by Midhun HP News | Sep 21, 2026 | Latest News, കേരളം
തിരുവനന്തപുരം: സംസ്ഥാനത്ത് മഴ കനത്ത സാഹചര്യത്തിൽ സ്ഥിതിഗതികൾ മണിക്കൂർ അടിസ്ഥാനത്തിൽ വിലയിരുത്താൻ മുഖ്യമന്ത്രി വി ഡി സതീശൻ നിർദ്ദേശം നൽകി. ജില്ലകളിലെ സ്ഥിതിഗതികൾ വിലയിരുത്തി, ആവശ്യമെങ്കിൽ ഒഴിപ്പിക്കൽ നടപടി അടക്കം സ്വീകരിക്കാൻ കലക്ടർമാരോട് നിർദ്ദേശിച്ചിട്ടുണ്ട്.
മുഖ്യമന്ത്രിയുടെ നിർദേശത്തിന്റെ അടിസ്ഥാനത്തിൽ ദുരന്തനിവാരണ അതോറിറ്റി കമ്മീഷണർ വിഗ്നേശ്വരി ഐ എ എസ് ഇടുക്കി, കോട്ടയം ജില്ലാ കലക്ടർമാരുടെ യോഗം വിളിച്ചുചേർത്ത് സ്ഥിതിഗതികൾ വിലയിരുത്തി. കാലാവസ്ഥ സംബന്ധിച്ച് ഇടുക്കി, കോട്ടയം ജില്ലകളിൽ എസ്എംഎസ് അലർട്ടുകൾ നൽകിയിട്ടുണ്ട്.
മലവെള്ളപ്പാച്ചിലുണ്ടായ മലപ്പുറം നിലമ്പൂർ ചോക്കാട് മേഖലയിൽ ദുരന്തനിവാരണ സേനയുടെ പ്രത്യേക സംഘത്തെ വിന്യസിക്കാൻ മുഖ്യമന്ത്രി അടിയന്തര നിർദേശം നൽകി. സംസ്ഥാനത്ത് വിവിധ ജില്ലകളിലുണ്ടായ മഴക്കെടുതിയിൽ ആറു പേരാണ് മരിച്ചത്. കോട്ടയം, ഇടുക്കി, മലപ്പുറം ജില്ലകളിലായാണ് മരണം സംഭവിച്ചത്.
by Midhun HP News | Sep 21, 2026 | Latest News, കേരളം
മലപ്പുറം: മലപ്പുറം ചോക്കാട് പൂക്കോട്ടുപാടം ടി കെ നഗറിലുണ്ടായ മലവെള്ളപ്പാച്ചിലില്‍ കാണാതായ മൂന്നുപേരുടെ മൃതദേഹം കൂടി കണ്ടെടുത്തു. ഇതോടെ മരണം അഞ്ചായി. പൊട്ടിക്കല്‍ ഭാഗത്തു നിന്നാണ് തിരച്ചിലില്‍ മൃതദേഹം കണ്ടെത്തിയത്. കാണാതായ ഒരാള്‍ക്കായി പുഴയില്‍ തിരച്ചില്‍ തുടരുകയാണ്. ഒരു സ്ത്രീ ഉള്‍പ്പെടെ ആറു പേരാണ് അപകടത്തില്‍പ്പെട്ടത്.
ഇന്നലെ കണ്ടെത്തിയ രണ്ടു മൃതദേഹങ്ങള്‍ ജില്ലാ ആശുപത്രിയിലേക്ക് മാറ്റി. മലവെള്ളപ്പാച്ചിലില്‍ അപകടത്തില്‍പ്പെട്ടവരില്‍ അഞ്ചുപേര്‍ പുറത്തു നിന്നും വന്നവരാണെന്നും, ഒരു സ്ത്രീ മാത്രമാണ് പ്രദേശവാസിയായിട്ടുള്ളതെന്നും മന്ത്രി വ്യക്തമാക്കി. ടികെ കോളനി വെളുത്തേടത്ത് സഞ്ജയ് ദാസിന്റെ ഭാര്യ സജിത (26) യാണ് പുഴക്കടവില്‍ വസ്ത്രം അലക്കി കൊണ്ടിരിക്കെ ഒഴുക്കില്‍പ്പെട്ടത്.
ഇതോടെ സംസ്ഥാനത്ത് കോട്ടയം, ഇടുക്കി, മലപ്പുറം ജില്ലകലിലുണ്ടായ വിവിധ മഴക്കെടുതികളില്‍ മരണം ഒമ്പതായി ഉയര്‍ന്നു. വാഗമണ്‍ റോഡില്‍ വേലത്തുശ്ശേരിയില്‍ മണ്ണിടിച്ചിലില്‍ വിനോദസഞ്ചാരി മരിച്ചു. വാഹനത്തിന് മുകളിലേക്ക് മണ്ണിടിഞ്ഞ് വീണ് തമിഴ്നാട് സ്വദേശിയായ സംഗീതയാണ് മരിച്ചത്. അടിമാലിയില്‍ മണ്ണിടിച്ചില്‍ സാധ്യത കണക്കിലെടുത്ത് അഞ്ചു കുടുംബങ്ങളെ മാറ്റിപാര്‍പ്പിച്ചു.
മണ്ണിടിച്ചിലിന്റെ സാഹചര്യത്തില്‍ ഇടുക്കിയില്‍ മലയോര മേഖലയില്‍ രാത്രികാല യാത്രാ നിരോധനം ഏര്‍പ്പെടുത്തി. വൈകീട്ട് ഏഴു മണി മുതല്‍ രാവിലെ 6 മണിവരെയാണ് നിയന്ത്രണം. സാഹസിക വിനോദ കേന്ദ്രങ്ങള്‍ അടയ്ക്കാനും നിര്‍ദേശം നല്‍കിയിട്ടുണ്ട്.
മണ്ണിടിച്ചില്‍ കണക്കിലെടുത്ത് പഴയ മൂന്നാറില്‍ ഗതാഗത നിയന്ത്രണം ഏര്‍പ്പെടുത്തി. പഴയ മൂന്നാറില്‍ നിന്ന് എത്തുന്ന വാഹനങ്ങള്‍ സിഎസ്‌ഐ പള്ളിക്ക് സമീപത്തുനിന്ന് ഗ്യാപ് റോഡിലേക്ക് പ്രവേശിച്ച്, പൊലീസ് സ്റ്റേഷന് സമീപത്തെ പാലം കടന്നാണ് മൂന്നാര്‍ ടൗണിലെത്തേണ്ടത്. മണ്ണിടിച്ചില്‍ സാധ്യത കണക്കിലെടുത്താണ് ഗതാഗത നിയന്ത്രണം. യാത്രക്കാര്‍ ജാഗ്രത പാലിക്കണമെന്ന് അധികൃതര്‍ നിര്‍ദേശിച്ചു.
by Midhun HP News | Sep 21, 2026 | Latest News, കേരളം
തിരുവനന്തപുരം: മോട്ടോര്‍ വാഹന വകുപ്പിലെ 60 സേവനങ്ങള്‍ തിങ്കളാഴ്ച മുതല്‍ ആധാര്‍ അധിഷ്ഠിതമാകും. ഡ്രൈവിങ് ലൈസന്‍സ്, വാഹന രജിസ്‌ട്രേഷന്‍ രേഖകള്‍ ആധാറുമായി ബന്ധിപ്പിച്ച അപേക്ഷകര്‍ക്കേ ഈ സൗകര്യം ലഭ്യമാകു. ഇടനിലക്കാരെ പൂര്‍ണമായി ഒഴിവാക്കുന്നതിന്റെ ഭാഗമായാണിത്.
അപേക്ഷ സമര്‍പ്പിക്കുമ്പോള്‍ ഉടമയുടെ ആധാര്‍ബന്ധിത മൊബൈല്‍ ഫോണിലേക്ക് വരുന്ന ഒടിപിയാണ് സുരക്ഷാക്രമീകരണം. വാഹനം വില്‍ക്കുമ്പോള്‍ വാങ്ങുന്നയാളും വില്‍ക്കുന്നയാളും ഇത്തരത്തില്‍ ആധാര്‍ ഒടിപി വച്ച് അപേക്ഷ പൂര്‍ത്തിയാക്കണം. ഓഫീസിലേക്ക് വരേണ്ടതില്ല.
ഇതേ രീതിയില്‍ ഓരോ സേവനങ്ങള്‍ക്കും ആധാര്‍ ഒടിപി നിര്‍ബന്ധമാക്കും. ഓഫീസ് നടപടി ക്രമങ്ങളും ലഘൂകരിച്ചതായി അധികൃതര്‍ വ്യക്തമാക്കി. അധാര്‍ ബന്ധിപ്പിച്ചിട്ടില്ലാത്തവര്‍ക്ക് അതിനുള്ള സൗകര്യമുണ്ടാകും. അതിനു ശേഷമേ അപേക്ഷ നല്‍കാന്‍ കഴിയു. അപേക്ഷകള്‍ക്ക് മുന്‍ഗണനാക്രമമുണ്ടാകും. ഉദ്യോഗസ്ഥരുടെ താത്പര്യത്തിനു അനുസരിച്ച് ഇടനിലക്കാരുടെ അപേക്ഷകള്‍ വേഗത്തില്‍ തീര്‍പ്പാക്കാന്‍ കഴിയില്ല. ഇടനിലക്കാരുടെ അപേക്ഷകള്‍ തിരിച്ചറിയാനും കഴിയില്ല.
നിലവില്‍ 21 സേവനങ്ങള്‍ മാത്രമാണ് ആധാര്‍ അധിഷ്ഠിതം. ഹിയറിങ് ഉള്‍പ്പെടെ ഓഫീസുകളില്‍ ഹാജരാകേണ്ട അപേക്ഷകളില്‍ സമയം നിശ്ചയിക്കാന്‍ പ്രത്യേക പോര്‍ട്ടല്‍ നിലവില്‍ വരും. ഇതിലൂടെ അപേക്ഷകര്‍ക്ക് സൗകര്യപ്രദമായ സമയം തിരഞ്ഞെടുക്കാം.
by Midhun HP News | Sep 21, 2026 | Latest News, കേരളം
കൊച്ചി: സിഎംആര്‍എല്‍- എക്‌സാലോജിക് സാമ്പത്തിക ഇടപാടു കേസില്‍ മുന്‍ മുഖ്യമന്ത്രി പിണറായി വിജയനെ സമ്മര്‍ദ്ദത്തിലാക്കി ഡയറക്ടര്‍ ജനറല്‍ ഓഫ് പ്രോസിക്യൂഷന്റെ നിയമോപദേശം. എന്‍ഫോഴ്സ്മെന്റ് ഡയറക്ടറേറ്റ് കൈമാറിയ കേസിന്റെ വസ്തുതകളും സാഹചര്യങ്ങളും പരിശോധിച്ചതില്‍ നിന്ന്, 2017 മാര്‍ച്ച് 4-നും 2019 മെയ് 18-നും ഇടയില്‍ വ്യാജ കരാറിന്റെ മറവില്‍ കൊച്ചിന്‍ മിനറല്‍സ് ആന്‍ഡ് റൂട്ടൈല്‍ ലിമിറ്റഡില്‍ (CMRL) നിന്ന് മകള്‍ ടി. വീണ വഴി 3.28 കോടി രൂപയുടെ സാമ്പത്തിക നേട്ടം പിണറായി വിജയന്‍ കൈവരിച്ചതായി സംശയലേശമന്യേ തെളിയിക്കപ്പെട്ടിട്ടുണ്ടെന്ന്, ഡിജിപി ടി ആസിഫലി നിയമോപദേശത്തില്‍ വ്യക്തമാക്കുന്നു.
ഈ തുക പിണറായി വിജയന്റെ അറിയപ്പെടുന്ന വരുമാന സ്രോതസ്സുകള്‍ക്ക് ആനുപാതികമല്ലെന്ന് നിയമോപദേശത്തില്‍ പറയുന്നു. കൂടാതെ, 1988-ലെ അഴിമതി നിരോധന നിയമത്തിലെ (PC Act) സെക്ഷന്‍ 13(1)(b) പ്രകാരം പിണറായിയും വീണയും വിചാരണ നേരിടാന്‍ ബാധ്യസ്ഥരാണെന്നും നിയമോപദേശത്തില്‍ വ്യക്തമാക്കുന്നു. കൃത്യം നടന്ന കാലയളവ് അഴിമതി നിരോധന നിയമത്തിലെ ഭേദഗതി നടന്ന 2018 ജൂലൈ 26-ന് മുമ്പും ശേഷവും ആയതിനാല്‍, ഭേദഗതിക്ക് മുമ്പും ശേഷവും ബാധകമായ ശിക്ഷാ വ്യവസ്ഥകള്‍ ഉചിതമായി പ്രയോഗിക്കാവുന്നതാണെന്നും നിയമോപദേശത്തില്‍ പറയുന്നു.
അന്ന് മുഖ്യമന്ത്രിയായിരുന്ന പിതാവിന് വേണ്ടി വീണ കൈക്കൂലിയോ നിയമവിരുദ്ധമായ പ്രതിഫലമോ കൈപ്പറ്റി എന്നത് ശക്തമായ വാക്കാലുള്ള മൊഴിയാല്‍ പ്രഥമദൃഷ്ട്യാ വ്യക്തമാക്കപ്പെട്ടിട്ടുണ്ട്. രേഖാമൂലവും, ഡിജിറ്റല്‍ തെളിവുകളും ഇടക്കാല സെറ്റില്‍മെന്റ് ബോര്‍ഡിന്റെ കണ്ടെത്തലുകളെ ശക്തിപ്പെടുത്തുന്നുണ്ട്. ഇത്തരം സാഹചര്യങ്ങളില്‍, അഴിമതി നിരോധന നിയമത്തിലെ സെക്ഷന്‍ 20 പ്രകാരം, കൈക്കൂലിപ്പണം വീണ തന്റെ പിതാവിന് വേണ്ടി, അദ്ദേഹത്തിന്റെ പ്രതിനിധിയായി നിയമവിരുദ്ധമായി കൈപ്പറ്റിയതാണെന്ന് അനുമാനിക്കാവുന്നതാണ്. നിയമോപദേശത്തില്‍ വ്യക്തമാക്കുന്നു.
നിയമപരമായി തനിക്ക് ലഭിക്കാന്‍ അര്‍ഹതയില്ലാത്ത 3,28,01,000 രൂപ വീണ സിഎംആര്‍എല്ലില്‍ (CMRL) നിന്ന് കൈപ്പറ്റി എന്നത് വസ്തുതയാണ്. ഇതു കൈക്കൂലിയല്ലെന്ന് ഖണ്ഡിക്കാന്‍ അവ്യക്തമായ വിശദീകരണങ്ങള്‍ മതിയാകുന്നതല്ലെന്നും ഡിജിപി നിയമോപദേശത്തില്‍ സൂചിപ്പിക്കുന്നു.
റിയാസിനെതിരെയും നിയമനടപടി സ്വീകരിക്കാം
സിഎംആര്‍എല്‍ കേസില്‍ മുന്‍മന്ത്രിയും വീണയുടെ ഭര്‍ത്താവുമായ മുഹമ്മദ് റിയാസിനെതിരെയും നിയമനടപടി സ്വീകരിക്കാവുന്നതാണെന്ന് ഡിജിപി നിയമോപദേശത്തില്‍ വ്യക്തമാക്കി. 2019 ജനുവരി 26-ന് ആദായനികുതി നിയമത്തിലെ 132(4)ാം വകുപ്പ് പ്രകാരം രേഖപ്പെടുത്തിയ സിഎംആര്‍എല്‍ (CMRL) എംഡി എസ് എന്‍ ശശിധരന്‍ കര്‍ത്തയുടെ മൊഴി ഈ നിഗമനത്തെ സാധൂകരിക്കുന്നതായി ഡിജിപി പറയുന്നു.
‘കരാര്‍ പ്രകാരമുള്ള സേവനദാതാക്കള്‍ ഞങ്ങളുടെ പ്രതീക്ഷയ്‌ക്കൊത്തുള്ള ജോലിയോ സേവനമോ, സോഫ്റ്റ്വെയര്‍ പരിപാലനമോ, കണ്‍സള്‍ട്ടന്‍സിയോ മറ്റേതെങ്കിലും തരത്തിലുള്ള സേവനമോ ഇതുവരെ നല്‍കിയിട്ടില്ല. എന്നിരുന്നാലും, കരാര്‍ പ്രകാരമുള്ള പ്രതിമാസ പണം നല്‍കിവരുന്നുണ്ട്.’ എന്നാണ് ശശിധരന്‍ കര്‍ത്തയുടെ മൊഴിയെന്ന് ഡിജിപി ചൂണ്ടിക്കാട്ടുന്നു.
ശശിധരന്‍ കര്‍ത്തയുടെ മൊഴിയുടെ അടിസ്ഥാനത്തില്‍, അന്നത്തെ മുഖ്യമന്ത്രിയായിരുന്ന പിതാവ് വഴി ഔദ്യോഗിക കൃത്യനിര്‍വ്വഹണത്തില്‍ ക്രമക്കേട് വരുത്തുന്നതിനായി വീണ കൈക്കൂലിത്തുക കൈപ്പറ്റി എന്ന് അനുമാനിക്കാവുന്നതാണ്. ഒരു പൊതുപ്രവര്ത്തകന് മൂന്നാമതൊരാളിലൂടെയാണ് കൈക്കൂലി വാങ്ങിയതെങ്കില്‍ പോലും, ആ പൊതുപ്രവര്ത്തകന് വിചാരണ നേരിടാന്‍ ബാധ്യസ്ഥനാണെന്നും നിയമോപദേശത്തില്‍ ഡിജിപി വ്യക്തമാക്കുന്നു.
ഒരു പൊതുപ്രവര്ത്തകന് കൈക്കൂലി നല്‍കിയെന്നാരോപിക്കപ്പെടുന്ന സാഹചര്യത്തില്‍, കമ്പനീസ് നിയമപ്രകാരം രൂപീകരിച്ച സിഎംആര്‍എല്‍ (CMRL) കമ്പനിയും നിയമനടപടിക്ക് വിധേയമാകാന്‍ ബാധ്യസ്ഥമാണ്. 2018-ലെ 16-ാം നിയമപ്രകാരം ഭേദഗതി വരുത്തിയ 1988-ലെ അഴിമതി നിരോധന നിയമത്തിലെ 13(1)(b) വകുപ്പ് പ്രകാരം, വീണയുടെ ഭര്‍ത്താവും അന്നത്തെ മന്ത്രിയുമായിരുന്ന പി എ മുഹമ്മദ് റിയാസിനെതിരെയും നടപടിയെടുക്കാം. വരുമാന സ്രോതസ്സുകള്‍ക്ക് ആനുപാതികമല്ലാത്ത സാമ്പത്തിക ആസ്തി കൈവശം വെച്ചെന്നാരോപിച്ച് റിയാസിനെതിരെ നിയമനടപടി സ്വീകരിക്കാവുന്നതാണ്. ഡയറക്ടര്‍ ജനറല്‍ ഓഫ് പ്രോസിക്യൂഷന്‍ നിയമോപദേശത്തില്‍ വ്യക്തമാക്കുന്നു.
by Midhun HP News | Sep 20, 2026 | Latest News, കേരളം
കോഴിക്കോട്: മലബാറിലെ പ്രധാന റഫറൽ ആതുരാലയമായ കോഴിക്കോട് ഗവൺമെന്റ് മെഡിക്കൽ കോളജ് ആശുപത്രിയിൽ പ്രിയപ്പെട്ടവരുടെ വിയോഗത്തിന് പിന്നാലെ ഉറ്റവർ നേരിടുന്നത് മണിക്കൂറുകൾ നീണ്ട ദുരിത കാത്തിരിപ്പ്. വടകര, കൊയിലാണ്ടി, താമരശ്ശേരി തുടങ്ങിയ വിദൂര താലൂക്കുകളിൽ നിന്നുൾപ്പെടെ പ്രതിദിനം 18 മുതൽ 22 വരെ മൃതദേഹങ്ങളാണ് പോസ്റ്റ്‌മോർട്ടത്തിനായി ഇവിടെ എത്തുന്നത്.
എന്നാൽ, രാവിലെ 10 മുതൽ വൈകിട്ട് 4 മണി വരെ മാത്രമായി പോസ്റ്റ്‌മോർട്ടം സമയം ചുരുക്കിയിരിക്കുന്നതിനാൽ മൃതദേഹം വിട്ടുകിട്ടാൻ ബന്ധുക്കൾ അടുത്ത ദിവസം വരെ കാത്തിരിക്കേണ്ടി വരുന്നു. ജീവനക്കാരുടെ ക്ഷാമവും നടപടിക്രമങ്ങളിലെ കാലതാമസവുമാണ് ഈ വലിയ പ്രതിസന്ധിക്ക് പ്രധാന കാരണം. പലപ്പോഴും പൊലീസ് ഇൻക്വസ്റ്റ് നടപടികൾ പൂർത്തിയാകുന്നത് ഉച്ചയ്ക്ക് ശേഷമാണ്. ഔദ്യോഗിക രേഖകൾ മോർച്ചറി അധികൃതരുടെ കൈകളിൽ എത്തുമ്പോഴേക്കും വൈകിട്ട് നാല് മണി കഴിയും. അതോടെ പോസ്റ്റ്‌മോർട്ടം സ്വാഭാവികമായും അടുത്ത ദിവസത്തെ ഉച്ചയ്ക്ക് ശേഷത്തേക്ക് മാറ്റിവെക്കപ്പെടുകയാണ്.
പോസ്റ്റ്‌മോർട്ടം വൈകുന്നതോടെ വിദൂര ദേശങ്ങളിൽ നിന്നെത്തുന്ന പാവപ്പെട്ട കുടുംബങ്ങൾ അന്ത്യകർമ്മങ്ങൾ പോലും യഥാസമയം നടത്താനാകാതെ മണിക്കൂറുകളോളം ആശുപത്രിക്കു മുന്നിൽ കണ്ണീരോടെ കാത്തിരിക്കേണ്ടി വരുന്നു. മൃതദേഹങ്ങൾ രാത്രി മുഴുവൻ സൂക്ഷിക്കേണ്ടി വരുന്നത് മോർച്ചറികളിൽ സ്ഥലപരിമിതിക്കും തുടർന്നുള്ള ദിവസങ്ങളിൽ തിരക്കിനും ഇടയാക്കുന്നുണ്ട്. ഈ വിഷയത്തിൽ ശാശ്വത പരിഹാരം ആവശ്യപ്പെട്ട് പ്രമുഖ പൊതുപ്രവർത്തകൻ ഷൗക്കത്ത് മൂഴിക്കൽ ഹൈക്കോടതിയിൽ പൊതുതാൽപ്പര്യ ഹർജി ഫയൽ ചെയ്തു. രാത്രികാല പോസ്റ്റ്‌മോർട്ടം നടപ്പാക്കാൻ മുൻപ് തീരുമാനമുണ്ടായിട്ടും ഉദ്യോഗസ്ഥതല അനാസ്ഥയാണ് പദ്ധതി മുടക്കുന്നതെന്ന് അദ്ദേഹം ചൂണ്ടിക്കാട്ടുന്നു.
“2014-ൽ ഉമ്മൻ ചാണ്ടി സർക്കാരിന്റെ കാലത്ത് കോഴിക്കോട്, തിരുവനന്തപുരം, കോട്ടയം മെഡിക്കൽ കോളേജുകളിൽ രാത്രികാല പോസ്റ്റ്‌മോർട്ടം നടപ്പാക്കാൻ നിയമസഭയിൽ പ്രമേയം പാസാക്കിയതാണ്. ഇതിന്റെ രേഖകൾ നിലവിലുണ്ട്. എന്നാൽ കാസർകോട് ജനറൽ ആശുപത്രിയിലും മഞ്ചേരി മെഡിക്കൽ കോളേജിലും മാത്രമാണ് നിലവിൽ ഈ സൗകര്യം പരിമിതമായ തോതിലെങ്കിലും പ്രവർത്തിക്കുന്നത്,” ഷൗക്കത്ത് മൂഴിക്കൽ പറഞ്ഞു. പോസ്റ്റ്‌മോർട്ടം നടത്തുന്നതിന് സ്വാഭാവിക പകൽ വെളിച്ചം വേണമെന്ന പതിറ്റാണ്ടുകൾ പഴക്കമുള്ള സാങ്കേതിക തടസ്സങ്ങൾക്ക് ആധുനിക ഡിജിറ്റൽ ഇൻഫ്രാസ്ട്രക്ചറും അത്യാധുനിക സർജിക്കൽ ലൈറ്റിംഗ് സംവിധാനങ്ങളും ഉള്ള ഈ കാലഘട്ടത്തിൽ പ്രസക്തിയില്ല. എന്നിട്ടും ഭരണപരമായ മെല്ലെപ്പോക്കും മോർച്ചറി അറ്റൻഡർമാരുടെ കുറവുമാണ് ഈ പരിഷ്കാരം നടപ്പാക്കുന്നതിന് തടസ്സമായി നിൽക്കുന്നത്.
“അടുത്തിടെ നഗരത്തിലെ ആശുപത്രിയിൽ രാവിലെ 10 മണിക്ക് മരിച്ച ഒരു രോഗിയുടെ ഇൻക്വസ്റ്റ് പൂർത്തിയായത് ഉച്ചകഴിഞ്ഞ് 3.30-നാണ്. റിപ്പോർട്ട് 3.50-ന് മുൻപ് കൈമാറിയിട്ടും സമയം കഴിഞ്ഞു എന്ന കാരണത്താൽ പോസ്റ്റ്‌മോർട്ടം അടുത്ത ദിവസത്തേക്ക് മാറ്റി. മരിച്ച ഒരു വ്യക്തിക്ക് അടിസ്ഥാനപരമായ അന്തസ്സ് ലഭിക്കേണ്ടതുണ്ട്. എന്നാൽ ഇവിടെ ആ പരിഗണന പൂർണ്ണമായും അവഗണിക്കപ്പെടുകയാണ്,” അദ്ദേഹം ചൂണ്ടിക്കാട്ടി. ആദ്യഘട്ടത്തിൽ പോസ്റ്റ്‌മോർട്ടം സമയം രാത്രി എട്ട് മണിവരെയെങ്കിലും ദീർഘിപ്പിക്കണമെന്നും, തുടർന്ന് ഇത് 24 മണിക്കൂറും പ്രവർത്തിക്കുന്ന പൂർണ്ണതോതിലുള്ള സംവിധാനമാക്കി മാറ്റണമെന്നും ഹർജിയിൽ ആവശ്യപ്പെടുന്നു.
by Midhun HP News | Sep 20, 2026 | Latest News, കേരളം
കണ്ണൂർ: വളപട്ടണം പൊലീസ് സ്റ്റേഷൻ പരിധിയിൽ 2012-ൽ നടന്ന കൊലപാതകക്കേസിൽ വർഷങ്ങളായി പോലീസിനെ വെട്ടിച്ച് ഒളിവിൽ കഴിഞ്ഞിരുന്ന കുപ്രസിദ്ധ പിടികിട്ടാപ്പുള്ളി ഒടുവിൽ പിടിയിൽ. കേസിലെ ഒന്നാം പ്രതിയായ സി. ആനന്ദിനെ (41) കോയമ്പത്തൂർ കാങ്കയംപാളയത്തു നിന്നാണ് കണ്ണൂർ സിറ്റി പോലീസിന്റെ പ്രത്യേക അന്വേഷണ സംഘം അതിസാഹസികമായി പിടികൂടിയത്. കണ്ണൂർ സിറ്റി പോലീസിന്റെ ‘ഓപ്പറേഷൻ ഗ്രിപ്പ്’ പദ്ധതിയുടെ ഭാഗമായാണ് അറസ്റ്റ്.
2012 ഡിസംബർ രണ്ടിന് വൈകിട്ട് 7.15-ഓടെ അഴീക്കോട് പഞ്ചായത്തിലെ കാക്കമ്പാലം ഇസ്മായിൽ ക്വാർട്ടേഴ്സിന് സമീപമായിരുന്നു നാടിനെ നടുക്കിയ കൊലപാതകം നടന്നത്. വ്യക്തിവൈരാഗ്യത്തെ തുടർന്ന് മണികണ്ഠൻ എന്നയാളെ തടിക്കഷ്ണം കൊണ്ട് തലയ്ക്കടിച്ച് കൊലപ്പെടുത്തിയ കേസിലാണ് ആനന്ദ് പ്രതിയായത്. സംഭവത്തിന് തൊട്ടുപിന്നാലെ വളപട്ടണം പൊലീസ് ഇയാളെ അറസ്റ്റ് ചെയ്തിരുന്നുവെങ്കിലും പിന്നീട് ജാമ്യത്തിലിറങ്ങി നാടുവിടുകയായിരുന്നു. തുടർന്ന് കോടതി ഇയാളെ പിടികിട്ടാപ്പുള്ളിയായി പ്രഖ്യാപിച്ചു.
മൊബൈൽ ഫോൺ ഒഴിവാക്കി ഒളിവുജീവിതം; തമിഴ്നാട്ടിലും കൊലപാതകം
സൈബർ നിരീക്ഷണത്തിൽ കുടുങ്ങാതിരിക്കാൻ മൊബൈൽ ഫോണുകൾ ഒഴിവാക്കിയായിരുന്നു പ്രതിയുടെ ഒളിവുജീവിതം. ഒരു സ്ഥലത്തും സ്ഥിരമായി തങ്ങാതെ തമിഴ്‌നാട്ടിലെ വിവിധ ഭാഗങ്ങളിലായി ഒളിത്താവളങ്ങൾ നിരന്തരം മാറ്റിക്കൊണ്ടിരുന്നതിനാൽ വർഷങ്ങളോളം പൊലീസിന് ഇയാളെ കണ്ടെത്താനായിരുന്നില്ല. ഒളിവിൽ കഴിയുന്നതിനിടയിൽ 2021-ൽ കോയമ്പത്തൂർ ജില്ലയിലെ സൂലൂർ പൊലീസ് സ്റ്റേഷൻ പരിധിയിൽ രജിസ്റ്റർ ചെയ്ത മറ്റൊരു കൊലപാതകക്കേസിലും ആനന്ദ് പ്രതിയായിട്ടുണ്ടെന്ന് അന്വേഷണത്തിൽ വ്യക്തമായി. കോയമ്പത്തൂർ കാങ്കയംപാളയത്തെ ഒരു വീട്ടിൽ പ്രതി സ്ഥിരമായി എത്താറുണ്ടെന്ന രഹസ്യവിവരത്തെത്തുടർന്ന് അന്വേഷണ സംഘം അവിടെ നിരീക്ഷണം നടത്തി സാന്നിധ്യം സ്ഥിരീകരിക്കുകയായിരുന്നു. തുടർന്ന് പഴുതടച്ച നീക്കത്തിലൂടെയാണ് ഇയാളെ കീഴ്പ്പെടുത്തിയത്.
‘ഓപ്പറേഷൻ ഗ്രിപ്പ്’ വഴി വലവിരിച്ച് പൊലീസ്
കണ്ണൂർ റേഞ്ച് ഡിഐജി കെ. കാർത്തിക്കിന്റെ മേൽനോട്ടത്തിലും കണ്ണൂർ സിറ്റി പൊലീസ് കമ്മീഷണർ വിജയ ഭാരത് റെഡ്ഡിയുടെ നിർദ്ദേശപ്രകാരവും രൂപീകരിച്ച പ്രത്യേക അന്വേഷണ സംഘമാണ് മാസങ്ങൾ നീണ്ട പരിശ്രമത്തിനൊടുവിൽ പ്രതിയെ കുടുക്കിയത്. നാർക്കോട്ടിക് സെൽ എസിപി വി.വി. മനോജ്, കണ്ണൂർ ടൗൺ എസിപി ആസാദ് എന്നിവരുടെ നേതൃത്വത്തിലുള്ള സംഘമാണ് തമിഴ്‌നാട്ടിലെത്തി പ്രതിയെ അറസ്റ്റ് ചെയ്തത്. തുടർനടപടികൾ പൂർത്തിയാക്കിയ ശേഷം പ്രതിയെ കോടതിയിൽ ഹാജരാക്കും.
Recent Comments