by Midhun HP News | Oct 13, 2026 | Latest News, കേരളം
പാലക്കാട്: നെടുമ്പാശ്ശേരി മൂന്നുപേരുടെ മരണത്തിനിടയാക്കി മിനി കൂപ്പര്‍ അപകട കേസ് അട്ടിമറിക്കാന്‍ നീക്കമെന്ന് മരിച്ച ഗോപികയുടെ മാതാപിതാക്കള്‍. ഇത്രയും ഗുരുതരമായ കുറ്റം ചെയ്ത പ്രതി സുഹൈല്‍ സജീവിനെ ജുവനൈല്‍ ഹോമിലേക്കാണ് അയച്ചത്. അതുകൊണ്ടുതന്നെ നീതി ലഭിക്കുമോയെന്ന് സംശയമുണ്ടെന്ന് ഗോപികയുടെ അച്ഛന്‍ പ്രദീപ് മാധ്യമങ്ങളോട് പറഞ്ഞു. മകള്‍ക്ക് നീതി നിഷേധിക്കപ്പെടുമെന്ന് ഭയമുണ്ടെന്ന് പൊട്ടിക്കരഞ്ഞുകൊണ്ട് ഗോപികയുടെ അമ്മയും പറഞ്ഞു.
പൊലീസിന്റെ ഭാഗത്തു നിന്നും വീഴ്ചയുണ്ട്. മുകളില്‍ നിന്നും അവര്‍ക്ക് സമ്മര്‍ദ്ദം നേരിടുന്നു എന്നു പറയപ്പെടുന്നുണ്ട്. അതൊക്കെ നീതി ലഭിക്കുന്നതിന് തടസ്സമാകുന്നുണ്ടെന്നാണ് കരുതുന്നത്. ആഭ്യന്തരമന്ത്രിയുടെ മണ്ഡലത്തില്‍പ്പെടുന്ന ആളുകളാണ് പ്രതിയും പ്രതിയുടെ കുടുംബവും എന്നാണ് താന്‍ മനസ്സിലാക്കുന്നത്. അത്തരത്തിലുള്ള എല്ലാ സ്വാധീനവും ഇവര്‍ ഉപയോഗിച്ചേക്കാം. അതുകൊണ്ടായിരിക്കാം അപകടശേഷവും എല്ലാം ബാപ്പ നോക്കിക്കോളുമെന്ന് സുഹൈല്‍ സജീവ് പറഞ്ഞതെന്നും ഗോപികയുടെ അച്ഛന്‍ പറയുന്നു.
സമൂഹമാധ്യമങ്ങളിലൂടെ ഗോപികയേയും ഞങ്ങളേയും താറടിച്ചുകൊണ്ടുള്ള പ്രചാരണം നടക്കുന്നുണ്ട്. കെഎംഎം കോളജില്‍ വൈസ് ചെയര്‍പേഴ്‌സണായിരുന്നു ഗോപിക. അഞ്ചുവര്‍ഷത്തോളം എന്‍എസ്എസ് വളണ്ടിയര്‍ ആയിരുന്നു. സാമൂഹികപ്രവര്‍ത്തനത്തില്‍ ഏര്‍പ്പെട്ടിരുന്നവരാണ്. ഞങ്ങളുടെ കുടംബത്തെപ്പറ്റി ഏതെങ്കിലും തരത്തിലുള്ള അപവാദം ഉണ്ടോയെന്ന് നാട്ടില്‍ വിളിച്ചു ചോദിച്ചു നോക്കൂ. ഞങ്ങളെ താറടിക്കാനാണ് സോഷ്യല്‍ മീഡിയയില്‍ ശ്രമമെന്നും ഗോപികയുടെ അച്ഛന്‍ പറഞ്ഞു.
സോഷ്യല്‍ മീഡിയയിലെ ഇത്തരം അപവാദപ്രചാരണങ്ങള്‍ക്ക് പിന്നില്‍ നേതാക്കളാണുള്ളത്. ഇതെല്ലാം നീതി ലഭിക്കുന്നതിന് തടസ്സമാണ്. നേതാക്കൾ മാന്യത കാണിക്കണമെന്നും ഗോപികയുടെ പിതാവ് ആവശ്യപ്പെട്ടു. കേസില്‍ സുഹൈല്‍ സജീവ് മദ്യപിച്ചതായി എഫ്‌ഐആറില്‍ രേഖപ്പെടുത്തിയിട്ടില്ല എന്നാണ് അറിയാന്‍ കഴിഞ്ഞത്.
അമിതമായി മദ്യപിച്ച് മൂന്നുപേരെ വാഹനം ഇടിപ്പിച്ച് കൊന്നുകളഞ്ഞ സംഭവത്തില്‍, മദ്യപിച്ചിരുന്നു എന്ന് ആദ്യ എഫ്‌ഐആറില്‍ കൊടുത്തിട്ടില്ല. എന്ത് അടിസ്ഥാനത്തിലാണ് പ്രതിയെ ജൂവനൈൽ ഹോമില്‍ പാര്‍പ്പിച്ചത്?. രാവിലെ ആറേമുക്കാലിന് നെടുമ്പാശേരി പൊലീസ് സ്റ്റേഷനില്‍ ചെല്ലുമ്പോള്‍ പ്രതി സുഹൈല്‍ സജീവ് ലോക്കപ്പില്‍ മലര്‍ന്ന് കിടക്കുകയായിരുന്നു. സിഐ വിളിച്ച് എഴുന്നേല്‍പ്പിക്കുമ്പോള്‍ പോലും നല്ല പൂസാണെന്ന് സിഐ പറയുന്നത് തന്റെ ബന്ധുക്കള്‍ കേട്ടതാണെന്നും ഗോപികയുടെ അച്ഛന്‍ വെളിപ്പെടുത്തി.
ഓട്ടോറിക്ഷ ഓടിച്ചാണ് താന്‍ കുടുംബം പോറ്റുന്നത്. അമ്മയാകട്ടെ ഒരു റബര്‍ കടയില്‍ ജോലിക്ക് പോകുന്നുണ്ട്. പ്രതിയുടെ കുടുംബം കോടീശ്വരന്മാരാണെന്നും, വലിയ സ്വാധീനമുള്ളവരായതിനാല്‍ നീതി ലഭിക്കുമോയെന്ന് സംശയമുണ്ടെന്നും ഗോപികയുടെ അച്ഛന്‍ പറഞ്ഞു.
പോസ്റ്റ്‌മോര്‍ട്ടത്തിന് ശേഷം വീണ്ടും തുന്നിക്കെട്ടല്‍ അഴിച്ച് രക്തസാംപിള്‍ ശേഖരിച്ചതില്‍ സംശയമുണ്ടെന്നും അച്ഛന്‍ ആരോപിച്ചു. ഞങ്ങളുടെ പൊന്നുമോളുടെ തല കാണാന്‍ പോലും ഉണ്ടായിരുന്നില്ലെന്ന് ഗോപികയുടെ അമ്മ പൊട്ടിക്കരഞ്ഞു. അവളില്ലാതെ ഞങ്ങള്‍ ഇനി എന്തിന് ജീവിക്കണം. അവരൊക്കെ വലിയ ആളുകളാണ്. നീതി കിട്ടുമോയെന്ന് പേടിയുണ്ടെന്നും ഗോപികയുടെ അമ്മ കണ്ണീരോടെ പറഞ്ഞു.
by Midhun HP News | Oct 13, 2026 | Latest News, കേരളം
കൊച്ചി: നെടുമ്പാശേരിയില്‍ മദ്യപിച്ച് അമിത വേഗത്തില്‍ കറോടിച്ച് മൂന്നു പേരുടെ ജീവനെടുത്ത സുഹൈല്‍ സജീവിനെ ബോര്‍സ്റ്റല്‍ സ്‌കൂളിലേക്കു മാറ്റിയത് വലിയ ചര്‍ച്ചയാണ് സാമൂഹ്യ മാധ്യമങ്ങളില്‍ ഉയര്‍ത്തിവിട്ടത്. സുഹൈലിനെ ജുവനൈല്‍ ഹോമിലേക്കു മാറ്റിയെന്നായിരുന്നു, ചര്‍ച്ചകളുടെ കാതല്‍. എന്നാല്‍ സുഹൈലിനെ പാര്‍പ്പിച്ച ബോര്‍സ്റ്റല്‍ സ്കൂള് ജുവനൈല്‍ ഹോം അല്ല എന്നതാണ് യാഥാര്‍ഥ്യം. എന്നാല്‍ അതു കൊടും കുറ്റവാളികളെ പാര്‍പ്പിക്കുന്ന തടവറയുമല്ല.
നിയമപരമായി 21 വയസില്‍ താഴെയുള്ള കുറ്റവാളികളെ പാര്‍പ്പിക്കുന്ന ഇടമാണ് ബോര്‍സ്റ്റല്‍ സ്കൂള്. കാക്കനാട് ജില്ലാജയിലിനോട് ചേര്‍ന്നുള്ള, ഇപ്പോള്‍ സുഹൈലിനെ പാര്‍പ്പിച്ചിരിക്കുന്നതാണ് സംസ്ഥാനത്തെ ഏക ബോര്‍സ്റ്റല്‍ സ്കൂള്.
ഇന്ത്യയിലെ നിയമമനുസരിച്ച് ആറു വയസിന് മുകളില്‍ പ്രായമുള്ള ആര് തെറ്റ് ചെയ്താലും അത് ശിക്ഷ അര്‍ഹിക്കുന്ന കുറ്റമാണ്. ആറിനും 18 നും ഇടയില്‍ പ്രായമുള്ള പ്രതികളെ ദുര്‍ഗുണ പരിഹാര പാഠശാല എന്ന് വിളിക്കുന്ന ജുവനൈല്‍ ജസ്റ്റിസ് ഹോമിലേക്കും 18നും 21നും ഇടയില്‍ പ്രായമുള്ളവരെ ബോര്‍സ്റ്റല്‍ സ്‌കൂളിലേക്കും മാറ്റണമെന്നാണ് നിയമം.
ദുര്‍ഗുണ പരിഹാര പാഠശാല സാമൂഹ്യ നീതി വകുപ്പിന്റെ നിയന്ത്രണത്തിലുള്ള സംരക്ഷണ കേന്ദ്രമാണ്. ഏതാണ്ട് ഒരു ഹോസ്റ്റലിന്‍റെ മാതൃകയിലായിരിക്കും അവിടത്തെ ജീവിതം. ബോര്‍സ്റ്റല്‍ സ്കൂള് ആവട്ടെ, ജയില്‍ വകുപ്പിന്റെ നിയന്ത്രണത്തിലുള്ളതാണ്. സൂപ്രണ്ട് അടക്കം ജയില്‍ ഉദ്യോഗസ്ഥരാണ് അവിടെ അന്തേവാസികളെ നോക്കുന്നത്. ജയില്‍ നിയമങ്ങള്‍ എല്ലാം ഇവിടെ ബാധമാണ്.
കാക്കനാട്ടെ ബോര്‍സ്റ്റല്‍ സ്കൂള് തുടക്കത്തില്‍ കണ്ണൂരിലാണ് സ്ഥാപിച്ചത്. ഇത് 1995-ല്‍ ഇങ്ങോട്ടു മാറ്റുകയായിരുന്നു. രാജ്യത്തെ മറ്റ് പല സംസ്ഥാനങ്ങളിലും ഇത്തരം സ്ഥാപനങ്ങള്‍ അടച്ചുപൂട്ടിയപ്പോള്‍ കേരളത്തിലെ ബോര്‍സ്റ്റല്‍ സ്കൂള് ശിക്ഷയേക്കാള്‍ കൂടുതല്‍ അവരെ നല്ല മനുഷ്യരാക്കി ജീവിതത്തിലേക്ക് തിരിച്ചുകൊണ്ടുവരുകയെന്ന ലക്ഷ്യത്തോടെ പ്രവര്‍ത്തിച്ചുവരുന്നതെന്ന് സൂപ്രണ്ട് അജു ആര് വി പറഞ്ഞു.
ഇവിടെ കൊടുംകുറ്റവാളികളോ ഭയാനകമായ അന്തരീക്ഷമോ ഇല്ല. പകരം, കുറ്റവാളികള്‍ക്ക് ജീവിതം കെട്ടിപ്പടുക്കാന്‍ സഹായിക്കുന്ന കഴിവുകള്‍ ഇവിടെ നിന്ന് നേടിയെടുക്കാം. മാനസികമായ വളര്‍ച്ചയ്ക്ക് ഉപകരിക്കുന്ന കൃഷി, ബാഡ്മിന്റണ്‍ തുടങ്ങിയ കായിക വിനോദങ്ങള്‍ക്ക് അവസരം നല്‍കും. ശാരീരിക വ്യായാമത്തോടെയാണ് ദിവസം ആരംഭിക്കുന്നത്. തുടര്‍ന്ന് പല വിധത്തിലുള്ള ക്ലാസുകളിലും പങ്കെടുപ്പിക്കുന്നു. ചില അന്തേവാസികള്‍ പാചകത്തില്‍ സഹായിക്കുമ്പോള്‍, മറ്റുചില ജോലികളില്‍ ഏര്‍പ്പെടുന്നു. ചെടികള്‍ പരിപാലിക്കുക, മത്സ്യങ്ങള്‍ക്ക് ആഹാരം കൊടുക്കുക എന്നിവയും ചെയ്യുന്നു.
66 അന്തേവാസികളെ ഉള്‍ക്കൊള്ളാന്‍ പാകത്തില്‍ 16 സെല്ലുകളായാണ് ആദ്യം ബോര്‍സ്റ്റര്‍ സ്‌കൂളില്‍ ഉണ്ടായിരുന്നത്. ഇന്ന് ഇവിടെ ഏകദേശം 80 പേരുണ്ട്. നേരത്തെ അന്തേവാസികളുടെ എണ്ണം 140 വരെ എത്തിയിരുന്നു. ഒരു റസിഡന്‍ഷ്യല്‍ വിദ്യാഭ്യാസ സ്ഥാപനത്തിന്റേതിന് സമാനമായ അന്തരീക്ഷമാണ് ഇവിടെയുള്ളത്.
പരിശീലന പരിപാടികള്‍
വിവിധ സംഘടനകളുടെയും സന്നദ്ധപ്രവര്‍ത്തകരുടെയും സഹകരണത്തോടെ സര്‍ട്ടിഫിക്കറ്റ്, പരിശീലന പരിപാടികള്‍ ഈ സ്ഥാപനം നല്‍കുന്നുണ്ട്. സാംസ്കാരിക വകുപ്പിന്റെയും തൃക്കാക്കര മുനിസിപ്പാലിറ്റിയുടെയും സഹകരണത്തോടെ നാടന്‍പാട്ട്, നാടകം, മറ്റ് സര്‍ഗ്ഗാത്മക കലകള്‍ എന്നിവയില്‍ അന്തേവാസികള്‍ക്ക് പരിശീലനം നല്‍കുന്നു. കുറ്റകൃത്യങ്ങളില്‍ ഏര്‍പ്പെട്ട യുവാക്കളില്‍ ആത്മവിശ്വാസം വളര്‍ത്താനും സ്വയം വളരാനുള്ള പ്രോത്സാഹനം നല്‍കാനും ലക്ഷ്യമിട്ടാണ് ഈ പരിപാടികള്‍ ആസൂത്രണം ചെയ്തിരിക്കുന്നത്. നേരത്തെ മരപ്പണി, നെയ്ത്ത്, ഫിറ്റ്‌നെസ് എഡ്യൂക്കേഷന്‍ എന്നിവയില്‍ പ്രത്യേക പരിശീലനം ഇവിടെ ഉണ്ടായിരുന്നു.
എന്നാല്‍ ഇന്ന്, മുഴുവന്‍ അന്തേവാസികള്‍ക്കുമായി രണ്ട് അധ്യാപകരും ഒരു നെയ്ത്ത് പരിശീലകനും മാത്രമാണ് ഇവിടെയുള്ളത്. ഏകദേശം 30-40 ശതമാനം പേരും പോക്‌സോ നിയമപ്രകാരമുള്ള കേസുകളില്‍ ഉള്‍പ്പെട്ടവരാണ്. 20 ശതമാനം പേര്‍ ഇതര സംസ്ഥാന തൊഴിലാളികളാണ്. ഇവരില്‍ പലരും ലഹരിമരുന്ന് കേസുകളില്‍ ഉള്‍പ്പെട്ടവരാണ്. മോഷണം മുതല്‍ ചെറിയ കുറ്റകൃത്യങ്ങള്‍ ചെയ്തവരും ഇക്കൂട്ടത്തിലുണ്ട്.
by Midhun HP News | Oct 13, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില കുറഞ്ഞു. പവന് 280 രൂപയാണ് കുറഞ്ഞത്. 1,09,480 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 35 രൂപയാണ് കുറഞ്ഞത്. 13,685 രൂപയാണ് ഒരു ഗ്രാം സ്വര്‍ണത്തിന്റെ വില. രണ്ടുദിവസത്തിനിടെ 1560 രൂപയാണ് കുറഞ്ഞത്. ഇന്നലെ മാത്രം രണ്ടുതവണയായി 1280 രൂപയാണ് കുറഞ്ഞത്.
ആഗോള വിപണിയില്‍ എണ്ണവില കുറഞ്ഞത് അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വിലയില്‍ ബാരലിന് 1.21 ശതമാനത്തിന്റെ ഇടിവാണ് രേഖപ്പെടുത്തിയത്. 105.4 ഡോളറാണ് ഒരു ബാരല്‍ എണ്ണയുടെ നിലവിലെ വില. ഇതിന് പുറമേ പുറത്തുവരാനിരിക്കുന്ന അമേരിക്കയുടെ പണപ്പെരുപ്പ കണക്കുകളും വിപണിയെ സ്വാധീനിക്കും. പണപ്പെരുപ്പ നിരക്ക് കൂടുകയാണെങ്കില്‍ പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് നിര്‍ബന്ധിതമാകും. ഇത് സ്വര്‍ണത്തിന്റെ ആകര്‍ഷണം കുറയ്ക്കാമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 13, 2026 | Latest News, കേരളം
കോഴിക്കോട്: സംസ്ഥാനത്തെ കൗമാര കായിക പ്രതിഭകൾ മാറ്റുരയ്ക്കുന്ന 68-ാമത് കേരള സംസ്ഥാന സ്കൂൾ കായികമേളയ്ക്ക് ആതിഥേയത്വം വഹിക്കാൻ കോഴിക്കോട് ജില്ല സജ്ജമായി. ഒക്ടോബർ 25 മുതൽ 31 വരെ ഒരാഴ്ചക്കാലം നീണ്ടുനിൽക്കുന്ന കായിക മാമാങ്കത്തിൽ സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള ആയിരക്കണക്കിന് കായികതാരങ്ങൾ പങ്കെടുക്കും. കായിക പ്രതിഭകളും ടീം മാനേജർമാരും ഒഫീഷ്യലുകളും സംഘാടകരുമടക്കം ഏകദേശം 15,000-ത്തോളം പേർ മേളയുടെ ഭാഗമാകും. ഒക്ടോബർ 25-ന് 4,000 കായികതാരങ്ങൾ അണിനിരക്കുന്ന വിപുലമായ മാർച്ച് പാസ്റ്റോടെയും 3,000 വിദ്യാർത്ഥികൾ അണിനിരക്കുന്ന സാംസ്കാരിക പരിപാടികളോടെയും മേളയ്ക്ക് ഔദ്യോഗികമായി തുടക്കമാകും.
ജില്ലയിലുടനീളമുള്ള പത്ത് വേദികളിലായാണ് വിവിധ മത്സരങ്ങൾ ക്രമീകരിച്ചിരിക്കുന്നത്. ഒക്ടോബർ 27-ന് ആരംഭിക്കുന്ന പ്രധാന ട്രാക്ക് ആൻഡ് ഫീൽഡ് അത്‌ലറ്റിക്സ് പോരാട്ടങ്ങൾക്ക് എൻഐടി കാലിക്കറ്റ് ക്യാമ്പസ് മുഖ്യവേദിയാകും. സബ് ജൂനിയർ, ജൂനിയർ, സീനിയർ വിഭാഗങ്ങളിലായി 2,800-ഓളം അത്‌ലറ്റുകളാണ് ഇവിടെ ട്രാക്കിലിറങ്ങുക. ഒക്ടോബർ 30-ന് നടക്കുന്ന ക്രോസ് കൺട്രി മത്സരത്തിനും ഇൻക്ലൂസീവ് അത്‌ലറ്റിക്സ്, ഇൻക്ലൂസീവ് ഫുട്ബോൾ എന്നിവയ്ക്കും എൻഐടി തന്നെ വേദിയാകും.
ദേവഗിരി സെന്റ് ജോസഫ്സ് കോളേജ് ഇൻഡോർ സ്റ്റേഡിയത്തിലാണ് ബാഡ്മിന്റൺ, ഇൻക്ലൂസീവ് ബാഡ്മിന്റൺ മത്സരങ്ങൾ അരങ്ങേറുക. പെൺകുട്ടികളുടെ ബാസ്കറ്റ്ബോൾ മത്സരങ്ങൾ ചേവായൂർ പ്രസന്റേഷൻ എച്ച്.എസ്.എസിലും ആൺകുട്ടികളുടെ മത്സരങ്ങൾ സിൽവർ ഹിൽസ് പബ്ലിക് സ്കൂളിലും നടക്കും. കുന്നമംഗലം എച്ച്.എസ്.എസിൽ വടംവലിയും ഇൻക്ലൂസീവ് ക്രിക്കറ്റും നടക്കുമ്പോൾ കരാട്ടെ, വുഷു, സോഫ്റ്റ്ബോൾ, ബേസ്ബോൾ, ബോൾ ബാഡ്മിന്റൺ മത്സരങ്ങൾക്ക് കൊടിയത്തൂർ പിടിഎം എച്ച്.എസ്.എസും വാദി റഹ്മ ഇംഗ്ലീഷ് സ്കൂളും ആതിഥേയത്വം വഹിക്കും. ചാത്തമംഗലം ആർഇസി ഗവൺമെന്റ് വിഎച്ച്എസ്എസിൽ യോഗ മത്സരങ്ങളും പെരുവയൽ സെന്റ് സേവ്യേഴ്സ് യുപി സ്കൂളിൽ നെറ്റ്ബോൾ, ത്രോബോൾ മത്സരങ്ങളും അരങ്ങേറും.
ഭിന്നശേഷിക്കാരായ കുട്ടികൾക്കായുള്ള ഇൻക്ലൂസീവ് കായിക മത്സരങ്ങൾ ഇത്തവണത്തെ മേളയുടെ പ്രധാന സവിശേഷതയാണ്. ഒക്ടോബർ 26-ന് നടക്കുന്ന ഈ വിഭാഗത്തിൽ 2,000-ത്തിലധികം കുട്ടികൾ വിവിധ ഇനങ്ങളിലായി തങ്ങളുടെ കായികമികവ് പ്രകടിപ്പിക്കും. ഇതിനുപുറമെ ഗൾഫ് മേഖലയിൽ നിന്നെത്തുന്ന 48 വിദ്യാർത്ഥികൾ അത്‌ലറ്റിക്സിലും ഗെയിംസ് ഇനങ്ങളിലും പങ്കെടുക്കുന്നത് സംസ്ഥാന മേളയ്ക്ക് അന്താരാഷ്ട്ര തലം സമ്മാനിക്കും. കൊല്ലം ജില്ലയിലെ കെ.എൻ.എൻ.എം എച്ച്.എസ്.എസിലെ എട്ടാം ക്ലാസ് വിദ്യാർത്ഥിനി ആർ.എസ്. ലക്ഷ്മി നന്ദന രൂപകൽപ്പന ചെയ്ത ‘കുട്ടു’ എന്ന ചിഹ്നമാണ് കായികമേളയുടെ ഔദ്യോഗിക മാസ്കോട്ട്.
റസാഖ് മാസ്റ്റർ എംഎൽഎയുടെ നേതൃത്വത്തിലുള്ള 17 ഉപസമിതികളാണ് കായികമേളയുടെ സംഘാടന പ്രവർത്തനങ്ങൾക്ക് നേതൃത്വം നൽകുന്നത്. മേളയുടെ സുഗമമായ നടത്തിപ്പിനായി 620 ഒഫീഷ്യലുകളെയും 140 സെലക്ടർമാരെയും 100 സാങ്കേതിക ഒഫീഷ്യലുകളെയും ചുമതലപ്പെടുത്തിയിട്ടുണ്ട്. താരങ്ങൾക്കും ടീം മാനേജർമാർക്കുമായി 50 സ്കൂളുകളിലെ 450 ക്ലാസ് മുറികളിലാണ് താമസസൗകര്യം ഒരുക്കുന്നത്. ഭക്ഷണം തയ്യാറാക്കുന്നതിനായി രണ്ട് പ്രധാന പാചകപ്പുരകളും അതോടൊപ്പം എല്ലാ മത്സര വേദികളിലും വിതരണ കേന്ദ്രങ്ങളും സജ്ജീകരിക്കും. താമസസ്ഥലങ്ങളിൽ നിന്ന് വേദികളിലേക്ക് മത്സരാർത്ഥികളെ എത്തിക്കാൻ സ്കൂൾ ബസുകൾ സർവീസ് നടത്തും.
by Midhun HP News | Oct 13, 2026 | Latest News, കേരളം
കൊച്ചി: യുപിഐ ഇടപാടുകള്‍ക്ക് ഫീസ് ഏര്‍പ്പെടുത്താനുള്ള തീരുമാനത്തിനെതിരെ വ്യാപാരികള്‍. 2000 രൂപയ്ക്ക് മുകളിലുള്ള യുപിഐ ഇടപാടുകള്‍ക്ക് ഫീസ് ഈടാക്കാനാണ് നീക്കം. ഇതിനെതിരെ പ്രതിഷേധിച്ച് 15 മുതല്‍ സംസ്ഥാനത്തെ ഹോട്ടലുകളിലും റസ്റ്ററന്റുകളിലും 2000 രൂപയ്ക്ക് മുകളിലുള്ള യുപിഐ പേയ്‌മെന്റുകള്‍ സ്വീകരിക്കില്ലെന്ന് കേരള ഹോട്ടല്‍ ആന്‍ഡ് റസ്റ്ററന്റ് അസോസിയേഷന്‍ അറിയിച്ചു.
അധിക ഫീസ് ഹോട്ടല്‍ വ്യാപാരികള്‍ക്ക് അധിക സാമ്പത്തിക ബാധ്യത ഉണ്ടാക്കുമെന്നാണ് വ്യാപാരികള്‍ പറയുന്നത്. ഉത്സവസമയത്ത് യുപിഐ ഇടപാടുകള്‍ക്ക് ചാര്‍ജ് ഏര്‍പ്പെടുത്തുന്നത് ഒഴിവാക്കണമെന്ന് വാണിജ്യ സംഘടനകള്‍ ധനമന്ത്രിയോട് ആവശ്യപ്പെട്ടിരുന്നു.
ഇടപാടുകള്‍ക്ക് ഫീസ് ഏര്‍പ്പെടുത്താനുള്ള തീരുമാനം നീട്ടി വെക്കാന്‍ സാധ്യതയുണ്ടെന്നും റിപ്പോര്‍ട്ടുകളുണ്ടായിരുന്നു. ഒക്ടോബര്‍ 15 ന് പകരം ജനുവരി ഒന്നിലേക്ക് ഇത് നീട്ടാനാണ് ആലോചന നടക്കുന്നത്. ദസറ, ദീപാവലി, ക്രിസ്മസ് തുടങ്ങിയ ആഘോഷങ്ങള്‍ വരെ ഇത് ഒഴിവാക്കുന്ന കാര്യമാണ് പേയ്മെന്റ്‌സ് കൗണ്‍സില്‍ ഓഫ് ഇന്ത്യ ആലോചിക്കുന്നത്.
by Midhun HP News | Oct 13, 2026 | Latest News, കേരളം
അബുദാബി: ബിഗ് ടിക്കറ്റ് നറുക്കെടുപ്പിൽ രണ്ട് മലയാളികളടക്കം അഞ്ച് ഇന്ത്യക്കാർക്ക് സമ്മാന നേട്ടം. യുഎഇയിലും ഒമാനിലുമായി ജോലി ചെയ്യുന്ന ഇന്ത്യൻ പ്രവാസികൾക്കാണ് ആകെ അഞ്ച് കോടിയിലേറെ രൂപ (19.5 ലക്ഷം ദിർഹം) സമ്മാനമായി ലഭിച്ചത്. മലയാളികളായ അജിത് കുമാർ വണ്ണാറത്തും സി. മുഹമ്മദ് ഇജാസും ഉൾപ്പെടെയുള്ളവരാണ് ഭാഗ്യം സ്വന്തമാക്കിയത്.
ഒമാനിൽ ഡോക്യുമെന്റ് കൺട്രോളറായി ജോലി ചെയ്യുന്ന അജിത് കുമാർ (54) സുഹൃത്തുക്കൾക്കൊപ്പം എടുത്ത ടിക്കറ്റിലൂടെയാണ് 2.5 ലക്ഷം ദിർഹം നേടിയത്. പത്ത് വർഷമായി ഒമാനിലുള്ള അജിത് സുഹൃത്തുക്കൾക്കൊപ്പം ഏറെക്കാലമായി ബിഗ് ടിക്കറ്റിൽ പങ്കെടുക്കുന്നുണ്ട്. അജിത്തിനെപ്പോലെ തന്നെ സംഘമായി ടിക്കറ്റെടുത്താണ് അജ്മാനിൽ താമസിക്കുന്ന എഞ്ചിനീയർ സി. മുഹമ്മദ് ഇജാസും സമ്മാനം നേടിയത്.
മകന്റെ ജനനത്തീയതിയും ജനനവർഷവും ചേർത്തുണ്ടാക്കിയ നമ്പറാണ് ഇജാസ് തിരഞ്ഞെടുത്തത്. തനിക്ക് ലഭിക്കുന്ന സമ്മാനത്തുക മകനുവേണ്ടി ചെലവഴിക്കാനാണ് ആഗ്രഹിക്കുന്നത് എന്ന് ഇജാസ് പറഞ്ഞു.
ഇന്ത്യക്കാരനായ സുനിൽ കുമാറിന് 10 ലക്ഷം ദിർഹമാണ് ബിഗ് ടിക്കറ്റ് നറുക്കെടുപ്പിലൂടെ സമ്മാനമാണ് ലഭിച്ചത്. ദുബൈ ജബൽ അലിയിൽ ട്രക്ക് ഡ്രൈവറായി ജോലി ചെയ്യുന്ന പഞ്ചാബ് സ്വദേശി കുൽവന്ത് സിങ്ങിന് 5 ലക്ഷം ദിർഹവും ലഭിച്ചു. 2008 മുതൽ യുഎഇയിലുള്ള കുൽവന്ത് സമ്മാനത്തുക കുടുംബത്തിനും വീടിന്റെ ആവശ്യങ്ങൾക്കുമായി ഉപയോഗിക്കുമെന്ന് അറിയിച്ചു. മറ്റൊരു ഇന്ത്യൻ പൗരനായ സെത്വാൻ കുമാർ ചൗഹാനും ഒരു ലക്ഷം ദിർഹത്തിന്റെ സമ്മാനം ലഭിച്ചു.
x
Recent Comments