by Midhun HP News | Sep 21, 2026 | Latest News, കേരളം
കണ്ണൂർ: കേരളത്തിലെ വിവിധ ജില്ലകളിൽ വൻതോതിൽ കവർച്ച നടത്താൻ ലക്ഷ്യമിട്ടെത്തിയ ഉത്തർപ്രദേശിൽ നിന്നുള്ള ഹൈടെക് അന്തർസംസ്ഥാന മോഷണസംഘത്തിലെ അഞ്ചുപേരെ കണ്ണൂർ സിറ്റി പൊലീസ് പിടികൂടി. ഉത്തർപ്രദേശിലെ മീററ്റ് സ്വദേശികളായ സമീർ, മൊഹ്‌സിൻ, മുഹമ്മദ് സാജിദ് അൻസാരി, മുഹമ്മദ് സാഹിൽ, മോനിഷ് എന്നിവരാണ് കണ്ണൂർ സിറ്റി പൊലീസ് കമ്മീഷണർ വിജയ് ഭാരത് റെഡ്ഡിയുടെ നേതൃത്വത്തിലുള്ള പ്രത്യേക അന്വേഷണ സംഘത്തിന്റെ പിടിയിലായത്. നിരവധി മോഷണക്കേസുകളിൽ പ്രതികളായ ഇവരെ രാത്രിയോടെ കണ്ണൂരിലെ ലോഡ്ജ് വളഞ്ഞാണ് പൊലീസ് പിടികൂടിയത്.
നിർമ്മാണം പുരോഗമിക്കുന്ന വലിയ വീടുകൾ, വിലപിടിപ്പുള്ള ചെമ്പ് ഘടകങ്ങൾ അടങ്ങിയ വൻകിട ജനറേറ്ററുകൾ, ടെലിഫോൺ എക്സ്ചേഞ്ച് ബൂത്തുകൾ എന്നിവയായിരുന്നു ഈ സംഘത്തിന്റെ പ്രധാന ലക്ഷ്യം. വിമാനമാർഗ്ഗം കൂട്ടത്തോടെ കേരളത്തിൽ പറന്നിറങ്ങിയ ശേഷം ഡൽഹിയിൽനിന്ന് ട്രെയിൻ മാർഗ്ഗം എത്തിക്കുന്ന ബൈക്കുകളിൽ കറങ്ങിനടന്നാണ് ഇവർ കൃത്യങ്ങൾ ആസൂത്രണം ചെയ്തിരുന്നത്. ആർക്കും സംശയം തോന്നാതിരിക്കാൻ നിർമ്മാണ സ്ഥലങ്ങളിലെ ഇതരസംസ്ഥാന തൊഴിലാളികൾ ധരിക്കുന്ന തരത്തിലുള്ള പ്രത്യേക വസ്ത്രങ്ങൾ ധരിച്ചാണ് ഇവർ കവർച്ച നടത്തിയിരുന്നത്. ഇത്തരം വസ്ത്രങ്ങളും മോഷണത്തിന് ഉപയോഗിക്കുന്ന ആയുധങ്ങളും വാഹനങ്ങളും പൊലീസ് പിടിച്ചെടുത്തു.
നേരത്തെ എറണാകുളം കളമശ്ശേരി പൊലീസ് സമാന രീതിയിൽ മോഷണം നടത്തുന്ന ഈ സംഘത്തിലെ ചിലരെ പിടികൂടിയിരുന്നു. ഇവരെ വിശദമായി ചോദ്യം ചെയ്തപ്പോഴാണ് വിവിധ ജില്ലകളിലേക്ക് സംഘം തിരിഞ്ഞ് കവർച്ച ലക്ഷ്യമിട്ട് ഇറങ്ങിയിട്ടുണ്ടെന്ന സുപ്രധാന വിവരം ലഭിച്ചത്. തുടർന്ന് കണ്ണൂർ സിറ്റി പൊലീസ് കമ്മീഷണറുടെ പ്രത്യേക അന്വേഷണ സംഘം ജില്ലയിൽ നിരീക്ഷണം ശക്തമാക്കുകയും, കണ്ണൂർ നഗരത്തിലെ ലോഡ്ജ് കേന്ദ്രീകരിച്ച് വൻ കവർച്ച ആസൂത്രണം ചെയ്യുകയായിരുന്ന പ്രതികളെ തന്ത്രപരമായി കുടുക്കുകയുമായിരുന്നു.
പിടിയിലായ സംഘത്തിലെ ചിലർക്കെതിരെ സമാനമായ മോഷണക്കേസുകൾ തൃക്കാക്കര പൊലീസ് സ്റ്റേഷനിലും നിലവിലുണ്ടെന്ന് ഉദ്യോഗസ്ഥർ വ്യക്തമാക്കി. കണ്ണൂർ റേഞ്ച് ഡി.ഐ.ജി കെ. കാർത്തിക് ഐ.പി.എസിന്റെ മേൽനോട്ടത്തിലും സിറ്റി പൊലീസ് കമ്മീഷണർ വിജയ് ഭാരത് റെഡ്ഡിയുടെ നിർദ്ദേശപ്രകാരവും കണ്ണൂർ ടൗൺ എ.സി.പി അസാദ്, ടൗൺ സി.ഐ മഹേഷ്‌ കണ്ടമ്പേത്ത് എന്നിവരടങ്ങിയ പ്രത്യേക പൊലീസ് സംഘമാണ് അതീവ രഹസ്യമായി നീങ്ങി പ്രതികളെ വലയിലാക്കിയത്. ഇതോടെ കണ്ണൂർ നഗരത്തിലും പരിസരപ്രദേശങ്ങളിലും നടക്കാനിരുന്ന വൻ കവർച്ചാ പരമ്പരയാണ് പൊലീസിന്റെ കൃത്യമായ ഇടപെടലിലൂടെ ഒഴിവായത്.
by Midhun HP News | Sep 21, 2026 | Latest News, കേരളം
തിരുവനന്തപുരം: ലോക കേരളസഭ തുടരില്ലെന്ന യുഡിഎഫ് സര്‍ക്കാര്‍ തീരുമാനത്തില്‍ മാറ്റമില്ലെന്ന് മുഖ്യമന്ത്രി വിഡി സതീശന്‍. എല്‍ഡിഎഫ് സര്‍ക്കാരിന്റെ കാലത്ത് സംഘടിപ്പിച്ചത് പോലെ ലോക കേരളസഭ തുടര്‍ന്നും സംഘടിപ്പിക്കുന്നത് നിലവിലുള്ള സര്‍ക്കാരിന്റെ പരിഗണനയിലില്ലെന്ന് മുഖ്യമന്ത്രിയുടെ ഓഫീസ് അറിയിച്ചു.
ലോക കേരളസഭയുടെ ആറാമത് എഡിഷനായി പുതിയ സര്‍ക്കാര്‍ ഒരു രൂപ പോലും വകയിരുത്തിയിട്ടില്ലെന്നും വാര്‍ത്താക്കുറിപ്പില്‍ പറയുന്നു. ലോക കേരളസഭ സെക്രട്ടേറിയറ്റിന്റെ നിലവിലുള്ള ഓഫീസിന്റെ അഡ്മിനിസ്ട്രേറ്റീവ് ചെലവുകള്‍ക്കും, നോര്‍ക്ക വഴി നടത്തുന്ന ബിസിനസ് ലീഡര്‍ഷിപ്പ് മീറ്റ് ഉള്‍പ്പെടെയുള്ള അത്യാവശ്യ പരിപാടികള്‍ക്കും മാത്രമാണ് നിലവില്‍ തുക അനുവദിച്ചിട്ടുള്ളത്. ഇതിനുപുറമേ പ്രവാസി ക്ഷേമ പദ്ധതികള്‍ക്കാണ് സര്‍ക്കാര്‍ പ്രഥമ പരിഗണന നല്‍കുന്നത്. ഇത്തരത്തിലുള്ള വിവിധ പ്രവാസി ക്ഷേമ നിര്‍ദ്ദേശങ്ങള്‍ പ്രാവര്‍ത്തികമാക്കുന്നതിന്റെ പ്രാരംഭ പ്രവര്‍ത്തനങ്ങള്‍ക്കു കൂടിയാണ് തുക നീക്കിവെച്ചിരിക്കുന്നതെന്ന് മുഖ്യമന്ത്രിയുടെ ഓഫീസ് അറിയിച്ചു.
by Midhun HP News | Sep 21, 2026 | Latest News, കേരളം
പത്തനംതിട്ട: സന്നിധാനത്ത് അരവണ ക്ഷാമം രൂക്ഷമായതോടെ വിതരണത്തില്‍ നിയന്ത്രണം. ഒരാള്‍ക്ക് ഒരു ടില്‍ അരവണയും മൂന്ന് കവര്‍ അപ്പവുമാണ് ഞായറാഴ്ച വിതരണം ചെയ്തത്. അരവണ പ്ലാന്റില്‍ നവീകരണം നടക്കുന്നതിനാല്‍ ഉത്പാദനം താത്കാലികമായി നിര്‍ത്തിവച്ചതാണ് ക്ഷാമത്തിന് കാരണം.
കന്നിമാസ പൂജയ്ക്കായി മുന്‍ വര്‍ഷത്തെ അപേക്ഷിച്ച് ഇത്തവണ തീര്‍ഥാടകര്‍ അധികം എത്തിയിരുന്നു. അരവണ ശേഖരം കുറഞ്ഞതിനെ തുടര്‍ന്നു ഞായറാഴ്ച ഉച്ചയോടെ കൗണ്ടറുകള്‍ അടച്ചു. പിന്നീട് വൈകീട്ട് അഞ്ചിനാണ് തുറന്നത്.
കന്നിമാസ പൂജയ്ക്ക് 2.6 ലക്ഷം അരവണയാണ് നിര്‍മിച്ചത്. ഈ വര്‍ഷം 50,000 യൂണിറ്റ് കൂടുതല്‍ ഉത്പാദിപ്പിച്ചതായി ദേവസ്വം ബോര്‍ഡ് പറയുന്നു. തിങ്കളാഴ്ചത്തേക്ക് 14,000 ടിന്നില്‍ താഴെ അരവണ മാത്രമാണ് ബാക്കിയുള്ളത്.
അപ്പത്തിന് നിലവില്‍ ക്ഷാമമില്ലെന്നാണ് അധികൃതര്‍ പറയുന്നത്. അരവണയുടെ കരുതല്‍ ശേഖരം തീരുന്ന മുറയ്ക്ക് വില്‍പ്പനയും നിര്‍ത്തിവയ്ക്കും.
by Midhun HP News | Sep 21, 2026 | Latest News, കേരളം
തിരുവനന്തപുരം: സംസ്ഥാനത്ത് മഴ കനത്ത സാഹചര്യത്തിൽ സ്ഥിതിഗതികൾ മണിക്കൂർ അടിസ്ഥാനത്തിൽ വിലയിരുത്താൻ മുഖ്യമന്ത്രി വി ഡി സതീശൻ നിർദ്ദേശം നൽകി. ജില്ലകളിലെ സ്ഥിതിഗതികൾ വിലയിരുത്തി, ആവശ്യമെങ്കിൽ ഒഴിപ്പിക്കൽ നടപടി അടക്കം സ്വീകരിക്കാൻ കലക്ടർമാരോട് നിർദ്ദേശിച്ചിട്ടുണ്ട്.
മുഖ്യമന്ത്രിയുടെ നിർദേശത്തിന്റെ അടിസ്ഥാനത്തിൽ ദുരന്തനിവാരണ അതോറിറ്റി കമ്മീഷണർ വിഗ്നേശ്വരി ഐ എ എസ് ഇടുക്കി, കോട്ടയം ജില്ലാ കലക്ടർമാരുടെ യോഗം വിളിച്ചുചേർത്ത് സ്ഥിതിഗതികൾ വിലയിരുത്തി. കാലാവസ്ഥ സംബന്ധിച്ച് ഇടുക്കി, കോട്ടയം ജില്ലകളിൽ എസ്എംഎസ് അലർട്ടുകൾ നൽകിയിട്ടുണ്ട്.
മലവെള്ളപ്പാച്ചിലുണ്ടായ മലപ്പുറം നിലമ്പൂർ ചോക്കാട് മേഖലയിൽ ദുരന്തനിവാരണ സേനയുടെ പ്രത്യേക സംഘത്തെ വിന്യസിക്കാൻ മുഖ്യമന്ത്രി അടിയന്തര നിർദേശം നൽകി. സംസ്ഥാനത്ത് വിവിധ ജില്ലകളിലുണ്ടായ മഴക്കെടുതിയിൽ ആറു പേരാണ് മരിച്ചത്. കോട്ടയം, ഇടുക്കി, മലപ്പുറം ജില്ലകളിലായാണ് മരണം സംഭവിച്ചത്.
by Midhun HP News | Sep 21, 2026 | Latest News, കേരളം
മലപ്പുറം: മലപ്പുറം ചോക്കാട് പൂക്കോട്ടുപാടം ടി കെ നഗറിലുണ്ടായ മലവെള്ളപ്പാച്ചിലില്‍ കാണാതായ മൂന്നുപേരുടെ മൃതദേഹം കൂടി കണ്ടെടുത്തു. ഇതോടെ മരണം അഞ്ചായി. പൊട്ടിക്കല്‍ ഭാഗത്തു നിന്നാണ് തിരച്ചിലില്‍ മൃതദേഹം കണ്ടെത്തിയത്. കാണാതായ ഒരാള്‍ക്കായി പുഴയില്‍ തിരച്ചില്‍ തുടരുകയാണ്. ഒരു സ്ത്രീ ഉള്‍പ്പെടെ ആറു പേരാണ് അപകടത്തില്‍പ്പെട്ടത്.
ഇന്നലെ കണ്ടെത്തിയ രണ്ടു മൃതദേഹങ്ങള്‍ ജില്ലാ ആശുപത്രിയിലേക്ക് മാറ്റി. മലവെള്ളപ്പാച്ചിലില്‍ അപകടത്തില്‍പ്പെട്ടവരില്‍ അഞ്ചുപേര്‍ പുറത്തു നിന്നും വന്നവരാണെന്നും, ഒരു സ്ത്രീ മാത്രമാണ് പ്രദേശവാസിയായിട്ടുള്ളതെന്നും മന്ത്രി വ്യക്തമാക്കി. ടികെ കോളനി വെളുത്തേടത്ത് സഞ്ജയ് ദാസിന്റെ ഭാര്യ സജിത (26) യാണ് പുഴക്കടവില്‍ വസ്ത്രം അലക്കി കൊണ്ടിരിക്കെ ഒഴുക്കില്‍പ്പെട്ടത്.
ഇതോടെ സംസ്ഥാനത്ത് കോട്ടയം, ഇടുക്കി, മലപ്പുറം ജില്ലകലിലുണ്ടായ വിവിധ മഴക്കെടുതികളില്‍ മരണം ഒമ്പതായി ഉയര്‍ന്നു. വാഗമണ്‍ റോഡില്‍ വേലത്തുശ്ശേരിയില്‍ മണ്ണിടിച്ചിലില്‍ വിനോദസഞ്ചാരി മരിച്ചു. വാഹനത്തിന് മുകളിലേക്ക് മണ്ണിടിഞ്ഞ് വീണ് തമിഴ്നാട് സ്വദേശിയായ സംഗീതയാണ് മരിച്ചത്. അടിമാലിയില്‍ മണ്ണിടിച്ചില്‍ സാധ്യത കണക്കിലെടുത്ത് അഞ്ചു കുടുംബങ്ങളെ മാറ്റിപാര്‍പ്പിച്ചു.
മണ്ണിടിച്ചിലിന്റെ സാഹചര്യത്തില്‍ ഇടുക്കിയില്‍ മലയോര മേഖലയില്‍ രാത്രികാല യാത്രാ നിരോധനം ഏര്‍പ്പെടുത്തി. വൈകീട്ട് ഏഴു മണി മുതല്‍ രാവിലെ 6 മണിവരെയാണ് നിയന്ത്രണം. സാഹസിക വിനോദ കേന്ദ്രങ്ങള്‍ അടയ്ക്കാനും നിര്‍ദേശം നല്‍കിയിട്ടുണ്ട്.
മണ്ണിടിച്ചില്‍ കണക്കിലെടുത്ത് പഴയ മൂന്നാറില്‍ ഗതാഗത നിയന്ത്രണം ഏര്‍പ്പെടുത്തി. പഴയ മൂന്നാറില്‍ നിന്ന് എത്തുന്ന വാഹനങ്ങള്‍ സിഎസ്‌ഐ പള്ളിക്ക് സമീപത്തുനിന്ന് ഗ്യാപ് റോഡിലേക്ക് പ്രവേശിച്ച്, പൊലീസ് സ്റ്റേഷന് സമീപത്തെ പാലം കടന്നാണ് മൂന്നാര്‍ ടൗണിലെത്തേണ്ടത്. മണ്ണിടിച്ചില്‍ സാധ്യത കണക്കിലെടുത്താണ് ഗതാഗത നിയന്ത്രണം. യാത്രക്കാര്‍ ജാഗ്രത പാലിക്കണമെന്ന് അധികൃതര്‍ നിര്‍ദേശിച്ചു.
by Midhun HP News | Sep 21, 2026 | Latest News, കേരളം
തിരുവനന്തപുരം: മോട്ടോര്‍ വാഹന വകുപ്പിലെ 60 സേവനങ്ങള്‍ തിങ്കളാഴ്ച മുതല്‍ ആധാര്‍ അധിഷ്ഠിതമാകും. ഡ്രൈവിങ് ലൈസന്‍സ്, വാഹന രജിസ്‌ട്രേഷന്‍ രേഖകള്‍ ആധാറുമായി ബന്ധിപ്പിച്ച അപേക്ഷകര്‍ക്കേ ഈ സൗകര്യം ലഭ്യമാകു. ഇടനിലക്കാരെ പൂര്‍ണമായി ഒഴിവാക്കുന്നതിന്റെ ഭാഗമായാണിത്.
അപേക്ഷ സമര്‍പ്പിക്കുമ്പോള്‍ ഉടമയുടെ ആധാര്‍ബന്ധിത മൊബൈല്‍ ഫോണിലേക്ക് വരുന്ന ഒടിപിയാണ് സുരക്ഷാക്രമീകരണം. വാഹനം വില്‍ക്കുമ്പോള്‍ വാങ്ങുന്നയാളും വില്‍ക്കുന്നയാളും ഇത്തരത്തില്‍ ആധാര്‍ ഒടിപി വച്ച് അപേക്ഷ പൂര്‍ത്തിയാക്കണം. ഓഫീസിലേക്ക് വരേണ്ടതില്ല.
ഇതേ രീതിയില്‍ ഓരോ സേവനങ്ങള്‍ക്കും ആധാര്‍ ഒടിപി നിര്‍ബന്ധമാക്കും. ഓഫീസ് നടപടി ക്രമങ്ങളും ലഘൂകരിച്ചതായി അധികൃതര്‍ വ്യക്തമാക്കി. അധാര്‍ ബന്ധിപ്പിച്ചിട്ടില്ലാത്തവര്‍ക്ക് അതിനുള്ള സൗകര്യമുണ്ടാകും. അതിനു ശേഷമേ അപേക്ഷ നല്‍കാന്‍ കഴിയു. അപേക്ഷകള്‍ക്ക് മുന്‍ഗണനാക്രമമുണ്ടാകും. ഉദ്യോഗസ്ഥരുടെ താത്പര്യത്തിനു അനുസരിച്ച് ഇടനിലക്കാരുടെ അപേക്ഷകള്‍ വേഗത്തില്‍ തീര്‍പ്പാക്കാന്‍ കഴിയില്ല. ഇടനിലക്കാരുടെ അപേക്ഷകള്‍ തിരിച്ചറിയാനും കഴിയില്ല.
നിലവില്‍ 21 സേവനങ്ങള്‍ മാത്രമാണ് ആധാര്‍ അധിഷ്ഠിതം. ഹിയറിങ് ഉള്‍പ്പെടെ ഓഫീസുകളില്‍ ഹാജരാകേണ്ട അപേക്ഷകളില്‍ സമയം നിശ്ചയിക്കാന്‍ പ്രത്യേക പോര്‍ട്ടല്‍ നിലവില്‍ വരും. ഇതിലൂടെ അപേക്ഷകര്‍ക്ക് സൗകര്യപ്രദമായ സമയം തിരഞ്ഞെടുക്കാം.
Recent Comments