തിരുവനന്തപുരം കഴക്കൂട്ടത്ത് കാറിൽ കൊച്ചുകുട്ടിയുമായി അപകടയാത്ര നടത്തിയ സംഭവത്തിൽ സംസ്ഥാന ബാലാവകാശ സംരക്ഷണ കമ്മിഷൻ സ്വമേധയാ കേസെടുത്തു. മാധ്യമ വാർത്തകളുടെ അടിസ്ഥാനത്തിലാണ് കേസ്. കുട്ടിയെ ഡ്രൈവിംഗ് സീറ്റിൽ ഒപ്പം ഇരുത്തി, കുട്ടി സ്റ്റിയറിങ്ങിൽ പിടിച്ചിരിക്കുന്ന ദൃശ്യമാണ് മാധ്യമങ്ങളിലൂടെ പുറത്തുവന്നിരിക്കുന്നത്. സംഭവത്തിൽ ജില്ലാ പൊലിസ് മേധാവി, ആർ. ടി. ഒ എന്നിവരോട് കമ്മിഷൻ റിപ്പോർട്ട് ആവശ്യപ്പെട്ടു.
അബുദാബി: അബുദാബി ബിഗ് ടിക്കറ്റില്‍ വീണ്ടും മലയാളിക്ക് ഭാഗ്യം. ഒക്ടോബര്‍ മാസത്തെ മൂന്നാമത്തെ വീക്കിലി ഡ്രോയില്‍ വിജയിച്ച നാല് പേരില്‍ ഒരാളാണ് മലയാളിയായ ജിജോയ് വിശ്വന്‍. 2007 മുതല്‍ ഷാര്‍ജയില്‍ താമസിക്കുന്ന ജിജോയ്ക്ക് 200 ഗ്രാം 24 കാരറ്റ് സ്വര്‍ണ്ണക്കട്ടിയാണ് ലഭിച്ചത്. നിലവിലെ വിപണി നിരക്ക് അനുസരിച്ച് ഇതിന് ഏകദേശം 96,500 ദിര്‍ഹം (25 ലക്ഷം രൂപ) വിലവരും. ഒക്ടോബറിലെ മൂന്നാമത്തെ പ്രതിവാര നറുക്കെടുപ്പില്‍ നാല് ഇന്ത്യക്കാരാണ് സമ്മാനം നേടിയത്.
അഞ്ച് മുതല്‍ പത്ത് പേര്‍ വരെയുള്ള ഒരു സംഘത്തിനൊപ്പമാണ് ജിജോയ് ബിഗ് ടിക്കറ്റ് എടുക്കാറ്. ബിഗ് ടിക്കറ്റ് പ്രതിനിധി വിളിച്ചപ്പോള്‍ ജിജോയ് ഡ്രോയുടെ ഫലത്തെക്കുറിച്ച് അറിഞ്ഞിരുന്നില്ല. വെബ്‌സൈറ്റില്‍ നോക്കിയാണ് അദ്ദേഹം ഫലം ശരിയാണെന്ന് ഉറപ്പുവരുത്തിയത്. സമ്മാനത്തുക തുല്യമായി വീതിക്കാനും തനിക്ക് ലഭിക്കുന്ന പങ്ക്, നാട്ടിലുള്ള കുടുംബത്തിനായി ചെലവഴിക്കാനുമാണ് അദ്ദേഹം ആഗ്രഹിക്കുന്നത്.
ബഹ്റൈനില്‍ ഓഫീസ് ബോയിയായി ജോലി ചെയ്യുന്ന മറ്റൊരു ഇന്ത്യക്കാരനും ഭാഗ്യം തുണച്ചു. 45 വയസ്സുകാരനായ അരുണ കൃഷ്ണപ്പ കിടിയൂരാണ് വിജയി. കഴിഞ്ഞ 23 വര്‍ഷമായി പ്രവാസിയാണ് ഇന്ത്യക്കാരനായ അരുണ. നാല് മാസമായി സുഹൃത്തുക്കള്‍ക്കൊപ്പമാണ് അരുണ ബിഗ് ടിക്കറ്റ് എടുക്കാറ്. സമ്മാനത്തുക എങ്ങനെ ചെലവഴിക്കണമെന്നതില്‍ ഇനിയും തീരുമാനമെടുത്തിട്ടില്ലെന്ന് അരുണ പറഞ്ഞു. അപ്രതീക്ഷിതമായി ലഭിച്ച ഈ നേട്ടത്തിന്റെ സന്തോഷത്തിലാണ് ഇദ്ദേഹം.
മൂന്നാമത്തെ വിജയി ബംഗലൂരുവില്‍ നിന്നുള്ള സിവില്‍ എന്‍ജിനീയര്‍ സദാത്തുള്ള ഷരീഫ് ആണ്. ദുബൈയിലാണ് ഒരു വര്‍ഷമായി താമസിക്കുന്നത്. മുംബൈയില്‍ നിന്നുള്ള മനിഷ ഹര്‍ഷല്‍ കസാത് ആണ് മറ്റൊരു വിജയി. ഷാര്‍ജയിലാണ് ഒരു ദശകമായി അവര്‍ ജീവിക്കുന്നത്. മൂന്നു വര്‍ഷമായി ബിഗ് ടിക്കറ്റില്‍ പങ്കെടുക്കുന്നുണ്ടെന്ന് മനിഷ പറഞ്ഞു.
മുംബൈ: മഹാരാഷ്ട്രയിലെ കോലാപൂരില്‍ വിചിത്രമായ മോഷണക്കേസില്‍ 19കാരന്‍ പൊലീസ് പിടിയില്‍. ആഡംബര എസ്‌യുവിയായ മഹീന്ദ്ര ഥാര്‍ വാങ്ങുന്നതിനായി സ്വന്തം അമ്മാവന്റെ വീട്ടില്‍ നിന്ന് സ്വര്‍ണാഭരണങ്ങള്‍ മോഷ്ടിച്ച സമര്‍ ചവാന്‍ എന്ന യുവാവാണ് അറസ്റ്റിലായത്. താന്‍ കവര്‍ന്ന സ്വര്‍ണം വിറ്റ് കാറുവാങ്ങിയ ശേഷം, വാഹനത്തിന്റെ പൂജയ്ക്കായി ഇരയായ അമ്മാവനെ തന്നെ അതിഥിയായി ക്ഷണിച്ചതാണ് പ്രതിക്ക് വിനയായത്.
കോലാപൂര്‍ ജില്ലയിലെ പന്‍ഹാല താലൂക്കിലുള്ള സാത്വെ ഗ്രാമത്തിലാണ് സംഭവം. സമര്‍ ചവാന്‍ തന്റെ അമ്മാവനായ ഉമേഷ് മാരുതി ചവാന്റെ വീട്ടില്‍ നിന്ന് ഒരു മാസം മുമ്പാണ് സ്വര്‍ണം മോഷ്ടിച്ചത്. ഉമേഷിന്റെ വീട്ടില്‍ സൂക്ഷിച്ചിരുന്ന 21 പവനിലേറെ (175 ഗ്രാം) സ്വര്‍ണാഭരണങ്ങളാണ് സമര്‍ കൈക്കലാക്കിയത്. പിന്നീട് ഈ സ്വര്‍ണം സമീപത്തെ ജ്വല്ലറി ഉടമയ്ക്ക് 10 ലക്ഷം രൂപയ്ക്ക് വില്‍ക്കുകയായിരുന്നു. ഈ പണം ഉപയോഗിച്ചാണ് യുവാവ് മഹീന്ദ്ര ഥാര്‍ എസ്‌യുവി സ്വന്തമാക്കിയത്.
പുതിയ വാഹനം വാങ്ങിയ സന്തോഷത്തില്‍ സമര്‍ ഗ്രാമത്തില്‍ പൂജ സംഘടിപ്പിച്ചു. അമ്മാവന്‍ ഉമേഷ് ചവാനെയും കുടുംബത്തെയുമാണ് വാഹന പൂജയിലേക്ക് സമര്‍ മുഖ്യാതിഥിയായി വിളിച്ചത്. ചടങ്ങിന് പുറപ്പെടും മുമ്പ് വീട്ടിലെ സ്വര്‍ണാഭരണങ്ങള്‍ ധരിക്കാനായി ഉമേഷ് ലോക്കര്‍ തുറന്നു നോക്കിയപ്പോഴാണ് സ്വര്‍ണം നഷ്ടപ്പെട്ട വിവരം അറിയുന്നത്. എന്നാല്‍ വീട്ടിലുണ്ടായിരുന്ന അമ്മൂമ്മയുടെ സ്വര്‍ണം സുരക്ഷിതമായി അവിടെത്തന്നെ ഉണ്ടായിരുന്നു. ഉമേഷിന്റെയും ഭാര്യയുടെയും ആഭരണങ്ങള്‍ മാത്രമാണ് നഷ്ടപ്പെട്ടത്. ഇത് കുടുംബത്തെയും വീടിനേക്കുറിച്ചും നന്നായി അറിയാവുന്ന ആരെങ്കിലും ചെയ്ത മോഷണമാണെന്ന് സംശയമുണ്ടാക്കി.
തുടര്‍ന്ന് ഉമേഷ് പൊലീസ് സ്റ്റേഷനില്‍ പരാതി നല്‍കി. അന്വേഷണം ആരംഭിച്ച പൊലീസിന്, തൊഴിലോ സ്ഥിര വരുമാനമോ ഇല്ലാത്ത സമര്‍ എങ്ങനെ പെട്ടെന്ന് വിലകൂടിയ വാഹനം വാങ്ങിയെന്ന കാര്യത്തില്‍ സംശയം തോന്നി. തുടര്‍ന്ന് നടത്തിയ ചോദ്യംചെയ്യലിലും ബാങ്ക് ഇടപാടുകള്‍ പരിശോധിച്ചതിലും സമര്‍ കുറ്റം സമ്മതിക്കുകയായിരുന്നു. സ്വര്‍ണം നല്‍കിയ ജ്വല്ലറി ഉടമ സംഗ്രാം മോറെയെയും പൊലീസ് അറസ്റ്റ് ചെയ്തു. മോഷ്ടിച്ച സ്വര്‍ണവും പ്രതികള്‍ ഉപയോഗിച്ച വാഹനവും പൊലീസ് കസ്റ്റഡിയില്‍ എടുത്തു. പ്രതികള്‍ക്കെതിരെ കേസെടുത്ത് അന്വേഷണം നടത്തിവരികയാണെന്ന് പൊലീസ് അറിയിച്ചു.
തിരുവനന്തപുരം: ചേരാനെല്ലൂര്‍ വാഹനാപകടത്തില്‍ സ്‌കൂട്ടര്‍ യാത്രക്കാരനായ തട്ടുകടക്കാരന്‍ ജയബാലകൃഷ്ണന്‍ മരിച്ച സംഭവത്തില്‍ പൊലീസിന്റെ ഭാഗത്ത് വീഴ്ചയുണ്ടായിട്ടുണ്ടെന്ന് ആവര്‍ത്തിച്ച് ആഭ്യന്തരമന്ത്രി രമേശ് ചെന്നിത്തല. ഈ കേസില്‍ സര്‍ക്കാരിന് ഒന്നും ഒളിക്കാനില്ല. സര്‍ക്കാര്‍ ശക്തമായ നിലപാട് സ്വീകരിച്ചിട്ടുള്ളതാണ്. സംഭവം ഉണ്ടായ രാത്രി ടിജെ വിനോദ് എംഎല്‍എയാണ് ഫോണില്‍ വിളിച്ച് ആദ്യം വിവരം പറയുന്നത്. അതറിഞ്ഞ ഉടന്‍ തന്നെ വിവരം തിരക്കിയപ്പോള്‍ കുറ്റകരമായ നരഹത്യ എന്ന വകുപ്പ് ചേര്‍ത്തിട്ടില്ല എന്നു മനസ്സിലായി. മന്ത്രി രമേശ് ചെന്നിത്തല നിയമസഭയില്‍ പറഞ്ഞു.
അപ്പോള്‍ തന്നെ ഇത് ഗൗരവകരമായ കാര്യമാണ്, പൊലീസിന്റെ ഭാഗത്ത് വീഴ്ചയുണ്ടായിയെന്ന് ഡിജിപിയെ വിളിച്ച് പറഞ്ഞു. പൊലീസിന്റെ ഭാഗത്ത് വീഴ്ചയുണ്ടായാല്‍ അത് അംഗീകരിക്കുന്നതില്‍ തനിക്ക് ഒരു മടിയുമില്ല. പത്തുകൊല്ലം ആഭ്യന്തര വകുപ്പ് ഭരിച്ച പിണറായി വിജയന്‍ ഒരിക്കല്‍ പോലും പൊലീസിന്റെ വീഴ്ച അംഗീകരിച്ചിട്ടില്ലെന്നും ചെന്നിത്തല ചൂണ്ടിക്കാട്ടി. എന്നാല്‍ ഐആം ഓപ്പണ്‍, തെറ്റു ചെയ്താല്‍ തെറ്റു ചെയ്‌തെന്ന് പറയും. ഒരു മടിയുമില്ല. രമേശ് ചെന്നിത്തല വ്യക്തമാക്കി.
രാത്രി രണ്ടര മണിയ്ക്ക് പാവപ്പെട്ട ഒരു മനുഷ്യനെ ബെന്‍സ് കാറില്‍ പോയ വ്യക്തി ഇടിച്ചു കൊല്ലുകയാണ്. ആ പാവപ്പെട്ട മനുഷ്യന്‍ അരിയും സാധനങ്ങളും വീട്ടിലേക്ക് കൊണ്ടുപോകുകയായിരുന്നു. അയാളെ ഇടിച്ചുകൊന്നിട്ട്, പൊലീസ് വന്ന് ജാമ്യം ലഭിക്കുന്ന വകുപ്പുകള്‍ ഇട്ടത് എന്തടിസ്ഥാനത്തിലാണെന്ന് ഡിജിപിയോട് ചോദിച്ചു. അത് തന്റെ ഉത്തരവാദിത്തമാണ്. പൊലീസ് തെറ്റുചെയ്താല്‍ അത് കണ്ണടച്ച് ന്യായീകരിക്കേണ്ട ഒരു ബാധ്യതയും ഈ സര്‍ക്കാരിനില്ല. ജഡ്ജിയുടെ മകനല്ല, ആരുടെ മകനായാലും എന്താണ്?. നിയമം എല്ലാവര്‍ക്കും ഒരുപോലെയാണെന്ന് ചെന്നിത്തല പറഞ്ഞു.
ഈ പാവപ്പെട്ട മനുഷ്യന്‍ ജോലി ചെയ്ത് സാധനങ്ങള്‍ കൊണ്ടുചെന്നിട്ട് വേണം ആ വീട്ടില്‍ ഭക്ഷണം കഴിക്കാന്‍. ഈ സംഭവത്തില്‍ പൊലീസ് ഉദ്യോഗസ്ഥര്‍ ചെയ്തത് തെറ്റാണ്. ഇന്നലെ രാത്രി തന്നെ എഡിജിപി പി വിജയനോട് ഇന്നുതന്നെ സന്ദര്‍ശിക്കണമെന്ന് നിര്‍ദേശിച്ചിട്ടുണ്ട്. മരിച്ചയാളുടെ വീട്ടുകാരുമായി സംസാരിച്ചു. മൊബൈല്‍ ഫോണ്‍ പിടിച്ചുവാങ്ങി ഡിലീറ്റ് ചെയ്തയാള്‍ മാത്രമല്ല, പ്രസക്തമായ വകുപ്പുകള്‍ ചേര്‍ത്ത് എഫ്‌ഐആര്‍ ഇടാത്ത പൊലീസ് ഉദ്യോഗസ്ഥരെ കണ്ടെത്തി നടപടിയുണ്ടാകണമെന്ന് നിര്‍ദേശിച്ചിട്ടുണ്ട്.
പ്രതിയുടെ ജാമ്യം റദ്ദാക്കണമെന്ന് കുടുംബം ആവശ്യപ്പെട്ടിട്ടുണ്ട്. ജുവനൈല്‍ മജിസ്‌ട്രേറ്റ് ഒരു കാരണവശാലും ജാമ്യം നല്‍കരുതായിരുന്നു എന്നുതന്നെയാണ് തന്റെ അഭിപ്രായം. ഒരു പാവപ്പെട്ട മനുഷ്യനെ ഇടിച്ചു കൊന്നിട്ട്, മജിസ്‌ട്രേറ്റിന് മുമ്പില്‍ ഹാജരാക്കിയപ്പോള്‍ പിറ്റേദിവസം കൊണ്ടു വരാനാണ് പറഞ്ഞത്. പിറ്റേദിവസം കൂടുതല്‍ വകുപ്പ് ഇട്ടശേഷവും പ്രതിക്ക് ജാമ്യം കൊടുത്തു. ഇതെന്താണ് ഈ രാജ്യത്ത് നടക്കുന്നത്?. പ്രതിയുടെ ജാമ്യം റദ്ദാക്കാന്‍ മുകളിലെ കോടതിയില്‍ അപ്പീല്‍ നല്‍കിയിരിക്കുകയാണെന്ന് രമേശ് ചെന്നിത്തല പറഞ്ഞു.
പ്രതിയുടെ പിതാവായ ജഡ്ജിയുടെ പേരില്‍ നടപടി എടുക്കണമെന്നാണ് കുടുംബം ആവശ്യപ്പെട്ട ഒരു ഡിമാന്‍ഡ്. എന്നാല്‍ ജഡ്ജിയുടെ പേരില്‍ നടപടിയെടുക്കാന്‍ സര്‍ക്കാരിന് സാധ്യമല്ല. വാഹനം ഓടിച്ചയാള്‍ മൈനറാണ്. അതിന്റെ ഉടമയെന്നു പറയുന്നത് ജഡ്ജിയാണ്. ഉടമയുടെ പേരില്‍ കേസെടുക്കാം. അതനുസരിച്ച് ജഡ്ജിയുടെ പേരില്‍ കേസെടുത്തു. ആ വിവരം ഹൈക്കോടതി രജിസ്ട്രാറെ രേഖാമൂലം അറിയിച്ചിട്ടുണ്ട്. ആ ജില്ലയുടെ ചുമതലയുള്ള ഹൈക്കോടതി ജഡ്ജി അന്വേഷിച്ച് നടപടി സ്വീകരിക്കേണ്ടത് ഹൈക്കോടതിയുടെ ഉത്തരവാദിത്തമാണ്. അത് അവര്‍ ചെയ്യുമെന്നാണ് പ്രതീക്ഷിക്കുന്നതെന്നും മന്ത്രി രമേശ് ചെന്നിത്തല പറഞ്ഞു.
അപകടത്തില്‍ മരിച്ചയാളുടെ ശരീരം ബന്ധുക്കള്‍ക്ക് വിട്ടുകിട്ടുന്നതിന് മുമ്പുതന്നെ പ്രതിക്ക് ജാമ്യം ലഭിച്ച നടപടിയെ ശക്തമായി അപലപിക്കുകയാണ്. ഈ കാര്യത്തില്‍ സര്‍ക്കാര്‍ ശക്തമായ നടപടിയെടുക്കും. ഒരു കുറ്റവാളിയും രക്ഷപ്പെടാന്‍ അനുവദിക്കില്ലെന്നും മന്ത്രി രമേശ് ചെന്നിത്തല വ്യക്തമാക്കി. ഈ വിഷയം സഭ നിര്‍ത്തിവെച്ച് ചര്‍ച്ച ചെയ്യേണ്ടതാണെന്ന് സിപിഎം അംഗം എ സി മൊയ്തീന്‍ പറഞ്ഞു. പൊലീസ് സ്റ്റേഷനില്‍ രണ്ടു നീതിയാണ് നടക്കുന്നത്. ആഭ്യന്തരമന്ത്രി പറഞ്ഞതില്‍ നിന്നും ഇതു വ്യക്തമാണെന്നും എസി മൊയ്തീന്‍ ആരോപിച്ചു.
കൊല്ലം കുളത്തൂപ്പുഴയില്‍ വാഹനാപകടത്തില്‍ 17 കാരൻ മരിച്ചു. കല്ലുവെട്ടാങ്കുഴി ഹയർസെക്കൻഡറി സ്കൂള്‍ വിദ്യാർത്ഥി ആകാശ് ആണ് മരിച്ചത്.
ഇന്നലെ രാത്രിയായിരുന്നു അപകടം ഉണ്ടായത്. ബൈക്ക് നിയന്ത്രണം വിട്ട് അപകടത്തില്‍പ്പെടുകയായിരുന്നു. ഗുരുതരമായി പരിക്കേറ്റ ആകാശിനെ തിരുവനന്തപുരം മെഡിക്കല്‍ കോളേജിലേക്ക് കൊണ്ടുപോകുന്നതിനിടെയാണ് മരിച്ചത്. ആകാശ് ഓടിച്ച ബൈക്ക് അപകടത്തില്‍പ്പെടുകയായിരുന്നു. മൃതദേഹം ആശുപത്രിയില്‍ സൂക്ഷിച്ചിരിക്കുകയാണ്. പോസ്റ്റ്മോർട്ടത്തിന് ശേഷം കുടുംബത്തിന് വിട്ടുനല്‍കും.
കൊച്ചി: നെടുമ്പാശേരി മിനി കൂപ്പര്‍ അപകടത്തില്‍ പ്രതികളായ സുഹൈല്‍ സജീവിന്റെയും കൂട്ടുപ്രതികളുടേയും ജാമ്യാപേക്ഷയില്‍ കോടതി നാളെ വിധി പറയും. എറണാകുളം ജില്ലാ കോടതിയാണ് വിധി പ്രസ്താവിക്കുക. പ്രതികളുടെ റിമാന്‍ഡ് കാലാവധി 14 ദിവസം പിന്നിട്ട സാഹചര്യത്തിലാണ് ജാമ്യാപേക്ഷ നല്‍കിയിരിക്കുന്നത്. സാക്ഷി മൊഴി ഇനിയും രേഖപ്പെടുത്താനുള്ളതിനാല്‍ പ്രതികള്‍ക്ക് ജാമ്യം നല്‍കരുതെന്നാണ് പ്രോസിക്യൂഷന്‍ ആവശ്യപ്പെട്ടിട്ടുള്ളത്.
അതേസമയം, മുഖ്യപ്രതിയായ 19 കാരന്‍ സുഹൈല്‍ സജീവിനെ വെട്ടിലാക്കി, കേസിലെ മൂന്നാം പ്രതി ജോയലിന്റെ ശബ്ദ സന്ദേശം പൊലീസിന് ലഭിച്ചു. ഇത് കോടതിയില്‍ സമര്‍പ്പിച്ചിട്ടുണ്ട്. അപകടം നടന്നശേഷം രാവിലെ 9.25 ന് ജോയല്‍ സുഹൃത്തിന് അയച്ച ശബ്ദസന്ദേശമാണ് പുറത്തു വന്നത്. മദ്യപിച്ച് വാഹനം ഓടിച്ചത് വ്യക്തമാക്കുന്നതാണ് ശബ്ദസന്ദേശത്തിലെ ഉള്ളടക്കം.
‘ബാറില്‍ പോയി മദ്യപിച്ചു. നേരത്തെ മദ്യപിച്ചതിന് പുറത്താണ് കഴിച്ചത്. ഞാനും അടിച്ചു ഒരു ബിയര്‍. തിരിച്ചുവരുന്ന വഴി ഭയങ്കര സ്പീഡിനാണ് വണ്ടി ഓടിച്ചത്. സ്‌കൂട്ടറില്‍ ഇടിച്ചു, മൂന്നുപേരും തെറിച്ചുവീണു. നിനവ് ആണ് എന്നോടും അമീനോടും വിട്ടോളാന്‍ പറഞ്ഞത്. മൂന്നുപേരും സ്പോട്ടില്‍ തീര്‍ന്നു. ഓ.. ആ വിറയല്‍ മാറിയിട്ടില്ല. ആ സുഹൈല്‍ പറയുകയാണ് ബാപ്പ നോക്കിക്കോളുമെന്ന്. നാട്ടുകാര്‍ അതു കേട്ടിട്ട് ഇടി കൊടുത്തു. നിനവിനും കിട്ടി ഇടി’ എന്നാണ് ജോയല്‍ ശബ്ദസന്ദേശത്തില്‍ പറയുന്നത്.
Recent Comments