by Midhun HP News | Oct 27, 2026 | Latest News, ദേശീയ വാർത്ത
ആപ്പിള്‍ സ്റ്റോറുകളിലെ റിട്ടേണ്‍ തട്ടിപ്പുകള്‍ക്കും വ്യാജ തിരിച്ചുവരവുകള്‍ക്കും തടയിടാന്‍ പുതിയ ആന്റി-തെഫ്റ്റ് സ്‌കാനിങ് സംവിധാനവുമായി ആപ്പിള്‍ രംഗത്ത്. വ്യാജന്മാര്‍ പുതിയ ഐഫോണുകള്‍ വാങ്ങി അവയുടെ അകത്തെ ഘടകങ്ങളോ പാര്‍ട്‌സുകളോ ഊരിയെടുത്ത ശേഷം, ഒറിജിനല്‍ പോലെ സീല്‍ ചെയ്ത് തിരികെ സ്റ്റോറുകളില്‍ നല്‍കുന്ന തട്ടിപ്പ് രീതികള്‍ക്ക് അറുതി വരുത്താനാണ് പുതിയ സാങ്കേതികവിദ്യ.
സാധാരണയായി ഉപഭോക്താക്കള്‍ ഐഫോണ്‍ തിരികെ നല്‍കുമ്പോള്‍, ഉത്പന്നം കൃത്യമാണോ എന്ന് പരിശോധിക്കാന്‍ ജീവനക്കാര്‍ പാക്കിങ്ങിന്റെ സീല്‍ പൊട്ടിച്ച് ബോക്‌സ് തുറക്കേണ്ടി വരാറുണ്ട്. സീല്‍ പൊട്ടിച്ചു കഴിഞ്ഞാല്‍ ആ ഉത്പന്നം വീണ്ടും സ്റ്റോക്ക് സെല്‍ഫിലേക്ക് നേരിട്ട് മാറ്റാന്‍ കഴിയില്ല. പകരം അവ വെയര്‍ഹൗസുകളിലേക്ക് പ്രോസസിങ്ങിനായി അയക്കേണ്ടി വരുന്നു. ഇത് ആപ്പിളിന് വലിയ തോതിലുള്ള ഇന്‍വെന്ററി നഷ്ടങ്ങള്‍ ഉണ്ടാക്കുന്നുണ്ട്.
എന്നാല്‍ ഈ പുതിയ സ്‌കാനര്‍ ഉപയോഗിച്ച്, ഐഫോണ്‍ ബോക്‌സ് സീല്‍ പൊട്ടിക്കാതെ തന്നെ അകത്തുള്ള ഫോണ്‍ ഒറിജിനലാണോ എന്നും അതിലെ എല്ലാ ഭാഗങ്ങളും കേടുകൂടാതെ ഇരിപ്പുണ്ടോ എന്നും പരിശോധിക്കാന്‍ സാധിക്കും. ആപ്പിള്‍ സ്റ്റോറുകളില്‍ ഇതിനകം ഉപയോഗത്തിലുള്ള ‘പ്രെസ്റ്റോ’ സാങ്കേതികവിദ്യയുടെ അടിസ്ഥാനത്തിലാണ് പുതിയ സ്‌കാനിങ് ഡിവൈസ് വികസിപ്പിച്ചിരിക്കുന്നത്.
പുതിയ സംവിധാനം വ്യാജന്മാര്‍ക്ക് പണിയാകുമ്പോള്‍, സാധാരണ ഉപഭോക്താക്കള്‍ക്ക് വലിയ ആശ്വാസമാകും. ഐഫോണ്‍ വാങ്ങി, മനസ്സില്ലാതെ തിരികെ നല്‍കുന്ന യഥാര്‍ഥ ഉപഭോക്താക്കള്‍ക്ക് കൂടുതല്‍ വേഗത്തിലും തടസ്സങ്ങളില്ലാതെയും റിട്ടേണ്‍ നടപടികള്‍ പൂര്‍ത്തിയാക്കാന്‍ ഇതുവഴി സാധിക്കും. പാക്കറ്റ് തുറക്കാതെ തന്നെ പരിശോധന വിജയകരമായി പൂര്‍ത്തിയാകുന്നതിനാല്‍, സീല്‍ ചെയ്ത ബോക്‌സ് യാതൊരു പ്രശ്‌നവുമില്ലാതെ വീണ്ടും സ്റ്റോക്കിലേക്ക് എടുത്തു വില്‍പന നടത്താന്‍ സ്റ്റോറുകള്‍ക്ക് സാധിക്കും. പുതിയ ഐഫോണ്‍ മോഡലുകളുടെ വരവോടെ സ്റ്റോറുകളില്‍ വര്‍ധിച്ചുവരുന്ന റിട്ടേണ്‍ തിരക്കുകളും തട്ടിപ്പുകളും ഒഴിവാക്കാന്‍ ആപ്പിളിന്റെ ഈ പുതിയ നീക്കം സഹായിക്കുമെന്നാണ് വിലയിരുത്തപ്പെടുന്നത്.
by Midhun HP News | Oct 27, 2026 | Latest News, ജില്ലാ വാർത്ത
ചിറയിൻകീഴ്: പെരുങ്ങുഴി റെയിൽവേ ഗേറ്റ് അടിക്കടി പണിമുടക്കുന്നത് ഇതുവഴിയുള്ള യാത്രക്കാർക്ക് ദുരിതമാകുന്നു. ഇക്കഴിഞ്ഞ ദിവസം അപ്രതീക്ഷിതമായി ഗേറ്റ് അടഞ്ഞത് കാരണം ഇതുവഴിയുള്ള നൂറുകണക്കിന് യാത്രക്കാരാണ് ബുദ്ധിമുട്ടിലായത്.
ഗേറ്റിലെ റോപ്പ് തെന്നി മാറിയതാണ് കഴിഞ്ഞദിവസം ഗേറ്റ് അടഞ്ഞു കിടക്കുന്നതിന് കാരണമായത്. ബുധനാഴ്ച രാത്രി 6.30 തോടെ അടഞ്ഞ ഗേറ്റ് വ്യാഴാഴ്ച ഉച്ചയ്ക്കാണ് തുറന്നത്. ജോലിക്കിടക്കം വിവിധ ആവശ്യങ്ങൾക്കായി ഗേറ്റ് കടന്ന് പോയവർ രാത്രിയിൽ തിരിച്ചെത്തിയപ്പോൾ ഗേറ്റ് അടഞ്ഞത് കാരണം ഗേറ്റ് കടക്കാനാകാതെ പലരും വാഹനങ്ങൾ റോഡ് വക്കിലും സമീപത്തെ വീടുകളിലും പാർക്ക് ചെയ്ത ശേഷം കിലോമീറ്റർ താണ്ടിയാണ് വീടുകളിലെത്തിയത്.
ഇവിടത്തെ ഗേറ്റ് അടപ്പ് കൊണ്ടുതന്നെ നാട്ടുകാർ പൊറുതിമുട്ടിയിരിക്കുമ്പോഴാണ് അപ്രതീക്ഷിതമായി മണിക്കൂറുകളോളം ഗേറ്റ് അടഞ്ഞു കിടക്കുന്നത്. സിഗ്നൽ സിസ്റ്റം ഇല്ലാത്തതിനാൽ പലപ്പോഴും നാലു അഞ്ചും ട്രെയിനുകൾക്ക് വരെ ഇവിടെ ഗേറ്റ് അടഞ്ഞു കിടക്കാറുണ്ട്.
ഗേറ്റ് തുറന്നാൽ തന്നെ മിനിറ്റുകൾക്കുള്ളിൽ ഗേറ്റ് അടയ്ക്കുകയാണ് പതിവ്. ഇക്കാരണത്താൽ തന്നെ ഇതുവഴിയുള്ള യാത്രക്കാർക്ക് വിലയേറിയ സമയമാണ് പലപ്പോഴും ഗേറ്റിനു മുന്നിൽ കാത്ത് കിടക്കേണ്ടി വരുന്നത്. അതിനിടയിലാണ് ഇത്തരത്തിലുള്ള അപ്രതീക്ഷിത ഗേറ്റ് അടവുകൾ കൂടി. മൂന്നു വശവും കായലിനാൽ ചുറ്റപ്പെട്ട പ്രദേശമായതിനാൽ ഗേറ്റ് അടഞ്ഞാൽ ഗേറ്റിനപ്പുറം ഉള്ളവർക്ക് പുറംലോകത്ത് എത്താൻ തന്നെ സാധിക്കാത്ത അവസ്ഥയാണ്. കുഴിയം വഴി ഒരു റോഡ് ഉണ്ടെങ്കിലും ചെമ്മൺ പാത ആയതിനാൽ ഇതുവഴിയുള്ള യാത്ര മഴക്കാലത്ത് പ്രത്യേകിച്ചും അസാധ്യമാണ്. ഇത്തരം സന്ദർഭങ്ങളിൽ ആശുപത്രി കേസോ, വിദൂരങ്ങളിൽ നിന്നും ബന്ധുവീടുകളിലെത്തി തിരികെ ഗേറ്റ് കടക്കേണ്ട സന്ദർഭങ്ങളോ ആണ് വരുന്നതെങ്കിൽ അത്തരക്കാരുടെ അവസ്ഥ പരമ ദയനീയമാകും.
ദിനംപ്രതി 100 കണക്കിന് ആളുകൾ ആശ്രയിക്കുന്ന ചിറയിൻകീഴ് താലൂക്കിലെ പ്രധാന റെയിൽവേ ഗേറ്റുകളിൽ ഒന്നാണിത്. ഇവിടെ ഒരു സിഗ്നൽ സിസ്റ്റം വേണമെന്ന ആവശ്യത്തിന് പതിറ്റാണ്ടുകൾ പഴക്കമുണ്ട്. നിവേദനങ്ങളും പരാതികളും നൽകി മടുത്തിരിക്കുകയാണ് നാട്ടുകാർ. റെയിൽവേഗറ്റിനപ്പുറമുള്ള നൂറുകണക്കിന് കുടുംബങ്ങൾ ഈ റെയിൽവേ ഗേറ്റിന് ആശ്രയിച്ചാണ് യാത്ര ചെയ്യുന്നത്. അടിക്കടി ഗേറ്റ് പണി ഒപ്പിക്കുന്നതിനാൽ ഇവിടെ ഒരു ഇലക്ട്രിക് ഗേറ്റ് വേണം എന്നുള്ള ആവശ്യവും ശക്തമാണ്.
by Midhun HP News | Oct 27, 2026 | Latest News, കേരളം
കൊല്ലം: ട്രെയിന്‍ യാത്രയ്ക്കിടെ ഹെഡ്ഫോണുകളോ അത്യാവശ്യ ഉപയോഗത്തിനുള്ള മറ്റെന്തെങ്കിലും സാധനമോ വീട്ടില്‍ വെച്ചു മറന്നുപോയാല്‍ ഇനി പരിഹാരം ഒരു ക്ലിക്ക് അകലെ മാത്രം. യാത്രക്കാര്‍ക്ക് ഓണ്‍ലൈനായി ഓര്‍ഡര്‍ ചെയ്ത് സാധനങ്ങള്‍ ട്രെയിനിലെയോ അല്ലെങ്കില്‍ സ്റ്റേഷനുകളിലെ പ്രത്യേക കിയോസ്‌കുകളിലോ എത്തിച്ചുനല്‍കാന്‍ സതേണ്‍ റെയില്‍വേ പദ്ധതിയിടുന്നു.
സ്വിഗ്ഗി, സൊമാറ്റോ തുടങ്ങിയ പ്ലാറ്റ്ഫോമുകള്‍ വഴി നിലവില്‍ ഭക്ഷണം ലഭ്യമാക്കുന്നതിന് പുറമെയാണ് കേരളത്തിലെ തെരഞ്ഞെടുക്കപ്പെട്ട റെയില്‍വേ സ്റ്റേഷനുകളില്‍ ആപ്പ് വഴിയുള്ള ഡെലിവറി സേവനം വ്യാപിപ്പിക്കാന്‍ സതേണ്‍ റെയില്‍വേ ലക്ഷ്യമിടുന്നത്. ഇ-കൊമേഴ്സ് പ്ലാറ്റ്ഫോമുകള്‍, ക്വിക്ക്-കൊമേഴ്സ് ദാതാക്കള്‍ എന്നിവയിലൂടെ യാത്രക്കാര്‍ക്ക് ആവശ്യമായ നിത്യോപയോഗ സാധനങ്ങള്‍ യാത്രയ്ക്കിടയില്‍ ഓര്‍ഡര്‍ ചെയ്യാന്‍ ഈ പദ്ധതി സഹായിക്കും.
തിരുവനന്തപുരം സെന്‍ട്രല്‍, കൊല്ലം ജങ്ഷന്‍, കായംകുളം ജങ്ഷന്‍, ചെങ്ങന്നൂര്‍, കോട്ടയം, ആലപ്പുഴ, എറണാകുളം ടൗണ്‍, എറണാകുളം ജങ്ഷന്‍, ആലുവ, തൃശൂര്‍ എന്നീ 10 സ്റ്റേഷനുകളാണ് തിരുവനന്തപുരം ഡിവിഷനില്‍ ഈ പദ്ധതിക്കായി തിരഞ്ഞെടുത്തിട്ടുള്ളത്. കോഴിക്കോട്, പാലക്കാട് ജങ്ഷന്‍, കണ്ണൂര്‍, ഷൊര്‍ണൂര്‍, കാസര്‍കോട്, തലശ്ശേരി, തിരൂര്‍, വടകര, പയ്യന്നൂര്‍, കൊയിലാണ്ടി, ഒറ്റപ്പാലം എന്നീ 11 സ്റ്റേഷനുകളാണ് പാലക്കാട് ഡിവിഷനില്‍ ഉള്‍പ്പെടുത്തിയിരിക്കുന്നത്.
റെയില്‍വേ സ്റ്റേഷനുകളില്‍ വ്യാപാരികള്‍ക്കായി കിയോസ്‌ക് സജ്ജീകരിക്കാന്‍ പദ്ധതിയിടുന്നുണ്ടെന്ന് സതേണ്‍ റെയില്‍വേ തിരുവനന്തപുരം ഡിവിഷനിലെ മുതിര്‍ന്ന ഉദ്യോഗസ്ഥന്‍ വ്യക്തമാക്കി. യാത്രക്കാരുടെ ആവശ്യാനുസരണം സാധനങ്ങള്‍ ട്രെയിനുകളില്‍ നേരിട്ട് എത്തിച്ചുനല്‍കുന്നതാണ് രണ്ടാമത്തെ മാര്‍ഗം. യാത്ര കഴിഞ്ഞ് സ്റ്റേഷനില്‍ ഇറങ്ങുമ്പോള്‍ ഓര്‍ഡര്‍ ചെയ്ത സാധനങ്ങള്‍ കൈപ്പറ്റാന്‍ താല്‍പ്പര്യപ്പെടുന്നവര്‍ക്കായി ഈ കിയോസ്‌കുകള്‍ പ്രത്യേക ഡെലിവറി പോയിന്റുകളായും പ്രവര്‍ത്തിക്കും.
ഉദാഹരണത്തിന്, ഒരു യാത്രകന്‍ ട്രെയിനിറങ്ങി വീട്ടിലേക്ക് മടങ്ങുമ്പോള്‍ ഈ കിയോസ്‌ക് ഡെലിവറി പോയിന്റായി തെരഞ്ഞെടുത്ത് വഴിയില്‍ വെച്ച് സാധനങ്ങള്‍ കൈപ്പറ്റാം. കൂടാതെ ട്രെയിനില്‍ യാത്ര ചെയ്യുമ്പോഴും ഓര്‍ഡര്‍ ചെയ്യാം. ഫുഡ് ഡെലിവറി ആപ്പുകളില്‍ നിന്ന് വ്യത്യസ്തമായി ഇത് യാത്രക്കാര്‍ക്ക് രണ്ട് സൗകര്യങ്ങളും നല്‍കുന്നുവെന്നും ഉദ്യോഗസ്ഥന്‍ കൂട്ടിച്ചേര്‍ത്തു.
ഫുഡ് ഡെലിവറി പ്ലാറ്റ്ഫോമുകള്‍ ട്രെയിനുകളില്‍ ഭക്ഷണം എത്തിച്ചുനല്‍കുന്നുണ്ടെങ്കിലും, ഈ പുതിയ പദ്ധതിയിലൂടെ കൂടുതല്‍ നിത്യോപയോഗ സാധനങ്ങള്‍ യാത്രക്കാര്‍ക്ക് ലഭ്യമാകും. യാത്ര പുറപ്പെടുന്നതിന് മുന്‍പ് അത്യാവശ്യ സാധനങ്ങള്‍ എടുക്കാന്‍ മറന്നുപോകുന്ന സാഹചര്യങ്ങളില്‍ സ്റ്റേഷനുകളിലെ പരിമിതമായ സ്റ്റോപ്പുകളെ ആശ്രയിക്കുന്നതിന് പകരം ഇത് യാത്രക്കാര്‍ക്ക് മികച്ച ബദലാകും.
by Midhun HP News | Oct 27, 2026 | Latest News, ദേശീയ വാർത്ത
ഡല്‍ഹി: കേന്ദ്ര സര്‍ക്കാരിന്റെ ഡേറ്റാ സ്വകാര്യതാ നിയമത്തിനെതിരെ (ഡിപിഡിപി ആക്ട്) എന്‍ഡിടിവി, സിഎന്‍എന്‍-ന്യൂസ് 18 ഉള്‍പ്പെടെയുള്ള 21 പ്രമുഖ വാര്‍ത്താ സ്ഥാപനങ്ങളുടെ കൂട്ടായ്മ സുപ്രീം കോടതിയില്‍ ഹര്‍ജി സമര്‍പ്പിച്ചു. നിയമം അന്വേഷണാത്മക പത്രപ്രവര്‍ത്തനത്തെ പ്രതികൂലമായി ബാധിക്കുമെന്ന് ഹര്‍ജിയില്‍ ചൂണ്ടിക്കാണിക്കുന്നു. റിപ്പോര്‍ട്ടുകള്‍ തയ്യാറാക്കുന്നതിന് മുമ്പ് വ്യക്തികളില്‍ നിന്ന് മുന്‍കൂര്‍ അനുമതി തേടാന്‍ ഈ നിയമം മാധ്യമപ്രവര്‍ത്തകരെ നിര്‍ബന്ധിതരാക്കുമെന്നും, സര്‍ക്കാര്‍ ആവശ്യപ്പെടുമ്പോള്‍ രഹസ്യ വിവരങ്ങളുടെ ഉറവിടങ്ങള്‍ വെളിപ്പെടുത്താന്‍ ഇത് ഇടയാക്കുമെന്നും ഹര്‍ജിക്കാര്‍ ആശങ്ക പ്രകടിപ്പിച്ചു. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് ഹര്‍ജി പരിഗണിക്കും.
ഉപയോക്താക്കളുടെ ഡിജിറ്റല്‍ വ്യക്തിഗത ഡേറ്റ സംരക്ഷിക്കുന്നതിനായി നരേന്ദ്ര മോദി സര്‍ക്കാര്‍ കഴിഞ്ഞ വര്‍ഷം പ്രഖ്യാപിച്ച ഡേറ്റാ സ്വകാര്യതാ നിയമത്തിന്റെ വ്യവസ്ഥകളെയാണ് ഹര്‍ജി ചോദ്യം ചെയ്യുന്നത്. മെറ്റ, ഗൂഗിള്‍ തുടങ്ങിയ ഡിജിറ്റല്‍ പ്ലാറ്റ്ഫോമുകള്‍ക്ക് കര്‍ശന വ്യവസ്ഥകള്‍ ഈ നിയമം ഏര്‍പ്പെടുത്തുന്നുണ്ട്. എന്നാല്‍ മാധ്യമ സ്ഥാപനങ്ങള്‍ക്ക് ഇതില്‍ ഇളവുകള്‍ നല്‍കാത്തത് പത്രസ്വാതന്ത്ര്യത്തിന് മേലുള്ള കടന്നുകയറ്റമാണെന്ന് ഹര്‍ജിക്കാര്‍ വാദിക്കുന്നു. ഡിജിറ്റല്‍ ന്യൂസ് പബ്ലിഷേഴ്സ് അസോസിയേഷന്റെ (ഡിഎന്‍പിഎ) നേതൃത്വത്തിലാണ് ഹര്‍ജി ഫയല്‍ ചെയ്തിരിക്കുന്നത്. നിയമം റദ്ദാക്കുന്നത് ഉള്‍പ്പെടെയുള്ള ഉചിതമായ ഉത്തരവുകളും നിര്‍ദേശങ്ങളും പുറപ്പെടുവിക്കണമെന്ന് അസോസിയേഷന്‍ കോടതിയോട് അഭ്യര്‍ത്ഥിച്ചു.
ഡിപിഡിപി നിയമത്തിലെ സെക്ഷന്‍ 7, 17(2), 18, 19, 27, 29, 36, 37, 44(3) എന്നിവയും, സെക്ഷന്‍ 40 പ്രകാരം രൂപീകരിച്ച ചട്ടങ്ങളിലെ റൂള്‍ 16, 17, 23 എന്നിവ ഭരണഘടനാവിരുദ്ധമായി പ്രഖ്യാപിക്കണമെന്ന് ഹര്‍ജിയില്‍ ആവശ്യപ്പെടുന്നുണ്ട്. ആര്‍ട്ടിക്കിള്‍ 14, 19(1)(a) എന്നിവ നല്‍കുന്ന മൗലികാവകാശങ്ങളുടെ ലംഘനമാണിതെന്ന് അസോസിയേഷന്‍ വ്യക്തമാക്കുന്നു. മാധ്യമപ്രവര്‍ത്തനം, ഗ്രൗണ്ട് റിപ്പോര്‍ട്ടിങ്, പൗരന്മാര്‍, വിസില്‍ബ്ലോവര്‍മാര്‍, ആര്‍ടിഐ ആക്ടിവിസ്റ്റുകള്‍ തുടങ്ങിയവരുടെ പ്രവര്‍ത്തനങ്ങളെ ഈ നിയമം പ്രതികൂലമായി ബാധിക്കും.
പ്രസാധകര്‍, എഡിറ്റര്‍മാര്‍, റിപ്പോര്‍ട്ടര്‍മാര്‍ എന്നിവരെല്ലാം കര്‍ശനമായ നോട്ടീസ്, മുന്‍കൂര്‍ സമ്മതം, ഡേറ്റ നിര്‍ബന്ധിതമായി നീക്കം ചെയ്യല്‍ തുടങ്ങിയ ചട്ടക്കൂടുകള്‍ക്ക് കീഴിലാകും. ഇത് മാധ്യമങ്ങളുടെ സാധാരണ പ്രവര്‍ത്തനരീതിയുമായി പൊരുത്തപ്പെടുന്നതല്ല. പൊതുതാത്പര്യമുള്ള പ്രവര്‍ത്തനങ്ങളുമായി ബന്ധപ്പെട്ട വിവരങ്ങള്‍ പോലും വെളിപ്പെടുത്തുന്നതില്‍ നിന്ന് തടയുന്ന സെക്ഷന്‍ 44(3) നിയമപരമായി നിലനില്‍ക്കില്ല. സ്വകാര്യതയ്ക്കുള്ള അവകാശവും വിവരങ്ങളറിയാനുള്ള അവകാശവും തമ്മില്‍ നിലനിന്നിരുന്ന സന്തുലിതാവസ്ഥയെയാണ് ഈ വ്യവസ്ഥകള്‍ തകിടം മറിക്കുന്നതെന്നും ഹര്‍ജിയില്‍ ചൂണ്ടിക്കാണിക്കുന്നു.
by Midhun HP News | Oct 27, 2026 | Latest News, കേരളം
കണ്ണൂർ: കണ്ണൂർ സിറ്റി പൊലീസ് ഡോഗ് സ്ക്വാഡിലെ സ്ഫോടക വസ്തു പരിശോധനാ വിഭാഗത്തിലെ വിശ്വസ്ത അംഗമായിരുന്ന ‘ചേതക്’ ഇനി ഓർമ്മ. സേനയ്ക്ക് പത്തുവർഷത്തോളം സ്തുത്യർഹവും നിസ്തുലവുമായ സേവനം നൽകിയ ചേതക്ക് പൂർണ്ണ ഔദ്യോഗിക ബഹുമതികളോടെ വിടവാങ്ങി. സഹപ്രവർത്തകരായ പൊലീസ് ഉദ്യോഗസ്ഥരുടെയും സേനാംഗങ്ങളുടെയും സാന്നിധ്യത്തിൽ കണ്ണീരോടെയാണ് സേന ചേതക്കിന് അന്ത്യോപചാരം അർപ്പിച്ചത്.
മധ്യപ്രദേശിലെ ബിഎസ്എഫ് അക്കാദമി തെക്കൻപൂരിൽനിന്ന് കഠിനമായ സ്ഫോടകവസ്തു പരിശോധനാ പരിശീലനം വിജയകരമായി പൂർത്തിയാക്കിയ ചേതക്ക്, 2017 മുതലാണ് കണ്ണൂർ സിറ്റി പൊലീസ് ഡോഗ് സ്ക്വാഡിന്റെ ഭാഗമായി ഔദ്യോഗിക സേവനം ആരംഭിച്ചത്. സർവീസ് കാലാവധി പൂർത്തിയായതിനെ തുടർന്ന് ആറുമാസത്തെ സേവന കാലാവധി കൂടി നീട്ടിനൽകിയിരുന്നു. എന്നാൽ, ഇതിനിടയിൽ പിടിപെട്ട ഗുരുതരമായ കിഡ്നി സംബന്ധമായ അസുഖത്തെ തുടർന്ന് ജില്ലാ മൃഗാശുപത്രിയിൽ വിദഗ്ദ്ധ ചികിത്സയിലിരിക്കെയാണ് അന്ത്യം സംഭവിച്ചത്.
കണ്ണൂർ ജില്ലയിലെ രാഷ്ട്രീയ സംഘർഷ ബാധിതവും അതീവ സുരക്ഷ ആവശ്യമുള്ളതുമായ തലശ്ശേരി, പാനൂർ, കൂത്തുപറമ്പ് തുടങ്ങിയ വിവിധ മേഖലകളിൽ നടന്ന നിരവധി നിർണായക സ്ഫോടക വസ്തു പരിശോധനകളിൽ ചേതക്ക് മുൻനിരയിൽ തന്നെയുണ്ടായിരുന്നു. ഒളിപ്പിച്ചുവെച്ച സ്ഫോടകവസ്തുക്കളും ബോംബുകളും മണത്തുപിടിക്കുന്നതിൽ ചേതക്ക് കാട്ടിയ അസാധാരണ വൈദഗ്ധ്യം സേനയ്ക്ക് പലപ്പോഴും വലിയ കരുത്തായി മാറി.
കൂടാതെ, സുരക്ഷാ പരിശോധനകളുടെ ഭാഗമായി ഒരു വർഷത്തോളം കണ്ണൂർ അന്താരാഷ്ട്ര വിമാനത്താവളത്തിലും ചേതക്കിന്റെ സേവനം വിന്യസിച്ചിരുന്നു. സീനിയർ സിവിൽ പൊലീസ് ഓഫീസർമാരായ കെ. സരീഷ്, എം.വി. രതീഷ് എന്നിവരായിരുന്നു ചേതക്കിന്റെ പ്രിയപ്പെട്ട ഹാൻഡ്ലർമാർ.
ചേതക്കിന്റെ അപ്രതീക്ഷിത വേർപാടിൽ കണ്ണൂർ സിറ്റി പൊലീസ് കമ്മീഷണർ ബി.വി. വിജയ ഭരത് റെഡ്ഡി ഐപിഎസ് അഗാധമായ അനുശോചനം രേഖപ്പെടുത്തി. തുടർന്ന് നടന്ന സംസ്കാര ചടങ്ങുകളിൽ കണ്ണൂർ സിറ്റി നാർക്കോട്ടിക് സെൽ അസിസ്റ്റന്റ് കമ്മീഷണർ ഓഫ് പൊലീസ് വി.വി. മനോജ്, കെഎപി നാലാം ബറ്റാലിയൻ അസിസ്റ്റന്റ് കമാൻഡന്റ് എ. രാജീവൻ, കണ്ണൂർ സിറ്റി ഡിഎച്ച്ക്യു റിസർവ് ഇൻസ്പെക്ടർ പി.ആർ. ബിജു, കണ്ണൂർ സിറ്റി കെ.9 സ്ക്വാഡ് ഇൻചാർജ് എസ്ഐ ജയ്സൺ ജോർജ്, കണ്ണൂർ റൂറൽ കെ.9 സ്ക്വാഡ് ഇൻചാർജ് എസ്ഐ പി.വി. ബാബുരാജ്, കാസർഗോഡ് കെ.9 സ്ക്വാഡ് ഇൻചാർജ് എസ്‌സിപിഒ കെ. ഷീബു എന്നിവരുൾപ്പെടെയുള്ള ഉന്നത പൊലീസ് ഉദ്യോഗസ്ഥർ ചേതക്കിന്റെ ഭൗതികശരീരത്തിൽ അന്ത്യോപചാരമർപ്പിച്ചു. തുടർന്ന് കേരള പൊലീസിന്റെ ഔദ്യോഗിക ഗാർഡ് ഓഫ് ഓണർ ഉൾപ്പെടെയുള്ള പൂർണ്ണ ബഹുമതികളോടെ ഭൗതികശരീരം സംസ്കരിച്ചു.
by Midhun HP News | Oct 27, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില വീണ്ടും 1,05,000ന് മുകളില്‍. ഇന്ന് പവന് ഒറ്റയടിക്ക് 400 രൂപയാണ് വര്‍ധിച്ചത്. 1,05,080 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 50 രൂപയാണ് വര്‍ധിച്ചത്. 13,135 രൂപയാണ് ഒരു ഗ്രാം സ്വര്‍ണത്തിന്റെ വില.
രണ്ടാഴ്ചയ്ക്കിടെ ഏകദേശം 7000 രൂപ ഇടിഞ്ഞ ശേഷം കഴിഞ്ഞ ദിവസം മുതലാണ് സ്വര്‍ണവില തിരിച്ചുകയറാന്‍ തുടങ്ങിയത്. ആഗോള വിപണിയില്‍ എണ്ണവില കുറഞ്ഞത് അടക്കമുള്ള ഘടകങ്ങളാണ് സ്വര്‍ണവിലയെ സ്വാധീനിക്കുന്നത്. എണ്ണവില കൂടുന്നത് പണപ്പെരുപ്പനിരക്ക് ഉയരാന്‍ ഇടയാക്കും. അങ്ങനെയെങ്കില്‍ പണപ്പെരുപ്പം പിടിച്ചുനിര്‍ത്താന്‍ യുഎസ് ഫെഡറല്‍ റിസര്‍വ് പലിശനിരക്ക് ഉടന്‍ തന്നെ വീണ്ടും കൂട്ടുമെന്നായിരുന്നു റിപ്പോര്‍ട്ടുകള്‍. എന്നാല്‍ എണ്ണവില കുറഞ്ഞതോടെ പലിശനിരക്ക് കൂട്ടാനുള്ള സാധ്യതയ്ക്ക് മങ്ങലേറ്റു എന്നുള്ള സൂചനകളാണ് സ്വര്‍ണവിലയില്‍ പ്രതിഫലിച്ചത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
Recent Comments