by Midhun HP News | Dec 30, 2025 | Latest News, കേരളം
പത്തനംതിട്ട: മകരവിളക്ക് ഉത്സവത്തിനായി ചൊവാഴ്ച ശബരിമല നട തുറക്കും. വൈകീട്ട് അഞ്ചിന് തന്ത്രി കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി ഇഡി പ്രസാദ് നമ്പൂതിരി നട തുറക്കും.
മേല്ശാന്തി സന്നിധാനത്തെ ആഴിയില് അഗ്നി പകര്ന്ന ശേഷം ഭക്തര്ക്കു പതിനെട്ടാം പടി ചവിട്ടി ദര്ശനം നടത്താം. നട തുറക്കുമ്പോള് യോഗദണ്ഡും രുദ്രാക്ഷ മാലയുമണിഞ്ഞ് ഭസ്മാഭിഷിക്തനായ അയ്യപ്പനെ കണ്ട് തൊഴാം
ഇന്ന് പൂജകളില്ല. രാത്രി 11നു ഹരിവരാസനം പാടി നട അടയ്ക്കും. മൂന്ന് ദിവസങ്ങളിലായി സന്നിധാനത്ത് ശുചീകരണമടക്കമുള്ളവ പൂര്ത്തിയാക്കി. ചൊവ്വാഴ്ച വെര്ച്വല് ക്യൂ വഴിയുള്ള ദര്ശനം 30,000 പേര്ക്ക് മാത്രമായി നിജപ്പെടുത്തിയിട്ടുണ്ട്. ബുധനാഴ്ച മുതല് നെയ്യഭിഷേകവും പതിവു പൂജകളും തുടരും. ജനുവരി 14നാണ് മകര വിളക്ക്.
by Midhun HP News | Dec 29, 2025 | Latest News, ജില്ലാ വാർത്ത
ശ്രീനിവാസന്റെ വിയോഗത്തിന് ഒരാഴ്ചയ്ക്കിപ്പുറവും അദ്ദേഹത്തെക്കുറിച്ച് സംസാരിച്ച് മതിയാകുന്നില്ല മലയാളികള്ക്ക്. ശ്രീനിവാസന് സിനിമകളും തമാശകളുമൊക്കെ ചര്ച്ചയാകുമ്പോള് സിനിമയ്ക്ക് പുറത്തുള്ള ശ്രീനിവാസന്റെ ജീവിതവും ചര്ച്ചകളില് നിറയുന്നുണ്ട്. അത്തരത്തില് ഒന്നാണ് അദ്ദേഹത്തിന്റെ വീട്ടില് സഹായത്തിന് നിന്നിരുന്ന സ്ത്രീയ്ക്ക് വീടു വച്ചു നല്കിയ സംഭവം.
തന്റെ സഹായിക്ക് ശ്രീനിവാസന് വീടു വച്ചു നല്കിയതിനെക്കുറിച്ച് ചന്ദ്രലേഖ രഞ്ജിത് എന്ന് ബ്ലോഗര് പങ്കുവച്ച കുറിപ്പാണ് ചര്ച്ചയാകുന്നത്. വീട്ടിലെ കുക്ക് ആയിരുന്ന അരുണയ്ക്കാണ് ശ്രീനിവാസന് വീടു വച്ചു നല്കിയത്. അരുണയെ സഹായിയായിട്ടല്ല, വീട്ടിലെ ഒരംഗമായി തന്നെയാണ് ശ്രീനിവാസനും കുടുംബവും കണ്ടിരുന്നതെന്ന് ചന്ദ്രലേഖ കുറിപ്പില് പറയുന്നു.
ആ വാക്കുകളിലേക്ക്:”ഇത് അരുണേച്ചി. തൊക്കിലങ്ങാടിയില് ആണ് താമസം. തൊക്കിലങ്ങാടി ശ്രീനാരായണ ഹോട്ടലിലെ ജീവനക്കാരിയുമാണ്. ഈ പോസ്റ്റ് അരുണേച്ചിക്ക് വേണ്ടിയാണ്. വര്ഷങ്ങള്ക്ക് മുമ്പ് ജീവിതത്തിലെ ദുര്ഘടവഴികളിലൂടെ ജീവിക്കാനായ് നെട്ടോട്ടമോടിയ അരുണേച്ചി ശ്രീനിവാസന് എന്ന അതുല്യ കലാകാരന്റെ വീട്ടിലെത്തുകയും അവര്ക്ക് രുചികരമായ ആഹാരം വച്ച് വിളമ്പി മക്കളെയും നോക്കി കഴിഞ്ഞ ആ കാലഘടത്തില് വെറുമൊരു അടുക്കളക്കാരിയെ പോലെ കാണാതെ സ്വന്തം വീട്ടിലെ ഒരംഗത്തെപോലെ ആയിരുന്നു അരുണേച്ചി അവിടെ.
അരുണേച്ചിക്ക് അദ്ദേഹം ഒരു വീട് സ്വന്തമായി വച്ച് കൊടുത്തിരുന്നു പൂക്കോട്. അങ്ങനെ അദ്ദേഹത്തിന്റെ സഹായത്തോടെ ആണ് അരുണേച്ചി ജീവിതം മുന്നോട്ട് നയിച്ചതും ഇന്നും സന്തോഷത്തോടെ ജീവിച്ചിരിക്കുന്നതും. തന്റെ ചുറ്റുമുള്ളവര് ആരുമായ്ക്കോട്ടെ അവരെയൊക്കെ ചേര്ത്ത് പിടിക്കാന് കാണിച്ച ആ പ്രതിഭയ്ക്ക് ശതകോടി പ്രണാമം” എന്നു പറഞ്ഞാണ് കുറിപ്പ് അവസാനിക്കുന്നത്.
ശ്രീനിവാസന്റെ ഡ്രൈവറായിരുന്ന ഷിനോജിന്റെ കുറിപ്പും കഴിഞ്ഞ ദിവസം ചര്ച്ചയായിരുന്നു. 17 വര്ഷം ശ്രീനിവാസന്റെ സാരഥിയായിരുന്നു ഷിനോജ്. താന് ചോദിക്കുക പോലും ചെയ്യാതെയാണ്, ധ്യാനിനോടും വിനീതിനോടും പറഞ്ഞ് ശ്രീനിയേട്ടന് തനിക്കായി വീടൊരുക്കിയതെന്നാണ് ഷിനോജ് പറഞ്ഞത്. എവിടെ ആണെന്ന് അറിയില്ലെങ്കിലും, അവിടെ ഒരു ഡ്രൈവറുടെ ആവശ്യമുണ്ടെങ്കില് വിളിക്കാന് മറക്കരുതേ എന്നു പറഞ്ഞാണ് ഷിനോജ് കുറിപ്പ് അവസാനിപ്പിച്ചത്.
by Midhun HP News | Dec 29, 2025 | Latest News, ദേശീയ വാർത്ത
ഡല്ഹി: രാജ്യത്ത് 3 ജി സേവനം അവസാനിപ്പിക്കാന് പൊതുമേഖലാ ടെലികോം കമ്പനിയായ ബിഎസ്എന്എല്. രാജ്യമെമ്പാടും 4ജി എത്തുന്നതോടെ 3ജി സേവനങ്ങള് നിര്ത്തും. ഉപയോക്താക്കള്ക്ക് 4ജിക്കൊപ്പം 3ജി സേവനം ലഭിക്കില്ല. നിലവില് രാജ്യത്ത് 97,841 4ജി ടവറുകള് ബിഎസ്എന്എല് സ്ഥാപിച്ചിട്ടുണ്ട്. കൂടുതല് ടവറുകള് സ്ഥാപിക്കാനാണ് നീക്കം.
ഈ വര്ഷം മാര്ച്ചിലെ കണക്കുപ്രകാരം ബിഎസ്എന്എലിന് രാജ്യത്താകെ 58,919 എണ്ണം 3ജി ടവറുകളാണുള്ളത്. 5,863 പട്ടണങ്ങളില് 3ജി സേവനങ്ങള് എത്തുന്നു. നിലവില് 3ജി സേവനത്തിന് കമ്പനിയുമായി സഹകരിക്കുന്ന നോക്കിയ, ചൈനീസ് കമ്പനി സെഡ്ടിഇ എന്നിവയുമായുള്ള കരാറും ബിഎസ്എന്എല് അവസാനിപ്പിക്കും.
3ജി സേവനങ്ങള് അവസാനിപ്പിക്കുമെന്ന് ബിഎസ്എന്എല് ഇതുവരെയും ഔദ്യോഗികമായി പറഞ്ഞിട്ടില്ലെങ്കിലും ഇതുസംബന്ധിച്ച നടപടി സ്വീകരിക്കണമെന്ന് എല്ലാ സര്ക്കിളുകളിലും നിര്ദ്ദേശങ്ങള് നല്കിയതായാണ് റിപ്പോര്ട്ടുകള്.
സെപ്റ്റംബറിലെ കണക്കുപ്രകാരം ബിഎസ്എന്എലിന് ആകെ 9.23 കോടി മൊബൈല് വരിക്കാരാണുള്ളത്. അധികം വൈകാതെ ബിഎസ്എന്എല് 5ജിയിലേക്കും പ്രവേശിക്കുമെന്നും റിപ്പോര്ട്ടുണ്ട്. ഇതില് 7 കോടിപ്പേര് ഇപ്പോഴും 3ജി സേവനമാണ് ഉപയോഗിക്കുന്നത്. ഇവര്ക്ക് ബിഎസ്എന്എല് ഓഫിസിലെത്തി 4ജി സിം നേടാം. അതേസമയം, പഴയ 3ജി ഫോണുകളോ ഫീച്ചര് ഫോണുകളോ ഉപയോഗിക്കുന്നവര് 4ജി/5ജി ഫോണിലേക്ക് അപ്ഗ്രേഡ് ചെയ്യേണ്ടിവരും.
by Midhun HP News | Dec 29, 2025 | Latest News, കേരളം
തൃശൂര്: ആളുമാറി കസ്റ്റഡിയിലെടുത്ത യുവാവിന് സ്റ്റേഷന് മര്ദനം. വിയ്യൂര് പൊലീസാണ് ആളുമാറി കുറ്റൂര് ചാമക്കാട് പുതുകുളങ്ങരയില് പി.എസ്.ശരത്തിനെ (31) കസ്റ്റഡിയിലെടുത്തത്. യുവാവിന്റെ ശരീര്ം നിറയെ ലാത്തിഅടികൊണ്ടുണ്ടായ പാടുകളാണ്.
നെയ്തലക്കാവ് ക്ഷേത്രത്തിലെ ഉത്സവത്തിനിടയിലെ അടിപിടിയുടെ പേരില് ശരത് എന്ന് പേരുള്ളയാളെ പൊലീസ് തിരയുന്നുണ്ടായിരുന്നു. കാപ്പാ കേസിലടക്കം പ്രതിയായ പി.എസ്. ശരത്ത് ആണ് ഈ അടിപിടിക്കേസിലും പ്രതിയെന്നു തെറ്റിദ്ധരിച്ചാണു മര്ദനം നടന്നതെന്നു പറയുന്നു. ശരത്തിന്റെ സഹോദരന് രാജീവിന്റെ വീട്ടിലെത്തിയാണു മര്ദിച്ചതെന്നുകാട്ടി ബന്ധുക്കള് കമ്മീഷണര്ക്ക് അടക്കം പരാതി നല്കി. ശരത്തിന്റെ സഹോദരന്റെ ഭാര്യ വിയ്യൂര് പൊലീസില് പരാതി നല്കാന് എത്തിയെങ്കിലും എസ്എച്ച്ഒ സ്ഥലത്തില്ലെന്നു പറഞ്ഞു പരാതി സ്വീകരിച്ചില്ലെന്നും ബന്ധുക്കള് ആരോപിച്ചു. എന്നാല്, വിശേഷ ദിവസങ്ങളില് സുരക്ഷാ മുന്കരുതലിന്റെ ഭാഗമായി കാപ്പാ കേസ് പ്രതികളെയും കേഡി ലിസ്റ്റില് ഉള്പ്പെട്ടവരെയും കസ്റ്റഡിയിലെടുക്കാറുണ്ടെന്നും ശരത്തിന്റെ കാര്യത്തിലും ഇതാണു സംഭവിച്ചതെന്നുമാണ് പൊലീസ് ഭാഷ്യം.
ഉത്സവത്തിനിടയില് അടിപിടിയുണ്ടാക്കിയവരുടെ കൂട്ടത്തില് ശരത് എന്നു പേരുള്ള മറ്റൊരാള് ഉണ്ടായിരുന്നു. ആ ശരത്താണെന്നു തെറ്റിദ്ധരിച്ചാണു പൊലീസ് പ്രതിയാക്കാന് ശ്രമിച്ചതെന്നാണ് ആരോപണം.
കഴിഞ്ഞ ദിവസം രാത്രി 10.30നു വീട്ടിലേക്കു കയറിവന്ന പൊലീസുകാര് ശരത്തിനെ തലങ്ങും വിലങ്ങും മര്ദിച്ചെന്നും ലാത്തി കൊണ്ടു പുറത്തും വയറ്റിലും അടിച്ചെന്നും പരാതിയിലുണ്ട്. ഉന്തിത്തള്ളി ജീപ്പില് കയറ്റിയപ്പോള് തലയിടിച്ചും പരുക്കേറ്റു.
ഉത്സവം കാണാന് പോയിട്ടില്ലെന്നു ശരത് പറഞ്ഞെങ്കിലും പൊലീസ് ചെവിക്കൊണ്ടില്ല. ആളു മാറിയാണ് അറസ്റ്റ് ചെയ്തതെന്നു പിന്നീടു മനസ്സിലാക്കിയതോടെ രാത്രി ഒന്നരയോടെ സ്റ്റേഷനില് നിന്നു മോചിപ്പിച്ചു. പരിക്കുകള് ഉള്ളതിനാല് പൊലീസ് തന്നെ ജില്ലാ ആശുപത്രിയിലേക്കു കൊണ്ടുപോയി. വീട്ടിലെത്തിയ ശേഷം രാവിലെ അസ്വസ്ഥത തോന്നിയതിനാല് സഹകരണ ആശുപത്രിയില് ചികിത്സ തേടി. കണ്ണിന്റെ ഭാഗത്തു ലാത്തി കൊണ്ടുള്ള അടിയേറ്റിട്ടുണ്ടെന്നും കാഴ്ചയ്ക്കു മങ്ങലുണ്ടായെന്നും ശരത് പറയുന്നു.
by Midhun HP News | Dec 29, 2025 | Latest News, കേരളം
കൊച്ചി: ‘സേവ് ബോക്സ്’ നിക്ഷേപത്തട്ടിപ്പ് കേസുമായി ബന്ധപ്പെട്ട് നടന് ജയസൂര്യയെ ചോദ്യം ചെയ്ത് എൻഫോഴ്സ്മെന്റ് ഡയറക്ടറേറ്റ്. ഓണ്ലെന് ലേല ആപ്പിന്റെ പേരില് തട്ടിപ്പ് നടത്തിയെന്ന പരാതിയില് തൃശ്ശൂര് ഈസ്റ്റ് പൊലീസ് രജിസ്റ്റര് ചെയ്ത കേസിന്റെ തുടര്ച്ചയായാണ് നടപടി. ഓണ്ലൈന് ലേല ആപ്പായ സേവ് ബോക്സിന്റെ ബ്രാന്ഡ് അംബാസഡറായി ജയസൂര്യക്ക് കരാര് ഉണ്ടായിരുന്നതായി ഇഡിക്ക് വിവരം ലഭിച്ചിരുന്നു. ഇതിന്റെ അടിസ്ഥാനത്തിലാണ് ചോദ്യം ചെയ്യല്. കൊച്ചി ഓഫീസില് വെച്ചാണ് ചോദ്യം ചെയ്യല്.
രാവിലെ പതിനൊന്ന് മണിയോടെയാണ് ജയസൂര്യ ചോദ്യം ചെയ്യലിനായി ഇ ഡി ഓഫീസില് ഹാജരായത്. സേവ് ബോക്സ് നിക്ഷേപത്തട്ടിപ്പ് കേസില് 2023 ജനുവരിയില് സ്ഥാപന ഉടമയും മുഖ്യപ്രതിയുമായ സ്വാതിഖ് റഹീ (സ്വാതി റഹീം)മിനെ അറസ്റ്റ് ചെയ്തിരുന്നു. കിഴക്കേക്കോട്ട സ്വദേശിയുടെ പരാതിയില് തൃശ്ശൂര് ഈസ്റ്റ് പൊലീസാണ് സ്വാതിയെ അറസ്റ്റ് ചെയ്തത്. സേവ് ബോക്സിന്റെ ഫ്രാഞ്ചൈസി നല്കാമെന്ന് പറഞ്ഞ് സ്വാതിഖ് റഹീം ലക്ഷങ്ങള് തട്ടിയെന്നായിരുന്നു പരാതി.
മാസം 25 ലക്ഷം രൂപവരെ ലാഭം വാഗ്ദാനം ചെയ്താണ് സ്വാതിഖ് റഹീം നിക്ഷേപങ്ങള് സ്വീകരിച്ചിരുന്നത്. നൂറിലധികം പേരില്നിന്ന് ഇത്തരത്തില് ലക്ഷങ്ങള് നിക്ഷേപമായി സ്വീകരിച്ചിട്ടുണ്ടെന്നയാരുന്നു റിപ്പോര്ട്ട്. എന്നാല് ലാഭവിഹിതമോ മുടക്കിയ പണമോ ലഭിച്ചിക്കാതെ വന്നതോടെയാണ് പരാതികള് ഉയര്ന്നത്.
by Midhun HP News | Dec 29, 2025 | Latest News, കേരളം
പത്തനംതിട്ട: ശബരിമല സ്വര്ണക്കൊള്ളയില് വീണ്ടും അറസ്റ്റ്. തിരുവിതാംകൂര് ദേവസ്വം ബോര്ഡ് മുന് അംഗം എന് വിജയകുമാറിനെയാണ് എസ്ഐടി അറസ്റ്റ് ചെയ്തത്. സ്വര്ണക്കൊള്ള നടന്ന 2019ല് എ പത്മകുമാര് പ്രസിഡന്റ് ആയിരുന്ന തിരുവിതാംകൂര് ദേവസ്വം ബോര്ഡ് ഭരണസമിതിയില് അംഗമായിരുന്നു എന് വിജയകുമാര്. സിപിഎം പ്രതിനിധിയായാണ് ഭരണസമിതിയില് എത്തിയത്. കെ പി ശങ്കര്ദാസ് ആണ് അന്നത്തെ ഭരണസമിതിയില് ഉണ്ടായിരുന്ന മൂന്നാമത്തെയാള്.
വിജയകുമാറും ശങ്കര്ദാസും മുന്കൂര് ജാമ്യത്തിനായി കൊല്ലം വിജിലന്സ് കോടതിയെ സമീപിച്ചിരുന്നു. ഇതില് വിധി വരുന്നതിന് മുന്പായിരുന്നു വിജയകുമാറിന്റെ അറസ്റ്റ്. സ്വര്ണക്കൊള്ളയില് അന്നത്തെ ഉദ്യോഗസ്ഥര്ക്കാണ് പങ്കെന്നായിരുന്നു വിജയകുമാര് വാദിച്ചിരുന്നത്. പത്മകുമാറിനെ അറസ്റ്റ് ചെയ്ത ശേഷം മറ്റു ഭരണസമിതി അംഗങ്ങള്ക്കെതിരെ എസ്ഐടി നടപടി സ്വീകരിക്കാത്തതില് കഴിഞ്ഞദിവസം ഹൈക്കോടതി ആശ്ചര്യം പ്രകടിപ്പിച്ചിരുന്നു. ഈ പശ്ചാത്തലത്തിലാണ് എസ്ഐടിയുടെ നടപടി.
കഴിഞ്ഞ ദിവസം സ്വര്ണക്കൊള്ളയില് ചോദ്യം ചെയ്യുന്നതിനായി വിജയകുമാറിനും ശങ്കര്ദാസിനും എസ്ഐടി നോട്ടീസ് നല്കിയിരുന്നു. എന്നാല് കേസില് കൊല്ലം വിജിലന്സ് കോടതിയില് മുന്കൂര് ജാമ്യഹര്ജി നല്കിയതായി ചൂണ്ടിക്കാട്ടി ഇരുവരും എസ്ഐടി മുന്പാകെ ഹാജരായിരുന്നില്ല. അതിനിടയാണ് ഇപ്പോള് വിജയകുമാറിനെ എസ്ഐടി അറസ്റ്റ് ചെയ്തത്.
Recent Comments