പാലക്കാട് മൂലത്തറയിൽ ഭിക്ഷാടകനെ തല്ലിക്കൊന്നു; അഞ്ച് പേർ പൊലീസ് കസ്റ്റഡിയിൽ

by Midhun HP News | Oct 13, 2026 | Latest News, കേരളം

പാലക്കാട്: മൂലത്തറയിൽ ഭിക്ഷാടകനെ ക്രൂരമായി തല്ലിക്കൊന്ന നിലയിൽ കണ്ടെത്തി. സംഭവവുമായി ബന്ധപ്പെട്ട് അഞ്ച് പേരെ മീനാക്ഷിപുരം പൊലീസ് കസ്റ്റഡിയിലെടുത്തു. മൂലത്തറ ഡാമിന് സമീപത്തെ കള്ള് ഷാപ്പിന് മുന്നിൽ വെച്ച് ഇക്കഴിഞ്ഞ ശനിയാഴ്ച രാത്രിയോടെയാണ് സംഭവം ഉണ്ടായത്.

ഞായറാഴ്ച രാവിലെ കള്ള് ഷാപ്പിന് സമീപം ഭിക്ഷാടകനെ സംശയാസ്പദമായ സാഹചര്യത്തിൽ മരിച്ച നിലയിൽ നാട്ടുകാരാണ് ആദ്യം കണ്ടെത്തുന്നത്. തുടർന്ന് വിവരമറിഞ്ഞെത്തിയ പൊലീസ് സംഘം ഇൻക്വസ്റ്റ് നടപടികൾ പൂർത്തിയാക്കി മൃതദേഹം പോസ്റ്റ്മോർട്ടത്തിനായി തൃശ്ശൂർ മെഡിക്കൽ കോളജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിലാണ് ക്രൂരമായ മർദനത്തെ തുടർന്നാണ് മരണമെന്നും സംഭവം കൊലപാതകമാണെന്നും സ്ഥിരീകരിച്ചത്. ഇതോടെ മീനാക്ഷിപുരം പൊലീസ് സംഘം പ്രദേശത്ത് കേന്ദ്രീകരിച്ച് ഊർജ്ജിതമായ അന്വേഷണം ആരംഭിക്കുകയും കൊലപാതകവുമായി ബന്ധമുണ്ടെന്ന് സംശയിക്കുന്ന അഞ്ച് പേരെ കസ്റ്റഡിയിലെടുക്കുകയുമായിരുന്നു. ഇവരെ പൊലീസ് വിശദമായി ചോദ്യം ചെയ്തുവരികയാണ്.

കലാച്ചി നോവല്‍: ഹരിത സാവിത്രിക്കെതിരെ അപകീര്‍ത്തിക്കേസ് ഫയല്‍ ചെയ്ത് കെആര്‍ മീര

by Midhun HP News | Oct 13, 2026 | Latest News, കേരളം

തൃശൂര്‍: എഴുത്തുകാരി ഹരിത സാവിത്രിക്കെതിരെ അപകീര്‍ത്തിക്കേസ് ഫയല്‍ ചെയ്ത് കെആര്‍ മീര. കെആര്‍ മീരയുടെ ‘കലാച്ചി’ എന്ന നോവല്‍ തന്റെ ‘സിന്‍’ എന്ന നോവലിന്റെ കോപ്പിയടിയാണെന്ന ഹരിതയുടെ ആക്ഷേപത്തിലാണ് കേസ്. നവംബര്‍ ഏഴിന് തൃശൂര്‍ ചീഫ് ജ്യൂഡീഷ്യല്‍ മജിസ്‌ട്രേറ്റ് കോടതി കേസ് പരിഗണിക്കും.

പ്രതിയായ ഹരിത സാവിത്രി 2026 മേയ് 5ന് ഫെയ്‌സ്ബുക്കില്‍ പങ്കുവച്ച പോസ്റ്റും തുടര്‍ന്നുണ്ടായ സാമൂഹിക മാധ്യമ പ്രതികരണങ്ങളും ചാനല്‍ അഭിമുഖങ്ങളും വഴി ‘കലാച്ചി’ എന്ന നോവലിന്റെ മൗലികതയെ ചോദ്യം ചെയ്യുകയും കെആര്‍ മീരയുടെ സാഹിത്യപ്രതിച്ഛായയ്ക്ക് ഗുരുതരമായ ക്ഷതം വരുത്തുകയും ചെയ്തുവെന്നാണ് പരാതിയിലെ പ്രധാന ആരോപണം. ‘കലാച്ചി’ എന്ന നോവലിന്റെ രചനാപരമായ ആശയം 2013 മുതല്‍ രൂപപ്പെട്ടതാണെന്നും 2020 നവംബര്‍ 16 മുതല്‍ ‘ട്രൂകോപ്പി തിങ്കി’ല്‍ ഇതേ പേരില്‍ നോവലിന്റെ ആദ്യ ആറ് അധ്യായങ്ങള്‍ പ്രസിദ്ധീകരിച്ചിരുന്നുവെന്നും പരാതിയില്‍ വ്യക്തമാക്കുന്നു. നോവലിലെ കഥാപാത്രങ്ങളും കഥാപശ്ചാത്തലവും പ്രധാന പ്രമേയങ്ങളും വര്‍ഷങ്ങള്‍ക്ക് മുമ്പുതന്നെ പൊതുസമൂഹത്തിന് ലഭ്യമായിരുന്നുവെന്നതിന് രേഖകളും പരാതിയോടൊപ്പം ഹാജരാക്കിയിട്ടുണ്ട്.

നേരത്തെ നിയമ നടപടിക്ക് മുന്നോടിയായി കെആര്‍ മീര അഡ്വ. എന്‍കെ ഉണ്ണികൃഷ്ണന്‍ മുഖേന ഹരിത സാവിത്രിക്ക് വക്കീല്‍ നോട്ടീസ് അയിച്ചിരുന്നു. നോട്ടീസിന് ഹരിത സാവിത്രി മറുപടി നല്‍കുകയും ചെയ്തിരുന്നു.

മീര തന്റെ പുസ്തകം വായിച്ചിട്ടുണ്ടെന്ന് ഉറപ്പാണെന്നായിരുന്നു ഹരിത സാവിത്രി നേരത്തേ പറഞ്ഞത്. ‘പുസ്തകം ഇറങ്ങിയപ്പോള്‍ തന്നെ വായിച്ചിട്ടുണ്ടെന്ന് അവരോട് വളരെ അടുപ്പമുള്ള ഒരാള്‍ തന്നെ തന്നോട് പറഞ്ഞിരുന്നു. 2022 -ലാണ് ‘സിന്‍’ ഇറങ്ങിയത്. 2022 -ലാണ് മീരച്ചേച്ചി കസാക്കിസ്ഥാനിലേക്ക് പോകുന്നത്. ഇതിന്റെ പിന്നിലെന്താണ് എന്നൊന്നും എനിക്ക് അറിയില്ല. തന്റെ പുസ്തകത്തിന്റെ ത്രെഡിന് അവരുടെ പുസ്തകവുമായി സാമ്യമുണ്ട്’ എന്നായിരുന്നു ഹരിതയുടെ വാദം.

സിഎംആർഎൽ–എക്സാലോജിക് കേസ്: പിണറായി വിജയന്റെ വാദങ്ങളെ പിന്തുണച്ച് സർക്കാർ; കേസെടുക്കാൻ മതിയായ തെളിവില്ലെന്ന് വാദം

by Midhun HP News | Oct 13, 2026 | Latest News, കേരളം

കൊച്ചി: സിഎംആർഎൽ–എക്സാലോജിക് കേസിലെ ഹർജിയിൽ മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയന്റെ വാദങ്ങളെ പിന്തുണച്ച് സംസ്ഥാന സർക്കാർ ഹൈക്കോടതിയിൽ. കേസിൽ പിണറായി വിജയനെതിരെ എഫ്ഐആർ രജിസ്റ്റർ ചെയ്യണമെന്ന സിംഗിൾ ബെഞ്ച് ഉത്തരവിനെതിരായ അപ്പീൽ പരിഗണിക്കുമ്പോഴാണ് സർക്കാർ നിലപാട് വ്യക്തമാക്കിയത്. കേസെടുക്കാൻ മതിയായ തെളിവുകൾ ഇല്ലായിരുന്നുവെന്നും ചില ഡയറി രേഖകൾ മാത്രമാണ് ലഭിച്ചതെന്നും സർക്കാർ ഹൈക്കോടതിയെ അറിയിച്ചു. സിംഗിൾ ബെഞ്ച് ഉത്തരവ് അനുസരിച്ച് എഫ്ഐആർ ഇട്ട് കേസ് റജിസ്റ്റർ ചെയ്തതായി സർക്കാരും ഇഡിയും കോടതിയെ അറിയിച്ചു.

ഇഡി സർക്കാരിന് കൈമാറിയത് ഒരു റിപ്പോർട്ട് മാത്രമാണെന്നും സാക്ഷിമൊഴികളോ മറ്റ് അനുബന്ധ രേഖകളോ നൽകിയിരുന്നില്ലെന്നും സർക്കാർ വ്യക്തമാക്കി. അതുകൊണ്ടാണ് പ്രാഥമിക അന്വേഷണം നടത്താൻ ഉത്തരവിട്ടതെന്നും പ്രാഥമിക അന്വേഷണം വേണമെന്ന നിലപാടാണ് ഇപ്പോഴും സർക്കാരിനുള്ളതെന്നും അഡ്വക്കേറ്റ് ജനറൽ കോടതിയെ അറിയിച്ചു. ഇഡി നൽകിയ തെളിവുകൾ കേസെടുക്കാൻ പര്യാപ്തമല്ലെന്നും സർക്കാർ കോടതിയെ ബോധിപ്പിച്ചു.

അതേസമയം, പിണറായിക്കെതിരെ എഫ്‌ഐആർ ഇട്ടതിൽ പ്രശ്‌നം എന്തെന്ന ചോദ്യം ഹൈക്കോടതി ആവർത്തിച്ചു. സിംഗിൾ ബെഞ്ചിന്റെ വിധി ഇല്ലെങ്കിലും എഫ്ഐആർ ഇടാമല്ലോ എന്നായിരുന്നു കോടതിയുടെ ചോദ്യം. എന്നാൽ ലഭിച്ച തെളിവുകൾ കേസെടുക്കാൻ തൃപ്തികരമല്ലായിരുന്നുവെന്ന് സർക്കാർ മറുപടി നൽകി.പിണറായി വിജയൻ അടക്കമുള്ള പ്രതികളുടെ ഹർജിയെ ഇഡി ശക്തമായി എതിർത്തു. സിംഗിൾ ബെഞ്ച് ഉത്തരവിനെതിരെ പ്രതികൾക്ക് എങ്ങനെ അപ്പീൽ നൽകാൻ കഴിയുമെന്നായിരുന്നു ഇഡിയുടെ ചോദ്യം.

പിണറായി വിജയനെതിരെ എഫ്ഐആർ രജിസ്റ്റർ ചെയ്യണമെന്ന സിംഗിൾ ബെഞ്ച് ഉത്തരവിനെ ചോദ്യം ചെയ്ത് പിഎ മുഹമ്മദ് റിയാസും കോടതിയിൽ വാദങ്ങൾ ഉന്നയിച്ചു. ഹർജി പൊതുതാൽപര്യ ഹർജിയാണെന്ന് നേരത്തെ അറിയിച്ചിരുന്നുവെന്നും അത് പരിഗണിക്കാൻ സിംഗിൾ ബെഞ്ചിന് അധികാരമില്ലെന്നുമാണ് റിയാസിന്റെ വാദം. ഹർജി പരിഗണിക്കേണ്ടത് ചീഫ് ജസ്റ്റിസിന്റെ ബെഞ്ചാണെന്നും അദ്ദേഹം വാദിച്ചു. കേസിൽ സിംഗിൾ ബെഞ്ച് സ്വീകരിച്ച നടപടിയുടെ നിയമസാധുതയാണ് ഇതിലൂടെ ചോദ്യം ചെയ്യപ്പെട്ടത്.

ഹർജിക്കാരനായ കെ.എം. ഷാജഹാൻ സത്യസന്ധനായ ഹർജിക്കാരൻ അല്ലെന്നും അഴിമതിക്കെതിരെ ശബ്ദമുയർത്തുന്ന വ്യക്തിയായി കാണാനാവില്ലെന്നും സർക്കാരും മറ്റ് എതിർകക്ഷികളും കോടതിയിൽ വാദിച്ചു. മൂന്ന് ഹൈക്കോടതി ജഡ്ജിമാർക്കെതിരെ ഷാജഹാൻ നേരത്തെ പ്രതികൂല പരാമർശങ്ങൾ നടത്തിയിരുന്നുവെന്നും പിന്നീട് മാപ്പപേക്ഷിച്ച് നടപടികളിൽനിന്ന് ഒഴിവായെന്നും അഡ്വക്കേറ്റ് ജനറൽ കോടതിയെ അറിയിച്ചു.

ഷാജഹാൻ സമർപ്പിച്ച ഹർജി പൊതുതാൽപര്യ ഹർജിയാണെന്ന് സിംഗിൾ ബെഞ്ച് നിരീക്ഷിച്ചിരുന്നുവെന്നും ഹൈക്കോടതി രജിസ്ട്രിയും ഹർജിയിൽ എതിർപ്പുയർത്തിയിരുന്നുവെന്നും കോടതിയിൽ ചൂണ്ടിക്കാട്ടി. അഴിമതിക്കെതിരെ നിയമനടപടി ആവശ്യപ്പെടുന്നതിന് മുമ്പ് ഷാജഹാൻ മജിസ്‌ട്രേറ്റ് കോടതിയെ സമീപിച്ചിരുന്നില്ലെന്നും എതിർകക്ഷികൾ വാദിച്ചു. അപ്പീലിൽ വാദം തുടരുകയാണ്.

പ്രതിശ്രുത വധുവിനെ പുഴയിൽ ചാടി മരിച്ച നിലയിൽ കണ്ടെത്തി

by Midhun HP News | Oct 13, 2026 | Latest News, കേരളം

കണ്ണൂർ: പയ്യന്നൂരിൽ കൗൺസിലിംഗ് കേന്ദ്രത്തിൽ നിന്നും കാണാതായ പ്രതിശ്രുത വധുവിനെ പുഴയിൽ ചാടി മരിച്ച നിലയിൽ കണ്ടെത്തി. പയ്യന്നൂർ ടൗണിലെ മാളിലെ ജീവനക്കാരിയും കോറോം കാനായി മുക്കൂട് സ്വദേശിനിയുമായ സി ശ്രുതി (24) യുടെ മൃതദേഹമാണ് പുഴയിൽ നിന്ന് കണ്ടെത്തിയത്.

തിങ്കളാഴ്ച വൈകുന്നേരം നാലിന് കോറോം കൂർക്കരയിൽ പ്രവർത്തിക്കുന്ന കൗൺസിലിംഗ് കേന്ദ്രത്തിൽ അമ്മായി സുലേഖ, വിവാഹം നിശ്ചയിച്ച അഖിൽ, അഖിലിന്റെ അമ്മാവൻ സുരേഷ് എന്നിവരോടൊപ്പം എത്തിയതായിരുന്നു ശ്രുതി. കൗൺസിലറുമായി സംസാരിച്ചുകൊണ്ടിരിക്കെ പെട്ടെന്ന് പുറത്തിറങ്ങിയ യുവതി ആരോടും പറയാതെ സ്വന്തം സ്കൂട്ടറെടുത്ത് പോവുകയായിരുന്നു. രാത്രിയായിട്ടും വീട്ടിൽ തിരിച്ചെത്താതിരുന്നതിനെ തുടർന്ന് അമ്മാവൻ എം. ശ്രീധരൻ നൽകിയ പരാതിയിൽ പയ്യന്നൂർ പൊലീസ് കേസെടുത്ത് അന്വേഷണം ആരംഭിച്ചു.

തുടർന്ന് നടത്തിയ പരിശോധനയിൽ ഇന്നലെ രാത്രിയോടെ ചിറ്റാരികൊവ്വൽ റോട്ടറി ക്ലബ്ബ് റോഡിൽ തണൽ ഇക്കോ പാർക്കിന് സമീപം ശ്രുതിയുടെ സ്കൂട്ടർ ഉപേക്ഷിച്ച നിലയിൽ കണ്ടെത്തി. ഇതിനടുത്തുനിന്ന് യുവതിയുടെ ചെരിപ്പും ലഭിച്ചതോടെയാണ് പുഴയിൽ ചാടിയിട്ടുണ്ടാകാമെന്ന സംശയമുയർന്നത്. പയ്യന്നൂർ ഫയർ സ്റ്റേഷൻ ഓഫീസർ സി.പി. രാജേഷിന്റെ നേതൃത്വത്തിൽ സ്കൂബാ ടീമിന്റെ സഹായത്തോടെ ഇന്നലെ രാത്രിയും ഇന്ന് രാവിലെയുമായി പെരുമ്പ ചിറ്റാരി കൊവ്വൽ ഭാഗത്ത് തിരച്ചിൽ നടത്തി. തുടർന്ന് ഇന്ന് രാവിലെ 11.15 ഓടെ തണൽ ഇക്കോ പാർക്കിന് സമീപമുള്ള പുഴയിൽ നിന്നാണ് മൃതദേഹം കണ്ടെത്തിയത്.

‘തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് എനിക്ക്? സർവ്വമംഗളാനീ ഭവന്തു’: മറുപടിയുമായി കെപി ശശികല

by Midhun HP News | Oct 13, 2026 | Latest News, കേരളം

കൊച്ചി: നെടുമ്പാശ്ശേരിയിൽ അമിതവേഗത്തിലെത്തിയ മിനി കൂപ്പർ കാറിടിച്ച് മരിച്ച ഗോപികയ്ക്കെതിരെ സമൂഹ മാധ്യമങ്ങളിൽ നടക്കുന്ന അപവാദ പ്രചാരണങ്ങളെച്ചൊല്ലി ഹിന്ദു ഐക്യവേദി നേതാവ് കെ.പി. ശശികലയും പെൺകുട്ടിയുടെ കുടുംബവും തമ്മിൽ രൂക്ഷമായ വാക്പോര്. അപകടത്തിൽ മരിച്ച പെൺകുട്ടിയെ അധിക്ഷേപിക്കുന്ന തരത്തിലുള്ള പ്രചാരണങ്ങൾക്കെതിരെ വാർത്താസമ്മേളനം നടത്തിയ കുടുംബത്തിനെതിരെ ‘തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് എനിക്ക്??? സർവ്വമംഗളാനീ ഭവന്തു’ എന്ന പ്രതികരണവുമായി ശശികല ടീച്ചർ രംഗത്തെത്തി. തനിക്കെതിരെ ആരോപണം ഉന്നയിച്ച കുടുംബത്തിന്റെ വാർത്താസമ്മേളനം കണ്ട ശേഷമാണ് ശശികല ടീച്ചർ ഫെയ്സ്ബുക്കിലൂടെ മറുപടി കുറിച്ചത്.

നെടുമ്പാശ്ശേരിയിൽ മിനി കൂപ്പർ കാറിടിച്ച് ഗോപിക മരിച്ചതിന് പിന്നാലെ സമൂഹ മാധ്യമങ്ങളിൽ വലിയ രീതിയിലുള്ള അപവാദ പ്രചരണങ്ങൾ നടന്നിരുന്നു. ഇതിനു പിന്നിൽ കാറോടിച്ച പ്രതിയുടെ കുടുംബമാണെന്ന് ചൂണ്ടിക്കാട്ടി ഗോപികയുടെ പിതാവും കുടുംബവും വാർത്താസമ്മേളനം നടത്തിയിരുന്നു. മകൾക്കെതിരെ ഹിന്ദു ഐക്യവേദി നേതാവ് ശശികല ഉൾപ്പെടെയുള്ളവർ സമൂഹ മാധ്യമങ്ങളിലൂടെ വൃത്തികേട് പ്രചരിപ്പിക്കുന്നുവെന്ന് കുടുംബം വാർത്താസമ്മേളനത്തിൽ കുറ്റപ്പെടുത്തിയിരുന്നു.

വാർത്താസമ്മേളനത്തിൽ ‘വിഷകല’ എന്ന പ്രയോഗം നടത്തിയതിനെ പരിഹസിച്ച ശശികല ടീച്ചർ, പെൺമക്കളുടെ എല്ലാ രക്ഷിതാക്കളോടും താൻ മാപ്പ് ചോദിക്കുന്നുവെന്ന് വ്യക്തമാക്കി. നമ്മൾ പൊതുവായി ചില കാര്യങ്ങളിൽ ചർച്ച നടത്തണമെന്ന് പറഞ്ഞതിനാണ് മാപ്പ് പറയുന്നതെന്നും, അതുകൊണ്ട് കഴിയുമെങ്കിൽ മക്കളെ പാതിരാക്ക് ചായ കുടിക്കാൻ വിടണമെന്നും രാത്രി പകലാക്കാമെന്നും നൈറ്റ് വാക്കുകളും നൈറ്റ് ലൈഫുകളും സജീവമാകട്ടെയെന്നും അവർ ഫെയ്സ്ബുക്ക് കുറിപ്പിൽ പരിഹസിച്ചു. തന്തമാർക്കും കുടുംബത്തിനും ഇല്ലാത്ത എന്ത് വേവലാതിയാണ് തനിക്കെന്നും, ആ ചങ്ങായി പറഞ്ഞ ഹിന്ദു-മുസ്ലിം എവിടെ നിന്നാണ് കിട്ടിയതെന്നും അത് വെച്ചാലല്ലേ ഒരു ഗുമ്മുണ്ടാവൂ എന്നും ശശികല ടീച്ചർ ചോദിച്ചു.

തന്നെ ഫോണിൽ വിളിച്ച് മാനനഷ്ടക്കേസ് കൊടുക്കുമെന്ന് ശശികല ടീച്ചർ ഭീഷണിപ്പെടുത്തിയതായി ഗോപികയുടെ അച്ഛന്റെ സഹോദരൻ എംആർ അനിൽകുമാർ ഫെയ്സ്ബുക്കിലൂടെ വ്യക്തമാക്കിയിരുന്നു. ശശികല ടീച്ചറുടെ പേരിൽ സമൂഹ മാധ്യമങ്ങളിൽ വ്യാപകമായി പ്രചരിക്കുന്ന സ്ക്രീൻഷോട്ടുകളുടെ അടിസ്ഥാനത്തിലാണ് ആരോപണം ഉന്നയിച്ചതെന്നും, അത് വ്യാജമാണെങ്കിൽ അത്തരം പ്രചരണങ്ങൾ അവസാനിപ്പിക്കാനായി അവർ ആദ്യം ഡിജിപിക്ക് പരാതി നൽകി പ്രസ്താവന പരസ്യമായി നിഷേധിക്കുകയാണ് വേണ്ടതെന്നും അദ്ദേഹം പറഞ്ഞു.

സന്തപ്ത കുടുംബത്തിനെതിരെ മാനനഷ്ടക്കേസ് എന്ന ഉമ്മാക്കി കാണിച്ച് തറ രാഷ്ട്രീയ കുതന്ത്രം ഇറക്കി പേടിപ്പിക്കേണ്ടതില്ലെന്നും അത്തരം പേടിയുള്ള കുടുംബമല്ല തങ്ങളുടേതെന്നും അനിൽകുമാർ വ്യക്തമാക്കി. ചെയ്യാത്ത കാര്യത്തിന്റെ പേരിലാണ് കുറ്റപ്പെടുത്തിയതെങ്കിൽ അക്കാര്യം തീർച്ചയായും പിൻവലിക്കാൻ തയ്യാറാണെന്നും, എന്നാൽ മരിച്ച കുട്ടിയോടും കുടുംബത്തോടും മര്യാദ പാലിക്കാൻ ആദ്യം പഠിക്കണമെന്നും സ്വന്തം പേരിൽ പ്രചരിക്കുന്ന പോസ്റ്റുകൾ പിൻവലിക്കാൻ ഡിജിപിക്ക് പരാതി നൽകിയിട്ട് ഭീഷണിയുമായി വരുന്നതാണ് മനുഷ്യത്വമെന്നും അനിൽകുമാർ കുറിച്ചു.

കോഴിക്കോട് – പാലക്കാട് ദേശീയപാത 966-ല്‍ ഗതാഗത നിയന്ത്രണം

by Midhun HP News | Oct 13, 2026 | Latest News, കേരളം

പാലക്കാട്: കോഴിക്കോട് – പാലക്കാട് ദേശീയപാത 966-ല്‍ കല്‍മണ്ഡപം പാലത്തില്‍ അറ്റകുറ്റപ്പണികള്‍ നടക്കുന്നതിനാല്‍ ഒക്ടോബര്‍ 13 മുതല്‍ പ്രവൃത്തി പൂര്‍ത്തിയാകുന്നത് വരെ ഈ റോഡില്‍ ഭാഗികമായി ഗതാഗത നിയന്ത്രണം ഉണ്ടായിരിക്കുമെന്ന് അസിസ്റ്റന്റ് എന്‍ജിനീയര്‍ അറിയിച്ചു.