by Midhun HP News | Aug 1, 2024 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ വീണ്ടും വര്‍ധന. പവന്‍ വില 400 രൂപ കൂടി, ഒരു പവന്‍ സ്വര്‍ണത്തിന്റെ ഇന്നത്തെ വില 51,600 രൂപയാണ്. ഗ്രാം വിലയില്‍ 50 രൂപയാണ് കൂടിയത്. ഒരു ഗ്രാം സ്വര്‍ണത്തിന്റെ വില 6450 രൂപ.
ബജറ്റ് പ്രഖ്യാപനത്തെത്തുടര്‍ന്ന് കുത്തനെ ഇടിഞ്ഞ സ്വര്‍ണ വില വീണ്ടും 50,000 കടന്നിരിക്കുകയാണ്. ബജറ്റില്‍ ഇറക്കുമതി തീരുവ കുറച്ചതിനു പിന്നാലെ സ്വര്‍ണ വിലയില്‍ വന്‍ ഇടിവാണ് രേഖപ്പെടുത്തിയത്. ബജറ്റ് അവതരണത്തിനു ശേഷം കുറഞ്ഞ സ്വര്‍ണ വില, ശനിയാഴ്ച മുതലാണ് ഉയരാന്‍ തുടങ്ങിയത്.
by Midhun HP News | Aug 1, 2024 | Latest News, ജില്ലാ വാർത്ത
മംഗലപുരം: സമൂഹത്തിലെ അനീതിക്കും, അഴിമതിക്കുമെതിരെ പോരാടിയ ജനകീയ നേതാവായിരുന്നു അഡ്വ.സി.മോഹനചന്ദ്രനെന്ന് സീനിയർ സിറ്റിസൺസ്‌ കോൺഗ്രസ്സ് സംസ്ഥാന പ്രസിഡൻ്റ് എൻ പീതാംബര കുറുപ്പ് അഭിപ്രായപ്പെട്ടു. തിരുവനന്തപുരം ജില്ലയിൽ കോൺഗ്രസ്സ് പ്രസ്ഥാനത്തെ ശക്തിപ്പെടുത്തുന്നതിൽ നിർണ്ണായക പങ്കുവഹിച്ചയാളാണ് മോഹനചന്ദ്രനെന്ന് അദ്ദേഹത്തിൻ്റെ ആത്മ സുഹൃത്തു കൂടിയായ പീതാംബരകുറുപ്പ് പറഞ്ഞു. കെ.പി.സി.സി. നിർവ്വാഹ സമിതി അംഗം, കേരള സർവ്വകലാശാല സിൻഡിക്കേറ്റ് അംഗം, കേരള സ്പോർട്‌സ് കൗൺസിൽ തുടങ്ങി വിവിധ മേഖലകളിൽ തനതായ വ്യക്തിമുദ്ര പതിപ്പിച്ച അഡ്വ. സി.മോഹനചന്ദ്രൻ്റെ 10-ാം ചരമവാർഷിക ദിനത്തിൽ മുരുക്കും പുഴയിൽ അഡ്വ. സി.മോഹനചന്ദ്രൻ കൾച്ചറൽ ഫോറത്തിൻ്റെ ആഭിമുഖ്യത്തിൽ സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
മാതൃകാപൊതുപ്രവർത്തകനുള്ള ഈ വർഷത്തെ അഡ്വ.സി. മോഹനചന്ദ്രൻ പുരസ്കാരം അഡ്വ എം വിൻസൻ്റ് എം എൽ എ യ്ക്കു സമ്മാനിച്ചു. ഫോറം പ്രസിഡൻ്റ് എ .നൗഷാദ് ആദ്ധ്യക്ഷം വനിക്കുകയും, അഡ്വ.കെ.അനിൽകുമാർ സ്വാഗതം ആശംസിക്കുകയും ചെയ്ത സമ്മേളനത്തിൽ ബി എസ് .അനൂപ്, അണിയൂർ പ്രസന്നൻ, തോന്നയ്ക്കൽ ജമാൽ, പാങ്ങപ്പാറ അശോകൻ, തുടങ്ങിയർ സംസാരിച്ചു.
by Midhun HP News | Aug 1, 2024 | Latest News, ജില്ലാ വാർത്ത
ആറ്റിങ്ങൽ: പ്രഗത്ഭനായ സംഘാടകനും ഭരണാധികാരിയും ആയിരുന്നു വക്കം പുരുഷോത്തമൻ എന്ന് കെ. പി. സി. സി ജനറൽ സെക്രട്ടറി അഡ്വ : ജി. സുബോധൻ. ഐ. എൻ. റ്റി. യു. സി കോ – ഓർഡിനേഷൻ കമ്മിറ്റിയുടെ ആഭിമുഖ്യത്തിൽ ആറ്റിങ്ങൽ കിഴക്കേ നാലുമുക്ക് പബ്ലിക് സ്‌ക്വയറിൽ നടന്ന വക്കംജി അനുസ്മരണം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. തൊഴിലാളികൾക്കും പാവപ്പെട്ട ജനങ്ങൾക്കും വേണ്ടി നിരവധി കർമ്മ പദ്ധതികളാണ് വക്കം ആവിഷ്‌കരിച്ചു നടപ്പിലാക്കിയത്. ഒരു പഞ്ചായത്തിൽ ഒരു ആശുപത്രിയെന്ന നിലയിൽ വിവിധ പദ്ധതികളും റെഫറൽ മെഡിക്കൽ കോളേജ്കളും കൊണ്ടു വന്നു.
ടുറിസം മേഖലയിൽ വൻ വികസനം ആണ് നടപ്പിലാക്കിയത്. ഗവർണർ എന്ന നിലയിൽ ആന്റമാനിൽ അദ്ദേഹം നടത്തിയ വികസനം എല്ലാവരുടെയും ശ്രദ്ധ പിടിച്ചു പറ്റി. സ്‌പീക്കർ എന്ന നിലയിലും അദ്ദേഹം ശ്രദ്ധേയനായി. വക്കം പുരുഷോത്തമന് തുല്യനായി അദ്ദേഹം മാത്രമാണെന്നും അദ്ദേഹം സൂചിപ്പിച്ചു. ഐ. എൻ. റ്റി. യു. സി ദേശീയ വർക്കിംഗ്‌ കമ്മിറ്റി അംഗം ഡോ. വി. എസ് അജിത് കുമാർ അദ്ധ്യക്ഷത വഹിച്ചു. വക്കം പുരുഷോത്തമന്റെ ഛായാ ചിത്രത്തിനു മുന്നിൽ നൂറോളം പ്രവർത്തകർ പുഷ്പാർപ്പണം നടത്തി. വക്കം സുകുമാരൻ, ജെ. ശശി, എസ്. ശ്രീരംഗൻ, സലിം പാണന്റെമുക്ക്, കടക്കാവൂർ അശോകൻ, വി. ചന്ദ്രിക, ആർ. വിജയകുമാർ, ജയ വക്കം, ഊരുപൊയ്ക അനിൽ, സിറാജ് ഉല്ലാസ്, നാസർ മണനാക്ക്, ശാസ്താവട്ടം രാജേന്ദ്രൻ, പ്രീത് എന്നിവർ സംസാരിച്ചു.
by Midhun HP News | Aug 1, 2024 | Latest News, ജില്ലാ വാർത്ത
തിരുവനന്തപുരം: കുട്ടികളുടെയും രക്ഷകർത്താക്കളുടെയും സൗകര്യാർത്ഥം, നഗരൂർ, രാജധാനി കോളേജിൽ എൻജിനീയറിങ്ങിന്റെ ഓപ്ഷൻ സെന്റർ ജൂലൈ 29 ആം തീയതി മുതൽ പ്രവർത്തനമാരംഭിച്ചു. കോളേജിന്റെ പത്തോളം എഞ്ചിനീയറിങ് ബ്രാഞ്ചുകളിലേക്ക് ഈ സേവനം ലഭ്യമാക്കുന്നതിനോടൊപ്പം, കീം 2024 പ്രകാരം ഓപ്ഷൻ നൽകാൻ വിദഗ്ധരുടെ സേവനവും ഇവിടെ ലഭ്യമാണ്. ഈ സേവനങ്ങൾ എല്ലാം തികച്ചും സൗജന്യമാണ്.
കൂടുതൽ വിവരങ്ങൾക്ക്: 7025077773, 7025577773 എന്ന നമ്പറിൽ ബന്ധപ്പെടുക.
by Midhun HP News | Aug 1, 2024 | Latest News, കേരളം
കല്‍പ്പറ്റ: വയനാട് മുണ്ടക്കൈയിലെ ഉരുള്‍പ്പൊട്ടലിന്റെ പശ്ചാത്തലത്തില്‍ രക്ഷാപ്രവര്‍ത്തനങ്ങള്‍ക്ക് സഹായമായി എയര്‍ടെല്‍. വയനാട്ടില്‍ മൂന്ന് ദിവസത്തേക്ക് ഇന്റര്‍നെറ്റ്, എസ്എംഎസ്, ടോക്ക് ടൈം എന്നിവ സൗജന്യമായിരിക്കുമെന്നും അധികൃതര്‍ അറിയിച്ചു.
ഏതെങ്കിലും പാക്കേജ് വാലിഡിറ്റി കഴിഞ്ഞവര്‍ക്ക് അടക്കം ഓഫര്‍ ബാധകമാണ്. പ്രീപെയ്ഡ്, പോസ്റ്റ് പെയ്ഡ് കസ്റ്റമേഴ്‌സിനും ഇളവുകള്‍ പ്രഖ്യാപിച്ചിട്ടുണ്ട്. പോസ്റ്റ് പെയ്ഡ് ബില്‍ അടക്കാന്‍ വൈകുന്നവര്‍ക്കും ഇളവ് നല്‍കിയിട്ടുണ്ട്.
ഇതിന് പുറമേ കേരളത്തിലെ 52 റീട്ടെയില്‍ സ്റ്റോറുകളില്‍ കളക്ഷന്‍ സെന്ററുകളും ആരംഭിച്ചിട്ടുണ്ട്. ഇവിടെ സഹായ സന്നദ്ധരായവര്‍ക്ക് ദുരിതബാധിതര്‍ക്ക് ആവശ്യമായ വസ്തുക്കള്‍ എത്തിക്കാന്‍ സാധിക്കുമെന്നും ഇവ തദ്ദേശ സ്ഥാപനങ്ങളെ ല്‍പ്പിക്കുമെന്നും കമ്പനി അറിയിച്ചു.
ഉരുള്‍പൊട്ടലില്‍ മരണം 276 ആയി. ഇരുന്നൂറ്റി നാല്‍പ്പതിലേറെ പേരെ കാണാനില്ല. മരണസംഖ്യ ഇനിയും ഉയരുമെന്നാണ് സൂചന. ചെളിനിറഞ്ഞ വീടുകളില്‍ ഇനിയും ആളുകള്‍ കുടുങ്ങിക്കിടക്കുന്നുണ്ടെന്നാണ് സംശയിക്കപ്പെടുന്നത്. തിരച്ചില്‍ മൂന്നാം ദിവസം രാവിലെ ആരംഭിച്ചു.
by Midhun HP News | Aug 1, 2024 | Latest News, കേരളം
ന്യൂഡൽഹി : ലോക്സഭയിലെ പ്രതിപക്ഷ നേതാവ് രാഹുല്‍ ഗാന്ധിയും സഹോദരിയും കോൺഗ്രസ് നേതാവുമായ പ്രിയങ്ക ഗാന്ധിയും ഇന്ന് വയനാട്ടിലെ ദുരന്ത ബാധിത മേഖലയിലെത്തും. രാവിലെ 9.45 ന് ഇരുവരും കണ്ണൂരെത്തും. തുടർന്ന് 12 മണിയോടെ ഇവർ കൽപ്പറ്റയിലെത്തും. മേപ്പാടിയിലെ ക്യാമ്പുകളും പരിക്കേറ്റവർ ചികിത്സയിൽ കഴിയുന്ന ആശുപത്രിയും സന്ദര്‍ശിക്കും.
ബുധനാഴ്ച വയനാട്ടിലെത്താനായിരുന്നു വയനാടിന്റെ മുൻ എംപി കൂടിയായ രാഹുൽഗാന്ധി നിശ്ചയിച്ചിരുന്നത്. എന്നാൽ പ്രതികൂല കാലാവസ്ഥയായതിനാൽ വിമാനം ലാൻഡ് ചെയ്യാൻ സാധിക്കില്ലെന്ന് അധികൃതർ അറിയിച്ചതിനെത്തുടർന്ന് ഇരുവരും അവസാന നിമിഷം യാത്ര റദ്ദാക്കുകയായിരുന്നു. എന്നാൽ എത്രയും പെട്ടെന്ന് തന്നെ വയനാട്ടിലെത്തുമെന്ന് രാഹുൽ അറിയിച്ചിരുന്നു. ഉരുള്‍പൊട്ടല്‍ ദുരന്തം രാഹുല്‍ഗാന്ധി ലോക്സഭയിലും ഉന്നയിച്ചിരുന്നു. കേന്ദ്ര സർക്കാർ സാധ്യമായ എല്ലാ പിന്തുണയും സംസ്ഥാനത്തിന് നൽകണം. ചികിത്സാ സൗകര്യങ്ങൾ ഒരുക്കണം. മരണപ്പെട്ടവരുടെ കുടുംബങ്ങൾക്ക് നഷ്ടപരിഹാരം വർദ്ധിപ്പിക്കണമെന്നും അത് അടിയന്തിരമായി വിതരണം ചെയ്യണമെന്നും രാഹുൽഗാന്ധി കേന്ദ്രസർക്കാരിനോട് ആവശ്യപ്പെട്ടിരുന്നു.
Recent Comments