എല്ലാ വീടുകളിലും ദേശീയ പതാകയെന്ന ലക്ഷ്യം; പ്രധാനമന്ത്രി

by liji HP News | Jul 22, 2022 | Latest News, കേരളം, ജില്ലാ വാർത്ത

ന്യൂഡല്‍ഹി: ഓഗസ്റ്റ് 13 മുതല്‍ 15 വരെ രാജ്യത്തെ എല്ലാ വീടുകളിലും ദേശീയ പതാക ഉയര്‍ത്തുകയോ പ്രദര്‍ശിപ്പിക്കുകയോ ചെയ്യാന്‍ ജനങ്ങളോട് അഭ്യര്‍ഥിച്ച് പ്രധാനമന്ത്രി നരേന്ദ്ര മോദി. എല്ലാ വീട്ടിലും ദേശീയ പതാക എന്ന ആശയത്തിന് ശക്തിപകരാനും അദ്ദേഹം ട്വീറ്റുകളിലൂടെ ആവശ്യപ്പെട്ടു.

എല്ലാ വീടുകളിലും ദേശീയ പതാകയെന്ന ലക്ഷ്യം ത്രിവര്‍ണ പതാകയോടുള്ള നമ്മുടെ ആത്മബന്ധം ദൃഢമാക്കുമെന്ന് അദ്ദേഹം അഭിപ്രായപ്പെട്ടു. കോളനി ഭരണത്തിനെതിരെ പോരാടുന്നതിനിടെ സ്വതന്ത്ര ഇന്ത്യയും ദേശീയ പതാകയും സ്വപ്‌നം കണ്ടവരുടെ ധൈര്യവും പരിശ്രമങ്ങളും നാം അനുസ്മരിക്കേണ്ടതുണ്ട്. അവര്‍ സ്വപ്‌നംകണ്ട ഇന്ത്യ യാഥാര്‍ഥ്യമാക്കാന്‍ നാം പ്രതിജ്ഞാബദ്ധമാണ്. സ്വാതന്ത്ര്യം ലഭിച്ചതിന്റെ 75-ാം വാര്‍ഷിക ആസാദി കാ അമൃത് മഹോത്സവമായി ആഘോഷിക്കുന്ന വേളയില്‍ എല്ലാ വീടുകളിലും ത്രിവര്‍ണ പതാക എന്ന ആശയത്തെ ശക്തിപ്പെടുത്തേണ്ടതുണ്ടെന്നും അദ്ദേഹം ട്വീറ്റ് ചെയ്തു.

വാഹനാപകടത്തിൽ ചികിത്സയിലായിരുന്ന വനിതാ പൊലീസ് ഉദ്യോഗസ്ഥ മരിച്ചു

by liji HP News | Jul 22, 2022 | Latest News, കേരളം, ജില്ലാ വാർത്ത

പത്തനംതിട്ട: വാഹനാപകടത്തിൽ ‍പരുക്കേറ്റു ചികിത്സയിലായിരുന്ന വനിതാ പൊലീസ് ഉദ്യോഗസ്ഥ മരിച്ചു. പത്തനംതിട്ട വനിതാ പൊലീസ് സ്റ്റേഷനിലെ സിപിഒ സിൻസി പി.അസീസാണ് മരിച്ചത്. ഈ മാസം 11ന് കിടങ്ങന്നൂരിനു സമീപത്തുവച്ച് സ്‌കൂട്ടറും കാറും കൂട്ടിയിടിച്ചാണ് സിൻസിക്കു പരുക്കേറ്റത്. സ്ത്രീകൾക്കും കുട്ടികൾക്കും സെൽഫ് ഡിഫൻസ് പരിശീലനം നൽകുന്ന ചുമതല വഹിക്കുകയായിരുന്നു സിൻസി.

11–ാം തീയതി വൈകിട്ട് മൂന്നരയോടെ മെഴുവേലിയിൽ കുറിയാനിപ്പള്ളി കിടങ്ങന്നൂർ റോഡിൽ കീർത്തി സ്‌കൂട്ടർ വർക് ഷോപ്പിനു സമീപമാണ് അപകടം സംഭവിച്ചത്. സിൻസി സഞ്ചരിച്ചിരുന്ന സ്‌കൂട്ടർ കാറുമായി കൂട്ടിയിടിക്കുകയായിരുന്നു. തലയ്ക്കു ഗുരുതരമായി പരുക്കേറ്റ സിൻസിയെ ആദ്യം കോഴഞ്ചേരിയിലെ സ്വകാര്യ ആശുപത്രിയിലും അവിടെനിന്ന് കല്ലിശേരിയിലെ സ്വകാര്യ ആശുപത്രിയിലേക്കും മാറ്റിയിരുന്നു.

അപകടത്തിൽ ഗുരുതരമായി പരുക്കേറ്റ് വഴിയിൽ കിടന്ന സിൻസിയെ ആശുപത്രിയിലെത്തിക്കാൻ വൈകിയത് തിരിച്ചടിയായി. ഇലവുംതിട്ട പൊലീസ് സ്റ്റേഷനിൽനിന്നും പൊലീസുകാരെത്തിയാണ് സിൻസിയെ ആശുപത്രിയിലേക്കു മാറ്റിയത്. അപ്പോഴേയ്ക്കും ഒരുപാടു രക്തം നഷ്ടമായിരുന്നു. തലയ്ക്കേറ്റ പരുക്കാണ് മരണകാരണമായതെന്നാണ് വിവരം.

കരവാരത്ത് എസ്.എഫ്.ഐ പട്ടിണി സമരം നടത്തി

by Midhun HP News | Jul 22, 2022 | Latest News, കേരളം, ജില്ലാ വാർത്ത

ആറ്റിങ്ങൽ: സ്‌കൂളുകളിൽ ഒരു വർഷം ആയി പ്രഭാത ഭക്ഷണം മുടക്കുന്ന കരവാരം പഞ്ചായത്ത്‌ ഭരണ സമിതിക്ക് എതിരെ എസ്.എഫ്.ഐ കരവാരം വഞ്ചിയൂർ മേഖല കമ്മിറ്റികളുടെ നേതൃത്വത്തിൽ പട്ടിണി ജാഥ നടത്തി. എസ്.എഫ്.ഐ കരവാരം മേഖല സെക്രട്ടറി പ്രിമ അധ്യക്ഷയായ സമരം മുൻ ആസൂത്രണ സമിതി അധ്യക്ഷൻ നാരായണൻ ഉൽഘാടനം ചെയ്തു. സിപിഎം വഞ്ചിയൂർ ലോക്കൽ കമ്മിറ്റി സെക്രട്ടറി എം.കെ.രാധാകൃഷ്ണൻ സ്വാഗതം പറഞ്ഞു.

കരവാരം ലോക്കൽ കമ്മിറ്റി സെക്രട്ടറി എസ്.എം റഫീഖ്, എസ്.എഫ്.ഐ ഏരിയ സെക്രട്ടറി വൈഷ്ണവ്, എസ്.എഫ്.ഐ ഏരിയ പ്രസിഡന്റ് നിമിഷ, ഷിജിലാൽ, നൗഫൽ, വിഷ്ണു, സുധീഷ് എന്നിവർ ആശംസ അറിയിച്ചു. പ്രതീകാത്മകമായി പ്ളേറ്റുകളിൽ മണ്ണ് വിളമ്പി ആണ് പട്ടിണി സമരം നടത്തിയത്. മേഖലകമ്മിറ്റികൾ സംയുക്തമായി പഞ്ചായത്ത്‌ സെക്രട്ടറിക്ക് നിവേദനം സമർപ്പിച്ചു. ഇതിൽ അടിയന്തിര നടപടികൾ ഉണ്ടായില്ലെങ്കിൽ തുടർ സമരങ്ങളുമായി മുന്നോട്ടു വരും എന്ന് എസ്.എഫ്.ഐ അറിയിച്ചു.

ഇന്ത്യൻ പ്രസിഡന്റായി ദ്രൗപതി മുർമു തിരഞ്ഞെടുത്തതിൽ ബി.ജെ.പി. ആറ്റിങ്ങിലിൽ ആഹ്ളാദ പ്രകടനം നടത്തി

by Midhun HP News | Jul 21, 2022 | Latest News, കേരളം, ജില്ലാ വാർത്ത

ഇന്ത്യൻ പ്രസിഡന്റായി ദ്രൗപതി മുർമു തിരഞ്ഞെടുത്തതിൽ ബി.ജെ.പി. ആറ്റിങ്ങിലിൽ ആഹ്ളാദ പ്രകടനം നടത്തി. മണ്ഡലം പ്രസിഡന്റ് സന്തോഷ്, ജന: സെക്രട്ടറി സുജി, വൈസ് പ്രസിഡന്റ് അജിത് പ്രസാദ് , മേഖലാ പ്രസിഡന്റുമാരായ ജീവൻ ലാൽ, രാധാകൃഷ്ണൻ, ജന: സെക്രട്ടറി വിനോദ, മഹിളാ മോർച്ച പ്രസിഡന്റ് ഷീബ, ദീപ്തി , കർഷക മോർച്ച ജന: സെക്രട്ടറി സുരേഷ്, കൗൺസിലർമാരായ ഷീല, സംഗീതാ റാണി, വക്കം സജി, തുടങ്ങിയവർ നേതൃത്വം നൽകി.

ആണ്‍/പെണ്‍ സ്കൂളുകൾ വേണ്ട; എല്ലാ സ്കൂളുകളും മിക്സ്ഡാക്കണമെന്ന് ബാലാവകാശ കമ്മീഷൻ

by Midhun HP News | Jul 21, 2022 | Latest News, കേരളം, ജില്ലാ വാർത്ത

തിരുവനന്തപുരം: അടുത്ത അധ്യയന വർഷം മുതൽ സംസ്ഥാനത്തെ ബോയ്സ്, ഗേൾസ് സ്കൂളുകൾ നിർത്തലാക്കാൻ ബാലാവകാശ കമ്മീഷൻ ഉത്തരവ്. എല്ലാ സ്കൂളുകളും മിക്സഡ് സ്കൂളുകളാക്കി സഹവിദ്യാഭ്യാസം നടപ്പാക്കണം. ഇതിന് മുന്നോടിയായി സ്കൂളുകളിലെ ശൗചാലയമടക്കമുള്ള ഭൗതിക സാഹചര്യങ്ങൾ മെച്ചപ്പെടുത്തുന്നതിനും രക്ഷിതാക്കൾക്ക് സഹവിദ്യാഭ്യാസത്തിന്‍റെ ആവശ്യകത സംബന്ധിച്ച ബോധവത്കരണം നടത്തുന്നതിനും ആവശ്യമായ നടപടികൾ വിദ്യാഭ്യാസ വകുപ്പ് കൈക്കൊള്ളണമെന്നും കമ്മീഷൻ ഉത്തരവിട്ടു.

ആൺകുട്ടികൾക്കും പെൺകുട്ടികൾക്കും പ്രത്യേകം സ്കൂളുകൾ പ്രവർത്തിക്കുന്നതിലൂടെ ലിംഗനീതി നിഷേധിക്കപ്പെടുകയാണെന്നും ഇവിടങ്ങളിൽ സഹവിദ്യാഭ്യാസം നടപ്പാക്കണമെന്നും ആവശ്യപ്പെട്ട് അഞ്ചൽ സ്വദേശി ഡോ. ഐസക് പോൾ സമർപ്പിച്ച ഹർജിയിലാണ് കമ്മീഷന്‍റെ ഉത്തരവ്. സംസ്ഥാനത്താകെ 280 ഗേൾസ് സ്കൂളുകളും 164 ബോയ്സ് സ്കൂളുകളുമാണ് പ്രവർത്തിക്കുന്നത്. ഉത്തരവിൽ നടപടി സ്വീകരിച്ച് 90 ദിവസത്തിനകം പൊതുവിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി, പൊതുവിദ്യാഭ്യാസ ഡയറക്ടർ, എസ്.സി.ഇ.ആർ.ടി ഡയറക്ടർ എന്നിവർ മറുപടി നൽകണമെന്നും കമ്മീഷൻ നിർദേശിച്ചു.