by Midhun HP News | Sep 10, 2026 | Latest News, കേരളം
തൃശൂർ: നഗരത്തിൽ മദ്യലഹരിയിൽ കാറുകൾ തടഞ്ഞ് പരാക്രമം കാട്ടിയ യുവതി അറസ്റ്റിൽ. ചാഴൂർ സ്വദേശി റഹ്മത്ത് (21) ആണ് അറസ്റ്റിലായത്. യുവതിയുടെ ആക്രമണത്തിൽ പൊലീസ് ഉദ്യോഗസ്ഥയ്ക്ക് പരിക്കേറ്റു. യുവതിക്കൊപ്പമുണ്ടായിരുന്ന ആൺ സുഹൃത്ത് പൊലീസിനെ കണ്ടതോടെ ഓടി രക്ഷപെട്ടു.
ഇന്നലെ രാത്രിയിലാണ് സംഭവം. മദ്യലഹരിയിലായിരുന്ന റഹ്മത്ത് നടുറോഡിൽ വാഹനങ്ങൾ തടഞ്ഞ് പണം ആവശ്യപ്പെടുകയായിരുന്നു. പൊലീസ് എത്തി ഇവരെ കസ്റ്റഡിയിലെടുത്ത് വൈദ്യപരിശോധനയ്ക്കായി കൊണ്ടുപോകുന്നതിനിടെ എഎസ്ഐ: കലയെ യുവതി കടിച്ചു പരിക്കേൽപ്പിച്ചു. സംഭവത്തിൽ ഈസ്റ്റ് പൊലീസ് കേസെടുത്തു.
by Midhun HP News | Sep 10, 2026 | Latest News, കേരളം
ഇരിട്ടി: ക്ലാസ് മുറിയിൽ അസുഖബാധിതയായി കുഴഞ്ഞുവീണ ആറാം ക്ലാസ് വിദ്യാർഥിനിയോട് മനുഷ്യത്വരഹിതമായി പെരുമാറുകയും അധിക്ഷേപിക്കുകയും ചെയ്തെന്ന പരാതിയിൽ അധ്യാപികയെ സ്കൂൾ മാനേജ്മെന്റ് താൽക്കാലികമായി ജോലിയിൽ നിന്ന് മാറ്റിനിർത്തി. ഇരിട്ടി കുന്നോത്ത് സെന്റ് ജോസഫ്സ് യുപി സ്കൂളിലെ അധ്യാപിക സിസ്റ്റർ ലിന്റോ ജോസിനെതിരെയാണ് മാനേജ്മെൻറ് അച്ചടക്ക നടപടി സ്വീകരിച്ചത്. സ്കൂളിന്റെ നിയന്ത്രണ ചുമതലയുള്ള തലശ്ശേരി അതിരൂപത കോർപ്പറേറ്റ് എജ്യുക്കേഷണൽ ഏജൻസിയാണ് അധ്യാപികയെ സർവീസിൽ നിന്ന് മാറ്റിനിർത്താൻ ഉത്തരവിട്ടത്. സംഭവത്തെക്കുറിച്ച് വിശദമായി പരിശോധിക്കാൻ പ്രത്യേക അന്വേഷണ സമിതിയെയും മാനേജ്മെന്റ് നിയോഗിച്ചിട്ടുണ്ട്.
രക്തത്തിലെ സോഡിയം അളവിലെ വ്യതിയാനം കാരണം സ്ഥിരമായി മരുന്ന് കഴിച്ചുവരുന്ന കുട്ടിയാണ് ബുധനാഴ്ച ഉച്ചയോടെ ക്ലാസ് മുറിയിൽ തലകറങ്ങി വീണത്. കുട്ടിയുടെ അസുഖവിവരം സ്കൂൾ അധികൃതർക്ക് നേരത്തെ തന്നെ അറിയാവുന്നതുമായിരുന്നു. കുട്ടി ക്ലാസിൽ കുഴഞ്ഞുവീണ വിവരം സഹപാഠികൾ പ്രധാനാധ്യാപകനെയും ക്ലാസ് ടീച്ചറെയും അറിയിക്കാൻ എത്തിയപ്പോൾ, ‘കുട്ടി എന്തുകൊണ്ട് നേരിട്ടെത്തി വിവരം പറഞ്ഞില്ല’ എന്ന മനുഷ്യത്വരഹിതമായ മറുപടിയാണ് ക്ലാസ് ടീച്ചർ നൽകിയതെന്ന് കുട്ടികൾ പറയുന്നു.
തുടർന്ന് ക്ലാസിലെത്തിയ സിസ്റ്റർ ലിന്റോ ജോസ്, നിലത്തു കിടക്കുകയായിരുന്ന കുട്ടിയോട് ‘നീയിതുവരെ ചത്തില്ലേ’ എന്ന് ചോദിച്ചതായും വീണുകിടന്ന കുട്ടിയെ ചവിട്ടിയതായും രക്ഷിതാക്കൾ മാനേജ്മെന്റിന് നൽകിയ പരാതിയിൽ വ്യക്തമാക്കുന്നു.
വിവരമറിഞ്ഞ് രക്ഷിതാക്കൾ സ്കൂളിലെത്തി ചോദ്യം ചെയ്തപ്പോൾ അധ്യാപിക ആരോപണങ്ങൾ പൂർണ്ണമായി നിഷേധിക്കുകയായിരുന്നു. ഇതോടെ രോഷാകുലരായ രക്ഷിതാക്കൾ സംഘടിച്ച് സ്കൂളിലെത്തി ഉപരോധവും പ്രതിഷേധവും സംഘടിപ്പിച്ചു. സിസ്റ്റർ ലിന്റോയെ സർവീസിൽ നിന്ന് പൂർണ്ണമായി പിരിച്ചുവിടണമെന്ന് ആവശ്യപ്പെട്ടായിരുന്നു പ്രതിഷേധം.
by Midhun HP News | Sep 10, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ വര്‍ധന. ഇന്ന് പവന് ഒറ്റയടിക്ക് 880 രൂപയാണ് കൂടിയത്. 1,14,040 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 110 രൂപയാണ് കൂടിയത്. 14,255 രൂപയാണ് ഒരു ഗ്രാം സ്വര്‍ണത്തിന്റെ വില.
പശ്ചിമേഷ്യന്‍ സംഘര്‍ഷത്തെ തുടര്‍ന്ന് ഉയര്‍ന്നുനില്‍ക്കുന്ന എണ്ണവില അടക്കമുള്ള ഘടകങ്ങളാണ് സ്വര്‍ണവിലയെ സ്വാധീനിക്കുന്നത്. ഇത് പണപ്പെരുപ്പനിരക്ക് ഉയരാന്‍ കാരണമാക്കുമെന്നതിനാല്‍ പലിനിരക്ക് വര്‍ധിപ്പിക്കാന്‍ അമേരിക്കന്‍ കേന്ദ്രബാങ്ക് തയ്യാറായേക്കുമെന്ന റിപ്പോര്‍ട്ടുകളും സ്വര്‍ണവിലയില്‍ പ്രതിഫലിക്കുന്നുണ്ട്. പലിശനിരക്ക് ഉയര്‍ത്തുന്നത് സ്വര്‍ണത്തിന്റെ ആകര്‍ഷണം കുറയ്ക്കാന്‍ ഇടയാക്കുമെന്നാണ് വിപണി വിദഗ്ധരുടെ വിലയിരുത്തല്‍.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Sep 10, 2026 | Latest News, കേരളം
കണ്ണൂര്‍: മലയാളത്തിന്റെ പ്രിയപ്പെട്ട എഴുത്തുകാരന്‍ മണിയമ്പത്ത് മുകുന്ദന് എന്ന എം മുകന്ദന് വ്യാഴാഴ്ച 84ാം പിറന്നാള്‍. മയ്യഴിയെന്ന കുഞ്ഞു ദേശത്തിന്റെ ആത്മസ്പന്ദനങ്ങളെ ലോകമെമ്പാടുമുള്ള വായനാ സമൂഹത്തിന്റെ സംവേദന താളത്തോടു ചേര്‍ത്തുവച്ച എഴുത്തുകാരനാണ് മുകുന്ദന്.
എഴുത്തുകാരനും കുടുംബവും ഈ ദിവസങ്ങളില്‍ യാത്രയില്‍ ആയതിനാല്‍ ജന്മദിനത്തില്‍ പ്രത്യേക ആഘോഷങ്ങള്‍ ഒന്നുമില്ല. ‘മയ്യഴിപ്പുഴയുടെ തീരങ്ങളില്‍’ തുടങ്ങി ‘എയ്ഞ്ചല്‍ മേരിയിലേക്ക് നൂറുദിവസത്തില്‍’ എത്തി നില്‍ക്കുന്നതാണ് എം മുകുന്ദന്റെ സുദീര്‍ഘമായ എഴുത്തു ജീവിതം.
രചനയിലും പരിപ്രേക്ഷ്യത്തിലും ഏറ്റവും നവീനമായ ഭാവുകത്വ പരിണതിയെ ഏറ്റുവാങ്ങുകയും കാലത്തിനൊപ്പമോ ഒരുപക്ഷേ കാലത്തിനു മുമ്പേയോ സഞ്ചരിക്കുകയും ചെയ്യുന്നതാണ് മുകുന്ദന്റെ രചനകള്‍. അവ നാട്ടുഭാഷയുടെ വിശുദ്ധികൊണ്ടും പ്രമേയപരമായ പുതുമകൊണ്ടും ദര്‍ശനത്തിന്റെ മൗലികത കൊണ്ടും അദ്ഭുതകരമായ പാരായണക്ഷമതകൊണ്ടും മലയാളിക്ക് ഏറെ പ്രിയപ്പെട്ടതാണ്.
മൂന്ന് വര്‍ഷക്കാലം കേരള സാഹിത്യ അക്കാദമി പ്രസിഡന്റായിരുന്നു മുകുന്ദന്. ഭാര്യ: ശ്രീജ. മക്കള്‍: പ്രീതിഷ്, ഭാവന.
by Midhun HP News | Sep 10, 2026 | Latest News, കേരളം
ആപ്പിള്‍ തങ്ങളുടെ ആദ്യത്തെ ഫോള്‍ഡബിള്‍ സ്മാര്‍ട്ട്‌ഫോണായ ‘ഐഫോണ്‍ ഡ്യുവോ’ ആഗോളതലത്തില്‍ അവതരിപ്പിച്ചു. പോക്കറ്റില്‍ എളുപ്പത്തില്‍ ഒതുങ്ങുന്നതും അതേസമയം ഐപാഡിന് സമാനമായ വലിയ സ്‌ക്രീന്‍ അനുഭവം നല്‍കുന്നതുമായ രീതിയിലാണ് പുതിയ ഫോണിന്റെ രൂപകല്പന.
ഇന്ത്യയില്‍ ഇതുവരെ വിപണിയിലെത്തിയതില്‍വെച്ച് ഏറ്റവും വിലകൂടിയ സ്മാര്‍ട്ട്ഫോണാണ് ഐഫോണ്‍ ഡ്യൂവോ. 2,99,900 രൂപ മുതലാണ് ഇതിന്റെ പ്രാരംഭ വില ആരംഭിക്കുന്നത്. ഒക്ടോബര്‍ 23 മുതല്‍ ഈ ഫോണ്‍ ഉപയോക്താക്കള്‍ക്കായി വില്‍പ്പനയ്ക്ക് ലഭ്യമായിതുടങ്ങും.
മടക്കിവെക്കുമ്പോള്‍ പാസ്‌പോര്‍ട്ടിന് സമാനമായ വലിപ്പമുള്ളതിനാല്‍ ഒരു കൈകൊണ്ട് പിടിക്കാനും ഉപയോഗിക്കാനും വളരെ സൗകര്യപ്രദമാണ്. ഐഫോണുകളുടെ ചരിത്രത്തിലെ ഏറ്റവും വലിയ ഡിസ്പ്ലേയാണ്. ആപ്പിളിന്റെ ഇന്നേവരെയുള്ള ചരിത്രത്തില്‍ ഏറ്റവും വലിയ വഴിത്തിരിവായി വിശേഷിപ്പിക്കാവുന്ന ഒന്നാണ് കമ്പനിയുടെ ആദ്യ ഫോള്‍ഡബിള്‍ ഫോണായ ‘ഐഫോണ്‍ ഡ്യൂവോ’.
ഫോണിന്റെ ഉള്‍ഭാഗത്ത് 7.6 ഇഞ്ച് സൂപ്പര്‍ റെറ്റിന എക്‌സ്ടിആര്‍ ഡിസ്പ്ലേയും, പുറത്തുവശത്ത് 5.4 ഇഞ്ച് കവര്‍ സ്‌ക്രീനും നല്‍കിയിട്ടുണ്ട്. കൂടാതെ ഇതില്‍ ആപ്പിള്‍ പെന്‍സില്‍ ( പിന്തുണയും ഉള്‍പ്പെടുത്തിയിട്ടുണ്ട്. കൂടുതല്‍ കരുത്തുറ്റ പ്രോസസര്‍, മെച്ചപ്പെടുത്തിയ ക്യാമറ, മികച്ച ബാറ്ററി പ്രകടനം, പുതിയ എഐ സവിശേഷതകള്‍ എന്നിവയാണ് പുതിയ സീരീസിന്റെ പ്രധാന പ്രത്യേകതകള്‍. ആപ്പിളിന്റെ പുതിയ നീക്കങ്ങള്‍ ആഗോള സ്മാര്‍ട്ട്‌ഫോണ്‍ വിപണിയില്‍ ശ്രദ്ധേയമായ മാറ്റങ്ങള്‍ക്ക് വഴിയൊരുക്കുമെന്നാണ് സാങ്കേതിക വിദഗ്ധരുടെ വിലയിരുത്തല്‍.
റിഫ്‌ലക്ഷന്‍ കുറയ്ക്കാന്‍ പ്രത്യേക നാനോ-ടെക്‌സ്ചര്‍ ഫിനിഷും, കട്ടികൂടിയ പോളിമര്‍ ലെയറും, ഒഎല്‍ഇഡി പാനലിനു മുകളിലും താഴെയുമായി കരുത്തുറ്റ ഗ്ലാസും ഉള്‍പ്പെടുത്തിയിട്ടുണ്ട്. കൂടാതെ, സ്‌ക്രീന്‍ സുഗമമായി തുറക്കാനും അടയ്ക്കാനും സഹായിക്കുന്ന വേരിയബിള്‍ ടോര്‍ക്ക് ഹിഞ്ചും, യുഎസ്ബി-സി, ആപ്പിള്‍ പെന്‍സില്‍ പിന്തുണയും ഇതിലുണ്ട്. ക്യാമറ48 മെഗാപിക്‌സല്‍ ഫ്യൂഷന്‍ മെയിന്‍ ക്യാമറയും 48 മെഗാപിക്‌സല്‍ ഫ്യൂഷന്‍ അള്‍ട്രാ-വൈഡ് ക്യാമറയുമാണ് ഇതില്‍ നല്‍കിയിരിക്കുന്നത്. മെയിന്‍ ക്യാമറയില്‍ സീറോ ഷട്ടര്‍ ലാഗ്, 2ഃ ഒപ്റ്റിക്കല്‍ ക്വാളിറ്റി ടെലിഫോട്ടോ, സെന്‍സര്‍ ഷിഫ്റ്റ് ഒഐഎസ് (OIS), 4K 120fps വീഡിയോ റെക്കോഡിങ് എന്നിവ ലഭ്യമാണ്.
ഇന്റേണല്‍ സ്‌പേസ് പരമാവധി പ്രയോജനപ്പെടുത്താനായി ഐഫോണ്‍ ഡ്യുവോ പൂര്‍ണമായും ഇ-സിം (eSIM) മാത്രമായാണ് രൂപകല്പന ചെയ്തിരിക്കുന്നത്. ഫോണിന്റെ ഇരുവശത്തുമായി നല്‍കിയിരിക്കുന്ന രണ്ട് ബാറ്ററികളെ പ്രത്യേക സോഫ്റ്റ്വേര്‍ ഉപയോഗിച്ച് ഒരൊറ്റ ബാറ്ററി സിസ്റ്റമായി പ്രവര്‍ത്തിപ്പിക്കുന്നു. ഇന്നര്‍ ഡിസ്‌പ്ലേയില്‍ 31 മണിക്കൂര്‍വരെയും, ഔട്ടര്‍ ഡിസ്‌പ്ലേയില്‍ 44 മണിക്കൂര്‍വരെയും, രണ്ട് സ്‌ക്രീനുകളും ഒരുപോലെ ഉപയോഗിക്കുമ്പോള്‍ 24 മണിക്കൂര്‍വരെയും ബാറ്ററി ലൈഫ് ലഭിക്കും. വെറും 20 മിനിറ്റുകൊണ്ട് 50 ശതമാനം വരെ ചാര്‍ജ് ചെയ്യാന്‍ സാധിക്കുന്ന ഫാസ്റ്റ് ചാര്‍ജിങ് പിന്തുണയും ഇതിനുണ്ട്. മുന്‍ മേധാവി ടിം കുക്കിന്റെ സാന്നിധ്യത്തിലായിരുന്നു ജോണ്‍ ടേണസിന്റെ ആദ്യ പ്രധാന ഉല്‍പ്പന്ന അവതരണം.
by Midhun HP News | Sep 10, 2026 | Latest News, കേരളം
തിരുവനന്തപുരം: ഗുരുതര വൈദ്യുതി പ്രതിസന്ധി തുടരുന്നതിനാല്‍ സംസ്ഥാനത്ത് ഇന്ന് രാത്രിയിലും ഭാഗിക വൈദ്യുതി നിയന്ത്രണം തുടരുമെന്ന് കെഎസ്ഇബി. തുടര്‍ച്ചയായി പത്താം ദിവസമാണ് വൈദ്യുതി നിയന്ത്രണം ഏര്‍പ്പെടുത്തേണ്ടി വരുന്നത്. വൈകിട്ട് 6.30 മുതല്‍ പുലര്‍ച്ചെ ഒരു മണിവരെയുള്ള സമയത്താണ് നിയന്ത്രണം. ഒന്നിലേറെ തവണ പവര്‍ കട്ടുണ്ടാവുന്നത് തുടരാനാണ് സാധ്യത.
വൈദ്യുതി നിയന്ത്രിക്കുന്ന സമയം സംബന്ധിച്ച് മുന്‍കൂട്ടി അറിയിക്കുന്ന സംവിധാനം ഇന്ന് വൈകുന്നേരത്തോടെ ഏര്‍പ്പെടുത്തുമെന്നാണ് വൈദ്യുതി മന്ത്രി സണ്ണി ജോസഫ് അറിയിച്ചിട്ടുള്ളത്. ആവശ്യമായ വൈദ്യുതി ലഭിക്കാത്തതുകൊണ്ടാണു നിയന്ത്രണം വേണ്ടി വരുന്നതെന്നും അതു പരിഹരിക്കാനായി സര്‍ക്കാര്‍ എല്ലാ ശമങ്ങളും നടത്തുന്നുണ്ടെന്നും മന്ത്രി പറഞ്ഞു. ജനങ്ങളുടെ പ്രതിസന്ധി മനസ്സിലാക്കുന്നെന്നും സ്വിച്ചിട്ട പോലെ പരിഹരിക്കാന്‍ പറ്റാത്ത വിഷയമാണിതെന്നും ജനങ്ങള്‍ സഹകരിക്കണമെന്നുമായിരുന്നു മന്ത്രിയുടെ അഭ്യര്‍ഥന.
എല്‍ നിനോ പ്രതിഭാസത്തെ തുടര്‍ന്ന മഴ കുറയുകയും ചൂട് കൂടുകയുമാണ്. അതുകൊണ്ടു തന്നെ വൈദ്യുതി ഉല്‍പാദനം കുറയുകയും ഉപയോഗം ഗണ്യമായി കൂടുകയും ചെയ്തു. കഴിഞ്ഞ വര്‍ഷം സെപ്റ്റംബര്‍ മാസത്തില്‍ 3,794 മെഗാവാട്ടാണ് ഒരു ദിവസം വൈദ്യുതി ആവശ്യമായി വന്നത്. എന്നാല്‍ ഇന്നലെ 5200 മെഗാവാട്ടാണ് നമ്മുടെ ഉപയോഗം. നമ്മുടെ നല്‍കല്‍ ശേഷിയേക്കാള്‍ 900 മെഗാവാട്ടിന്റെ കുറവാണ് വന്നത്. അതുകൊണ്ടാണ് ഇപ്പോഴത്തെ പ്രതിസന്ധിയെന്നാണ് സര്‍ക്കാര്‍ പറയുന്നത്.
അതേസമയം, കനത്ത ചൂടിന് ആശ്വാസമായി സംസ്ഥാനത്ത് ഇന്നു മുതല്‍ വീണ്ടും മഴ ശക്തമാകുമെന്നാണ് കാലാവസ്ഥ വകുപ്പിന്റെ പ്രവചനം. ശക്തമായ മഴ കണക്കിലെടുത്ത് ആലപ്പുഴയിലും എറണാകുളത്തും യെല്ലോ അലര്‍ട് പ്രഖ്യാപിച്ചു. നാളെ പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും ശനിയാഴ്ച പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലും മഴ മുന്നറിയിപ്പുണ്ട്. ഈ ജില്ലകളില്‍ പരക്കെ മഴലഭിക്കും. ഒറ്റപ്പെട്ട ശക്തമായ മഴക്കും സാധ്യതയുണ്ട്. ആന്ധ്ര ഒഡീഷ തീരത്തിന് സമീപം ബംഗാള്‍ ഉള്‍ക്കടലില്‍ ന്യൂനമര്‍ദം രൂപമെടുക്കാനിടയുണ്ട്. ഇതിന്റെ സ്വാധീനത്തില്‍ കേരളത്തില്‍ കൂടുതല്‍ മഴ ലഭിച്ചേക്കുമെന്നാണ് കേന്ദ്രകാലാവസ്ഥ വകുപ്പിന്റെ പ്രവചനം
Recent Comments