by Midhun HP News | Oct 20, 2026 | Latest News, കേരളം
കൊല്ലം: നെടുമ്പ ഉഗ്രാംകുന്ന് അജിത് ഭവനില്‍ അജിത്തിന്റെ ഭാര്യ ശ്രീദേവി (28), മകന്‍ ആദിദേവ് (5) എന്നിവര്‍ക്കാണ് ഇടിമിന്നലില്‍ പൊള്ളലേറ്റത്. തിങ്കളാഴ്ച്ച ഉച്ചക്ക് വീട്ടില്‍ ആഹാരം കഴിച്ചുകൊണ്ടിരിക്കേയാണ് സംഭവം. കുഞ്ഞിന് ദേഹമാസകലവും അമ്മയ്ക്ക് വയറിന്റെ ഭാഗത്തുമാണ് പൊള്ളലേറ്റത്. ഇരുവരെയും തിരുവനന്തപുരം എസ്എടി ആശുപത്രിയില്‍ പ്രവേശിപ്പിച്ചു.
ഇടിമിന്നലില്‍ വീടിന്റെ ചുവരും കിണറും തകര്‍ന്നിട്ടുണ്ട്. സ്വിച്ച് ബോര്‍ഡുകള്‍ പൊട്ടിത്തെറിക്കുകയും ഇലക്ട്രിക് വയറുകള്‍ കത്തിപ്പോവുകയും ചെയ്തു. ശ്രീദേവിയും ആദിദേവും മറ്റ് രണ്ട് മക്കളും ഭര്‍തൃമാതാവുമാണ് വീട്ടില്‍ ഉണ്ടായിരുന്നത്. വീടിന്റെ മുന്‍വശത്തെ മുറിയില്‍ ഒരുമിച്ചിരുന്ന് ഭക്ഷണം കഴിക്കുന്നതിനിടെ ശ്രീദേവിയും ആദിദേവും അടുക്കളയിലേക്ക് പോയി. പെട്ടെന്നുണ്ടായ ഇടിമിന്നലില്‍ അടുക്കളയില്‍ വെച്ചാണ് ഇരുവര്‍ക്കും ഇടിമിന്നലേല്‍ക്കുന്നത്.
നിലവിളി കേട്ട് ഓടിയെത്തിയ അയല്‍വാസികളാണ് ഇവരെ ആശുപത്രിയില്‍ എത്തിച്ചത്. ആദ്യം നെടുമ്പന ടിബി ആശുപത്രിയില്‍ എത്തിച്ച് പ്രാഥമിക ചികിത്സ നല്‍കി. പിന്നീട് പാരിപ്പള്ളി മെഡിക്കല്‍ കോളേജിലേക്ക് കൊണ്ടു പോയി. കുഞ്ഞിന്റെ നിലഗുരുതരമായതോടെ തിരുവനന്തപുരം എസ്എടി ആശുപത്രിയിലേക്ക് കൊണ്ടു പോയി. നെടുമ്പന ഉഗ്രാംകുന്ന് ഭാഗത്ത് മുന്‍പും ഇതേപോലെ ഒരു വീട്ടില്‍ ഇടിമിന്നലേറ്റിരുന്നു എന്ന് പഞ്ചായത്തംഗം നിസാമോള്‍ പറഞ്ഞു.
by Midhun HP News | Oct 19, 2026 | Latest News, കേരളം
തിരുവനന്തപുരം: സംസ്ഥാനത്ത് തുലാവര്‍ഷം ശക്തമാകുന്നു. വിവിധ ജില്ലകളില്‍ തിങ്കളാഴ്ച രാവിലെ ശക്തമായ മഴയാണ് ലഭിച്ചത്. തുലാവര്‍ഷം ശക്തമായതിനെ തുടര്‍ന്ന് കേന്ദ്ര കാലാവസ്ഥ വകുപ്പ് മുന്നറിയിപ്പില്‍ മാറ്റം വരുത്തി. ഇന്ന് ഒന്‍പത് ജില്ലകളിലാണ് ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്കുള്ള സാധ്യത നിലനില്‍ക്കുന്നത്. ജാഗ്രതയുടെ ഭാഗമായി പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട് വയനാട്, കണ്ണൂര്‍ ജില്ലകളില്‍ കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചു.
യെല്ലോ അലര്‍ട്ട്
20/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം
21/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം
22/10/2026: ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍
23/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍
24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. മഴയ്‌ക്കൊപ്പം ഈ ദിവസങ്ങളില്‍ ഇടിമിന്നലിനുള്ള സാധ്യതയും നിലനില്‍ക്കുന്നുണ്ട്. മണിക്കൂറില്‍ 50 കിലോമീറ്റര്‍ വരെ വേഗത്തില്‍ ശക്തമായ കാറ്റിനും സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു.
by Midhun HP News | Oct 19, 2026 | Latest News, കേരളം
കൊച്ചി: മുഖ്യമന്ത്രി വിഡി സതീശന്റെ മണ്ഡലത്തില്‍ ഉള്‍പ്പെട്ട പ്രദേശത്ത് കെഎസ്ഇബി ട്രാന്‍സ്‌ഫോര്‍മറിന്റെ ഫ്യൂസ് ഊരി വൈദ്യുത തടസ്സമുണ്ടാക്കിയ കേസിലെ പ്രതി അറസ്റ്റില്‍. കൈതാരം സ്വദേശിയായ കളത്തിപ്പറമ്പില്‍ വിഷ്ണുവിനെയാണ് പൂനെയില്‍നിന്ന് പൊലീസ് പിടികൂടിയത്.
കഴിഞ്ഞ വൈദ്യുതി പ്രതിസന്ധിയുടെ കാലത്താണ് പറവൂരില്‍ വ്യാപകമായി ട്രാന്‍സ്‌ഫോര്‍മറുകളില്‍നിന്ന് ഫ്യൂസ് ഊരി മാറ്റുന്ന സംഭവങ്ങള്‍ റിപ്പോര്‍ട്ട് ചെയ്തത്. കൈതാരത്ത് നടന്ന സംഭവത്തിന്റെ സിസിടിവി ദൃശ്യങ്ങള്‍ പൊലീസ് ശേഖരിച്ചിരുന്നു. കെഎസ്ഇബി നല്‍കിയ ഔദ്യോഗിക പരാതിയുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതി പിടിയിലായത്.
സംഭവത്തിനു പിന്നാലെ കേരളം വിട്ട വിഷ്ണുവിനെ കേന്ദ്രീകരിച്ച് നടത്തിയ അന്വേഷണത്തിലാണ് പൂനെയില്‍നിന്ന് പിടികൂടിയത്. സംഭവത്തില്‍ നേരത്തെ രാഷ്ട്രീയ ആരോപണങ്ങള്‍ ഉയര്‍ന്നിരുന്നു. എന്നാല്‍, പ്രതിക്ക് ഏതെങ്കിലും രാഷ്ട്രീയ പാര്‍ട്ടിയുമായി ബന്ധമില്ലെന്നും നാട്ടുകാരെ ബുദ്ധിമുട്ടിക്കുന്ന സാമൂഹികവിരുദ്ധ മനോഭാവമാണ് സംഭവത്തിന് പിന്നിലെന്നും പൊലീസ് വ്യക്തമാക്കി.
by Midhun HP News | Oct 19, 2026 | Latest News, കേരളം
തിരുവനന്തപുരം: രജിസ്ട്രേഷൻ നമ്പർ എന്നത് വാഹനങ്ങളെ സംബന്ധിച്ചിടത്തോളം ഏറെ പ്രധാനപ്പെട്ട ഒന്നാണ്. എന്നാൽ പല വാഹന ഉടമകളും വളരെ ലാഘവത്തോടെയാണ് നമ്പർ പ്ലേറ്റ് കൈകാര്യം ചെയ്യുന്നത്. രജിസ്ട്രേഷൻ നമ്പർ പ്ലേറ്റ് അഴിച്ചു വെക്കുന്നതും നമ്പർ പ്ലേറ്റ് വളച്ച് വെയ്ക്കുന്നത് നിയമലംഘനമാണെന്ന് മോട്ടോർ വാഹനവകുപ്പ് ഓർമ്മിപ്പിച്ചു.
ക്യാമറയിൽ പതിയാത്ത തരം മെറ്റീരിയൽ കൊണ്ട് നമ്പർ പ്ലേറ്റ് ഉണ്ടാക്കുന്നതും നമ്പർ പ്ലേറ്റിൽ അനാവശ്യമായ ചിത്രങ്ങൾ, എഴുത്തുകൾ ഒട്ടിക്കുന്നതും ഹൈ സെക്യൂരിറ്റി നമ്പർ പ്ലേറ്റ് അഴിച്ചുമാറ്റി സാധാരണ നമ്പർ പ്ലേറ്റ് ഘടിപ്പിക്കുന്നതും നിയമവിരുദ്ധമാണെന്നും മോട്ടോർ വാഹനവകുപ്പ് ഫെയ്സ്ബുക്കിൽ കുറിച്ചു.
കുറിപ്പ്:
രജിസ്ട്രേഷൻ നമ്പർ എന്നത് വാഹനങ്ങളെ സംബന്ധിച്ചിടത്തോളം ഏറെ പ്രധാനപ്പെട്ട ഒന്നാണ്. എന്നാൽ പല വാഹന ഉടമകളും വളരെ ലാഘവത്തോടെ അവർക്കിഷ്ടപ്പെട്ട രീതിയിൽ പ്രദർശിപ്പിക്കുകയും, ചിലർ മറച്ച് വെക്കുകയും, മറ്റു ചിലർ അഴിച്ചു വെക്കുകയും, കാണാതിരിക്കാൻ ചെളി വാരിത്തേക്കുകയും ഒക്കെ ചെയ്യുന്നതായി കാണുന്നു.
പരിശോധനക്കിടെ കാണുന്ന പ്രധാന പ്രശ്നങ്ങൾ ഒന്ന് പരിശോധിക്കാം.
1. റെജിസ്ട്രേഷൻ നമ്പർ പ്ലേറ്റ് അഴിച്ചു വെക്കുക.
2. നമ്പർ പ്ലേറ്റ് വളച്ച് വെക്കുക.
3. നമ്പർ കാണാത്ത തരത്തിൽ മറച്ചുവെക്കുക.
4. നമ്പർ പ്ലേറ്റിൻ്റെ ഒരു ഭാഗം മുറിച്ചു കളയുക.
5. കാണാതിരിക്കാൻ കരി ഓയിൽ, ചെളി മുതലായവ തേച്ചു വെക്കുക.
6. ഏതെങ്കിലും ഒരു അക്കത്തിനു മേൽ എന്തെങ്കിലും ഒട്ടിച്ചു വെക്കുക.
7. നമ്പർ പ്ലേറ്റ് തന്നെ വിചാഗിരി വെച്ച് ആവശ്യത്തിന് മടക്കി വെക്കുക.
8. ആവശ്യാനുസരണം റിമോട്ട് വഴി പ്ലേറ്റിനെ കവർ ചെയ്യുക.
9. ക്യാമറയിൽ പതിയാത്ത തരം മെറ്റീരിയൽ കൊണ്ട് നമ്പർ പ്ലേറ്റ് ഉണ്ടാക്കുക.
10. നമ്പർ പ്ലേറ്റിൽ അനാവശ്യമായ ചിത്രങ്ങൾ, എഴുത്തുകൾ ഒട്ടിക്കുക.
11. ടെമ്പററി റെജിസ്ട്രേഷൻ നമ്പർ മഞ്ഞ പ്രതലത്തിൽ ചുവപ്പ് അക്കങ്ങൾക്ക് പകരം ചുവന്ന പ്രതലത്തിൽ വെളുത്തതോ, കറുത്തതോ നിറമുള്ള അക്കത്തിൽ എഴുതുക.
12. ട്രാൻസ്പോർട്ട് വാഹനങ്ങളിൽ സൈഡിൽ നമ്പർ എഴുതാതിരിക്കുക.
13. ബാറ്ററി ഓപറേറ്റഡ് (EV) ട്രാൻസ്പോർട്ട് വാഹനങ്ങൾക്ക് പച്ച പ്രതലത്തിൽ മഞ്ഞ അക്ഷരത്തിന്നു പകരം വെളുത്ത അക്ഷരത്തിൽ എഴുതുക.
14. ഹൈ സെക്യൂരിറ്റി നമ്പർ പ്ലേറ്റ് അഴിച്ചുമാറ്റി സാധാരണ നമ്പർ പ്ലേറ്റ് ഘടിപ്പിക്കുക.
ഇങ്ങനെയുള്ള പ്രവൃത്തികള്‍ കൊണ്ട് അപകടങ്ങളിൽ പെട്ട വാഹനങ്ങൾ തിരിച്ചറിയാൻ പ്രയാസമുണ്ടാവുകയും, hit and run കേസുകളിൽ ഉൾപെടെ സാധാരണ നിലയിൽ ലഭിക്കേണ്ടതായ ഇൻഷുറൻസ് പരിരക്ഷ ഇരകൾക്ക് കിട്ടാതിരിക്കാനും സാധ്യത ഉണ്ട്.
ഇത്തരം നിയമലംഘനങ്ങൾക്കെല്ലാം റെജിസ്ട്രേഷൻ ചട്ടങ്ങളുടെ ലംഘനമായി കണക്കാക്കി ലൈറ്റ് മോട്ടോർ വാഹനങ്ങൾക്ക് 3000 രൂപയും, മീഡിയം ഹെവി വാഹനങ്ങൾക്ക് 5000 രൂപയുമാണ് പിഴയൊടുക്കേണ്ടത് എന്നുകൂടി മനസിലാക്കുക.
by Midhun HP News | Oct 19, 2026 | Latest News, കേരളം
മുംബൈ: ജുഹുവില്‍ വെടിവയ്പില്‍ പരിക്കേറ്റ നടന്‍ ടൈഗര്‍ ഷറോഫിനെ മഹാരാഷ്ട്ര ഉപ മുഖ്യമന്ത്രി ഏക്‌നാഥ് ഷിന്‍ഡെ സന്ദര്‍ശിച്ചു. ഞായാറാഴ്ച രാത്രിയാണ് മുഖ്യമന്ത്രി ടൈഗര്‍ ഷറോഫിന്റെ വസതിയിലെത്തിയത്. കുടുംബത്തിന് സംസ്ഥാന സര്‍ക്കാരിന്റെ പിന്തുണ കുടിക്കാഴ്ചയില്‍ ഉപമുഖ്യമന്ത്രി ഉറപ്പുനല്‍കുകയും ചെയ്തു.
ടൈഗര്‍ ഷറോഫിന് നേരെ അഞ്ചുതവണയാണ് അക്രമികള്‍ വെടിയുതിര്‍ത്തതെന്ന് നടനുമായുള്ള കൂടിക്കാഴ്ചയ്ക്ക് ശേഷം ഷിന്‍ഡെ പറഞ്ഞു. അദ്ദേഹത്തിന്റെ ഇടതുകൈക്ക് പരിക്കേറ്റതായും സംഭവത്തില്‍ ഡ്രൈവര്‍ക്ക് പരിക്ക് പറ്റിയതായും അദ്ദേഹം പറഞ്ഞു. അതേസമയം, കൃത്യമായ ആസൂത്രണത്തോടെ ആക്രമണം ഉണ്ടായതെന്ന് പൊലീസ് പറഞ്ഞു. അക്രമികള്‍ ഉപയോഗിച്ച ബൈക്ക് അന്ധേരി റെയില്‍വേ സ്‌റ്റേഷന് സമീപം ഉപേക്ഷിച്ച നിലയില്‍ കണ്ടെത്തി. മുംബൈ രജിസ്റ്റര്‍ ചെയ്ത ബൈക്ക് പൊലീസ് കസ്റ്റഡിയിലെടുത്തു.
ഞായറാഴ്ച വൈകുന്നേരം ഫുട്‌ബോള്‍ കളി കഴിഞ്ഞ് വീട്ടിലേക്ക് മടങ്ങുന്നതിനിടെയാണ് അദ്ദേഹത്തിന്റെ ബിഎംഡബ്ല്യു കാറിന് നേരെ ആക്രമണമുണ്ടായത്. ടൈഗര്‍ ഷറോഫിന്റെ കാറിനു നേരെ അക്രമികള്‍ വെടിയുതിര്‍ക്കുന്ന ദൃശ്യങ്ങള്‍ പുറത്തുവന്നു. മുംബൈയിലെ പുഷ്പ പാര്‍ക്കിലെ ഫുട്‌ബോള്‍ മൈതാനത്തുനിന്ന് നടന്‍ തന്റെ കാറില്‍ യാത്രതിരിക്കവെ, രണ്ട് അക്രമികള്‍ കാറിന്റെ മുന്‍വശത്തെ ചില്ലിലൂടെയും വശങ്ങളിലൂടെയും അദ്ദേഹത്തിന് നേരെ തുടരെ വെടിയുതിര്‍ക്കുന്നത് ദൃശ്യങ്ങളില്‍ വ്യക്തമാണ്. എന്നാല്‍ കാറിന്റെ തൊട്ടടുത്തെത്തി പോയിന്റ് ബ്ലാങ്ക് റേഞ്ചില്‍ വെടിവയ്ക്കാന്‍ ശ്രമിച്ച അക്രമിയുടെ തോക്ക് പ്രവര്‍ത്തനരഹിതമായത് വലിയ ദുരന്തം ഒഴിവാക്കി. 18 സെക്കന്‍ഡ് ദൈര്‍ഘ്യമുള്ള വിഡിയോയില്‍, വെടിവയ്പ്പില്‍ പരുക്കേറ്റ കാര്‍ ഡ്രൈവര്‍ വാഹനത്തില്‍ നിന്ന് പുറത്തിറങ്ങുന്നതും കാണാം. ഈ സമയം, മൂന്നാമതൊരാള്‍ തയാറാക്കി നിര്‍ത്തിയിരുന്ന ബൈക്കില്‍ അക്രമികള്‍ രക്ഷപ്പെടുകയായിരുന്നു.
മറ്റു ചില ദൃശ്യങ്ങളില്‍, ടൈഗര്‍ ഷറോഫ് കാറിന്റെ മുന്‍വശത്തെ പാസഞ്ചര്‍ സീറ്റില്‍ കയറി അവിടെ നിന്ന് യാത്ര തിരിക്കുന്ന നിമിഷം, തൊട്ടുപിന്നാലെ ബൈക്കിലെത്തിയ സംഘം കാറിന് നേരെ അഞ്ച് തവണ വെടിയുതിര്‍ക്കുന്നതു കാണാം. ഡ്രൈവര്‍ ഫിര്‍ദൗസിന് പരുക്കേറ്റതോടെ ടൈഗര്‍ സ്വയം ഡ്രൈവിങ് സീറ്റിലേക്ക് മാറുന്നതാണ് മറ്റൊരു 14 സെക്കന്‍ഡ് വിഡിയോയിലുള്ളത്. കാറിലും റോഡിലും രക്തക്കറകള്‍ കാണാം. ‘ടൈഗര്‍, വേഗം കൊണ്ടുപോകൂ’ എന്ന് പരിക്കേറ്റ ഡ്രൈവറെ ചൂണ്ടിക്കാട്ടി ഒരു സ്ത്രീ നടനോട് പറയുന്നതും ദൃശ്യങ്ങളിലുണ്ട്.
അക്രമികള്‍ക്കെതിരെ കര്‍ശന നടപടി സ്വീകരിക്കുമെന്ന് സംസ്ഥാന സര്‍ക്കാര്‍ വ്യക്തമാക്കി. തലനാരിഴയ്ക്കാണ് ടൈഗര്‍ ഷറോഫ് വെടിയേല്‍ക്കാതെ രക്ഷപ്പെട്ടത്.അക്രമികളെ തിരിച്ചറിയുന്നതിനും അവരുടെ സഞ്ചാരവഴികളും കൃത്യത്തിന് ശേഷം രക്ഷപ്പെട്ട രീതിയും കണ്ടെത്താനുമായി 15 പ്രത്യേക അന്വേഷണ സംഘങ്ങള്‍ പ്രദേശത്തെ സിസിടിവി ദൃശ്യങ്ങള്‍ വിശദമായി പരിശോധിച്ച് വരികയാണ്’ പൊലീസ് പറഞ്ഞു.
by Midhun HP News | Oct 19, 2026 | Latest News, കേരളം
കണ്ണൂർ: കൗൺസിൽ ഹാളിലെ ചൂടേറിയ രാഷ്ട്രീയ വാദപ്രതിവാദങ്ങളും പോരടികളും മാറ്റിവെച്ച് ജനപ്രതിനിധികൾ ഒരേ മനസ്സോടെ ഒരേ വേദിയിൽ ചുവടുവെച്ചപ്പോൾ കണ്ണൂർ ദസറ ആഘോഷങ്ങൾക്ക് പുത്തൻ മിഴിവ്. കലകൾ മനുഷ്യരെ ഒരുമിപ്പിക്കാനുള്ളതാണെന്ന ഉന്നതമായ ദസറ സന്ദേശം അന്വർത്ഥമാക്കി യുഡിഎഫ്, എൽഡിഎഫ്, ബിജെപി കക്ഷിഭേദമന്യേ കോർപ്പറേഷനിലെ വനിതാ കൗൺസിലർമാർ അവതരിപ്പിച്ച ഫ്യൂഷൻ ഡാൻസ് കാണികളിൽ വലിയ ആവേശമാണ് പടർത്തിയത്. നാടിന്റെ വികസനകാര്യങ്ങളിലും സാമൂഹിക പ്രവർത്തനങ്ങളിലും കാട്ടുന്ന നേതൃപാടവത്തിനൊപ്പം കലാരംഗവും തങ്ങൾക്ക് വഴങ്ങുമെന്ന് തെളിയിക്കുകയായിരുന്നു ഈ ജനപ്രതിനിധികൾ.
നാടൻ കലാ പ്രകടനങ്ങളുടെ ഭാഗമായി വേദിയിലെത്തിയ വനിതാ കൗൺസിലർമാരുടെ നൃത്തം സദസ്സിൽ തിങ്ങിനിറഞ്ഞ ജനക്കൂട്ടം വലിയ ഹർഷാരവത്തോടെയാണ് സ്വീകരിച്ചത്. വെല്ലിംഗ്ടൺ ഐലൻഡ് മ്യൂസിക് ബാൻഡിന്റെ സംഗീത പരിപാടി പ്രതീക്ഷിച്ചിരുന്ന ആയിരക്കണക്കിന് കാണികൾക്ക് മുന്നിലാണ് കക്ഷിരാഷ്ട്രീയത്തിന്റെ വേർതിരിവുകൾ മറന്ന് കൗൺസിലർമാർ ഒരുമിച്ച് ആടിത്തിമിർത്തത്.
കൗൺസിലർമാരായ ദീപ പി, വിജിന കെ.കെ, ശ്രുതി കെ.പി, ശ്രീജ കെ, ദീപ്‌തി വിനോദ്, സുമ കെ, രേഷ്മ വിനോദ് എന്നിവരാണ് ദസറ വേദിയിൽ മികവുറ്റ ഫ്യൂഷൻ ഡാൻസ് കാഴ്ചവെച്ചത്. രാഷ്ട്രീയ ഭിന്നതകൾ മറന്നുള്ള ഇവരുടെ ഒത്തൊരുമയും കലാപ്രകടനവും ജനങ്ങൾക്കിടയിലും മാതൃകാപരമായ വലിയ കൈയടിയാണ് നേടിക്കൊടുത്തത്.
Recent Comments