by Midhun HP News | Oct 14, 2026 | Latest News, കേരളം
തൃശൂര്‍: കൊടുങ്ങല്ലൂരില്‍ ആത്മഹത്യ ചെയ്ത 18 കാരന്‍ മുഹമ്മദ് അസ്ലം, ഭീഷണിപ്പെടുത്തി പണം തട്ടാന്‍ ആസൂത്രണം നടത്തിയെന്നതിന്റെ ശബ്ദരേഖ പുറത്തുവിട്ട് പെണ്‍കുട്ടിയുടെ കുടുംബം. അസ്ലം സുഹൃത്തിനോട് ഇക്കാര്യം പറയുന്ന ഓഡിയോയാണ്, കേസിലെ പരാതിക്കാരിയായ പെണ്‍കുട്ടിയുടെ കുടുംബം പുറത്തുവിട്ടത്. കള്ളക്കേസില്‍ കുടുക്കിയതിലും പൊലീസ് മര്‍ദ്ദനത്തിലും മനംനൊന്താണ് അസ്ലം ജീവനൊടുക്കിയതെന്ന് പിതാവ് നൗഷാദ് ആരോപിച്ചിരുന്നു.
പെണ്‍കുട്ടിയുടെ കയ്യില്‍ നിന്നാണെങ്കില്‍ മൂന്നെണ്ണം തന്നാല്‍ മതിയെന്നും. അവളുടെ ചേച്ചിയില്‍ നിന്നും വാങ്ങുകയാണെങ്കില്‍ പണമായിട്ടേ വാങ്ങുകയുള്ളൂവെന്നും പറയുന്നതായാണ് ഓഡിയോയിലുള്ളത്. ‘ചേച്ചിയുടെ കയ്യില്‍ നിന്നാണെങ്കില്‍ മൂന്നു ലക്ഷം രൂപ വാങ്ങിക്കും. അതിനുള്ള വകുപ്പ് വിത്ത് പ്രൂഫ് ആയി ഉണ്ടാക്കും. ഞാന്‍ എന്റെ കയ്യിലുള്ളതെല്ലാം അയക്കും. അപ്പോള്‍ അവളുടെ ചേച്ചി ലീക്ക് ആകാതിരിക്കാന്‍ സമ്മതിക്കും. അവളുടെ ചേച്ചി ജര്‍മ്മനി, യുകെ, കാനഡ എന്നിവിടങ്ങളിലെല്ലാം പോകുന്നതാണല്ലോ. അവളേക്കാളും കൂടുതല്‍ പൈസ ചേച്ചിയുടെ കയ്യിലുണ്ടാകും. ഞാന്‍ ചിലപ്പോ ഇത്തിരി കൂട്ടിയും പറയും. അപ്പോള്‍ അവള്‍ തന്നെ റെഡിയാക്കി തന്നോളും’ എന്നും ഓഡിയോ സന്ദേശത്തിലുണ്ട്.
നാലുമാസമായി പെണ്‍കുട്ടി അസ്ലത്തെ ഫോണില്‍ ബ്ലോക്ക് ചെയ്തിരുന്നു. ഇതേത്തുടര്‍ന്നാണ് പെണ്‍കുട്ടിയുടെ പരിചയക്കാരന്‍ കൂടിയായ സുഹൃത്തിന് അസ്ലം സന്ദേശം അയക്കുന്നത്. പെണ്‍കുട്ടിയോട് ഫോണ്‍ എടുക്കാന്‍ പറയണം. അല്ലെങ്കില്‍ തന്റെ പക്കലുള്ള ചിത്രങ്ങള്‍ പ്രചരിപ്പിക്കുമെന്നും പറഞ്ഞിരുന്നു. പെണ്‍കുട്ടിയുടെ വിദേശത്തുള്ള ചേച്ചിക്കും യുവാവ് മെസ്സേജ് അയച്ചിരുന്നു. ഇതേത്തുടര്‍ന്നാണ് പണവും സ്വര്‍ണ്ണവും കൈക്കലാക്കാനാണ് യുവാവിന്റെ ശ്രമമെന്ന് പെണ്‍കുട്ടിയുടെ കുടുംബം നിഗമനത്തിലെത്തുന്നത്.
തുടര്‍ന്ന് വീട്ടിലെ സ്വര്‍ണം കാണാതായതുമായി ബന്ധപ്പെട്ട് പെണ്‍കുട്ടിയോട് ചോദിച്ചപ്പോള്‍, ഇന്‍സ്റ്റഗ്രാം വഴി ഒരു യുവാവുമായി സൗഹൃദമുണ്ടായിരുന്നുവെന്നും, ആ സമയത്ത് എടുത്ത ചിത്രങ്ങള്‍ വെച്ച് ഭീഷണിപ്പെടുത്തി സ്വര്‍ണവും പണവും വാങ്ങിയെന്നും പറഞ്ഞു. ഇതുമായി ബന്ധപ്പെട്ട ഓഡിയോ ക്ലിപ്പുകളെല്ലാം ലഭിച്ചശേഷമാണ് പെണ്‍കുട്ടിയുടെ വീട്ടുകാര്‍ പരാതിയുമായി പൊലീസിനെ സമീപിച്ചത്. പരാതി നല്‍കിയ ദിവസം പെണ്‍കുട്ടിയുടെ വീട്ടിലെത്തി ഭീഷണിപ്പെടുത്താന്‍ യുവാവ് വരുന്നതിന്റെ വീഡിയോ ദൃശ്യവും വീട്ടുകാര്‍ പുറത്തു വിട്ടിട്ടുണ്ട്.
കൊടുങ്ങല്ലൂരില്‍ ഏറിയാട് സ്വദേശിയായ പതിനെട്ടുകാരന്‍ മുഹമ്മദ് അസ്ലം ജീവനൊടുക്കിയ സംഭവത്തില്‍ പൊലീസിനെതിരെ ഗുരുതര ആരോപണവുമായി പിതാവ് നൗഷാദ് രംഗത്തെത്തിയിരുന്നു. കള്ളക്കേസ് എടുത്തതിലും പൊലീസ് മര്‍ദ്ദനത്തിലും മനംനൊന്താണ് മകന്‍ മുഹമ്മദ് അസ്ലം ജീവനൊടുക്കിയതെന്ന് അച്ഛന്‍ നൗഷാദ് ആരോപിച്ചിരുന്നു.അസ്ലമുമായുള്ള ബന്ധത്തെ എതിര്‍ത്ത പെണ്‍കുട്ടിയുടെ കുടുംബം പൊലീസിനെ സ്വാധീനിച്ച് മക്കളെ രണ്ട് പേരെയും കസ്റ്റഡിയിലെടുപ്പിച്ചു. പെണ്‍കുട്ടിയെ ഭീഷണിപ്പെടുത്തി സ്വര്‍ണ്ണവും പണവും കൈക്കലാക്കിയെന്ന കള്ള കേസില്‍ മക്കളെ കുടുക്കി. മകന്റെ മരണത്തില്‍ കുറ്റക്കാര്‍ക്കെതിരെ നടപടി സ്വീകരിക്കണമെന്നും നൗഷാദ് ആവശ്യപ്പെട്ടിരുന്നു.
by Midhun HP News | Oct 14, 2026 | Latest News, കേരളം
തിരുവനന്തപുരം: കേരളത്തിലെ നദികളിലെ മണല്‍വാരല്‍ ഡിസംബര്‍ അവസാനം അല്ലെങ്കില്‍ ജനുവരി ആദ്യം പുനരാംഭിക്കുമെന്ന് റവന്യൂമന്ത്രി എ പി അനില്‍കുമാര്‍. പ്രളയത്തിന് വഴിവെയ്ക്കുന്ന മണല്‍, ഏക്കല്‍ കൂമ്പാരങ്ങള്‍ മാറ്റുമെന്നും മന്ത്രി നിയമസഭയെ അറിയിച്ചു.
വെള്ളപ്പൊക്കത്തിന് കാരണമാകുന്ന നിരവധി കാരണങ്ങളില്‍ ഒന്ന് നദികളില്‍ മണല്‍ അടിഞ്ഞുകൂടിയതാണ്. മഴ കഴിഞ്ഞപ്പോള്‍ തന്നെ മുഖ്യമന്ത്രിയുടെ നേതൃത്വത്തില്‍ യോഗം ചേര്‍ന്നിരുന്നു. നിലവില്‍ മണല്‍വാരലുമായി ബന്ധപ്പെട്ട നടപടിക്രമങ്ങള്‍ തുടരുകയാണ്. മണല്‍വാരലിന് ഇനി വ്യവസായ വകുപ്പിന്റെയും പരിസ്ഥിതി വകുപ്പിന്റെ അനുമതി കൂടി ലഭിക്കേണ്ടതുണ്ട്. ഇവ ലഭിച്ചാല്‍ ഡിസംബര്‍ അവസാനത്തോടെ അല്ലെങ്കില്‍ ജനുവരി ആദ്യത്തോടെ കേരളത്തിലെ നദികളില്‍ മണല്‍വാരല്‍ ആരംഭിക്കുമെന്ന് എപി അനില്‍കുമാര്‍ പറഞ്ഞു.
സംസ്ഥാനത്ത് മണല്‍വാരലുമായി ബന്ധപ്പെട്ട് 155 കടവുകള്‍ അംഗീകാരത്തിനായി കണ്ടെത്തിയിട്ടുണ്ട്. ഈ കടവുകള്‍ തദ്ദേശ സ്വയംഭരണ സ്ഥാപനങ്ങളെ ഏല്‍പ്പിക്കാനും തീരുമാനിച്ചിട്ടുണ്ട്. മണല്‍ വന്ന് നിറഞ്ഞ് വെള്ളപ്പൊക്കം ഉണ്ടാവുന്നത് ഒഴിവാക്കാന്‍ ആവശ്യമായ നടപടികള്‍ സര്‍ക്കാര്‍ സ്വീകരിക്കുമെന്നും അദ്ദേഹം പറഞ്ഞു.
by Midhun HP News | Oct 14, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില വീണ്ടും കുറഞ്ഞ് പവന് 1,09,000ല്‍ താഴെയെത്തി. ഇന്ന് പവന് ഒറ്റയടിക്ക് 760 രൂപയാണ് കുറഞ്ഞത്. 1,08,720 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 95 രൂപയാണ് കുറഞ്ഞത്. 13,590 രൂപയാണ് ഒരു ഗ്രാം സ്വര്‍ണത്തിന്റെ വില. മൂന്ന് ദിവസത്തിനിടെ 2250 രൂപയിലധികമാണ് സ്വര്‍ണവിലയില്‍ പവന് ഉണ്ടായ ഇടിവ്.
ആഗോള വിപണിയില്‍ എണ്ണവില വര്‍ധിച്ചത് അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 106 ഡോളറിന് മുകളിലാണ്. സൗദി അറേബ്യയും യെമനിലെ ഇറാന്‍ പിന്തുണയുള്ള ഹൂതി വിമതരും തമ്മിലുള്ള സംഘര്‍ഷം വര്‍ധിച്ചതാണ് എണ്ണവില ഉയരാന്‍ പ്രധാന കാരണം. ഇതിന് പുറമേ പുറത്തുവരാനിരിക്കുന്ന അമേരിക്കയുടെ പണപ്പെരുപ്പ കണക്കുകളും വിപണിയെ സ്വാധീനിക്കും. പണപ്പെരുപ്പ നിരക്ക് കൂടുകയാണെങ്കില്‍ പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് നിര്‍ബന്ധിതമാകും. ഇത് സ്വര്‍ണത്തിന്റെ ആകര്‍ഷണം കുറയ്ക്കാമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 14, 2026 | Latest News, കേരളം
കൊച്ചി: എറണാകുളം മാര്‍ക്കറ്റ് റോഡിലെ ജൂതപ്പള്ളിക്ക് മുമ്പില്‍ തീയിട്ട സംഭവത്തില്‍ യുവാവ് പിടിയില്‍. എറണാകുളം പുത്തന്‍കുരിശ് വടയമ്പാടി പത്താംമൈല്‍ വാദ്യംപടി കുന്നത്തുകാവാലംകുഴി എബിന്‍ ബി പോള്‍ (32) ആണ് എറണാകുളം സെന്‍ട്രല്‍ പൊലീസിന്റെ പിടിയിലായത്. ഇയാളുടെ വീട്ടില്‍ നടത്തിയ പരിശോധനയില്‍ ഹെറോയിനും ഫെന്റനൈലും ഉള്‍പ്പെടെയുള്ള നിരോധിത ലഹരിവസ്തുക്കളുടെ ശേഖരം കണ്ടെത്തിയിട്ടുണ്ട്.
പ്രതിക്ക് തീവ്രവാദ ഗ്രൂപ്പുമായി ബന്ധമുണ്ടെന്ന സൂചന പൊലീസിന് ലഭിച്ചതായി റിപ്പോര്‍ട്ടുകളുണ്ട്. മൊബൈല്‍ ഫോണില്‍ നിന്നും ഇതുസംബന്ധിച്ച തെളിവുകള്‍ ലഭിച്ചതായി സൂചന. ഇതു വ്യക്തമാക്കുന്ന ചില രേഖകള്‍ അന്വേഷണ സംഘം വീട്ടില്‍ നിന്നും പിടിച്ചെടുത്തതായാണ് വിവരം. ‘ബോസ്’ എന്നയാള്‍ നല്‍കുന്ന ദൗത്യങ്ങള്‍ നിര്‍വഹിക്കുകയാണ് ചെയ്തതെന്നാണ് ഇയാള്‍ പൊലീസിനോട് പറഞ്ഞത്. ബോസിന്റെ യഥാര്‍ത്ഥ പേര് വ്യക്തമല്ല.
ഡല്‍ഹി, ഉത്തര്‍പ്രദേശ്, അമൃത്സര്‍ എന്നീ സ്ഥലങ്ങളില്‍ സ്‌ഫോടനം നടത്തണമെന്ന് ബോസ് സന്ദേശം അയച്ചതായും പൊലീസ് കണ്ടെത്തി. ചെയ്യുന്ന കുറ്റകൃത്യങ്ങള്‍ വീഡിയോയില്‍ പകര്‍ത്തി അയച്ചു കൊടുത്ത്, ഇതിന്റെ പ്രതിഫലം ക്രിപ്‌റ്റോകറന്‍സിയായി കൈപ്പറ്റുന്നതായിരുന്നു ഇയാളുടെ രീതിയെന്ന് പൊലീസ് സൂചിപ്പിച്ചു. തീവ്രവാദ ഗ്രൂപ്പുകളുമായി ബന്ധമുണ്ടെന്ന വിവരത്തിന്റെ അടിസ്ഥാനത്തില്‍ പ്രതിയെ ദേശീയ അന്വേഷണ ഏജന്‍സി ( എന്‍ഐഎ) അടക്കമുള്ള കേന്ദ്ര ഏജന്‍സികള്‍ ചോദ്യം ചെയ്തു.
പ്രതി എബിന്‍ പോളിന്റെ വീട്ടില്‍ നിന്നും എട്ട് ഇനങ്ങളിലായി 105.703 ഗ്രാം ലഹരിവസ്തുക്കളാണ് പിടിച്ചെടുത്തത്. 3.613 ഗ്രാം വെള്ള ഹെറോയിന്‍, 2.736 ഗ്രാം ബ്രൗണ്‍ ഹെറോയിന്‍, 2.361 ഗ്രാം ഓക്‌സികോഡോണ്‍, 5.264 ഗ്രാം ഫെന്റനൈല്‍, 20.171 ഗ്രാം ആല്‍പ്രാസോലം, 50.883 ഗ്രാം കെറ്റമിന്‍, 20.675 ഗ്രാം കെ- റോക്ക് എന്നിവയാണ് പിടിച്ചെടുത്തത്. കിടപ്പുമുറിയിലെ അലമാരയില്‍ സൂക്ഷിച്ചിരുന്ന ലഹരിശേഖരം കണ്ടെത്തിയതോടെ പുത്തന്‍കുരിശ് പൊലീസ് എന്‍ഡിപിഎസ് നിയമപ്രകാരവും കേസ് രജിസ്റ്റര്‍ ചെയ്തിട്ടുണ്ട്.
തിങ്കളാഴ്ച പുലര്‍ച്ചെ രണ്ടരയോടെയാണ് എറണാകുളം മാര്‍ക്കറ്റിനുള്ളിലെ സിനഗോഗിനു മുന്‍വശത്ത് തീവയ്പുണ്ടായത്. സിനഗോഗിന്റെ മാനേജിങ് ട്രസ്റ്റി പരിപാലിക്കുന്ന ഹോര്‍ട്ടികള്‍ച്ചര്‍ നഴ്സറിയുടെ ബാനറുകളും ഫ്‌ലെക്‌സുകളും പെട്രോളൊഴിച്ചു തീ കൊളുത്തുകയായിരുന്നു. കാറിലെത്തിയ പ്രതി വാഹനം മാറ്റിയിട്ട് പള്ളിക്കു മുന്നിലെ നഴ്സറിയിലേക്ക് പെട്രോള്‍ ഒഴിക്കുകയും തുടര്‍ന്ന് തീ എറിഞ്ഞ് നഴ്സറി കത്തിക്കുകയുമായിരുന്നു. പശ്ചിമേഷ്യന്‍ സംഘര്‍ഷങ്ങളുടെ പശ്ചാത്തലത്തില്‍ സിനഗോഗിന് പൊലീസ് സംരക്ഷണം ഏര്‍പ്പെടുത്തിയിരുന്നതാണ്.
by Midhun HP News | Oct 13, 2026 | Latest News, കേരളം
കൽപ്പറ്റ: 23 വയസിൽ താഴെയുള്ളവർക്കായുള്ള സികെ നായിഡു ട്രോഫിയിൽ പോണ്ടിച്ചേരിക്കെതിരെ പിടിമുറുക്കി കേരളം. രണ്ടാം ദിവസം കളി നിർത്തുമ്പോൾ അഞ്ച് വിക്കറ്റ് നഷ്ടത്തിൽ 240 റൺസെന്ന നിലയിലാണ് പോണ്ടിച്ചേരി. കേരളത്തിന്റെ ഒന്നാം ഇന്നിങ്സ് 515 റൺസിന് അവസാനിച്ചിരുന്നു.
അഞ്ച് വിക്കറ്റിന് 373 റൺസെന്ന നിലയിൽ രണ്ടാം ദിവസം കളി തുടങ്ങിയ കേരളത്തിൻ്റെ ഇന്നിങ്സ് 500 കടത്തിയത് മുഹമ്മദ് ഇനാന്റെയും ജിഷ്ണു മണികണ്ഠന്റെയും ആദിത്യ ബൈജുവിന്റെയും ഇന്നിങ്സുകളാണ്. ജിഷ്ണുവും മുഹമ്മദ് ഇനാനും ചേർന്ന് ആറാം വിക്കറ്റിൽ 89 റൺസ് കൂട്ടിച്ചേർത്തു. 70 റൺസെടുത്ത മുഹമ്മദ് ഇനാനെ രാഹുൽ രാജീവ് യാദവ് ക്ലീൻ ബൗൾഡ് ചെയ്യുകയായിരുന്നു. ജിഷ്ണു 55ഉം ആദിത്യ ബൈജു 47ഉം റൺസെടുത്ത് പുറത്തായി. വിജയ് വിശ്വനാഥ് 23 റൺസെടുത്തു. പോണ്ടിച്ചേരിക്ക് വേണ്ടി രാഹുൽ രാജീവ് യാദവ് മൂന്നും ആകാഷ് പുകഴേന്തി രണ്ടും വിക്കറ്റുകൾ വീഴ്ത്തി.
മറുപടി ബാറ്റിങ്ങിന് ഇറങ്ങിയ പോണ്ടിച്ചേരിയുടെ തുടക്കം തകർച്ചയോടെയായിരുന്നു. രണ്ട് വിക്കറ്റിന് 13 റൺസെന്ന നിലയിലായിരുന്ന പോണ്ടിച്ചേരിയെ പ്രവീൺ രാജരത്നവും അനീഷ് വിശാഗനും ചേർന്നുള്ള കൂട്ടുകെട്ടാണ് കരകയറ്റിയത്. പ്രവീൺ 74ഉം അനീഷ് 30ഉം റൺസെടുത്തു. കൈലാസ് ബി നായരാണ് ഇരുവരെയും പുറത്താക്കിയത്. തുടർന്നെത്തിയ ആകാഷ് പുഗഴേന്തി 32 പന്തുകളിൽ 45 റൺസ് നേടി.
കളി നിർത്തുമ്പോൾ 55 റൺസോടെ ക്യാപ്റ്റൻ നിതിൽ പ്രണവും 29 റൺസോടെ വിക്രം കുമാറുമാണ് ക്രീസിൽ. കേരളത്തിന് വേണ്ടി കൈലാസ് ബി. നായർ രണ്ടും ആദിത്യ ബൈജുവും ജിഷ്ണു മണികണ്ഠനും അഹ്മദ് ഇമ്രാനും ഓരോ വിക്കറ്റ് വീതവും വീഴ്ത്തി.
by Midhun HP News | Oct 13, 2026 | Latest News, കേരളം
പാലക്കാട്: മൂലത്തറയിൽ ഭിക്ഷാടകനെ ക്രൂരമായി തല്ലിക്കൊന്ന നിലയിൽ കണ്ടെത്തി. സംഭവവുമായി ബന്ധപ്പെട്ട് അഞ്ച് പേരെ മീനാക്ഷിപുരം പൊലീസ് കസ്റ്റഡിയിലെടുത്തു. മൂലത്തറ ഡാമിന് സമീപത്തെ കള്ള് ഷാപ്പിന് മുന്നിൽ വെച്ച് ഇക്കഴിഞ്ഞ ശനിയാഴ്ച രാത്രിയോടെയാണ് സംഭവം ഉണ്ടായത്.
ഞായറാഴ്ച രാവിലെ കള്ള് ഷാപ്പിന് സമീപം ഭിക്ഷാടകനെ സംശയാസ്പദമായ സാഹചര്യത്തിൽ മരിച്ച നിലയിൽ നാട്ടുകാരാണ് ആദ്യം കണ്ടെത്തുന്നത്. തുടർന്ന് വിവരമറിഞ്ഞെത്തിയ പൊലീസ് സംഘം ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി തൃശ്ശൂർ മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിലാണ് ക്രൂരമായ മർദനത്തെ തുടർന്നാണ് മരണമെന്നും സംഭവം കൊലപാതകമാണെന്നും സ്ഥിരീകരിച്ചത്. ഇതോടെ മീനാക്ഷിപുരം പൊലീസ് സംഘം പ്രദേശത്ത് കേന്ദ്രീകരിച്ച് ഊർജ്ജിതമായ അന്വേഷണം ആരംഭിക്കുകയും കൊലപാതകവുമായി ബന്ധമുണ്ടെന്ന് സംശയിക്കുന്ന അഞ്ച് പേരെ കസ്റ്റഡിയിലെടുക്കുകയുമായിരുന്നു. ഇവരെ പൊലീസ് വിശദമായി ചോദ്യം ചെയ്തുവരികയാണ്.
Recent Comments