന പനി പോലുള്ള അസുഖങ്ങളില് ജനങ്ങള് അതീവ ജാഗ്രത പാലിക്കണമെന്ന് കര്ണാടക ആരോഗ്യവകുപ്പ് ആവശ്യപ്പെട്ടിട്ടുണ്ട്.
സീസണല് ഇന്ഫ്ലുവന്സയുടെ പട്ടിക പ്രസിദ്ധീകരിച്ച ആരോഗ്യവകുപ്പ് ലക്ഷണങ്ങളും അപകടസാധ്യത ഘടകങ്ങളും വ്യക്തമാക്കിയിട്ടുണ്ട്. അസുഖമുള്ളപ്പോള് ചെയ്യേണ്ടതും ചെയ്യരുതാത്തതുമായ കാര്യങ്ങളും നിര്ദേശിച്ചിട്ടുണ്ട്. ചുമയ്ക്കുമ്പോഴോ തുമ്മുമ്പോഴോ വായും മൂക്കും മൂടുക, ഇടയ്ക്കിടെ കൈ കഴുകുക, മുഖം തൊടുന്നത് ഒഴിവാക്കുക, തിരക്കേറിയ സ്ഥലങ്ങളില് മാസ്ക് ഉപയോഗിക്കുക തുടങ്ങിയവ ഇതില് ഉള്പ്പെടുന്നു.
നിലവില് ആശങ്കപ്പെടേണ്ട സാഹചര്യമില്ലെങ്കിലും, സീസണല് രോഗങ്ങളില് ജനങ്ങള് ജാഗ്രത പുലര്ത്തണമെന്ന് രാജസ്ഥാന് ആരോഗ്യ വകുപ്പും നിര്ദേശം പുറപ്പെടുവിച്ചിട്ടുണ്ട്. ചൈനയിലെ രോഗവ്യാപനം കണക്കിലെടുത്ത് കോവിഡ് സാഹചര്യത്തിലേതിന് സമാനമായി ആരോഗ്യപരിരക്ഷയ്ക്കായുള്ള അടിസ്ഥാന സൗകര്യങ്ങള് ശക്തിപ്പെടുത്തുമെന്ന് ഗുജറാത്ത് ആരോഗ്യമന്ത്രി ഋഷികേശ് പട്ടേല് പറഞ്ഞു.
ചൈനയിലെ അജ്ഞാത ന്യൂമോണിയയുടെ പശ്ചാത്തലത്തില് സര്വ സജ്ജമായിരിക്കാന്, സര്ക്കാര് ആശുപത്രികള്ക്ക് പുറമെ സ്വകാര്യ ആശുപത്രികള്ക്കും തമിഴ്നാട് സര്ക്കാര് നിര്ദേശം നല്കി. സംസ്ഥാനത്ത് ഇതുവരെ കുട്ടികളില് ന്യൂമോണിയ കേസുകളൊന്നും റിപ്പോര്ട്ട് ചെയ്തിട്ടില്ല. എങ്കിലും മുന്കരുതല് നടപടിയായി ജാഗ്രത പാലിക്കണമെന്ന് സംസ്ഥാന ആരോഗ്യ വകുപ്പ് നിര്ദേശം നല്കിയിട്ടുണ്ട്.
by Midhun HP News | Nov 28, 2023 | Latest News, ദേശീയ വാർത്ത
ദെഹ്റാദൂണ്: കൊല്ലം ആശ്രാമത്തുനിന്നുള്ള ആശ്വാസവാര്ത്തയ്ക്കു പിന്നാലെ ഉത്തരകാശിയില്നിന്നും ആ ശുഭവാര്ത്ത എത്തി. ഉത്തരകാശിയില് നിര്മാണത്തിലിരുന്ന തുരങ്കത്തില് കുടുങ്ങിയ 41 തൊഴിലാളികളെയും പുറത്തെത്തിച്ചു. ചൊവ്വാഴ്ച വൈകിട്ട് 7.05-ഓടെ ആരംഭിച്ച രക്ഷാദൗത്യത്തിന്റെ അവസാനഘട്ടം ഒന്നരമണിക്കൂറില് വിജയം കണ്ടു, മുഴുവന് തൊഴിലാളികളും പുറത്തെത്തിച്ചു.
തുരങ്കത്തിന് പുറത്ത് സജ്ജമാക്കി നിര്ത്തിയ ആംബുലന്സില് തൊഴിലാളികളെ ആശുപത്രിയിലേക്ക് മാറ്റി. ആദ്യത്തെ കുറച്ച് തൊഴിലാളികളെ സ്ട്രെച്ചറിലാണ് പുറത്തെത്തിച്ചത്. എല്ലാ തൊഴിലാളികളും ആരോഗ്യവാന്മാരാണെന്ന് ഡോക്ടര്മാര് അറിയിച്ചു. ഉത്തരാഖണ്ഡ് മുഖ്യമന്ത്രി പുഷ്കര് സിങ് ധാമിയും കേന്ദ്രമന്ത്രി വി.കെ. സിങ്ങും ചേര്ന്നാണ് പുറത്തെത്തിയ തൊഴിലാളികളെ സ്വീകരിച്ചത്.
“ഡല്ഹിയില്നിന്നുള്ള റാറ്റ് മൈനര്, മുന്ന ഖുറേഷിയാണ് തൊഴിലാളികളുടെ അടുത്തേക്ക് ആദ്യമെത്തിയതെന്ന് ഹിന്ദുസ്ഥാന് ടൈംസ് റിപ്പോര്ട്ട് ചെയ്തു. അവസാനത്തെ പാറ ഞാനാണ് നീക്കം ചെയ്തത്. എനിക്ക് അവരെ കാണാന് കഴിഞ്ഞു. തുടര്ന്ന് ഞാന് മറുവശത്തേക്ക് ചെന്നു. അവര് ഞങ്ങളെ കെട്ടിപ്പിടിക്കുകയും എടുത്തുയര്ത്തുകയും ചെയ്തു. രക്ഷിക്കാനെത്തിയതിന് അവര് നന്ദി അറിയിച്ചു. കഴിഞ്ഞ 24 മണിക്കൂര് ഞങ്ങള് തുടര്ച്ചയായി ജോലി ചെയ്യുകയായിരുന്നു. എനിക്ക് എന്റെ സന്തോഷം പ്രകടിപ്പിക്കാനാകുന്നില്ല. ഞാന് എന്റെ രാജ്യത്തിനുവേണ്ടിയാണിത് ചെയ്തത്. അവര് (കുടുങ്ങിയ തൊഴിലാളികള്) ഞങ്ങള്ക്ക് നല്കിയ ബഹുമാനം എനിക്ക് എന്റെ ജീവിതത്തില് മറക്കാന് കഴിയില്ല, മുന്നയെ ഉദ്ധരിച്ച് ഹിന്ദുസ്ഥാന് ടൈംസ് റിപ്പോര്ട്ട് ചെയ്തു.
തൊഴിലാളികള് പുറത്തെത്തിയതിന് പിന്നാലെ പ്രദേശവാസികള് മധുരവിതരണം നടത്തി. നവംബര് 12-ന് പുലര്ച്ചെ നാലുമണിയോടെയാണ് ബ്രഹ്മകമല്-യമുനോത്രി ദേശീയപാതയില് നിര്മാണത്തിലിരുന്ന തുരങ്കത്തിന്റെ ഒരുഭാഗം തകര്ന്നുവീണ് തൊഴിലാളികള് ഉള്ളില് കുടുങ്ങിയത്. ഉടന് സ്ഥലത്തെത്തിയ രക്ഷാപ്രവര്ത്തകസംഘം തൊഴിലാളികള്ക്ക് പൈപ്പമാര്ഗത്തിലൂടെ ഭക്ഷണം, വെള്ളം, മരുന്ന് തുടങ്ങിയവ എത്തിച്ചു നല്കി. ഓക്സിജനും പൈപ്പ് മാര്ഗം തൊഴിലാളികള്ക്ക് എത്തിച്ചു നല്കിയിരുന്നു.
by Midhun HP News | Nov 28, 2023 | Latest News, ദേശീയ വാർത്ത
ഡെറാഡൂണ്: ഉത്തരകാശിയിലെ സില്ക്യാര ടണലില് കുടുങ്ങിയ തൊഴിലാളികളെ രക്ഷപ്പെടുത്താനുള്ള രക്ഷാദൗത്യം വിജയത്തില്. തുരക്കല് പൂര്ത്തിയായി. എസ്ഡിആര്എഫ് സംഘം സ്ട്രക്ചറുമായി ടണലിന് ഉള്ളിലേക്ക് കയറി. 10 ആംബുലന്സുകള് തുരങ്കത്തിന് സമീപത്തേക്കെത്തി.
എസ്ഡിആര്ഫിന്റെയും എന്ഡിആര്എഫിന്റെയും 10 പേരടങ്ങുന്ന സംഘമാണ് ടണലിലേക്ക് കയറുക. ഇതില് നാലുപേരാണ് ടണലില് സ്ഥാപിച്ച പൈപ്പിലൂടെ തൊഴിലാളികളുടെ അടുത്തേക്ക് എത്തുക. 41 തൊഴിലാളികളാണ് സില്ക്യാര ടണലിനുള്ളില് കുടുങ്ങിക്കിടക്കുന്നത്.
17 ദിവസത്തിനൊടുവിലാണ് സില്ക്യാര തുരങ്കത്തില് കുടുങ്ങിയവര് തിരികെ പുറം ലോകത്തിലേക്കെത്തുന്നത്. യന്ത്രസഹായ.ത്തോടെയുള്ള തുരക്കല് പ്രതിസന്ധി നേരിട്ടതോടെ, ഇന്നലെ മുതലാണ് റാറ്റ് മൈനേഴ്സിന്റെ നേതൃത്വത്തില് പരിചയസമ്പന്നരായ 24 ‘റാറ്റ്-ഹോള് മൈനിംഗ്’ വിദഗ്ധരുടെ സംഘം മാനുവല് ഡ്രില്ലിംഗ് നടത്തിയത്.
by Midhun HP News | Nov 28, 2023 | Latest News, ദേശീയ വാർത്ത
ടെല് അവീവ്: ഗാസയില് വെടിനിര്ത്തല് രണ്ടു ദിവസത്തേക്ക് കൂടി നീട്ടാന് ഇസ്രയേലും ഹമാസും തമ്മില് ധാരണ. ഖത്തറിന്റെ മധ്യസ്ഥതയില് നടന്ന ചര്ച്ചയിലാണ് വെടിനിര്ത്തല് നീട്ടാന് ധാരണയായത്. ഗാസയില് അടിയന്തരസഹായങ്ങള് എത്തിക്കാനുള്ള വെടിനിര്ത്തല് സമയം ചൊവ്വാഴ്ച രാവിലെ അവസാനിക്കാനിരുന്ന പശ്ചാത്തലത്തിലാണ് വെടിനിര്ത്തല് 48 മണിക്കൂര് കൂടി നീട്ടുന്നത്.
വെടിനിര്ത്തല് നീട്ടാനുള്ള ധാരണയെ, ‘യുദ്ധത്തിന്റെ ഇരുട്ടിന്റെ നടുവില് പ്രതീക്ഷയുടെയും മാനവികതയുടെയും ഒരു വെളിച്ചം’ എന്ന് യുഎന് സെക്രട്ടറി ജനറല് അന്റോണിയോ ഗുട്ടെറസ് പറഞ്ഞു. വെടിനിര്ത്തല് നീട്ടുന്നതിനുള്ള കരാറിന്റെ ഭാഗമായി ജയിലിലുള്ള 50 വനിതാ തടവുകാരെ മോചിപ്പിക്കുമെന്ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു അറിയിച്ചു.
ഇതിന് ഇസ്രയേല് മന്ത്രിസഭ അംഗീകാരം നല്കി. വെടിനിര്ത്തല് ധാരമ പ്രകാരം മൂന്നാം ദിവസം നാലു വയസ്സുള്ള അമേരിക്കന് ബാലിക അടക്കം 17 ബന്ദികളെ ഹമാസ് കഴിഞ്ഞദിവസം മോചിപ്പിച്ചിരുന്നു. 10 ബന്ദികളെ വീതം ഹമാസ് മോചിപ്പിച്ചാല് വെടിനിര്ത്തല് ഓരോ ദിവസവും ദീര്ഘിപ്പിക്കാമെന്ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു വ്യക്തമാക്കിയിരുന്നു.
by Midhun HP News | Nov 27, 2023 | Latest News, ദേശീയ വാർത്ത
കല്പ്പറ്റ: കുസാറ്റ് ദുരന്തത്തില് മരിച്ച കോഴിക്കോട് താമരശ്ശേരി സ്വദേശിനി സാറാ തോമസ് (20) ഇനി ജ്വലിക്കുന്ന ഓര്മ്മ. സാറയ്ക്ക് ജന്മനാട് കണ്ണീരില് കുതിര്ന്ന അന്ത്യാഞ്ജലി നല്കി. ഈങ്ങാപ്പുഴ സെയ്ന്റ് ജോർജസ് ഓർത്തഡോക്സ് വലിയപള്ളി സെമിത്തേരിയിലായിരുന്നു സംസ്കാരം.
സാറയുടെ മാതാപിതാക്കൾ, സഹോദരിമാർ, അടുത്ത ബന്ധുക്കൾ, നാട്ടുകാർ തുടങ്ങി നിരവധി പേരാണ് സെമിത്തേരിയിൽ സാറയ്ക്ക് അന്തിമോപചാരം അർപ്പിക്കാനെത്തിയത്. രാവിലെ വീട്ടിലെ പ്രാർത്ഥനാ ശുശ്രൂഷകൾ പൂർത്തിയാക്കിയ ശേഷം വിലാപയാത്രയായാണ് മൃതദേഹം പള്ളിയിലേക്ക് എത്തിച്ചത്.
വീട്ടിലും സ്കൂളിലും പൊതു ദർശനത്തിന് വെച്ചപ്പോൾ അന്ത്യോപചാരം അർപ്പിക്കാൻ കഴിയാത്തവർക്കായി ഒരു നോക്കു കാണാൻ പള്ളിയിലും പ്രത്യേക ക്രമീകരണം ഏർപ്പെടുത്തിയിരുന്നു.
താമരശ്ശേരി കോരങ്ങാട് സെയ്ന്റ് അൽഫോൻസാ ഹയർസെക്കൻഡറി സ്കൂളിൽ പൊതുദർശനത്തിന് വെച്ചപ്പോൾ നൂറുകണക്കിന് പേരാണ് സാറ തോമസിനെ അവസാനമായി ഒരുനോക്ക് കാണാൻ എത്തിയത്. പൂർവകാല വിദ്യാർത്ഥിയെ അവസാനമായി കണ്ട് ആദരമർപ്പിക്കാൻ സ്കൂളിലെ വിദ്യാർത്ഥികൾ പുഷ്പങ്ങളുമായെത്തി.കുസാറ്റിൽ ഇലക്ട്രോണിക്സ് ആൻഡ് കമ്യൂണിക്കേഷൻ മൂന്നാം സെമസ്റ്റർ വിദ്യാർഥിനിയായ സാറാ തോമസ് കോരങ്ങാട് തൂവക്കുന്നുമ്മൽ വയലപ്പള്ളിൽ തോമസ് സ്കറിയുടെയും കൊച്ചുറാണിയുടെയും മകളാണ്. സാറയ്ക്ക് രണ്ടു സഹോദരമാരാണുള്ളത്.
കാമ്പസിലെ ടെക് ഫെസ്റ്റിനിടെയുണ്ടായ തിരക്കിലും തിരക്കിലും പെട്ടാണ് സാറ തോമസ് അടക്കം നാലുപേര് മരിച്ചത്. ദുരന്തത്തിൽ മരിച്ച ആൻ റുഫ്തയുടെ മൃതദേഹം നാളെ സംസ്കരിക്കും.
by Midhun HP News | Nov 27, 2023 | Latest News, ദേശീയ വാർത്ത
ഗുജറാത്തിൽ മിന്നലേറ്റ് 20 പേർ മരിച്ചു. സംസ്ഥാനത്ത് ഞായറാഴ്ച മുതൽ തുടരുന്ന മഴയിൽ നിരവധി നാശനഷ്ടങ്ങളാണ് റിപ്പോർട്ട് ചെയ്തിട്ടുള്ളത്. സംഭവത്തിൽ കേന്ദ്ര ആഭ്യന്തരമന്ത്രി അമിത് ഷാ അനുശോചനം രേഖപ്പെടുത്തി. സൂറത്ത്, സുരേന്ദ്രനഗർ, ഖേദ, തപി, ബഹാറുച്, അമ്രേലി തുടങ്ങിയ ജില്ലകളിൽ ശക്തമായ മഴയാണ് പെയ്തത്. ഗുജറാത്തിലെ 252 താലൂക്കുകളിൽ 234 ഇടങ്ങളിലും ശക്തമായ മഴയായിരുന്നുവെന്ന് സ്റ്റേറ്റ് എമർജൻസി ഓപ്പറേഷൻ സെന്റർ അറിയിച്ചു. ന്നും സംസ്ഥാനത്ത് ശക്തമായ മഴ തുടരുമെന്ന് കാലാവസ്ഥ വകുപ്പ് മുന്നറിയിയിപ്പ് നൽകി.
Recent Comments