by Midhun HP News | May 9, 2025 | Latest News, കേരളം
തിരുവനന്തപുരം: ഈ വര്ഷത്തെ എസ്എസ്എല്സി പരീക്ഷാഫലം ഇന്ന് പ്രഖ്യാപിക്കും. വൈകിട്ട് മൂന്നു മണിക്ക് വിദ്യാഭ്യാസ വകുപ്പ് മന്ത്രി വി ശിവന്കുട്ടിയാണ് പരീക്ഷാ ഫലം പ്രഖ്യാപിക്കുക. എസ്എസ്എല്സി ഫലത്തോടൊപ്പം റ്റിഎച്ച്എസ്എല്സി, എഎച്ച്എസ്എല്സി പരീക്ഷാഫലങ്ങളും പ്രഖ്യാപിക്കും.
വൈകിട്ട് നാലു മണി മുതൽ പിആർഡി ലൈവ് മൊബൈൽ ആപ്പിലൂടെയും താഴെ പറയുന്ന വെബ്സൈറ്റുകളിലൂടെയും ഫലമറിയാം. https://pareekshabhavan.kerala.gov.in, https://prd.kerala.gov.in, https://results.kerala.gov.in, https://examresults.kerala.gov.in, https://kbpe.kerala.gov.in, https://results.digilocker.kerala.gov.in, https://sslcexam.kerala.gov.in, https://results.kite.kerala.gov.in.
ആകെ 4,27,021 വിദ്യാര്ഥികളാണ് ഈ വര്ഷം എസ്എസ്എല്സി പരീക്ഷ എഴുതിയത്. മുന് വര്ഷങ്ങളിലേതിന് സമാനമായി ഔദ്യോഗിക വെബ്സൈറ്റുകള്ക്ക് പുറമെ ഡിജിലോക്കര് വഴിയും എസ്എംഎസ് വഴിയും ഫലം അറിയാന് സൗകര്യമുണ്ടാകും. കഴിഞ്ഞ വർഷം 99.69 എസ്എസ്എൽസി പരീക്ഷയിലെ വിജയ ശതമാനം.
എസ്എസ്എൽസി (എച്ച്ഐ) ഫലം http://sslchiexam.kerala.gov.in ലും ടിഎച്ച്എസ്എൽസി (എച്ച്ഐ) ഫലം http://thslchiexam.kerala.gov.in ലും എഎച്ച്എസ്എൽസി ഫലം http://ahslcexam.kerala.gov.in ലും ടിഎച്ച്എസ്എൽസി ഫലം https://thslcexam.kerala.gov.in/thslc/index.php എന്ന വെബ്സൈറ്റിലും ലഭിക്കും.
by Midhun HP News | May 9, 2025 | Latest News, ദേശീയ വാർത്ത
ന്യൂഡല്ഹി: ഇന്ത്യ- പാക് സംഘര്ഷം രൂക്ഷമാകുന്നതിനിടെ, അതിര്ത്തി സംസ്ഥാനങ്ങളില് കര്ശന ജാഗ്രതാ നിര്ദേശം. പാകിസ്ഥാനുമായി അതിര്ത്തി പങ്കിടുന്ന ജമ്മു കശ്മീരിന് പുറമെ, രാജസ്ഥാന്, പഞ്ചാബ്, ഗുജറാത്ത് തുടങ്ങിയ സംസ്ഥാനങ്ങളില് സുരക്ഷ ശക്തമാക്കി. ഈ സംസ്ഥാനങ്ങളില് അവധിയില് പോയ എല്ലാ പൊലീസ് ഉദ്യോഗസ്ഥരെയും തിരികെ വിളിച്ചു.
പൊതു സ്ഥലങ്ങളില് ആളുകള് ഒത്തുകൂടുന്നതിന് വിലക്കേര്പ്പെടുത്തിയിട്ടുണ്ട്. ഡല്ഹി സര്ക്കാരും ജീവനക്കാരുടെ അവധി റദ്ദാക്കി തിരികെ ജോലിക്ക് കയറാന് നിര്ദേശം നല്കിയിട്ടുണ്ട്. രാജ്യത്തെ 24 വിമാനത്താവളങ്ങള് അടച്ചു. നിരവധി വിമാനങ്ങള് റദ്ദാക്കി. അതിര്ത്തി മേഖലകളിലെ വിമാനത്താവളങ്ങള്ക്ക് കര്ശന സുരക്ഷ ഏര്പ്പെടുത്തിയിട്ടുണ്ട്.
അതിര്ത്തി ജില്ലകളിലെ വിദ്യാഭ്യാസസ്ഥാപനങ്ങള്ക്ക് അവധി നല്കിയിട്ടുണ്ട്. സ്കൂളുകളും കോളജുകളും അടക്കം എല്ലാ വിദ്യാഭ്യാസ സ്ഥാപനങ്ങളും അടുത്ത മൂന്നു ദിവസത്തേക്ക് അടച്ചിടാന് പഞ്ചാബ് സര്ക്കാര് ഉത്തരവിട്ടു. ചണ്ഡിഗഡിലും വിദ്യാഭ്യാസസ്ഥാപനങ്ങള്ക്ക് അവധി പ്രഖ്യാപിച്ചിട്ടുണ്ട്. ഫിറോസ്പൂര്, പത്താന്കോട്ട്, ഫാസില്ക, അമൃത്സര്, ഗുരുദാസ്പൂര്, താന്തരണ് എന്നീ ജില്ലകളിലെ വിദ്യാഭ്യാസസ്ഥാപനങ്ങള് ഇനി ഒരു അറിയിപ്പ് ഉണ്ടാകുന്നതുവരെ തുറക്കുന്നതല്ലെന്ന് അധികൃതര് അറിയിച്ചു.
by Midhun HP News | May 8, 2025 | Latest News, ദേശീയ വാർത്ത
ന്യൂഡല്ഹി: ഓപ്പറേഷന് സിന്ദൂറിന് പിന്നാലെ സാമൂഹ്യമാധ്യമങ്ങളില് നിരീക്ഷണം ശക്തമാക്കാന് സംസ്ഥാനങ്ങള്ക്ക് കേന്ദ്ര ആഭ്യന്തര മന്ത്രാലയത്തിന്റെ നിര്ദേശം. സാമൂഹ്യമാധ്യമങ്ങളിലെ രാജ്യവിരുദ്ധ പോസ്റ്റുകള്ക്കെതിരെ നടപടിയെടുക്കണമെന്നും ആഭ്യന്തരമന്ത്രാലയം നിര്ദേശം നല്കിയിട്ടുണ്ട്.
സാമൂഹ്യമാധ്യമങ്ങളിലെ പാകിസ്ഥാന് അനുകൂല ഹാന്ഡിലുകളില് നിന്ന് വരുന്ന വ്യാജവാര്ത്തകളും ദേശവിരുദ്ധ പ്രചാരണങ്ങളും തടയാന് എല്ലാ സംസ്ഥാനങ്ങള്ക്കും നിര്ദേശം നല്കിയിട്ടുണ്ട്. തെറ്റായ വിവരങ്ങള് പ്രചരിപ്പിക്കുന്നതിനെതിരെ അടിയന്തര നടപടി സ്വീകരിക്കാനും ആഭ്യന്തര മന്ത്രാലയം പറഞ്ഞു.
ഭീകര ക്യാംപുകള്ക്കെതിരെ ഇന്ത്യയുടെ ‘ഓപ്പറേഷന് സിന്ദൂര്’ ആക്രമണത്തിന് പിന്നാലെ വന്തോതില് തെറ്റായ വിവരങ്ങള് പ്രചരിപ്പിക്കുന്ന സാഹചര്യത്തിലാണിത്. ആക്രമണങ്ങള് സംബന്ധിച്ച തെറ്റായ വിവരങ്ങള് പാകിസ്ഥാന് അക്കൗണ്ടുകള് വഴി പ്രചരിക്കുന്നതായി റിപ്പോര്ട്ടുകളുണ്ടായിരുന്നു. ഇത്തരം അക്കൗണ്ടുളില് പലതും വിദേശത്ത് നിന്നാണ് പ്രവര്ത്തിക്കുന്നത്.
സംസ്ഥാനങ്ങള് തദ്ദേശ സര്ക്കാരുകള്, സായുധ സേനകള് എന്നിവയുമായി ഏകോപനം ശക്തമാക്കണമെന്നും കേന്ദ്രം ആവശ്യപ്പെട്ടിട്ടുണ്ട്. പ്രത്യേകിച്ച് പ്രശ്ന ബാധിത പ്രദേശങ്ങളുമായി ആശയവിനിമയ ബന്ധങ്ങള് ശക്തമാക്കണമെന്നും നിര്ദേശമുണ്ട്.
by Midhun HP News | May 8, 2025 | Latest News, കേരളം
ഡല്ഹി: കേന്ദ്ര സര്വകലാശാലകള്, മറ്റു സര്വകലാശാലകള്, സ്ഥാപനങ്ങള് എന്നിവിടങ്ങളിലെ ബിരുദ പ്രവേശനത്തിന് ദേശീയ തലത്തില് നടത്തുന്ന സിയുഇടി- യുജി 2025 പരീക്ഷ മെയ് 13 മുതല് ആരംഭിക്കുമെന്ന് നാഷണല് ടെസ്റ്റിങ് ഏജന്സി. നേരത്തെ എട്ടാം തീയതി മുതലാണ് പരീക്ഷ നിശ്ചയിച്ചിരുന്നത്. സിറ്റി ഇന്റിമേഷന് സ്ലിപ്പ് cuet.nta.nic.in ല് നിന്ന് ഡൗണ്ലോഡ് ചെയ്യാമെന്നും നാഷണല് ടെസ്റ്റിങ് ഏജന്സി അറിയിച്ചു.
കമ്പ്യൂട്ടര് അധിഷ്ഠിതമായാണ് പരീക്ഷ. രാജ്യത്തുടനീളമുള്ള വിവിധ പരീക്ഷാ കേന്ദ്രങ്ങളിലും വിദേശത്തുള്ള 15 നഗരങ്ങളിലുമാണ് പരീക്ഷ നടത്തുന്നത്. ജെഎന്യു, അലിഗഢ് മുസ്ലീം, ബനാറസ് ഹിന്ദു അടക്കമുള്ള കേന്ദ്രസര്വകലാശാലകളിലെ ബിരുദ പ്രവേശനമാണ് സിയുഇടി വഴി നടത്തുന്നത്. സര്വകലാശാലകളുടെ/സ്ഥാപനങ്ങളുടെ പട്ടിക, പ്രോഗ്രാമുകള്, പ്രവേശനയോഗ്യത തുടങ്ങിയവ cuet.nta.nic.in ല് ലഭിക്കും. കൂടുതല് സ്ഥാപനങ്ങള് പ്രക്രിയയിലേക്ക് വരുന്ന മുറയ്ക്ക് പട്ടിക വിപുലമാക്കും. അതിനാല് അപേക്ഷകര് വെബ്സൈറ്റ് നിരന്തരം സന്ദര്ശിച്ചുകൊണ്ടിരിക്കണം.
അഡ്മിറ്റ് കാര്ഡിലാണ് പരീക്ഷാ കേന്ദ്രത്തിന്റെ പേര്, പരീക്ഷാ തീയതി, ഷിഫ്റ്റ് സമയം, നിര്ദ്ദേശങ്ങള്, മറ്റ് വിശദാംശങ്ങള് എന്നിവ ഉണ്ടാവുക. അഡ്മിറ്റ് കാര്ഡ് പരീക്ഷയ്ക്ക് നാലുദിവസം മുന്പ് പ്രസിദ്ധീകരിക്കും. പരീക്ഷാ ദിവസം വിദ്യാര്ഥികള് ഫോട്ടോ പതിച്ച തിരിച്ചറിയല് കാര്ഡിനൊപ്പം അഡ്മിറ്റ് കാര്ഡും കൊണ്ടുവരണം. ഫോട്ടോ പതിച്ച തിരിച്ചറിയല് കാര്ഡുകളുടെ പട്ടിക അഡ്മിറ്റ് കാര്ഡില് സൂചിപ്പിക്കും.
വിഷയങ്ങള്: മൂന്നുഭാഗങ്ങളിലായി മൊത്തം 37 വിഷയങ്ങളാണ് ഉള്പ്പെടുത്തിയിട്ടുള്ളത് -13 ഭാഷകള്, 23 ഡൊമൈന് സ്പെസിഫിക് വിഷയങ്ങള്, ഒരു ജനറല് ആപ്റ്റിസ്റ്റിസ് ടെസ്റ്റ്. എല്ലാത്തിലും ചോദ്യങ്ങള് ഒബ്ജക്ടീവ് ടൈപ്പ് മള്ട്ടിപ്പിള് ചോയ്സ് രീതിയിലായിരിക്കും.
ചോദ്യങ്ങള്: ഓരോ ടെസ്റ്റ്പേപ്പറിലും 50 ചോദ്യങ്ങള് വീതം ഉണ്ടാകും. എല്ലാം നിര്ബന്ധമാണ്. ഓരോ ടെസ്റ്റിന്റെയും സമയം 60 മിനിറ്റ് ആയിരിക്കും.
മാര്ക്ക് : ശരിയുത്തരത്തിന് അഞ്ചുമാര്ക്ക് വീതം ലഭിക്കും. ഉത്തരം തെറ്റിയാല് ഒരുമാര്ക്ക് വീതം നഷ്ടപ്പെടും.
മലയാളത്തിലും ചോദ്യക്കടലാസ് : ഇംഗ്ലീഷ്, ഹിന്ദി, മലയാളം ഉള്പ്പെടെ മൊത്തം 13 ഭാഷകളില് ചോദ്യക്കടലാസ് ലഭ്യമാക്കും.
കേരളത്തിലെ പരീക്ഷാകേന്ദ്രങ്ങള്: ഇടുക്കി, കണ്ണൂര്, കാസര്കോട്, കൊല്ലം, കോട്ടയം, കോഴിക്കോട്, മലപ്പുറം, പാലക്കാട്, പത്തനംതിട്ട, തിരുവനന്തപുരം, തൃശ്ശൂര്, വയനാട്, പയ്യന്നൂര്, ആലപ്പുഴ, ചെങ്ങന്നൂര്, എറണാകുളം, മൂവാറ്റുപുഴ
by Midhun HP News | May 8, 2025 | Latest News, ദേശീയ വാർത്ത
ശ്രീനഗര്: ഇന്ത്യയുടെ പ്രതിരോധ കേന്ദ്രങ്ങള് ലക്ഷ്യമിട്ട് പാകിസ്ഥാന് നടത്തിയ സൈനിക നീക്കങ്ങള് ഇന്ത്യന് സേന ചെറുത്തുതോല്പ്പിച്ചു. ഗുജറാത്ത് മുതല് ജമ്മുകശ്മീര് വരെയുള്ള 15 കേന്ദ്രങ്ങള് ലക്ഷ്യമിട്ടാണ് പാക് മിസൈല് – ഡ്രോണ് ആക്രമണശ്രമം നടത്തിയത്. പാക് വ്യോമ പ്രതിരോധ മിസൈലുകളും, ഡ്രോണുകളും ഇന്ത്യന് സൈന്യം തകര്ത്തതായി പ്രതിരോധ ഉദ്യോഗസ്ഥര് വ്യക്തമാക്കി.
അവന്തിപുര, ശ്രീനഗര്, ജമ്മു, പത്താന്കോട്ട്, അമൃത്സര്, കപൂര്ത്തല, ജലന്ധര്, ലുധിയാന, ആദംപൂര്, ഭട്ടിന്ഡ, ചണ്ഡീഗഡ്, നല്, ഫലോഡി, ഉത്തരലൈ, ഭുജ് എന്നിവ ലക്ഷ്യമാക്കിയായിരുന്നു പാക് സൈനിക ആക്രമണശ്രമം. പാക്കിസ്ഥാന്റെ എച്ച്ക്യ-9 പ്രതിരോധ മിസൈലുകള് ഇന്ത്യന് സൈന്യം ഡ്രോണ് ഉപയോഗിച്ച് തകര്ത്തു. പാകിസ്ഥാന് സൈനിക ആക്രമണത്തിന്റെ നിരവധി അവശിഷ്ടങ്ങളും ഈ സ്ഥലങ്ങളില് നിന്ന് കണ്ടെടുത്തതായും പ്രതിരോധ ഉദ്യോഗസ്ഥര് പറയുന്നു.
ഇന്ന് രാവിലെയാണ് ഓപ്പറേഷന് സിന്ദൂറിന്റെ തുടര്ച്ചയായി ഇന്ത്യന് സൈന്യം വീണ്ടും തിരിച്ചടിച്ചത്. പാകിസ്ഥാനിലെ നിരവധി സ്ഥലങ്ങളില് ആക്രമണം നടത്തിയതായി പ്രതിരോധ മന്ത്രാലയം അറിയിച്ചു. ലാഹോറിലെ പാക് വ്യോമ പ്രതിരോധ സംവിധാനങ്ങള് തകര്ത്തതായും വാര്ത്താക്കുറിപ്പില് അറിയിച്ചു. ജമ്മു കശ്മീരിലെ കുപ് വാര,ബാരാമുള്ള, ഉറി, പൂഞ്ച്, മെന്ദാര്, രജൗരി മേഖലകളില് നിയന്ത്രണ രേഖ ലംഘിച്ച് പ്രകോപനമില്ലാതെ പാക് സൈന്യം പീരങ്കികളും മറ്റും ഉപയോഗിച്ച് വെടിവയ്പ് തുടര്ന്നതായും പ്രതിരോധ മന്ത്രാലയം വ്യക്തമാക്കി. പാക് വെടിവയ്പില് മൂന്ന് സ്ത്രീകളും അഞ്ച് കുട്ടികളും ഉള്പ്പെടെ പതിനാറ് പേര് മരിച്ചതായും പ്രതിരോധ മന്ത്രാലയം വ്യക്തമാക്കി.
by Midhun HP News | May 8, 2025 | Latest News, ദേശീയ വാർത്ത
ന്യൂഡല്ഹി: പഹല്ഗാം ഭീകരാക്രമണത്തിന് തിരിച്ചടിയായി പാകിസ്ഥാനിലെയും പാക് അധിനിവേശ കശ്മീരിലെയും ഒന്പത് ഭീകരകേന്ദ്രങ്ങളില് ഓപ്പറേഷന് സിന്ദൂര് എന്ന പേരില് ഇന്ത്യ നടത്തിയ മിന്നലാക്രമണത്തില് ജെയ്ഷെ മുഹമ്മദിന് കനത്ത പ്രഹരം. ഓപ്പറേഷന് സിന്ദൂറില് ജെയ്ഷെ മുഹമ്മദിന്റെ സുപ്രീം കമാന്ഡറും ഐക്യരാഷ്ട്രസഭ ഭീകരനായി പ്രഖ്യാപിച്ച മസൂദ് അസറിന്റെ സഹോദരനുമായ അബ്ദുള് റൗഫ് അസറും കൊല്ലപ്പെട്ടതായി സര്ക്കാര് വ്യത്തങ്ങള് അറിയിച്ചു.
കാണ്ഡഹാര് വിമാനം റാഞ്ചലിന്റെ സൂത്രധാരനാണ് അബ്ദുള് റൗഫ് അസര്. ഓപ്പറേഷന് സിന്ദൂറിന്റെ ഭാഗമായി പാകിസ്ഥാനിലെ പഞ്ചാബ് പ്രവിശ്യയിലെ ബഹാവല്പൂരിലും മുരിഡ്കെയിലുമാണ് ഇന്ത്യന് സേന ആക്രമണം നടത്തിയത്. ബഹാവല്പൂര് ആക്രമണത്തില് മസൂദ് അസറിന്റെ 10 കുടുംബാംഗങ്ങളെ കൊലപ്പെടുത്തിയതായി ഇന്നലെ ഇന്ത്യന് സൈനിക വൃത്തങ്ങള് അറിയിച്ചിരുന്നു. ഇതിന് പിന്നാലെയാണ് കൊല്ലപ്പെട്ടവരില് ജെയ്ഷെ മുഹമ്മദിന്റെ സുപ്രീം കമാന്ഡറും ഉള്പ്പെടുന്നതായുള്ള റിപ്പോര്ട്ട് പുറത്തുവന്നത്.
‘കാണ്ഡഹാര് വിമാനം റാഞ്ചലിന്റെ സൂത്രധാരനാണ് അബ്ദുള് റൗഫ് അസര്. അല്ഖ്വയ്ദ ഭീകരന് ഒമര് സയീദ് ഷെയ്ഖിന്റെ മോചനത്തിന് വേണ്ടിയാണ് കാണ്ഡഹാര് വിമാനം റാഞ്ചിയത്. അമേരിക്കന്-ജൂത പത്രപ്രവര്ത്തകനായ ഡാനിയേല് പേളിനെ തട്ടിക്കൊണ്ടുപോയി ക്രൂരമായി കൊലപ്പെടുത്തിയത് ഒമര് സയീദ് ഷെയ്ഖിന്റെ നേതൃത്വത്തിലായിരുന്നു. ഒമര് സയീദ് ഷെയ്ഖിന്റെ മോചനത്തിന് വേണ്ടി പ്രവര്ത്തിച്ചത് അബ്ദുള് റൗഫ് അസറാണ്. 2002-ല് പേളിന്റെ ക്രൂരമായ കൊലപാതകം ലോകമനഃസ്സാക്ഷിയെ ഞെട്ടിച്ചിരുന്നു,’- സര്ക്കാര് വൃത്തങ്ങള് പറഞ്ഞു.
Recent Comments