by Midhun HP News | Sep 22, 2026 | Latest News, കേരളം
തിരുവനന്തപുരം: കടുത്ത വൈദ്യുതിക്ഷാമം നേരിടുന്ന പശ്ചാത്തലത്തില്‍ കേരളത്തില്‍ ആണവ നിലയം സ്ഥാപിക്കുന്നത് സംസ്ഥാന സര്‍ക്കാരിന്റെ പരിഗണനയില്‍. വൈദ്യുതി പ്രതിസന്ധിയാണ് ഏറെക്കാലമായി അകറ്റിനിര്‍ത്തിയിരുന്നതും രാഷ്ട്രീയമായി ഏറെ പ്രശ്‌നസാധ്യതയുള്ളതുമായ ഒരു സാധ്യത പരിശോധിക്കാന്‍ സര്‍ക്കാര്‍ നിര്‍ബന്ധിതമായിരിക്കുന്നത്. ആണവ പദ്ധതിയുമായി മുന്നോട്ട് പോകുന്നതിന് മുന്‍പ് രാഷ്ട്രീയ സമവായം ഉണ്ടാക്കുന്നതിന്റെ ഭാഗമായി, വിവിധ രാഷ്ട്രീയ പാര്‍ട്ടി നേതൃത്വങ്ങളുമായി ഈ നിര്‍ദ്ദേശം ചര്‍ച്ച ചെയ്യാന്‍ യുഡിഎഫ് സര്‍ക്കാര്‍ ആലോചിക്കുന്നു.
രാഷ്ട്രീയ പാര്‍ട്ടി നേതാക്കള്‍ക്കിടയില്‍ സമവായം ഉണ്ടായാല്‍ കേരളത്തില്‍ ആണവ നിലയം സ്ഥാപിക്കുന്നതുമായി സര്‍ക്കാര്‍ മുന്നോട്ട് പോകുമെന്ന് വൈദ്യുതി മന്ത്രി സണ്ണി ജോസഫ് ദി ന്യൂ ഇന്ത്യന്‍ എക്‌സ്പ്രസിനോട് പറഞ്ഞു. വര്‍ദ്ധിച്ചുവരുന്ന വൈദ്യുതിക്ഷാമവും അടിയന്തര വൈദ്യുതി കരാറുകള്‍ക്കുള്ള തടസ്സങ്ങളും കണക്കിലെടുക്കുമ്പോള്‍, സംസ്ഥാനം എല്ലാ സാധ്യതകളും പരിശോധിക്കേണ്ടതുണ്ട്. എല്ലാ വിഭാഗങ്ങളേയും വിശ്വാസത്തിലെടുത്തു കൊണ്ടായിരിക്കും സര്‍ക്കാര്‍ അന്തിമ തീരുമാനം കൈക്കൊള്ളുകയെന്നും മന്ത്രി സണ്ണി ജോസഫ് പറഞ്ഞു.
ആണവ നിലയം എന്ന നിര്‍ദേശം മുമ്പും ഉയര്‍ന്നു വന്നിരുന്നെങ്കിലും, രാഷ്ട്രീയ സമ്മര്‍ദ്ദവും സാമൂഹിക-പരിസ്ഥിതി സംഘടനകളുടെ എതിര്‍പ്പും കാരണം സര്‍ക്കാരുകള്‍ക്ക് മുന്നോട്ടു പോകാനായിരുന്നില്ല. മറ്റ് സംസ്ഥാനങ്ങളില്‍ നിന്നും ഏജന്‍സികളില്‍ നിന്നും വൈദ്യുതി ലഭിക്കുന്നതിനുള്ള പരിമിതികള്‍, കാലാവസ്ഥ വ്യതിയാനം, കാലവര്‍ഷത്തിലെ മഴക്കുറവ് തുടങ്ങിയവയെല്ലാം സര്‍ക്കാരിനെ, വൈദ്യുതിയുടെ ബദല്‍ സ്രോതസ്സുകള്‍ തേടാന്‍ പ്രേരിപ്പിക്കുന്നു.
‘ആണവ നിലയം സ്ഥിതി ചെയ്യുന്ന സംസ്ഥാനം അവിടെ ഉല്‍പ്പാദിപ്പിക്കുന്ന വൈദ്യുതിയില്‍ കൂടുതല്‍ വിഹിതം ആവശ്യപ്പെട്ടാല്‍ അത് ആ സംസ്ഥാനത്തിന് നല്‍കണമെന്ന വ്യവസ്ഥയോടെയുള്ള പദ്ധതികള്‍ കേന്ദ്ര സര്‍ക്കാര്‍ കൊണ്ടുവരുന്നുണ്ട്. ‘ മന്ത്രി സണ്ണി ജോസഫ് വ്യക്തമാക്കി.
‘ആണവ നിലയം- ഗുണദോഷങ്ങള്‍ ചര്‍ച്ച ചെയ്യാന്‍ സര്‍ക്കാര്‍ തയ്യാര്‍’
ധൃതിപിടിച്ച തീരുമാനങ്ങളെടുക്കുന്നതിന് പകരം, ആണവ നിലയം സ്ഥാപിക്കുന്നതിലെ ഗുണദോഷങ്ങള്‍ ചര്‍ച്ച ചെയ്യാന്‍ സര്‍ക്കാര്‍ തയ്യാറാണ്. അതേസമയം, പുതിയ ആണവനിലയം സ്ഥാപിച്ചാല്‍ തമിഴ്നാട്ടിലെ കൂടംകുളം പോലുള്ള ആണവ നിലയങ്ങളില്‍ നിന്നും മറ്റ് സംസ്ഥാനങ്ങളില്‍ നിന്നും വൈദ്യുതി ലഭ്യമാക്കുന്നതിനുള്ള കേരളത്തിന്റെ സാധ്യതകളെ പ്രതികൂലമായി ബാധിച്ചേക്കാമെന്നും മന്ത്രി സണ്ണി ജോസഫ് കൂട്ടിച്ചേര്‍ത്തു.
കാസര്‍കോട് ചീമേനിയില്‍ ആണവ നിലയം സ്ഥാപിക്കാനുള്ള നിര്‍ദ്ദേശം മുമ്പ് സര്‍ക്കാര്‍ തലത്തില്‍ സജീവ ചര്‍ച്ചയായിരുന്നു. എന്നാല്‍ പ്രതിഷേധങ്ങളെത്തുടര്‍ന്ന് പദ്ധതിയുമായി മുന്നോട്ട് പോകില്ലെന്ന് സര്‍ക്കാര്‍ വ്യക്തമാക്കുകയായിരുന്നു. അയല്‍ സംസ്ഥാനമായ കര്‍ണാടകയില്‍ നിന്ന് വൈദ്യുതി വാങ്ങുന്നതുമായി ബന്ധപ്പെട്ട് സണ്ണി ജോസഫ് ഞായറാഴ്ച കര്‍ണാടക വൈദ്യുതി മന്ത്രി കെ ജെ ജോര്‍ജുമായി ചര്‍ച്ച നടത്തിയിരുന്നു. വൈകീട്ടത്തെ പീക്ക് അവേഴ്‌സില്‍ തങ്ങളുടെ അധിക വൈദ്യുതി ശരാശരി യൂണിറ്റിന് 10 രൂപ നിരക്കില്‍ കര്‍ണാടക ദേശീയ ഗ്രിഡിന് വില്‍ക്കുന്നുണ്ട്. തിരക്ക് കുറഞ്ഞ സമയങ്ങളിലും യൂണിറ്റിന് 10 രൂപ നിരക്കില്‍ വൈദ്യുതി വാങ്ങണമെന്നാണ് കര്‍ണാടക ആവശ്യപ്പെടുന്നത്. അത് സംസ്ഥാനത്തിന് പ്രായോഗികമല്ലെന്ന് ഉദ്യോഗസ്ഥര്‍ ചൂണ്ടിക്കാട്ടുന്നു.
മുന്‍കാലങ്ങളിലെ നിര്‍ദ്ദേശങ്ങള്‍
1970-കളുടെ അവസാനം, എറണാകുളം ജില്ലയിലെ ഭൂതത്താന്‍കെട്ടില്‍ ഒരു ആണവനിലയം സ്ഥാപിക്കാനുള്ള നിര്‍ദ്ദേശം ഉയര്‍ന്നു വന്നിരുന്നു. എന്നാല്‍ ശക്തമായ എതിര്‍പ്പിനെത്തുടര്‍ന്ന് അന്നത്തെ സര്‍ക്കാര്‍ ആ പദ്ധതി ഉപേക്ഷിച്ചു.
1980-കളുടെ മധ്യത്തില്‍ കാസര്‍കോട് ജില്ലയിലെ പെരിങ്ങോമില്‍ ആണവനിലയം സ്ഥാപിക്കാന്‍ നീക്കം നടത്തി. 1990 ലെ കെ കരുണാകരന്‍ സര്‍ക്കാര്‍ ഇതിനുള്ള നടപടികളുടെ വേഗം കൂട്ടി. എന്നാല്‍ ശക്തമായ എതിര്‍പ്പിനെത്തുടര്‍ന്ന് ആ പദ്ധതിയും പിന്നീട് ഉപേക്ഷിച്ചു.
ഏതാനും വര്‍ഷം മുമ്പാണ്, കാസര്‍കോട് ജില്ലയിലെ ചീമേനിയില്‍ 440 മെഗാവാട്ട് ശേഷിയുള്ള ആണവ വൈദ്യുതി പദ്ധതി നടപ്പിലാക്കാനുള്ള മറ്റൊരു നിര്‍ദ്ദേശം ഉയര്‍ന്നത്. ഇതിനായി പ്രാഥമിക പഠനങ്ങള്‍ നടത്തുകയും ചെയ്തിരുന്നു. എന്നാല്‍ പ്രാദേശിക തലത്തില്‍ ആണവ നിലയത്തിനെതിരെ ശക്തമായ എതിര്‍പ്പുയര്‍ന്നു. തുടര്‍ന്ന് പദ്ധതിയുമായി മുന്നോട്ട് പോകുന്നില്ലെന്ന് വൈദ്യുതി മന്ത്രി അടുത്തിടെ വ്യക്തമാക്കിയിരുന്നു.
by Midhun HP News | Sep 22, 2026 | Latest News, കേരളം
തിരുവനന്തപുരം: സംസ്ഥാനത്ത് ഇന്നും ഒറ്റപ്പെട്ട മഴയ്ക്ക് സാധ്യത. ഒരു ജില്ലകളിലും പ്രത്യേക മഴ മുന്നറിയിപ്പില്ല. തൃശൂർ, മലപ്പുറം ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ നേരിയ മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ട്. ആലപ്പുഴ, കോട്ടയം, എറണാകുളം, കോഴിക്കോട്, കണ്ണൂർ, കാസർകോട് ജില്ലകളിൽ നേരിയ മഴയ്ക്കും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
മധ്യ പടിഞ്ഞാറൻ ബംഗാൾ ഉൾക്കടലിലും സമീപ മധ്യകിഴക്കൻ ബംഗാൾ ഉൾക്കടലിനും മുകളിൽ ശക്തി കൂടിയ ന്യൂനമർദം സ്ഥിതി ചെയ്യുന്നു. ഇത് പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് മധ്യ പടിഞ്ഞാറൻ ബംഗാൾ ഉൾക്കടലിൽ തീവ്ര ന്യൂനമർദമായി ശക്തിപ്രാപിക്കാൻ സാധ്യതയുണ്ട്. തുടർന്നുള്ള 24 മണിക്കൂറിനുള്ളിൽ മധ്യ പടിഞ്ഞാറൻ ബംഗാൾ ഉൾക്കടലിലും സമീപ വടക്കുപടിഞ്ഞാറൻ ബംഗാൾ ഉൾക്കടലിലുമായി അതിതീവ്ര ന്യൂനമർദമായി വീണ്ടും ശക്തിപ്രാപിച്ചേക്കും.
തുടർന്നും പടിഞ്ഞാറ്-വടക്കുപടിഞ്ഞാറ് ദിശയിൽ സഞ്ചരിച്ച് സെപ്റ്റംബർ 23-ന് രാവിലെ വടക്കൻ ആന്ധ്രപ്രദേശ്–തെക്കൻ ഒഡിഷ തീരങ്ങൾക്ക് സമീപം എത്താൻ സാധ്യതയുണ്ടെന്ന് കാലാവസ്ഥ വകുപ്പ് അറിയിച്ചു. മധ്യ തമിഴ്നാടിനും സമീപ പ്രദേശങ്ങൾക്കും മുകളിൽ സമുദ്രനിരപ്പിൽ നിന്ന് 4.5 മുതൽ 7.6 കിലോമീറ്റർ വരെ ഉയരത്തിൽ ചക്രവാതച്ചുഴി നിലനിൽക്കുന്നു.
കേരളം, തമിഴ്നാട്, തെക്കുപടിഞ്ഞാറൻ ബംഗാൾ ഉൾക്കടൽ എന്നിവിടങ്ങളിലൂടെയും തെക്കുകിഴക്കൻ അറബിക്കടലിൽ നിന്ന് ന്യൂനമർദ്ദ മേഖലയുമായി ബന്ധപ്പെട്ട മധ്യ തമിഴ്നാടിനും സമീപ പ്രദേശങ്ങൾക്കും മുകളിലുള്ള ചക്രവാതച്ചുഴിയുടെ കേന്ദ്രത്തിലൂടെയും പ്രസ്തുത ചക്രവാതച്ചുഴിയിലേക്ക് സമുദ്രനിരപ്പിൽ നിന്ന് 5.8 മുതൽ 7.6 കിലോമീറ്റർ വരെ ഉയരത്തിൽ ഒരു ന്യൂനമർദ്ദ പാത്തി നിലനിൽക്കുന്നു.
ഇതിന്റെ സ്വാധീനഫലമായി കേരളത്തിൽ സെപ്റ്റംബർ 25 വരെയുള്ള ദിവസങ്ങളിൽ നേരിയതോ മിതമായതോ ആയ മഴയ്ക്ക് സാധ്യത. സെപ്റ്റംബർ 23, 24 & 25 തീയതികളിൽ ഒറ്റപ്പെട്ട സ്ഥലങ്ങളിൽ ശക്തമായ മഴക്ക് സാധ്യത. സെപ്റ്റംബർ 22 ന് കേരളത്തിൽ ഒറ്റപ്പെട്ട സ്ഥലങ്ങളിൽ ഇടി മിന്നലിനും മണിക്കൂറിൽ 30 -40 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
by Midhun HP News | Sep 21, 2026 | Latest News, കേരളം
വേങ്ങോട്: വേങ്ങോട് മണ്ഡലം കോൺഗ്രസ്സ് കമ്മിറ്റിയുടെ ആഭിമുഖ്യത്തിൽ ശ്രീനാരായണ ഗുരുദേവ സമാധി ദിനത്തോട് അനുബന്ധിച്ച് ഗുരുദേവഅനുസ്‌മരണവും വേങ്ങോട് എസ് എൻ ഡി പി ശാഖാ മന്ദിരത്തിലെ ഗുരുദേവ ക്ഷേത്രത്തിലെ വിഗ്രഹത്തിൽ പുഷ്പാർച്ചനയും നടത്തി.
മണ്ഡലം പ്രസിഡൻ്റ് എം. ആർ. ഷാനവാസിൻ്റെ അദ്ധ്യക്ഷതയിൽ ഡി സി സി ജനറൽ സെക്രട്ടറി എസ്. കൃഷ്‌ണകുമാർ അനുസ്‌മരണ സമ്മേളനം ഉദ്ഘാടനം ചെയ്തു. പോത്തൻകോട് പഞ്ചായത്ത് യു ഡി എഫ് ചെയർമാൻ ആർ.എസ്. വിനോദ് മണി സ്വാഗതം പറഞ്ഞ യോഗത്തിൽ 939 നമ്പർ എസ് എൻ ഡി പി ശാഖാ സെക്രട്ടറി അനിരുദ്ധൻ അനുസ്‌മരണ പ്രഭാഷണം നടത്തി.
അഴൂർ മണ്ഡലം പ്രസിഡൻ്റ് എ.നിസാർ, വെമ്പായം ബ്ലോക്ക് കോൺഗ്രസ്സ് ജനറൽ സെക്രട്ടറി മഞ്ഞമല ബാബു, മണ്ഡലം കോൺഗ്രസ്സ് കമ്മിറ്റി വൈസ് പ്രസിഡൻ്റ് എ.ഷംനാദ്, ജനറൽ സെക്രട്ടറിമാരായ ത്യാഗരാജൻ, ഹക്കിം അടപ്പിനകം, മുജീബ് കല്ലുവെട്ടി, ഭാരവാഹികളായ നാരായണൻ നായർ, ഭവാനന്ദൻ, ശശിധരൻ നായർ, വേങ്ങോട് മുരളി, മഹിളാ കോൺഗ്രസ്സ് നേതാവ് അഡ്വ. മഞ്ജു ചന്ദ്രൻ, വേങ്ങോട് ശശി തുടങ്ങിയവർ നേതൃത്വം നൽകി.
by Midhun HP News | Sep 21, 2026 | Latest News, കേരളം
നഗോയ: ഏഷ്യന്‍ ഗെയിംസ് പുരുഷ കബഡിയില്‍ കിരീടം നിലനിര്‍ത്താനുള്ള ഇന്ത്യയുടെ പോരാട്ടത്തിന് തകര്‍പ്പന്‍ തുടക്കം. ഗ്രൂപ്പ് എയിലെ ആദ്യ മത്സരത്തില്‍ ആതിഥേയരായ ജപ്പാനെതിരെ ഏകപക്ഷീയമായ വിജയം സ്വന്തമാക്കിയാണ് നിലവിലെ ചാംപ്യന്മാരുടെ കുതിപ്പ്. ടോക്കായി സിറ്റിസണ്‍സ് ജിംനേഷ്യത്തില്‍ നടന്ന മത്സരത്തില്‍ 49-24 എന്ന സ്‌കോറിനാണ് ഇന്ത്യ ജപ്പാനു മേല്‍ മിന്നും വിജയം നേടിയത്.
സുനില്‍ കുമാറിന്റെ നേതൃത്വത്തിലിറങ്ങിയ ഇന്ത്യന്‍ സംഘം മത്സരത്തിന്റെ തുടക്കം മുതല്‍ തന്നെ ആധിപത്യം പുലര്‍ത്തി. അശു മാലികക്കിന്റെ സൂപ്പര്‍ റെയ്ഡ് ഇന്ത്യക്ക് മികച്ച തുടക്കമാണ് നല്‍കിയത്. സ്റ്റാര്‍ റെയ്ഡര്‍മാരായ അര്‍ജുന്‍ ദേശ്വാള്‍, ദേവാങ്ക് ദലാല്‍, അയാന്‍ ലോഹ്ചബ് എന്നിവരും ഇന്ത്യന്‍ മുന്നേറ്റത്തിന് പിന്തുണ നല്‍കി.
ആദ്യ പകുതിയില്‍ തന്നെ ഇന്ത്യ ജപ്പാനെ സമ്മര്‍ദ്ദത്തിലാഴ്ത്തി. ജപ്പാന്റെ റെയ്ഡിങ് നിരയെ വരിഞ്ഞുമുറുക്കിയ ഇന്ത്യ, ആദ്യ പകുതിയില്‍ മൂന്ന് തവണയാണ് ആതിഥേയരെ ഓള്‍ഔട്ട് ആക്കിയത്. ആദ്യ പകുതി അവസാനിച്ചപ്പോള്‍ 31-9 എന്ന വലിയ ലീഡോടെ ഇന്ത്യ വ്യക്തമായ മുന്‍തൂക്കം നേടി. ജപ്പാന് ആദ്യ പകുതിയില്‍ 5 ടച്ച് പോയിന്റുകളും 4 ബോണസ് പോയിന്റുകളും മാത്രമാണ് നേടാനായത്.
രണ്ടാം പകുതിയിലും ഇന്ത്യ തങ്ങളുടെ കരുത്തുറ്റ പ്രതിരോധം തുടര്‍ന്നു. നാലാം തവണയും ജപ്പാനെ ഓള്‍ ഔട്ട് ആക്കിയ ഇന്ത്യ, സമയോചിതമായ നീക്കങ്ങളിലൂടെ ജയമുറപ്പിച്ചു. തിരിച്ചുവരാനുള്ള ജപ്പാന്റെ ശ്രമങ്ങളെ ഇന്ത്യന്‍ പ്രതിരോധം സമര്‍ത്ഥമായി പ്രതിരോധിച്ചു. 49ല്‍ 36 പോയിന്റും റെയ്ഡുകളിലൂടെയും ഡിഫന്‍സിലൂടെയും നേരിട്ട് നേടിയാണ് ഇന്ത്യ ഗംഭീര ജയം സ്വന്തമാക്കിയത്.
by Midhun HP News | Sep 21, 2026 | Latest News, കേരളം
തിരുവനന്തപുരം: കെ.എസ്.ആർ.ടി.സിയുടെ പ്രിയദർശിനി പദ്ധതിക്ക് നാളെ 100 ദിവസം പൂർത്തിയാകും. ഇതിന്റെ ഭാഗമായി സംസ്ഥാനത്തെ എല്ലാ കെ.എസ്.ആർ.ടി.സി ഡിപ്പോകളിലും വനിതകൾക്ക് സാരി വിതരണം ചെയ്യും.
രാവിലെ 10ന് തിരുവനന്തപുരം തമ്പാനൂർ കെ.എസ്.ആർ.ടി.സി ടെർമിനലിൽ നടക്കുന്ന ചടങ്ങിൽ മന്ത്രി സി.പി. ജോൺ സാരി വിതരണത്തിന്റെ ഉദ്ഘാടനം നിർവഹിക്കും. പ്രിയദർശിനി പദ്ധതി ആരംഭിച്ച് നൂറ് ദിവസം പൂർത്തിയാകുന്ന സാഹചര്യത്തിലാണ് പ്രത്യേക പരിപാടി സംഘടിപ്പിക്കുന്നത്. പദ്ധതിയുടെ ഭാഗമായി വനിതാ ജീവനക്കാർക്കും യാത്രക്കാരുമായി ബന്ധപ്പെട്ട സേവന മേഖലയിലെ വനിതകൾക്കും സാരി വിതരണം ചെയ്യുന്നതിനാണ് തീരുമാനം.
പ്രിയദർശിനി പദ്ധതി മികച്ച രീതിയിൽ മുന്നോട്ടുപോകുകയാണെന്ന് മന്ത്രി സി.പി. ജോൺ പറഞ്ഞു. നിലവിൽ ഓർഡിനറി ബസുകളിൽ മാത്രമാണ് പദ്ധതി നടപ്പാക്കുന്നത്. ഈ രീതിയിൽ തന്നെ പദ്ധതി തുടരാനാണ് തീരുമാനമെന്നും മന്ത്രി വ്യക്തമാക്കി.
by Midhun HP News | Sep 21, 2026 | Latest News, കേരളം
തിരുവനന്തപുരം: ബംഗാള്‍ ഉള്‍ക്കടലില്‍ സ്ഥിതി ചെയ്യുന്ന ശക്തി കൂടിയ ന്യൂനമര്‍ദ്ദത്തിന്റെ സ്വാധീനഫലമായി സംസ്ഥാനത്ത് വെള്ളിയാഴ്ച വരെ ശക്തമായ മഴയ്ക്ക് സാധ്യത. ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍ ജില്ലകളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പ് അറിയിച്ചു. ജാഗ്രതയുടെ ഭാഗമായി ഈ ജില്ലകളില്‍ കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചു.
മധ്യ പടിഞ്ഞാറന്‍ ബംഗാള്‍ ഉള്‍ക്കടലിലും സമീപ മധ്യകിഴക്കന്‍ ബംഗാള്‍ ഉള്‍ക്കടലിനും മുകളിലായാണ് ശക്തി കൂടിയ ന്യൂനമര്‍ദം സ്ഥിതി ചെയ്യുന്നത്. അടുത്ത 24 മണിക്കൂറിനുള്ളില്‍ പടിഞ്ഞാറ്-വടക്കുപടിഞ്ഞാറ് ദിശയില്‍ സഞ്ചരിച്ച് മധ്യ പടിഞ്ഞാറന്‍ ബംഗാള്‍ ഉള്‍ക്കടലില്‍ തീവ്ര ന്യൂനമര്‍ദമായി ശക്തിപ്രാപിക്കാന്‍ സാധ്യതയുണ്ട്. തുടര്‍ന്നുള്ള 24 മണിക്കൂറിനുള്ളില്‍ മധ്യ പടിഞ്ഞാറന്‍ ബംഗാള്‍ ഉള്‍ക്കടലിലും സമീപ വടക്കുപടിഞ്ഞാറന്‍ ബംഗാള്‍ ഉള്‍ക്കടലിലുമായി അതിതീവ്ര ന്യൂനമര്‍ദമായി ഇത് വീണ്ടും ശക്തിപ്രാപിച്ചേക്കാം. തുടര്‍ന്നുള്ള മണിക്കൂറുകളില്‍ പടിഞ്ഞാറ്-വടക്കുപടിഞ്ഞാറ് ദിശയില്‍ സഞ്ചരിച്ച് സെപ്റ്റംബര്‍ 23-ന് രാവിലെ വടക്കന്‍ ആന്ധ്രപ്രദേശ്- തെക്കന്‍ ഒഡിഷ തീരങ്ങള്‍ക്ക് സമീപം എത്താനും സാധ്യതയെന്നും കാലാവസ്ഥ വകുപ്പ് അറിയിച്ചു.
മധ്യ തമിഴ്നാടിനും സമീപ പ്രദേശങ്ങള്‍ക്കും മുകളില്‍ സമുദ്രനിരപ്പില്‍ നിന്ന് 4.5 മുതല്‍ 7.6 കിലോമീറ്റര്‍ വരെ ഉയരത്തില്‍ ചക്രവാതച്ചുഴിയും നിലനില്‍ക്കുന്നുണ്ട്. കേരളം, തമിഴ്നാട്, തെക്കുപടിഞ്ഞാറന്‍ ബംഗാള്‍ ഉള്‍ക്കടല്‍ എന്നിവിടങ്ങളിലൂടെയും തെക്കുകിഴക്കന്‍ അറബിക്കടലില്‍ നിന്ന് ന്യൂനമര്‍ദ്ദ മേഖലയുമായി ബന്ധപ്പെട്ട മധ്യ തമിഴ്നാടിനും സമീപ പ്രദേശങ്ങള്‍ക്കും മുകളിലുള്ള ചക്രവാതച്ചുഴിയുടെ കേന്ദ്രത്തിലൂടെയും ചക്രവാതച്ചുഴിയിലേക്ക് സമുദ്രനിരപ്പില്‍ നിന്ന് 5.8 മുതല്‍ 7.6 കിലോമീറ്റര്‍ വരെ ഉയരത്തില്‍ ഒരു ന്യൂനമര്‍ദ്ദ പാത്തി നിലനില്‍ക്കുന്നുണ്ട്.
ഇതിന്റെയെല്ലാം ഫലമായാണ് സംസ്ഥാനത്ത് വരുംദിവസങ്ങളില്‍ മഴ ലഭിക്കുക എന്നും കാലാവസ്ഥ വകുപ്പ് അറിയിച്ചു. മഴയ്‌ക്കൊപ്പം ഇടിമിന്നലിനും 40 കിലോമീറ്റര്‍ വേഗത്തില്‍ ശക്തമായ കാറ്റിനും സാധ്യതയുള്ളതിനാല്‍ ജാഗ്രത പാലിക്കണമെന്നും മുന്നറിയിപ്പില്‍ പറയുന്നു. കേരള – കര്‍ണാടക – ലക്ഷദ്വീപ് തീരങ്ങളില്‍ ഇന്നും നാളെയും (ചൊവ്വാഴ്ച) മത്സ്യബന്ധനത്തിന് പോകാന്‍ പാടില്ലെന്നും കേന്ദ്ര കാലാവസ്ഥ വകുപ്പ് അറിയിച്ചു.
ബുധനാഴ്ച തിരുവനന്തപുരം, കൊല്ലം, പത്തനംതിട്ട ജില്ലകളിലും വ്യാഴാഴ്ച മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലും വെള്ളിയാഴ്ച തിരുവനന്തപുരം, കൊല്ലം, പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്‍ത്ഥമാക്കുന്നത്.
Recent Comments