by Midhun HP News | Oct 28, 2025 | Latest News, കേരളം
തിരുവനന്തപുരം: സംസ്ഥാനത്ത് ഇന്ന് രണ്ടാം തവണയും സ്വർണവില പരിഷ്കരിച്ചു. രാവിലെ വില കുറഞ്ഞിരുന്നു. ഉച്ചയ്ക്ക് വീണ്ടും വില കുത്തനെ ഇടിഞ്ഞിരിക്കുകയാണ്. പവന് 1200 രൂപയാണ് ഇപ്പോൾ കുറഞ്ഞിരിക്കുന്നത്.
ഇതോടെ സ്വർണവില 89,000 ത്തിന് താഴെയെത്തി. ഒരു പവൻ 22 കാരറ്റ് സ്വർണത്തിന്റെ വിപണി വില നിലവിൽ 88,600 രൂപയാണ്. ഏറ്റവും കുറഞ്ഞ പണിക്കൂലിയായ 5 ശതമാനവും ജിഎസ്ടി 3 ശതമാനവും ഹാൾമാർക്കിങ് ചാർജും ചേർത്താൽ ഇന്ന് ഒരു പവൻ സ്വർണാഭരണം വാങ്ങാൻ 95000 ത്തിനടുത്ത് നൽകണം.
പവന് ഇന്നലെ 1,720 രൂപയും ഇന്ന് രാവിലെ 600 രൂപയുമാണ് ഇടിഞ്ഞത്. കഴിഞ്ഞ ചെവ്വാഴ്ച രാവിലെ 97,360 എന്ന സർവകാല റെക്കോർഡിലായിരുന്നു സ്വർണവില. ഒരാഴ്ച പിന്നിട്ടപ്പോഴേക്ക് 8,760 രൂപയുടെ കുറവാണ് സ്വർണവിലയിൽ ഉണ്ടായത്. ഓൾ കേരള ഗോൾഡ് ആൻഡ് സിൽവർ മർച്ചന്റ് അസേസിയേഷൻ അന്താരാഷ്ട്ര വിലയെ അനുസൃതമാക്കിയാണ് കേരളത്തിൽ വില നിശ്ചയിക്കുന്നത്. അന്താരാഷ്ട്ര വിപണി നിരക്കുകൾ, ഇറക്കുമതി തീരുവകൾ, നികുതികൾ, വിനിമയ നിരക്കുകളിലെ ഏറ്റക്കുറച്ചിലുകൾ എന്നിവയാണ് പ്രധാനമായും ഇന്ത്യയിലെ സ്വർണ്ണ വിലയെ സ്വാധീനിക്കുന്നത്.
യുഎസ്-ചൈന വ്യാപാര സംഘർഷങ്ങൾ കുറയുന്നതിന്റെ സൂചനകൾ വന്നതോടെ നിക്ഷേപകർ സ്വർണത്തിൽ നിന്നും പിന്മാറിയിട്ടുണ്ട്. ലോകത്തിലെ ഏറ്റവും വലിയ രണ്ട് സമ്പദ്വ്യവസ്ഥകൾ തമ്മിലുള്ള വ്യാപാര സംഘർഷങ്ങൾ ലഘൂകരിക്കുമെന്ന സൂചനകളെ തുടർന്ന് 3.2 ശതമാനമാണ് സ്വർണവില കുറഞ്ഞത്. വരും
ഇന്നത്തെ വില വിവരങ്ങൾ
ഒരു ഗ്രം 22 കാരറ്റ് സ്വർണത്തിന്റെ വില 11075 രൂപയാണ്. ഒരു ഗ്രം 18 കാരറ്റ് സ്വർണത്തിന്റെ വില 9110 രൂപയാണ്. ഒരു ഗ്രം 14 കാരറ്റ് സ്വർണത്തിന്റെ വില 7100 രൂപയാണ്. ഒരു ഗ്രം 9 കാരറ്റ് സ്വർണത്തിന്റെ വില 4600 രൂപയാണ്. വെള്ളിയുടെ വിലയും കുറഞ്ഞിട്ടുണ്ട്. ഇതോടെ വെള്ളിയുടെ വില 155 രൂപയായി. വെള്ളിയുടെ വില 196 എന്ന റെക്കോർഡ് നിരക്ക് വരെ എത്തിയിരുന്നു.
by Midhun HP News | Oct 28, 2025 | Latest News, കേരളം
തൃശൂര്: അഗതി മന്ദിരത്തില് വെച്ച് കൊലക്കേസ് പ്രതിയെ ക്രൂരമായി മര്ദിക്കുകയും ജനനേന്ദ്രിയത്തില് മുറിവേല്പ്പിക്കുകയും ചെയ്ത സംഭവത്തില് മൂന്നുപേര് പിടിയില്. പാസ്റ്റര് ഉള്പ്പെടെ മൂന്നുപേരെയാണ് തൃശൂര് കൊടുങ്ങല്ലൂരില് വെച്ച് പൊലീസ് കസ്റ്റഡിയിലെടുത്തത്. വരാപ്പുഴ കൂനമ്മാവില് പ്രവര്ത്തിക്കുന്ന അഗതി മന്ദിരമായ ഇവാഞ്ചലോയുടെ നടത്തിപ്പുകാരനായ പാസ്റ്റര് ഫ്രാന്സിസ് (65), ആരോമല് , നിതിന്, എന്നിവരാണ് പിടിയിലായത്. ഇവരെ പൊലീസ് ചോദ്യം ചെയ്ത് വരികയാണ്.
വരാപ്പുഴ കൂനമ്മാവ് അഗതിമന്ദിരത്തില് വെച്ച്് എറണാകുളം അരൂര് സ്വദേശി സുദര്ശനാണ് (44) ക്രൂരമായി മര്ദനമേറ്റത്. 18ന് വഴിയാത്രക്കാരെ ശല്യപ്പെടുത്തിയതിന് സുദര്ശനെ കൊച്ചി സെന്ട്രല് പൊലീസ് പിടികൂടി. മനോനില ശരിയല്ലെന്ന് മനസിലാക്കിയതിനെ തുടര്ന്ന് സെന്ട്രല് പൊലീസ് ആണ് സുദര്ശനെ അഗതിമന്ദിരത്തിലെത്തിച്ചത്. അവിടെ വച്ച് മാനസിക പ്രശ്നമുള്ളവര് തമ്മില് വഴക്ക് ഉണ്ടായി. അതിനിടെ സുദര്ശനെ നിയന്ത്രിക്കാന് വേണ്ടി നടത്തിപ്പുകാര് ക്രൂരമായി മര്ദ്ദിക്കുകയായിരുന്നുവെന്നാണ് കൊടുങ്ങല്ലൂര് പൊലീസിന്റെ കണ്ടെത്തല്.
മര്ദനത്തെ തുടര്ന്ന് അവശനായതോടെ സുദര്ശനെ അഗതി മന്ദിരത്തിന്റെ വാഹനത്തില് കൊടുങ്ങല്ലൂരില് കൊണ്ടുവന്ന് വഴിയരികില് ഉപേക്ഷിക്കുകയായിരുന്നു. അവശനിലയില് കണ്ട സുദര്ശനെ കൊടുങ്ങല്ലൂര് പൊലീസ് ആണ് തൃശൂര് മെഡിക്കല് കോളജ് ആശുപത്രിയില് എത്തിച്ചത്. ആശുപത്രിയില് ചികിത്സയില് കഴിയുന്ന സുദര്ശന്റെ നില ഗുരുതരമായി തുടരുകയാണെന്നാണ് പൊലീസ് പറയുന്നത്.
by Midhun HP News | Oct 28, 2025 | Latest News, കേരളം
കൊച്ചി: സിപിഎം- സിപിഐ അതൃപ്തി രൂക്ഷമാകുന്നതിനിടെ നെല്ലുസംഭരണവുമായി ബന്ധപ്പെട്ട് ഭക്ഷ്യവകുപ്പ് വിളിച്ചുചേര്ത്ത യോഗം മാറ്റിവച്ച് മുഖ്യമന്ത്രി പിണറായി വിജയന്. യോഗത്തില് മില്ലുടമകള് പങ്കെടുത്തില്ലെന്ന് പറഞ്ഞ് മുഖ്യമന്ത്രി മടങ്ങുകയായിരുന്നു. എറണാകുളം ഗസ്റ്റ്ഹൗസില് വിളിച്ചുചേര്ത്ത യോഗത്തില് മന്ത്രിമാരായ ജിആര് അനില്, പി പ്രസാദ്, കെഎന് ബാലഗോപാല്, കെ കൃഷ്ണന്കുട്ടി, ഉന്നത ഉദ്യോഗസ്ഥര് എന്നിവര് എത്തിയിരുന്നു.
രാവിലെ ഒന്പത് മണിക്ക് യോഗത്തിനെത്തിയ മുഖ്യമന്ത്രി മില്ലുടമകള് എത്തിയില്ലേയെന്ന് ചോദിച്ചപ്പോള് ഉദ്യാഗസ്ഥരെ മാത്രമേ ക്ഷണിച്ചുള്ളുവെന്ന് അറിയിച്ചപ്പോള് അതില് ക്ഷുഭിതനായി ഇറങ്ങിപ്പോകുകയായിരുന്നു. നേരത്തെ ഓണ്ലൈനായി വിളിച്ച യോഗം മുഖ്യമന്ത്രിയുടെ ഓഫീസ് അറിയിച്ചതനുസരിച്ചാണ് ഓഫ്ലൈനായി ചേരാന് ഭക്ഷ്യവകുപ്പ് തീരുമാനിച്ചത്. ഉദ്യോഗസ്ഥര് മാത്രമാണ് യോഗത്തിലുണ്ടാകുകയെന്ന കാര്യം മുഖ്യമന്ത്രിയുടെ ഓഫീസില് അറിയിച്ചിരുന്നെന്ന് ഭക്ഷ്യവകുപ്പ് ഉദ്യോഗസ്ഥര് അറിയിച്ചെങ്കിലും മുഖ്യമന്ത്രി അത് കേള്ക്കാന് തയ്യാറായില്ല. പോകുന്ന വഴിക്ക് നാളെ തിരുവനന്തപുരത്ത് യോഗം ചേരാമെന്ന് മുഖ്യമന്ത്രി പറയുകയുമായിരുന്നു. നാളെ മന്ത്രിസഭാ യോഗത്തിന് ശേഷമായിരിക്കും ഭക്ഷ്യവകുപ്പിന്റെ യോഗം ചേരുക. എന്നാല് സിപിഐ മന്ത്രിമാര് മന്ത്രിസഭാ യോഗത്തില് നിന്നും വിട്ടുനില്ക്കുന്ന സാഹചര്യമുണ്ടായാല് ഈ യോഗം നടക്കുമോയെന്ന കാര്യം ഉറപ്പില്ല.
by Midhun HP News | Oct 28, 2025 | Latest News, കേരളം
കൊച്ചി: ഡേറ്റാബാങ്കില് ഉള്പ്പെട്ടിട്ടില്ല എന്നത് കണക്കിലെടുക്കാതെ ഭൂമി തരംമാറ്റാനുള്ള അപേക്ഷ നിരസിച്ച തിരൂര് റവന്യൂ ഡിവിഷന് ഓഫീസര്ക്ക് (ആര്ഡിഒ) 10,000 രൂപ പിഴചുമത്തി ഹൈക്കോടതി. മലപ്പുറം പൊന്നാനി സ്വദേശി എ ബി സുജയ്യയുടെ ഹര്ജിയില് ജസ്റ്റിസ് സി എസ് ഡയസിന്റേതാണ് ഉത്തരവ്.
ഹര്ജിക്കാരിയുടെ ഭര്ത്താവിന് പൊന്നാനി വട്ടക്കുളം വില്ലേജില് 12 സെന്റിലധികം സ്ഥലമുണ്ട്. പതിറ്റാണ്ടുകള്ക്കുമുമ്പ് കെട്ടിടം നിര്മിച്ചതാണ്. തുടര്ന്നാണ് തരംമാറ്റുന്നതിന് അപേക്ഷ നല്കിയത്. ഇത് നിഷേധിച്ചതിനെത്തുടര്ന്ന് കലക്ടര്ക്ക് അപ്പീല് നല്കി. നടപടി ഉണ്ടാകാത്തതിനെത്തുടര്ന്ന് ഹൈക്കോടതിയെ സമീപിച്ചു. എത്രയുംവേഗം തീരുമാനമെടുക്കാന് ഹൈക്കോടതി നിര്ദേശിച്ചു. കലക്ടര് അപേക്ഷ ആര്ഡിഒയ്ക്ക് കൈമാറി.
ഭൂമി ഡേറ്റാബാങ്കില് ഉള്പ്പെട്ടതാണോ അല്ലയോ എന്ന് പരിശോധിക്കാതെ ആര്ഡിഒ വീണ്ടും അപേക്ഷ തള്ളി. വില്ലേജ് ഓഫീസറുടെ റിപ്പോര്ട്ടില് സ്ഥലം ഡേറ്റാബാങ്കില് ഉള്പ്പെട്ടിട്ടില്ലെന്നതും സമീപ സ്ഥലങ്ങള് തരംമാറ്റാന് ആര്ഡിഒ അനുമതി നല്കിയെന്നതും ഹര്ജിക്കാരി ചൂണ്ടിക്കാട്ടി. ഹര്ജിക്കാരിക്ക് കോടതിയിലെത്തേണ്ട സാഹചര്യം സൃഷ്ടിച്ചത് നിഷേധാത്മക സമീപനത്തിന്റെ ഫലമായിട്ടാണെന്ന് വിലയിരുത്തിയാണ് പിഴ. ആര്ഡിഒ സ്വന്തംകൈയില്നിന്ന് ഹര്ജിക്കാരിക്ക് നേരിട്ട് പണം നല്കണം. അപേക്ഷയില് നാലാഴ്ചയ്ക്കുള്ളില് തീരുമാനവുമെടുക്കണം.
by Midhun HP News | Oct 28, 2025 | Latest News, കേരളം
തൊടുപുഴ: ഇടുക്കി ജലവൈദ്യുതപദ്ധതിയുടെ ഭാഗമായ മൂലമറ്റം പവര്ഹൗസ് ഒരു മാസത്തേയ്ക്ക് അടയ്ക്കുന്നു. അടുത്ത മാസം 11 മുതലാണ് സമ്പൂര്ണ ഷട്ട്ഡൗണ്. അറ്റകുറ്റപ്പണികള്ക്ക് വേണ്ടിയാണ് പവര് ഹൗസ് അടക്കുന്നത് എന്നാണ് റിപ്പോര്ട്ടുകള് വ്യക്തമാക്കുന്നത്.
മൂലമറ്റം പവര്ഹൗസ് അടയ്ക്കുന്നതോടെ ഒരു ദിവസം 600 മെഗാവാട്ട് വൈദ്യുതിയുടെ കുറവുണ്ടാകും. താത്കാലികമാണെങ്കിലും മൂലമറ്റം പവര്ഹൗസില് നിന്നുള്ള വൈദ്യുതി ഉല്പ്പാദനം നിലയ്ക്കുന്നതോടെ, മഴ തുടര്ന്നാല് ഇടുക്കി ഡാമിലെ ജലനിരപ്പ് ഉയരാനും സാധ്യതയുണ്ട്. നിലവില് തുലാവര്ഷത്തോടനുബന്ധിച്ച് ഇടുക്കിയില് നല്ലമഴ ലഭിക്കുന്നുണ്ട്.
ഇന്ത്യയിലെ വലിപ്പമേറിയ ഭൂഗര്ഭ ജല വൈദ്യുത നിലയങ്ങളില് ഒന്നാണിത്. പവര് ഹൗസിന്റെ സ്ഥാപിത ശേഷി 780 മെഗാ വാട്ടാണ്. ഇടുക്കി ജലവൈദ്യുത പദ്ധതിയിലെ മൂന്ന് അണക്കെട്ടുകളില് കുളമാവിനു സമീപമുള്ള ടണലുകള് (പെന്സ്റ്റോക്ക് പൈപ്പുകള് ) വഴിയാണ് മൂലമറ്റം പവര് ഹൗസില് വൈദ്യുതി ഉല്പ്പാദിപ്പിക്കുവാനാവശ്യമായ ജലമെത്തിക്കുന്നത്. തൊടുപുഴയാറിലേക്കാണ് ഇവിടെ നിന്നും പുറന്തള്ളുന്ന ജലം എത്തിച്ചേരുന്നത്. ഇടുക്കി അണക്കെട്ടില് നിന്നും 46 കിലോമീറ്റര് ദൂരത്തായി നാടുകാണി മലയുടെ താഴ് വാരത്ത് ഭൂമിക്കടിയിലാണ് പവര്ഹൗസ് സ്ഥാപിച്ചിരിക്കുന്നത്. ഇടുക്കി ജലവൈദ്യുത പദ്ധതിയില് ഇടുക്കി ജലസംഭരണിയും ഇടുക്കി ആര്ച്ച് ഡാമും ചെറുതോണി ,കുളമാവ് അണക്കെട്ടുകളും ,ഏഴു ഡൈവേര്ഷന് അണക്കെട്ടുകളും മൂലമറ്റം പവര് ഹൗസുമാണ് ഉള്പ്പെടുന്നത്.
by Midhun HP News | Oct 28, 2025 | Latest News, കേരളം
ശബരിമലയില് നിര്ണായക രേഖകള് നശിപ്പിച്ചെന്ന് സൂചന. വിജയ് മല്യ സ്വര്ണം പൊതിഞ്ഞ രേഖകള് കാണാനില്ല. പ്രത്യേക അന്വേഷണസംഘം ആവശ്യപ്പെട്ട രേഖകളാണ് കാണാതായത്. തിരുവിതാംകൂര് ദേവസ്വം ബോര്ഡ് ഉദ്യോഗസ്ഥര് നടത്തിയ പരിശോധനയില് രേഖകള് കണ്ടെത്താനായില്ല.
രേഖകള് നിരന്തരമായി ആവശ്യപ്പെട്ടിട്ടും പ്രത്യേക അന്വേഷണ സംഘത്തിന് കൈമാറിയിട്ടില്ല. സ്വര്ണക്കൊള്ളയുമായി ബന്ധപ്പെട്ട അന്വേഷണം നിര്ണായക ഘട്ടത്തിലേക്ക് പോകുന്നതിനിടെയാണ് 1998 – 99 കാലത്തെ രേഖകള് നഷ്ടപ്പെട്ടിരിക്കുന്നത്. വിജയ് മല്യ ശബരിമലയില് സ്വര്ണം പൂശിയതുമായി ബന്ധപ്പെട്ട രേഖകളാണ് കാണാതായത്.
രേഖകള് കണ്ടെത്താന് എക്സിക്യൂട്ടീവ് ഓഫീസറുടെയും ദേവസ്വം കമ്മീഷണറുടെയും നേതൃത്വത്തില് ഉദ്യോഗസ്ഥ സംഘത്തെ നിയോഗിച്ചിരുന്നു. ഇവര് പരിശോധന നടത്തിയിട്ടും രേഖകള് കണ്ടെത്താന് സാധിച്ചില്ല. ദേവസ്വം ബോര്ഡ് ആസ്ഥാനത്തും പമ്പയിലും ആറന്മുളയിലുമുള്പ്പടെ പരിശോധനകള് നടത്തിയിരുന്നു. ഇതില് ദുരൂഹതയുണ്ടെന്ന് നിലവിലെ ദേവസ്വം ബോര്ഡും സംശയിക്കുന്നുണ്ട്. ഏതെങ്കിലും തരത്തില് രേഖകള് നശിപ്പിക്കപ്പെട്ടിട്ടുണ്ടോ എന്നാണ് സംശയിക്കുന്നത്. ഉദ്യോഗസ്ഥരോട് രേഖകള് നിരന്തരം ആവശ്യപ്പെട്ടിട്ടും നല്കാത്തതോടെയാണ് വിവരങ്ങള് പുറത്ത് വന്നത്.
അതേസമയം, ശബരിമല സ്വര്ണ്ണക്കൊള്ളയില് പ്രതിയും മുന് അഡ്മിനിസ്ട്രേറ്റീവ് ഓഫീസറുമായ മുരാരി ബാബുവിനെ എസ്ഐടിക്ക് കസ്റ്റഡിയില് നല്കുന്നതില് കോടതി തീരുമാനമെടുക്കും. കഴിഞ്ഞദിവസം എസ്ഐടി നല്കിയ പ്രൊഡക്ഷന് വാറന്റാണ് റാന്നി മജിസ്ട്രേറ്റ് കോടതി പരിഗണിക്കുന്നത്. ഇന്ന് തന്നെ കസ്റ്റഡി അനുവദിക്കാനാണ് സാധ്യത. ഒന്നാംപ്രതിയായ ഉണ്ണികൃഷ്ണന് പോറ്റിയുടെ കസ്റ്റഡി കാലാവധി ഒക്ടോബര് 30 വരെയാണ്. അത് തീരും മുന്പ് ഇരുവരെയും കൊണ്ട് ഒന്നിച്ച് തെളിവെടുപ്പ് നടത്തുകയെന്ന ലക്ഷ്യത്തോടെയാണ് എസ്ഐടി 29-ന് മുമ്പ് മുരാരി ബാബുവിനെ കസ്റ്റഡിയില് ആവശ്യപ്പെട്ടത്.
ഇരുവരെയും ഒന്നിച്ചിരുത്തി ചോദ്യം ചെയ്യാനും ആലോചിക്കുന്നുണ്ട്. ദ്വാരപാലക പാളികളിലെ സ്വര്ണം കവര്ച്ച ചെയ്ത കേസില് രണ്ടാം പ്രതിയായ മുരാരി ബാബു, സ്വര്ണം പൊതിഞ്ഞ കട്ടിളപ്പാളികള് പുറത്തേക്കുകൊണ്ടുപോയ കേസില് ആറാം പ്രതിയാണ്. മുരാരി ബാബു തട്ടിപ്പിന് പോറ്റിയുമായി ചേര്ന്ന് ഗൂഢാലോചന നടത്തിയെന്നാണ് എസ്ഐടിയുടെ കണ്ടെത്തല്.
Recent Comments